XNAQʼTZBʼIL 01
¿Tzeʼn jaku tzʼonin Biblia tiʼja?
Ateʼ nim xjal in kubʼ kyximen tiquʼn in qo anqʼin, tiquʼn in qo kyim, tiquʼn at kʼixkʼoj ex tiʼ kbʼajel qiʼj toj ambʼil tzul. Ax ikx in tzaj bʼaj qkʼuʼj kyiʼj junjuntl tiʼchaq tkyaqil qʼij, ik tzeʼn tuʼn tkanet twi qwa ex tuʼn qtzalaj kyukʼil toj qja. Ateʼ nim xjal o tzʼel kynikʼ tiʼj qa in tzaj tqʼoʼn Biblia tzaqʼwebʼil kyiʼj xjel nim kyoklen ex in tzaj tqʼoʼn junjun consej jaku che onin qiʼj. ¿Jakupe tzʼonin Tyol Dios tiʼj jun xjal ojtzqiʼn tuʼna?
1. ¿Alkye junjun xjel in tzaj ttzaqʼweʼn Tyol Dios?
In tzaj tqʼoʼn Tyol Dios tzaqʼwebʼil kyiʼj xjel nim kyoklen ik tzeʼn qe jlu: ¿Tzeʼn tzaj tzyet qanqʼibʼil? ¿Tiquʼn atoʼ tzalu twitz Txʼotxʼ? ¿Tiquʼn in tzaj nya bʼaʼn kyiʼj tbʼanel xjal? ¿Tiʼ in bʼaj qiʼj aj qkyim? ¿Tiquʼn at nim qʼoj? Ex ¿okpe kpol ambʼil tuʼn tkubʼ xiten Txʼotxʼ? In tzaj ttzaqʼweʼn Tyol Dios qe xjel lu ex ateʼ nim millón xjal o che tzalaj tiʼjju tzaqʼwebʼil o kanet kyuʼn toj.
2. ¿Tzeʼn in nonin Tyol Dios qiʼj tuʼn qtzalaj junjun qʼij?
In tzaj tqʼoʼn Biblia tbʼanel consej qe. Jun techel, in tzaj tqʼamaʼn tzeʼn jaku che tzalajxix ja xjal, tzeʼn jaku qo tzalaj tiʼj qaqʼun ex tiʼ jaku bʼant quʼn tuʼn miʼn qsikt. Akux in xnaqʼtzana tiʼj uʼj lu, kʼelel tnikʼa tiʼjju in tzaj tqʼamaʼn Tyol Dios tiʼj xnaqʼtzbʼil lu ex kyiʼj junjuntl. Ax ikx kʼelel tnikʼa tiʼj qa «tkyaqil aju tzʼibʼan tuj Tuʼjil» at tajbʼen te qe (2 Timoteo 3:16).
Mintiʼ in nok uʼj lu te t-xel Biblia, sino oʼkx kʼonil tiʼja tuʼn telxix tnikʼa tiʼj. Tuʼntzunju, jaku jaw tuʼjina kykyaqil taqikʼ Tyol Dios tkuʼx kyoj xnaqʼtzbʼil ex jaku tzʼok tmojbʼaʼna tukʼilju in nel tnikʼa tiʼj.
QO JYON MAS TQANIL
Qo xnaqʼtzan tiʼj tzeʼn o tzʼonin Biblia kyiʼj junjun xjal, tiʼ jaku bʼant quʼn tuʼn qtzalaj aj tjaw quʼjin ex tiʼ tbʼanel tzul qe qa ma tzʼonin juntl xjal qiʼj.
3. In tzaj tyekʼin Biblia qbʼe
Ik tten Biblia ik tzeʼn jun lámpara aju in tzaj tyekʼin qbʼe. Jaku tzʼonin qiʼj tuʼn tjaw qjyoʼn aju mas bʼaʼn ex tuʼn tel qnikʼ tiʼjju kbʼajel toj ambʼil tzul.
Kyuʼjinktze Salmo 119:105 ex che yoline kyiʼj xjel lu:
¿Tiʼtoq t-ximbʼetz xjal lu at tiʼj Tyol Dios?
¿Tiʼ teya t-ximbʼetz tiʼj Tyol Dios?
4. In tzaj tqʼoʼn Biblia tzaqʼwebʼil kyiʼj qe qxjel
El tnikʼ jun xuʼj tiʼj qa in tzaj tqʼoʼn Tyol Dios tzaqʼwebʼil kyiʼj xjel otoq ximen tiʼj toj nimku abʼqʼi. Kyqʼonke kywitze tiʼj VIDEO ex che yoline kyiʼj xjel lu:
¿Alkye junjun xjel ximen xuʼj tiʼj moqa qya?
