Qo onin kyiʼj qe xjal moẍ tuʼn tel kynikʼ tiʼj Jehová
1. ¿Tzeʼn kubʼ tyekʼun Jesús qa in ximentoq kyiʼj qe xjal moẍ?
1 Chʼixtoq tetz Jesús toj tnam Jericó. E jaw schʼin kabʼe moẍ tiʼj: «Tat [...] qʼaqʼantz tkʼuʼja qiʼje». Atzun te Jesús in bʼisintoq tuʼnju chʼixtoq tpon ambʼil tuʼn tkyim. Noqtzun tuʼnj, kubʼ weʼ, e tzaj ttxkoʼn ex e kubʼ tqʼanin (Mat. 20:29-34). ¿Tzeʼn jaku tzʼel qkanoʼn tiʼj Jesús tej tzaj qʼaqʼan tkʼuʼj kyiʼj xjal moẍ?
2. ¿Tzeʼn jaku qo pakbʼan kye xjal moẍ aʼyeju in che kanet quʼn toj bʼe?
2 Qo onin kyiʼj. Qa ma kanet jun xjal quʼn moẍ twitz, jun techel tzeʼn toj bʼe, bʼaʼn tuʼn qxi yolin te ex qqʼonx onbʼil te. Te tnejel mlaylo tzʼok qe tkʼuʼj xjal qiʼj, tuʼnju ateʼ junjun xjal kukx in kubʼ kybʼinchaʼn nya bʼaʼn kyiʼj qe moẍ. Noqtzun tuʼnj, qa jun tbʼanel amiw qo ex qa ma kubʼ qyekʼun qa in qo ximen tiʼj, jakulo qo kubʼ tbʼiʼn. Ax ikx, bʼaʼn tuʼn ttzaj qnaʼn qa at junxichaq yabʼil tiʼj witzbʼaj, ex atzun jlu kʼonil qiʼj tuʼn tel qnikʼ alkye onbʼil kxel qqʼoʼn te xjal. Ajtzun qbʼaj onin tiʼj xjal, bʼaʼn tuʼn t-xi qqʼamaʼn te qa in qo pakbʼan tiʼj Tyol Dios. Jaku txi quʼjin jun taqikʼ Tyol Dios te, ik tzeʼn Salmo 146:8 moqa Isaías 35:5, 6. Ax ikx, jaku txi qyekʼun te tzeʼn tuʼn kykutz iqʼet qe audio toj tembʼil jw.org. Qa bʼaʼn uʼjin xjal toj braille, jaku txi qqanin te qa tajbʼil tuʼn tkubʼ tuʼjin jun uʼj tiʼj Tyol Dios. Qa at tcomputadora xjal tukʼe jun programa aju in jaw tuʼjin xnaqʼtzbʼil in netz yekʼun twitz pantalla, jakulo che onin qeju xnaqʼtzbʼil tiʼj aʼyeju ateʼkux toj jw.org ex qe uʼj aʼyeju jaku che kutz iqʼet toj formato RTF aʼyeju formato te uʼj lu oʼkx at toj kastiy moqa kyoj junjuntl yol mas in yolinjtz twitz tkyaqil Txʼotxʼ. (Qʼonk twitza tiʼj recuadro «Aj qonin tiʼj jun xjal moẍ...».)
3. ¿Alkye tten jaku che kanet qe xjal moẍ quʼn toj tembʼil jatumel in qo pakbʼan?
