Agosto

Je Abrahán nʼio miyole koanni je Jeobá kʼoa ñaki je kisinʼiotʼa ngantsjai, ni tse kʼoa ni choa kjoa jaʼatojin. Koan tsakjákaoni tojmeni xi mele, saʼnda kʼoakitsole jmeni xi tsín koanjinle. Tobʼelañá, kʼianga kʼoakitso je Jeobá nga sikjeson je naxinandá Sodoma kao Gomorra, je Abrahán nʼio koankjáojinle. Ánni. Kuinga kʼoasʼin kisikjaʼaitsjen nga ya kuiyá xi nda tjíosʼín kao xi chʼao tjíosʼín. Tsakui nichxin je tikjaʼmele kisikjaʼaitsjen, je Lot kao familiale xi ya tjío ya Sodoma. Tonga je Abrahán kisinʼiotʼaa je Jeobá “je xi Jues tíjnale jngo tjíjtsa sonʼnde”. Kuinga tsakʼéyanajmísínile Niná jmeni xi koankjáojinle. Jósʼin tsakasenkao je Jeobá. Tsejta koan kʼoa kʼoakitsole je Abrahán nga tjínle kjoamatokon. Kʼoati kitsole nga kʼianga faʼaikao kjoaxkón básjainí je xi nda chjota kʼoa bʼasjentjainí (Gén. 18:22-33). Je kjoankjíntokon kao kjoafaʼaitsjen xi kisʼele je Abrahán kui xi tsakasenkao nga tosi tonda miyole Jeobá koan. w16.02 1:11, 12

Ngatsʼiñá nga nda sasénná je chjota xi ñaki kixi. Kʼoa je xi ngisa sasénná tʼatsʼe Jonatán, ali tsa tokuijin nga kixi kitʼale je David, kuinga kixi kitʼale je Niná. Kʼoa kui xi ngisa koanndosinle je Jonatán, kuinga ñaki kixi kitʼanile je David kʼoa tsín koanxinkonkeni. Ñaki kixi kitʼale xínkjín nga jao kʼoa kʼoati kixi kitʼale Jeobá. Kisitjosonní jmeni xi kitsole xínkjín. Nga chjotale Cristo maa, kʼoati tjínnele kʼoasʼiaan tsanda ñá, kixi kjuintʼalee xíngiaa, je miyoná kʼoa kao je ndsʼee ya jinjtín (1 Tes. 2:10, 11). Tonga xi ngisa kixi kjuintʼalee jé Jeobá, nga̱ jé kisindaná kʼoa jé títsjoáná kjoabijnachon (Apoc. 4:11). Kʼianga kixi mangíntʼalee Niná nda sʼe tokoán kʼoa ʼyañá jme xá tiyoñá. Kʼoati ʼyaa nga kixi kjuintʼalee ngantsjai ninga ñʼai kjoa xi kuitjátojiaan. w16.02 3:3, 4

Tsa sʼa xti, jósʼin koakui nga jetjínli kjoafaʼaitsjen, kʼiaa nga si̱tjosonlai Jeobá ninga ñʼai tjín kjoa kuitjátojin. Alikui koa̱n nga jo miyole Niná sʼiain ya Ndʼia jña chotʼayá kʼoa nga jo miyole sonʼnde sʼiain ya ndʼiaskuela. Tjínnele kixi kʼuíntʼalai Niná kʼianga jme xi sa̱tíobasenli (Efes. 4:14, 15). Sakʼoaa saténgiaa ngatsʼiaa, ni sʼa xtiaa kʼoa ninga jejchíngaa (Ecl. 7:20). Tonga tsa jemeli kʼuínsʼenngindái, tjínnele chjónangilai yaoli tsa ñaki kʼoatjín tokuin nga kʼoasʼiain ngantsjai jmeni xi mele Jeobá. A jekjoatse nga tinitjosonlai Jeobá. Tikjaʼaitsjain jókinʼiai kʼianga kui kisʼejnabasenli jmeni xi tsín ndatjín. A kui xi ndatjín kʼoakinʼiai. Kʼoa tojo koan Daniel, tsakui nichxin tjín xi kʼoatsoli nga koa̱n nʼio ndasʼin kuijnai. Kʼianga kui kjoa bitjatojin, a majinli jméni xi mele Jeobá nga sʼiain (Efes. 5:17). w16.03 1:7-9

Nichxin xi tiyoaa ndʼaibi nichxin fetʼa tsole Biblia. Kʼoa tojeme kjoaʼaí kjoañʼai xi nʼio tse (2 Tim. 3:1). Je Na̱i kʼoa kao ánkje xi je kitjenngile i kinikʼatsaojenngi i̱ Sonʼnde kʼoa tse kjoañʼai tjíosíkjaʼá je chjota (Apoc. 12:9, 12). Xi ijngosani, kui tinitjosoán je xá xi kitso je Jesús nga tjínnele sa̱kóyason jngo tjíjtsa Sonʼnde. Nʼio nkjín chjota jetiʼmiyalee kʼoa nʼio nkjín én jetiʼmiyasoán. Tsa mená nga tosi tonda sichikontʼainná je Niná tjínnele nga kuenta sʼiaan jmeni xi tsoná kʼoa josʼin bándiaaná je naxinandále. Tsa nitjosoán ndʼaibi, kui xi koasenkaoná nga kʼoati si̱tjosoán kʼianga kjoaʼaí kjoañʼai xi nʼio tse, kʼianga tjóxin ngayeje jme xi chonle je Na̱i (Mat. 24:21). Kʼoa kʼianga jeya tiyoaa ya sonʼnde chjotse, kjaʼaí kjoatéxoma tikoa̱nchjénngániná. w16.03 4:16, 18

