Julio

Jósʼin tsoyanile én jebi. Kui tsoyanile nga nda nikoaa je chjota xi tsín ʼyaxkoaan. Kʼoa kui síkjaʼaitsjenjinná jokisʼin je Abrahán kao Lot. Je chjota xi kiskoeya saʼnda tsín bexkon kʼoa xijekoan kʼiaani kisʼejinle nga ánkjeni (Gén. 18:2-5; 19:1-3). Jósʼin chjoéyaa je xíngiaa. Koaan kʼoakʼuínlee je ndsʼee nga katafikjenkaoná ya niʼyaná kʼoa tsa kʼiaje̱ nga si̱kʼayalee nichxinná xíngiaa. Kʼoa nga kuichosíxatʼaná je superintendente viajante kao chjoónle, koaan kʼoakʼuínlee nga katafikonná niʼyaná ninga tsín nanda ʼyaxkoaan (3 Juan 5-8). Ali tsakuijin xi machjén nga jngo sʼuí kʼoéjnaa kʼoa tsa tse tao̱n si̱kjeyaa. Xi mená kuinga si̱nʼioá kon je ndsʼee, ali tsakuijin nga nda katasíkʼaxki̱ná. Xi ijngosani, alikui toje kuinókjoalee je xi kʼoasikaongajaoniná nga jekoa̱nni (Luc. 10:42; 14:12-14). Ninga tsín maʼaná, kjoásjailee josʼin chjoéyaa xíngiaa. w16.01 1:11, 12

Je Jeobá tsjoále nganʼiotsjele ngatsʼi xi ya koai ngʼajmi kʼoa kuinga tsín jao sʼesínile nga ya koai. Kuinga kʼoakitsosíni je Pablo nga jngoyale kui kisʼejnangi je nganʼiotsje nga ya koai ngʼajmi (2 Cor. 1:21, 22; 5:5). Kʼianga jngo chjotale Cristo kjoejin je Niná, alikui kui xi tsonile nga ñaki jeya koai ngʼajmi. Je xi tsín jao tjínná kuinga títsjoále kjoanda je Niná nga koa̱n ya koai. Je Pedro i kitso: “Tixítíyalao yaono nga koakosontsaon nga Niná kinchja̱no kʼoa tsakjaʼájinno. Tsa kʼoasʼiaon je kjoabi, nitokʼiajin tsao̱ngio. Kʼoasʼin kjaínga tonda kʼoaiʼndeno kʼia nga kuitjásʼenjion kao kjoajeya je kjoatéxomantsjaile Jesucristo xi Nainá kʼoa xi tsakʼasjentjainá” (2 Ped. 1:10, 11). Machjénní nga kixi koa̱n nga jngó jngó je xi ya koai ngʼajmi. Tokʼianí nga ya koai kʼiatsa tsín yátsʼi̱n kuinyale je Jeobá (Heb. 3:1; Apoc. 2:10). w16.01 3:6, 7

Chʼaotjín nga jngo chjota chʼa̱sjengʼaa, kʼoa tsa síxkón si̱koaa, ninga je chjotale Cristo xi ya koai ngʼajmi. Ya Biblia kʼoatso nga chjénngilee kjoamakjainle je xi chjotajchínga sʼin tjío, tonga alikui kʼoatso nga chjota chʼa̱sjengʼaa kʼoa kjuintjenngilee (Heb. 13:7). Je Biblia kʼoatso nga tjínkʼa ndsʼee xi “bakinle nga kanni kʼa kataʼyaxkón”, tonga kuinga nʼio síxá nga tsoyason kʼoa nga bakóya, ali tsakuijin nga ya ngʼajmi koai (1 Tim. 5:17). Kʼiatsa síxkón si̱koaa jngo chjotale Cristo xi ya ngʼajmi koai tochale chan koa̱nsoale. Kʼoa nʼio chʼao sʼiaan tsa tokui nga síxkón nikoaa nga koa̱nngʼakonni kʼoa tsa ngisa ñʼai koa̱nle nga nangitokon koa̱n (Rom. 12:3). Alikui koa̱n kui kʼoasʼiaan jmeni xi jée ska̱nijin chjotale Cristo xi ya koai ngʼajmi (Luc. 17:2). w16.01 4:9

Jngo miyo nʼio chjíle. Alikui kʼoasʼin mangóson joni tsa jngo tiixolo xi nʼio chjíle xi tokui xá tíjnani nga katatsjoále sén je niʼya. Je xi miyo ʼmile yaa mangóson joni tsa jngo naxó xi machjénle nga koa̱nkuinda. Je Abrahán tsabee nga nʼio chjíle je kjoamiyo xi kisʼele kao Jeobá. Kuinga kisikuindasíni. Jméni xi kisʼin. Je Abrahán kisitjosonle ngantsjai je Niná kʼoa tsabexkónní. Tobʼelañá, kʼianga tjen kao familiale kʼoa kao choʼndale nga tjíofi ya jña kitsole Niná, kisitjoson ngantsjai josʼin tsakándiaale Niná. Kuenta kisʼin ni tse kʼoa ni choa kjoa xi jaʼatojin. Jngo nó tongini nga kjesa tsinjin je Isaac, je Jeobá kʼoakitsole Abrahán nga katatindai yaole ngatsʼi je chjotaxʼin xi ya tjío niʼyale. Kʼianga kui nichxin 99 nóle je Abrahán. Jókisʼin. A kisitjosonle je Jeobá. Axo tojme xi tsakasenngini yaole nga tsín kisitjoson. Majain. Kisinʼiotʼaa je Niná kʼoa tikuini nichxin kisitjoson jme xi tsakʼinle (Gén. 17:10-14, 23). w16.02 1:9, 10

