¿TIʼ JAKU BʼANT QUʼN TUʼN TKUBʼ TIʼJ IKʼBʼIL?

3 | Qʼimetza ikʼbʼil at toj t-ximbʼetza

In tzaj tqʼamaʼn Tyol Dios jlu:

«Kytzoqpinkje qeju tiʼchaq at twitz Txʼotxʼ, noq oʼkx kychʼixpunke kyximbʼetze, tuʼntzun tel kynikʼe kyuʼnx kyibʼe alkye bʼaʼn ex alkye in xi tkʼamoʼn Dios ex alkyeju tzʼaqli tajbʼil» (ROMANOS 12:2, TNM).

¿Tiʼ t-xilen jlu?

Nim toklen toj twitz Dios aju in kubʼ qximen (Jeremías 17:10). Ax tok, nya oʼkx tuʼn tok qxqʼuqin aju in xi qqʼamaʼn ex aju in bʼant quʼn, tuʼnju toj qximbʼetz ex toj qanmi in xi tzyet tuʼn tkubʼ qnaʼn ikʼbʼil. Tuʼntzunju, mintiʼ tuʼn qximen tiʼj jun tiʼ aju jaku kubʼ qnaʼn ikʼbʼil tuʼn. Qa ma bʼant jlu quʼn, ok kchʼexpajel qximbʼetz ex ya mlay ten ikʼbʼil toj qanmi.

Ximinkuya tuʼn tbʼant jlu tuʼna:

Bʼaʼn tuʼn tel tnikʼa tiʼj tiʼ in kubʼ tnaʼna ex tiʼ t-ximbʼetza at kyiʼj txqantl, mas kyiʼj qeju junxitl kyyajil ex kytnam. Xjelinkuya jlu: «¿Tiʼ nximbʼetze at kyiʼj xjal lu? ¿In kubʼpe nximane junjun tiʼ kyiʼj noq tuʼnju ojtzqiʼn junjun tiʼchaq wuʼne kyiʼj moqa tuʼnju in xi nqʼoʼne ambʼil tuʼn tten ikʼbʼil toj wanmiye?». Tzʼok tilil tuʼna tuʼn miʼn tok tkeʼyina qe redes sociales, qe película ex junjuntl saqchbʼil in ten ikʼbʼil ex bʼiybʼel kyuʼn toj qanmi.

Jaku tzʼonin Tyol Dios qiʼj tuʼn ya miʼn tten ikʼbʼil toj qanmi ex toj qximbʼetz.

Kwest tuʼn tel qnikʼ tiʼj qximbʼetz ex tiʼjju in kubʼ qnaʼn. Pero jaku tzʼonin Tyol Dios qiʼj tuʼnju in «nneʼl tnikʼ tiʼj qximbʼetz ex aju qaj tuʼn qbʼinchante» (Hebreos 4:12). Tuʼntzunju, bʼaʼn tuʼn t-xnaqʼtzana tiʼj Tyol Dios ex jaku tzʼok tmojbʼaʼna aju kʼelel tnikʼa tiʼj tukʼilju in kubʼ t-ximana. Ax ikx, bʼaʼn tuʼn tok tilil tuʼna tuʼn tten t-ximbʼetza ik tzeʼn o tzʼel tnikʼa tiʼj toj Biblia. Jaku kubʼ «kyiʼj qeju [tiʼchaq] at kyipumal» tuʼn Tyol Dios, aqeju at toj qximbʼetz ex toj qanmi, ik tzeʼn ikʼbʼil (2 Corintios 10:4, 5).

Aju in bʼaj toj ambʼil jaʼlo—STEPHEN

Chʼexpaj t-ximbʼetz

El ikʼun Stephen ex qe toj tja kyuʼn qe saq xjal. Tuʼntzunju, bʼaʼn ela kyximbʼetz junjun aj kawil toj twitz tuʼnju e kolin kyiʼj xjal. Tuʼnju ten ikʼbʼil toj tanmi kubʼ tbʼinchaʼn nim nya bʼaʼn. In tzaj tqʼamaʼn jlu: «In qoʼxtoqe toj cine kyukʼil wamiwe tuʼn tok qkeʼyine qe película tiʼj nya bʼaʼn in nok bʼinchaʼn kyiʼj xjal te África atz Estados Unidos. Tej tok qkeʼyine jlu, tzaj nim qqʼoje. Tuʼntzunju, bʼaj qbʼyoʼne qe xjal saq che keʼyin ateʼ toj cine ex o xiʼye jyol kye mas kyoj junjuntl lugar».

Chʼexpaj t-ximbʼetz Stephen tej t-xi tzyet tuʼn t-xnaqʼtzan tiʼj Tyol Dios kyukʼil testigos de Jehová. In tzaj tqʼamaʼntl jlu: «Tuʼnju otoq bʼant nim tiʼchaq nya bʼaʼn wuʼne, in jaw labʼine kyiʼj junjun tiʼchaq in bʼant kyuʼn testigo de Jehová. Jun techel, tej t-xiʼ jun testigo de Jehová saq xjal toj juntl tnam, kyaj tqʼoʼn qe tkʼwal tukʼil jun familia qʼeq xjal. Ax ikx, oʼkx tkʼamoʼn jun familia saq xjal jun kuʼxun qʼeq xjal toj tja tuʼnju mintiʼtoq tja». Ok qeʼ tkʼuʼj Stephen tiʼj qa in kubʼ kyyekʼin testigos de Jehová kʼujlabʼil kyxolx ik tzeʼn kyerman kyibʼ, ik tzeʼn kyaj tqʼamaʼn Jesús tuʼn tbʼant kyuʼn axix tok okslal (Juan 13:35).

¿Tiʼ bʼant tuʼn Stephen tuʼn ya miʼn tkubʼ tnaʼn ikʼbʼil ex tuʼn ya miʼn tbʼiyen? Onin tiʼj aju in tzaj qʼamaʼn toj Romanos 12:2. Tqʼamatl jlu: «El nnikʼe tiʼj qa iltoq tiʼj tuʼn tchʼexpaj nmode. Ok tilil wuʼne tuʼn miʼn tokx nqʼon wibʼe kyoj qʼoj ex tuʼn tkubʼ nmasin wibʼe». Ya ma tzikʼ 40 abʼqʼi in tzalaj Stephen tuʼnju ya mintiʼ in kubʼ tnaʼn ikʼbʼil toj tanmi.