Marzo

Je xi chjotajchínga sʼin tjío tsjoakení je ndsʼee xi tjío ya jinjtín kʼoa kuinga bʼénesínile yaole nga binyakao xi kjaʼaí nga bakóyale jmeni xi male (Sal. 71:17, 18). Je chjotajchínga xi binyakao je ndsʼee nga tsesa xá katabʼaile nʼio binyakao je jtín nga nʼio bʼejna. Mankjínní je ndsʼee xi tsjoánganʼiole je jtín kʼoa ngisa jtín sʼin batio je ndsʼee kʼoa kixi fitʼale Niná. Kʼoa nʼio machjén jebi nichxin fetʼa xi tiyoaa ndʼaibi. Kʼoa ngisa nʼio koa̱nchjén nichxin xi nroaján kʼianga kjoaʼaí kjoañʼai xi nʼio tse (Ezeq. 38:10-12; Miq. 5:5, 6). Jon xi chjotajchínga sʼin tiyo, kʼiatsa tsín tiniʼalao je ndsʼee nga tsesa xá katabʼaile, tʼetsʼiakaokjoanño ndʼai. Kʼoati machoyaná nga nʼio tse xá kjineno ya jinjtín nga chjotajchínga sʼin tiyo. Tsakui nichxin machjén nga ngisa choa nichxin si̱kʼayalao xá jebi kʼoa tosa je ndsʼee kuinyakao nga ngisasa tse xá katabʼaile (Ecl. 3:1). Kʼiatsa kʼoasʼiaon ngisa nda si̱chjaon nichxinno kʼoa koasenkao je jtín nichxin xi nroaján. wp15 1/4 1:8-10

ʼYañá kʼianga basenkao ngatsʼi chjota xi tjín sonʼnde je én xi faʼaitʼa Biblia. Tonga kʼoati basenkaoná nga jngó jngoá nga nichriantʼalee je Niná. Machjénní nga kuenta sʼiaan josʼe tokoán kʼianga bʼexkiaa kʼoa nga chotʼayá je Biblia. Kʼoati si̱kjaʼaitsjenjiaan josʼin si̱chjén jmeni xi bʼexkiaa. Kʼiatsa kʼoasʼiaan, jngoyale tífákaoná je Jeobá. Kʼoa nga ʼyaa nga basenkaoná ngisaa mamiyosaa (Heb. 4:12; Sant. 1:23-25). Tojngola choa̱ si̱kʼéjnaa. Ya Mateo 6:19, 20 je Jesús i kitso: “Ali kjoanyinájin bʼexkó i̱ sonʼndebi”. Jósʼe tokoán kʼianga bʼexkiaa én jebi. Kʼiatsa je Jeobá títjon tinikʼéjnaa, tsenjin koa̱nná nga tsjoa tjínle nga kʼoatinʼia. Tonga tsa tsín tokjimaniná josʼin tiyoaa kʼoa likui nʼio tinixálee je Jeobá jchajián nga je Jeobá tíbakóná jmeni xi sʼiaan nga nʼiosa si̱chriantʼalee. wp15 1/4 3:3-5

Je Pablo tosi tonda kitsoyason kʼoa koanjngole je xá xi tsakánele je Niná. Je Jeobá kʼoati kui xá títsjoáná tsanda ñá ndʼaibi nga kʼuínyasoán. Jé Niná tinixákoaa (1 Cor. 3:9; 1 Tes. 2:4). Kʼiatsa nʼio kʼuínyasoán, alikui jao tjínná nga je Jeobá tsjoáná ngayeje jmeni xi machjénná (Mat. 6:33). Xi ijngosani, ngisaa choa ñʼai koa̱nná nga chóyalee josʼin tsjoáná Jeobá jmeni xi kinijélee nga tsakʼetsʼoalee. Kʼoénelee yaoná nga ngisasa si̱miyoaa je Jeobá. Kʼiatsa jngo kjoa xi nʼio ñʼai tjín tiyojiaan, koakoá nga ngisasa tinichriantʼalee. Kʼoéxkiaa kʼoa chótʼayá je Biblia, kʼoa si̱kjaʼaitsjenjiaan jmeni xi kachotʼayá. Tosi tonda kʼoétsʼoalee kʼoa tosi tonda si̱xálee. Kʼiatsa kʼoasʼiaan, alikui jao sʼe̱ tokoán nga je Jeobá koasenkaoná nga ska̱ná je kjoa xi tjínná ndʼaibi kʼoa kao xi sʼe̱ná nichxin xi nroaján. wp15 1/4 4:17, 18

Kʼianga kjoangʼakon sʼe ya jinjtín alikui nyʼán biyoaa. Kʼiatsa chʼa̱sjengiaa xi kjaʼaí kʼoa tsa kʼoasʼin si̱kjaʼaitsjeen nga ngisa ngʼa tiyoaa tikʼoajinni je, tsakui nichxin kui kʼoasʼiaan kʼoa tsakui kʼoakʼuínleje̱ jmeni xi nʼio sikiʼaon (Prov. 12:18). Ya Biblia basenkaoná nga tsín ngʼakon maa. Tobʼelañá, ya Proverbios 16:5 kʼoatso kʼianga je Jeobá jtike “toʼyani xi kjoangʼakon tjínle ni̱ma̱le”. Kʼoa ya Hechos 17:26 kʼoatso kʼianga tojngo chjota kisinda Niná kʼoa nga ya jaʼaini ngatsʼi je chjota. Kuinga kʼoabixónsíñá nga tongósoán ngatsʼiaa nga̱ yaa Adán jaʼaiñá. Kʼoa kuinga tsín kixi tíjnasíni tsa kʼoasʼin si̱kjaʼaitsjeen nga tjín chjota xi ngisa ngʼa tjío tikʼoajinni xi kjaʼaí. Kʼiatsa kʼoasʼin si̱kjaʼaitsjeen, jejin Na̱i kʼoaiʼndelee kʼoa tsínjin titsjoacha koa̱nñá xíngiaa kʼoa tsínjin tijtín kuiyoñá (Juan 13:35). Tonga tsa mená si̱kinjelee je Na̱i, kʼoénelee yaoná nga tsín ngʼakon koaan (Prov. 16:18). wp15 1/5 2:8, 9