Ninga xtiʼndí koaanle skoe̱ jmeni xi ndatjín kʼoa jmeni xi chʼaotjín, kʼoa koa̱njinle jmeni xi tsoyanile nga bʼaitʼalee yaoná je Jeobá. Kuinga ndatjínsíni nga koaisʼenngindá je xi sʼa xti tsa bakó nga jetjínle kjoafaʼaitsjen kʼoa tsa jekitsjoatʼale yaole je Jeobá (Prov. 20:7). Jngo chjota xi jetjínle kjoafaʼaitsjen ali tsakuijin tsa jetjínle nó kʼoa tsa jejchínga. Je Biblia kʼoatso nga nʼio katamangakaoná kjoafaʼaitsjenná ánni nga jchasíñá jmeni xi ndatjín kʼoa jmeni xi chʼaotjín (Heb. 5:14). Kui xi tsonile nga ñaki ni̱ma̱le nroajinni nga kʼoasʼín xi ndatjín. Jngo chjota xi jetjínle kjoafaʼaitsjen kjántʼakao jme xi sʼejnabasenle kʼoa aliʼya xi kʼoatsole nga kui xi ndatjín kʼoakatasʼín. Kʼianga jekʼuínsʼenngindái, choyale nga kui kʼoasʼiain xi ndatjín ninga tsín tjíobeli xijcháli kʼoa tsa kjaʼaí chjota (Filip. 2:12). w16.03 1:4, 5

Je Jonatán tokʼoakoanle xi tʼatsʼe David kʼianga kʼoasʼin kisikʼien je Goliat kʼoa nga nʼiojin koan kʼoa nga kikaole je jko̱ Goliat je nʼaile Jonatán xi rey sʼin tíjna ya Israel (1 Sam. 17:57). Je Jonatán ñaki kʼoatsakʼé kon nga je Jeobá tíbasenkao je David. Saʼnda nga kui nichxin, je Jonatán kao David nʼio miyo koanle xínkjín. Kʼoakitsole xínkjín nga ñaki kixi koaitʼale xínkjín ngantsjai (1 Sam. 18:1-3). Je Jonatán nʼio miyole koanni je David kʼoa kixi kitʼale, ninga je David xi rey sʼin kʼoéjna nga jekoa̱nni. Kʼianga tsakásjai Saúl je David nga mele sikʼien, je Jonatán nʼio koankjáojinle xi tʼatsʼe David. Tjínjinle nga ya kikʼejna je David ya ʼndekixí xi tíjna ya Hores, kʼoa je Jonatán kinrʼoe nga kitsjoánganʼiole nga tosi tonda je Jeobá katasínʼiotʼa. Kʼoakitsole tojo tso je testo xi kamaxkia ndʼaibi (1 Sam. 23:16). w16.02 3:1, 2

Jeobá kao Jesús ñatjen tjíosíxá saʼnda nga sʼa koannda sonʼnde kao ngʼajmi. Kʼoa je choʼndale Niná kʼoatisʼin síxájtín ngatsʼi nga kʼoasʼín jme xi tsole Niná. Tobʼelañá, je Noé kao familiale ñatjen kisixá kʼianga tsakʼénda je arca. Nga koanskanni, je chjota israelita kisixájtín nga kisinda tabernákulo, nga tsakʼasjekjao kʼoa nga kikao jokji tse tsakʼetsoma ya ʼndekixí. Kʼoa kʼianga jetíjna yo̱ngo̱, je chjota israelita kisejtínle kʼoa kisikjanejtínle Jeobá nga tsakʼasjengʼa. Kuinga koan kʼoasʼin kisixájtínni je choʼndale Niná nga̱ kitsjoanganʼiole xínkjín (Gén. 6:14-16, 22; Núm. 4:4-32; 1 Crón. 25:1-8). Je chjotale Cristo xi títjon tsakatio kʼoati kisixájtín ngantsjai. Je pastro Pablo kʼoakitso nga kjaʼaí kjaʼaí xá kjinele je chjotale Cristo tonga nga síxájtín ngatsʼi nga̱ je Cristo fitjenngile (1 Cor. 12:4-6, 12). w16.03 3:1, 2

Je xá xi kitsole Jesús nga sʼin je choʼndale kuinga kuitsoyason. Kʼoa nga kʼia, je xá jebi sʼaa chjotse. Nga̱ nichxin kjoatse, kʼianga jngo chjota xi xin naxinandále xi koanmele nga Niná kisixále tjínnele ya kikonle je naxinandá Israel (1 Rey. 8:41-43). Tonga je Jesús kʼoakitsole je chjotale nga je koaikásjai je chjota, tojo tso je testo xi kamaxkia ndʼaibi. Kʼianga nó 33 nga kisʼejna je sʼuí Pentecostés, je Jeobá tsakakó nga kui xi mele nga katatsoyason choʼndale ngakjijnda Sonʼnde. Nga kui nichxin jngo siento kao kanla mani je chjota xi tsakʼaile nganʼiotsjele Niná kʼoa kjaʼaí kjaʼaí én kinchja̱ nga kitsoyale chjota judío kao chjota xi xin naxinandále xi kui relijiónle chjota judío tjíojin (Hech. 2:4-11). Xijekoan, kʼiaa tsakʼinyasonle je chjota samaritano. Kʼoa kʼianga nó 36 kʼiaa tsakʼinyale je chjota xi tsín judío. Je chjotale Cristo kitsoyasonle toʼya chjotani. w16.03 4:12

