Akʼaj bʼitz tuʼn tjaw qnimsaʼn Jehová
1 Toj chmabʼil in nok toj junjun abʼqʼi tuʼn Watch Tower Bible and Tract Society of Pennsylvania, aju bʼaj toj 4 te octubre te 2014, etz qʼoʼn tqanil qa ma bʼaj ximit tuʼn tbʼaj bʼinchet chʼintl qbʼitzbʼil. Tbʼanelxix aju tqanil etz qʼoʼn. Ax ikx, tzaj naʼn kye kykyaqil qeju in che bʼintoq qa aʼyeju bʼitz in chex bʼitzet te Dios at toklen tukʼilju qajbʼebʼil te Dios (Sal. 96:2).
2 Noqtzun tuʼnj, ¿tiquʼn il tiʼj tuʼn tbʼaj bʼinchet chʼintl qbʼitzbʼil? At nim tiquʼn. Tnejel, tuʼnju toj ambʼil jaʼlo mas ma tzʼel chʼintl qnikʼ tiʼj junjun taqikʼ Tyol Dios, tuʼntzunju il-lo tiʼj tuʼn tbʼaj chʼixpet junjun yol tiʼj junjun bʼitz (Prov. 4:18). Tkabʼ, tuʼnju toj nimku yol in bʼaj bʼinchaʼn chʼintl aju Traducción del Nuevo Mundo, il-lo tiʼj tuʼn tbʼaj chʼixpet junjun yol toj qbʼitzbʼil aʼyeju e jatz toj Tyol Dios in najbʼentoq tnejel. Ax ikx, tuʼnju chʼixmilo tkyaqil qbʼitzbʼil kbʼajel chʼixpet, ma bʼaj ximit tuʼn tajbʼen ambʼil lu tuʼn tkux qʼet junjuntl akʼaj bʼitz toj.
3 ¿Ilpe tiʼj tuʼn qayon tuʼn tetz akʼaj qbʼitzbʼil twitz uʼj toj kʼuxbʼil tuʼn t-xi tzyet tuʼn kyajbʼen quʼn? Mintiʼ, tuʼnju kyoj junjuntl xjaw che ul ok che kbʼel qʼet junjun toj jw.org. Aj tikʼ junjun qʼij tkubʼlen qʼoʼn jun akʼaj bʼitz, ok kxel qbʼitzen aj tkubʼ bʼaj jun Chmabʼil tuʼn Qajbʼen te Dios. Toj tajlal Chmabʼil tuʼn Qajbʼen te Dios toj seman aju ok kbʼel qʼet tbʼi bʼitz ex tukʼe txol yol lu: «akʼaj bʼitz».
4 ¿Tzeʼn jaku che kyaj toj qwiʼ aʼyeju akʼaj bʼitz? Kwest tuʼn tkyaj jun bʼitz toj qwiʼ. Noqtzun tuʼnj, bʼaʼn tuʼn tel qkanoʼn techel kyaj tqʼoʼn aj bʼitzel, tej tqʼama jlu: «Mlay chin kubʼ tene tuʼn mi nqʼajte; che xel nbʼitzane qe bʼitz te nimbʼil teya» (Sal. 30:12). Aʼyeju junjun onbʼil ateʼ kubʼni kʼonil qiʼj tuʼn kykyaj akʼaj bʼitz toj qwiʼ ex tuʼn kyxi qbʼitzen tuʼn tkyaqil qanmi.
Qbʼink nim maj aʼyeju tqʼajqʼajel chnabʼ te bʼitz, aʼyeju che kbʼel qʼet toj jw.org. A jlu kʼonil qiʼj tuʼn kykyaj naj toj qwiʼ.
Qxnaqʼtzanku aʼyeju letra te bʼitz ex tzʼok tilil quʼn tuʼn kykyaj toj qwiʼ.
Qbʼitzenx nim maj aʼyeju bʼitz, tzmaxi aj t-xi qbʼitzen toj tumel.
Bʼaʼn tuʼn qxnaqʼtzan kyiʼj bʼitz tojju Ambʼil in xi qqʼoʼn kyukʼe toj qja te Jehová, iktzun tten kykyaqil qe toj qja kbʼantel kybʼitzen tukʼil qʼuqbʼil kykʼuʼj.
5 Kyoj junjuntl xjaw che ul, aj tkux qʼet jun akʼaj bʼitz tuʼn tkubʼ bʼaj aju Chmabʼil tuʼn Qajbʼen te Dios, tnejel qo bʼil tiʼj tqʼajqʼajel twi chnabʼ te bʼitz. Yajxetl kxel qbʼitzen aju bʼitz ik tzeʼn in bʼant quʼn.
6 Jun oklenj nim toklen aju tuʼn qbʼitzen kyoj chmabʼil, tuʼnju in tzaj tqʼoʼn ambʼil qe tuʼn tok qmojbʼan tqʼajqʼajel qwiʼ tuʼn qbʼitzen te Jehová. Tuʼntzunju, miʼn kubʼ qbʼinchaʼn junjuntl tiʼ aj tpon ambʼil tuʼn qbʼitzen kyoj chmabʼil.
7 At juntl jaku bʼant quʼn tuʼn tkubʼ qyekʼun qa nim toklen qeju qbʼitz. Kyoj nimaq chmabʼil, naʼmxtoq txi tzyet xnaqʼtzbʼil, in nok qbʼiʼn jun tqʼajqʼajel twi chnabʼ te bʼitz. At nim qerman te junxichaq tnam twitz tkyaqil Txʼotxʼ in nok tilil kyuʼn tuʼn tbʼaj grabaret kykyaqil tqʼajqʼajel twi chnabʼ te bʼitz, aʼyeju in che ajbʼen tuʼn qbʼitzen. In cheʼx kabʼe maj toj jun abʼqʼi toj tnam te Patterson (Nueva York), ex aʼyex in chex chjonte kypasaj. Tuʼntzunju, aj ttzaj tqʼamaʼn aju in xi tzyunte chmabʼil tuʼn qkubʼ qe ex tuʼn tok qbʼiʼn aju tqʼajqʼajel twi bʼitz o bʼaj bʼinchaʼn, il tiʼj tuʼn qkubʼ qe naj. A jlu kʼonil qiʼj tuʼn ttzaj qgan tiʼj xnaqʼtzbʼil kʼeletz chikʼbʼaʼn (Esd. 7:10).
8 Aju qchmabʼil te jaʼlo kbʼel bʼaj tukʼil jun akʼaj bʼitz aju tok tbʼi: «¡Que venga el Reino establecido por Dios!». Aju bʼitz lu, aju xi bʼitzet toj chmabʼil in nok toj junjun abʼqʼi, kubʼ bʼinchet tuʼn ttzaj qnaʼn qa ma bʼant jun syent abʼqʼi ttzajlen tzyet tuʼn tkawin Tkawbʼil Dios.
9 Aʼyeju akʼaj bʼitz ax tok at toklen kyiʼj qeju tbʼanel tiʼchaq ma che tzaj tqʼoʼn Jehová qe (Mat. 12:35a). Qqʼonk tilil tuʼn kykyaj naj toj qwiʼ tuʼn t-xi qbʼitzen tuʼn tkyaqil qanmi. Iktzun tten, qo bʼitzel te Qman Dios ex kjawil qnimsaʼn tbʼi (Sal. 147:1).