Kʼujlaʼn qoʼ tuʼn Dios ex in ximen qiʼj

1. TUʼN DIOS IN NETZ QʼIJ

¿Tzeʼnwtlo qanqʼibʼil noqwit mintiʼ Qʼij? Tuʼn tipumal Qʼij in chʼiy t-xaq tzeʼ, in nel kybʼechil, in nel kywitz ex in nel iyaj moqa ijaj kyiʼj. Ax ikx in nonin Qʼij tuʼn tjax aʼ toj kylokʼ tzeʼ tuʼn tjapun toj kyxaq ex tuʼn tok te vapor.

2. TUʼN DIOS IN TZAJ JBʼAL

In najbʼen jbʼal tuʼn Dios tuʼn tchʼiy awal twitz Txʼotxʼ. Ax ikx in tzaj tqʼoʼn Dios nim twitz awal, nim qwa tuʼntzun qtzalaj.

3. IN TZAJ TQʼOʼN DIOS QWA EX QXBʼALUN

In tzaj bʼaj kykʼuʼj mambʼaj tuʼn t-xi kyqʼoʼn kywa ex kyxbʼalun toj kyja. In tzaj tqʼamaʼn Tyol Dios jlu: «Kykeʼyinxe qe chyuʼj; mintiʼ in che awan ex mintiʼ in che chmon twitz awal, ex mintiʼ kytxʼutxʼ te chmobʼl kywa; ex ate Kymane aju at tuj kyaʼj nnoʼk kʼaʼchante kye. ¿Myapetzun mas maʼ kyxilene kywitz qe chyuʼj?» (Mateo 6:25, 26).

«Che ximane kyiʼj bʼech tuj kʼul tzaʼn tten in che chʼiy [...]. Kxel nmaʼne kyeye tiʼj rey Salomón, maske tbʼanilxix t-xbʼalun ok tqʼoʼn, pero mintiʼ pon jun t-xbʼalun ik tzaʼn kye tal bʼech lu. Qatzun qa ik in t-xbʼalumiʼn Dios tal kʼul tuj kojbʼil [...], ¿yajtzun kyeye, mlaypelo che xbʼaluminjtze tuʼn?» (Mateo 6:28-30).

Qa in tzaj tqʼoʼn Dios qwa ex qxbʼalun, ax ikx jaku tzaj tqʼoʼn junjuntl tiʼchaq at tajbʼen qe. In qo tzaj tkʼiwlaʼn Dios qa in nok tilil quʼn tuʼn tkubʼ qbʼinchaʼn tajbʼil ex jaku tzʼonin qiʼj tuʼn tkanet jun qaqʼun tuʼn ttzaj qlaqʼoʼn qe tiʼchaq at tajbʼen qe (Mateo 6:32, 33).

Aj qximen tiʼj Qʼij, tiʼj jbʼal, kyiʼj pájaro ex kyiʼj bʼech, in nel qnikʼ tiʼj qa at nim tiquʼn tuʼn tok qkʼujlaʼn Dios. Toj juntl xnaqʼtzbʼil kʼelel qnikʼ tiʼj tzeʼn o tzaj yolin Dios kyukʼil xjal.