Ñandia kʼianga jngo sén tsakakóle Jeobá je pastro Juan jñani ñato ánkje tjíosíkjane je xjao. Kʼianga kisikjane je xjaole xi mani aon ánkje, tsabee jngo “niño xi kiskani ngʼajmi, kiskatʼa sonʼnde”. Niño jebi “kitsʼaile je yobi̱ xi tsʼe ndi̱tja̱n jña nga tixʼa̱jinsén. Kiskoʼai je ndi̱tja̱n, kʼoa jitjomi niʼndi̱ ya ʼndebe [...]. Kʼoa je niʼndi̱be jitjojinni chjo̱ba̱ yason sonʼnde”. Kʼoatsakʼinle nga tsínkui sikao “tsojmi xi xkoén kjoan, nijngojin yá, tojé chjota xi tsínkui tjíotʼa ya tjen je seyo xi tsʼe Niná” (Apoc. 9:1-4). Je Juan bení nga ñaki síkje tsojmi je chjo̱ba̱, tojo kisʼin ya Egipto kʼianga nichxinle Moisés (Éx. 10:12-15). Je chjo̱ba̱ xi tsabe Juan jé tínchja̱ni je chjotale Cristo xi ya koai ngʼajmi, xi kʼoasʼin tjíotsoyason nga ni̱kjeson je relijión ndiso. Kʼoati miyón mani je chjota xi i̱ tjínle kjoachoya i̱ Sonʼnde xi tjíobinyakao kʼianga tjíotsoyason kʼoa nga tjíobinyakao chjota nga ndaí tjíobatiole relijión ndiso kao Na̱i. w16.03 3:3

Kʼianga skoe̱ je xi chjotajchínga sʼin tjío jósʼin tíbasenkao Biblia je ndsʼee, tobʼelañá josʼin síkjaʼaitsjen kʼoa jotjín kon koaan kʼoexkiale Marcos 12:29, 30 kʼoa i̱ kuitsole: “Jósʼin tíbasenkaoli nga tsakʼaitʼalai yaoli je Jeobá kʼianga jmeni xi chjoejin”. Kʼiatsa kui skónangile tsakui nichxin jekui kjaonajmíni josʼin nga ñaki kao ni̱ma̱ná nixánilee je Jeobá. Kʼoati koa̱n kʼoetsʼoa kao je kʼoa sijéle je Jeobá nga katatsjoále nganʼiotsjele nga kuitjosonle je xá xi sʼe̱ne. Kʼianga kjuinrʼoé je ndsʼee nga tísʼetsʼoantjai kui xi tsjoánganʼiole nga ngisasa tse sixá ya jinjtín. Je xi chjotajchínga sʼin tíjna koaan kui kjoakaoni jmeni xi bʼéyanajmí je Biblia xi koasenkao nga skoe̱ nga nʼio chjíle nga bʼainganʼiolee xi kjaʼaí, nga nitjosoán xi sʼenená kʼoa nga nangitokon maa (1 Rey. 19:19-21; Neh. 7:2; 13:13; Hech. 18:24-26). Kui xi koasenkao je ndsʼee nga sasa koa̱nnile “jmeni xi naskánatjín” faʼaitʼa Biblia. wp15 1/4 2:3, 4

Kʼiatsa mená nga si̱chriantʼalee je Jeobá, nʼio machjén nga chja̱kaonajmiá. Tonga jósʼin chja̱kaonajmiá. Kʼianí nga kjitʼa kʼoétsʼoalee (Sal. 142:2). Kʼoa jósʼin fákaoná je Jeobá. Kao Biblia. Kʼianga kuinóʼyalee jmeni xi tsoná, tjínnele kjitʼa kʼoéxkiaa je Biblia kʼoa si̱nkjínlee tokoán jmeni xi bʼexkiaa (Is. 30:20, 21). Tsakui nichxin sakʼoa tsín ʼyaa josʼin sítjoson Jeobá jmeni xi kanijélee. Tonga tsa ñaki kʼoakʼuínkixilee jmeni xi mená ngisaa jchaa josʼin kuitjoson. Kʼoa ngisaa nʼio koa̱nmiyosaa. Kʼiatsa ñaki ni̱ma̱ná kʼoakʼuínnilee jmeni xi makjáojinná, sichriantʼaná. Koaan si̱chriantʼasalee je Jeobá. Kuinga machjénsíni nga tosi tonda kuinóʼyalee nga nyaon nyaon chótʼayá je Biblia, kʼoati kuinókjoakoaa kʼianga kʼoétsʼoalee. Kʼiatsa kʼoasʼiaan, ngisaa nʼio koa̱nmiyosa Niná kʼianga nyaon nyaon. Kʼoa nga tsjoánganʼioná, chókjoakaoná jme kjoa xi kuitjátojiaan. wp15 1/4 3:3, 14, 16

