¿Tiʼ jaku bʼant tuʼn jun mambʼaj tuʼn tten jun tbʼanel tamiwbʼil tukʼil tkʼwal?

«PAPI, ¿tiquʼn ojtzqiʼn nim tiʼchaq tuʼna?». ¿Ope t-xi tqanin tkʼwala jun maj jlu teya? Tej tbʼant jlu tuʼn, kubʼlo tnaʼna nim tzalajbʼil. Noqtzun tuʼnj, qa xi tbʼiʼn tkʼwala qe nabʼil xi tqʼoʼna te ex qa tzaj tiʼn tbʼanel te, kubʼlo tnaʼna nimxix tzalajbʼil (Proverbios 23:15, 24).a

¿Axpe tzalajbʼil in kubʼ tnaʼn tkʼwala tiʼja ik tzeʼn tej tzma kʼwalxtoq? ¿Moqa in kubʼ tnaʼna qa ya mintiʼ in tzalaj tiʼja? ¿Tiʼ jaku bʼant tuʼna tuʼn miʼn tnaj aju tzalajbʼil in kubʼ tnaʼn tkʼwala tiʼja akux in chʼiy? Qo xnaqʼtzan kyiʼj junjun tiʼchaq jaku che ok weʼ mambʼaj twitz.

Oxe tiʼ in che ok weʼ twitz

1. MINTIʼ AMBʼIL KYIʼJ: Kyoj nimku ttnam aʼye mambʼaj in che aqʼunan tuʼn kykʼaʼchit qe toj kyja, tuʼntzunju, mintiʼ in che ten nim ambʼil kyukʼil kykʼwal. Jun techel, in tzaj tqʼamaʼn jun encuesta kʼitzqeku etz, qa toj tnam Francia oʼkx in che ten mambʼaj junlo 12 minut kyukʼil kykʼwal.

XIMANA TIʼJ JLU: ¿Jniʼ ambʼil in tena tukʼil tkʼwala? ¿Yajtzun qa ma kubʼ ttzʼibʼina toj jun seman moqa toj kabʼe seman jniʼ ambʼil in tena tukʼil tkʼwala junjun qʼij? Qa ma bʼant jlu tuʼna, jaku jaw labʼina tiʼj jniʼ ambʼil in tena tukʼil tkʼwala.

2. MINTIʼ KUBʼ QʼOʼN JUN TBʼANEL TECHEL KYWITZ: Ateʼ junjun xinaq mintiʼ o ten jun tbʼanel kyamiwbʼil tukʼil kyman. In tzaj tqʼamaʼn Jean-Marie jlu, aju in nanqʼin atz Francia: «Mintiʼ ten tbʼanel wamiwbʼile tukʼil nmaʼne». ¿Tiʼ nya bʼaʼn tzaj tiʼj tuʼn jlu? In tzaj tqʼamaʼntl jlu: «O tzaj nim nya bʼaʼn wiʼje aju mintiʼ kubʼ nximane. Jun techel, kwest in nela weye tuʼn nyoline kyukʼil nkʼwale». Atzun junjuntl xinaq mas e yolin kyukʼil kyman, pero mintiʼ jun tbʼanel kyamiwbʼil kyukʼil. In tzaj tqʼamaʼn Philippe jlu, aju qʼiʼn 43 abʼqʼi tuʼn: «Kwest ela te nmane tuʼn tkubʼ tyekʼin tkʼujlabʼil wiʼje. Tuʼntzunju, kwest in nela te weye tuʼn tkubʼ nyekʼine nkʼujlabʼile tiʼj nkʼwale».

XIMANA TIʼJ JLU: ¿In kubʼpe t-ximana qa kwest tuʼn tkubʼ tyekʼina tkʼujlabʼila tiʼj tkʼwala tuʼnju alkye tten xjaw chʼiysaʼna? ¿Ope tzʼel tkanoʼna qe tbʼanel tmod tmana moqa aʼyeju nya bʼaʼn tmod? ¿Alkye tten o tzʼel tkanoʼna tiʼj?