Je choʼndale Jeobá bení nga nʼio chjíle nga tongini nikatíondaná. Tobʼelañá, je Abrahán kʼianga kikján kao chjotakontrale nga kikʼasjentjai je Lot jé kikao je chjota xi tokʼoa jekinikatíonda (Gén. 14:14-16). Kʼianga nichxinle David tsakatio chjota xi tokʼoa jekinikatíonda kʼianga kisele je Jeobá (1 Crón. 25:7). Ánni nga nʼio mandosinsíniná xi tʼatsʼe jebi. Xi títjon, kuinga je tibixkantʼakoaa je Na̱i kao jmeni xi chonle i̱ Sonʼnde (Efes. 6:11-13). Xi majaoni, kuinga tibʼenelee yaoná nga nda chʼa̱sjee je Jeobá nga nokjoakaoñá chjota xi tʼatsʼe (Heb. 13:15, 16). Tojo kisʼin je choʼndale Niná nichxin kjoatse kʼoati machjén nga kuiyondaa. Ya jinjtín, jé xi chjotajchínga sʼin tjío títsjoále xá Jeobá kʼianga koasenkao je ndsʼee nga tsesa xá katabʼaile. Je xi chjotajchínga sʼin tjío títjon kjoanla testole Biblia bʼéxkiale je ndsʼee xi koasenkao. Kui kʼoasʼínni nga kui xi koasenkao nga sitjoson jme xi kʼuínyale (1 Tim. 4:6). wp15 1/4 2:1, 2

Jebi ali tsakuijin xi tsonile nga ñaki jesoa Na̱i síkʼien ngatsʼi je chjota. Tonga ánni nga kʼoatsosíni Biblia nga male josʼin síkʼien. Xi títjon, kuinga je xosʼín nga jtike katama xínkjín chjota kʼoa tsʼen katama. Xi majaoni, kuinga totʼatsʼe nga tsakajngijée je Adán kao Eva kʼoa nga kʼoasʼin kiskatʼaniná jée kao kjoabiya (Rom. 5:12). Kʼoa kuinga kʼoakitsosíni Jesús nga male síkʼien kʼien je Na̱i (Juan 8:44). Tojosʼin tiʼyaa, je Na̱i tse nganʼio tjínle. Kʼianga kontra biyolee je Na̱i kʼoati kontra biyolee je ankje xi je fijtakao. Ánkje tsʼen jebi kʼoati yátsʼi̱n tsakinyále Niná (Apoc. 12:3, 4). Ya Biblia faʼaitʼa choa̱ xi bakó nga ngisa tse nganʼio tjínle tikʼoajinni ñá kʼoa male nga kjoañʼai síkjaʼáná (Mat. 8:28-32; Mar. 5:1-5). Alikui koa̱n si̱chajiaan nga tjínle nganʼio je Na̱i kao ánkje xi ya fijtakao (Mat. 9:34). Tokao nganʼiole Jeobá nga koa̱n si̱kinjelee. wp15 1/5 1:6, 7

Kʼiatsa kjoachajngi kjimametokuin, jmé xi koa̱n sʼiain. Ali tokjoaskájin mali (Rom. 7:22, 23). Tʼetsʼoalai Jeobá kʼoa tijélai nganʼio (Filip. 4:6, 7, 13, TNM). Tisenxinlai jmeni xi kui ska̱nijinli (Prov. 22:3). Kʼoa kʼianga jetíjnabasenli nga koa̱n kʼoasʼiain, tokjoan chʼa̱sjengi (Gén. 39:12). Jmé xi kisʼin Jesús kʼianga mele kʼoanachale je Na̱i. Alikui kitsjoaʼnde nga tsakʼanachale je Na̱i kʼianga tjín xi kitsjoatʼale. Tosa kjitʼanangi kui kʼoakitso jme xi tso je Énle Niná, kitsole: “Tjítʼa” (Mat. 4:4-10). Je Jesús nʼio nda be jotso Énle Niná. Kuinga kjitʼanangi jaʼaitsjensínile jotso kʼianga koanmele Na̱i nga kʼoanachale. Tsa mená nga si̱kinjelee je Na̱i, tjínnele kʼoénelee yaoná nga tsín kjoachajngi sʼiaan. wp15 1/5 2:15, 16

Je Jeobá nʼio chjine kʼoa be jmeni xi koa̱n nichxin xi nroaján. Ñá alikui ʼyaa jmeni xi koa̱n nichxin xi nroaján, tonga kʼoati koa̱n chjine koaan joni tsa Jeobá. Jósʼiaan. Kʼiatsa tjín xi mená sʼiaan, nga kjesa kʼoanʼiajian títjon kjoanla cha̱niyaa jkoaa josʼin kʼoetʼaná kʼoa josʼin kʼoetʼale xi ngikʼa. Nga katamachoyaná josʼin nga chjine koaan, jngola choa̱ si̱kʼéjnaa. Kʼiatsa jetjínli xi chjakoai, tsakui nichxin ñʼai koa̱nno nga si̱kuindao yaono nga tsín kjoachajngi jtsaojion. Jósʼiain nga chjine koai̱n. Kuinga kʼoéchjoalai yaoli nga tsínkui kʼoasʼiain xi tsín ndatjín. Alijmejin xi nʼiai xi chʼaosʼin sikʼéjnali ngixko̱n Jeobá. Je Niná kui xi mele nga chjine katamai. Kʼiatsa tsín si̱kuindai yaoli tochale kjoa ska̱jin (Prov. 22:3). wp15 1/5 4:10, 11

