Pathian hi tu siam nge?

Pa pakhat chu a fapa kum sarih mi nêna an inbe lai chu han mitthla teh. Ani chuan, “Hmân lai hian, Pathianin lei leh a chhûnga thil engkim hi a siam a, nî leh thla leh arsite pawh a siam bawk,” tiin a hrilh a. Naupang chuan chu chu rei lo te chhûng a ngaihtuah a, tichuan, “Ka pa, Pathian hi tu siam nge?” tiin a zâwt a ni.

A pa chuan, “Pathian hi tuma siam a ni lo. Ani chu eng lai pawhin a awm reng,” tiin a chhâng a. Tûnah rih chuan chu thusawi tluangtlam tak chuan naupang chu a tilungawi tâwk a ni. Mahse, a lo ṭhan len deuh deuh chuan, chu zawhna chu a la ngaihven zui reng a. Ani chuan awm ṭanna nei lo tuemaw a awm theih dân hriatthiam chu harsa a ti hle a. Lei leh vân pawhin awm ṭanna a nei si a. ‘Pathian chu khawi aṭanga lo awm nge ni?’ tiin a ngaihtuah a ni.

Engtin nge Bible-in a chhân? A nihna takah chuan, entîrnaa pa ber chhânna ang deuh a ni. Mosia chuan: “Lalpa, . . . tlângte pian hmâa, leilung leh khawvêl i din hmâ pawh khân, chatuan ata chatuan thleng pawhin nang chu Pathian i ni,” tiin a ziak a. (Sâm 90:1, 2) Chutiang bawkin, zâwlnei Isaia chuan: “In rilruin in hre ngai lo vem ni? In bengin in hre ngai lo vem ni? Kumkhaw Pathian, LALPA, kâwlkil Siamtu chu,” tiin a sawi bawk. (Isaia 40:28) Chutiang bawkin, Juda lehkha thawn chuan Pathian chu “chatuan thlengin” a awm tih a sawi a ni.—Juda 25.

Hêng Bible chângte hian tirhkoh Paula sawi angin Pathian chu “Lalber chatuana awm” a ni tih min hriattîr a. (1 Timothea 1:17) Chu mi awmzia chu, hun eng anga rei tawh pawh thlîr lêt mah ila, Pathian chu englai pawhin a awm reng a. Hma lam hunah pawh a awm reng dâwn a ni. (Thu Puan 1:8) Chuvângin, chantuana a awm rengna chu Engkimtithei a nihna bulpui ber a ni.

Engvângin nge he ngaih dân hi hriat thiam harsa kan tih? Kan dam chhûng hunin chin tâwk a neihna chuan kan hun thlîr dân chu Jehova thlîr dân lakah a tih dang lam êm vâng a ni. Pathian chu chatuana awm a nih avângin, a tân chuan kum sâng khat pawh ni khat ang a ni a. (2 Petera 3:8) Entîr nân: A puitlin hnua ni 50 lek dam khau chuan, kan dam chhûng kum 70 emaw, 80 emaw chu a hre thiam thei ang em? Hre thiam lo vang! Mahse, Bible chuan min Siamtu Ropui nêna khaikhin chuan khaute ang kan ni tih a sawi a. Kan thil chhût theihna pawh a lakah chuan a bei tham hle a ni. (Isaia 40:22; 55:8, 9) Chuvângin, Jehova nihphung mihringte’n an hre kim thei lo hi a mak lo a ni.

Chatuan Pathian nihphung chu hriat thiam harsa ti mah ila, chu chuan awmzia a nei tih kan hmu thei a. Tuemawin Pathian hi siam ta se, ani chu Siamtu a ni ang. Mahse, Bible-in a hrilhfiah angin Jehova chu thil ‘engkim siamtu’ a ni. (Thu Puan 4:10, 11) Chu bâkah, atîrah chuan lei leh vân hi a awm lo tih kan hria a ni. (Genesis 1:1, 2) Khawi aṭangin nge a lo awm? Lei leh vân Siamtu chu a awm hmasak phawt a ngai a ni. Ani chu finna nei dang, a Fapa mal neih chhun leh vântirhkohte awm hmain a awm tawh bawk. (Joba 38:4, 7; Kolossa 1:15) Chutiang a nih chuan, ani chu amah chauhvin a awm hmasa tih a chiang hle. Siam a ni lo va; amah siam theitu thil engmah a awm hek lo.

Keini mihringte leh lei leh vân lo awmna chuan chatuan Pathian a awm tih a nemnghet a. Lei leh vân zau tak her kualtîrtu leh chu mi thunun tûra dânte siamtu chu englai pawhin a awm ngei ang. Ani chuan thil dang zawng zawng hnênah nunna thaw a pe thei dâwn a ni.—Joba 33:4. (w14-E 08/01)