Noviembre

Ya Biblia kʼoatso nga jejchínga je Abrahán nga kʼien kʼoa nga ñaki tjín jngojngo kon. Tsjoa kisʼe kon nga kui kisikjaʼaitsjen josʼin tsakʼejna. Nga̱ je xi ngisa nʼio tsabechjí kui kjoamiyo xi kisʼele kao Jeobá. Je Biblia kʼoatso kʼianga je Abrahán “kiskoyale je naxinandátsebe xi tjínle xjáoja̱ma̱, jñale xi tijeni Niná tsakʼénda, kʼoa kisinda” (Heb. 11:10). Cha̱niyalai jkui jokji tsjoa sʼe̱le Abrahán nga kʼoéjna ya ʼNdenaxó kʼoa nga ngisa tinʼio miyo koa̱nngánile je Jeobá. Nʼiojin tsjoa koa̱nle nga jesʼe̱jinle kʼianga nʼio nkjín choʼndale Niná tsakinyakao je kjoamakjain xi kisʼele. Kʼoajin tiskoe̱ nga nʼio chjíle jme xi kitsoyanile nga jetítsjoátʼale Niná tsakai je Isaac (Heb. 11:19). Kʼoati sʼe̱jinle nga jokji aon koanle nga títsjoátʼa je Isaac miyón chjota tsakinyakao nga koanjinle jokji aon koanle Jeobá nga kisikasén ʼNdíle i̱ Sonʼnde nga kʼienntjai chjota (Juan 3:16). w16.02 1:15, 16

Kʼianga koakoá nga kixi mangíntʼalee je Jeobá kʼianí tsa jngo ndsʼee xi xá tjínle tsín kixi tíjna jme xi sikaoná. Je Saúl jé Niná kiskoejin nga rey koa̱n tonga totaon tsabe je Jonatán. Alikui koanchoyale anni nga kʼoasikji tsjoake koanni je David. Kʼianga koanmele Jonatán nga tsakasenkao je David, je Saúl nʼio koanjtile kʼoa saʼnda chʼaosʼin kisikʼéjna ngixko̱n chjota. Tonga je Jonatán tojo tsabexkón je nʼaile kʼoa kixi kitʼale je Jeobá kao David, nga̱ jé Niná kiskoejin nga rey sʼin kʼoéjna ya Israel (1 Sam. 20:31-41). Nichxin xi tiyoaa ndʼaibi, je xi chjotajchínga sʼin tjío, bʼénele yaole kʼianga nda fikao ngatsʼi je xi tjío ya jinjtín. Tonga nga kʼoati chjotajée ma tsanda je, tsakui nichxin sakʼoa tsín nda majinle jmeni xi nʼia (1 Sam. 1:13-17). Kʼianga jngo ndsʼee xi xá tjínle tsín kixi tíjna jmeni xi síkaoná, tosi tonda kixi kjuintʼalee je Jeobá. w16.02 3:14, 15

Tjínkʼa xti xi tsín majinle jósʼin tíjna nga bʼaitʼalee yaoná je Jeobá kʼoa nga mangínsʼenngindá. Kʼoatso nga jekitsjoatʼale yaole je Jeobá, tonga nga kje tjíondajin nga koaisʼenngindá. Nga bʼaitʼalee yaoná je Jeobá kui xi tsonile nga jngo kjoabʼetsʼoa bʼejnalee kʼianga kʼoaʼmilee nga je si̱xálee ngantsjai nichxin. Xijema, kʼiaa mangínsʼenngindá ánni nga besíni xi kjaʼaí kʼianga jekabʼaitʼalee yaoná je Jeobá. Nga kjesa ʼmisʼenngindájin tjínnele koa̱njinli jósʼin tsoyanile nga bʼaitʼalee yaoná je Jeobá. Kʼianga bʼaitʼalee yaoná je Jeobá, kui xi ʼmilee nga tojé jesi̱xálee, nga jetsʼe kjoabijnachonná. Kuinga tsín tokjoaská tjenkaoni nga bʼaitʼalee yaoná je Jeobá (Mat. 5:33). Tjínnele si̱tjosoán je énná. Jósʼin koakui nga jetsʼe Niná je kjoabijnachonli. w16.03 1:14, 15

