Sábado 25 te octubre
Jaw t-schʼiʼn Safán twitz rey aju tzʼibʼan tuj libro (2 Crón. 34:18).
Tej qʼiʼntoq 26 abʼqʼi tuʼn Josías, xi tzyet tuʼn tbʼaj tbʼinchaʼn chʼintl templo. Tej in che aqʼunantoq xjal, kanet «libro jatum tzʼibʼan tley Dios, aju otoq kyaj ttzʼibʼan Moisés». Tej tok tbʼiʼn rey aju in tzaj tqʼamaʼn libro, e bʼant junjun chʼixpubʼil tuʼn tuʼn t-xi tnimen Tley Jehová (2 Crón. 34:14, 19-21). Yajtzun teya, ¿taja tuʼn tjaw tuʼjina Tyol Dios tkyaqil qʼij? Qa ya in bʼant tuʼna, ¿in kubʼpe tnaʼna tzalajbʼil aj tuʼjina tiʼj? Ex qa tbʼanel ma tzʼela jun versículo toj twitza, ¿tiʼ in xi tbʼinchaʼna tuʼn miʼn tikʼ tnaʼl tuʼna? Tej qʼiʼntoq 39 abʼqʼi tuʼn Josías, kubʼ tbʼinchaʼn jun tiʼ nya toj tumel ex kyim tuʼn jlu. Toj ambʼil lu, mintiʼ ok qeʼ tkʼuʼj tiʼj Jehová ex ok qeʼ tkʼuʼj tiʼjx (2 Crón. 35:20-25). ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj? Qa nim toklen tuʼn kukx qjyon tiʼj Jehová maske o tzikʼ nim ambʼil in qo xnaqʼtzan tiʼj Biblia moqa ya o qo tijen. Tuʼn tkubʼ qyekʼin qa in bʼant jlu quʼn, nim toklen tuʼn qnaʼn Dios te, tuʼn qxnaqʼtzan tiʼj Tyol ex tuʼn t-xi qbʼiʼn qe consej in che tzaj qʼoʼn qe kyuʼn erman o che chʼiy toj kyokslabʼil. Qa ma bʼant jlu quʼn, mlaylo kubʼ qbʼinchaʼn jun matij il ex mas qo tzalajel toj qanqʼibʼil (Sant. 1:25). w23.09 12 párr. 15, 16
Domingo 26 te octubre
At tqʼoj Dios kyiʼj qe xjal jawni kywitz, atzun qeju mans qe, in tzaj tqʼoʼn Dios t-xtalbʼil kye (Sant. 4:6).
In yolin Biblia tiʼj tbʼanel techel kyaj kyqʼoʼn junjun xuʼj e ajbʼen te Jehová ex ok kykʼujlaʼn. Aʼye xuʼj lu «in kyjakʼun kyibʼ, ex [ . . . ] in japun kyuʼn tuj tkyaqil» (1 Tim. 3:11). Axlo ikx ateʼ ermana toj teya tcongregación, aʼyeju o tzʼok kynabʼil ex jaku tzʼel tkanoʼna kyiʼj. Qa txin teya, jaku ximana kyiʼj junjun ermana in kubʼ kyqʼoʼn jun tbʼanel techel ex kanoʼmila kyiʼj. Tuʼn tbʼant jlu tuʼna, qʼonka twitza tiʼj tbʼanel kymod ex ximana tiʼj tzeʼn jaku txi tbʼinchaʼna. Aʼye tmajen Jehová o tzʼok kynabʼil in kubʼ kyin kyibʼ. Aju xuʼj in kubʼ tiʼn tibʼ, in tzalaj tiʼj jun tbʼanel tamiwbʼil tukʼil Jehová ex in ten tbʼanel txol kyukʼil txqantl. Jun techel, tuʼnju in kubʼ tiʼn tibʼ ex kʼujlaʼn Jehová tuʼn, in nonin kyiʼj qeju o txi tqʼoʼn Jehová kyoklen tuʼn kykubʼ nej toj congregación ex toj familia (1 Cor. 11:3). w23.12 18, 19 párr. 3-5
Lunes 27 te octubre
Ax ikx qe chmilbʼaj kykʼujlam kyxuʼjil ik tzaʼn in kykʼujlaʼn kyximlal (Efes. 5:28).
Taj Jehová tuʼn tok tkʼujlaʼn chmilbʼaj t-xuʼjil, tuʼn t-xi tqʼoʼn aju at tajbʼen te, tuʼn tok te jun tbʼanel tamiw ex tuʼn tonin tiʼj tuʼn tten nqayin ttxlaj Jehová. Qa ma tzʼok tilil tuʼna tuʼn tten tnabʼila, tuʼn t-respetarina kye xuʼj ex tuʼn tok qeʼ kykʼuʼj txqantl tiʼja, kʼonil tuʼn toka te jun tbʼanel chmilbʼaj. Qa ma kubʼ mojeʼya, jaku tzʼoka te mambʼaj. Tuʼn toka te jun tbʼanel mambʼaj jaku tzʼonin tiʼja qa ma tzʼel tkanoʼna tiʼj Jehová (Efes. 6:4). Mintiʼ tzaj tchʼixwi Jehová tej t-xi tqʼamaʼn te tkʼwal qa kʼujlaʼn tuʼn ex qa in tzalaj tiʼj (Mar. 1:11). Qa ma tzʼoka te mambʼaj, bʼaʼn tuʼn tnaqʼeta tuʼn t-xi tqʼamaʼna kye tkʼwala qa kʼujlaʼn qe tuʼna ex qa in tzalaja tiʼj tbʼanel aqʼuntl in bʼant kyuʼn. Ax ikx, in nel kykanoʼn mambʼaj tiʼj Jehová aj kyonin kyiʼj kykʼwal tuʼn tok kynabʼil. ¿Tzeʼn jaku bʼaj tbʼinchaʼna ttena jaʼlo tuʼn toka te jun tbʼanel mambʼaj? Jaku bʼant tuʼna qa ma kubʼ tyekʼina tbʼanel tmoda kyiʼj toj tjaya, kyiʼj erman ex qa ma txi tqʼamaʼna kye qa kʼujlaʼn qe tuʼna ex qa in nok tqʼoʼna kyoklen (Juan 15:9). w23.12 28, 29 párr. 17, 18