Octubre

Je Jeobá kʼiaa kiskoejin kʼa chjota tikʼiani nga jejaʼáyale je Jesús kʼoa kui nganʼiotsjele kisichjén. Nga kui nichxin, ngatsʼi je chjotale Cristo yaa kisʼele kjoachoya ya ngʼajmi. Tonga xijekoan, nkjín siento nó nga kisʼe je xi chjotale Cristo kitsole yaole tonga xi tsínni kui. Tonga je Jeobá tojo kiskoejin, je xi ya koai ngʼajmi, je xi ñaki chjotale Cristo koan. Chjota jebi yaa koanngóson je trigo xi kitso Jesús nga ya koanntjejin jñá xi tsín nda (Mat. 13:24-30). Kʼoa nga jetífikjetʼa nichxin, je Jeobá tojo tíkjoejin je chjota xi ya koai ngʼajmi. Kʼiatsa je Jeobá xi kʼia skoéjin kʼa chjota nga toje kjoaʼaí kjoafetʼa, ʼyañá nga kixi tíjna jmeni xi sʼin (Is. 45:9; Dan. 4:35; Rom. 9:11, 16). Alikui mená nga ya koa̱nngósonkoaa je chjota xi kisikʼaxki̱ Jesús kʼianga tsakʼéjna jngo choa̱. Je chjota xi tse kisixá koanjtile kao je naile nga ya koanjngokao je xi to jetífikjetʼa ora kisixá (Mat. 20:8-15). w16.01 4:15

Nichxin xi tiyoaa ndʼaibi, alikui kui tísíjéná je Jeobá nga xtiná kʼoaitʼalee. Tonga kʼoatsoná nga si̱tjosoán kjoatéxomale. Tsakui nichxin sakʼoa tsín majinná jmeni xi tsoná je Jeobá kʼoa tsa sakʼoa ñʼai maná nga nitjosoán. Tsakui nichxin soa maná nga ʼmiyasoán kʼoa ñʼai maná nga nokjoakoaa chjota xi tsín ʼyaxkoaan. Kʼoa tsakui nichxin nokjoaan nga tsín kʼoanʼia jmeni xi sʼín je chjota xi ñatjen nixá kʼoa tsa je xti xi ñatjen titsomaa skuela (Éx. 23:2; 1 Tes. 2:2). Kʼiatsa kʼoasatío tokoán, jméni xi sʼiaan. Si̱kjaʼaitsjenjiaan je kjoamakjain kao kjoanʼiojin xi kisʼele je Abrahán. Kʼiatsa si̱kjaʼaitsjenjiaan jmeni xi kisʼin je chjota xi kixi koan nichxin kjoatse, ni xi xʼin ni xi yánchjín, kjuintjenngiñá je choa̱le kʼoa miyoná koa̱n je Jeobá (Heb. 12:1, 2). w16.02 1:3, 14

Kʼianga kʼoakitso je Saúl nga mele sikʼien je David, je Jonatán nʼio ñʼai koanle nga kiskoejin ʼyani xi kixi koaitʼale, nga̱ mele nga kixi koaitʼale nga jao. Tonga bení nga je Niná títsjoánganʼiole je David, kuinga je xi kixi kitʼasínile. Kikájinkon je David nga katabʼejnaʼma kʼoa xijekoan kʼiaa kʼoakitsole je Saúl nga tsín je David katasíkʼien (1 Sam. 19:1-6). Kʼiatsa tsjoachaa je Niná, jé xi ngisa kixi kjuintʼalee tikʼoajinni tojmeni, ninga je equipo xi síská, ninga ndʼiaskuelaná kʼoa ninga naxinandáná. Si̱kjaʼaitsjenla jngo ti xi Henry ʼmi, xi ya tsakʼejnajinle equipo xi ajedrez síská ya ndʼiaskuelale. Ñaki kʼoatjín kon nga jngo campeonato kuinje̱le. Kʼoa nga tosíská nga xoto kao nga taingo alikui maʼale nga fitsoyason kʼoa nga fi kjoajtín. Tochan koanchoyale nga kui ngisa nʼio tífitʼale skuelale. Kuinga kitjojinsíni equipo xi tíjnajin xi tsʼe ajedrez (Mat. 6:33). w16.02 3:10, 12

Tsa sʼa xti, jósʼin jchani tsa ñaki me kjoaixili kʼuínsʼenngindái. Jngo koya kuinga si̱kjaʼaitsjain jósʼin bʼetsʼoalai Jeobá. Chjónangilai yaoli: “A nkjín kʼa bʼetsʼoale Jeobá axo to sakʼoaa bʼetsʼoale. A ñaki kʼoaxinle jotjín tokoán”. Tsakui chjónangilai yaoli jebi, koasenkaoli nga jchai tsa miyoli mani je Jeobá (Sal. 25:4). Kʼianga jme xi nijélee je Jeobá sakʼoaa kui síchjén je Biblia nga tsoyaná jmeni xi kanijélee. Nga chótʼayai je Biblia kʼoati kui xi koasenkaoli nga jchai tsa ñaki ni̱ma̱li tínroajinni nga meli kʼuínsʼenngindái, kuinga machjénni nga kʼoati si̱kjaʼaitsjenjin xi tʼatsʼe jebi (Jos. 1:8). Chjónangilai yaoli: “A kʼoasʼin ngana nga kotʼaya je Biblia nga xki̱ xomana. A tsjoake̱ña nga chotʼayajtínjin Biblia kao familiana”. Kui xi koasenkaoli nga jchai tsa ñaki ni̱ma̱li tínroajinni nga meli kʼuínsʼenngindái. w16.03 1:11, 13

