Rut ex Noemí

TOJ Tuʼjil Tyol Dios ok kkanetel jun uʼj tuʼne aju Rut tbʼi. Ajo nyolin tiʼj jun ja xjal e anqʼin tuj ambʼil tej aʼyetoq jwes nejenel kye aj Israel. Aju Rut jun txinjo te Moab; nyateq te Israel te, aju tnam etzan tuʼn Dios. Tejtzun tel tnikʼ Rut tiʼj axixtok Dios, aju Jehová, ok tkʼujlaʼnxix. Atzen te Noemí jun xuʼj otaq tijin aju onin tiʼj Rut tuʼn tel tnikʼ tiʼj Jehová.

Aj Israel te Noemí. Tej mitiʼxixtaq wabʼj toj tnam Israel xiʼ Noemi tukʼex tchmil ex kabʼe tal najal atz tuj tnam Moab. Pon jun qʼij, jatumel kyim tchmil Noemí. Yajxitl, e kubʼ mojeʼ qe tal Noemí kyukʼil kabʼe xuʼj te Moab ajo Rut ex Orpá kybʼi. Tikʼtl 10 abʼqʼi, ax ikx e kyim tal Noemí. ¡Nim bʼisbʼajil tzaj! ¿Tiʼtoqtl kbʼantel tuʼn Noemí jaʼle?

Kubʼ t-ximin Noemí tuʼn tmeltzʼaj kyukʼe t-xjalel. Kyajbʼilteq Rut tukʼe Orpá tuʼn kyxiʼ tukʼil Noemí, tuʼntzejo e ok lepe tiʼj. Tejtzun in che bʼettaq, xi tqʼamaʼn Noemí te Rut ex te Orpá: ‹Ku kyaje kyjaye, ex bʼaʼn tuʼn kykyaj tene tukʼil kytxuʼye›.

E tzaj tchleʼn Noemí qe tlibʼ ex tma qa kʼelel bʼet. E oktzun ten tlibʼ oqʼel, tuʼnjo kʼujlaʼnxixtoq Noemí kyuʼn. Kyqʼama kyjalu: ‹¡Miʼn! Qo xeʼl qeye tukʼila tzmax tuj ttanmiya›. Tzajtzun ttzaqʼweʼn Noemí kyjalu: ‹Ku kyaje wal, mas bʼaʼn che teleye toj kytname›. Anj meltzʼajtzen Orpá tuj ttnam. Atzun te Rut mixtiʼ aj.

Xitzun tmaʼn Noemí te Rut: ‹Lu Orpá ma tzʼaj tuj ttnam. Ax ikx teya ku tanje tukʼil›. Tzajtzen ttzaqʼweʼn Rut te: ‹¡Miʼn tzaj tmaʼne weye tuʼn tkyaj nkolina (ntzaqpiʼne)! Ex tuʼn tel npaʼn wibʼe tiʼja, chin xeʼle tukʼila jaxku tumel ma txiʼye ex junx chin najaleye tukʼila. Aju ttname kʼokel te ntanmiye ex aju tDiose kʼokel te nDiose. Jatumel kkyimelaya axtzun chin kyimeleye, jatumel kbʼelex moquʼna axtzun chin bʼelex maquʼne›. Tej t-xi tqʼamaʼn Rut jlu, mitiʼtl xi tmaʼn Noemí mastl tyol.

E pontzun xuʼj lu atz toj tnam Israel ex atz e kyaj ten anqʼil atztzu. Oktzen ten naj Rut aqʼunal kyoj kojbʼil, quʼn oteq pon ambʼil tuʼn tjaw chmet twitz awal. Jun xjal Boaz tbʼi xi tqʼoʼn ambʼil te Rut tuʼn tjaw tiʼn (tsikʼin) tqan cebada tuj ttxʼotxʼ. ¿Ojtzqiʼn tuʼne alkye tnan Boaz? Atoq Rahab, aju te tnam Jericó.

Jun maj xi tqʼamaʼn Boaz te Rut: ‹Ma nbʼiye tkyaqilju bʼaʼn o tbʼinchaya tiʼj tlibʼa atxix tej tkyim tchmila, ex ma kyaj tqʼoʼn tmane tukʼix ttxuʼya ex ttanmiya noq tuʼn tule najal qxole, maske miʼn ojtzqiʼn qoʼye tuʼna. ¡Awt Jehová tzaj kʼiwlan teya!›

Xe ttzaqʼweʼn Rut: ‹Tat kukxwit tbʼinchaya xtalbʼil weye. Ma qʼuqbʼanjtz nkʼuʼje tuʼn tyole ex ma yolina wukʼile tukʼil tkʼujlalila›. Tbʼanelxix ela Rut toj twitz Boaz, tejtzun tikʼ chʼintl ambʼil kubʼ mojeʼ Boaz tukʼe Rut. ¡O tzalaj Noemí tuʼn jlu! Atzun tej tul itzʼji tnejel tkʼwaʼl Boaz tukʼil Rut ajo Obed tbʼi mas o tzalajxixtl Noemí tuʼn jlu. Tejtzen tbʼet ambʼil ok Obed te tchman David, kelel mas qnikʼ tiʼj David yajxitl.