3. QE XIMBʼETZ NYA TOJ TUMEL: Kyoj junjun lugar in kubʼ kyximen xjal qa nya aʼye mambʼaj at kyoklen tuʼn kychʼiyset kʼwal. In tzaj tqʼamaʼn Luca jlu, aju jaw chʼiy toj jun tnam te Europa occidental: «Kubʼ kyximen xjal qa oʼkx qe xuʼj at kyoklen tuʼn kyxqʼuqin kyiʼj kʼwal». Atzun kyoj junjuntl lugar, oʼkx qe mambʼaj at kyoklen tuʼn t-xi kykawin kykʼwal. In tzaj tqʼamaʼn George jlu, aju jaw chʼiy toj jun tnam te África: «Toj tnam jatumel in chin anqʼine, mintiʼ in che saqchan mambʼaj kyukʼil kykʼwal tuʼnju in kubʼ kyximen qa mlay che nimen kykʼwal kye. Tuʼntzunju, kwest in nela toj nwitze tuʼn nsaqchane jun rat tukʼil nkʼwale».

XIMANA TIʼJ JLU: ¿Tiʼ kymod mambʼaj in kubʼ kyyekʼin jatumel in nanqʼina? ¿In xipe xnaqʼtzaʼn kye mambʼaj qa oʼkx qe xuʼj at kyoklen tuʼn tjaw kychʼiysaʼn qe kʼwal? ¿In xipe qʼamaʼn teya tuʼn tkubʼ tyekʼina tkʼujlabʼila kyiʼj tkʼwala moqa nya bʼaʼn in nela jlu toj kywitz txqantl?

Qa jun mambʼaj teya ex qa in nok weʼya kywitz junjun tiʼ ma qo yolin tiʼj, ¿tiʼ jaku tzʼonin tiʼja? Tbʼanel tuʼn tok tqʼoʼna twiʼya kyiʼj junjun nabʼil qo xnaqʼtzal tiʼj.

Tzʼonina tiʼj tkʼwala akux tal neʼ

Aj kyul itzʼ qe kʼwal ya kyaj tuʼn tel kykanoʼn tiʼj kytat. Tuʼntzunju, tzʼajbʼenx ambʼil tuʼna tuʼn ttena tukʼil tkʼwala akux tal chʼin. ¿Tzeʼn jaku bʼant jlu tuʼna? Ex ¿tzeʼn jaku tzʼel tpaʼna ambʼil tuʼn ttena tukʼil?

Qa jaku bʼant, jaku txi tbʼinchaʼna junjun aqʼuntl junx tukʼil tkʼwala atz tjaya. Jun techel, jaku txi tqʼoʼna jun tzʼisbʼil te tkʼwala moqa jun rastrillo ex qʼamanxa te tuʼn tonin tiʼja. Nimlo ktzalajel tkʼwala aj tonin tiʼja, tuʼnju kʼujlaʼna tuʼn. Bʼalo jaku txi tiʼn mas ambʼil tuʼn tkubʼaj jun aqʼuntl tuʼna, pero qa ma tzʼonina tiʼj tkʼwala ktel jun tbʼanel tamiwbʼila tukʼil ex kbʼantel taqʼunan. Toj ambʼil ojtxe, kyaj qʼamaʼn toj Biblia tuʼn kyaqʼunan mambʼaj junx kyukʼil kykʼwal ex tuʼn tajbʼen ambʼil aju kyuʼn tuʼn kyyolin kyukʼil ex tuʼn t-xi kyxnaqʼtzaʼn (Deuteronomio 6:6-9). Kukx at tajbʼen nabʼil lu toj ambʼil jaʼlo.

Nya oʼkx jaku bʼant junjun aqʼuntl tuʼna tukʼil tkʼwala, sino ax ikx jaku saqchana jun rat tukʼil. Qa ma bʼant jlu tuʼna, ktzalajela ex tzul tiʼn nim tbʼanel teya. In tzaj kyqʼamaʼn junjun xjal at kyojtzqibʼil, qa aʼyeju mambʼaj in che saqchan kyukʼil kykʼwal in che onin kyiʼj tuʼn tbʼant junjun tiʼ kyuʼn kyjunalx ex tuʼn miʼn kytzaj xobʼ.

Qa ma saqchana tukʼil tkʼwala nim kʼonil tiʼj tamiwbʼila tukʼil. In tzaj tqʼamaʼn Michel Fize, qa «in ten jun tbʼanel tamiwbʼil jun kʼwal tukʼil tman aj kysaqchan junx». Toj ambʼil lu, in kubʼ tyekʼin mambʼaj tkʼujlabʼil tiʼj tkʼwal tukʼil tyol ex tbʼinchbʼen, ex in xi tyekʼin te tuʼn tbʼant ax jlu tuʼn. In tzaj tqʼamaʼn André jlu, aju in nanqʼin atz Alemania: «Tej tal chʼin nkʼwale, o saqchane junx tukʼil, in chinxtoqe chlel te ex ax jlu bʼant tuʼn».

