Abril

Kʼianga sʼa títjon, jngo ánkje tsakʼejna xi miyole mani je Jeobá. Tonga ánkje jebi chan kui koanmele nga je katabʼétsʼoale chjota ʼndele nga Niná kʼoetsʼoale. ʼNdele nga tosichajin jme xi kjimamekon tosa tokui kisikjaʼaitsjenʼnde, kʼoa nga kʼoakisʼin chaan tsakajngijée (Sant. 1:14, 15). Yátsʼin tsakasénle Jeobá “kʼoa nʼaile kjoandiso” tsakʼin (Juan 8:44). Alikui ʼyaa joʼmi xi ñaki jaʼaínle ánkje jebi kʼianga kjesa bajngijéejin, tonga Na̱i ʼmilee. Je xi nʼio kontra tíjnale je Jeobá kao je chjota jéní Na̱i. Ya Biblia nkjín koya josʼin bʼaijaʼaínle je Na̱i kʼoa jebi kui bakóyaná jokji tsʼen. Tobʼelañá, “Satanás” tsole kʼoa kui tsoyanile nga tsakʼejnachjoale Niná. Kui kʼoatsonile nga̱ tsín sasénle josʼin batéxoma je Jeobá kʼoa tíbʼejnachjoale. Je Satanás alikui mele nga Jeobá koatexoma. wp15 1/5 1:1, 2

Kʼianga chotʼayá Biblia be yaoná jmeni xi tjínnele si̱kʼantjaiyaa kʼiatsa mená nga ngisasa nda si̱xálee Niná. Tonga kʼoati ʼyaa jokjoan je Niná kʼoa jmeni xi ñaki kao kjoatsjoachale kʼoasʼínni. Kʼianga ʼyaa jebi, ngisasa nʼio matsjoachaa. Kʼoa je ngisasa nʼio matsjoakená. Kʼoa je kjoamiyo xi tjínná kao je Niná ngisasa nʼio sʼejna. Kʼiatsa mená nga si̱chriantʼalee je Jeobá, nʼio machjén nga kataʼyaa jme xá tichotʼayáñá je Biblia. Je Jesús kʼoakitso tsa mená kuiyoaa ngantsjai nichxin machjénní nga nda kataʼyaa je Jeobá (Juan 17:3). Kjoaixiní nga naskánatjín xi ʼyaa kʼianga chotʼayá Biblia. Tonga ali tsakuijin xá chotʼayañá. Kui xá chotʼayañá kʼianga jchasaa je Jeobá (Éx. 33:13; Sal. 25:4). Kʼiatsa ñaki miyo sʼin jchatokoán je Jeobá, alikui kui si̱kjáojiaan tsa jme kjoani xi tsín bʼéyanajmí anni kʼoakisʼinni je Niná. wp15 1/4 3:6-8

Je chjotajchínga xi xinxin naxinandále tjíobinyakao je ndsʼee nga tsesa xá katabʼaile kʼoa nʼio nda tíbichótsjoá. Nga kichjonangi kʼale jósʼin binyakao je ndsʼee, me mangóson je kjoafaʼaitsjen xi kitsjoa ninga xinxin ʼndele. Jebi kui bakóná nga ngakjijnda machjén kjoafaʼaitsjen xi faʼaitʼa Biblia kʼianga binyakoaa je ndsʼee nga tsesa xá katabʼaile. Je xi títjon sʼin je xi chjotajchínga sʼin tíjna kuinga katasíkʼéjnanda ni̱ma̱le je ndsʼee xi koasenkao. Tobʼelañá, jngo chjota xi tsojmi bʼéntje, títjon kjoanla síndachon je nangi. Nga̱ kʼoasʼin nga ngisa nda ma je tsojmintje. Kʼoatisʼinni, je xi chjotajchínga sʼin tíjna títjon kjoanla katasíkʼéjnanda ni̱ma̱le je ndsʼee ánni nga toje tíjnandasíni kʼianga kʼuínyale. Koaan koaitjenngi choa̱le je profeta Samuel josʼin kisikʼéjnanda je Saúl nga koasentítjonle naxinandá Israel (1 Sam. 9:15-27; 10:1). wp15 1/4 1:11, 12

Nʼio nkjín koya jmeni xi tjín sonʼnde je xi chʼaotjín. Je Na̱i kui síchjén jmeni xi tjín sonʼnde nga kui si̱metokoán kʼoa nga kuitjátoné kjoatéxomale Niná. Je Na̱i koasjaile josʼin nga ngisa katamatsjoachaa xi tjín sonʼnde kʼoa nga tsín tinanda kʼoénenilee yaoná nga si̱tjosonlee je Jeobá (1 Juan 2:15, 16). Kʼoakoan kʼa je chjotale Cristo xi tsakatio kʼianga siglo 1. Tobʼelañá, jngo chjotale Cristo tsakʼejna xi Demas tsakʼin je xi tsakasenkao je Pablo. Tonga je Pablo kʼoakitso nga kitsjionkon je Demas nga kui ngisa koantsjoake xi tjín sonʼnde (2 Tim. 4:10). Jmékjoánni xi nʼio koantsjoake je Demas. Alikui kʼoatso ya Biblia. Tsakui nichxin tao̱n ngisa koantsjoake tikʼoajinni je xále Jeobá. Kʼianga kʼoakisʼin, nʼio tse kjoanda kisicha nga tsín ti Jeobá kisixánile. Toxitsjoa jme xi kisʼin. Jme xi tjín sonʼnde alikui mangóson jokji kjoanda tsjoále tsakai je Jeobá (Prov. 10:22). wp15 1/5 2:10, 11