Je rey David “jngo chjoón tsabe xi tíbangoya” (2 Sam. 11:2). Chjoón jebi jetjínle xʼin. Kʼoa David ʼndele nga xin skótsen, tosi tonda kiskotsenle kʼoa tosi tonda kui kisikjaʼaitsjen. Xijekoanni, kisichajngikao chjoón jebi. Kʼiatsa mená nga tsín kjoachajngi si̱kjaʼaitsjeen, kjuintjenngiaa je choa̱le Job. I kitso: “Jngo kjoa tjínndajinna kao xkoan” (Job 31:1, 7, 9). Machjénní nga kʼoati jngo kjoa kʼoéndajiaan kao xkoaan. Nga̱ kui xi koasenkaoná nga tsínkui si̱mekoaan xi chʼaotjín. Tonga jósʼiaan, kuinga tsín ʼya xi chótsenlee nga kjoachajngi cha̱niyaa jkoaa kao je. Kʼoa tsa jngo sén xi tsʼe kjoachajngi jchaa ya telebisión kjitʼanangi xin chótseen, kʼoati sʼiaan tsa jngo cartel faʼaitʼa, tsa jngo rebista faʼaitʼa kʼoa tsa jñasani. Kʼiatsa si̱tjosonlee je Jeobá, alikui kjoachajngi jtsaojiaan kʼoa tsje sʼin kuiyoaa (Sant. 1:21-25). wp15 1/6 3:12-14

Nga tsakʼéjna Jesús je padrenuestro i kitso: “Ali chanitʼajinnajin xi chʼao síkaonajin”. Én jebi kui síkjaʼaitsjenná jmeni xi koantʼain je Jesús kʼianga jekisʼenngindá. Je Jeobá kitsjoaʼnde nga “je na̱i koanmele nga chʼao sikao” je Jesús (Mat. 4:1). Ánni nga kitsjoaʼndesíni je Jeobá nga kichotʼayakao Jesús. Kuinga jchale jmeni xi kitso je Na̱i kʼianga tsakʼasjengi je Adán kao Eva josʼin tíbatéxoma je Jeobá. A tsín nda kisinda Jeobá je chjota. A koaan kixi koaitʼale Niná jngo chjota xi tsje kʼiatsa chótʼayakao. A ngisaa nda koatio je chjota kʼiatsa toje koatexomale yaole tojo kitso je Na̱i (Gén. 3:4, 5). Tonga je Jesús kixi koan kʼoa tsakakó nga to énndiso jmeni xi kitso je Na̱i. Jmeni xi kitso je Na̱i kʼiaa ñaki jchale nichxin xi nroaján. Xijekoa̱n, ngatsʼi xi ya koatio ya ngʼajmi kao i̱ Sonʼnde skoe̱ní nga toje Jeobá xi nʼio nda batéxoma. wp15 1/6 5:12

Je kjoañʼai xi nʼio tse kʼiaa koaitsʼiani nga si̱kjeson ngatsʼi je relijión ndiso. Je Biblia “Babilonia xi nʼio je, xi na̱le chjotachajngi” tsole (Apoc. 17:5-7). Ánni nga kʼoaʼmisínile. Kuinga tsín kixi tjíofitʼale Niná je chjota xi nyatítjonle. ʼNdele nga je Jesús kao Chjotaxále Niná tsjoánganʼiole tosa to chjotaxá sonʼnde tsjoánganʼiole. Kʼoati tjíobʼasjengi jmeni xi tso je Biblia tojoni nga sʼe̱le nganʼio xi tsʼe chjota polítiko. Alikui tsje tíjna josʼin tjíobexkón Niná, alikui kʼoatjíosʼín jotjíosʼín je chjotale Cristo xi ya koai ngʼajmi (2 Cor. 11:2; Sant. 1:27; Apoc. 14:4). Tonga ʼyáni xi sikjeson ngatsʼi je relijión ndiso. Jé xosʼin “je nra̱ xi te mani” xi tsʼe je cho̱ xi ní kji. Cho̱ jebi jé tsoyanile Naciones Unidas, kʼoa je nra̱le jé tsoyanile ngatsʼi je chjotaxá xi tsjoánganʼiole jtín jebi. Jé Jeobá xosʼin nga je Naciones Unidas sikjeson ngatsʼi je relijión ndiso (Apoc. 17:3, 16-18). wp15 1/7 2:3, 4

Kʼianga kui kjoa tjín ya jinjtín, je Pablo i kitsole ndsʼe̱: “Bʼetsʼoano ndsʼe [...], nga ngatsʼio tongóson sʼin kuixón, kʼoa nga tsín tsa jme kjoasi sʼe̱jinno nga jon. Tosa ñaki tojngo tiyo nga tojngo kjoafaʼaitsjen, kʼoa nga tongóson sʼin chósonlao” (1 Cor. 1:10, 11, 13). Ndʼaibi kʼoati tsín koa̱n nga xkoa̱ya sʼin kuiyoaa ya jinjtín (Rom. 16:17, 18). Je Pablo kʼoakitsole je chjotale Cristo nga tsín koa̱n kui koaitʼale “kjoale sonʼnde” nga̱ yaa ngʼajmi bʼakaole (Filip. 3:17-20). Je xi ya koai ngʼajmi jé tjíoyangajaole je Niná kao Cristo. Je chjota xi jngo chjotaxá tíjnayangajaole ya jña xin naxinandá alikui ya tsjonjin yaole je kjoa xi tjín ya naxinandá kao kjoa polítika xi ya tjín. Tikʼoasʼinni je chjotale Cristo xi ya koai ngʼajmi, alikui ya tsjonjin yaole kjoa polítika (2 Cor. 5:20). Kʼoa xi koatio i̱ Sonʼnde kʼoati tsínkui kjoa tsjonjin yaole. Tojé Chjotaxále Niná tsjoánganʼiole. wp15 1/7 3:9, 10