Je Jeobá kʼoakitso nga je xi ya koai ngʼajmi yaa koatio ngantsjai nichxin. Kʼoa je xi kjaʼaí barré ʼmile i koatio ngantsjai nichxin i̱ Sonʼnde. Kʼianga kuiyoaa tokʼia saʼndani ali tijme xi sikjaʼákonniná (Juan 10:16; 17:3; 1 Cor. 15:53). Tonga ndʼaibi je Niná bení jokji kjoañʼai tibitjatojiaan kʼoa nʼio aon male nga kʼoakjima. Tobʼelañá, je Biblia kʼoatso nga nʼio aon koanle kʼianga tsabe je chjota israelita nga kjoañʼai tjíofaʼá ya Egipto (Is. 63:9). Kʼoa nga tjíobʼéndaya yo̱ngo̱ je chjota israelita, je Jeobá tsabe jotjío kon nga tjíotsokjónle je chjotakontrale. Je Jeobá kʼoakitso nga nʼio aon male kʼianga ʼya xi choʼndale síkao, joxi xkon tínikao male (Zac. 2:8). Je Jeobá nʼio tsjoakená kʼoa kuinga basenkaoniná kʼianga kjoañʼai chjaʼá. Kʼoasʼin tsjoakená josʼin tsjoake jngo na̱ je ʼndíleele (Is. 49:15). Jósʼin koa̱n chjénngilee choa̱le Jeobá. Kʼiaa nga cha̱niyaa jkoaa jósʼe̱ tokoán tsañálani xi kjoañʼai tichjaʼá (Sal. 103:13, 14). wp15 1/5 4:2

A kui xi kitsonile je Jesús nga tosʼe̱ntsjai je chjota xi ma̱ sijchá je yaole i̱ Sonʼnde. Je xi kitsole Jesús kuinga sʼe̱ chjota xi ma̱ sijchá yaole kʼianga kjesa tjoxinjin jmeni xi chon sonʼnde jebi. Nga tsín nda batéxoma chjotaxá kʼoa nga to yaole fini, miyón mani chjota xi ma̱ tjío. Tonga je Niná mele nga tsjoále jme xi machjénle chjota nga katabatiokon. Kʼoatso nga tsín tiʼya xi ma̱ koationi (Sal. 72:16). Nga kjoaxkón tsakatío Jesús kui tsakakó nga sichjén je nganʼio xi tjínle nga koasenkaoná (Mat. 14:14-21). Kʼoa kʼianga nikjaʼaitsjenjiaan nga jeme kʼoasʼin, mená kuinyakoaa xi ngikʼa (Sal. 45:1; 49:3). Ninga tsínná nganʼio nga kjoaxkón koatioá koaan kʼoasʼin si̱chjén je nganʼioná kao nichxinná nga kʼoakʼuínlee je chjota jmeni xi tso Biblia tʼatsʼe nichxin xi nroaján. Kui xá kjinená nga testigole Jeobá maa (Rom. 1:14, 15). wp15 1/6 1:7, 10, 11

Jebi kui xi tsonile nga kui kʼoasʼiaan kʼoa nga kui si̱kjaʼaitsjeen jmeni xi sasénle Niná. Kʼiatsa mená nga tosi tonda miyole Niná koaan, alikui kui kʼoasʼiaan jmeni xi síjtile Niná. Kʼoénelee yaoná nga tokui si̱kjaʼaitsjeen xi tsje tíjna (Sal. 24:3, 4; 51:6; Filip. 4:8). Je Jeobá be nga chjotajée maa kʼoa nga sakʼoa likui maná bʼechjoalee yaoná nga kui nimetokoán xi chʼaotjín. Tonga nga tsín mená si̱jtilee je Niná, nʼio bʼenelee yaoná nga chʼasjengiaa xi chʼaotjín kʼoa nga tokui nikjaʼaitsjeen xi tsje tíjna (Gén. 6:5, 6). Kʼiatsa kʼoétsʼoalee ngantsjai je Jeobá, jé koasenkaoná nga kuixkantʼakoaa jmeni xi chʼaotjín mametokoán. Kʼianga bʼetsʼoalee je Jeobá ngisaa machriantʼalee. Tsjoáná nganʼiotsjele nga tsje koaan. Kʼianga kʼoétsʼoalee koaan kʼoakʼuínlee nga katabasenkaoná nga tokui si̱kjaʼaitsjeen jmeni xi sasénle. wp15 1/6 3:4, 5