Je Na̱i nʼio tsʼen. Kʼoa je Biblia kʼoatso nga ya mangóson jngo xa xi tíbaté xi nʼio baole. Jé jekjinentsja sonʼnde, tonga alikui tokui xi mele. Jé xotísíkao chjota nga kʼoasʼin fitjenngikeni je xi ñaki chjotale Cristo ma, kʼoatísʼín saʼnda nga siglo 1 saʼnda ndʼaibi. Jngo xa xi baole alikui mamake je cho̱ xi kjine, ni kʼianga sʼa tísíkʼien kʼoa ni kʼianga jekakjine. Tikʼoasʼinni, je Na̱i alikui mamake je chjota xi bʼétʼale. Tosi̱kjaʼaitsjenla josʼin tsakʼetʼale je naxinandá Israel. Jé xokisikao Zimrí nga kʼoasʼin kisichajngi kʼoa kao Guehazí nga kui kiskoé tsojmi xi tsín je bʼakaole. Nga kʼoakisʼin tse kjoañʼai kichomani. Kʼoa je Na̱i nʼiojin tsjoa koanle nga je kinjele (Núm. 25:6-8, 14, 15; 2 Rey. 5:20-27). wp15 1/5 1:8, 9

Jósʼin si̱kinjelee je Na̱i. Je Jesús kʼoakitso nga kuitjo̱ntjé kʼiatsa ska̱ná saʼnda nga kjoetʼa (Luc. 21:19). Je chjota alikui koa̱nle nga tondiaa sikʼienná. Kʼianga kixi koanngíntʼalee je Niná, aliʼya xi kʼoechjoaná nga miyole koaan (Rom. 8:38, 39). Kʼoa tsa kixi kjimaa kʼianga kuiyá, tojo tsín je Na̱i sikinjená, nga̱ je Jeobá sikjaʼáyaniná (Juan 5:28, 29). Tonga jmé xi koa̱nle je Na̱i. Kʼianga jeni̱kjeson sonʼnde jebi, je Cristo jngo jmi nó sikʼéjnaʼyanʼio je Na̱i, kʼoa nga kʼia, aliʼya xi tijo sikaoni (Apoc. 20:1-3). Xijekoa̱n, je Na̱i si̱kʼéjnandaíní kʼoa ijngokʼa kʼoanachale chjota. Kʼoa xijekoa̱n kʼiaa ni̱kʼien (Apoc. 20:7-10). Tojosʼin tiʼyaa, je Na̱i alijme kjoachoya tjínle. Tonga ji tjínli kjoachoya. Kuinga tosi tonda tʼenesínilai yaoli nga tixkantʼakoai je Na̱i kʼoa tosi tonda titajai kjoamakjainli (1 Ped. 5:9). Koaan si̱kinjelai je Na̱i. wp15 1/5 2:1, 18

Kʼiatsa chjinee si̱kuindajinlee yaoná jmeni xi nikjaʼaitsjeen. Je kjoafaʼaitsjenná mangóson joni tsa lʼí. Je lʼí ma nda machjén nga̱ ma kui bʼendañá tsojmi. Tonga tsa tsín chónlee je lʼí koaká je niʼyaná kʼoa saʼnda sikʼienná. Kʼoatisʼin mangóson je kjoafaʼaitsjenná. Kʼiatsa kui si̱kjaʼaitsjeen jmeni xi tsoyaná je Jeobá nda kjuinkoaa yaoná. Tonga tsakui si̱kjaʼaitsjeen xi chʼaotjín kʼoa kui cha̱niyaa jkoaa nga tinichajngiaa tochale kui kjoa jtsaojiaan. Kʼoa alikuijin timiyoná koa̱nni je Jeobá (Sant. 1:14, 15). Tonga ya Biblia kʼoatsokixi nga chʼaotjín nga kjoachajngi chaniyaa je jkoaa. Je Jesús kʼoakitso kʼianga jngo chjota xi kjoachajngi kaníya jko̱ kao jngo chjoón xi tsín tsa chjoónle mani jetísíchajngi “jajin ni̱ma̱le” (Mat. 5:28). wp15 1/5 4:11, 12, 14

Je kjoaxkón xi tsakatío je Jesús kʼianga kitsoyason kui tsakakó nga nʼio tsjoake ngatsʼi je chjotasonʼnde. Ñandia nga jngo chjota xi nʼio táo chʼin tjínle tsabe xi tífiʼndojon yaole (Mar. 1:39, 40). Chjota jebi nʼio táo chʼinle nga̱ je Lucas, je xi chjinexki koan, kʼoakitso nga ñaki “tífiʼndojon [“ngakjijngo”, TNM] yaole” (Luc. 5:12). Je chjota jebi, kʼianga tsabe Jesús tsakasénle xkóle kʼoa i kitsole: “Señor, tsa meli koaan si̱tsjenái”. Chjota jebi bení nga koa̱nle Jesús nga sindaya. Tonga alikui be tsa koa̱nmele Jesús nga sindaya. Ninga tsín ʼya xi síchriantʼale je chjota xi tjíofiʼndojon yaole, jókisʼin je Jesús. Koanmake chjota jebi “tsakjén ntsja, [kʼoa] kitsole: Mena katamatsjai. Ndi̱toon jitjoxin chʼinle chjotabe” (Luc. 5:13). Nga kʼoakisʼin je Jesús tsakakó nga nʼio tsjoake je chjotasonʼnde (Luc. 5:17). wp15 1/6 2:3-5

