1921: ma tzikʼ 100 abʼqʼi

TOJ uʼj Xqʼuqil te 1 te enero te 1921 toj yol inglés, tzaj qanin xjel lu kye Xnaqʼtzal tiʼj Tyol Dios: «¿Alkye aqʼuntl mas nim toklen tuʼn qonin tiʼj toj abʼqʼi lu?». Tuʼn ttzaqʼwet xjel lu, tzaj tqʼamaʼn uʼj qe yol tkuʼx toj Isaías 61:1 ex 2, jatumel tzaj naʼn kye qa il tiʼj tuʼn kypakbʼan: «Ma tzaj qʼoʼn woklene tuʼn Qman ex ma chin tzaj samaʼne qʼolte tqanil bʼaʼn kye mebʼa, [...] ex tuʼn t-xi nqʼoʼne tqanil tiʼj tqʼijlalil tuʼn tul kanun t-xtalbʼil Qman ex tuʼn tkubʼ kycastiw qe aj qʼoj tiʼj».

TEN KYIPUMAL PAKBʼAL

Iltoq tiʼj tuʼn tten kyipumal Xnaqʼtzal tiʼj Tyol Dios. ¿Tiquʼn? Tuʼnju che pakbʼaltoq tiʼj «tqanil bʼaʼn kye mebʼa» ex iltoq tiʼj tuʼn kypakbʼan tiʼj tqʼijlalil «tuʼn tkubʼ kycastiw qe aj qʼoj».

Ok weʼ ermano John Hoskin te tnam Canadá twitz nya bʼaʼn, pero mintiʼ tzaj xobʼ ex kukx pakbʼan. Tej t-xi tzyet abʼqʼi 1921, yolin tukʼil jun pakbʼal te okslabʼil Metodista ex xi tqʼamaʼn jlu te: «Jaku qo yolin tiʼj Tyol Dios ex mintiʼ tuʼn ttzaj qqʼoj. Axpe ikx qa nya ax qximbʼetz at kyiʼj junjun tiʼchaq, jaku qo bʼaj yolin toj tumel ex jaku qo ikʼ bʼet». Pero mintiʼ bʼaj jlu. Tqʼamatl ermano John jlu: «Tzmatoq in nikʼ junjun minut ttzyetlen qyoline tej tetz tlamoʼn pwert tuʼn tkyaqil tipumal ex kubʼ nximane qa tuʼn tel tzʼaq tvidrio pwert».

Xi schʼin xjal te: «¿Tiquʼn mintiʼ in xiʼya yolil kyukʼil xjal nya okslal qe?». Mintiʼ jun tiʼ xi tqʼamaʼn ermano John, pero tej tikʼ bʼet, tqʼama jlu tex: «Kubʼ nximane qa atzun jlu in bʼant wuʼne».

Toj juntl qʼij in pakbʼantoq ministro toj t-iglesia ex yolin nya bʼaʼn tiʼj ermano John. Tqʼama John jlu: «Xi tqʼamaʼn kye xjal qa jun nikʼal yol qine ex qa bʼaʼn tuʼn nkubʼ bʼyoʼne». Pero mintiʼ tzaj xobʼ ermano tuʼn jlu. Kukx pakbʼan ex yolin kyukʼil nim xjal. Tqʼamatl ermano John jlu: «Nimxix in tzalaje tej npakbʼane ttziyele ja. Ateʼ junjun xjal kyqʼama jlu: ‹Ojtzqiʼn quʼne qa tmajen Dios teya› ex tzaj kyqanin weye qa wajtoqe tuʼn kyonin wiʼje kyukʼil junjuntl tiʼchaq atx taj weye».