Nʼio tsjoa sʼená kʼianga ʼyaa informe xi xki̱ nó faʼaitʼa je Anuario. Xi basenkaoná nga jtín sʼin biyoaa kui je kjoajtíntse xi jan nichxin satíoná kʼianga xki̱ nó. Je kjoanokjoaya, je xi faʼachoya kao drama xi faʼa nʼio basenkaoná nga tosi tonda nixálee je Jeobá. Xi kʼoati basenkaoná nga jtín sʼin biyoaa kʼiaa nga faʼaitsjenya je Kjoabiyale Cristo, je xi xki̱ nó sʼejna kʼianga 14 sá nisán tojosʼin faʼaitʼa je calendariole chjota judío (1 Cor. 11:23-26). Tongini kʼoaʼmilee je chjota nga katafi nga faʼaitsjenya je Kjoabiyale Cristo. Kʼoa nga jebichó nichxin, ñatjen biyoxkóñá ngatsʼiaa. Kʼoasʼin nitjosonñá jmeni xi kitso je Jesús kʼoa kʼoasʼin bakonilee je Jeobá nga bʼailee kjoanda jmeni xi kisʼin xi tʼatsaan. Alikui kʼoakoa̱nná kʼuínyasoán kʼiatsa toñá. Kuinga nixájtínñá. Kʼianga kʼoanʼia miyón mani chjota ʼmiyalee xi tʼatsʼe Jeobá nga je kʼoasjengʼa kʼoa skoe̱xkón. w16.03 3:4, 6, 7

Je ndsʼee xi sʼa tjíokotʼaya nga ngisa nda sixá ya jinjtín kuinga sítjosonni jme xi ʼmile nga kʼoatso Biblia, ali tsakuijin nga tjín xotítsole. Tobʼelañá, kʼiatsa jngo chjotajchínga kʼoakuitsole je ndsʼee nga tsje kʼoa nga kixí katasíchon ya jchxo xo̱ntjoale Ndʼia jña chotʼayá, koaan kʼoexkiale Tito 2:10 kʼoa kʼoakuitsole nga ngisa sa̱sénle chjota je Énle Niná kʼiatsa tsje chon. Kʼoati koa̱n kʼoakuitsole nga katasíkjaʼaitsjen josʼin koasenkao je xi jetjínle nó nga kixí chon. Kʼiatsa kʼoakuitsole koasenkao nga kuenta sʼin xi ngikʼa kʼoa nga tsín tokui kʼoasʼinni nga kʼoatíʼmile. Kʼianga skoe̱ nga nʼio binyakao je ndsʼee jmeni xá xi tísʼín, nʼio tsjoa sʼe̱ kon. Xi ijngosani, je xi chjotajchínga sʼin tíjna koaan tsjoále kjoanda je ndsʼee nga tísítjoson kjoafaʼaitsjen xi tsakʼaile. Tsa kʼoasʼin, koasenkao je ndsʼee nga ngisasa nda sitjoson. Kʼianga kʼoaile kjoanda jngoyale kʼoatínikao joni tsa jngo naxó xi nandá tísʼejtenngile nga katamangʼa. wp15 1/4 2:7, 8

A jesa kitjatojin je kjoa xi ñʼai tjín kʼoa aliʼya xi tsakasenkaoli koanli. Tsakui nichxin koantsínli xá kʼoa tsa kjoa kisʼeli ya ndʼiaskuela. Tsakui nichxin chʼin kisʼeli kʼoa tsa jngo kjoa xi nʼio ñʼai tjín kitjatojin. Tsakui nichxin ñaki totsʼe kisʼeli nga tsín ʼya xi tsakasenkaoli. Kjoaixiní, sakʼoa tjín kjoa xi nʼio ñʼai tjín xi tsín koa̱nle kʼoendajin xi to chjota. Jméni xi sʼiaan tsa kʼoakoaan. Je Biblia kʼoatso nga je Jeobá si̱nʼiotʼaa (Prov. 3:5, 6). A koaan si̱nʼiotʼaa je Jeobá. Jaon. Nʼio nkjín choa̱ faʼaitʼa Biblia je xi bʼéjngo tokoán nga basenkao Jeobá je choʼndale nga kjoa faʼatojin. Kʼiatsa kjoa tijnajin kʼoa liʼya xi tíbasenkaoli, ali tsa majen makjájinli. Kʼoati tʼiain jokisʼin je Pablo. Takui nga ñaki ninʼiotʼai je Jeobá. Kʼoati kuenta tʼiain jósʼin tísíkuindali. Tsa kʼoasʼiain, ngisaa nʼio koa̱nnʼiotʼasai je Jeobá kʼoa nʼio koa̱nmiyosai. wp15 1/4 4:3-5

Je Jeobá nʼio tsjoakená (1 Juan 4:8). Kʼoa je Na̱i bení nga tokʼia nga koa̱n kontra koatiole Niná je chjota tsa kʼoanachale. Jósʼin bʼanachale. Kuinga tsín katabe je chjota “nga machjénle tʼatsʼe Niná” (Mat. 5:3, TNM). Je Na̱i nʼio nkjín chjota tíbʼanachale kʼianga tsín katasʼejinle jokjoantjínni xi tʼatsʼe Niná. Je Na̱i bení nga kui xi mele je Jeobá nga toje kʼoétsʼoalee (Éx. 20:5). Kʼoa kuinga relijión ndiso síchjénsíni nga bʼanachale je chjota. Nʼio nkjín chjota xi kʼoasʼin makjainle nga sasénle Niná josʼin tjíobʼétsʼoale, tonga alijmeni chjíle je kjoamakjain xi tjínle kʼoa kao kostumbre xi tjínle. Kʼianga nichxinle je Isaías kʼoati kui kjoa kitsaojin je chjota israelita. Je Jeobá tsakasenkao kʼoa kitsole: “Ánni nga ya nikjesínilao je xi njesonno xi tsínni maskiño. Ndakjoan tinóʼyanáo kʼoa kui chi̱nao xi ñaki nda” (Is. 55:2). wp15 1/5 1:14, 15