Je Jesús kʼianga tsakʼétsʼoa ali tsa “tʼainái nioxtilana” kitsojin. Je Jesús i kitso: “Tʼainajin nioxtila xi [...] machjénnajin”. Kataʼyala jmeni xi sʼín jngo superintendente xi tsʼe circuito xi Victor ʼmi xi ya África tsʼe. Itso: “Tsjoale kjoanda je Jeobá kʼianga an kao je chjoónna alikui jme xi nikjáojinjin nga tjín choanajin xi chinaijin kʼoa nga tsín renta bʼechjíjin. Jé ndsʼee binyakaonajin xi tʼatsʼe jebi. Tonga sijéle Niná nga katabasenkao je ndsʼee xi ñʼai sokóle je tao̱n”. Tsakui nichxin tjínná je tsojmi xi chinee, tonga nʼio nkjín ndsʼee xi ma̱ tjío kʼoa xi kjoañʼai tjíofaʼatojin. Machjénní nga kʼoétsʼoantjé. Tonga jmésani xi koa̱n sʼiaan nga kuinyakoaa. Tobʼelañá, koaan kʼoailee tsa jmeni xi tjínná. Kʼoati koa̱n kʼoee tao̱n nga katafisonsa xále Niná. Je tao̱n xi batioá kʼoati kui xá machjénní nga bʼainganʼiole je ndsʼee xi machjénle (1 Juan 3:17). wp15 1/6 5:4-6

Jokji tífaʼato nó, nkjín koya jmeni xi tíbʼantjaiyajin ya jinnaxinandále Niná. Kʼoa je profeta Isaías tongini kʼoakitso nga kʼoakoa̱n (Is. 60:17). Je ndsʼee xi sʼa xti kao chjota xi sʼa tjíokotʼaya tsakui nichxin tjín xi tsakʼéyanajmíle jmeni xi tíbʼantjaiyajin ya naxinandále Niná kʼoa tsa maije̱ ya tsakʼéxkia je xo̱n xi nichjén. Tonga nʼio nkjín ndsʼee xi jekjoatse tjíojin naxinandále Niná xi tsabe nga kʼoakoan. Ndsʼee jebi ñaki tjíojngo kon nga je Jesucristo tísíchjén Niná nga tíbándiaale naxinandále. Kʼiatsa kuinyañolee jmeni xi bʼéyanajmíná ndsʼee jebi, ngisaa koa̱nnʼiotʼasaa je Jeobá. Ngatsʼiñá nga tjínnele kʼoéyanajmílee je chjota xi tʼatsʼe naxinandále Jeobá. Kʼianga kʼoasikji chʼao chon i̱ Sonʼnde, tokʼoamaná nga nyʼán kʼoa jtín sʼin tiyoaa kao ngatsʼi ndsʼee xi tjío jngo tjíjtsa Sonʼnde. wp15 1/7 1:12, 13

Je kjoajchán xi tsʼe Armagedón kui jaʼaíntsjele Jeobá kʼoasjengʼa. Je xi “tindso” sʼin jchatokon si̱kjesonní (Mat. 25:31-33, 46). Alikui tisʼe̱ni kjoatsʼen i̱ Sonʼnde, kʼoa je chjotankjín kʼoangile yaole. Kʼianga jeʼyaa jmeni xi jeme koa̱n, jméni xi sʼiaan. Je pastro Pedro jngo kjoafaʼaitsjen kitsjoa jotjínnele katamakjoaan. Tjínnele nga tsje kjuinkoaa yaoná, nga tsjoacha katamaa Niná kʼoa nga kixi kjuintʼalee. Kʼoa alikui si̱chajiaan nga tochoatsesa chale nga kjoaʼaí “nichxinle Niná”. Je Pedro i kitsosa: “Nga tichoyalao je kjoabi, jon xi tsjoake̱no, tixítíyalao yaono nga nda koanngínkao yaono, jméni nga koa̱nsjaisínino ngixko̱n Jesucristo, nga tsín jme kjoajndí tsín jme jée sʼe̱no, kʼoa nga nyʼán kuiyo” (2 Ped. 3:11, 12, 14). Kʼianga jchaxkoán je Jeobá alikui koa̱n kjoaʼmiya ndiso cha̱nisʼenjiaan jmeni xi makjainná, tosa je kʼoainganʼiolee je rey xi tjínle kjoanyʼán, je Jesucristo. wp15 1/7 2:17, 18

Jngo tjíjtsa Sonʼnde, nʼio nkjín testigole Jeobá xi kui xá sʼín nga bʼénda Ndʼia jña chotʼayá. Alikui machjíle nga bʼénda kʼoa tsa bʼéndaya ndʼia jebi. Kʼoa aonla ndʼia tísʼenda nga nyaon nyaon xi jexjaʼaon nó tífaʼato. Kʼoa jetsʼato kanjin jmi Ndʼia jña chotʼayá kisʼenda. Je Biblia kʼoatso nga je xi tjínle tjínnele kuinyakao je xi tsínle. Itso: “Kʼoaxian jebi, jméni nga ngóson koa̱nsínio, kʼoa je xi tse tjínno ndʼaibi, katinyakao je xi chale, jméni nga kʼoati je xi tse sʼe̱le kuinyakaosínino xi chano. Kʼoasʼin tongóson koa̱on” (2 Cor. 8:13-15). Kuinga je naxinandále Niná síkasénsíni je ndsʼee xi bʼénda Ndʼia jña chotʼayá kʼoa kui síchjén je tao̱n xi batioá ngatsʼiaa kʼianga bʼénda ndʼia jebi jñani ngisa machjén. Kʼoa nʼio nkjín Ndʼia jña chotʼayá jekisʼenda ya jñani tsínle tao̱n je ndsʼee. wp15 1/7 4:9-11