TUʼN QXNAQʼTZAN QJUNALX EX KYUKʼIL TOJ QJA

Etz kyqʼoʼn Xnaqʼtzal tiʼj Tyol Dios jun programa tiʼj xnaqʼtzbʼil tiʼj Biblia toj uʼj The Golden Age tuʼn tonin kyiʼj xjal tuʼn kychʼiy toj kyokslabʼil.a Toj programa «Juvenile Bible Study» (Xnaqʼtzbʼil tiʼj Tyol Dios kye kuʼxun) tkuʼxtoq qe xjel toj tuʼn tonin kyiʼj tatbʼaj tuʼn kyyolin kyukʼil kykʼwal. In xitoq kyqanin tatbʼaj «xjel kye kykʼwal ex in che onintoq kyiʼj tuʼn tkanet tzaqʼwebʼil kyuʼn toj Tyol Dios». Kyxol qe xjel tkuʼx toj uʼj, ateʼ junjun ik tzeʼn jlu: «¿Jteʼ uʼj tkuʼx toj Biblia?» ex e onin kyiʼj kuʼxun tuʼn tel kynikʼ kyiʼj junjun xnaqʼtzbʼil. Ax ikx, ateʼtoq junjun xjel ik tzeʼn jlu: «¿Ilpe tiʼj tuʼn kyyon okslal axix tok tuʼn kyel ikʼun kyuʼn xjal?». Onin kyiʼj kuʼxun tuʼn miʼn kytzaj xobʼ tuʼn kypakbʼan.

Toj programa «Advanced Studies in the Divine Plan of the Ages» (Xnaqʼtzbʼil kye qeju o che chʼiy toj kyokslabʼil tuʼn tel kynikʼ tiʼj t-ximbʼetz Dios) e kux qʼoʼn qe xjel toj tuʼn tonin kyiʼj Xnaqʼtzal tiʼj Tyol Dios o che chʼiy toj kyokslabʼil tuʼn kyxnaqʼtzan tiʼj tnejel tomo tiʼj uʼj Estudios de las Escrituras. Onin kabʼe programa lu kyiʼj nim xjal. Pero toj uʼj The Golden Age te 21 te diciembre te 1921, tzaj qʼamaʼn qa ya mlaytoq che etz. ¿Tiquʼn bʼant chʼixpubʼil lu?

JUN AKʼAJ UʼJ

Aju uʼj *El Arpa de Dios* toj inglés.

Jun tal uʼj jatumel in tzaj qʼamaʼn alkyeqe t-xaq libro tuʼn kyjaw uʼjit.

Qe tarjeta kyukʼil xjel.

El kynikʼ erman qʼil twitz aqʼuntl tiʼj qa aqeju akʼaj xnaqʼtzal tiʼj Tyol Dios, iltoq tiʼj tuʼn tel kynikʼ kyiʼj xnaqʼtzbʼil nim kyoklen tkuʼx toj Biblia toj jun tten mas nukʼun. Tuʼntzunju, toj noviembre te 1921 etz uʼj The Harp of God (toj 1925 etz uʼj lu toj kastiy ex ok qʼoʼn tbʼi El Arpa de Dios). Aqeju xjal kyaj kyiʼn libro lu, kux tzʼibʼin kybʼi toj jun xnaqʼtzbʼil tiʼj Tyol Dios aju ok qʼoʼn tbʼi The Harp Bible Study Course ex jakutoq che xnaqʼtzan kyjunalx tiʼj xnaqʼtzbʼil lu. Onin xnaqʼtzbʼil lu kyiʼj xjal «tuʼn tel kynikʼ tiʼj qa taj Dios tuʼn t-xi tqʼoʼn kychwinqlal xjal te jumajx». ¿Tzeʼn xi qʼet xnaqʼtzbʼil lu?

Ajtoq txi qʼoʼn jun libro te jun xjal, ax ikx in xitoq qʼoʼn jun tarjeta te jatumel in tzaj qʼamaʼn alkyeqe t-xaq libro tuʼn tjaw tuʼjin. Aj tikʼ jun seman, in xitoq qʼoʼn juntl tarjeta te jatumel ateʼkux nimku xjel kyiʼj t-xaq otoq jaw tuʼjin ex in tzajtoq qʼamaʼn te alkye t-xaq libro tuʼn tjaw tuʼjin toj juntl seman.

Toj 12 seman in chextoq samaʼn tarjeta lu te jun xjal in xnaqʼtzan tiʼj Tyol Dios tuʼn kʼloj okslal nqayin at toj correo. In chextoq samaʼn tarjeta lu kyuʼn erman otoq che tijen moqa kyuʼn erman mlaytoq bʼant tuʼn kyex kyja. Jun techel, naʼnx jlu tuʼn Anna Gardner, te tnam Millvale te Pensilvania te tnam Estados Unidos. Tqʼama jlu: «Onin uʼj lu tiʼj wermane Thayle tuʼn tpakbʼan mas ambʼil tuʼnju mlaytoq bʼant tuʼn tbʼet ex tuʼn jlu jakutoq txi tsamaʼn tarjeta kye xjal kyukʼil xjel tkyaqil seman». Aj tkubʼaj t-xnaqʼtzbʼil xjal, in cheʼxtoq erman visitaril te tuʼntzun kyonin tiʼj tuʼn tel mas tnikʼ tiʼj Tyol Dios.