Kʼiatsa ñʼai kjimali nga tibixkantʼakoai xi chʼaotjín mametokuin, tijélai nganʼio jngo ndsʼee xi jetjínle kjoafaʼaitsjen (Heb. 3:12, 13). Je ndsʼee xi jetjínle kjoafaʼaitsjen kui Biblia sichjén nga koasenkaoli nga si̱kʼantjaiyai yaoli. Kʼoa tosi tonda miyole Jeobá koai̱n. Jé xi chjotajchínga sʼin tjío xi ngisa nda koasenkaoná (Sant. 5:13-15). Kʼiatsa jekʼoasʼin ngali nga pornografía chotsenlai, machjén nga kjitʼanangi si̱jái nganʼio. Ánni. Kʼiatsa chóyakaolai, ngisaa ngotjo ska̱jinni kjoachajngi. Kʼiatsa kʼoakoa̱n, nʼio tse kjoaba si̱katíojin je familiali kao miyoli. Xi ijngosani, je chjota chʼaosʼin sikʼaxki̱ je Niná. Nkjín mani xi tjíosíjéle nganʼio xi chjotajchínga sʼin tjío kʼoa tjíosítjoson kjoafaʼaitsjen xi tjíobʼaile. Tosi tonda miyole Niná kjima kʼoa tojo yaa tjíojin ya jtín (Sal. 141:5; Heb. 12:5, 6; Sant. 1:15). wp15 1/6 3:15-17

Kʼianga si̱kjeson je relijión ndiso, alikui kuiyá ngatsʼi je chjota xi ya tjíojin. Tjínkʼa chjotatítjonle xi kʼoakuitso nga tsínkʼia ya tsakatiojin je relijión ndiso (Zac. 13:5, 6). Jméni xi koa̱nle je naxinandále Niná kʼianga jetínikjeson je relijión ndiso. Je Jesús kʼoakitso nga kjuinroajen je nichxin xi totʼatsʼe “je xi kitjojin” (Mat. 24:22). Kʼianga siglo 1, kinroajen je nichxin nga kichonikje Jerusalén, xi tsonile, kisʼejñáʼnyo choatse nichxin. Kʼoa kui xi tsakinyakao nga koan tsakanga je xi kitjoejin, xi tsonile, je chjotale Cristo xi koai ya ngʼajmi. Kʼoati koa̱n nichxin xi tiyoaa ndʼaibi. Je kjoañʼai xi nʼio tse sʼe̱jñáʼnyo choatsele, xi totʼatsʼe je Chjotale Cristo xi koai ya ngʼajmi. Je Jeobá alikui tsjoáʼnde nga ni̱kjeson je naxinandále (Apoc. 17:16). wp15 1/7 2:5, 6

Ñá xi kuixónñá tsa taja kuiyolee kʼoa tsa mai je che̱n xi satíobasenná (Mat. 6:13; Sant. 1:13-15). Si̱kjaʼaitsjenla je Jesús, jméni xi kisʼin kʼianga kiskotʼayakao je Na̱i. Kjitʼanangi tsakʼasjengi kʼoa kʼoakitsole jmeni xi tso je Énle Niná. Je Jesús ñaki kʼoatsakʼé kon nga kixi koaitʼale je Jeobá. Tonga je Na̱i alikui tsakʼéjngo kon. Kjaʼaí nichxin tikiskotʼayakaongáni (Luc. 4:13, TNM). Ninga kʼoalani, je Jesús kisitjosonle ngantsjai je Niná. Nichxin xi tiyoaa ndʼaibi, je Na̱i kʼoati tíkotʼayakaoná kʼoa jmeni xi kitso sʼasa sʼe̱ndajin. Kuinga títsjoáʼndesíni je Jeobá nga tíkotʼayakaoná je Na̱i. Si̱kjaʼaitsjeen nga tsín je Niná xi kotʼayakaoná. Je Niná tosa basenkaoná kʼoa be nga chókjoaná. Kʼoati tsín bʼénená nga si̱tjosonlee. Ñá xi kuixónñá tsa kixi koaan kʼoa tsa mai. Nga tsín ya jtsaoyaa je che̱n xi satíobasenná, miyole Jeobá katamaa kʼoa kʼoétsʼoalee ngantsjai nga katabasenkaoná. wp15 1/6 5:13, 14

Machjén nga si̱kuindaa yaoná nga tsín ʼya xi kjuintʼalee kʼianga jme kjoa sʼe̱ (Rom. 14:19). Kataʼyala jokoan jngo tichjaa xi Mirjeta ʼmi. Tichjaa jebi yaa kitsin ya naxinandá xi Yugoslavia tsakʼin. Yaa koanjchínga ya jñani nʼio jticha je chjota xi Serbia tsʼe. Kʼianga kiskotʼaya Biblia koanjinle nga je Jeobá tongóson sʼin bechjí je chjota tojñani tsʼe kʼoa nga je Na̱i xi kʼoasʼin mele nga jtike katama xínkjín je chjota. Kuinga tsakʼénenile yaole nga kisikʼantjaiya kjoafaʼaitsjenle. Tonga nga kitsʼia jngo kjoajchán ya naxinandále, tichjaa jebi ti ijngokʼa koanjtikengáni je chjota xi Serbia tsʼe. Saʼnda tsín mele nga je kuitsoyasonle. Bení nga tsín ndatjín nga kʼoasʼin síkjaʼaitsjen, kisijéle nganʼio je Jeobá kʼoa tsakʼénele yaole nga kiskenngi je kjoatsjoacha xi tjínle je Jeobá kʼianga kitsoyason kʼoa kui xi tsakasenkao nga tsín tikʼoasʼin kisikjaʼaitsjenni. wp15 1/7 3:11-13

