Apah Gustè Allah Andi’ Pamarèntahan?

1. Apah Karajaan Gustè Allah rowa?

Karajaan Gustè Allah rowa yâ-arèya pamarèntahanNa Gustè Allah è sowarghâ. Karajaan Gustè Allah bâkal aghântèa kabbhi pamarèntahan laènna bân ngalakonè kasokanna Gustè Allah è sowarghâ bân è bhumè. Tanto rèya kabhâr beccèʼ. Manossa bhutoh pamarèntahan sè beccèʼ, bân sakejjâʼaghi, Karajaan Gustè Allah bâkal ngalakonèna. Èbâbâna Karajaan rèya, rèng-orèng sè odiʼ neng bhumè èparokon.​—Bâca Daniyèl 2:44; Matiyus 6:9, 10; 24:14.

Nabi Isa èpadâddhi rato biʼ Allah Yèhuwa kaangghuy mamarèntah neng KarajaanNa.​—Bâca Wahyu 11:15.

Tèngghu video Apah Karajaan Gustè Allah Rowa?

2. Arapah Nabi Isa Rato sè palèng teppaʼ?

abi Isa Rato sè palèng teppaʼ polana beccèʼ atèna, bân kokoh dâlâm abèla apah sè bendhâr. (Matiyus 11:28-30) Salaèn jârèya, Nabi Isa andiʼ kobâsa kaangghuy nolong rèng-orèng polana dâri sowarghâ Nabi Isa bâkal marènta bhumè. Saampona èpaodiʼ, Nabi Isa ongghâ ka sowarghâ bân adântèʼ neng kanganna Allah Yèhuwa. (Ibrani 10:12, 13) Akhèrra, Allah Yèhuwa aberriʼ kobâsa ka Nabi Isa kaangghuy marènta bhumè.​—Bâca Daniyèl 7:13, 14.

3. Sapah sè bâkal marèntaah neng sowarghâ bhâreng Nabi Isa?

Allah Yèhuwa mèlè sakalompok orèng kaangghuy mamarènta bhâreng Nabi Isa neng sowarghâ. (Daniyèl 7:27) Partama sè èpèlè Allah Yèhuwa yâ-arèya sul-rasul Nabi Isa sè èsto. Sampèʼ satèya, Allah Yèhuwa terros mèlè lakeʼ bân binèʼ sè andiʼ iman kaangghuy marènta neng sowarghâ. Èngaʼ Nabi Isa, orèng sè èpaodiʼ neng sowarghâ andiʼ bhâdhân dâri Gustè Allah [bhâdhân rohani, Terjemahan Dunia Baru].​—Bâca Yahya 14:1-3; 1 Korintus 15:42-44.

Berempa orèng sè ka sowarghâ? Nabi Isa nyebbhut orèng pèlèan rowa ”sakompolan kènèʼ ”. (Lukas 12:32) Rèng-orèng pèlèan sè bâkal marèntah bhumè bhâreng Nabi Isa jumblana 144.000.​—Bâca Wahyu 14:1.

4. Bâdâ kadâddhiyân apah bâkto Nabi Isa mamarènta?

Karajaan Gustè Allah molaè marènta taon 1914.a Sè dâʼ-adâʼân Nabi Isa dâddhi rato, Nabi Isa ngusèr Setan bân kad-malaikad sè jahat ka bhumè. Setan cèʼ peggellâ bân masossa odiʼân manossa. (Wahyu 12:7-10, 12) Sajjhâgghâ rowa, kasossaʼan sè èalamè manossa sajhân berrâʼ. Perrang, kakorangan kakanan, panyakèʼ, bân lèndhu dâddhi ”tandhâ” jhâʼ pamarèntahan Gustè Allah bâkal dhuliyâ ngobâsanè bhumè.​—Bâca Lukas 21:7, 10, 11, 31.

5. Apah sè èlakonè Pamarèntahan Gustè Allah?

Lèbât pangajhârân Kètab Soccè, Pamarèntahan Gustè Allah makompol rèng-orèng sadunnya. Rèng-orèng sè andhâp asor rèya dâddhi rakyaddhâ Nabi Isa. Bâkto pamarèntahan Gustè Allah maancor pamarèntahan manossa bân rèng-orèng sè jahat, rèng-orèng sè andhâp asor rèya èlindungè. Mangkana, kaulâ sadhâjâ kodhu ajhâr bân naadhi Nabi Isa.​—Bâca Wahyu 7:9, 14, 16, 17.

Sèbuh taon abiddhâ, pamarèntahan Gustè Allah bâkal ngalakonè kasokanna kaangghuy manossa. Yâ-arèya ngobâ bhumè dâddhi Firdaus. Akhèrra, Nabi Isa massraʼaghi kakobâsaânna ka Allah Yèhuwa. (1 Korintus 15:24-26) Sapah sè terro Bâʼna berriʼ tao kabhâr tentang pamarèntahan Gustè Allah rèya?​—Bâca Jabur 37:10, 11, 29.