ATTOQ NIM AQʼUNTL TUʼN TBʼANT

Tej tkubʼaj abʼqʼi, xi tsamaʼn ermano Joseph Rutherford jun carta kye kykyaqil kʼloj okslal. Toj carta lu tqʼama: «Mas tbʼanel o tzʼok pakbʼabʼil tiʼj Tkawbʼil Dios toj abʼqʼi lu ex mas o tzʼonin kyiʼj xjal». Ax ikx ximen tiʼj ambʼil tzul ex tqʼama: «Atx nim aqʼuntl tuʼn tbʼant. Kyqʼamanxe kye junjuntl tuʼn kyonin tiʼj aqʼuntl lu». Xi kybʼiʼn Xnaqʼtzal tiʼj Tyol Dios txokbʼil lu. Tuʼntzunju, toj 1922 mintiʼ e tzaj xobʼ ex ok tilil kyuʼn tuʼn kypakbʼan tiʼj Tkawbʼil Dios.

Qeju amiw ten kyipumal

Kubʼ kyyekʼin Xnaqʼtzal tiʼj Tyol Dios kykʼujlabʼil tej tbʼaj kyonin kyibʼ kyxolx. E ok te tbʼanel amiw kyoj ambʼil kwest ik tzeʼn tzul qʼamaʼn kyoj junjuntl taqikʼ (Prov. 17:17).

Toj martes 31 te mayo te 1921 tzaj qʼoj atz Tulsa toj tnam Oklahoma te Estados Unidos, aju ok qʼoʼn tbʼi te Masacre Racial de Tulsa (Ikʼbʼil tiʼj kyyajil xjal atz Tulsa). Bʼaj jlu tej tokx qʼoʼn jun qʼeq xjal toj cárcel tuʼnju ok qʼoʼn tpaj qa otoq tzʼok lipen tiʼj jun xuʼj saq xjal. E ok lipen mas te mil saq xjal tiʼj jun kʼloj qʼeq xjal ex jun rat pon bʼaj qʼoj nqayin kyiʼj qʼeq xjal in che anqʼin atz Greenwood, jatumel etz qʼiʼn qe tiʼchaq kye xjal kyoj mas te 1,400 ja ex kʼaẍjel. Tzaj qʼamaʼn qa e kyim 36 xjal, pero bʼalo e kyim nim syent.

Tzaj tqʼamaʼn Richard Hill tiʼ otoq bʼaj, jun kyxol qeju qʼeq xjal in che xnaqʼtzan tiʼj Tyol Dios. Tqʼama jlu: «Toj qonikʼen tej ttzaj qʼoj, ok qxnaqʼtzbʼile tiʼj libro ik tzeʼnx in bʼanttoq quʼne. Tej tbʼaj xnaqʼtzbʼil, ok qbʼiʼne qe disparos kyoj tnam ex kukxtoq in che qʼajt tej qxiʼye jtal». Tej qsqix te juntl qʼij, toj 1 te junio, mas xiʼ nya bʼaʼn toj il. Tqʼamatl Richard jlu: «E ul junjun xjal ex tzaj kyqʼamaʼn qeye qa iltoq tiʼj tuʼn tok tilil quʼne tuʼn qxiʼye toj Centro de Convenciones qa qaje tuʼn qklete». Tuʼntzunju, xiʼ ermano Richard tukʼil t-xuʼjil ex kyukʼil jweʼ tkʼwal toj Centro de Convenciones atz Tulsa. Toj lugar aju, pon samaʼn Guardia Nacional tuʼn aj kawil tuʼntzun ya miʼn ttzaj nya bʼaʼn ex xi kyiʼn junlo 3,000 xinaq ex xuʼj qʼeq xjal.