Je Jesús kui xá kʼoakitsoni jme choa̱ xi sʼe̱ nichxin fikjetʼa nga toje xi koa̱njinle xi tjenyatokon koatio. Ñá xi choʼndale Niná maa tjenyatokon tibiyoaa (Mat. 24:27, 42). Saʼnda tjen nó 1914, tiʼyañá nga jenkjín koya én tíbitjoson xi tongini kinokjoa. Ñaki kʼoatjío tokoán nga jenichxin fetʼa tiyoaa ndʼaibi. Kʼoa je Jeobá jetjínndajinle kʼiani sikjeson ngayeje kjoa xi chʼaotjín kijnajtsa sonʼnde (Mat. 24:3). Machjénní nga tosi tonda tjenyatokon kuiyoaa kʼoa kuiyondaa. Ánni. Kuinga je Jesús xokitso nga kʼoasʼiaan kʼoa mená si̱tjosonlee. Kʼoa kʼoati kuinga jetíbitjoson je én xi tongini kinokjoa tʼatsʼe nichxin fetʼa. Ánni nga kʼoasʼin makjainsíniná. Ali tsakuijin nga tomakjainyejená jmeni xi ʼminá. Kuinga ñaki tjín choa̱ xi bakó nga jetíbitjoson jme xi tso Biblia. wp15 1/8 2:8, 9

Ya ʼNdenaxó sʼená nichxin nga kʼoasʼiaan jmeni xi mená. A koaan kʼoétsaojiaan kʼoa a koaan si̱kjáyaa. Jaon. Jé Jeobá xi kʼoasʼin kisindaná nga meniná bʼetsaojiaan. Kʼoa kʼoatsoná nga tsjoáná jmeni xi mametokoán (Ecl. 2:24). Nichxin xi tiyoaa ndʼaibi maa nikjáyaa kʼoa bʼetsaojiaan, tonga alikui koa̱n si̱chajiaan nga je xi ngisa tsjoa bʼé tokoán kuinga kui títjon nikʼéjnaa je kjoamiyo xi tjínná kao Jeobá. Kʼoa kʼianga jesʼe̱jna ʼNdenaxó koaan si̱kjáyaa kʼoa koaan kʼoétsaojiaan, tonga je xi ngisa nʼio chjíle kuinga Jeobá si̱xálee. Kuinga kui títjon si̱kʼéjnasíñá ndʼaibi je xále Niná kʼoa kuenta sʼiaan jmeni xi títsjoáná nga tinixálee (Mat. 6:33). Saʼnda tsínjin machoyaná jonaskásʼin kuiyoaa ya ʼNdenaxó. Tjen koakoá ndʼaibi nga mená ya kuiyoaa. wp15 1/8 3:17, 18

Kʼianga tsakʼejna Jesús i̱ Sonʼnde, ñaki chjotatsje koan tonga chjotajée tsakʼejnajinle. Je xijchále, je ndsʼe̱ kʼoa kao chjota xi tsabe chjotajée koan. Saʼnda je chjotale sakʼoaa to yaole kini. Tobʼelañá, nitje̱n nga toje si̱kʼien je Jesús tsakjáotiyani ʼyáni xi ngisa ngʼa tíjna (Luc. 22:24). Ninga kʼoalani kisʼin, je Jesús bení nga sʼe̱nile kjoafaʼaitsjen je chjotale kʼoa nga jtín sʼin koationi ya jinjtín. Nga tikuini nitje̱n, je Jesús kʼoakitsole Jeobá nga katabasenkao je chjotale nga jtín sʼin koatio josʼin tjío je. Kitsole: “Jméni nga tojngo koa̱nsíni ngatsʼi, joni nga ji, Nʼai, tijnakaonái, kʼoa an tijnakaole. Kʼoati je tojngo katatiokaoná, [...] jméni nga tojngo koa̱nsíni joni tsa ñá tojngo manía” (Juan 17:21, 22). wp15 1/9 1:10, 11

Ánni nga kitsokjonsíni je Pedro kʼianga jetífison je nandá. Je Biblia kʼoatso nga tsín tikiskotsennile Jesús kʼoa tosa kui jtsínʼio kao ntjao̱ kiskotsenle (Mat. 14:24-32). Je kjoamakjainle kinroajen kʼoa kiskangindá. Je jtsínʼio kao ntjao̱ jebi kui mangóson je kjoa xi tjínná nga nyaon nyaon kʼoa kao jme xi satíobasenná. Ninga sakʼoa ñʼai tjín kjoa xi sʼená, je Jeobá koaanle tsjoánganʼioná nga ska̱ná. Tonga tsa tokui kjuinñá je kjoa xi tjínná, tochale kjuinroajen kjoamakjainná kʼoa tsín tikʼoasʼin si̱kjaʼaitsjenñá nga je Jeobá koasenkaoná. Koaan kjuinroajen kjoamakjainle toʼyani. Ánni kʼoabixónsíñá. Kuinga ya Biblia kʼoatso nga je jée xi ngotjo kajinñá kuinga nroajen kjoamakjainná (Heb. 12:1). Kʼiatsa tokui kjuinñá je kjoa xi tjínná tojo kisʼin je Pedro, kjuinroajenjin kjoamakjainná. wp15 1/9 3:1, 6, 7

