Ok qʼuqbʼil tkʼuʼj Abrahán toj malbʼil

¿NTILA, mo ntlome tiʼ nbʼant tuʼn Abrahán tzalu? Qʼiʼn jun kuchiy tuʼn, okle kbʼel tbʼiyoʼn tkʼwaʼl. ¿Tiquʼn? Tnejel, kʼelel qnikʼ tzeʼn ul itzʼji tkʼwal Abrahán tukʼe Sara aju t-xuʼjil.

Naʼntza, tzaj ttziyen Dios kye qa tzultoq jun kykʼwaʼl. Aj qok ten ximel tiʼj jlu melayxtaq japonbʼaj twiʼ, tuʼnju otaq chi tijinxix Abrahán tukʼe Sara. Atzunte Abrahán qʼuqleteq tkʼuʼj qa jaku bʼanttoq tiʼxku tuʼn Dios. Tuʼntzunjo, ¿tiʼ tzaj?

Otaqxi tzikʼ jun abʼqʼi ttzajlen ttziyen Dios jlu kye. Tej otaq japun Abrahán toj 100 abʼqʼi atzunte Sara 90, ul itzʼj jun kyneʼ Isaac tbʼi ok. ¡Otaq japunbʼajjo tzaj ttziyen Dios!

Tejtzun tchʼiy Isaac, ok qʼuqbʼil tkʼuʼj Abrahán toj malbʼil tuʼn Jehová. ‹¡Abrahán!, chi Dios te. ¡Lu qine lu!, chi Abrahán xi ttzaqʼweʼn›. Xitzun tqʼamaʼn Dios te Abrahán kyjaʼ: ‹Qʼinxa Isaac aju oʼkxku jun tkyʼajala ex txiʼya. Bʼiyonku tkʼwaʼla te jun oyaj weye twiʼ witz kxel nyekʼune teya›.

¡Nim bʼisbʼajil tzaj toj tanmi Abrahán, tuʼnjo nimtoq tkʼujlabʼil tiʼj tkʼwaʼl! Ex qa naʼnx tuʼne, otaq tzaj ttziyen Dios qa chi anqʼilteq tkʼwal Abrahán tuj txʼotxʼ te Canaán. ¿Tzeʼnteqtzun jaku bʼant jlu naqwit otaq kyim Isaac? Mitiʼtoq nel tnikʼ Abrahán tiʼj jlu, kubʼx tbʼinchan aju tzaj tqʼmaʼn Dios te.

Kubʼ tkʼaloʼn Abrahán Isaac tej kyjapun twiʼ witz ex kubʼ tqʼoʼn twiʼ jun patbʼil aju otaq jaw tbʼinchan. Jatztzun tiʼn kuchiy tuʼn tkubʼ tbʼiyoʼn tkʼwaʼl. Tojx ambʼil aju tzaj yolin jun t-anjel Dios, chi kyjalu: ‹¡Abrahán, Abrahán!, chi anjel. ¡Lu qine lu!, chi Abrahán xi ttzaqʼweʼn›.

‹Miʼn kubʼ tbʼyoʼna aju qʼa›, chi Dios te. ‹Quʼn ma wile qʼuqli tkʼuʼja wiʼje, tuʼnjo mintiʼ xkubʼ t-xkʼayina tuʼn ttzaj tqʼoʼna oʼkxku jun tkʼwaʼla weye›.

¡Attoq nim qʼuqbʼil tkʼuʼj Abrahán tiʼj Dios! Qʼuqlitoq tkʼuʼj qa jakutoq bʼant tkyaqil tuʼn Jehová, axtpe ikx qʼuqleteq tkʼuʼj Abrahán qa jakutaq jaw itzʼji Isaac tuʼn Jehová kyxol kyimni. Nya tajteq Dios tuʼn tkubʼ tbʼiyoʼn Abrahán Isaac; kyaj qʼet (jitzʼle) jun rit, moqa ẍneʼl, tuʼn Dios kyxol tal tzeʼ atz nqaku kytxlaj, ex tzaj tqʼamaʼn Dios te Abrahán tuʼn tkubʼ tpatun jlu te oyaj te t-xel (tchʼixel) Isaac.