Juntl ambʼil jaku tzʼonin tiʼja tuʼn tten jun tbʼanel tamiwbʼila tukʼil tkʼwala, aju aj t-xiʼya qʼolte jtal. Bʼaʼn tuʼn t-xi tuʼjina jun txʼolbʼabʼil te tkyaqil qonikʼen ex tbʼanel tuʼn tok tbʼina akux in tzaj tqʼamaʼn teya qe tbʼanel tiʼchaq otoq che ikʼ tiʼj moqa aju in tzaj bʼaj tkʼuʼj tiʼj. Qa ma bʼant jlu tuʼna, nya kwest kʼelel te tkʼwala tuʼn tyolin tukʼila aj tchʼiy.

Kybʼinchame qe tiʼchaq kygane

Ateʼ junjun kuʼxun mintiʼ in nok kyqʼoʼn toklen ambʼil in nel kypaʼn kytat tuʼn kyyolin kyukʼil. Qa mintiʼ in tzaj tzaqʼweʼna tuʼn tkʼwala, miʼn kubʼ t-ximana qa nya taj tuʼn tyolin tukʼila tiʼj jun tiʼ. Bʼalo mas jaku yolin tukʼila qa ma txi tjyoʼna juntl tumel tzeʼn tuʼn tyolina tukʼil.

At maj kwest ela te Jacques, te tnam Francia, tuʼn tyolin tukʼil tkʼwal Jérôme. Mintiʼ ok t-obligarin tuʼn tyolin tukʼil sino ok ten saqchal tukʼil tiʼj fútbol. In tzaj tnaʼn Jacques jlu: «Aj qbʼaj saqchane in qo kubʼtoq qeye ojlal toj kʼul ex kukxtoq in tzaj tqʼamaʼn nkʼwale aju in tzaj bʼaj tkʼuʼj tiʼj. Tuʼnju el npaʼne ambʼil tuʼn ntene tukʼil, onin jlu tuʼn tten jun tbʼanel qamiwbʼile».

¿Yajtzun qa nya tgan tkʼwala qe deporte? In tzaj tnaʼn André aju ambʼil tej tkeʼyin kyiʼj qe cheʼw twitz kyaʼj junx tukʼil tkʼwal: «In che etztoq qine qe siy ex in qo kubʼ qeye toj jun tbʼanel lugar, in nok qqʼoʼne nim qxbʼalune ex in qo kʼane tiʼj jun té akux in qo keʼyine kyiʼj cheʼw toj qonikʼen. O yoline tiʼj alkye kubʼ bʼinchante qe cheʼw, tiʼjju tzaj bʼaj qkʼuʼje tiʼj... ex o yoline kyiʼj nim tiʼchaq» (Isaías 40:​25, 26).

¿Yajtzun qa nya tgana aju tgan tkʼwala? Qa ikju, bʼalo il tiʼj tuʼn t-ximana tiʼjju tgan tkʼwala ex nya tiʼjju teya tgan (Filipenses 2:4). In tzaj tqʼamaʼn Ian jlu aju in nanqʼin atz Sudáfrica: «Ngantoqe qe deporte atzunte nkʼwale Vaughan nya tgan. Mas tgantoq qe avión ex qe computadora, tuʼntzunju ok tilil wuʼne tuʼn tel nnikʼe kyiʼj tiʼchaq lu. Ax ikx, xi wiʼne kyoj lugar jatumel ateʼ avión ex o saqchane kyiʼj juego toj computadora kyiʼj avión. Tuʼnju bʼant jlu wuʼne, mas nya kwest ok te Vaughan tuʼn tyolin wukʼile».

Onina tiʼj tkʼwala tuʼn tok qeʼ tkʼuʼj tiʼjx.

«¡Papi keʼyintza jlu!» ¿Ope txi tqʼamaʼn tkʼwala jlu teya aj tbʼant jun tiʼ tuʼn? Qa ya kuʼxun tkʼwala, bʼalo ya mintiʼ in tzaj tqanin onbʼil teya tiʼj tkyaqilju in bʼant tuʼn, noqtzun tuʼnj, nim toklen tuʼn t-xi tonina tuʼntzun tkubʼ tbʼinchaʼn qe tiʼchaq toj tumel aj tchʼiy.

