Hmasâwn Zêl Tûrin ‘I Kê Atân Kawng Tirualrem Rawh’

B.C.E. 537-a Pathian mite Babulon aṭanga an chhuah khân, Jerusalem an panna kawngah Jehova chuan a ngaihsak hle a ni. Ani chuan: “Mite tân kawng buatsaih ula; chhûng pâwng ula, lamlian chu chhûng pâwng rawh u; lungte chu chhar fai ula,” tiin a hrilh a. (Is. 62:10) Juda ṭhenkhatte’n chutianga an tih vêl dân tûr chu han mitthla teh. Kawng sial tûra lo kal hmasate chuan a khuar laite an chhûn khah leh a pâwng laite an tihrual a ngai mai thei a. Chutianga an tihna chuan an hnua kal an unaute haw kawng chu a tinuam sawt ngei ang.

Chu chu thlarau lam thiltuma min hruai thlengtu kawng angin kan tehkhin thei a. Jehova chuan a chhiahhlawh zawng zawngte chu chu kawnga awm thil pawimawh lote thian fai tûrin a duh a ni. A Thu chuan: “I kê atân kawng tirualrem la, i kawng zawng zawng tihngheh ni rawh se,” tiin min fuih a. (Thuf. 4:26) Naupang emaw, naupang vak tawh lo emaw pawh ni la, chu Pathian fuihna thua finna awm chu i hmu thei a ni.

THU TLUKNA ṬHA NEN KAWNG BUATSAIH RAWH

Mite’n tleirâwl pakhat chungchângah: ‘Hlawhtlin theihna hun remchâng tam tak a nei’ ti emaw, ‘Hma lam hun êng tak a nei’ ti emawa an sawi chu i hre tawh mai thei a. Ṭhalaite chuan, hrisêlna ṭha, rilru chak tak, leh hlawhtlin duhna an nei tlângpui ṭhîn. Bible chuan: “Tlangvâlte ropuina chu an chakna a ni,” tiin chiang takin a sawi a ni. (Thuf. 20:29) Jehova rawngbâwl nâna a thiamna leh a chakna hmangtu ṭhalai chuan thlarau lam thiltumte a hlen theiin, hlimna dik tak a nei thei a ni.

Mahse, kan ṭhalaite theihna neihte chu khawvêl mite’n an ngaihlu hle tih kan hria a. Thuhretu ṭhalai pakhatin school-a a tih ṭhat hle chuan zirtîrtu, a nih loh leh a school kalpui chuan he khawvêla hlawhtlinna neih theih nâna zirna sâng ûm tûrin an nawr mai thei a. A nih loh leh, tleirâwl infiam mi tak chuan infiamna lama eizawng tûra fuihna a dawng thei bawk a ni. Chutiang dinhmun chu i tawng tawh em, nge chutianga nawrna tawng tuemaw chu hriat i nei em? Kristian chu fingthiam taka duh thlang tûrin engin nge ṭanpui ang?

Bible zirnate chuan mi chu nun kawng ṭha ber zawh tûra inbuatsaih tûrin a ṭanpui thei a ni. “I vânglai hian i siamtu hre reng rawh,” tiin Thuhriltu 12:1 chuan a sawi a. Engtin nge nangmah emaw, i hmêlhriat tleirâwl emaw chuan a ṭha thei ang bera ‘in Siamtu Ropui chu in hriat reng’ theih?

Africa khawthlang lama awm Eric-aa thiltawn hi han ngaihtuah teh. Ani chu football khelh ngaina tak a ni a. Kum 15 mi a nih chuan ram aiawha khêl tûra thlan a ni a. Europe-a infiamna lama training dawn a beisei thuai thei tihna a ni a, chu chuan eizawnna tling a neihtîr thei a ni. Mahse, chutiang a nih chuan, engtin nge ‘Siamtu Ropui hre reng’ tûra fuihna chu a zawm theih ang? He thu aṭang hian nang leh i ṭhian ṭhalai ṭhenkhatte tân zir tûr eng nge awm?

