ZIRLAI 06
Engtin Nge Nunna A Lo Inṭan?
“Nunna tuikhur chu [Pathian] hnênah a awm.” (Sâm 36:9) Chu chu i ring em? Mi ṭhenkhat chuan nun hian siamtu a nei lo va, tihpalh thila lo awm niin an ngai a ni. Chu chu a dik a nih chuan, tihpalh thil avânga lo awm mai kan ni ang. Mahse, nunna hi Pathian Jehova siam a nih chuan, thiltum a nei dâwn lâwm ni?a Bible-a nunna a rawn inṭan dân chanchin leh chu chanchin a rin tlâk chhan ngaihtuah ang che.
1. Engtin nge lei leh vân hi a lo awm ṭan?
Bible chuan: “A tîrin Pathianin lei leh vân a siam a,” a ti a. (Genesis 1:1) Scientist a tam zâwkte chuan lei leh vân hian awm ṭan hun a nei tih an pawm a. Engtin nge Pathianin a siam? Ani chuan a “chakna”—a thlarau thianghlim—hmangin galaxy te, arsi te, leh planet te pawh tiamin, lei leh vâna thil awm zawng zawngte a siam a ni.—Genesis 1:2.
2. Engvângin nge Pathianin leilung hi a siam?
Jehova chuan “[leilung hi] engmah lovah a siam lo va, mihring awm nân a din zâwk a ni.” (Isaia 45:18) Ani chuan kan chênna leilung hi nuam tak leh mihringte chatuana awmna tûrin a siam a. (Isaia 40:28; 42:5 chhiar rawh.) Science chuan leilung hi planet dangte lakah a danglam bîk tih a târ lang a. Mihringte nunna chhawmdâwl theitu planet awmchhun nia hriat a ni bawk.
3. Mihringte hi nungchate lakah engin nge tidanglam?
Jehova chuan leilung a siam zawh hnuah, chuta awm tûr nunna nei thilte a siam a. A hmasain leilung hi thlai leh nungchatein a tikhat a. Tichuan, “Pathianin ama anpuiin mihring a siam” a ni. (Genesis 1:27 chhiar rawh.) Engin nge mihringte chu tidanglam bîk? Pathian anpuia siam kan nih avângin hmangaihna leh rorêl dikna ang chî a miziate kan lantîr thei a. Ṭawng hrang hrang zir theihna te, thil mawi ngaihhlut theihna te, leh rimawi ngainat theihnate neiin min siam a. Chu bâkah, nungchate nêna inang lo takin min Siamtu kan hmangaih theiin, chibai kan bûk thei bawk a ni.
ZIR BELHIN HMUH BELH RAWH
Nunna hi siam a ni tih leh Bible-a thil siam chanchinte a rin tlâk chhan finfiahnate chu ngaihtuah rawh. Pathian chungchâng min zirtîrtu mihring miziate chu zir rawh.
4. Nunna hi siam a ni
Mihringte’n thil siamte entawna thil an siam chhuah hian chawimawina an dawng ṭhîn a. A nih leh, an entawn thilte siamtu chawimawina dawngtu tûr chu tu nge ni? VIDEO chu chhuah la, a hnuaia zawhna hi sawiho vang che u.
Mihringte chuan thil siamte entawnin engte nge an siam chhuah?
In tin hian duangtu leh dintu a nei a. Mahse, thil siam kan hmuhte duangtu leh dintu chu tu nge ni? Hebrai 3:4 chhiarin, hêng zawhnate hi sawiho vang che u:
Eng thil siamin nge i rilru khawih?
Lei leh vân leh, a chhûnga thil engkim hi siam a ni tih rin chu a inâwm em? Engvângin nge?
I lo hre tawh em?
Hemi chungchânga thuziakte leh video-te chu jw.org-a “Siam A Ni Em?” leh “Nunna Lo Inṭan Dân Chungchânga Ngaih Dânte” tih thuziak chhuak ṭhînahte chuan i hmu thei ang.
“In tin hian dintu tuemaw a nei zêl ang hian, thil zawng zawng dintu chu Pathian a ni”
5. Bible-a thil siam chanchin chu a rin tlâk
Bible chuan Genesis bung 1-ah leilung leh chuta nun a lo awm ṭan dân chungchâng chu a târ lang a. Chu chu i ring nge ni a, thawnthu phuahchawp maiah i ngai zâwk? VIDEO chu chhuah la, a hnuai zawhnate hi sawiho vang che u.
Bible-in lei leh a chhûnga nunna neite hi dârkâr 24 nei ni ruk chhûnga siam niin a zirtîr em?
Bible-a thil siam chanchin hi a dikin, a rin tlâk i ti em? Engvângin nge?
Genesis 1:1 chhiarin, he zawhna hi sawiho vang che u:
Scientist-te chuan lei leh vân hian awm ṭan hun a nei an ti a. An thu tâwp siam leh tûna i chhiar tâk Bible châng chu eng anga khaikhin theih nge ni?
Mi ṭhenkhat chuan Pathianin chanchhâwnna hmangin nunna a siam an ring a. Genesis 1:21, 25, 27 chhiarin, hêng zawhnate hi sawiho vang che u:
Pathianin nunna nei thil ho tê pakhat siamin, chu chu sanghaah te, nungchaah te, leh a tâwpah mihringahte a chanchhâwntîr niin Bible-in a zirtîr em? Nge ni a, anmahni “chi” awm dân tûr ang ṭheuhvin a siam zâwk?b
6. Mihringte hi Pathian thil siam danglam bîk tak kan ni
Jehova chuan keini mihringte hi nungchate nêna inang lo takin min siam a ni. Genesis 1:26 chhiarin, he zawhna hi sawiho vang che u:
Pathian anpuia siam kan nih avângin, hmangaihna leh khawngaihna kan lantîr theihna chuan Pathian mizia chungchângah eng nge min hriattîr?
MI ṬHENKHAT SAWI DAN: “Thil siam chungchânga Bible sawi hi thawnthu phuahchawp mai a ni.”
Nang, engtin nge i ngaih? Engvângin nge?
KHAIKHAWMNA
Jehova chuan lei leh vân leh nunna nei zawng zawngte chu a siam.
Ennawnna
Lei leh vân lo awm ṭan dân chungchângah Bible-in eng nge min zirtîr?
Pathianin nunna nei thil chi hrang hrangte chu thil ho tê pakhat aṭangin a chanchhâwntîr nge ni a, a vaiin a siam zâwk?
Mihringte danglam bîkna chu eng nge?
HRIAT BELH NAN
Siamtu a awm tih târ langtu thil siamte chungchâng chhiar rawh.
“Leilunga Thil Awmte Nih Phungin Eng Nge Min Zirtîr?” (Awake!, September 2006)
Pain a fapa naupang hnêna Bible-a thil siamte chungchâng a hrilhfiah dân chu en rawh.
Chanchhâwnna leh Bible a inrem nge rem lo ngaihtuah rawh.
“Pathianin Thil Nung Chi Hrang Hrangte Siam Tûrin Chanchhâwnna A Hmang Em?” (Website thuziak)
Ruh ro hmuh chhuahte leh science lama tihchhinnate chuan nunna hi siam angin nge a târ lan a, amaha lo awm angin a târ lang zâwk? A chhânna bih chiang rawh.
b Bible-a “chi” tih ṭawngkam chuan a huap zau hle a, nunna nei thil hokhat sawi nâna hman a ni.