Kʼianga ʼya xi tsjoákjoatjaoná tsa jmeni, bʼailee kjoanda. Jngo koya josʼin bakoá nga bʼailee kjoanda kʼiaa nga nichjén jmeni xi katsjoáná. Je Jeobá tsjoáná ngayeje jme xi machjénná nga biyochoán kʼoa xi tsjoa bʼé tokoán. Kʼoa bʼailee kjoanda. ʼYañá nga nʼio tsjoakená je Niná kʼoa kui xi mená nga kʼoati koakolee nga tsjoachaa tsanda ñá. Je Jeobá nʼio tse jmeni xi kitsjoale je chjota israelita. Nkjín siento nó nga kitsjoale jmeni xi tsakatiokonni. Kʼoati kitsjoale kjoatéxoma nga skoe̱ jmeni xi tjínnele sʼin (Deut. 4:7, 8). Tobʼelañá, je kjoatéxoma kʼoatso nga kui tjínnele tsjoále Niná “je tsojmi xi títjon majchá[le] xi ngisa ndakjoan” (Éx. 23:19). Kʼiatsa mele nga tosi tonda sichikontʼain je Jeobá, tjínnele nga sitjoson kʼoa kui tsjoá tsojmi xi ngisa nda. Kʼoasʼin koakoni nga tjíotsjoále kjoanda Jeobá (Deut. 8:7-11). wp15 1/9 5:5, 6

Jósʼin tíbasenkaoli je Jeobá. Aonla koya si̱kʼaxkiaa. Xi títjon, tsakui nichxin tsaʼyai nga je Jeobá tsakasenkaoli nga koansjaili je relijión xi ñaki kixi. Xi majaoni, tsakui nichxin jngo kjoanokjoaya kinoʼyai ya jinjtín kʼoa i̱ kisi: “Kuikjoán jebi xi machjénna”. Xi majanni, tsakui nichxin kinrʼoé je Jeobá jmeni xi tsakʼinlai nga tsakʼetsʼoalai. Xi mañoni, tsakui nichxin jekichotjenngi je xá xi meli xi tsʼe Jeobá nga tsesa si̱xálai. Xi maʼaonni, tsakui nichxin kitsjoali Jeobá jmeni xi koanchjénli kʼianga kinikʼéjnai je xáli jñani tse nichxin tsakjáʼali kʼoa ñʼai koanli nga kʼin kjoajtín kʼoa nga tsakʼinyasuin (Heb. 13:5). Kʼiatsa miyole maa je Jeobá kʼoa tsje tíjna je ni̱ma̱ná, ʼyañá nga nkjín koya josʼin basenkaoná. Nga tsje koa̱n ni̱ma̱ná kui xi ndatjín si̱kjaʼaitsjeen kʼoa tsín tikui kʼoasʼianñá xi chʼaotjín (2 Cor. 4:2). Nʼio si̱miyoaa je Jeobá kʼiatsa mená jchaa josʼin basenkaoná. wp15 1/10 1:17, 19

Tjíokʼa chjota griego xi kicho ya Jerusalén kʼianga kʼoati tsakʼéjna je sʼuí Paxko. Kʼianga tsabe jmeni xi kisʼin je Jesús ya yo̱ngo̱ ñaki tokʼoakoanle. Kʼoa kʼoakitsole je pastro Felipe tsa koa̱n kjoakaonajmí je Jesús. Tonga je Jesús koankaile, nga̱ tsín mele nga je skoe̱xkon chjota xi koa̱n tsjoánganʼiole kʼoa xi je sitoánntjai. Je xi ngisa nʼio kini Jesús kuinga sitjoson jme xá xi tsakánele je Jeobá, nga kuiyántjainá. Kʼoakitsole je chjotale nga kuiyá, kʼoa nga je xi chjotatjenngile koa̱nni kʼoati tsín yaole katafini ninga si̱kʼien. Kʼiatsa tjíonda nga tsjoá kjoabijnachonle, je Jeobá nda sʼe̱le kʼoa tsjoále kjoabijnachon xi tsínkʼia fetʼa, tojo tso je testo xi kamaxkia ndʼaibi. Kʼoa je Felipe kuijin én jebi kichokao ijngokʼale je chjota griego nga kitsjoanganʼiole (Juan 12:20-25). Ninga kui ngisa kini je Jesús nga kuitsoyason, ali tsa tokuijin xi kisʼin. wp15 1/10 3:13, 14

Kʼianga tsabe Jesús nga jngo kjoa kisʼele je chjotale nga me tokui tsakjáotiyani ngantsjai ʼyani xi ngisa ngʼa tíjna, je Jesús tsejta koan kʼoa nkjín kʼa tsakatekjáyale. Tonga ngasin nganda kʼoakitsole, kʼoa tsakásjai jñani kʼoakitsole kʼoa kʼiani (Mar. 9:33-37). Nga tsjoachai xtiʼndíli ʼyaní nga machjén nga kuichákjáyalai. Kʼiatsa jmeni xi sʼin, tsakui nichxin to kuinókjoakaonajmí kʼoa kʼuínyalai nga chʼaotjín jmeni xi kasʼín. Tonga tsa tsín nrʼoé, jméni xi sʼiain (Prov. 22:15). Kʼoatʼiain jokisʼin je Jesús. Tosi tonda tjandiaalai, tʼailai kjoafaʼaitsjen kʼoa tikixiyandai. Chósonnilai jñani kʼoakʼuínlai kʼoa kʼiani kuichákjáyalai. Ya Sudáfrica, jngo tichjaa xi Elaine ʼmi kʼoatso nga tsínkʼia kao kjoatsʼen tsakatekjáyanile xijchále. Kʼoa kʼoasʼin tsabeni je Elaine nga nʼio tsjoake koan je xijchále. wp15 1/11 1:5, 6