Chʼixme tojx ambʼil aju, mintiʼ tzaj xobʼ Arthur Claus tuʼn tkubʼ t-ximen tuʼn tbʼant jun tiʼ tuʼn. Tqʼama jlu: «Tej tok nbʼiʼne qa otoq tzʼetz qʼiʼn qe tiʼchaq kye xjal toj kyja ex qa otoq bʼaj patin kyja atz Greenwood, kubʼ nximane tuʼn nxiʼye keʼyil wamiwe Richard Hill».

Xi tqʼoʼn Arthur Claus xnaqʼtzbʼil tiʼj Tyol Dios kye 14 kuʼxun tukʼil uʼj El Arpa de Dios.

Tej tpon Arthur tja ermano Richard, ok tkeʼyin jun vesin saq xjal ex qʼiʼn jun rifle tuʼn. Ax ikx te vesin tamiw tibʼ tukʼil ermano Richard. Tuʼntzunju, kubʼ t-ximen qa aj qʼoj ermano Arthur ex xi tqʼamaʼn jlu te tukʼil tqʼajqʼajel twiʼ: «¿Tiʼ in bʼaj teya toj tjardín xjal lu?».

Tzaj tnaʼn Arthur jlu: «Noqwit nya toj tumel xi ntzaqʼweʼne te xjal, tzajwitlo tdispararin wiʼje. Xi nqʼamaʼne te qa qamiw qibʼe tukʼil ermano Richard ex qa otoq chin tene nim maj tja». Onin ermano Arthur tukʼil xjal tuʼn miʼn tex qʼiʼn qe tiʼchaq toj tja ermano Richard.

Jun rat ok tbʼiʼn ermano Arthur qa otoq pon ermano Richard toj Centro de Convenciones. Xi qʼamaʼn te qa mlaytoq che etz qʼeq xjal qa naʼmxtoq ttzaj tfirmarin Barret kypermis, tuʼnju atoq nejenel toj ambʼil aju. Tqʼama Arthur jlu: «Xi tiʼn ambʼil tuʼn tok nchmon wibʼe tukʼil general moqa aju nejenel. Tej t-xi nqʼamaʼne te tiʼtoq waje tuʼn tbʼant wuʼne, tzaj tqanin jlu: ‹¿Kʼokelpe t-xqʼuqina familia lu ex kxelpe tqʼoʼna aju at tajbʼen kye?›. Xi nqʼamaʼne kye qa ok ex qa kxeltoq nbʼinchaʼne tuʼn tkyaqil nkʼuʼje».

Tej ttzaj qʼoʼn permis te ermano Arthur, jun rat xiʼ toj Centro de Convenciones. Tej tpon, xi tyekʼin permis te jun oficial ex tqʼama oficial jlu: «¡Ma tzaj firmarin jlu tuʼn general! ¿Ojtzqiʼn tuʼna qa aya tnejel xjal kʼelex qʼinte jun xjal toj lugar lu?». Jun rat kanet ermano Richard ex qe toj tja tuʼn ermano Arthur ex oficial. Kykyaqilx e jax toj tkar Arthur ex i eʼx tja ermano Richard.

Ok tilil tuʼn ermano Arthur tuʼn miʼn ttzaj jun nya bʼaʼn tiʼj ermano Richard nix kyiʼj toj tja. Tej tkubʼ tyekʼin ermano Arthur tkʼujlabʼil, onin kyiʼj txqantl xjal. Tqʼama Arthur jlu: «Ten jun tbʼanel t-ximbʼetz vesin tiʼj axix tok tej wonine tiʼj tuʼn tok xqʼuqit tja ermano Richard. Ex ateʼ nim xjal kyajtoq tuʼn tel kynikʼ tiʼj axix tok tuʼnju ok kykeʼyin qa mintiʼ in nok qqʼoʼn qwitz tiʼj kyyajil xjal ex qa ni jun at mas toklen twitz juntl toj ttnam Jehová».

a Kubʼ chʼixpuʼn tbʼi uʼj The Golden Age toj 1937 ex ok qʼoʼn tbʼi te Consolation, ex toj 1946 ok qʼoʼn tbʼi te Awake! (Atzun toj yol mam, xi tzyet tuʼn tetz uʼj lu toj 2019 ex ok qʼoʼn tbʼi te ¡Weʼktza!).