Je pastro Pablo kui yaoná kisingósonkao nga kʼoakitso josʼin koa̱n kʼoainganʼioá ngatsʼiaa xi chjotale Cristo maa kʼianga jtín kuiyoaa kʼoa kjuintjenngilee je Jesús, xi ngʼajko̱ tíjnale je jtín. Kʼoakitso nga ngayeje je yaoná tojngo tíkjao kʼoa síxájtín (Efes. 4:16). Tikʼoasʼinni tsanda ñá, ni sʼa xtiaa, ni jechjotajchíngaa, ni nda tiyoaa kʼoa ni chʼin tjínná, jméni xi sʼiaan nga jtín sʼin kuiyoaa ngantsjai. Je Jesús jé xi chjotajchínga sʼin tjío tsakánele nga koandiaale je jtín kʼoa kui xi mele nga jchaxkoán kʼoa nga kjuintjenngiaa je kjoafaʼaitsjen xi tsjoá (Heb. 13:7, 17). Alikui choa ñʼai ma sakʼoaná nga kʼoanʼia. Tonga tsa si̱jélee je Jeobá nganʼiotsjele kui xi koasenkaoná nga si̱tjosoán. Tsa nangitokon maa kʼoa tsa bʼainganʼiolee je xi chjotajchínga sʼin tjío nga ñatjen nixá, nʼiojin kuinyakoaa je jtín. Tsa kʼoasʼiaan, jtín sʼin kuiyoaa kʼoa ngisaa tsjoacha koaan xíngiaa. w16.03 3:8, 9

Tjínkʼa ndsʼee xi tsín kʼoatsakʼinle nga sʼa ʼndí kjoan nga xále Niná katafitjenngi kʼoa kuinga tsínkui kuenta kisʼinsíni kʼoa tsínkui xále Niná kisikatío títjonni (Mat. 10:24). Je xi chjotajchínga sʼin tíjna koaan sikʼayale nichxin nga simiyo je ndsʼee kʼoa kʼoakuitsole nga machjén nganʼiole ya jinjtín. Kʼoa xijekoa̱n, koaan kjoakaonajmí kʼoa koakole testo xi sikjaʼaitsjenjinle jme xá kitsjoatʼanile yaole je Jeobá (Ecl. 5:4; Is. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Koaan skónangile: “Jméni xi tsakʼinlai Jeobá kʼianga tsakʼaitʼalai yaoli. Jókisʼe kon Niná nga kichanisʼenngindái yaoli (Prov. 27:11). Jókisʼe kon je Na̱i (1 Ped. 5:8)”. Nʼio machjén nga kʼoexkiale bersíkulole Biblia jolani je xi kanikʼaxkiaa. Nʼio koasenkao je ndsʼee kʼoa ska̱jin ni̱ma̱le. wp15 1/4 2:9, 11

Ánni nga tsín tokjoan tsjoá sakʼoasíniná je Jeobá jme xi nijélee kʼianga bʼetsʼoalee. Kʼianga koa̱njinná, je Biblia kʼoatso kʼianga je Jeobá Nʼainá mani kʼoa ñá xtile mañá (Sal. 103:13). Je xi xijchá ma alikui totsjoántsjaile jmeni xi síjé je ʼndíxtile. Kʼoa nga jme xi tsjoále, alikui tokjoan tsjoá sakʼoale. Xi ijngosani, je ʼndíxti sakʼoaa kui síjé tsojmi xi matsjoake nga títjon tonga likui timatsjoakeni nga jemani. Je xi xijchá ma kʼoati be tsa tsín nda sikao je ʼndíxtile jmeni xi tjíosíjé kʼoa tsa kʼoetʼaleje̱ xi kjaʼaí chjota. Kʼiatsa tokjoan tsjoále jmeni xi sijé je ʼndíxtile, je xi xijchá ma choʼnda kjima. Je xijchá be jmeni xi machjénle je ʼndíxtile kʼoa kʼiani nga machjénle. Kʼoakjoánti sʼín je Jeobá. Je Jeobá tsjoakená, be jmeni xi machjénná kʼoa be kʼiani tsjoáná. Kuinga machjénsíni nga chóyakaola tsa jme xi kanijélee (Is. 29:16; 45:9). wp15 1/4 4:6, 7

Jetochoasa nichxin tíjna nga kjoetʼa jmeni xi chon sonʼnde. Kʼoa je Na̱i kui xi mele nga kui kuenta sʼiaan jmeni xi kjimachon kʼoa nga kui kʼoétsaojinkoaa. Kui xi mele nga kʼoasʼin katamakjainná nga nʼiosa tse chale nga kjoaʼaí kjoafetʼa kʼoa tsa maije̱ nga likʼia kjoaʼaí. Tonga alikui kʼoatjín. Tjenyatokon kuiyoaa kʼoa alikui si̱chajiaan nga nichxin fetʼa tiyoaa ndʼaibi (Mat. 16:22, 23; 24:42). Je Na̱i kʼoati kui xi mele nga kʼoasʼin katamakjainná nga tsín tsjoakená je Jeobá kʼoa nga tsínkʼia sichatʼa je jéená. Tonga kʼoati toxokʼoatjín. Je Biblia itso: “Niná tjínle kjoakixi, likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle” (Heb. 6:10). Je Jeobá nʼio bechjí ngayeje jmeni xi nʼia xi tʼatsʼe (1 Cor. 15:58). Je xi tsín tsjoake je Jeobá jéní Na̱i, kʼoa jé xi tsín sichatʼale. Kuinga tsín kʼoaiʼndesínilee je Na̱i nga kao kjoandisole kʼoanachaná. wp15 1/5 1:16-19

