Tzalaja kyiʼj kʼiwlabʼil tzul tqʼoʼn Dios

Xi ttziyen Dios te profeta Abrahán qa «kykyaqil qe nasyon twitz txʼotxʼ» che tzajel kʼiwlaʼn noq tuʼn jun kyxol tyajil (Génesis 22:18). ¿Alqiʼj yolin?

Ma tzikʼ chʼixme kabʼe mil abʼqʼi, xi tqʼoʼn Dios tipumal Jesús tuʼn kybʼant milagr tuʼn. Tej kybʼant milagr lu, tzaj tyekʼin qa kʼajbʼel Jesús tuʼn Dios tuʼntzun tjapun twi yol xi ttziyen te Abrahán tuʼn ttzaj tkʼiwlaʼn kykyaqil nasyon (Gálatas 3:14).

Kyuʼn milagr bʼant tuʼn Jesús el kynikʼ xjal tiʼj qa jaw skʼoʼn tuʼn Dios tuʼn ttzaj tkʼiwlaʼn kykyaqil xjal. Ax ikx tzaj kyyekʼin milagr lu tzeʼn kʼajbʼel Jesús tuʼn Dios tuʼn qtzaj tkʼiwlaʼn te jumajx. Qo xnaqʼtzan tiʼj junjun tbʼanel tmod Jesús kubʼ tyekʼin tej kybʼant milagr tuʼn.

Ten tkʼujlabʼil ex kubʼ tqʼanin qe yabʼ.

Jun maj, kubʼsan jun xjal twitz Jesús ex xi tqanin te qa tajtoq tuʼn tkubʼ tqʼanin. Ok ttzyuʼn Jesús xjal ex xi tqʼamaʼn te: «Wajbʼile». Jun rat el lepra tiʼj (Marcos 1:40-42).

Kubʼ tyekʼin t-xtalbʼil ex xi tqʼoʼn kywa qeju at weʼyaj kyiʼj.

Nyatoq taj Jesús tuʼn tikʼx weʼyaj kyuʼn xjal. Nya oʼkx jun maj bʼant milagr tuʼn Jesús tej kywaʼn nim xjal ex oʼkx ajbʼen junjun pan ex junjun pescad tuʼn (Mateo 14:17-21; 15:32-38). Kykyaqil xjal e noj, axpe ikx mintiʼ bʼaj tkyaqil wabʼj kyuʼn xjal.

Tzaj qʼaqʼin tkʼuʼj ex e jaw anqʼin kyimni tuʼn.

Tej tok tkeʼyin Jesús otoq kyim tal jun xuʼj viud ex ni jun tuʼn t-xqʼuqin tiʼj, «tzaj qʼaqʼan tkʼuʼj [Jesús] tiʼj» ex jaw anqʼin kuʼxun tuʼn (Lucas 7:12-15).