Je Abel alikui be josʼin kuitjoson én jebi. Tonga tsakui nichxin kui kiskonangile yaole ʼyáni xi kʼoetʼale je ye̱ kʼoa je xi koasenkao je chjotasonʼnde nga chjotatsje koa̱n ijngokʼani. Je Abel ñaki koankjainle nga sitjoson Niná jmeni xi kitso. Kʼoa je Niná nda kisasenle je kjoatjao xi kitsjoatʼale (Gén 4:3-5; Heb. 11:4). Je Noé kʼoati koankjainle nga sitjoson Niná jmeni xi kitso. Kuinga kinjengini kʼianga jaʼai Jtsínʼio (Heb. 11:7). Nga nʼio kisʼele kjoamakjain, choo tsakakále Jeobá kʼianga jejaʼato Jtsínʼio (Gén. 8:20). Nga jeki nichxin tikisʼengáni chjotatsʼen. Jé tsakatéxoma Nemrod kʼoa kontra tsakʼejnale Niná (Gén. 10:8-12). Tonga Noé tojo taja kisʼejna kjoamakjainle. Kuijin kiskaniya jko̱ nichxin nga kjoaʼaxin Niná je jée kao kjoabiya kʼoa kʼianga tjóxin je chjotaxá xi chʼaosʼin batéxoma. Ñá kʼoati koa̱n kui cha̱niyaa jkoaa, kʼoa ngisaa nga jenʼio machrianle ndʼaibi nga kʼoakoa̱n (Rom. 6:23). wp15 1/5 3:4, 6

Kʼiatsa nʼio si̱kjáojiaan, tsakui nichxin tjóchʼinná kʼoa alikui tije Jeobá si̱nʼiotʼañá. Tse kjoaba bʼejnajin je chjota xi nʼio síkjáojin tojo tso je testo xi kamaxkia ndʼai. Jmé xi sʼiain tsa jme xi nʼio tinikjáojin. Koaan kuinókjoakoai je xijcháli, xʼinli, chjoónli kʼoa tsa jngo xi nʼio miyoli mani. Koasenkaoli nga si̱nʼiotʼai je Jeobá. Je Jeobá ngisaa nʼio nda be jmeni xi tibitjatojiaan tikʼoajinni toʼyani kʼoa koasenkaoná kʼiatsa ba tjínná. Je Pablo i kitso: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo” (Filip. 4:6, 7). Kʼiatsa jme xi makjáojinli, tikjaʼaitsjain je nganʼio xi tsjoáná je Jeobá. Nga basenkaoná jé síchjén je ndsʼee xi tjío ya jinjtín, je xi chjotajchínga sʼin tjío, je choʼnda xi nʼiotʼakon, je ánkje kʼoa kao Jesús. wp15 1/5 4:16, 17

Je Jesús yaa ki ya jñani tíjna jngo xjáonandá ya tʼain yo̱ngo̱. Yaa tíjna jngo chjota xi yá kjia xi tsín ma fi. Nʼio nkjín chjota xi mele nga koa̱nndaya xi ya fi jñani tíjna je xjáonandá. Je Jesús yaa kiskajin je chjota xi tsín ma fi. Kʼiaa saʼnda kʼoakjini saʼnda nga kjesa tsinjin je Jesús (Juan 5:6-9). Je Jesús kiskonangile chjota xi tímʼe tsa mele koa̱nndaya. Kʼoakitso nga mele tonga nga tsín ʼya xi tjínle xi koasenkao nga koaisʼenjin nandá. Je Jesús kitsole: “Tisotjain, chjoai nijñali, kʼoa tómjain”. Kʼoakisʼin chjota jebi. Kjoaxkón jebi kui síkjaʼaitsjenná jmeni xi jeme kʼoasʼin je Jesús ya ʼNdenaxó. Tonga kʼoati kui bakóyaná nga nʼio tsjoake chjota je Jesús. Kuinga ya kini jñani tíjna xjáonandá nga jé tsakásjai chjota xi nganʼio machjénle. Ñá kʼoati koa̱n chjénngiaa choa̱le kʼoa kuijnyísjee chjota xi nʼio tjíosíkjáojin jme xi chʼaotjín kjima sonʼnde. wp15 1/6 2:8-10

Kʼianga tsakʼétsʼiakao kjoabʼetsʼoale je Jesús i kitso: “Nʼainajin”. Je én jebi kui síkjaʼaitsjenjinná kʼianga je Jeobá nʼaile mani ngatsʼi je ndsʼee kao tichjaa xi tjío jngo tjíjtsa Sonʼnde (1 Ped. 2:17). Je Jeobá tíkjoejin kʼa chjotale Cristo kʼianga ya koatio ya ngʼajmi kʼianga xtile kuitsole. Kʼoa kuinga nʼaile mani je Jeobá (Rom. 8:15-17). Ánni kʼoabixónsíñá kʼianga kʼoati nʼaile mani je Jeobá je xi koatio i̱ Sonʼnde. Kuinga Jeobá títsjoále kjoabijnachon kʼoa tojmeni xi machjénle. Kʼoa nichxin xi nroaján, kʼianga jechjotatsje koa̱n nga jekjoaʼatojin je choa̱ xi tokjoetʼani, kʼoati xtile Niná koa̱n (Rom. 8:21; Apoc. 20:7, 8). Je kjoatjao xi nʼio chjíle xi koa̱n tsjoále je ʼndíxtile je xi xijchá ma kuinga kuitsoyale nga Nʼaile mani je Jeobá kʼoa nga kuitsoyale josʼin kʼoetsʼoa. Je kjoatjao xi ngisasa nio nda xi koa̱n tsjoále je xijchá je ʼndíxtile kuinga kuitsoyale nga ñaki tíjna je Jeobá kʼoa nga koa̱n miyole koa̱n. wp15 1/6 4:4-6