Tosikjaʼaitsjenla, jmé xi choyalee nichxin xi nroaján tsa tsínlani tsjoakená je Jeobá. Tojo jejin chjota koatexomale xínkjín kʼoa tojo jejin Na̱i koanentsja (2 Cor. 4:4; 1 Juan 5:19; Apoc. 12:9, 12). Jebi kui xi bakóná jokji chʼao koa̱nchon sonʼnde tsa tsínlani tsjoakená je Niná. Likuijin nda kuiyoaa. Kʼianga yátsʼi̱n tsakasénle Jeobá je Na̱i, kʼoakitso nga tsínle ʼnde nga je Niná koatexoma. Kʼoa kʼoakitso nga ngisa nda batéxoma je tikʼoajinni Niná (Gén. 3:1-5). Ninga kitsjoaʼndele Jeobá je Na̱i nga katabakó tsa kʼoatjín jmeni xi kitso, tochoa tse kitsjoaʼndele. Nʼio chjine Jeobá nga kitsjoale nichxin je Na̱i, nga̱ kʼoasʼin tíʼyanile nga toje Niná xi male nda batéxoma. Kʼoa jmeni xi kjima jokji nga tínroa nichxin tíʼyale nga tsín nda batexoma je Na̱i kao chjotasonʼnde. wp15 1/11 3:3, 4

Tsa nangitokon maa, kuijin kjuintjenngiaa je kjoafaʼaitsjen xi kitsjoa je Jesús nga kitso: “Kinoʼyanío nga kʼoakitso: Katamatsjoachai xíngi, kʼoa katamajtichai xi jtikeli. Tonga an xinno: Katamatsjoachao xi jtikeno, tichikontʼaon xi nchja̱ʼaonno, nda tikao xi chʼao bekonno, tʼetsʼoantjao xi chʼao síkaono, kʼoa xi fitjenngi kontrano, jméni nga koa̱nsínio ʼndíle Nʼaino xi tíjna ngʼajmi. Nga̱ jé xi síkjitjoson tsʼuíle xi tʼatsʼe xi tsʼen kʼoa xi tʼatsʼe xi nda. Bʼanele jtsí [...] je xi kixi kʼoa xi tsín kixi tjíoma” (Mat. 5:43-45). Ñá xi choʼndale Jeobá maa tjínnele tsjoacha koaan je xi jtikená ninga josikaoná. Tjínnele koakoá ngantsjai nga tsjoachaa je Jeobá kʼoa kao xíngiaa. Ninga tjín chjota xi jtikená kʼoa likui sasénle je Énle Niná, bisenkaoñá kʼianga nganʼio machjénle. wp15 1/11 4:17, 19, 20

Ñá xi choʼndale Jeobá maa kao ndsoʼbaa tichʼasjengʼañá je Jeobá kʼoa nokjoakaoñá je chjota xi tʼatsʼe. Kʼoa kʼoati kui én tinichjén nga tinikʼatoyaa je Biblia kʼoa nga tibinyakoaa je chjota nga katabe je Jeobá. Jmi Biblia tjín, tjínkʼa xi ndasʼin jaʼatoya kʼoa tjínkʼa xi mai. Je ndsʼee xi kisikʼatoya je Traducción del Nuevo Mundo kui xi koanmele nga ñaki nda katafaʼatoya. Kuinga jan koya tjínsíni xi kitjenngi. Xi títjon, nga jchaxkón je jaʼaínle Niná kʼoa nga kʼoatjín kʼa sʼe̱tʼa jotjín kʼa jaʼaitʼa je xo̱njchá xi kjio ngasʼa (Mat. 6:9). Xi majaoni, jñani nga nda sʼe̱ koaan xki̱ én kjoaʼatoya. Kʼoa jñani tsín nda sʼe̱ koaan kʼoasʼin kjoaʼatoya josʼin tínchja̱ni. Xi majanni, nga kui koa̱nchjén je én xi choa ñʼai tjío kʼoa xi sasa majinniná (Neh. 8:8). Ñá xi testigole Jeobá maa, kui nga jan koya jebi timangíntjenngiaa nga tinikʼatoyaa je Biblia kʼoa jetsʼato 130 én jaʼatoya. wp15 1/12 2:1, 2

Tsa tsín ñaki ndasʼin kjoane je xjao, alikuijin skoe̱ josʼin je sondado. Kʼoati ma josʼin nokjoaa. Je Biblia kʼoatso nga choa ñʼai sʼin kuinókjoaa ánni nga koa̱njinsínile chjota (1 Cor. 14:9). Xi si̱kuindaa nga kuinókjoaa, kuinga tsínkui én xi ai tíjna si̱chjén kʼoa xi tsín kjoaxkóntokon tjenkao. Je Jesús kui kisichjén ngantsjai je én xi choa ñʼai tjío. Si̱kjaʼaitsjenjinla jotso kapítulo 5 saʼnda 7 xi tsʼe Mateo. Nga kitsoya alikui kui kisichjén je én xi ñʼai tjío kʼoa xi sikiʼaon kjoafaʼaitsjenle chjota. Nʼio chjíle jmeni xi kitsoya, tonga nʼio choa ñʼai sʼin kitsoya ngantsjai. Tobʼelañá, kʼianga kitsoyale je chjotale nga tsín katasíkjáojin jmeni xi ski̱ne nga nyaon nyaon kʼoakitsole nga tsjoále Jeobá jme xi kjine je nise. Kʼoa xijekoan i kitsole: “Jon ngisasa chjíno kaoni tsa je [nise]” (Mat. 6:26). Kʼoa nga kʼoakitsole kitsjoanganʼiole je chjotale. wp15 1/12 3:13, 14