Kʼianga nikjaʼaitsjenjiaan jme xi tso bersíkulo jebi ʼyañá nga nʼio tsjoakená je Jeobá kʼoa nga mandosinle xi tʼatsaan ninga saténgiaa (1 Ped. 5:6, 7). Nʼio tjínnele jchachjiá je Biblia. Ánni. Kuinga kui síchjén Jeobá kʼianga fákaonajmíná. Kʼianga jngo nʼai kao jngo ʼndí nda fákaonajmí xínkjín, ngisaa nʼio sʼesale kjoatsjoacha kʼoa nʼiosa manʼiotʼa xínkjín. Tikʼoasʼinni, je Jeobá Nʼainá mani kʼoa nʼio tsjoakená. Ninga tsín ʼyañá xkoaan kʼoa ninga tsín noʼya sontsenlee, je Jeobá kao Biblia fákaoniná. Kuinga koasenñosíñá jmeni xi tsoná kʼianga bʼexkiaa je Biblia (Is. 30:20, 21). Tsa kʼoasʼiaan, jchañá nga mele Jeobá koandiaaná kʼoa sikuindaná. Ngisaa ndasa jchaa kʼoa ngisasa koa̱nnʼiotʼaa (Sal. 19:7-11; Prov. 1:33). wp15 1/8 1:6, 7

Xi nʼio tsjoa koaya tokoán ya Sonʼndenaxó kuiní nga skoe̱xkón jaʼaínle Niná ngatsʼi je chjota kʼoa nga toje sitjosonle (Mat. 6:9, 10). Kʼoa xi ijngosani kuinga ñaki to chjotatsje sʼe̱ i̱ Sonʼnde jokjoansʼin koanmele tsakai Niná saʼnda ngasʼa. Tobijbi chjotatsje koaan kʼoa sa koa̱nmiyo sa koa̱nmiyoñá je Niná (Sal. 73:28). Alikui jao tjínná kʼianga sitjoson je Jeobá jmeni xi títso. Nga̱ ya Biblia kʼoatso nga “Niná koaanle ngayije kjoa” (Mat. 19:25, 26). Je Pablo kʼoakitso nga kʼoénelee yaoná jokji tjen kuicho nganʼioná nga tjoéná kjoabijnachon xi tsínkʼia fetʼa (1 Tim. 6:19). Kuinga machjénsíni nga koakoá nga ñaki makjainná nga toxijña kjoaʼaí je kjoafetʼa. Kʼiatsa mená nga ya kuiyoaa ya ʼndenaxó, machjénní nga kuiyondaa ndʼaibi ánni nga koa̱n ya kuiyosíñá. wp15 1/8 3:2, 3

Nʼio nkjín pelíkula, programa xi tsʼe telebisión, canción kʼoa xi faʼaitʼa Internet xi tsín kixi tjío. Tsa tsín si̱kuindalee yaoná koa̱nkjinlee Niná. Kʼoa tochale kui kjuintjenngiaa jmeni xi chon sonʼnde ʼndele nga je Jeobá si̱nʼiotʼaa. Alikui koa̱n kui chótsenlee, kui kʼoéxkiaa kʼoa tsakui kuinóʼyalee xi kui simekonná xi chʼaotjín (Tito 2:12). Jmeni xi chon sonʼnde kʼoa jmeni xi bakóya je naxinandále Niná alikui mangóson, nga̱ je naxinandále Niná kui bakóyaná jmeni xi sʼiaan nga kuiyoaa ngantsjai nichxin. Kʼoa bʼasjee je xo̱n, video kao pájina xi tsʼe Internet xi kui faʼaitʼa. Xi ijngosani, bakóyaná kʼianga mangián kjoajtínná. Kʼoa tsʼato 110,000 mani jtín xi tjío jngo tjíjtsa Sonʼnde. Jmeni xi ʼmiyaná ya kjoajtínná kao ya kjoajtíntsená kui xi basenkaoná nga nʼiosa ninʼiotʼaa je Jeobá (Heb. 10:24, 25). wp15 1/8 4:9, 11