Kʼianga sikuindaná je Jeobá xi tʼatsʼe Na̱i, jméni xi sʼiaan. Kuinga tsín ya kuinójiaan yaoná xi chon sonʼnde kʼoa nikuijinla koa̱ntsjoachaa “ngayije jñale xi chon sonʼnde” (Juan 15:19; 1 Juan 2:15-17). Je Jeobá, jeme sikʼéjnaʼyanʼio je Na̱i kʼoa sikjeson jmeni xi chʼao chon i̱ Sonʼnde. Tonga si̱kjaʼaitsjeen nga nʼio jtile je Na̱i nga̱ be nga to choasa nichxin tíjnale. Koaijon koaitʼaa nga mele nga tsín ti Jeobá si̱xánilee. Kuinga tosi tonda si̱jésínilee je Niná nga katasíkuindaná xi tʼatsʼe Na̱i (Apoc. 12:12, 17). Kʼiatsa mená nga ya kuiyoaa jngo sonʼnde jñani koa̱ntsín je Na̱i, machjénní nga kʼoasʼiaan jotso je padrenuestro. Si̱jélee Niná nga katafaʼai Chjotaxále, nga katabitjotsje jaʼaínle kʼoa nga kʼoakatama josʼin mele i̱ Sonʼnde. Kʼoakʼoé tokoán nga je tsjoáná jmeni xi machjénná nga nyaon nyaon kʼoa nga koasenkaoná nga kixi kjuintʼalee (Mat. 6:9-13). wp15 1/6 5:12, 17, 18

Jméni xi koa̱n nga kui nichxin. Alikui ʼyaa. Tonga nʼiojin ñʼai koa̱nchon kʼoa tsakui nichxin si̱katioá jmeni xi tjínná. Ya Jerusalén, je chjotale Cristo kisikatío je niʼyale kʼoa tse kjoa jaʼatojin nga kitjontjaile yaole (Mar. 13:15-18). Kuinga chjónangisínilee yaoná: “A tijnandaña nga sikatíoa je tsojmi xi tjínna. A tijnandaña nga kʼoasʼian tojmeni nga kixi kjuítʼale je Jeobá”. Nga kui nichxin, ñaki toñá ñá xi je Jeobá kʼoétsʼoalee ninga tojme xi koa̱n, tojo kisʼin je profeta Daniel (Dan. 6:10, 11). Kʼianga kjoaʼaí kjoañʼai xi nʼio tse, alikui tikui “je énnda xi tʼatsʼe je kjoatéxomale ngʼajmi” kʼuínyasonñá. Ánni. Nga kʼia toje jaʼato nga kui én tsakʼinyasoán. Nga̱ toje “kjoetʼa” jmeni xi chon (Mat. 24:14). Je xi kʼuínyaa nga kui nichxin kuiní nga kjoaxkón kjoaʼaíne chjota kʼoa kjoanʼiojin machjén nga kʼoasʼiaan. Tsakui nichxin kui kʼuínyasoán nga jesi̱kjeson sonʼndele Na̱i. wp15 1/7 2:3, 8, 9

Je Jesús kʼoakitso nga tjín chjota xi koa̱njtikená nga tsín kʼoanʼia josʼín je. Chjota jebi alikui be anni nga nʼio chjínile nga toje bʼainganʼiolee je Chjotaxále Niná. Tsa mená nga kixi koanngíntʼalee je Niná machjénní nga si̱tjosonlee ngantsjai ninga jokuitsoná xi ngikʼa kʼoa ninga josikaoná (Dan. 3:16-18). Tsakui nichxin ñʼai male je xi sʼa xti nga tsín kʼoasʼín josʼín xi ngikʼa. Tjínkʼa xi tsokjón nga tsín sʼín saludar je bandera kʼoa tsa maije̱ nga tsín ya tsjonjin yaole je sʼuí xi naxinandá bʼasjengʼa. Kuinga machjénsíni nga je xi xijchá ma katabinyakao ʼndíxtile nga katasʼele kjoanʼiojin ya ndʼiaskuela. Kʼianga kotʼayajtín ya yaniʼya koaan kui kjaoyani josʼin síkjaʼaitsjen Jeobá xi tʼatsʼe jebi. Koaan koakoyale ʼndíxtile josʼin kuitsoya jme xi makjainle kʼoa nga kao kjoaxkóntokon kʼoasʼinni (Rom. 1:16). Kʼoa tsa machjén koaan kjoakao je maestro nga kʼoakuitsole josʼin makjainná. wp15 1/7 3:15, 16