Eric-a chuan school a kal laiin Jehova Thuhretute bulah Bible a zir ṭan a. Amah Siamtu chuan mihringte harsatna zawng zawng chu chatuan atân a nuaibo vek ang tih a hre ta a ni. A hun leh a chakna Pathian duhzâwng tih nâna hman a pawimawhzia a hmu thiam ta bawk a. Chu a hriat thiamna avâng chuan, Eric-a chuan eizawn nâna infiamna hman tuma a beihna chu a bânsan ta a ni. Baptisma changin thlarau lam thilah a in hmang ta zâwk a. A hnuah chuan kohhran rawngbâwltu niin, Nupui Nei Lo Unaupate Tâna Bible School kal tûra sâwm a ni ta a ni.

Eric-a chuan infiamna lam chu ti chho zêl ta se chuan a hming thangin, a hausa ngei ang. Mahse, ani chuan Bible thu: “Mi hausa chuan a sum chu a kulhpui a ni a, a suangtuah dânah chuan kulh sâng tak a ni,” tih dikzia chu a hria a ni. (Thuf. 18:11) Ni e, miin hausakna aṭanga a neih himna anga ngaih chu inbumna mai a ni. Chu bâkah, chûng hausakna ûmtute chu ‘anmahni leh anmahni lungngaihna tam takin an inchhun tlang chuk’ ṭhîn a ni.—1 Tim. 6:9, 10.

Ṭhalai tam takin hunbi kima rawngbâwlin hlimna leh himna tluantling an nei chu a lâwmawm hle a ni. Eric-a chuan: “Hunbi kima Jehova rawngbâwlna ‘team’ lian takah ka tel a. Chu chu ka tel theihna team ṭha ber a ni a, hlimna leh hlawhtlinna dik tak neih theih dân kawng awmchhun min hmuhtîr avângin Pathian Jehova hnênah lâwmthu ka sawi a ni,” tiin a sawi.

Engtin nge i ngaih ve? Khawvêl thiltumte ûm ai chuan pioneer rawngbâwlnaa telin engvângin nge “i kawng” chu Jehova hmaa i tihngheh lo vang?—“University Aṭanga Neih Theih Loh Hlâwkna” tih bâwm chu en rawh.

I KAWNG DALTU CHU PAIH BOVIN

United States branch office an tlawh laiin, Nupa tuak khat chuan chuta Jehova rawngbâwltute hlimzia chu an hmu a. A nupui chuan: “Kan nî tin thiltih ṭhin chu kan lo duhtâwk mai a,” tiin a hnuah a ziak a ni. An nupa chuan rawngbâwlna chanvo hlu zâwk atâna an tha leh zung pe tûrin thutlûkna an siam ta a ni.

Ṭum khat phei chu, an nupaa insiam danglam an duh dân chu a hautak hle niin a lang a. Ni khat chu, chu mi nîa ni châng an chhiar chu ngun takin an ngaihtuah a. Chu chu Johana 8:31-a Isua thusawi: “Ka thua in awm reng chuan ka zirtîrte in ni tak tak ang,” tih hi a ni. Chu thu chu rilrua vawng rengin: “Nun tihsamkhai nâna kan thiltih apiang chu inpêkna manhla tak a ni,” tiin an chhût ta a. An in lian tak chu an hralh a, an phurrit dangte dah kiangin ṭanpui a ngaihna kohhranah an in sâwn ta a ni. Pioneer an thawk mêk a, Kingdom Hall saknaah leh district inkhâwmpuiah an ṭanpui bawk a ni. Engtin nge an ngaih? “Jehova inawpna pâwlin ti tûra min fuih ang chiaha samkhai taka nunna aṭanga hlimna kan neih chu mak kan ti hle a ni.”

THLARAU LAM HMASAWNNA KAWNG CHU ZAWH ZEL RAWH

Solomona chuan: “I mitin hma lam en la, ngîl takin hma lam thlîr rawh,” tiin a ziak a. (Thuf. 4:25) Motor khalhtuin a kalna tûr kawng a en tlat angin, thlarau lam thiltum kan siamte leh chu mi tihhlawhtlin kan tumna tibuai thei thilte chu kan pumpelh tûr a ni.