Je Jesús koanchoyale je kjoañʼai xi tjíofaʼá chjota ninga tsínkui kjoa jaʼatojin. Tobʼelañá, je chjota kjoañʼai tsakjaʼá xi totʼatsʼe je chjotatítjonle relijión. Chjota jebi énndiso kitsoyale chjota kʼoa tojé kisikʼatsen kjoatéxoma xi tsín tʼatsʼe Niná jaʼaini. Kʼoa je chjota nʼio kitsokjonle (Mat. 23:4; Mar. 7:1-5; Juan 7:13). Je Jesús alikui kitsokjonle chjota xokjoan kʼoa nikuijinla koankjainle je énndisole. Tonga koanchoyale jokisatio kon je chjota kʼoa koanmake. Kʼoakitso nga kʼoasʼin tjío joni tsa barré xi tsínle xi koʼnda (Mat. 9:36). Je Jesús jé Nʼaile kiskenngile, tsjoake koan je chjota kʼoa tsakakóle kjoamatokon. Ñandia kʼianga nʼio kjin kikakóyason je pastrole kʼoa jenʼio kijtale kʼoa jngo ʼnde tsakásjai jñani koa̱n sikjáya. Tonga je Jesús tsabee nga nʼio nkjín chjota tjíokoyale. Bení nga nganʼio machjénle chjota jebi kʼoa kuinga kitsoyanile (Mar. 6:30, 31, 34). wp15 1/5 4:3, 4

Ya capiítulo 8 xi tsʼe Proverbios kui nchja̱ni xi tʼatsʼe kjoachjine, kʼoa jo chjota sʼin síkʼóya. Je xi kjoachjine tsole jé Jesús, je ʼNdítjonle Niná, kʼianga kjesa faʼaijin i̱ Sonʼnde. Ya Proverbios kʼoatso nga ya tíjna Jesús kʼianga kisinda Niná ngayeje tsojmi xi tjín. Je Jesús yaa tíjnatʼale “joni jngo choʼnda xi nʼio nda síxá”. Nʼiojin tsjoa kisʼele nga tsakʼejnakao Niná kʼianga kisinda ngayeje tsojmi xi tjín ya ngʼajmi kʼoa kao xi tjín i̱ Sonʼnde. Tonga je xi ngisa nʼio tsjoake koan je Jesús jéní chjotasonʼnde (Prov. 8:22-31). Jósʼin tsakakó Jesús kʼianga nʼio tsjoake je Niná kao chjotasonʼnde. Kʼoasʼin tsakakóni kʼianga jaʼai i̱ Sonʼnde nga kitsjoa kjoabijnachonle kʼoa nga tsakʼasjentjainá xi tʼatsʼe jée kao kjoabiya (Mat. 20:28; Filip. 2:5-8). Jmeni xi kisʼin Jesús kui bakó nga nʼio tsjoakená. wp15 1/6 2:1, 2

Tsa bʼailai kjoanda Jeobá jmeni xi kisʼin xi tʼatsi, xi ngisasa ndatjín nga kʼoasʼiain kuinga kʼoaitʼalai yaoli kʼoa nga kʼuínsʼenngindái. Nga bʼaitʼalee yaoná Niná kui xi tsonile nga kʼoaʼmilee nga kui kʼoasʼiaan ngantsjai josʼin mele. Tonga ali nokjonjin nga kʼoakʼuínlai Jeobá, nga̱ je kui xi mele nga ndasʼin kuijnai kʼoa nʼio tse kjoanda tsjoále je xi sítjosonle (Heb. 11:6). Kʼianga kʼoaitʼalai yaoli je Jeobá kʼoa kʼuínsʼenngindái nʼio ndasʼin kuijnai. Je Jeobá kui xi mele nga ndasʼin kuijnai. Tonga je Na̱i alikui mandosinle nga ndasʼin kuijnai nga̱ to yaole fini. Tsakui kʼoasʼiain jmeni xi mele alijme xi tsjoáli. Nga̱ tsín jme xi tjínle. Tsín jme xi ndatjín tjínle kʼoa alijme kjoachoya tsjoá. Nga̱ tsín jme kjoachoya tjínle je kʼoa to jchajin. w16.03 2:16, 18, 19