Xi chjotale Cristo maa mená nga si̱chjinee kjoafaʼaitsjenná ánni nga jchasíñá jmeni xi ndatjín kʼoa jmeni xi chʼaotjín. Kʼianga si̱chjinee, machjénní nga kʼoéxkiaa je Biblia kʼoa nga jchaa jmeni xi tso. Tonga ali tsa tokuijin xi machjén. Kʼoati machjén nga tsjoacha koaan kjoatéxomale Niná kʼoa nga ñaki katamakjainná nga kjoanda tsaanñá jmeni xi tso. Kuinga i̱ kitsosíni je pastro Pablo: “Kui xi mele kjoatéxomale Niná nga tsjoachaa kao ni̱ma̱ná xi tsje, kao kjoafaʼaitsjenndaná, kao nga ñaki kjoakixi makjainná” (1 Tim. 1:5). Kʼiatsa nda si̱chjinee je kjoafaʼaitsjenná kʼoa si̱tjosonlee, kʼoati koasenkaoná nga jtín sʼin kuiyoaa kao je ndsʼee ya jinjtín. Ngisaa nʼio koa̱ntsjoachasaa je Jeobá kʼoa ngisaa sʼe̱saná kjoamakjain xi tʼatsʼe. Kʼoati koakoá nga nʼio miyoná mani kʼoa nga mená nga tsjoa kjoáyaa ni̱ma̱le. Kʼoasʼin koakoñá jokjoan kjoaixiaa. wp15 1/9 2:2, 3

Jé Jeobá kisindaná kʼoa jé kitsjoaná kjoabijnachon (Sal. 100:3-5). Kʼoa kuinga “ʼndíle Niná” tsosínile je Adán ya Biblia (Luc. 3:38). Kʼoa kʼianga kitsoya Jesús josʼin kʼoétsʼoaa kʼoakitso nga Nʼainá mani je Jeobá (Mat. 6:9). Je Jeobá nʼio tsjoakená, yaa mangóson jngo nʼai xi nʼio tsjoake ʼndíxtile. Ninga kʼoalani, jngo nʼai sonʼnde alikui kʼoakji kjoatsjoacha koako jokji kjoatsjoacha bakóná je Jeobá. Saʼnda tjínkʼa chjota xi faʼaitsjenle nga totaon tsaʼya kʼianga sʼa ʼndí kjoan. Kʼoa tsakui nichxin kuinga tsín makjainnile tsa tíjna jngo nʼai xi tsjoakená. Tonga je Jeobá nikʼiajinla kjoañʼai sikjaʼáná nga̱ jngoní Nʼai xi nʼio nda chjota (Sal. 27:10). Nʼio tsjoakená kʼoa nkjín koya josʼin síkuindaná. Kʼianga jchaa nga nʼio tsjoakená je Jeobá kʼoati nʼio koa̱ntsjoachaa tsanda ñá (Sant. 4:8). wp15 1/9 4:3, 4

Nga nʼiotʼaa kʼoa nga tsjoachaa je Jeobá, jé kʼoaʼmilee ngantsjai nga katabasenkaoná. Kʼoa nga kjesa jme xi nʼiajián, fasjaiyañá josʼin síkjaʼaitsjen. Kʼianga tsakʼejna je Samuel, je chjota israelita tjíosícha kjoajchán xi tjíobʼéjna kao chjota filisteo. Tonga ʼndele nga Jeobá sinʼiotʼa kʼoa nga je skónangile jmeni xi sʼin, tosa kui kikao ya jinkjoajchán je kaxa̱ jña kixinya je kjoa xi kisʼendajin. Kʼoasʼin kisikjaʼaitsjen nga kʼoasʼin kuinyakao je Jeobá nga kuinje̱le. Kʼoa likui tsakásjaiya josʼin síkjaʼaitsjen je Jeobá. Tokui kʼoakisʼin jmeni xi mele. Jósʼin kichomani. Kante jmi chjota israelita kʼien. Kʼoa je chjota filisteo saʼnda jé kiskoé je kaxa̱ jña kixinya je kjoa xi kisʼendajin (1 Sam. 4:2-4, 10, 11; Prov. 14:12). wp15 1/9 5:16, 17

Kʼianga tosi tonda nʼio katasʼejna kjoamakjainná, alikui tokatamajngoni tokoán jmeni xi koanjinná nga kjesa chanisʼenngindájián yaoná (Heb. 6:1, 2). Tobʼelañá, koaan chótʼayá josʼin tíbitjoson je én xi tongini kinokjoa. Xi ijngosani, kʼianga tichotʼayá Biblia koaan si̱nkjínlee tokoán tsa tibakoá nga nʼio tíjna kjoamakjainná (Sant. 1:25; 2:17, 24). Je pastro Pablo kʼoakitso nga koa̱n kʼoainganʼiongañálee xíngiaa nga nʼio sʼe̱jna kjoamakjainná (Rom. 1:12). Kuinga kʼoakitsosíni nga ngisa nʼio sʼejna kjoamakjainná kʼianga nimiyoaa je ndsʼee xi tjío ya jinjtín, kʼoa ngisaa je ndsʼee xi kixi fitʼale Niná nga kjoa faʼatojin (Sant. 1:3). Kʼianga je nimiyoaa je chjota xi chʼao sʼín síkjinroajeen kjoamakjainná (1 Cor. 15:33). Kuinga kʼoatsosíniná je Biblia nga tsín koa̱n si̱chaa je kjoajtínná, nga̱ yaní nga bʼainganʼiongañálee xíngiaa (Heb. 10:24, 25). wp15 1/10 2:2, 8, 9

