Apah Kasokanna Gustè Allah kaangghuy Bhumè?

1. Apah tojjhuwân Gustè Allah nyèptaʼaghi bhumè?

Allah Yèhuwa nyèptaʼaghi bhumè kaangghuy kennengngânna manossa. Dâddhi, Adam bân Hawa taʼ ècèptaʼaghi neng sowarghâ. Namong Allah Yèhuwa nyèptaʼaghi kad-malaikad è sowarghâ. (Ayyub 38:4, 7) Allah Yèhuwa nyèptaʼaghi Adam bân Hawa neng Firdaus sè cèʼ lèburrâ sè èsebbhut Taman Eden. (Kadhâddhiyân 2:15-17) Allah Yèhuwa tèrro Adam bân katoronanna odiʼ salanjhângnga è bhumè.​—Bâca Jabur 37:29; 115:16.

Bâkto rowa, ghun Taman Eden sè palèng lèbur. Adam bân Hawa bâkal andiʼâ katoronan bân mosaʼè bhumè. (Kadhâddhiyân 1:28) Dâddhi, bhumè taʼ bâkal èpaancorra, tapè bâkal bâdâ kaangghuy kennengngânna manossa salanjhângnga.​—Bâca Jabur 104:5.

Tèngghu video Apah Tojjhuwân Gustè Allah Nyèptaʼaghi Bhumè?

2. Arapah bhumè satèya bânnè Firdaus?

Polana taʼ èsto, Allah Yèhuwa ngusèr Adam bân Hawa dâri Taman Eden. Dhi-budhina Firdaus èlang bân tadâʼ manossa sè bisa mabâlih polè. Kètab Soccè ngocaʼ, ”Bhumè biʼ Gustè Allah èpassraʼaghi ka orèng dârâkah [jahat].”​—Ayyub 9:24; Bâca Kadhâddhiyân 3:23, 24.

Apah kasokanna Allah Yèhuwa dâʼ-adâʼân kaangghuy manossa burung? Enjâʼ! Allah Yèhuwa Maha Kobâsa, kasokanna taʼ kèra burung. (Yesaya 45:18) Kabâdâân manossa bâkal èpabâliyâ sasuai biʼ kasokanna Gustè Allah dâʼ-adâʼân.​—Bâca Jabur 37:11, 34.

3. Dâʼremmah carana bhumè bisa èpadâddhi Firdaus polè?

Bâkto Nabi Isa èpadâddhi rato biʼ Allah Yèhuwa, Firdaus bâkal èpabâliyâ polè. Nabi Isa bâkal mimpin kad-malaikaddhâ Gustè Allah kaangghuy amosnaaghi kabbhi sè alabân Gustè Allah bâkto perrang Armagedon [kiyamat]. Lajhu, Nabi Isa mamenjara Sètan abiddhâ 1.000 taon. Nabi Isa bâkal ngalindungè rèng-orèng sè èsto sopajâ salamât bân odiʼ salanjhângnga neng bhumè Firdaus.​—Bâca Wahyu 20:1-3; 21:3, 4.

4. Bilâ kasossaʼan èpatadâʼâ?

Bilâ Gustè Allah matadâʼâ kajahaddhân dâri bhumè? Nabi Isa aberriʼ tao ”tandhâ” jhâʼ bâktona la paraʼ. Polana mon kajahaddhân bâdâ terros, ommat manossa bâkal mosna. Rowa noddhuaghi mon satèya kaulâ odiʼ neng rè-arè raʼ-paraʼ ”Kiyamat”.​—Bâca Matiyus 24:3, 7-14, 21, 22.

Kasossaʼan bâkal tadâʼâ polè bâkto Nabi Isa dâddhi rato neng sowarghâ kaangghuy marèntah bhumè 1.000 taon abiddhâ (Yesaya 9:5, 6; 11:9) Nabi Isa maèlang dhusa rèng-orèng sè narèsnaè Allah Yèhuwa. Dâddhi, lèbât Nabi Isa, Allah Yèhuwa jhughân matadâʼâ panyakèʼ, towa, bân patè.​—Bâca Yesaya 25:8; 33:24.

5. Sapah sè bâkal odiʼ è Firdaus?

Rèng-orèng sè naadhi Allah Yèhuwa bâkal odiʼ neng Firdaus. (1 Yahya 2:17) Nabi Isa ngotos rèd-morèddhâ kaangghuy ngajhâri rèng-orèng sè andhâp asor sopajâ atoroʼ ka kasokanna Gustè Allah. Satèya rèya, Allah Yèhuwa makompol bânnyaʼ orèng kaangghuy odiʼ neng bhumè Firdaus. (Zefanya 2:3) Neng kennengngan ibâdâ Saksè-Saksè Yèhuwa, rèng-orèng bisa ajhâr sopajâ dâddhi lakèh bân eppaʼ sè pèlak bân dâddhi binèh jhughân èbhu sè beccèʼ. Naʼ-kanaʼ bân orèng towa ibâdâ reng-bhâreng bân ajhâr carana nerrapaghi pangajhârân dâri Kètab Soccè sopajâ odiʼna lebbhi beccèʼ.​—Bâca Mikha 4:1-4.