Aju tmajen Dios Job tbʼi

Toj jun tnam Uz tbʼi, attoq jun xjal in najbʼentoq te Jehová. Job tbʼi xjal lu, qʼinentoq ex nimtoq kybʼet toj tja at. Ax ikx tbʼanel xjal ex onin kyiʼj qeju mintiʼ at chʼin kye, kyiʼj xuʼj mintiʼ kychmil ex kyiʼj kʼwaʼl mintiʼ kytat. In bʼanttoq tbʼanel tiʼchaq tuʼn Job. ¿Tiʼ teya t-xim tiʼj? ¿Tuʼnpetzulo tbʼanel tbʼinchbʼen mintiʼ tzaj nya bʼaʼn tiʼj?

Mintiʼtoq ojtzqiʼn tuʼn Job, pero in noktoq tqʼoʼn Satanás twitz tiʼj. Xi tqʼamaʼn Jehová te Satanás: «¿Mape tzʼok tqʼoʼn twitza tiʼj nmajene Job? Mintiʼ juntl xjal at ik tzeʼn te twitz Txʼotxʼ. In nimen weye ex tbʼanel tbʼinchbʼen». Xitzun ttzaqʼweʼn Satanás: «In nimen teya tuʼnju in xqʼuqina tiʼj, in tzaj tkʼiwlaʼna, in xi tqʼoʼna ttxʼotxʼ ex qe talun. Qʼimela tkyaqil te ex ya mlay tzʼajbʼentl teya». Xi tqʼamaʼn Jehová te: «Jaku tzʼok tqʼoʼna toj malbʼil, pero miʼn kubʼ tbʼyoʼna». Xi tqʼoʼn Jehová ambʼil te Satanás tuʼn ttzaj tiʼn nya bʼaʼn tiʼj Job, ¿ojtzqiʼn tuʼna tiquʼn? Tuʼnju ojtzqiʼntoq tuʼn Jehová qa kukx kxeʼl tbʼiʼn Job te.

Ok tbʼinchaʼn Satanás nimxix nya bʼaʼn tiʼj Job. Tnejel, e ajbʼen junjun xjal tuʼn aʼyeju sabeos kybʼi tuʼn t-xi kyelqʼaʼn qe twakẍ ex qe tbur. Ex e kyim qe t-ẍneʼl tuʼn qʼaqʼ. Ax ikx e ajbʼen juntl kʼloj xjal tuʼn aʼyeju caldeos kybʼi tuʼn t-xi kyelqʼaʼn qe tkamey Job. Nya oʼkxju, ax ikx e kyim qe tmajen tuʼn, aʼyeju in che xqʼuqintoq kyiʼj talun. Pero aju mas nya bʼaʼn tzaj yajxitl: kykyaqil qe tkʼwaʼl Job e kyim tej ttzaj tzʼaq ja jatumel in che waʼntoq. Tzaj nimxix tbʼis Job tuʼn jlu, pero kukx ajbʼen te Jehová.

Tajtoq Satanás tuʼn ttzaj mas yajbʼil tiʼj Job, tuʼntzunju ok tqʼoʼn txʼaʼk tiʼj tkyaqil t-xmilal. Tuʼn jlu tnaʼ Job nimxix kʼixkʼoj. Mintiʼtoq ojtzqiʼn tuʼn tiquʼn otoq tzaj nimxix nya bʼaʼn tiʼj, pero kukx ajbʼen te Jehová. Tzaj tqʼoʼn Dios twitz tiʼj jlu ex nimxix jaw tzalaj tiʼjju bʼant tuʼn Job.

Yajxitl, xi tsamaʼn Satanás oxe xjal tuʼn tok Job toj malbʼil tuʼn. Xi kyqʼamaʼn xjal lu te Job: «Malo kubʼ tbʼinchaʼna il, atzun jaʼlo taja tuʼn tkubʼ tewina. Tuʼntzunju ma kubʼ tqʼoʼn Dios tkastiwoya». Xi ttzaqʼweʼn Job: «Mintiʼ we ma bʼant jun nya bʼaʼn wuʼn». Pero tej tbʼet ambʼil kubʼ t-ximen qa a Jehová tzaj qʼonte tkyaqil nya bʼaʼn tiʼj ex tqʼama qa nya tzʼaqli Dios tukʼil.

Attoq jun kuʼxun Elihú tbʼi in bʼintoq tiʼj kyyol ex mintiʼ xi tqʼamaʼn jun tyol. Pero kubʼ t-ximen tuʼn t-xi tqʼamaʼn jun tyol ex tqʼama: «Kykyaqile tzpetni ateʼye. Tbʼanelxix te Jehová, ex mas twitzju in kubʼ qximin, mlay bʼant jun nya bʼaʼn tuʼn. Tkyaqil qʼanchaʼl toj twitz ex in nonin kyiʼj xjal aj ttzaj nya bʼaʼn kyiʼj».

Ax ikx tzaj yolin Jehová te Job. Xi tqʼamaʼn: «¿Jatumel taʼtoqa tej tkubʼ nbʼinchaʼne kyaʼj ex Txʼotxʼ? ¿Tiquʼn in kubʼ t-ximana qa in kubʼ nbʼinchaʼne nya bʼaʼn? In yolina ex mintiʼ ojtzqiʼn tuʼna tiquʼn in che ikʼ junjun tiʼ». Tqʼama Job qa nya bʼaʼn aju kubʼ t-ximen ex tqʼama: «Ma chin el txalpaje. Najsama tuʼnju nyole ma txi nqʼamaʼne. Otoq tzʼok nbʼiʼne tqanil tiʼja, pero jaʼlo ma tzʼok wojtzqiʼnxixa ex qʼanchaʼl qa tkyaqil jaku bʼant tuʼna».

Tej kykubʼ bʼaj nya bʼaʼn tiʼj Job, kubʼ tqʼanin Jehová te ex xi tqʼoʼn mas tiʼchaq te twitzju at te tnejel. Anqʼin Job nim ambʼil ex toj tzalajbʼil. Tzaj kʼiwlaʼn tuʼn Jehová tuʼnju kukx nimen te, maske at junjun maj kwest el toj twitz. ¿Yajtzun teya? ¿Kʼokela ik tzeʼn te Job ex kukxpe kʼajbʼela te Jehová, maske ma tzaj nya bʼaʼn tiʼja?