Ok qʼuqeʼ tkʼuʼj Job tiʼj Dios

NTZAJ qbʼis tuʼn yabʼ lu. Job tbʼi xjal lu, atzun xuʼj lu atzun t-xuʼjilju. ¿Nel tnikʼe tiʼ nxi tqʼmaʼn te Job? «Maslo bʼaʼn tuʼn tyolina mya bʼaʼn tiʼj Dios tuʼntzun tkyima». Qo xnaqʼtzal tiʼj tiquʼn xi tqʼamaʼn a yoljo te Job ex tiquʼn tzaj nim yajbʼil toj tanqʼibʼil Job.

Qʼuqletoq tkʼuʼj Job tiʼj Jehová ex kukx kubʼ tbʼinchan tajbʼil. In nanqʼintoq tuj txʼotxʼ te Uz, aju nqakuteq tok ttxlaj Canaán. Kʼujlaʼnxixtaq Job tuʼn Jehová, ex atteq jun ikʼel twitz. ¿Ajtzqiʼn tuʼna alkye?

Ateq Satanás aju tajaw il. Naʼntze, aju anjel mya bʼaʼn lu ikʼon Jehová tuʼn. bʼantpe te tuʼn, tuʼn miʼ tokx kybʼiʼn Adán ex Eva tyol Jehová, ex kubʼ t-ximen qa jakutoq tzʼel laqʼeʼ alkyexku xjal tuʼn tiʼj Jehová. ¿Bʼantpetzulo jlu tuʼn? Mitiʼ bʼant tuʼn. Ximinxpeye kyiʼj qeʼ xjal o qo xnaqʼtzan kyiʼj aʼyejo kukx e ajbʼen te Jehová. Qʼamantze, ¿jteʼ jaku tzul tuj tkʼuʼja?

Tej otaqxi kyim Jacob ex José atz Egipto, oʼkxtl Job ten twitz tkyaqil Txʼotxʼ aju kukx kubʼ tbʼinchan tajbʼil Jehová. Tajbʼiltoq Jehová tuʼn t-xi tyekʼen te Satanás qa mlaytaq chi ok kykyaqil xjal tuʼn te mya bʼaʼn. Tuʼntzunjo, xi tqʼamaʼn te: ‹¿Mape tila, mo mape tlome Job? Mi aʼl juntl xjal twitz txʼotxʼ in pon ik tzaʼn te, in nanqʼin tuj tumel ex tzʼaqlexix›.

‹Tzʼaqle taʼ Job twitze›, chi Satanás, ‹naq tuʼnju kʼiwlaʼn tuʼna, ex tuʼnju ma chmet nim tiʼchaq tbʼanel te. Qatzen qa ma tzʼel tiʼna tkyaqilju at te, ok kyolil mya bʼaʼn tiʼje›.

Tuʼntzejo, xi ttzaqʼweʼn Jehová te kyjalu: ‹Txiʼya, qʼimele tkyaqilju at te. Bʼinchama alkyexku mya bʼaʼn tiʼj Job. Oktzen kʼelel qnikʼ tiʼj qa ok kyolil mya bʼaʼn yol wiʼje. Oʼkx miʼn kubʼ tbʼyoʼna›.

Tnejel, ex elqʼaʼn qeʼ twakiẍ ex qeʼ tkamey Job, ex e kubʼ bʼiyoʼn t-rit, mo t-ẍneʼl. Ax ikx i kyim 10 tkʼwaʼl ex qeʼ tmeʼl tuʼn nim kyqʼiqʼ tzaj, tkyaqil jlu bʼent tuʼn Satanás. Yajxitl, tzaj tqʼoʼn jun mya bʼaʼn yabʼil tiʼj Job, ik tzeʼnj tkuʼx tuj tilbʼilal, nimxix kʼixkʼoj ikʼx tuʼn Job. Tuʼntzunjo, xi tqʼmaʼn t-xuʼjil te: ‹Maslo bʼaʼn tuʼn tyolina mya bʼaʼn tiʼj Dios tuʼntzun tkyima›. Mitiʼte Job xi tbʼiʼn jlu. Ax ikx e ul oxe nya axtok tamiw ex xi kyqʼamaʼn te qa tuʼnjo mya bʼaʼn oteq kubʼ tbʼinchan toj tanqʼibʼil. Atzun te Job kukx ajbʼen te Dios.

O tzalaj Jehová tuʼn jlu. Tejtzun tbʼet ambʼil, tzaj tkʼiwlaʼn Jehová Job, ik tzeʼnj nkux tkiʼne toj tilbʼilal lu. El tiʼn tyabʼ ex tzaj tqʼoʼntl 10 tkʼwaʼl. Ax ikx tzaj tqʼoʼntl kabʼe maj twakeẍ, kabʼe maj t-rit ex kabʼe maj tkamey twitzju attoq te tnejel.

¿Kukxpetzelo kʼajbʼel teya te Jehová ik tzaʼn Job? Qa ma bʼant ikjo tuʼne, ax ikx tzul kʼiwlaʼne tuʼn Dios. Ex jaku bʼant tuʼn tanqʼina te jun majx aj tok tkyaqil twitz Txʼotxʼ te jun tbʼanel najbʼel ik tzeʼntoq Edén.