Qe tbʼanel noticia kubʼ ttzʼibʼin Lucas

21 Tej in keʼyin Jesús kyiʼj tkubʼil pwaq,* ok tqʼoʼn twitz kyiʼj xjal qʼinun tej tkux kyqʼoʼn oyaj. 2 Ex til tej tkux tqʼoʼn jun xuʼj* viud ex prow kabʼe tal moneda nya nim tvalor.* 3 Ex tqʼama jlu: «Ax tok kxel nqʼamaʼne kyeye, mas nim ma kux tqʼoʼn xuʼj lu kywitz txqantl maske prow. 4 Porke ma kux kyqʼoʼn xjal lu oyaj tiʼjju in kyaj sobrarin kye. Pero atzunte xuʼj lu maske prow, ma kux tqʼoʼn tkyaqilju at te tuʼn tanqʼin».

5 Yajxitl, e ok ten junjun yolil tiʼj tzeʼn bʼinchaʼn templo kyuʼn tbʼanel abʼj ex kyiʼj oyaj pon kyiʼn xjal twitz Dios. 6 Tuʼntzunju xi tqʼamaʼn Jesús jlu kye: «Kpol jun qʼij jatumel mlay kyaj ten jun abʼj tibʼaj juntl tiʼj tkyaqilju in nok kykeʼyine jaʼlo. Tkyaqil kbʼel xiten». 7 Xi kyqanin te Jesús: «Xnaqʼtzal, ¿jtoj kbʼajel tkyaqil jlu ex alkyeqe señal kʼokel qkeʼyine chʼixtoq tbʼaj?». 8 Xi ttzaqʼweʼn Jesús kye: «Kyxqʼuqink kyibʼe tuʼn miʼn kykubʼ sbʼuʼne,* porke che ul junjun xjal kʼajbʼel nbʼiye kyuʼn ex kxel kyqʼamaʼn: ‹Aqine Cristo› moqa kxel kyqʼamaʼn ‹Ma tzul laqʼeʼ tqʼijlalil›. Miʼn chex lepeʼye kyiʼj. 9 Ax ikx miʼn che tzaj xobʼe aj tok kybʼiʼne qa in che ok guerra ex qa in che jaw tilj xjal.* Porke il tiʼj tuʼn tbʼaj tkyaqil jlu, pero naʼmxtoq tpon ambʼil tuʼn tul fin».

10 Entonces xi tqʼamaʼn kye: «Porke qe xjal te jun nasyon che qʼojil tukʼil juntl nasyon, ex qe xjal te jun tnam che qʼojil tiʼj juntl tnam. 11 Noq jaxku tumel che ikʼel kyuw terremoto, tzul weʼyaj ex txʼuʼj yabʼil. Kʼokel kyqʼoʼn xjal kywitz kyiʼj junjun tiʼ che tzajel xobʼ tuʼn ex che qʼanchaʼlix junjun señal twitz kyaʼj.

12 Pero naʼmxtoq tbʼaj tkyaqil jlu, che tzyetele kyuʼn xjal ex che bʼajel perseguirine kyuʼn. Che xel qʼiʼne kyuʼn toj ja te kʼulbʼil* ex che okex qʼoʼne pres. Ex che xel qʼiʼne kywitz rey ex gobernador tuʼn tpaj nbʼiye. 13 Iktzun tten che okele testiw wiʼje kywitz txqantl. 14 Pero miʼn che ximane tiʼjju kxel kyqʼamaʼne, 15 porke tzul nqʼoʼne kynabʼle ex che kbʼel nqʼoʼne yol toj kytziʼye. Ex mlay che tzaqʼwete kyuʼn aj qʼoj kyiʼje ex mlay kubʼ kyiʼje kyuʼn. 16 Nya oʼkxju, ax ikx che xel qʼoʼne toj kyqʼabʼ jwes kyuʼn kymane, kyuʼn kyermane, kyuʼn toj kyjaye ex kyuʼn kyamiwe. Ex ateʼ junjun kyxole che kbʼel bʼyoʼn. 17 Che elel ikʼune kyuʼn kykyaqil xjal noq tuʼn nbʼiye. 18 Maske ikju, mlay naj nijun ttzmal kywiʼye. 19 Qa ma tzikʼx kyuʼne, kkletel kychwinqlale kyuʼne.