Ñandia kʼianga je rey Jehosafat ya kisijngokao yaole je rey Acab nga kiskan kao chjota sirio. Ño siento mani profeta ndiso xi kʼoakitsole je Acab nga kuinje̱le kjoajchán jebi. Tonga je profeta Micaya xi ñaki kixi kitʼale Niná kʼoakitsole nga sicha kjoajchán jebi. Kʼoa kʼoakoan. Je Acab yaa kʼienjin kjoajchán, kʼoa je Jehosafat tome ya kʼien tsanda je. Xijekoan, je Jeobá jé Jehú kisikasén nga kisikixiyandale je Jehosafat nga kʼoakisʼin, tonga kʼoati i̱ kitsole: “Kʼoati tjín jmeni xi ndatjín kinʼiai” (2 Crón. 18:4, 5, 18-22, 33, 34; 19:1-3). Ninga tjín jñani chʼao kisʼin je Jehosafat, je Jeobá alikui kisichajin jmeni xi ndatjín kisʼin (2 Crón. 17:3-10). Jméni xi bakóyaná choa̱ jebi. Ninga sa̱téngiaa, kʼiatsa ñá xi kʼoénelee yaoná nga tosi tonda si̱xálee je Jeobá, tosi tonda tsjoake koa̱nná kʼoa alikui sichajin jmeni xi ndatjín tinʼia. wp15 1/8 1:8, 9

Jósʼin tjen kuiyondalee ndʼaibi nga kuiyoaa ya ʼNdenaxó. Cha̱niyalai jkui choa̱ jebi. Kʼianga jngo chjota xi xin naxinandá fi, jósʼin bʼejnanda. Bʼénele yaole nga kʼoasʼin bʼejna joni tsa jeya tíjna ya naxinandá jñani koai. Tobʼelañá, kotʼaya je én xi ya nokjoa kʼoa básjaiya josʼin ngale je chjota xi ya tjín. Tsakui nichxin saʼnda ski̱ne je tsojmi xi ya chine. Tikʼoasʼinni tsanda ñá, koaan tjen kuiyondaa ndʼaibi tsa mená nga ya kuiyoaa ya ʼNdenaxó nga kʼoasʼin kjuinkoaa yaoná joni tsa jeya tiyoaa. Kataʼyala kʼaa jmeni xi koa̱n sʼiaan. Tobʼelañá, nʼio nkjín chjota xi kʼoasʼin síkjaʼaitsjen nga tsín tjínnele Niná sitjosonle kʼoa nga koa̱n kʼoasʼin josʼin mele. Jósʼin tíbichómani. Nʼio tse kjoañʼai tjíojin je chjota kʼoa alikui tsjoa tjíole (Jer. 10:23). Tonga ñá ʼyañá nga kao kjoatsjoacha batéxoma je Jeobá. Kuinga nitjosonnilee. wp15 1/8 3:4, 5

Je xi sʼa tjíotoje machjén nga nda skósonnile ʼya xi simiyo. Kʼiatsa mele kuixan, machjénní nga nda katasíkuinda yaole ʼyani xi kʼoétsomakao. Ya Biblia kʼoatso nga toje kuixankoaa xi ngóson sʼin makjainná (1 Cor. 7:39). Kui xi tsonile nga toje kuixankoaa jngo testigole Jeobá xi jekisʼenngindá, xi bexkón je kjoatéxomale Niná kʼoa xi nda fikao yaole. Kʼiatsa je kuixankoaa jngo chjota xi tsjoake Jeobá, koasenkaoná nga kixi kjuintʼalee je Niná. Je Jeobá bení jmeni xi nda sikatíoná. Kʼoa ngantsjainí nga kʼoatsole je choʼndale nga toje katabixankao xi kʼoati je síxále. Tobʼelañá, je Jeobá kʼoakitsole Moisés nga kʼoakatatsole je chjota israelita nga tsín je katabixankao je chjota xi kjaʼaí naxinandále nga̱ niná ndiso bʼétsʼoale. Ánni kʼoakitsosínile. Kuinga skénʼndóbʼakjá je chjota israelita nga kjaʼaí niná kʼoetsʼoale (Deut. 7:3, 4). wp15 1/8 4:12, 13

Kʼiatsa mená nga si̱chjinee kjoafaʼaitsjenná, ali tsa tokuijin xi machjén nga kʼoéxkiaa je Biblia kʼoa tsa to jkoaa kuinyaa jmeni xi tso. Machjénní nga kjitʼa chótʼayá, nga si̱kjaʼaitsjenjiaan jmeni xi bʼexkiaa kʼoa nga si̱jélee je Jeobá nga katabasenkaoná nga kʼoasʼiaan jmeni xi chotʼayá. Kʼianga chotʼayá Biblia, kui xi mená nga ndasa jchaa jokjoan je Jeobá, jmeni xi sasénle kʼoa jmeni xi tsín sasénle. Kʼiatsa nʼio si̱chjinee kjoafaʼaitsjenná, kʼoasʼin si̱kjaʼaitsjeen josʼin síkjaʼaitsjen je Niná. Tobʼelañá, tsakui nichxin sakʼoa likui sasénná jmeni xi sʼín je ndsʼee. Tonga alikui koa̱n nga chʼaosʼin si̱kʼaxkiaa kʼoa nga kʼoakʼuínlee nga katasíkʼantjaiya kjoafaʼaitsjenle. Tsakui nichxin kuisa machjénle je ndsʼee nga sichjine kjoafaʼaitsjenle (1 Cor. 8:11, 12). wp15 1/9 2:4, 8, 10

