Jaku kubʼ tiʼj ikʼbʼil quʼn

Qa mintiʼ o tzikʼ jlu tiʼja bʼalo o tzʼok tkeʼyina tiʼj juntl. Kyoj noticia in nok qkeʼyin qe xjal in che el ikʼun tuʼnju junxitl kytnam, junxitl kyyajil moqa kyiyjil, moqa tuʼnju tgan jun xinaq juntl xinaq moqa ichin. Tuʼntzunju, ateʼ nim aj kawil in kubʼ kyqʼoʼn junjun ley tiʼj nya bʼaʼn in tzaj tuʼn ikʼbʼil.

Chʼixme tkyaqil maj tuʼn ikʼbʼil in tzaj mas ikʼbʼil. Aj tel ikʼun jun xjal, in naj tqʼoʼn t-xel nya bʼaʼn in nok bʼinchaʼn tiʼj ex tuʼntzunju mintiʼ in kubʼ naj ikʼbʼil.

Bʼalo ax ikx teya o tzʼok xmayina, o tzʼok yasoʼna moqa o tzaj qʼamaʼn teya tuʼn tok bʼinchaʼn jun nya bʼaʼn tiʼja. Pero jaku tzaj nim nya bʼaʼn tuʼn ikʼbʼil. Jaku tzʼok tbʼinchaʼn jun xjal nya bʼaʼn tiʼj juntl, jaku tzʼok ten elqʼal, jaku tzʼok ten bʼiyel, jaku tzaj tviolarin juntl ex jaku kubʼ tbʼyoʼn jun xjal moqa jun kʼloj xjal.

Ktzajel tchikʼbʼaʼn uʼj lu qa jaku kubʼ tiʼj ikʼbʼil quʼn ex tzul tqʼoʼn tzaqʼwebʼil kyiʼj xjel lu:

• ¿Tiquʼn at nim ikʼbʼil?

• ¿Tiʼ jaku bʼant quʼn tuʼn tkubʼ tiʼj ikʼbʼil?

• ¿Kpolpe jun qʼij jatumel kbʼel naj ikʼbʼil?