Ijngosa koya josʼin bakóná kjoatsjoachale Jeobá kuinga kitsjoa je kjoabʼechjíntjai. Kui xá kitsjoani kjoatjao jebi nga katasʼená kjoabijnachon (1 Juan 4:9). Je pastro Pablo kʼoakitso nga nijngojin xi tsjoá kjoabijnachonle xi totʼatsʼe jngo chjota xi kixi kʼoa kʼoakitso nga tsakui nichxin tsjoá kʼa kjoabijnachonle xi totʼatsʼe jngo xi nda chjota. Tonga je Niná tsakakó jokji tsjoakená kʼianga kʼienntjainá je ʼNdíle ninga “chjotajée” maa (Rom. 5:6-8). Je kjoabʼechjíntjai jebi kui xi basenkaoná nga koa̱n miyole Niná koaan kʼoa kui xi ngisasa bakóná jokji tsjoakená je Niná. Je kjoabʼechjíntjai kui xi bakó nga nʼio tsjoake Jeobá je chjotasonʼnde. Tsjoa maná nga nʼio nda kuiyoaa ya sonʼndenaxó kʼiatsa kixi kjuintʼalee je Niná. Je kjoabʼechjíntjai kui xi ngisasa bakó nga tsjoakená je Jeobá. Kuinga tosi tonda kʼoaisínilee kjoanda nga kʼoasʼin kitsjoa xi tsakʼéchjíntjainá. wp15 1/8 1:13, 15

Tse kjoanda tjenkao nga si̱xálee je Jeobá ya ʼNdenaxó. Kuinga machjénsíni nga kao kjoatsjoa kʼoainganʼiolee naxinandále ndʼaibi. Tobʼelañá, tjínkʼa ndsʼee xi ya tjíosíxá tsakai ya sucursal xi tíjna ya Estados Unidos kʼoa kʼoatsakʼinle nga tsín tiya sixáni. Kʼoa tjínkʼa superintendente viajante, xi jejchínga kʼoa xi tsín tikʼoamanile, xi kʼoatsakʼinle nga precursor especial sixá. Ngatsʼi ndsʼee jebi ñaki tsjoa tjíole josʼin tjíosíxá ndʼaibi kʼoa nʼio tse kjoanichikontʼain tjíosʼele. Tsa mená nga kʼoati tsjoa sʼe̱ná tsanda ñá kʼoa nga sichikontʼainná je Jeobá, si̱jélee nganʼiole, kʼoénelee yaoná jokji tjen kuicho nganʼioná nga si̱xálee kʼoa tsjoa kʼoé tokoán tojme xá xi tísʼenená (Prov. 10:22). Kʼoa jósʼiaan tsa jngo ʼnde matsjoachaa jñani mená kuiyoaa ya ʼNdenaxó tonga tsa kʼoakuitsoná je naxinandále Niná nga xin kuiyoaa. Alikuijin kui kjuinñá jñani kuiyoaa kʼoa jme xá xi sʼe̱ná. Nʼiojin kʼoailee kjoanda je Jeobá nga tsjoáʼndená nga ya tiyoaa ya ʼNdenaxó. wp15 1/8 3:8

Kʼianga tsakʼejna Noé, je chjota ñaki tokui kisikjaʼaitsjen nga kui kʼoasʼin xi chʼaotjín. Je Noé alikui je kisimiyo je chjota xi tsín tsjoake Jeobá. Tosa je chjoónle nʼio kisimiyo, kao xtile kʼoa kao yánchjínle xtile. Kʼoa tosa kui xá kisʼin ngatsʼi nga tsakʼénda je arca kʼoa nga kitsoyason (2 Ped. 2:5). Kui xi tsakinyakao nga kitjontjaile yaole kʼianga jaʼai Jtsínʼio. Kʼoa ngatsʼiaa xi tiyoaa ndʼaibi, yaa jaʼaiñá je ntje̱le Noé kao familiale. Bʼailee kjoanda kʼianga kisitjosonle Niná kʼoa nga tsín je kisimiyo chjota xi chʼao kisʼin. Kʼoa je chjotale Cristo xi títjon tsakatio kʼoati kisitjosonle Niná, alikui je kisimiyo je chjota xi tsín tsjoake je Jeobá. Kui xi tsakinyakao nga kitjontjaile yaole nga kichonikje Jerusalén kʼianga nó 70 (Luc. 21:20-22). wp15 1/8 4:17, 18

Tsakui xi mená nga koasenkaoná je kjoabʼetsaojin, machjénní nga nda chjoéjiaan kʼoa jotjín tse si̱kʼayalee nichxinná. Jósʼin basenkaoná je kjoafaʼaitsjenná nga kui chjoéjiaan xi ndatjín. Je Biblia kʼoatso nga tsínkʼia kui kʼoasʼiaan xi chʼaotjín nga kuijnyíjée. Tobʼelañá, nga si̱chajngiaa, tsa xkóson kʼoétsʼoalee, tsa kjoabʼenda sʼiaan, tsa kuixkan, tsa toxkia sʼioa kʼoa tsakui sʼuí koanngián jñani sʼínjen sʼínkjá chjota. Je Pablo kʼoakitso nga je xi kʼoatjíosʼín alikui “sʼe̱kjoatjaole kjoatéxomale Niná” (Gál. 5:19-21). Kuinga machjénsíni nga chjónangilee yaoná: “A tsjoáʼnde kjoafaʼaitsjenna nga kui bʼetsaojinña je kjoaniská xi kjoatsʼen tjenkao, tsa je xi naxinandále bʼasjengʼa kʼoa tsa je xi sítsʼenna. A tsjoáʼnde kjoafaʼaitsjenna nga kui kotsenle pelíkula xi kjoachajngi bakó, xi kjoabʼenda tjenkao kao xi kjoachʼi̱ bakó”. wp15 1/9 2:11, 12

