Sapah Nabi Isa?

1. Molaè bilâ Nabi Isa bâdâ?

Nabi Isa cèptaânna Gustè Allah sè partama. Bhidhâ biʼ manossa, Nabi Isa odiʼ è sowarghâ sabellunna neng bhumè. (Yahya 8:23) Nabi Isa ècèptaʼaghi langsung biʼ Allah bânnè èlahirraghi biʼ bâbinèʼ è sowarghâ. Dâddhi, Nabi Isa èsebbhut pottrana Gustè Allah. Nabi Isa jhughân èsebbhut ”Firman” polana sè madhâpaʼ dhâbuna Gustè Allah.​—Yahya 1:14; Bâca Bangsalan 8:22, 23, 30; Kolose 1:15, 16.

2. Arapah Nabi Isa dhâtâng ka bhumè?

Gustè Allah ngotos Nabi Isa ka bhumè kalabân cara èlahirraghi biʼ parabân Yahudi sè anyama Mariyam. Dâddhi, Nabi Isa taʼ andiʼ eppaʼ manossa. (Lukas 1:30-35) Nabi Isa dhâtâng ka bhumè kaangghuy (1) ngajhâri tentang Gustè Allah sè bendhâr (2) aberriʼ conto ngalakonè kasokanna Gustè Allah maskè malarat bân (3) ngorbannaghi odiʼna sè samporna ghâbây ”tebbhusân.”​—Bâca Matiyus 20:28.

3. Arapah manossa bhutoh tebbhusân?

Kaangghuy mabèbassaghi orèng dâri kamatèan, èbhutowaghi tebbhusân sè cocok. (Kalowaran 21:29, 30) Bhâkto nyèptaʼaghi manossa, Gustè Allah taʼ terro manossa dâddhi towa bân matè. Apah bhuktèna? Gustè Allah adhâbu ka Adam jhâʼ sampèʼ ngalakonè ”dhusa” sè ètolès neng Kètab Soccè, polana bisa matè. Dâddhi, mon taʼ ngalakonè dhusa, Adam taʼ kèra matè. (Kadhâddhiyân 2:16, 17; 5:5) Kètab Soccè ngocaʼ, patè ”masok” ka dunnya lèbât Adam, dâddhi kabbhi toronanna Adam ollè sangkolan dhusa bân patè. Mangkana jârèya manossa bhutoh tebbhusân kaangghuy mabèbas dâri kamatèan.​—Bâca Roma 5:12; 6:23.

Sapah sè bisa majâr tebbhusân kaangghuy mabèbas manossa dâri kamatèan? Bhâkto manossa matè, ghun bisa majâr dhusana dhibiʼ. Dâddhi, manossa sè taʼ samporna taʼ bisa nebbhus dhusana orèng laèn.​—Bâca Jabur 49:7-9.

4. Arapah Nabi Isa parlo matè?

Bhidhâ biʼ manossa, polana èlahirraghi kalabân mukjizat dâri Gustè Allah, Nabi Isa samporna. Nabi Isa taʼ toman ngalakonè dhusa, dâddhi taʼ parlo matè kaangghuy dhusana dhibiʼ. Namong Nabi Isa ikhlas matè kaangghuy nebbhus dhusana manossa. Polana tarèsna ka manossa, Gustè Allah ngotos Nabi Isa ka bhumè. Nabi Isa jhughân noddhuaghi tarèsnana ka manossa kalabân èsto ka Gustè Allah bân ngorbannaghi odiʼna kaangghuy manossa.​—Bâca Yahya 3:16; Roma 5:18, 19.

Tèngghu video Arapah Nabi Isa Parlo Sèdhâ?

5. Apah sè èlakonè Nabi Isa satèya?

Bhâkto neng bhumè, Nabi Isa mabârâs orèng sakèʼ, maodiʼ orèng matè, bân nolongè sè sossa. Rèya noddhuaghi apah sè bâkal èlakonè Nabi Isa kaangghuy manossa sè èsto neng bhumè Firdaus. (Matiyus 15:30, 31; Yahya 5:28) Saamponna sèdhâ, Nabi Isa èpaodiʼ polè biʼ Allah Yèhuwa kaangghuy odiʼ neng sowarghâ. (1 Petrus 3:18) Salanjuddhâ, Nabi Isa adântèʼ neng kanganna Gustè Allah sampèʼ èpadâddhi Rato ngobâsanè bhumè. (Ibrani 10:12, 13) Satèya, Nabi Isa la marènta dâddhi Rato è sowarghâ, bân rèd-morèddhâ ngomommaghi kabhâr beccèʼ rèya neng sakobhângnga dunnya.​—Bâca Daniyèl 7:13, 14; Matiyus 24:14.

Sakejjâʼaghi, Nabi Isa bâkal aghunaʼaghi kobâsana kaangghuy maèlang kasossaʼan bân matompes rèng-orèng sè jahat. Kabbhi orèng sè èsto bân parcajâ ka Nabi Isa bâkal odiʼ salanjhângnga è Firdaus sè bâdâ neng bhumè.​—Bâca Jabur 37:9-11.