Tzʼajbʼenx qtembʼil toj Internet tuʼna tuʼn kyxi t-xnaqʼtzaʼn tkʼwaʼla
1. ¿Tiquʼn o bʼaj bʼinchaʼn aju jatumel in tzaj qʼamaʼn «Niños» toj qtembʼil toj Internet?
1 Aju qtembʼil toj Internet, jw.org, o bʼaj bʼinchaʼn kye kykyaqil xjal te alkyexku kyabʼqʼi. Aju jatumel in tzaj qʼamaʼn «Niños» toj qtembʼil toj Internet (in qo okx toj Enseñanzas bíblicas > Niños) in nonin kyiʼj kʼwaʼl ex kyiʼj kytat tuʼn tok kyamiwin kyibʼ ex tuʼn kyok te tamiw Jehová (Deut. 6:6, 7). ¿Alkye tten jaku tzʼajbʼen tembʼil lu tuʼna tuʼn kyxi t-xnaqʼtzaʼn tkʼwaʼla moqa tala?
2. ¿Alkye tten jaku jaw tjyoʼna tbʼanel xnaqʼtzbʼil tuʼn kyxi t-xnaqʼtzaʼn tkʼwaʼla naq alkyex abʼqʼi iqʼin kyuʼn?
2 Ximana tiʼj alkye mas bʼaʼn. Nya kykyaqil kʼwaʼl junxqe (1 Cor. 13:11). Qa ikju, ¿alkye tten jaku jaw tjyoʼna tbʼanel xnaqʼtzbʼil tuʼn kyxi t-xnaqʼtzaʼn tkʼwaʼla naq alkyex abʼqʼi iqʼin kyuʼn? Bʼaʼn tuʼn t-ximana tiʼj jlu: «¿Alkye xnaqʼtzbʼil tbʼanel jaku tzʼela toj kywitz nkʼwaʼle? ¿Alkye xnaqʼtzbʼil jaku tzʼok toj kywiʼ? ¿Jniʼ ambʼil jaku tzikʼx kyuʼn tuʼn kyxnaqʼtzan?» Tuʼn t-xnaqʼtzana kyukʼe tkʼwaʼla te oxe abʼqʼi moqa naʼmx kyjapun toj oxe abʼqʼi, jaku tzʼajbʼen «Mis primeras lecciones de la Biblia» tuʼna aju at toj jw.org. At junjuntl ja xjal tbʼanel o tzʼela toj kywitz tuʼn tajbʼen kyuʼn aju «De padres a hijos». Ax ikx, jaku tzʼajbʼen junjuntl onbʼil lu tuʼna:
3. ¿Alkye tten jaku che ajbʼenxix txʼolbʼabʼil ex aqʼuntl ateʼ toj «Ideas para la adoración en familia» kyuʼn tatbʼaj?
3 Junjun tten tuʼn qxnaqʼtzan toj Ambʼil in xi qqʼoʼn kyukʼe toj qja te Jehová. Atz jatumel in tzaj qʼamaʼn «Ideas para la adoración en familia» at junjun tbʼanel onbʼil kye tatbʼaj. Bʼaʼn tuʼn tokxa jatumel in tqʼamaʼn «Descargar» ex bʼaʼn tuʼn tkubʼ tuʼjina aju «Guía para los padres» tuʼn tel tnikʼa tiʼj alkye tten jaku che kubʼ xnaqʼtzet txʼolbʼabʼil ex alkye tten jaku bʼant junjun aqʼuntl. Bʼaʼn tuʼn kyajbʼen qe tilbʼilal tuʼn kyonit qe tal kʼwaʼl, ik tzeʼn tuʼn tok qʼet kykʼaʼ qe tilbʼilal. Aʼyetzen kʼwaʼl ma che chʼiy chʼintl, jaku chex onit tuʼn ttzaj kyjyoʼn junjun tqanil tiʼj aju kbʼel xnaqʼtzet. Tkyaqil aqʼuntl at toj «Guía para los padres» at toklen tiʼj junx txʼolbʼabʼil moqa tiʼj junx xnaqʼtzbʼil in jatz toj Tyol Dios. Iktzun tten kykyaqil toj qja jaku bʼant jun tiʼ kyuʼn aj qxnaqʼtzan.
4. ¿Tiʼ jaku kanet quʼn toj «Hazte amigo de Jehová»?
4 Bʼaʼn tuʼn toka te tamiw Jehová. Aʼyeju video, bʼitz ex aqʼuntl in che kanet quʼn jatumel in tzaj qʼamaʼn «Hazte amigo de Jehová» toj jw.org, jaku tzʼonin kyiʼj tatbʼaj tuʼn kyonin kyiʼj tal kykʼwaʼl tuʼn tkuʼpen Tyol Dios toj kyanmi (Deut. 31:12). Aʼye video ateʼ jatumel in tzaj qʼamaʼn «Hazte amigo de Jehová» in tzaj kyyekʼun kye kʼwaʼl junjun xnaqʼtzbʼil nimxix toklen, ex aju junjun saqchbʼil toj tembʼil te aqʼuntl in nonin kyiʼj tuʼn telxix kynikʼ tiʼj xnaqʼtzbʼil. Tuʼnju chʼixmi kykyaqil kʼwaʼl kygan tuʼn kybʼitzen —ex aʼyeju bʼitz in che onin kyiʼj kʼwaʼl tuʼn ttzaj kynaʼn aju in nel kynikʼ tiʼj—, in che kubʼ qʼoʼn bʼitz in che jatz toj qbʼitzbʼil ex junjuntl bʼitz kye kʼwaʼl.
5. ¿Tiquʼn il tiʼj tuʼn t-xi kyqanin tatbʼaj onbʼil te Jehová tuʼn t-xi kyxnaqʼtzaʼn axix tok kye kykʼwaʼl?
5 Aqeye tatbʼaj, taj Jehová tuʼn tel bʼaʼn tkyaqilju in bʼant kyuʼne. Tuʼntzunju, kyqaninxe onbʼil te tuʼn t-xi kyxnaqʼtzaʼne axix tok (bʼaʼn ax) kye kykʼwaʼle (Juec. 13:8). Tukʼe onbʼil in tzaj tqʼoʼn Jehová, jaku che onine kyiʼj kykʼwaʼle tuʼn tten kynabʼil tuʼntzen kyklet tuʼn qʼuqbʼil kykʼuʼj «tiʼj Jesucrist» (2 Tim. 3:15; Prov. 4:1-4).