Ya Biblia kʼoatso nga tsínkui xá kisindaniná je Niná nga ñá kʼoakuixoán jmeni xi ndatjín kʼoa jmeni xi chʼaotjín. Je Niná bení jmeni xi nda sikatíoná. Tokʼiaa nga tsjoa sa̱tío tokoán kʼoa nga nyʼán kuiyoaa kʼiatsa si̱tjosonlee kʼoa tsa jchaxkoán. Kuinga bakóyaniná je Jeobá xi tʼatsʼe jebi nga tsjoakená. Jngo nʼai makjáojinle josʼin koatio je ʼndíxtile nichxin xi nroaján kʼoa kui xi mele nga nda katabatio. Tonga me ngatsʼi chjota xi tjín ndʼaibi nga tsín be jmeni xi koa̱nle nichxin xi nroaján. Tokui tjíosíxántjai tsojmi xi tokjoaʼato (Sal. 90:10). Tonga ñá xi Jeobá tinixálee, jé bʼailee kjoanda kʼianga tíbakóyaná nga tsjoa tjíosatío tokoán ndʼaibi kʼoa nga títsjoáná kjoachoya tʼatsʼe nichxin xi nroaján. wp15 1/9 4:10, 11

Nichxin kjoatse, nʼio nkjín chjota xi tsabe josʼin tsakasenkao Niná je naxinandá Israel. Tobʼelañá, je Jeobá nkjín kjoaxkón tsakatío kʼianga tsakʼaonsje naxinandále ya Egipto kʼoa nga kinjele kjoajchán je naxinandále ya ʼNde jña tsakʼinle nga kʼoaile (Jos. 9:3, 9, 10). Ningalani tsabe nga je Jeobá tíbasenkao naxinandále, je chjotakontrale naxinandá Israel xíjin koan, alikui koankjainle kʼoa kuinga kisichasíni kjoajchán. Kʼoa kʼianga jeki nó, je rey Acab nkjín kʼa tsabe josʼin tíbasenkao Niná je naxinandále. Je Elías kʼoakitsole je Jeobá nga lʼí katasíkasénni tjen ngʼajmi kʼoa je Jeobá kinrʼoéle. Je Elías kʼoati kitsole je Acab nga síxkón koa̱n jtsí xi sikʼa je Jeobá, kʼoa kʼoakoan (1 Rey. 18:22-45). Tonga Acab alikui koankjainle tsa je Jeobá tsakatío ngayeje kjoaxkón jebi. Jméni xi bakóyaná jebi. Kʼiatsa mená jchaa jósʼin basenkaoná je Niná, kuenta sʼiaan jmeni xi sʼín. wp15 1/10 1:4, 5

Kʼiatsa si̱nʼiotʼaa je Jeobá kʼoa kʼoasʼiaan jmeni xi tsoná jé koasenkaoná. Je pastro Pablo i kitso: “Niná ngisa totse male sʼín ngayije kjoa jo kji xi nijé, josʼin faʼaitsjenná, totʼatsʼe je nganʼio xi síxájinná” (Efes. 3:20). Bʼenelee yaoná nga nixálee je Niná, tonga kʼoati ʼyaa jokji tjen bichó nganʼioná. Kʼoanʼia jñani tjen kʼoamaná kʼoa ʼyañá nga sichikontʼain Jeobá jmeni xi tinʼia. Kʼoa nʼio bʼailee kjoanda je Jeobá nga kʼoasʼin basenkaoná. Je Jeobá tsjoáná tojmeni xi si̱jélee “josʼin mele nga je” (1 Juan 5:14). Kʼiatsa si̱jélee nga nʼio sa tse kjoamakjain katasʼená, tsjoáná. Kʼiatsa ñaki je Jeobá si̱nʼiotʼaa, sichikontʼainná kʼoa ngisasa tse kjoamakjain tsjoáná kʼiatsa si̱jélee. Kʼiatsa kʼoasʼiaan, ngisaa nʼiosa sʼe̱jna kjoamakjainná kʼoa kʼoainá kjoanda xi tsʼe “kjoatéxomale Niná” (2 Tes. 1:3, 5). wp15 1/10 2:16-18

Kʼiatsa ni̱kjaʼaitsjenjiaan xi tʼatsʼe Jeobá kao Jesús kui xi koasenkaoná nga sʼe̱ná kjoafaʼaitsjen kʼoa nga nʼio sʼe̱jna kjoamakjainná (Heb. 5:14; 6:1). Kʼiatsa tsín nanda si̱kjaʼaitsjeen xi tʼatsʼe Jeobá, tobijbijin koa̱nkjinlee kʼoa tsakui nichxin saʼnda tsín timiyoná koa̱nni (Heb. 3:12). Je Jesús kʼoakitso jmeni xi koa̱n kʼiatsa ñá xi tsín chʼa̱ʼén jmeni xi bʼexkiaa ya Biblia. “Je kjoanikjaojin kao kjoanyiná kao kjoatsjoa xi tsʼe sonʼnde” sikjinná xi tʼatsʼe Jeobá (Luc. 8:14, 15). Kuinga nʼio machjénsíni nga si̱kjaʼaitsjenjiaan ngantsjai jmeni xi tso Biblia nga̱ kui xi koasenkaoná nga ngisasa nda jchaa je Jeobá kʼianga nyaon nyaon. Kʼoati kui xi koasenkaoná nga tosi tonda kʼoénelee yaoná nga chjénngilee jokjoan (2 Cor. 3:18). Kʼiatsa kʼoénelee yaoná, kuiyoñá tokʼia saʼndani kʼoa tosi tonda jchaa jokjoan Niná (Ecl. 3:11). wp15 1/10 4:13, 14