Kʼianga bʼetsʼoalee je Niná, chʼasjengʼañá, bʼailee kjoanda kʼoa nijelee nganʼiole. Kʼoasʼin machriantʼanilee. Tonga tsa mená nga ñaki miyoná katama je Jeobá, ñaki kʼoakʼoé tokoán kʼianga nrʼoéná kʼianga bʼetsʼoalee. Si̱kjaʼaitsjenla je Jesús. Kʼianga kjesa faʼaijin i̱ Sonʼnde, tsabee josʼin kisitjoson Jeobá jmeni xi kisijéle chjota kʼianga tsakʼétsʼoale. Kʼoa kʼianga jaʼai i̱ Sonʼnde je Jesús, tsakʼétsʼoale Niná kʼoa kʼoakitsole jotjín kon kʼoa jomale. Ñandia kʼianga tsʼajnda nitje̱n tsakʼétsʼoa (Luc. 6:12; 22:40-46). Xi ijngosani, kʼoakitsole je chjotale nga katabʼétsʼoa. A kʼoakisʼin kʼiatsa belani nga tsínni nrʼoé je Jeobá kʼianga bʼetsʼoalee. Maijin. Tsabee kʼianga nrʼoéná je Jeobá. Kʼoa kʼoati ñaki tjíojngo tokoán tsanda ñá kʼianga nrʼoéná je Jeobá nga bʼetsʼoalee (Sal. 65:2). wp15 1/4 3:11, 13

Nʼio tse xi koa̱nle je xtiʼndíli nga kjuinrʼoé josi kʼianga bʼetsʼoalai Niná ngixko̱n. Koaan koakoyalai nga je Jeobá katasínʼiotʼa. Jósʼiain. ʼNdele nga toje si̱jéntjai kʼoati tijéntjai yaoli. Jngo tichjaa xi Brasil tsʼe xi Ana ʼmi kʼoatso nga je Jeobá kisijéntsjaile nganʼio je xijchále kʼianga kjoa kisʼele. Tobʼelañá, kʼianga chʼin tsakʼetʼale je pajchále, je xijchále Ana jé Jeobá kisijéle nganʼio kao kjoachjine nga tsabe jokisʼin. Jé Jeobá kisijéle nganʼio ngantsjai kʼianga kjoa jaʼatojin. Kui xi tsakasenkao je Ana nga je Jeobá kisinʼiotʼa yaole. Kʼoati koa̱n sʼiain tsanda ji kʼianga kʼoétsʼoai kao xtiʼndíli. Tobʼelañá, tijélai je Jeobá kjoanʼiojin nga kʼuínyalai je chjotandaindʼiali kʼoa tsakuije̱ nga si̱jékjoalai je naili nga koa̱n kʼuín kjoajtíntse. Tsa kʼoasʼiain je xtiʼndíli skoee nga ninʼiotʼai je Jeobá kʼoa kʼoati sʼin tsanda je. wp15 1/11 1:7, 8

Jngo koya xi nʼio koasenkaoli nga ngisasa koa̱ntsjoachai je Jeobá kuinga si̱kjaʼaitsjenjin je kjoabʼechjíntjaile Jesús (2 Cor. 5:14, 15; 1 Juan 4:9, 19). Tsa chʼa̱sjeʼai nichxin nga si̱kjaʼaitsjenjin kjoatjao jebi, ngisajin nʼio jchachjísai kʼoa kʼoaijinlai kjoanda je Niná. Tikjaʼaitsjenlai choa̱ jebi. Tsa jelani tífijtali ya jinnandá tonga tsa ʼya xi koasenkaoli. Jósʼiain. A tsín kʼoailai kjoanda je chjota xi kabʼasjentjaili kʼoa a tokʼuínni ya ndʼiali nga kʼuínnikʼantjaiyai najñoli. Maijin. Nʼiojin tse kjoanda kʼoailai kʼoa alikuijin kʼia cha̱jinli. Tikʼoasʼinni tsanda ñá, tjínnele kʼoailee kjoanda je Jeobá kao Jesús nga tsakʼasjentjainá xi tʼatsʼe jée kao kjoabiya. Kui kʼoakisʼinni nga nʼio tsjoakená. Kʼoa nga kʼoakisʼin koaan kuiyoaa ngantsjai nichxin ya Sonʼndenaxó. w16.03 2:16, 17

Je Jeobá nʼio aon koanle nga totaon tsaʼya je ʼNdíle nga jaʼai i̱ Sonʼnde. Tonga je Jesús kisitoánntjai ngantsjai nga je Niná bakinle koatexomaná. Kʼoati tsakakó nga koa̱n kixi koaitʼale Niná jngo chjota xi tsje ninga nʼio ñʼai kjoa kjoaʼatojin. Je Jesús tse kjoañʼai tsakjaʼá, kixi koan saʼnda nga kinikʼien kʼoa kisitoánntjai nga toje Nʼaile xi tiʼndele nga koatexoma. Jósʼin basenkaoná ngatsʼiaa nga kʼienntjainá je Jesús. Koaan kuiyoaa ngantsjai nichxin ya sonʼndenaxó. Kʼoa je pastro Juan i kitso: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle” (1 Juan 4:9, 10). wp15 1/11 3:13, 14