Jósʼin tíjna je kjoatsjoacha xi koakolee je ndsʼee. Je kjoatsjoacha xi síkʼaxki̱ Biblia, xi koakolee je ndsʼee, kuinga kʼoasʼin tsjoacha katamaa josʼin tsjoachaa je familianá kʼoa kao miyoná (Juan 11:36). Ali tsa to énjin nga ndsʼe ʼmilee xíngiaa ñaki ndsʼee mañá (Mat. 23:8). Je pastro Pablo i kitso: “Katamatsjoachao xíngio joni nga ndsʼao. Ngisa títjon jchaxkón xikʼa joni tsa tijonnio” (Rom. 12:10). Én jebi kui bakóyaná nga tjínnele nʼio tsjoacha katamaa je ndsʼee. Kʼiatsa tsjoachaa je ndsʼee, miyoná koa̱nni kʼoa jtín sʼin kuiyoaa kao je. Ngatsʼi je choʼndale Jeobá ndsʼe sʼin bekon xínkjín tojñani tsʼe (Rom. 10:12). Kuinga jo ndsʼee sʼin tsjoachasíñá xíngiaa nga̱ kui xi tíbakóyaná je Jeobá (1 Tes. 4:9). w16.01 1:5, 6

Tsa tsjoachaa je Jeobá kʼoa kao Jesús ñaki kao kjoatsjoa kʼuínyasoán kʼoa koakoyalee je chjota (Mat. 28:19, 20; Luc. 4:43). Nichxin nga kjoaʼaítsjenya je Kjoabiyale Jesús, koaan kʼoéndajiaan nga precursor auxiliar sʼin si̱xá, tsa 30 kʼoa tsa 50 ora si̱xá. Si̱kjaʼaitsjenla jokisʼin jngo ndsʼee xi 84 nóle xi jekʼien chjoónle. Kʼoasʼin kisikjaʼaitsjen nga tsín kʼoakoa̱nle nga precursor auxiliar sʼin sixá nga̱ jejchínga kʼoa nga̱ chʼin tjínle. Tonga je precursor xi ya chrian tjío tsakinyakao, jé kikao kʼoa jé tsakásjaile ʼnde jñani koan kitsoyason. Kʼoa nga kʼoakisʼin precursor jebi, koan 30 ora kisixá je ndsʼee. A koaan kuisenkoaa tsa ʼyani nga precursor auxiliar katama. Tsandalani likui kʼoakoa̱nná ngatsʼiaa nga precursor sʼin si̱xá, koaan chʼa̱sjeʼaa nichxinná nga ngisa tse si̱xálee je Jeobá. Tsa kʼoasʼiaan, koakoñá nga ʼyachjiá je kjoatsjoacha xi tsakakóná je Jesús. w16.01 2:7, 11

Je xi i̱ koatio Sonʼnde kʼiatsa tsín be joʼmi ngatsʼi xi ya koai ngʼajmi ánni nga i̱ tsosínile: “Menajin nga ya koanngínkaolaijin”. Je Biblia kʼoatso nga “te chjota [...] tsoa̱nʼio je najñojnrole jngo chjota xi judío, kʼoa i kuitso: Menajin nga ya koanngínkaolaijin, nga̱ kinoʼyaníjin nga Niná tíjnakaono”. Bersíkulo jebi “jngo chjota xi judío” síkʼaxki̱, kʼoa xijema “tíjnakaono” tso. Kuinga kʼoabixónsíñá nga tsín tojngo chjota tínchja̱ni, tínchjani ngatsʼi xi ya koai ngʼajmi. Kʼoa je xi i̱ koatio Sonʼnde bení xi tʼatsʼe jebi, kʼoa kuinga kʼoatsosíni nga ya koaikao, xi tsonile, nga tojngo sʼin yaole nga sixále Jeobá. Alikui machjénle nga skoe̱ joʼmi nga jngó jngó xi koai ngʼajmi nga je koaitjenngile. Nga̱ je Biblia kʼoatso nga toje Jesús xi koa̱n kjuintjenngilee (Mat. 23:10). w16.01 4:4

Saʼnda nga tsiaan kʼoa saʼnda nga biyaa, je xi ngisa nʼio machjénná kui kjoatsjoacha. Ñá xi chjotaa machjénná nga ñaki tsjoake katamaná je miyoná. Tonga je xi ngisa machjén nga si̱miyoaa jé Niná, kʼoa je Niná koakoná kjoatsjoachale. Nʼio nkjín chjota xi kʼoasʼin síkjaʼaitsjen nga tsín koa̱n miyoná koa̱n Niná, nga̱ je Niná likui matsen kʼoa tse nganʼio tjínle. Tonga ñá ʼyañá nga koa̱n miyole koaan. Jósʼin ʼyañá. Kuinga nʼio nkjín chjota síkʼaxki̱ ya Biblia xi kʼoati miyole Niná koan. Machjénní nga si̱kjaʼaitsjenjiaan tʼatsʼe chjota jebi kʼoa nga kjuintjenngiaa je choa̱le. Nga miyole Niná koaan kui xi ngisa nʼio chjíle. Jngo xi nʼio miyole Jeobá koan jé Abrahán (Sant. 2:23). Je Abrahán kuinga miyole koanni je Niná nga kisʼele kjoamakjain. Kʼoa je Biblia kʼoatso nga je Abrahán “nʼaile ngatsʼi chjota [...] xi makjainle” (Rom. 4:11). w16.02 1:1, 2

