Tuʼn tjyet axix tok

Kyoj nim abʼqʼi, ni jun xjal kanet tzaqʼwebʼil tuʼn tiʼj xjel lu ex tuʼntzunju e kyim nim xjal kyuʼn txʼuʼj yabʼil. Tej tikʼ ambʼil, el kynikʼ científico tiʼj. El kynikʼ tiʼj qa tzaj nim yabʼil kyuʼn junjun tiʼ, ik tzeʼn qe bacteria ex virus. Tuʼnju el kynikʼ tiʼj jlu, o tzʼonin tuʼn miʼn tel kyiqen xjal yabʼil, tuʼn tkanet qʼanbʼil, tuʼn miʼn kykyim nim mil millón xjal ex tuʼn tten tbʼanel kychwinqlal.

¿Tiʼ jaku txi qqʼamaʼn kyiʼj txqantl xjel nim kyoklen? ¿Jakupe chʼexpaj tanqʼibʼila aj tel tnikʼa tiʼj tzaqʼwebʼil kyiʼj xjel lu?

• ¿Alkye Dios?

• ¿Alkye Jesucristo?

• ¿Tiʼ aju Tkawbʼil Dios?

• ¿Tiʼ kbʼajel toj ambʼil tzul?

Nim millón xjal o kanet tzaqʼwebʼil kyuʼn kyiʼj xjel lu ex mas tbʼanel kyanqʼibʼil jaʼlo. Ax jlu jaku bʼaj tiʼja qa ma tzʼel tnikʼa tiʼj tzaqʼwebʼil kyiʼj xjel lu.

¿ATPE AXIX TOK?

Bʼalo jaku kubʼ t-xjelina qa jaku kanet axix tok tiʼj jun tiʼ tuʼna. Aj tikʼ junjun qʼij, mas kwest tuʼn tel qnikʼ tiʼj alkye axix tok ex alkye nya ax tok. ¿Tiquʼn?

Nim xjal mintiʼ in nok qeʼ kykʼuʼj tiʼjju in tzaj kyqʼamaʼn aj kawil, qe empresa moqa aʼyeju qʼol tqanil. Kwest tuʼn tel kynikʼ xjal tiʼj qa ax tok aju in tzaj qʼamaʼn kye moqa noq jun yol, ex qa ax tok chʼin moqa tkyaqil nya ax tok. Tuʼnju in qo anqʼin toj jun ambʼil jatumel mintiʼ in nok qeʼ kykʼuʼj xjal kyiʼj txqantl ex in bʼaj chʼexpuʼn tqanil, nya oʼkx mintiʼtl in nok qeʼ kykʼuʼj tiʼjju in xi qʼamaʼn kye tiʼj jun tiʼ sino ax ikx tiʼjju otoq bʼaj.

Maske ikju, jaku kanet axix tok tzaqʼwebʼil tuʼna kyiʼj xjel nim kyoklen toj qanqʼibʼil. ¿Tzeʼn? Ik tzeʼnx in kanet tzaqʼwebʼil tuʼna kyiʼj txqantl xjel nyaxix nim kyoklen.

¿TZEʼN JAKU KANET AXIX TOK QUʼN?

Jaku txi qqʼamaʼn qa tkyaqil qʼij in qo jyon tiʼj axix tok. Jun techel, il tiʼj tuʼn tokxix tkeʼyin Jessica qa mintiʼ maniy kyoj wabʼj in tzaj tlaqʼoʼn. In tzaj tqʼamaʼn jlu: «Jaku kyim wale qa at chʼin maniy toj jun tiʼ in xi twaʼn. Tuʼntzunju, naʼmxtoq ttzaj nlaqʼoʼne alkyexku wabʼj, tnejel in jaw wuʼjine tiʼ tkuʼx toj. Yajxitl in xi njyoʼne mas tqanil, axpe ikx in xi nqanine te empresa tuʼntzun tok qeʼ nkʼuʼje tiʼj qa mintiʼ chʼin maniy toj. Ax ikx in xi njyoʼne tqanil kyoj tembʼil jaku tzʼok qeʼ nkʼuʼje tiʼj, aʼyeju in che onin wiʼje tuʼn tel nnikʼe tiʼj qa axix tok aju in tzaj tqʼamaʼn empresa tiʼj alkye tten in che bʼaj bʼinchaʼn wabʼj».

Bʼalo nya il tiʼj tuʼn tjyona tqanil kyiʼj tiʼchaq nim kyoklen junjun qʼij, pero jaku bʼant tuʼna aju bʼant tuʼn Jessica tuʼn tkanet tzaqʼwebʼil kyiʼj junjuntl xjel:

• Tuʼn tel tnikʼa tiʼj tqanil.

• Tuʼn t-xi tjyona mas tqanil.

• Tuʼn tok qeʼ tkʼuʼja tiʼj qa ax tok aju tqanil in kanet tuʼna.

Qa ma bʼant jlu tuʼna, jaku kanet tzaqʼwebʼil tuʼna kyiʼj xjel nim toklen toj qanqʼibʼil. Qo xnaqʼtzaʼn tiʼj tzeʼn jaku bʼant.

JUN UʼJ TKUʼX AXIX TOK TOJ

Tuʼn tkanet axix tok tzaqʼwebʼil kyiʼj xjel mas nim kyoklen toj qanqʼibʼil, ajbʼen jun tten tuʼn Jessica aju chʼixme ik tzeʼnx ajbʼen tuʼn tuʼn tel tnikʼ tiʼj qa mintiʼ maniy toj wabʼj. In tzaj tqʼamaʼn jlu: «Aj wuʼjine ex aj njyone tqanil o tzʼonin wiʼje tuʼn tkanet axix tok tkuʼx toj Tyol Dios». Nim millón xjal o bʼant kyuʼn ik tzeʼn te Jessica ex o tzʼel kynikʼ tiʼj tiʼ in tzaj tqʼamaʼn Tyol Dios kyiʼj xjel lu:

• ¿Tiquʼn o qo kubʼ bʼinchaʼn?

• ¿Tiʼ in bʼaj qiʼj aj qkyim?

• ¿Tiquʼn at nim yajbʼil?

• ¿Tiʼ in bʼant tuʼn Dios tuʼn tkubʼ naj yajbʼil?

• ¿Tzeʼn jaku che tzalaj toj tjaya?

Jaku kanet axix tok tzaqʼwebʼil tuʼna kyiʼj xjel lu ex kyiʼj junjuntl aj tuʼjina tiʼj Tyol Dios ex aj tjyona mas tqanil toj www.pr2711.com.