Nga ya kinroañá ngatsʼiaa je Adán, chjotajée maa kʼoa kjoabiya choʼndá, kuinga machjénniná ngatsʼiaa je kjoabʼechjíntjaile Jesús. Kʼoati machjénle kjoabʼechjíntjai jebi ninga je choʼndale Niná xi ñaki kixi tjíofitʼale. Tjínnele katamajinná nga nʼio tse xi kisichatʼaná je Niná. Tsa bʼailee kjoanda nga kisichatʼaná, jméni xi tjínnele sʼiaan. Chjónangilee yaoná: “A tjín xi kisikaona jngo ndsʼee”. Chjénngilee josʼín je Jeobá nga tíjnanda nga síchatʼa (Neh. 9:17; Sal. 86:5). Tsa bʼailee kjoanda nga síchatʼaná je Jeobá, ñaki yajin ni̱ma̱ná kjuinroajinni nga si̱chatʼalee xíngiaa. Tsa mená nga tsjoake koa̱nná kʼoa sichatʼaná je Jeobá, tjínnele nga tsjoacha koaan kʼoa si̱chatʼalee je ndsʼee (Mat. 6:14, 15). Tsandalani likui tikoa̱n si̱kʼantjaiyañá jmeni xi koan nichxin xi jejaʼato, koasenkaoná nga tsjoa sʼe̱ tokoán nichxin xi sʼa nroa. w16.01 2:5, 15-17

Je Jesús tsakasenkao je Pedro kao xi ngikʼa chjotale nga kui katakaníya jko̱ nichxin xi nroaján. Koan kui kiskaniya jko̱ nga koatexomakao Jesús ya ngʼajmi kʼoa nga kuinyakao chjota nga chjotatsje katama. Je choʼndale Niná kui kiskaniya jko̱ jmeni xi kisitaja kjoamakjainle. Tobʼelañá, je Abel kui kiskaniya jko̱ jmeni xi tongini kitso Niná. Kʼoa nga koankjainle jmeni xi kitso Jeobá, je Jeobá nʼio tsjoa kisʼele xi tʼatsʼe. Je Abrahán kui kiskaniya jko̱ kʼianga kuitjoson jmeni xi kitso je Jeobá tʼatsʼe jngo ntje̱ (Gén. 3:15). Kʼoa je Moisés kui kisikjaʼaitsjen je kjoanda xi kitsole Niná nga tsjoále kʼoa kui xi tsakasenkao nga tsjoake koan kʼoa nga kixi kitʼale (Heb. 11:26). Kʼiatsa kʼoati kui cha̱niyaa jkoaa nichxin nga sitjoson jmeni xi títso je Jeobá, ngisaa nʼiosa tsjoacha koaan kʼoa ngisaa nʼio sʼe̱jna kjoamakjainná. wp15 1/5 3:17, 18

Kʼiatsa mená nga sʼe̱ná kjoafaʼaitsjen, kʼoasʼiaan jokisʼin Jesús. Alikui tokatamajngoni tokoán nga toʼi̱natjín jchaa jmeni xi tso je Biblia. Machjénní nga nʼiosa chótʼayajiaan, nga̱ ʼyañá nga “je tsojmi xi taja, kui xi machjénle je xi jekoanjchá” (Heb. 5:14). Machjénní nga katasʼená kjoankjíntokon xi ñaki kixi (Efes. 4:13). Kʼianga sʼe̱ná kjoankjíntokon jebi jngo programa kʼoéndaa josʼin chótʼayá. Nyaon nyaon kʼoéxkiaa je Biblia, kʼoa nga xki̱ xomana chótʼayá nga toñá kʼoa kao familianá. Kʼianga chótʼayá, si̱kjaʼaitsjeen jomale Jeobá kʼoa josʼin síkjaʼaitsjen, kʼoa xijekoa̱n kui kjoafaʼaitsjen si̱chjén kʼiatsa jmeni xi mená sʼiaan. Kʼiatsa kʼoasʼiaan, nʼio sʼe̱jna kjoamiyo xi tjínná kao Jeobá. Kʼianga kotʼayajin Biblia je chjotale Cristo kui nganʼiotsjele Niná basenkao nga sʼele kjoafaʼaitsjen. wp15 1/9 1:5, 9, 10

Je Jesús nʼio nda be josʼin tjínnda Sonʼnde kʼoa bení josʼin kʼoechjoale jolani tsa ntjao̱ kʼoa tsa ndáchikon. Kʼianga tsakʼejna i̱ Sonʼnde, tsakakó nga male bʼéchjoale je ntjao̱ kao ndáchikon. Cha̱niyala jkoaa jme xi koan. Je nandále ndáchikon ñaki tsakʼétʼale je chitso xi tjíoya kʼoa jaʼasʼen nandá. Ñaki tífane je nandá kʼoa tífijen tífikjá je chitso. Ninga kʼoakjima, je Jesús nʼio aonyale kʼoa kijnafe. Je chjotale nʼio kitsokjon. Kisikjaʼále Jesús kʼoa kitsole “jetinyamʼainjin” (Mat. 8:25). Jmé xi kisʼin Jesús. Tsakisótjeen kʼoa kitsole ntjao̱ kao ndáchikon: “Jyó tijnai” kʼoa je ndáchikon tsakʼejnajyo (Mar. 4:39). Choa̱ jebi kui xi bakóná nga koa̱nle Jesús kʼoechjoale jolani tsa ntjao̱xkón kao jtsínʼio. wp15 1/6 1:12-14