Je Jeobá nʼio ndasʼin tsakʼénda je Sonʼnde, tjínle ngayeje jmeni xi machjénná nga koa̱n kuiyoaa. Tonga kʼoati naskánakisika, nda biyoná kʼoa nda tiyoaa (Is. 45:18). Kʼianga nikjaʼaitsjeen jokji je sonʼndená, ʼyañá nga nʼio tsjoakená je Jeobá (Job 38:4, 7; Sal. 8:3-5). Ijngosa koya josʼin tsakakó je Jeobá nga tsjoakená kuinga kʼoasʼin kisindaná jokjoan je (Gén. 1:27). Kuinga tsen masíniná nga tsjoakená kʼoa kuinga koa̱n koa̱ntsjoachasíñá. Je Niná bení nga kui xi tsjoa báya tokoán, tojo male je ʼndíxti kʼianga tsjoa satíole nga bakóle kjoatsjoacha je nʼaile. Kʼoa je Jesús kʼoati kitso nga tsjoa sa̱tíoná kʼiatsa chrian tiyolee je Jeobá (Mat. 5:3, TNM). Ya Biblia kʼoatso nga je Niná “tsjoáná ngayije tsojmi, jméni nga sʼe̱síniná kjoatsjoa” (1 Tim. 6:17). Je Jeobá tsjoáná jmeni xi machjénná kʼoa tsjoakená (Sal. 145:16). wp15 1/9 4:6, 7

Je salmista nʼio tsjoake koan je Jeobá kʼoa nga nʼio ñʼai tjín kjoa xi kisʼele kʼoakitso nga je Jeobá koasenkao kʼoa kʼoasjentjai (Sal. 42:5, 6). A kʼoati nʼiai tsanda ji. Tsakui nichxin jenʼiotʼai je Jeobá. Tonga machjénní nga nʼiosa si̱nʼiotʼaa. Je Biblia itso: “Tin’iot’ai Jeobá kao ngayeje ni̱ma̱li, kʼoa ali tokuijin ’mini josʼin machoyali. Jé kuenta tʼiain tojmeni xi sʼiain, kʼoa jé sikixiya je ndiaali” (Prov. 3:5, 6). Jé Jeobá títjon koantsjoakená (1 Juan 4:19). Kʼoasʼin kitsoyaniná nga tsjoacha koaan tsanda je. Kui si̱kjaʼaitsjeen ngantsjai jmeni kjoanda xi títsjoáná kʼoa jokji tsjoakená. Koakolee nga tsjoachaa kao ngayeje ni̱ma̱ná, kjoabijnachonná, kjoafaʼaitsjenná kao nganʼioná (Mar. 12:30). wp15 1/9 5:17-19

Jngo koya xi basenkaoná nga nʼio sʼejna kjoamakjainná kʼianí nga ʼmiyalee chjota jmeni xi tso je Biblia. Kʼianga ʼmiyasoán, jé Jeobá ninʼiotʼaa kʼoa nʼiojin maa tojo kisʼin je chjotale Cristo xi tsakatio nga siglo 1 (Hech. 4:17-20; 13:46). Kʼianga ʼyaa josʼin tsjoáná Jeobá jmeni xi nijélee kʼoa josʼin basenkaoná, je kjoamakjainná ngisaa nʼio sʼejna. Je Josué kao Caleb kʼoakoan. Kʼianga kikotsenché ya ʼnde jñani tsakʼinle nga kʼoaile, tsakakó nga nʼio kisʼele kjoamakjain. Kʼianga jeki nó, je kjoamakjainle sa nʼio sa nʼio kisʼejna nga tsabe nga Niná tsakinyakao. Kʼoa kuijin nga kʼoakitsonile Josué je chjota israelita nga kisitjoson je Jeobá ngayeje jmeni xi tongini kitso. Kitsole: “Je Jeobá tijkónchao, nda tangíntʼalao kʼoa kixi tixálao” (Jos. 23:14; 24:14). Kʼiatsa kʼoati si̱nʼiotʼaa tsanda ñá je Jeobá, jchañá josʼin koasenkaoná kʼoa je kjoamakjainná ngisaa nʼio sʼe̱jna (Sal. 34:8). wp15 1/10 2:10, 11

Jmésani xi koa̱n si̱kjaʼaitsjenjiaan. Kʼiatsa bʼetʼaxoaan jmeni xi faʼa ya kjoajtínná kao kjoajtíntsená, chʼa̱sjeʼaa nichxin nga ijngokʼa chótʼayajiaan. Kʼoa chjónangilee yaoná: “Jméni xi koanchoyana xi tʼatsʼe Biblia kʼoa kao tʼatsʼe naxinandále Niná”. Kʼoati koa̱n si̱kjaʼaitsjeen jmeni xi bʼexkiaa ya Xo̱n xi Bájinkonná kʼoa kao ¡Despertad! kʼoa kao je xo̱n xi bitjo ya kjoajtíntsená. Kʼoa tsakui bʼexkiaa tʼatsʼe jngo ndsʼee xi faʼaitʼa je Anuario, si̱kjaʼaitsjeen jmeni xi koantʼain ánni nga jtsaojinsíni ni̱ma̱ná. Kʼianga bʼexkiaa je xo̱n xi bʼasje naxinandále Niná, koaan kjoándiaangilee jmeni xi tínchja̱ni kʼoa tsa maije̱ kʼoétʼaa én ya ndaile párrafo. Jmeni xi ya kʼoétʼaa koa̱nchjénná tsa jngo kjoanokjoaya kuitjá, tsa jngo ndsʼee si̱xatʼaa kʼoa tsa jngo chjota xi mandosinle Biblia si̱xatʼaa. Kʼianga nikjaʼaitsjenjiaan, nʼio machjén nga chʼa̱sjeʼaa nichxinná ánni nga ska̱jinsíni ni̱ma̱ná kʼoa kʼoailee kjoanda je Jeobá. wp15 1/10 4:9, 10