Koaan si̱kjaʼaitsjeen kʼianga chotʼayá jme xi kʼuínyalee je chjota nga kʼoee estudio. Koaan si̱kjaʼaitsjeen jmeni xi chjónangilee kʼoa tsa jngo choa̱ kʼoéjnalee je xi koasenkao ánni nga miyole Niná katamasíni. Kʼiatsa kʼoasʼiaan, koasenkaoná nga nʼio sʼe̱jna kjoamakjainná kʼoa nga ñaki kao kjoatsjoa kʼuínyaa. Kʼoati machjén nga si̱kjaʼaitsjenjiaan nga kjesa mangínkʼinyasonjián (Esd. 7:10). Koaan tsa jngo kapítulo kʼoéxkiaa je libro xi tsʼe Hechos kʼoa tsa maije̱ koaan si̱kjaʼaitsjenjiaan je bersíkulo xi kʼoéxkiaa kʼoa tsakuije̱ je xo̱n xi koájnaa. Jebi koasenkaoná nga ñaki kao kjoatsjoa kʼuínyaa (2 Tim. 1:6). Kʼoati ndatjín nga nikjaʼaitsjeen jmeni xi machjénle je chjota ya ʼndená kʼoa jmeni xi koa̱n kʼuínlee nga katamandosinle Énle Niná. Kʼoa kʼoasʼin nga ngisa nda koa̱nná si̱chjén je Biblia kʼianga ʼmiyasoán (1 Cor. 2:4). wp15 1/10 4:9

Je xi xijchá ma koaan skónangile yaole jebi: “A majinle xtiʼndína ánni nga xkón tíjnasíni nga pornografía skótsenle. Jméni xosikao nga kui koa̱nmenile skótsenle. A bʼéyanajmína ngayeje jmeni xi sʼín. Kʼiatsa pornografía koa̱nmele skótsenle, a kʼoakuitsona”. Ninga sʼa nʼio ʼndí kjoan je xtiʼndíli, koaan i̱ kʼuínlai: “Tsakui sén jchai ya Internet xi tjíosíchajngi kʼoa tsa koa̱nmeli chótsenlai, kʼoatʼinnái. Ali nokjonjin, ali masoajinli kʼoa ali nikjáojin, an koasenkaole”. Kʼianga chjoéjion jon xi xijchá mao josʼin kʼoétsaojion, kui tikjaʼaitsjaon jmé choa̱ xi tibʼejnalao je xtiʼndíno. Je Pranas kʼoatso nga je xijchá koaan nʼio tse jmeni xi kuitsole je xtiʼndíle, tonga je xti kui kotsenle jme xi kotsenle xijchále kʼoa je kjenngile. Tsakui chjoéjin canción, pelíkula kao libro xi tsín kjoajndí tjenkao, kʼoajinti sʼin je xtiʼndíli (Rom. 2:21-24). wp15 1/11 1:12-14

Xi tíbasenkaoná nga nkjín chjota chjakaonajmíñá je Énle Niná, kuinga ya ʼmiyasoán ya jñani nʼio tjín chjota. ʼMiyañá ya jña bitjo karro, jña bitjo tren, jña fayo karro, jña saténa tsojmi kao ya jinndi̱tsi̱n. Tsa tsín tso tokuin nga ʼmiyai jñani nʼio nkjín chjota tjín, tʼetsʼoalai Jeobá kʼoa tikjaʼaitsjain jokitso jngo xi superintendente sʼin tíjna. I kitso: “Nga jngó jngó koya josʼin ʼmiyasoán jé Jeobá nixálee kʼoa kʼoasʼin bakonilee nga tjínná kjoamakjain kʼoa nga kixi mangíntʼalee”. Ndsʼee jebi kʼoatso nga kʼoasʼin bakónile Jeobá nga tíjnanda nga sitjoson ngayeje xi kuitsole. Kʼianga nʼiojin maa kʼoa kjaʼaí kjaʼaísʼin ʼmiyaa, kui xi basenkaoná nga ngisa nda nixálee je Jeobá kʼoa ngisasa manʼiotʼaa (2 Cor. 12:9, 10). Nʼio nkjín ndsʼee xi nʼio tsjoake nga kui fákaoni chjota tʼatsʼe je pájina xi tíjnaná ya Internet. Kʼoa kui kjimachjén nga tísakóyale Énle Niná je chjota xi kjintʼa tjío. wp15 1/11 5:12, 13, 15

Ngasʼa ya Eclesiastés 9:10 kʼoa kao xi kjaʼaísa bersíkulo, kui síchjén je én xi Seol tso je Traducción del Nuevo Mundo xi kitjo nó 1984 nga én inglés. Kʼoati kui én síchjén je Biblia xi kjaʼaínile nga én inglés. Tonga nʼio nkjín diccionario xi tsín faʼaitʼa én jebi kʼoa alikui ʼyale. Nʼio nkjín chjota xi kʼoasʼin síkjaʼaitsjen nga ñaki tíjna ʼnde xi Seol ʼmi. Kuinga kitjoʼndesíni nga “Tsjó” sʼin jaʼatoya je én hebreo xi Seol tso kʼoa én griego xi Hades tso je Biblia xi nó 2013 kitjo nga én inglés. Én jebi sasa majinniná kʼoa kixi tíjna josʼin jaʼatoya. Je ndsʼee tsakʼénele yaole nga ñaki ndasʼin kisikʼatoya kʼoa nga sasa koa̱njinniná kʼoa kui én xi machjén ndʼaibi kisichjén. Kʼianga ñʼai koanle je ndsʼee xi kjaʼaí én kisikʼatoya je Biblia kui xi tsakinyakao je ndsʼee nga tsakʼéndaya je Biblia kʼianga én inglés. wp15 1/12 2:10, 12