Kʼianga jekitsoya Jesús je padrenuestro, jngo choa̱ tsakʼéjna nga tsínkui nʼio si̱kjáojiaan jmeni xi machjénná. Kʼoakitso nga je naxó xi tjín ya jinjñá alijme xi makjáojinle nga̱ je Jeobá síkuinda. Tikʼoasʼinni, alikui koa̱n kui si̱kjáojiaan josʼin so̱koná jmeni xi machjénná nichxin xi nroaján (Mat. 6:30-34). Tsjoa katasʼe tokoán jmeni xi tjínná nga nyaon nyaon. Tobʼelañá, koaan si̱jélee Niná jñani nga kuijnaa, nga so̱koná jngo xá xi koa̱n kuichiʼanilee yaoná kʼoa nga katabasenkaoná jmeni xi koa̱n sʼiaan tsa chʼin kakatʼaná. Tonga ijngo koya tíjna jmeni xi ngisa nʼio tjínle kjoandosin nga si̱jé. Kuinga si̱jélee Jeobá nga tosi tonda katabakóyaná kʼoa katabasenkaoná nga miyole koaan. Ánni nga kʼoabixónsíñá. Kuinga i̱ kitso je Jesús: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná” (Mat. 4:4). wp15 1/6 5:4, 7, 8

A nijelee ngantsjai je Niná nga katabasenkaoná nga kixi katamaa kʼianga jme xi satíobasenná. Tsakui nichxin kʼianga kjesa testigole Jeobá majián kui kʼoakinʼia xi chʼaotjín. Kʼoa tsakui nichxin sakʼoa kui mametokoán ndʼaibi. Tonga je Jeobá koaan koasenkaoná nga tsín tikʼoasʼianñá ánni nga nda kuiyosíñá ngixko̱n. Je rey David kʼoakoan. Kjoachajngi kisʼin kao jngo chjoón xi tsín tsa chjoónle mani. Tonga kʼoakoannile jéele kʼoa kʼoakitsole Jeobá nga “jngo ni̱ma̱ xi tsje sʼin tíjna” katatsjoále kʼoa nga katabasenkao nga sitjoson (Sal. 51:10, 12). Kʼiatsa kui tibixkantʼakoai jmeni xi chʼaotjín, tijélai nganʼio je Jeobá. Jé koasenkaoli nga si̱tjosonlai, nga ndasʼin si̱kjaʼaitsjain, nga nda sʼiain kʼoa nga tsínkui sikinjeli xi chʼaotjín (Sal. 119:133). wp15 1/6 3:5, 6

Je ndsʼee xi jetjínle nó tsabee nga nichxin kjoatse tojngo mani xi tsakándiaale nga jngó jngó jtín, nga tojngo koanni xi tsakándiaale nga jngó jngó sucursal kʼoa nga tojngo chjota tsakasentítjonle je oficina xi tíjnatítjon xi tsʼe Sociedad Watch Tower. Ninga tsakatio xi tsakinyakao ndsʼee jebi, tonga tojngo koanni xi kʼoakitso josʼin tjínnele koa̱nxá ya jinjtín, ya sucursal kao ya oficina xi tíjnatítjon. Kʼianga jejaʼato nó 1970, kʼiaa kisʼendajin nga jngo jtín xi chjotajchínga sʼin tjío kʼoakuitso josʼin koa̱nxá. Kʼianga kʼoasʼin tsʼantjaiyajin nʼio tsakasenkao je naxinandále Niná. Nga̱ kui kʼoakoanni nga ngisa nda majinná ndʼaibi jmeni xi tso je Biblia. Je naxinandále Niná nʼio basenkao nga tsín tsa tojngo chjota kʼoatso ndʼaibi jmeni xi ma. Tsjoánganʼio ngatsʼi je “kjoatjao” xi kitsjoa Jeobá, xi tsonile, je xi chjotajchínga sʼin tjío, nga jme xi sʼendajin (Efes. 4:8). wp15 1/7 1:14, 15

Ñá xi choʼndale Jeobá maa alikui ya nojiaan yaoná je kjoa xi síxkoa̱ya chjota. Kuinga tsín kʼoanʼiañá nga tsjoachaa je Jeobá kʼoa nga mená si̱tjosonlee (1 Juan 5:3). Alikui mangínñá jñani tiyoaa kʼoa jñani kitsiaan, kui mangíntjenngiaa kjoatéxomale Jeobá. Xi ngisa mandosinná kuinga bʼainganʼiolee je Jeobá kao chjotaxále (Mat. 6:33). Kʼoa kuinga tsín i̱ nojinsíñá yaoná jme xi chon sonʼnde (Is. 2:4; Juan 17:11, 15, 16). Nʼio nkjín chjota xi kʼoasʼin síkjaʼaitsjen nga ngisa chjíle naxinandále kao kostumbrele tikʼoajinni xi kjaʼaí. Kʼoati tjío chjota xi kʼoatisʼin síkjaʼaitsjen tʼatsʼe chjota xi síská nga ngisa chjíle je equipo xi finile. Yaa nroani nga kʼoasʼin kjan chjota, nga jtike ma xínkjín kʼoa nga saʼnda síkʼien je xi tsín kʼoasʼin síkjaʼaitsjen. Nʼio choa ñʼai sʼin tíjna nga kjoasi nojiaan yaoná. wp15 1/7 3:1, 2