Je xijchá nʼio tsjoa sʼele kʼianga fisʼenngindá je xtile. Jngo tichjaa xi Berenice ʼmi xi ño ma xtile xi kʼiaa kisʼenngindá nga kjesa teñojin nóle, kʼoatso nga nʼio tsjoa koanle kao je xʼinle nga kʼoasʼin je Jeobá tjíosíxále xtile. Tonga xi koankjáojinle kuinga jekjimajchínga je xtile kʼoa nga ñʼai koa̱nle. Jngo sicólogo kʼoatso nga nʼio ñʼai male je xti nga jekjimajchínga kʼoa nga kʼoati ñʼai male xijchále. Tsakui nichxin kʼoasʼin síkjaʼaitsjen kʼa je xi xijchá ma nga tosʼín tomani je xti kʼoa nga tojo xtiʼndí sʼín ninga jekjimajchínga. Sicólogo jebi kʼoati tso nga nkjín koya jmeni xi sʼín je xti nga jekjimajchínga, nga bʼantjaiya josʼin síkjaʼaitsjen kʼoa nga machjénle nga ya batiokao miyole. Nʼio nkjín koya jmeni xi ndatjín xi koa̱n sʼin je xti xi jekjimajchínga. Tobʼelañá, koaan miyole Jeobá koa̱n, tojo kisʼin Jesús kʼianga sʼa xti. wp15 1/11 2:1, 2

Nga tsjoakená je Jeobá jngo chjotaxá tsakasénnda. Kʼoa je xi kitsjoale xá nga koatexoma jé xi tsjoake je chjotasonʼnde kʼoa xi nda koatexomale (Prov. 8:31). Je xi koatexoma jé Jesucristo. Je Niná, 144, 000 chjota kiskoejin nga koatexomakao Jesús. Kʼianga faʼáyale ya ngʼajmi chjota jebi, jetjínle kjoafaʼaitsjen josʼin tsakatio i̱ Sonʼnde (Apoc. 14:1). Kʼianga tsakʼejna i̱ Sonʼnde, je Jesús nʼio kitsoyason tʼatsʼe Chjotaxále Niná kʼoa kʼoakitsole chjotale nga katasíjé nga katanroa chjotaxá jebi. Je Biblia kʼoatso nga kʼia nó 1914 tsakʼétsʼiakaoni je Chjotaxále Niná nga tsakatéxoma ya ngʼajmi. Saʼnda kʼiaa tísʼexkóni je xi chasa xi 144,000. Kʼoati tísʼexkó je chjota xi kjoaʼatojin tjínkon nga kjoetʼa jme xi chon sonʼnde nga ya koatio ya Sonʼndenaxó. Chjota jebi chjotankjín ʼmile (Apoc. 7:9, 13, 14). wp15 1/11 3:16, 18

Je xi títjon kisinda Jeobá jéní Jesús je xi “én” tsole pastro Juan (Juan 1:1; Apoc. 3:14). Je Jeobá tsakjákao je Jesús kʼoa kʼoakitsole jmeni xi síkjaʼaitsjen kʼoa jotjín kon (Juan 1:14, 17; Col. 1:15). Je Pablo kʼoati tso nga fákao xínkjín je ánkje kʼoa nga tsen tjínle josʼin nchja̱. Alikui mangóson je én xi nokjoaa ñá xi chjotaa kao tsʼe ánkje (1 Cor. 13:1). Je Jeobá nʼio nda be je ánkje ninga miyón mani kʼoa kao chjota xi kisinda. Ninga miyón mani chjota xi tikuini ora tjíobʼétsʼoa, je Jeobá nrʼoéle. Kʼoa ninga kjaʼaí kjaʼaí én tjíonchja̱ nga tjíobʼétsʼoa, je Jeobá nrʼoéle. Kʼoa nga tínrʼoéná kʼoati tíbándiaakaonile je ánkje kʼoa tífákao. Je Jeobá male kʼoasʼín ngayeje jebi nga̱ ngisaa ngʼa tíjna kjoafaʼaitsjenle kʼoa josʼin nchja̱ alikui mangóson kao chjota (Is. 55:8, 9). Kʼianga koa̱njinná josʼin nchja̱ je Jeobá, choa ñʼai tíjna josʼin fákaoná. wp15 1/12 1:1, 2

Nʼio nkjín naxinandá jñani nʼio tochoa chjota xi kjiole je Biblia, nga̱ nʼio chjí kʼoa tsa maije̱ likui nanda tjín kʼoa jngo kjoanda xi nʼio tse bʼainá kʼianga bitjo je Biblia. Tobʼelañá, ya Ruanda, nʼio nkjín chjota xi tse kiskotʼaya, tonga likui koantaja kjoamakjainle nga̱ tsínle Biblia. Je xi ya saténa ya yo̱ngo̱ nʼio chjí kʼoa tsín majinná jotso. Tonga nga tsakʼasje je naxinandále Jeobá jngo Biblia xi kui nroatʼa én xi nokjoa ya naxinandá jebi nʼio tse kjoatsjoa kisʼe. Jngo familia xi ño mani xtile nʼio kitsjoale kjoanda je Jeobá kao choʼndale kʼianga kitjo je Traducción del Nuevo Mundo xi kao énle. Ngasʼa alikui kinjele nga jngó jngó Biblia tsakatse nga̱ nʼio ma̱ tjío, tonga ndʼaibi tjínle Biblia ngatsʼi. Nga tsjoále kjoanda je Jeobá, ñatjen bʼéxkiaa ngatsʼi je Biblia nga nyaon nyaon. wp15 1/12 2:15, 16