Ojtzqiʼnka tiʼ tqʼama Jehová te Jesús tej chʼixtoq t-xi tzyet jun ambʼil nim toklen toj tanqʼibʼil tzalu twitz Txʼotxʼ. Kubʼ tyekʼin Jehová tkʼujlabʼil tiʼj Jesús tej tqʼama jlu: «Atzun Nkʼwaʼle jlu kʼujlaʼnxix wuʼne, in chin tzalaje tiʼj» (Mateo 3:17; 5:48). Ax tok, nim toklen tuʼn t-xi tkawina ex tuʼn t-xi tqʼoʼna xnaqʼtzbʼil te tkʼwala (Efesios 6:4). Noqtzun tuʼnj, ¿in xipe tjyona ambʼil tuʼn t-xi tqʼamaʼna te tkʼwala qa in tzalaja tiʼj aj tbʼant jun tbʼanel tiʼ tuʼn?

Ateʼ junjun tatbʼaj kwest in nela kye tuʼn t-xi kyqʼamaʼn kye kykʼwal qa in che tzalaj kyiʼj, bʼalo in bʼaj jlu kyiʼj tuʼnju mas ok kyqʼoʼn kyman kywitz tiʼj kypaltil ex nya tiʼjju tbʼanel bʼant kyuʼn. Qa a jlu in bʼaj tiʼja, tbʼanel tuʼn tonina tiʼj tkʼwala tuʼn tok qeʼ tkʼuʼj tiʼjx. ¿Alkye tten jaku bʼant tuʼna? Naqʼli Luca aju ma qo yolin tiʼj, tuʼn t-xi tbʼinchaʼn junjun aqʼuntl atz tja tukʼil Manuel, aju tkʼwal te 15 abʼqʼi. In tzaj tqʼamaʼn Luca jlu: «At maj in xi nqʼamaʼne te Manuel tuʼn t-xi tbʼinchaʼn junjun aqʼuntl ex qa taj onbʼil jaku tzaj tqʼamaʼn weye. Chʼixme tkyaqil maj tjunalx in xi tbʼinchaʼn qe taqʼun ex in nonin jlu tiʼj tuʼn ttzalaj. Qa toj tumel in bʼant jun aqʼuntl tuʼn, in xi nqʼamaʼne te qa in chin tzalaje tiʼj, ex qa mintiʼ ma bʼant tuʼn, in xi nqʼamaʼne te qa tbʼanel tuʼnju ma tzʼok tilil tuʼn».

Ax ikx, qa ma tzʼonina tiʼj tkʼwala tuʼn tjapun twi t-ximbʼetz toj tanqʼibʼil, kʼonil jlu tiʼj tuʼn tok qeʼ tkʼuʼj tiʼjx. Pero, ¿tiʼ jaku bʼaj qa mintiʼ ma japun twi t-ximbʼetz tkʼwala ik tzeʼn otoq kubʼ t-ximana? ¿Yajtzun qa junxitl aju taj tkʼwala tuʼn tbʼant tuʼn toj tanqʼibʼil twitzju teya otoq kubʼ t-ximen? Qa ma bʼaj jlu tiʼja, bʼalo il tiʼj tuʼn tkubʼ tchʼexpuʼna t-ximbʼetza. In tzaj tqʼamaʼn Jacques jlu aju ma qo yolin tiʼj: «In chin onine tiʼj nkʼwale tuʼn t-xi tbʼinchaʼn qe meta jaku bʼant tuʼn. Pero in nok tilil wuʼne tuʼn t-xi tbʼinchaʼn aju taj ex nya aju weye waj. Ax ikx, in tzaj nnaʼne qa kxel tbʼinchaʼn qe tiʼchaq toj ambʼil otoq kubʼ t-ximen». Jaku tzʼonina tiʼj tkʼwala tuʼn t-xi tbʼinchaʼn aju otoq kubʼ t-ximen qa ma tzʼok tbʼina, qa ma txi tqʼamaʼna te qa in tzalaja tiʼj tbʼanel taqʼun ex qa ma tzʼonina tiʼj tuʼn tex kywitz nya bʼaʼn.

At maj jaku tzaj nya bʼaʼn tiʼj tamiwbʼila tukʼil tkʼwala. Noqtzun tuʼnj, aj tikʼ ambʼil bʼalo kbʼel t-ximen tuʼn kukx tjyon onbʼil tukʼila. ¿Tiquʼn? Tuʼnju qkyaqilx qaj tuʼn qjyon onbʼil tukʼil jun xjal jaku tzʼonin qiʼj tuʼn qex kywitz nya bʼaʼn.

[Tqanil]