Je Jeobá nʼio tsje, kʼoa kui xi mele nga chʼin si̱xá. Kuinga machjénni nga tsje si̱choaan ya Ndʼia jña chotʼayá kʼoa chʼin chʼin si̱katioá je tsojmi xi tjío (1 Cor. 14:33). Nga tsje koaan joni Jeobá, tjínnele tsje kʼoé kjoafaʼaitsjenná, tsje sʼiaan kʼoa nga ñaki tsje sʼin tíjna je kjoaʼyaxkón xi kʼoailee je Jeobá. Kʼoati machjén nga tsje sóyoaa (Apoc. 19:8). Tsa tsje nichoaan ya Ndʼia jña chotʼayá, ñaki tjínjngojin tokoán nga kʼoakʼuínlee chjota nga katafi kjoajtínná. Kʼoa kʼoasʼin koakonilee nga mená ya kuiyoaa jngo sonʼnde chjotse jñani tsje chon. Kʼoati skoe̱ nga je bʼetsʼoalee Niná xi tsje tíjna kʼoa xi ʼndenaxó sikao i̱ Sonʼnde (Is. 6:1-3; Apoc. 11:18). Tojñani tsaan kʼoa ninga kjaʼaísʼin síkjaʼaitsjen chjota, tjínnele nga tsje si̱choaan ya Ndʼia jña chotʼayá kʼoa chʼin chʼin si̱katioá je tsojmi xi tjío, nga̱ yaa ʼyaxkoán je Jeobá (Deut. 23:14). wp15 1/7 4:13-15

Kʼianga koanjinle je chjotale Cristo nga nó 1914 tsakʼétsʼiakaoni Jesús nga tsakatéxoma, koanchoyale nga jeme kjoaʼaí kjoafetʼa. Kuinga tsakationdasíni. Jméni xi kisʼin. Nʼio kitsoyason. Je Jesús kʼoakitso nga tsakui nichxin kjaʼaíni ora kjoaʼaí je nai josʼin tjíokoyale je choʼndale. Ninga tojochon kjoaʼaí naile, tjínnele nga tjenyatokon koatio. Choa̱ jebi kui bakóyaná nga ninga jenkjín nó tichoyá, alikui xi tsonile tsa sʼa nʼio tse chale nga kjoaʼaí kjoafetʼa kʼoa tsa tsín tijchañáje̱ nga kʼoakoa̱n. Machjénní nga tosi tonda tjenyatokon kuiyoaa. Kʼianga jetiyoaa ya ʼNdenaxó kʼoa jekaʼyaa josʼin kisitjoson ngayeje jmeni xi kitso Jeobá ngisajin si̱nʼiotʼaa nga̱ ʼyañá nga sítjoson ngayeje én xi tongini tso (Jos. 23:14). Nʼiojin kʼoailee kjoanda je Jeobá nga ñaki choa̱lekjoan jaʼaikao kjoafetʼa kʼoa nga kʼoakitsole je choʼndale nga tjenyatokon katabatio (Hech. 1:7; 1 Ped. 4:7). wp15 1/8 2:10, 11, 14

Nichxin xi tiyoaa ndʼaibi, nʼio nkjín chjota xi kui bʼétsaojinkao jmeni xi jtike je Jeobá. Tobʼelañá, je kjoatsʼen, kjoachajngi, majia kao kjoabʼenda. Je kjoa jebi to ndatjín male chjota nga kui kotsenle ya Internet, ya telebisión, ya cine, nga bʼéxkia libro kao rebista. Tjínkʼa naxinandá jñani tjíosíkʼantjaiya kjoatéxomale kʼoa jetsjoáʼndele ndʼaibi je chjota nga kui kʼoasʼín jmeni xi chʼao be ngasʼa. Tonga je Jeobá alikui tísíkʼantjaiya kjoatéxomale, tojo jtikení jmeni xi chʼaotjín (Rom. 1:28-32). Kʼianga tsakatio je chjotale Cristo, je chjota kʼoati kui tsakʼétsaojinkao je kjoatsʼen kao kjoachajngi. Tonga je chjotale Cristo alikui kʼoakisʼin, nga̱ kui kisitjoson je kjoatéxomale Niná. Nʼio nkjín chjota xi to kjaʼaísʼin tsabekon, totsabesin kʼoa kitjenngike (1 Ped. 4:4). wp15 1/8 4:2, 3