Ya Salmo 41 kui bʼéyanajmí tʼatsʼe rey David kʼianga chʼin tsakʼetʼale, kʼoa kʼiaa kiski je én xi kamaxkia ndʼaibi. Tsakui nichxin kui nʼio kisikjáojin tʼatsʼe Absalón nga je koanmele koatexomangajaole. Tonga je David nʼio tímʼe kʼoa likui koan jokisʼin. Je David bení nga kuinga kjoa kisʼenile nga kʼoasʼin tsakajngijée kao Bat-seba (2 Sam. 12:7-14). Je David be nga jekisichatʼale je Jeobá kʼoa kuinga kisijénile nganʼio kʼianga tímʼe. A kui xi koanmele David nga sindaya je Jeobá. Mai. Kui xi koanmele nga koasenkao josʼin basenkao jngo chjota “xi bakóle kjoamatokon je xi ma̱ tjío” (Sal. 41:3). Je David miyo koanle je Jeobá, kuinga kisijénile nganʼio kʼoa kisijénile nga katasíkuinda kʼianga tímʼe. Kʼoati kui kisijéle nga katabasenkao. Kʼoati koa̱n kʼoakʼuínlee je Jeobá jokitso je David (Sal. 103:3). wp15 1/12 4:8, 9

Je chjotale Cristo xi kjoejin Jeobá nga ya koai ngʼajmi alikui machjén nga tjín xi kʼoakuitsole nga je kiskoejin Jeobá nga ya koai ngʼajmi. Jé Jeobá binyakao nga tsín jao sʼele nga ya koai. Je pastro Juan i kitsole xi ya koai ngʼajmi: “Tjínno je Espíritu Santo, xi je xi tsje kitsjoano joni siti̱ xi kinonjon yaono. Ñaki ʼyanío jo tjínni kjoabi”. Kʼoa i kitsosale: “Je Espíritu Santo xi jon kitsʼaino joni siti̱ xi kinonjon yaono, tíjnajinntsjai ni̱ma̱no. Liʼya xi machjénno xi kuitsoyano” (1 Juan 2:20, 27). Ngatsʼiñá nga machjénná nga kuitsoyaná je Jeobá xi tʼatsʼe kjoatéxomale, ninga je xi ya koai ngʼajmi kʼoati ʼmiyale. Tonga je xi tsín timachjénnile nga kʼoakʼuínle kuinga ya koai, nga̱ jebe. Kʼoa nga tsín jao sʼe̱le nga ya koai, je Jeobá kui nganʼiotsjele síchjén. w16.01 3:9, 10

Kʼiatsa je Jeobá tininʼiotʼaa, tokoa̱njngojinni tokoán jmeni xi tjínná. Jósʼin koasenkaoná jebi nga koakolee kjoatsjoacha je ndsʼee. Kʼiatsa tokjimajngoni tokoán jmeni xi tjínná, ngisajin jchachjiá ndsʼee tikʼoajinni je tsojmi xi tjín sonʼnde kʼoa kao je tao̱n (1 Tim. 6:6-8). Alikuijin je ndsʼee si̱kʼaxkiaa kʼoa alikuijin tokʼoakuixónʼndee nga tsín jme xi tjínná. Kʼoajin titsín xíngiaa koa̱nxinkonchaa kʼoa alikuijin kui si̱metokoán nga sa tse sa tse tsojmi katasʼená. Tosajin tjótʼaa tsa jme xi tjínná (1 Tim. 6:17-19). Kʼiatsa je Jeobá tininʼiotʼaa, ndajin sʼe̱ tokoán kʼoa ska̱jinná je kjoa xi kuitjátojiaan (Heb. 13:6). Kʼiatsa nʼiotakoán, kui xi koasenkaoná nga si̱nʼioá kon je ndsʼee (1 Tes. 5:14, 15). Kʼiatsa je Jeobá tininʼiotʼaa, kʼoati tajajin koaan nga kjoaʼaí kjoañʼai xi nʼio tse, nga̱ ʼyañá nga je Jeobá kʼoasjentjainá (Luc. 21:25-28). w16.01 1:16, 17

Nkjín nó nga sa choa sa choa koanni je chjotale Cristo xi tsakjen je nioxtila kʼoa xi tsakʼi je bino. Tonga ndʼaibi, sa nkjín sa nkjín kjima xi kʼoatjíosʼín. Tonga alikui koa̱n si̱kjáojiaan. Ánni. Je Jeobá bení ʼyáni xi ya koai ngʼajmi kʼoa ʼyáni xi mai. Tonga je ndsʼee xi bʼéxki̱ jotjín mani xi kjen nioxtila kʼoa ʼbi je bino nga faʼaitsjenya Kjoabiyale Cristo alikui be. Kʼoa yaa maxki̱kao je xi tsínni ya koai ngʼajmi tonga xi kʼoasʼin makjainle nga ya koai. Tobʼelañá, tjínkʼa xi tsakjen je nioxtila kʼoa tsakʼi je bino tsakai tonga likuini tikʼoakisʼinni nga jekoanni. Kʼoa tjínkʼaje̱ xi kuinga kʼoasʼínni nga tsín nda jko̱. Kuinga tsín ñaki ʼyasíñá josa tjín mani xi ya koai ngʼajmi. Je Biblia alikui kʼoatso jósa tjín mani xi tjío i̱ Sonʼnde kʼianga koaitsʼia je kjoañʼai xi nʼio tse. w16.01 4:12-14