Tsa nʼio timʼee, je Jeobá tsjoánganʼioná kʼoa koasenkaoná. Tojosʼin tsakasenkao je choʼndale nichxin kjoatse. Nga kʼoakitso je rey David, tojo tso je testo xi kamaxkia ndʼaibi, a kui xi kitsonile nga tsínkʼia kuiyá jngo chjota xi tsakakóle kjoanda jngo xi ma̱ tíjna. Mai. Je David kitso: “Jé Jeobá tsjoánganʼiole nga chʼin tíjnakao sonnachanle; kʼoa ji si̱kʼantjaiyai nachanle nga chʼin tjínle”. Kui xi kitsonile, nga je chjota xi bakóle kjoanda jngo xi ma̱ tíjna, jé Niná koasenkao kʼoa jé sikuinda kʼianga chʼin ska̱tʼale (Sal. 41:3). Nʼio tsjoánganʼioná nga be Jeobá kʼianga kjoañʼai chjaʼá kʼoa nga tsín síchajinná. Jé Jeobá tsjoáná kjoanʼiojin kao kjoachjine nga maná jonʼia kʼianga chʼin katʼaná. Xi ijngosani, kʼoasʼin tsakʼénda yaoná nga male tije síndaya sakʼoani yaole. wp15 1/12 4:7

Kʼianga kiski én jebi je Pablo, alikui je kinchja̱ni toʼya chjotani xi ndoyá tjíoʼya, jé tísíkjaʼaitsjen je ndsʼee xi ndoyá tjíoʼya xi totʼatsʼe nga kixi kitʼale Jeobá. Je pastro Pablo kʼoakitsole je chjota hebreo nga nda kisʼin nga kʼoasʼin koanmake “je xi tjío kjoañʼai” ya ndoyá (Heb. 10:34). Je Pablo kʼoati tsakʼejnaʼya ndoyá, kʼoa xi ño nó tsakʼejnaʼya ndoyá, je ndsʼee xi ya chrian tjío tsakinyakao. Tonga jósʼin tsakinyakao je xi tsín ya tjío chrian. Kʼianí nga nʼio tsakʼétsʼoantjai je Pablo (Filip. 1:12-14; Heb. 13:18, 19). Nichxin xi tiyoaa ndʼaibi, kʼoati nʼio nkjín ndsʼee xi ndoyá tjíoʼya nga tsín yátsʼi̱n tjíobinyále Jeobá. Je ndsʼee xi ya chrian tjío nkjín koya josʼin tjíobinyakao. Tonga jmé xi tjínnele sʼiaan xi kjin tiyolee, jósʼin kuinyakoaa kʼianga tsín si̱chajiaan. Kʼianí nga kʼoétsʼoantjé ngantsjai. w16.01 1:13, 14

Je Niná kui xá kisindaniná nga i̱ kuiyoaa Sonʼnde, ali tsakuijin nga ya ngʼajmi koanngián (Gén. 1:28; Sal. 37:29). Tonga je Jeobá kiskoejin kʼa chjota nga rey kʼoa nga naʼmi koa̱n ya ngʼajmi. Kʼianga jekjoejin Niná kao nganʼiotsjele, jebʼantjaiya josʼin síkjaʼaitsjen. Kʼoa kʼiaa fitsʼiani nga ya koyale nga ya ngʼajmi koai (Efes. 1:18). Jósʼin beni jngo chjotale Cristo kʼianga je kitjoejin. Je Pablo kʼoakitsole je chjotale Cristo xi tsakatio ya Roma nga toxá kitjoejinni, kitsole: “Nga̱ jon alikui kichjoao kjoafaʼaitsjen xi tsʼe xi tjíonʼio, nga ngijngokʼa sʼe̱no kjoajkon, tonga kichjoénío je Espíritu Santo xi bekonná joni tsa xtile. Xi totʼatsʼe je Espíritu Santo nokjoaa Abba, xi tsoni Nʼai” (Rom. 1:7; 8:15). Tojosʼin tiʼyaa, kui xá síchjénni je nganʼiotsjele Niná nga tsín jao katasʼele je chjotale Cristo xi xá kitjoejinni nga ya ngʼajmi koai kʼoa nga ya koatexomakao Jesús (1 Tes. 2:12). w16.01 3:8, 9

Jósʼin bakoá nga ʼyaxkoán je ndsʼee xi Niná kiskoejin nga ya koai ngʼajmi. Xi títjon, alikui kui chjonangilee jókoanni nga kitjoejin nga̱ tsín ñá bʼakaoná (2 Tes. 3:11). Kʼoati tsín kʼoasʼin nikjaʼaitsjeen tsa kʼoati ya ngʼajmi koai je xʼinle kʼoa tsa chjoónle, tsa xijchále kʼoa tsa xínkjín, nga̱ tsín tsa tokitjenjinni nga ya koai (1 Tes. 2:12). Kʼoa alikui kui chjonangilee jmeni xi chʼao kʼoe kon. Tobʼelañá, tsa jngo tichjaa xi ya koai ngʼajmi je xʼinle, alikui kui chjónangilee jótjín kon nga tsín ya kʼoéjnakao xʼinle ya ʼNdenaxó. ʼYañá kʼianga je Jeobá tsjoáná ngayeje xi machjénná ya ʼNdenaxó (Sal. 145:16). Kʼianga ngóson nikoaa ngatsʼi je ndsʼee ni xi ya koai ngʼajmi kʼoa ni xi i̱ koatio Sonʼnde basenkaoná. Nga̱ ya Biblia kʼoatso nga ya jinjtín sʼee ndsʼee xi tondisoni koa̱n xi saʼnda kʼoakuitso nga ya ngʼajmi koai (Gál. 2:4, 5; 1 Juan 2:19). w16.01 4:10, 11