Je chjotale Cristo xi jetjínle kjoafaʼaitsjen bʼénele yaole nga tsjoánganʼio nga tsín xkoa̱ya bʼejna je jtín (Efes. 4:1-6, 15). Je xi mele naxinandále Niná kuinga jtín sʼin koatiokao xínkjín ngatsʼi chjotale. Kʼoa ngatsʼiñá nga koa̱n kʼoainganʼioá nga jtín sʼin kuiyoaa ninga sakʼoa tsín sasénná josʼín je ndsʼee. Kʼianga kʼoasʼin kuiyoaa, machjénní nga nangitokon katamaa. Tobʼelañá, kʼiatsa jngo ndsʼee kʼoa tsa jngo tichjaa xi sa̱téngi kʼoa sijtiná, jósʼiaan. A tsín tikuinókjoakaoñá. Axo kuijnyísjailee nga nyʼán kuiyoaa kao je. Kʼiatsa jetjínná kjoafaʼaitsjen, kʼoéndajinjián je kjoa xi sʼe ʼndele nga tokʼoaiʼndee nga katamatse. wp15 1/9 1:12, 13

Je Jesús ñaki be nga tʼatsʼe Niná jaʼaini je Biblia kʼoa nga nʼio nda kjoafaʼaitsjen faʼaitʼa. Kʼiatsa mená nga chjénngilee je Jesús, nyaon nyaon kʼoéxkiaa je Biblia, chótʼayá kʼoa si̱kjaʼaitsjenjiaan jmeni xi chotʼayá. Kʼoati kjoásjeyaa tsa jmeni xi jao sʼená. Tobʼelañá, a ñaki tjínjngo tokuin kʼianga jenichxin fetʼa tiyoaa ndʼaibi. Chótʼayai jmeni xi tongini kitso je Biblia tʼatsʼe nichxin fetʼa kʼoa titajai kjoamakjainli. A jao tjínli nga sitjoson je Jeobá nichxin xi nroaján jmeni xi kitso. Chótʼayajin jmeni xi tongini kitso Biblia xi jekitjoson. A ñaki tjínjngo tokuin nga nʼio machjén ndʼaibi je kjoafaʼaitsjen xi tsjoá je Biblia. Chótʼayajin tʼatsʼe ndsʼee xi kisindaya yaole kʼianga kitjenngi je kjoafaʼaitsjen xi tsjoá je Biblia kʼoa koa̱ntajaa je kjoamakjainli (1 Tes. 2:13). Kʼoa tojo kisʼin je Jesús, tikjaʼaitsjenjin jmeni xi tongini kitso je Jeobá nga tsjoáli (Heb. 12:2). wp15 1/9 3:16, 17

Jósʼin koakolee je Jeobá nga tsjoachaa. Jngo koya josʼiaan kuinga kʼoee tao̱n xi machjén ya jinjtínná nga katafisonsa je Énle Niná jngo tjíjtsa Sonʼnde. Koaan kʼoee jokji tjen tjínná nga koakolee je Jeobá nga tsjoachaa (2 Cor. 8:12). Tonga kʼoati tjínsa josʼin koakolee nga tsjoachaa. Ijngosa koya kuinga ninʼiotʼaa. Tobʼelañá, je Jesús kʼoakitso nga tsín nʼio si̱kjáojiaan nga so̱koná je tsojmi xi machjénná. Je Jeobá kʼoatsoná nga tsjoáná tsojmi jebi kʼianga je si̱xálee (Mat. 6:31-33). Kʼianga makjainná jmeni xi tso je Jeobá bakolee nga tsjoachaa (Sal. 143:8). Kuinga chjónangisínilee yaoná: “A bakole Jeobá nga tsjoake̱ josʼin sichjén je nichxinna kao nganʼiona. A bakoña nga nyaon nyaon nga ñaki makjainna nga je tsjoána jmeni xi machjénna”. wp15 1/9 5:7, 8

A sakʼoaa chjonangilai yaoli kʼiatsa kʼoasjentjaili je Jeobá kʼianga kjoaʼaí kjoañʼai xi nʼio tse. Je xi nʼio machjén kuinga nʼio katasʼejna kjoamakjainná. Je pastro Pedro kʼoakitso nga nʼio chjíle nga kui sʼe̱ná je kjoamakjain xi jekachotʼayakao (1 Ped. 1:7). Kʼianga jemachrianle je kjoañʼai xi nʼio tse, machjén nga kui katasʼená je kjoamakjain xi kʼoasjentjainá (Heb. 10:39). Kuinga kʼoénesínilee yaoná nga sa nʼio sa nʼio katasʼejna kjoamakjainná. Kʼoa kʼoasʼin kʼoasjentjainá je Jesús kʼianga kjoaʼaísíkje sonʼnde jebi. Koaan kʼoakʼuínlee je Jeobá tojo kitsole jngo chjota je Jesús, kitsole: “Makjainna, xi tsín timakjainnina, tisenkaonái” (Mar. 9:24). Kʼoa kʼoati koa̱n kʼoakʼuínlee Niná jokitsole je pastrole Jesús, kitsole: “Tisenkaonajin, jméni nga ngisa nʼio koa̱nkjainsíninajin” (Luc. 17:5). wp15 1/10 2:1, 2