Thlarau lam thiltum i siam theih leh i tihhlawhtlin theihte chu eng nge? Hunbi kima rawngbâwlnaa thawh chu thil ṭha ber a ni a. Mi dangte chuan thu hrilhna bial zau tak hrût chhuak tûra thu hriltu thiltawn ngah takte ṭanpuina mamawhna ṭhenawm kohhranah rawng an bâwl mai thei. A nih loh leh, kohhran pakhatah chuan thuchhuahtu ṭha tam tak an awm a, upate leh kohhranho rawngbâwltu mamaw tâwk erawh an awm lo mai thei thung. Ṭanpui theihna i nei em? I ṭanpui theih dâwn leh dâwn loh hre tûrin engvângin nge bialkantu chu i biak loh vang? Hmun hla taka rawngbâwl i duh chuan, chutiang hmuna awm ṭanpuina mamawh kohhrante chungchâng chu i zâwt thei a ni.b

Isaia 62:10 thu kha han ngaihtuah lêt leh ta ila. Pathian mite an rama an kîr leh theih nân, Juda mi ṭhenkhat chu kawng tih rualremnaah leh thenfainaah an thawkrim hle ngei ang. Rawngbâwlna thianghlima i thiltumte tihlawhtling tûra theih tâwp i chhuah chuan, tâwpsan mai suh ang che. Pathian ṭanpuinain chûng thil tumte chu nang pawhin i tihlawhtling thei a ni. I hmâa dâltu awmte chu paih bo i tum laiin Jehova hnênah finna nei tûrin dîl zawm zêl ang che. A hun taka ‘i kê atân kawng tirual’ tûra a ṭanpui dân che chu i hmu ngei ang.—Thuf. 4:26.

a Hming thlâk a ni.

b Organized to Do Jehovah’s Will tih lehkhabu phêk 111-112-na chu en rawh.

University Aṭanga Neih Theih Loh Hlâwkna

FLAVIA-I chu Jehova Thuhretu a pi chuan a naupan laiin Bible thu a hrilh ṭhîn a. Mahse, a pa chu zirtîrtu a nih avângin leilung leh a chhûnga thil nih dân phungte zir duhna neihtîr leh zirna sânga zir chhuahtîr a tum a ni. Mi dangte chuan, “In hun laia chhuante hian leilung chhe tûr hi an vênghim thei a ni,” tiin an hrilh bawk a. A pa ṭanpuinain university hmingthang takah a kal a, chutah chuan tuialhthei thianghlim tihchhuah dân zawn chhuah hna a thawk ta a ni.

Flavia-i chuan zirlai tam takte’n ‘leilung vênhim’ duhna tak tak an nei lo tih a hre nghâl a. University-a program ṭhenkhat chu sumdâwng company-te’n sum leh paia an ṭanpuinaah an innghah avângin company-te chu duhsak mai an duh thei a ni. Chu chuan Flavia-i chu a tibuai hle a. Jehova Thuhretute’n an va tlawh chuan Pathian chanchin leh hma lam hun chungchâng Bible sawi chu a ngaihsak thar leh ta a ni.

Flavia-i chuan Bible thutak chu pawmin baptisma a chang ta a. Mahse, a thil zir belh avâng chuan chanchin ṭha hrilh nân hun a nei thei meuh lo. Ni khat chu bialkantuin: “Tupawh thil ṭha tih tûr hriaa ti si lo chu a tân sual a ni,” tih Jakoba 4:17 thu a sawi chu a ngaithla a. Chu chuan a dinhmun a ngaihtuahtîr ta a ni. Heti hian a sawi a ni: “Jehova malsâwmna ka duh rualin, science lama ka hnaah pawh hlawhtlin ka duh bawk a. Duhthlanna ka siam a ngai a ni,” tiin.

Flavia-i chuan university-a a zirna chu bânsan tûrin thutlûkna a siam ta a. A thutlûkna siamah chuan a inchhîr em? Heti hian a sawi a ni:

“Jehova rawngbâwlnaah chuan university aṭanga neih theih loh hlâwkna ka chhar chhuak a ni. Jehova chu ka tân a ṭha hle a. Ani chuan ngilnei tûr te, hmangaihna lantîr tûr te, thlarau lama mi dangte ṭanpui tûrtein min zirtîr a. Pasal ṭha tak ka nei a, science-in min pêk theih aia ṭha zâwk daih hma lam hun ka nei bawk. Jehova chauhin leilung hi a vênghim thei a ni. Amah chu ka hnuchhawn ngai lo vang,” tiin. A pasal nên New York hmuna Jehova Thuhretute headquarter-ah rawng an bâwl mêk a ni. (w14-E 06/15)