Xi xijchá mao kuijin xi meno nga miyole Jeobá katama je xtino. Kʼoa je Jeobá jon tsakáneno nga kʼuínyalao kʼoa si̱kixiyao (Efes. 6:4). Kuinga machjénsíni nga kʼuínyalai ngantsjai jmeni xi tso je Biblia. Tobʼelañá, ánni nga skuela nikasénni xtili. Kuijin nga ʼyai nga koa̱nchjénle jmeni xi sa̱kóyale ya skuela. Ngisaa nʼio chjíle nga kuisenkoai nga tsín sicha kjoajtínná kao kjoajtíntsená kʼoa nga koatio nga chotʼayajtíon Énle Niná ya niʼyano. Jmeni xi kjimajinle xi tʼatsʼe Jeobá kui xi koasenkao nga koa̱n kuitjontjai. Kuinga machjénni nga kuisenkoai nga tsjoa katasatío kon nga kjimajinle xi tʼatsʼe Jeobá kʼoa nga katamajinle nga je tsjoále kjoafaʼaitsjen nga kui xi ndatjín skoéjin. Kʼoati koa̱n kʼuínyalai nga nʼio chjíle nga ʼmiyasoán. Tʼintjenngi choa̱le Jesús kʼoa tisenkoai je xtili nga tsjoake katama nga kjoakaonajmíni je chjota xi tʼatsʼe Biblia. wp15 1/11 2:6

Jé Jeobá xi kʼoatso ʼya xi ngʼajko̱ tíjnale yaniʼya. Tonga alikuijin xi tsonile tsa je xi ngʼajko̱ ma totaon skoe̱ xi ngikʼa. Je Biblia kʼoatso nga je xi xʼin ma jé ngʼajko̱ tíjnale je chjoónle. Tonga kʼoati tso nga tjínnele skoe̱xkón (1 Ped. 3:7). Kui xi tsonile nga kuenta sʼin jme xi machjénle je chjoónle kʼoa nga tsjoále jme xi tsjoa koayani kon. Je Biblia itso: “Jon xi xʼion, tsjoacha katamao yánchjínno, josʼin nga Cristo koantsjoake naxinandále, kʼoa kitsjoantjai yaole xi tʼatsʼe” (Efes. 5:25). Tojo tso testo jebi, je Jesús saʼnda kitsjoantjai yaole xi totʼatsʼe chjotale nga nʼio tsjoake koan. Tsa je xi xʼin koaitjenngi choa̱le Jesús kʼoa tsjoake koa̱n je chjoónle, ngisajin choa ñʼai koa̱nle je chjoón nga tsjoake koa̱n, nga skoe̱xkón kʼoa nga tsjoánganʼiole jmeni xi sʼin (Tito 2:3-5). wp15 1/11 4:6, 7

Nga jeki nichxin, ngisaa nkjín koanni je chjotale Cristo xi én griego koanle tikʼoajinni xi én hebreo koanle. Nga jeme to én griego koanle ngatsʼi je chjota, je libro xi tsʼe Mateo, Marcos, Lucas kao Juan jekui én kichjini. Je karta xi kiski Pablo kʼoa kao xi kjaʼaísa libro xi faʼaitʼa Biblia kʼoati én griego kichjini. Je chjota xi kiski Escrituras Griegas kʼianga kui kisikʼaxki̱ je én xi faʼaitʼa Escrituras Hebreas, me to ya kiskoenile je Septuaginta, nga̱ jeʼén griego kijna. Tjíojin én xi tsʼantjaiya choa josʼin kichji, kʼoa alikui ñaki koanngóson je Escrituras Hebreas xi títjon kisʼenda. Ninga chjotajéelani xi kisikʼatoya je Septuaginta, tojo Énle Ninání kʼoa yaa kitjoéni je Biblia xi kjio saʼnda ndʼaibi. Jméni xi bakóyaná jebi. Kui bakóyaná nga tsín jngo én xi ngisa ngʼa síkʼéjna je Jeobá tikʼoajinni xi kjaʼaínile (Hech. 10:34). wp15 1/12 1:8, 9

Je Biblia kʼoatso nga tjín “nichxin nga jyó biyoaa” (Ecl. 3:7). Kui xi tsonile nga machjén sakʼoa nga tsín kuinókjoaa. Tobʼelañá, tsa ʼyani xi tínchja̱, machjén nga jyó kuiyoaa, kʼoasʼin koakonilee kjoaxkóntokon (Job 6:24). Kʼianga kui sʼejinná xi tsín koa̱n nga tjín xi sʼe̱jinle, alikui koa̱n ʼya xi jokʼuínlee (Prov. 20:19). Kʼoa nga ʼya xi kui kʼoatsoná jmeni xi tsín sasénná, tjínnele nga tojyó kuiyoaa kʼoa tosa likui jokuixoán (Sal. 4:4). Kʼoati tjín nichxin nga ma nokjoaa (Ecl. 3:7). Tobʼelañá, kʼianga chʼasjengʼaa je Jeobá, nga bʼainganʼiolee xi kjaʼaí kʼoa tsa kʼiaje̱ nga kʼoabixoán jotjín tokoán kʼoa tsa jme xi machjénná. Kʼoasʼin bakonilee je Jeobá nga tibʼailee kjoanda nga maná nokjoa. Kʼianga tjín xi tsjoákjoatjaoná je miyoná mená kʼianga ñaki nda si̱chjén je tsojmi xi katsjoáná kʼoa nga maná nokjoaa, jngo kjoatjao xi títsjoáná je Jeobá kʼoa mená nga nda si̱chjén. wp15 1/12 3:4, 5