20 Aj tok kyqʼoʼne kywitze kyiʼj soldad in nok kytxolin kyibʼ tiʼj tnam Jerusalén, tzʼelx kynikʼe tiʼj qa ya chʼix tpon or tuʼn tkubʼ xitj. 21 Aqeju xjal ateʼ toj Judea, bʼaʼn tuʼn kyxiʼ oq kywi witz. Atzun qeju ateʼ toj Jerusalén, bʼaʼn tuʼn kyel oq ex aqeju ateʼ toj campo, miʼn che okx toj tnam. 22 Porke kyoj qʼij lu, kbʼel tqʼoʼn Dios kykastiw xjal tuʼn tjapun twi tkyaqilju kyaj tzʼibʼin toj tyol. 23 ¡Lasmi kywitz xuʼj kʼokel ten kyal toj ambʼil aju ex qe xuʼj kxel kyqʼoʼn tchʼuʼ kyal! Porke tzul nim sufrimiento twitz txʼotxʼ lu ex kbʼel qʼoʼn kykastiw xjal. 24 Che kbʼel bʼyoʼn junjun tuʼn espada, atzun junjuntl che xel qʼiʼn pres kyoj junjuntl* tnam. Ex kbʼajel wabʼan tnam Jerusalén kyuʼn junjuntl nasyon* tzmaxi aj tjapun bʼaj ambʼil xi qʼoʼn kye.

25 Ax ikx che qʼanchaʼlix junjun señal tiʼj qʼij, tiʼj xjaw ex kyiʼj cheʼw. Atzun twitz txʼotxʼ, tzul bʼis kyxol xjal kyoj kykyaqil nasyon ex che tzajel xobʼ tuʼn tqʼajqʼajel twi mar in pulin. 26 Che tzajel desmayarin tuʼn kyxobʼil ex che ximel tiʼjju kbʼajel twitz txʼotxʼ, porke che tzajel luʼlun tipumal kyaʼj. 27 Entonces kʼokel kykeʼyin Tkʼwal Xinaq* aj ttzaj toj muj tukʼil tipumal ex in qoptzʼaj. 28 Pero aj t-xi tzyet tuʼn tbʼaj tkyaqil jlu, che weʼkuye ex kyiʼnktz kywitze porke chʼix tul kanin tzaqpibʼil kyeye».

29 Ex kubʼ tqʼoʼn Jesús ejemplo lu kywitz: «Che ximane tiʼj tqan higo ex qe txqantl tzeʼ. 30 Aj tok kykeʼyine aj ttzaj t-xuʼl, in nel kynikʼe tiʼj qa ya chʼinx tul jbʼalil. 31 Ax ikx kyeye aj tok kykeʼyine tkyaqil jlu, tzʼelx kynikʼe tiʼj qa ya chʼix tul Tgobierno Dios. 32 Ax tok kxel nqʼamaʼne kyeye, mlay che kyim xjal toj ambʼil jaʼlo tzmaxi aj tjapun bʼaj twi tkyaqil jlu. 33 Jaku kubʼ naj kyaʼj ex txʼotxʼ, pero mlayx che kubʼ naj nyole.

34 Pero kyxqʼuqink kyibʼe tuʼn miʼn tok bʼaj kywiʼye oʼkx tiʼjju tuʼn kywaʼne nim ex tuʼn kykʼaʼne nim, ex tiʼjju in nikʼ toj kyanqʼibʼile. Porke de repente tzul qʼij lu kyibʼaje 35 ex kʼokel ik tzeʼn jun tramp kyeye.* Porke tzul kyibʼaj kykyaqil xjal twitz txʼotxʼ. 36 Tuʼntzunju kukx che xqʼuqine ex che kubʼsane twitz Dios tkyaqil qʼij tuʼn kyklete tiʼj tkyaqilju tzul ex tuʼn kykubʼ weʼye twitz Tkʼwal Xinaq».

37 Te qʼijtl xi tqʼoʼn Jesús xnaqʼtzbʼil kye xjal toj templo, pero te qonikʼen etz toj tnam ex xiʼ jtal twi jun witz monte de los Olivos tbʼi. 38 Ex prim wen e pon kykyaqil xjal toj templo tuʼn tok kybʼiʼn.