3 Qo jyon kyiʼj qe xjal moẍ. Chʼixme tkyaqil maj aj qpakbʼan kyojele ja mintiʼ in che kanet xjal moẍ quʼn, tuʼnju tkyaqil maj nya kyajbʼil tuʼn kyyolin kyukʼe xjal mintiʼ ojtzqiʼn kywitz kyuʼn aʼyeju in che qʼolbʼen ttzi kyja. Tuʼntzunju, il tiʼj tuʼn tok tilil quʼn tuʼn qjyon kyiʼj ex tuʼn qpakbʼaʼn kye (Mat. 10:11). ¿Atpe jun qukʼe toj aqʼuntl moqa jun qukʼe toj ja xnaqʼtzbʼil moẍ twitz? Bʼaʼn tuʼn qyolin kyukʼe tiʼj axix tok. Qa toj tembʼil jatumel in qo pakbʼan at jun ja xnaqʼtzbʼil kye moẍ, qqaninx te nejenel qa tajbʼil tuʼn kyxi qiʼn junjun uʼj toj braille toj kʼubʼil uʼj te ja xnaqʼtzbʼil. ¿Ojtzqiʼnpe jun xjal quʼn aju at jun toj tja moẍ twitz? ¿Atpe kʼloj xjal in che onin kyiʼj moẍ toj tembʼil te pakbʼabʼil moqa ateʼ qe najbʼil jatumel in che anqʼin xjal moẍ? Qqʼamanx te toj tja xjal moẍ twitz, te xjal in kaʼyin tiʼj ja moqa te nejenel te ja xnaqʼtzbʼil qa aqoʼ testigos de Jehová qajbʼil tuʼn qonin kyiʼj moẍ, ex ateʼ qe quʼj toj braille ex qe grabación kye moẍ. Qyekʼunx kye qa in tzaj ttziyen Tyol Dios qa kbʼel tnajsaʼn te jumajx aju yabʼil lu. Ax ikx jaku txi qyekʼun te aju video tok tbʼi «No sé qué haría sin ella», aju tkubʼ toj tembʼil te Internet jw.org. Aju video lu in tzaj ttxʼolbʼaʼn tiʼj jun erman moẍ twitz alkye tten o tzʼonin tiʼj aju Tyol Dios at toj braille. Qa ma txi qqʼamaʼn tiquʼn ma qo pon, jakulo tzʼonin tuʼn qyolin kyukʼe qe xjal moẍ.
4. ¿Tiʼ xnaqʼtzbʼil in tzaj tqʼoʼn qe aju bʼant tuʼn ermana Janet tbʼi?
4 Jun ermana moẍ twitz Janet tbʼi xiʼ toj jun ja jatumel in che anqʼintoq xjal moẍ, ex xi tzyet tuʼn tyolin tukʼe jun txin. Xi tqʼamaʼn Janet jlu te: «Tej tten Jesús tzalu twitz Txʼotxʼ, e kubʼ tqʼanin junjun xjal moẍ kywitz tuʼn tkubʼ tyekʼun aju kbʼantel tuʼn toj ambʼil tzul kye kykyaqil xjal moẍ». Kubʼ kyxnaqʼtzaʼn Apocalipsis 21:3, 4 ex xi tchikʼbʼaʼn Janet alkye tten kjapunel twiʼ yol lu tuʼn Tkawbʼil Dios. Tej tok tbʼiʼn txin lu, yajxitl tqʼama: «Tzma tnejel maj ma tzaj tqʼamaʼn jun moẍ jlu weʼye. Chʼixme tkyaqil xjal in kubʼ kyximen qa aju yabʼil lu jun kastiw tiʼj jun tiʼ kubʼ qbʼinchaʼn moqa tuʼnju bʼant kyuʼn qxeʼchel ojtxe». Xi t-samaʼn Janet toj jun correo jun dirección te uʼj In tzaj t-xnaqʼtzaʼnxix, ex jaʼlo in che xnaqʼtzan junx tiʼj Tyol Dios kabʼe maj toj seman.
5. Maske mlay che qʼanit qe xjal moẍ quʼn, ¿tzeʼn jaku chʼixpet kyanqʼibʼil qa ma qo ximen kyiʼj?
5 Ax tok mlay che qʼanit qe xjal moẍ quʼn ik tzeʼn bʼant tuʼn Jesús. Noqtzun tuʼnj, jaku bʼant jun tiʼ quʼn. Aju dios te twitz Txʼotxʼ o kubʼ tmoẍsaʼn kynabʼl nimku xjal, ex kyxol qe jlu, at junjun moẍ kywitz. Jaku qo onin kyiʼj kykyaqil xjal moẍ tuʼn tel kynikʼ tiʼj axix tok tkuʼx toj Tyol Dios (2 Cor. 4:4). E kubʼ tqʼanin Jesús aʼyeju kabʼe xjal moẍ kywitz niqayin ttxlaj tnam Jericó tuʼnju tzaj qʼaqʼan tkʼuʼj kyiʼj (Mat. 20:34). Ax ikx qe qa ma qo ximen kyiʼj xjal moẍ, jaku qo onin kyiʼj tuʼn tok kyojtzqiʼn Jehová, aju kjaqetel kywitz tuʼn ex kxel tqʼoʼn kychwinqlal te jumajx.