Je pastro Pablo kui kisikʼéjna títjon jmeni xi ngisa nʼio chjíle. Nʼio kitsoyason kʼoa nkjín ʼnde tsakʼamje jolani tsa Siria, Asia Menor, Macedonia kao Judea. Kuinga i̱ kitsosíni: “Ñaki tisichajian je xi jejaʼato, tonga bʼasjenía nganʼio, jméni nga kjuicho nrʼoesínia xi sʼa nroa. Sʼinle kjoanʼio yaona, jméni nga kjuicho nrʼoesínia choa̱ nga tjoéna chjína” (Filip. 1:10; 3:8, 13, 14). Kʼoa nga tsínle chjoón, ngisaa kisʼele nichxin nga kisixále Niná (1 Cor. 7:32-35). Nichxin xi tiyoaa ndʼaibi, tjínkʼa je choʼndale Jeobá xi tsín tjíobixan nga mele nga tsesa sixále Niná (Mat. 19:11, 12). Je xi sʼa tjíotoje ngisaa choa xá kjinele tikʼoajinni jngo xi jechixan. Ninga toñá tijnaa kʼoa ninga jechixan, machjénní nga tsín tokjaʼaíla kjoa si̱sinlee nga tinixálee Jeobá. Tobʼelañá, tsakui nichxin si̱kʼéjnaa jmeni xi jenganá kʼoanʼia nga tsín nichxinná si̱chaa kʼoa ngisa nda si̱xálee Jeobá. wp15 1/10 3:15, 16

Ñaki kʼoatjín jotso én jebi. Kʼoa je Biblia kʼoati tso “nga je chjota likui koa̱n nga toje skién ndiaale. Saʼnda likui bakinle je chjota xi tsoʼba nga je koandiaale yaole” (Jer. 10:23). Jokji tífaʼato nichxin tíʼyale nga tsínkui xá kisindaniná je Jeobá nga ñá koatexomalee yaoná. Ánni nga títsjoáʼndeni Niná nga tojo tjín chjotatsʼen. Kuinga kʼoasʼin tíʼyanile nga toje Niná xi male nda batéxoma. Nichxin xi nroaján je Niná kjoaʼaxin ngatsʼi chjotatsʼen. Tonga nga kʼia, tsa ʼyani xi ijngokʼa kʼoakuitso nga tsín nda batéxoma je Niná, kjitʼanangi tjóxin. Nga̱ jetíʼyale ndʼaibi nga tsín ndasʼin bichótsjoá nga yátsʼi̱n binyále Niná je chjota. Je Niná likui titsjoáʼndeni nga chʼaosʼin ijngokʼa je chjota. wp15 1/11 3:5, 6

Je Jesús nʼio tsjoake koan nga kitsoyason tʼatsʼe Chjotaxále Niná. Kui xi ngisa koanndosinle. Kʼianga tsakʼejna i̱ Sonʼnde, tsʼato 100 kʼa nga kui kinchja̱ni tʼatsʼe Chjotaxále Niná. Kui xi ngisa nʼio kinchja̱ni tikʼoajinni xi kjaʼaí én (Mat. 12:34). Kʼianga jejaʼáyanile je Jesús, tsʼato 500 chjotale tsʼatsenle (1 Cor. 15:6). Tsakui nichxin je xokitsole je chjota jebi nga koaitsoyasonle “ngatsʼi naxinandá”. Tonga likui choa ñʼai tíjna nga sa̱kóyason ngakjijnda naxinandá, nʼio tse xá tjenkao. Je Jesús kʼoakitso nga nʼio tse nichxin machjén nga kʼuínyason ngakjijnda Sonʼnde. Tojo sa̱kóyason saʼnda nga kjoetʼa jmeni xi chon sonʼnde. Kʼianga ʼmiyasoán ndʼaibi, kui tinitjosoán jmeni xi kitso Jesús (Mat. 28:19, 20). Je Niná kʼoati tíbasenkaoná nga tsjoáná “ngayije xi nda” nga kʼuínyasoán. wp15 1/11 5:1-3

Kʼianga én hebreo, je jaʼaínle Niná ño letra tjínle. Jaʼaín jebi nʼio nkjín kʼa faʼaitʼa je xo̱njchá xi kjio xi tsʼe én hebreo. Tobʼelañá, je rollo xi koansjai ya jña mar Muerto ʼmi. Kʼoati faʼaitʼa kʼa copia xi kjio xi tsʼe Septuaginta xi kʼia kisʼenda nga nó 200 nga kjesa faʼaijin Cristo kʼoa kao nó 100 nga jejaʼai Cristo. Nʼio nkjín chjota xi tokʼoamale kʼianga be nga kʼoasikji nkjín kʼa faʼaitʼa jaʼaínle Niná je xo̱njchá xi kjioni saʼnda ngasʼa. Kʼoa ninga machjén nga kjoaʼaítʼa je jaʼaínle Niná ya Biblia, nʼio nkjín Biblia kjio xi tsín tifaʼaitʼani. Kʼianga nó 1952, ijngokʼa kisʼendaya je Biblia American Standard Version kʼoa jelikui tijaʼaitʼani je jaʼaínle Niná. Ánni. Kuinga je chjota xi kisikʼatoya kʼoakitso nga tsín kixi tíjna nga jaʼaínle Niná koa̱nchjén. Nʼio nkjín Biblia xi kʼoati tjíofaʼáxin jaʼaínle Niná nga én inglés kao xi kjaʼaí én. wp15 1/12 2:3-5