Nichxin xi tiyoaa ndʼaibi, nijngojin ndsʼee xi koa̱nle sindayaná (1 Cor. 12:9). Tonga tjínkʼa xi mele kuinyakaoná kʼoa tsjoáná kjoafaʼaitsjen josʼin si̱xkiaa. Tjínkʼa kjoafaʼaitsjen xi basenkaoná. Tobʼelañá, je Pablo kʼoakitsole je Timoteo nga bino kataʼbikao choa je tsʼoa̱ nga sakʼoa makjine. Tonga kʼoati machjén nga chósonnilee tsa kjuintjenngiaa kjoafaʼaitsjen xi tsjoáná xíngiaa. Tsakui nichxin jngo ndsʼee kʼoakuitsoná jñanile xki xi chi̱nee kʼoa tsa jme ndáxka̱ sʼioa. Kʼoa tsakui kʼoakuitsonáje̱ jokjoan tsojmi xi koa̱n chi̱nee kʼoa jokjoan xi mai. Tsa kʼoakuitsoná nga kui tsakasenkao je xínkjín xi kʼoati kui chʼin kisʼele. Ninga tsakasenkao je, alikui kui xi tsonile tsa kʼoati koasenkaoná tsanda ñá. Alikui tongóson kjoan xki̱ xi binyakaoná ngatsʼiaa. Tjín xki xi binyakao xi kjaʼaí tonga síkiʼaon xi ngikʼa (Prov. 27:12). wp15 1/12 4:13

Nga chjotajée maa ngatsʼiaa kjoabiya tichoʼndá (Rom. 5:12). Tonga je Niná nʼio tsjoakená kʼoa kuinga kisikasénni je ʼNdíle nga kʼienntjainá (Heb. 2:9). Kʼoa nga kʼoasʼin kʼienntjainá je Jesús, tjóxin je kjoabiya, likui tikʼia sʼe̱ni (Is. 25:7, 8; 1 Cor. 15:22, 26). Ngatsʼi xi sʼe̱le kjoamakjain tʼatsʼe Jesús tsjoa sa̱tío kon kʼoa nyʼán sʼin koatio ngantsjai nichxin, tjínkʼa xi ya koai ngʼajmi kʼoa tjínkʼa xi i̱ Sonʼnde koatio (Rom. 6:23; Apoc. 5:9, 10). Tonga je kjoatjao xi kitsjoaná Niná tsesa kjoanda tjenkao. Jmésa kjoanda xi tjenkao je kjoatjao xi kitsjoaná Niná. Kuinga je Sonʼnde ʼndenaxó koa̱n, koa̱nndayaa je xi chʼin tjínle kʼoa kjoaʼáyanile xi jekʼien (Is. 33:24; 35:5, 6; Juan 5:28, 29). Nʼio tsjoachaa je Jeobá kao Jesús nga kʼoakisʼin xi tʼatsaan (2 Cor. 9:15). w16.01 2:5, 6

Kʼianga jngo chjotale Cristo kjoejin Niná kao nganʼiotsjele, bʼantjaiyaa je kjoafaʼaitsjenle. Kʼianga kjesa bʼaijinle kjoanda jebi nga ya koai ngʼajmi, kui tíkoyale nga i̱ kʼoéjna ngantsjai nichxin i̱ Sonʼnde. Tsakui nichxin kui mele skoe̱ kʼianga kjoaʼaíkao ʼNdenaxó je Jeobá, nga kjoaʼaxin xi chʼaotjín kʼoa nga skoéya xínkjín xi jekʼien. Kʼoa tsakuije̱ nga kʼoenda niʼyale kʼoa nga ski̱ne tole je yá xi jesoa kʼoentje (Is. 65:21-23). Tonga a kuinga tsʼantjaiyani kjoafaʼaitsjenle tsa kjoañʼai tsakjaʼá kʼoa tsa kinroajen kon. Axo kuinga kʼoasʼin kisikjaʼaitsjen nga tokoa̱ntsʼe nga i̱ Sonʼnde kʼoéjna kʼoa nga tsín tsjoa sʼe̱le. Axo kuinga mele skoe̱ jókoa̱n tsa ya ngʼajmi kʼoéjna. Majain. Kuinga tsʼantjaiyani kjoafaʼaitsjenle nga je Jeobá xi kʼoasʼin koanmele. Kʼianga jngo chjotale Cristo xi kʼoatsole Jeobá nga ya koai ngʼajmi, kui nganʼiotsjele síchjén kʼianga katabʼantjaiya kjoafaʼaitsjenle kʼoa nga kui kjoachoya katasʼele. w16.01 3:11, 13

Jé Jeobá kisinda ngayeje tsojmi. Jésa xi ngisa nʼio chjine kʼoa xi ngisa nʼio tjínle nganʼio tikʼoajinni toʼyani. Kʼoakitso ñandia je Job nga koanjinle nga Niná koaanle kʼoasʼin tojmeni xi mele. Kitso: “Ndʼaibi ʼbeña nga mali kʼoanʼiai tojmeni. Kʼoa nga tsín jme xi tsín kʼoakoa̱nli kʼoasʼiain” (Job 42:2). Je Jeobá alikui machjénle nga tjín xi koasenkao. Ninga kʼoalani, tsjoáʼndele nga síxákao xi kjaʼaí. Kʼoasʼin bakónile nga tsjoake. Je xi títjon kisinda Niná jé Jesús, je ʼNdíle. Xijekoan, kitsjoaʼnde nga tsakasenkao nga koannda ngayeje tsojmi xi ngikʼa, xi matsen kʼoa xi tsín matsen (Juan 1:1-3, 18). Je Jeobá jngo xá xi nʼio chjíle kitsjoale je Jesús kʼoa bʼéyanajmí nga katasʼejinle xi kjaʼaí (Col. 1:15-17). w16.01 5:1, 2