¿Tzeʼn onin tiʼj xuʼj tej t-xnaqʼtzan tiʼj Biblia?
In tzaj tqʼamaʼn Tyol Dios qa bʼaʼn tuʼn t-xi qqanin qxjel. Kyuʼjinktze Mateo 7:7 ex che yoline tiʼj xjel lu:
¿In kubʼpe t-ximana qa jaku tzaj tqʼoʼn Biblia tzaqʼwebʼil kyiʼj junjun t-xjela? ¿Alkyeqe?
5. Tbʼanel jaku tzʼela toj twitza qa ma uʼjina tiʼj Biblia
Nim xjal kygan tuʼn kyuʼjin tiʼj Biblia ex in nonin kyiʼj. Kyqʼonke kywitze tiʼj VIDEO ex che yoline kyiʼj xjel lu:
¿Tiʼ kyximbʼetz qʼa ex txin at tiʼjju tuʼn kyuʼjin?
¿Tiquʼn junxitl kyximbʼetz qʼa ex txin at tiʼjju tuʼn kyuʼjin tiʼj Biblia?
In tzaj qʼuqbʼaʼn qkʼuʼj kyuʼn xnaqʼtzbʼil ateʼ toj Biblia. Kyuʼjinktze Romanos 15:4 ex che yoline tiʼj xjel lu:
¿Tajpe teya tuʼn tel mas tnikʼa tiʼj qʼuqbʼil qkʼuʼj in tzaj tqʼoʼn Biblia?
6. Jaku tzʼel qnikʼ tiʼj Tyol Dios qa ma tzʼonin juntl qiʼj
Ateʼ nim xjal kygan tuʼn kyuʼjin tiʼj Biblia, noqtzun tuʼnj, tbʼanel o tzʼela toj kywitz tuʼnju o tzʼonin juntl kyiʼj. Kyuʼjinktze Hechos 8:26 a 31 ex che yoline tiʼj xjel lu:
¿Tiʼ kʼonil qiʼj tuʼn tel qnikʼ tiʼj Biblia? (Kyqʼonke kywitze tiʼj versículo 30 ex 31).
El tnikʼ xjal te Etiopía tiʼj Tyol Dios tuʼnju onin juntl tiʼj. Toj ambʼil jaʼlo, ateʼ nim xjal kygan tuʼn kyxnaqʼtzan tiʼj Biblia noq tuʼnju in nonin juntl kyiʼj.
AJU IN TZAJ KYQʼAMAʼN JUNJUN XJAL: «Noqx gan in qo xnaqʼtzan tiʼj Biblia».
¿Tiʼ t-ximbʼetza tiʼj jlu? ¿Tiquʼn?
TOJ CHʼIN YOL
In che kanet consej quʼn toj Tyol Dios aʼyeju in che onin toj qchwinqlal, in tzaj tqʼoʼn tzaqʼwebʼil kyiʼj junjun qxjel ex in tzaj tqʼuqbʼaʼn qkʼuʼj.
Aju ma qo yolin tiʼj
¿Alkyeqe consej jaku che kanet quʼn toj Biblia?
¿Alkye junjun xjel in tzaj tqʼoʼn Biblia tzaqʼwebʼil kyiʼj?
¿Tiʼ taja tuʼn tel tnikʼa tiʼj toj Biblia?
OJTZQINKA CHʼINTL
Ojtzqinka tzeʼn jaku che onin consej ateʼ toj Biblia toj qanqʼibʼil.
«Te jumajx ojtzqibʼil tkuʼx toj Tyol Dios» (Aju Xqʼuqil, tajlal 1 te 2018)
Qʼonka twitza tiʼj tzeʼn o tzʼonin Biblia tiʼj jun xjal tuʼn tkubʼ kyiʼj nya bʼaʼn t-ximbʼetz.
Ojtzqinka qe tbʼanel consej in tzaj tqʼoʼn Biblia tuʼn qtzalaj kyukʼil toj qja.
«12 consej tuʼn qtzalaj kyukʼil toj qja» (¡Weʼktza!, tajlal 2 te 2018)
Ojtzqinka tiʼ in tzaj tqʼamaʼn Biblia tiʼj alkye in kawin tibʼaj twitz Txʼotxʼ.
¿Tiquʼn bʼaʼn tuʼn t-xnaqʼtzana tiʼj Tyol Dios? (video nim tqan) (3:14)