Ninga nʼio chʼao kisʼin je nʼaile Ezequías nga tsakatéxoma ya Judá, je Ezequías nda kisʼin (2 Rey. 18:6). Ánni. Kuinga tsín choa̱le nʼaile kitjenngi. Kui kitjenngi kjoafaʼaitsjen xi kitsjoa je profetale Jeobá. Je Ezequías tsakjaʼáxin jmeni xi kisʼin je nʼaile. Kisitsje yo̱ngo̱le Jeobá, kisijéle kjoanichatʼa je Jeobá tʼatsʼe jée xi tsakajngi je naxinandá kʼoa tsakjaʼáxin ngayeje xkóson xi tjío ngakjijnda ya naxinandá (2 Crón. 29:1-11, 18-24; 31:1). Kʼoa kʼianga jngo rey kichokʼetʼale Jerusalén, je Ezequías tsakakó kjoamakjain kao kjoanʼiojin. Kʼoa kʼoakitsole je naxinandá nga je Jeobá katasínʼiotʼa kʼoa nga je kʼoasjentjai (2 Crón. 32:7, 8). Kʼoa ñandia nga kjoangʼakon tsakʼetʼale, tonga koankjainle nga tsakatekjáyale je Jeobá kʼoa nangitokon koan ijngokʼani (2 Crón. 32:24-26). Je Ezequías alikui choa̱le familiale kitjenngi jokji tse tsakʼejna. Tsakakóní nga miyole Jeobá koan. Koaan chjénngilee jokisʼin Ezequías, nga̱ nʼio nda choa̱ tsakʼéjna. w16.02 2:11

Kʼianga bakoá kjoanda kʼoati basenkaoná nga kixi mangíntʼalee je Jeobá kao xi kjaʼaí. Cha̱niyalai jkui jebi, tsakui nichxin ʼyai nga jngo ndsʼee xi ai jée kabajngi. Tsakui nichxin meli nga tosa je kixi kʼuíntʼalai, kʼoa ngisaa tsa xíngi mani kʼoa tsa nʼio miyoli mani. Tonga kʼoati ʼyai nga je xi kixi kʼuíntʼalai jéní Jeobá. Titjosonlai je Jeobá kʼoa takolai kjoanda je ndsʼee. Kʼoatʼinlai nga kjitʼanangi katasíjéle nganʼio je xi chjotajchínga sʼin tjío. Kʼoa tsa tsín kʼoasʼin, ji tjínneli kuinókjoakoai xi chjotajchínga sʼin tjío. Kʼoa kʼoasʼin nga kixi kʼuíntʼalai je Jeobá. Kʼoa kʼoasʼin koakonilai kjoanda je ndsʼee, nga̱ je xi chjotajchínga sʼin tjío ngasin nganda koatekjáyale kʼoa jé xi koa̱nle koasenkao nga nda kʼoéjna ijngokʼani ngixko̱n Jeobá (Lev. 5:1). w16.02 4:14

Je én xi “jósʼin ʼyaxkón Niná” tso kui tínchja̱ni jmeni xi nʼiai ya jinjtín. Jolani nga ʼmi kjoajtín kʼoa nga ʼmiyasuin. Kʼoati kui tínchja̱ni jmeni xi toji kʼoanʼiai. Jolani nga bʼetsʼoalai Jeobá kʼoa nga chotʼayai je Biblia. ʼYani xi jekitsjoatʼale yaole Jeobá kao kjoatsjoa kʼoasʼínni jebi, ali tsa tobʼénejinle yaole. Kʼoati tso jokitso je rey David: “Kʼianga kʼoasʼian josʼin nga meli, ji Ninána, kui xi simetokoan, kʼoa je kjoatéxomali yaa tíjnajin jinyaona” (Sal. 40:8). Kʼianga jekʼoaitʼalai yaoli je Jeobá kʼoa jekʼuínsʼenngindái, jé kʼoailai kuenta jmeni xi sʼiain. Jmeni xi sʼiain ali tsakuijin xi kuitsoni josʼin je xijcháli kʼoa tsa kjaʼaí chjota. Tsakui kʼoatinʼiai je xá xi tsje kʼoa tiʼyaxkuín Niná, kʼoasʼin tibakoni nga ñaki kʼoatjín tokuin nga kui relijión xi kixi tijnajin kʼoa nga meli kʼoasʼiain jotso kjoatéxomale Niná. Tsa kʼoatinʼiai, jejin me koa̱n kʼuínsʼenngindái. w16.03 2:10, 12, 15

Je Kjoatéxomale Moisés kui tsakinyakao je chjota israelita nga tsín kjoachajngi kitsaojin kʼoa nga tsínkui kʼoakisʼin jokisʼin je chjota xi ya chrian tsakatio. Nga kisitjoson je chjota israelita tse kjoanichikontʼain kitsjoale Niná. Tonga kʼianga tsín kisitjoson, kjoañʼai tsakatiojin (Deut. 28:1, 2, 15). Je Kjoatéxomale Moisés tjen kisikatíondaa je chjota israelita tʼatsʼe nga kjoaʼaí je Mesías. Xi ijngosani, je kjoatéxoma kʼoati tsakinyakao nga koanjinle nga chjotajée ma kʼoa nga machjénle nga tjín xi kʼoasjentjai, nga jngo chjota xi tsje tsjoántjai yaole kʼianga tondiaa jchatʼa je jéele (Gál. 3:19; Heb. 10:1-10). Je kjoatéxoma kʼoati tsakasenkao je familia jña kinroani je Mesías. Kʼoa tsakasenkao je chjota israelita nga tsabe ʼyani xi Mesías kʼianga jejaʼai. Kuinga kʼoatsosíni Biblia nga je “kjoatéxoma joni tsa choʼnda koan, xi kiskanitʼaná ya Cristo”. w16.03 4:6, 7