Je Abrahán bení nga jesa kisitjoson Niná jmeni xi kitso kʼoa kuinga koankjainnile nga kʼoati sitjoson jmeni xi kitsole. Nga koankjainle Abrahán kuinga kisitjosonni ngantsjai. Tobʼelañá, kisikʼéjna naxinandá Ur kʼoa alijña naxinandá titsakʼejnaʼndeni, nga̱ bení nga nijngojin naxinandá xi kʼoéjnantsjai, nga̱ je chjota xi batéxomale alikui Jeobá síxále (Jos. 24:2). Kʼoa kiskoyale nichxin nga je Jeobá koatexomale ngayeje Sonʼnde. Je Biblia kʼoatso nga je Chjotaxále Niná xi naxinandá ʼmi “xi tjínle xjáoja̱ma̱, jñale xi tijeni Niná tsakʼénda, kʼoa kisinda” (Heb. 11:10). Je Abrahán, Abel, Enoc, Noé kao xi ngikʼa choʼndale Niná koankjainle xi tʼatsʼe kjoafaʼáya. Kʼianga kui kisikjaʼaitsjen nga ya koatio ngantsjai nichxin ya ʼndenaxó ngisaa koantajasa kjoamakjainle (Heb. 11:15, 16). wp15 1/5 3:8, 9

Je Jeobá jé Jesús kisichjén nga tsakakó nganʼiole. Kʼianga tsakʼejna Jesús i̱ Sonʼnde nʼio nkjín kjoaxkón kisʼin. Kʼianga kʼoéxkiaa ya Biblia jmeni xi kisʼin ngisa koa̱ntajasa kjoamakjainná (Mat. 9:35; Luc. 9:11). Kuinga koan kʼoakisʼinni Jesús nga̱ jé Jeobá kitsjoale nganʼio. Je pastro Pablo kʼoakitso nga je “Cristo nganʼiole Niná ní”. Jméni xi bakóyaná je kjoaxkón xi tsakatío Jesús. Je kjoaxkón xi tsakatío Jesús nʼio tse xi tsoyaná (Hech. 2:22). Kui tsoyaná jme xi sʼin Jesús je xi jngo jmi nó koatexoma. Jmeni xi sʼin koasenkao ngatsʼi chjota xi tjío sonʼnde. Kjoaxkón xi kisʼin kʼoati basenkaoná nga ngisa nda ʼyaa jokjoan je Jesús kʼoa jokjoan je Jeobá. wp15 1/6 1:1, 2

Je Jesús bení nga je Jeobá xi kisindaya chjoón jebi. Kuinga ngasin nganda tsakjákaoni kʼoa i̱ kitsosínile: “ʼNdínaa, kui nga koankjainli, kamandani”. Kʼoakitsole nga tsín tijme xi katasíkjáojinni. Je Jesús tsjoake koan je chjota xi chʼin tjínle (Mar. 5:34). Sínʼiojin tokoán kʼianga ʼyaa nga nʼio tsjoake chjota je Jesús kʼoa ngisaa je xi chʼin tjínle. Alikui mangóson kao je Na̱i. Je Na̱i kui xi mele nga kʼoasʼin si̱kjaʼaitsjeen nga tsín jme chjíná kʼoa nga tsín ʼya xi tsjoakená. Je kjoaxkón xi tsakatío Jesús kui bakó nga mandosinle xi tʼatsaan kʼoa kao kjoa xi tjínná. Nʼio bʼé kjoanda nga jngo rey kʼoa jngo naʼmi tíjnaná xi nʼio tsjoakená (Heb. 4:15). Kʼiatsa tsín chʼin tjínná, tsakui nichxin likui koa̱njinná jomale xi jekjoatse chʼin tjíokao. Tonga koaan kʼoasʼiaan jokisʼin Jesús. Ninga tsín chʼin kisʼele Jesús, koanjinle jomale xi chʼin tjínle kʼoa koanmake (1 Ped. 3:8). Kjuintjenngiaa je choa̱le. wp15 1/6 2:11, 12

Tse kjoanda tjínná nga ʼyaa je jaʼaínle Jeobá kʼoa nga kui kichʼá (Hech. 15:14, TNM; Is. 43:10). Ya padrenuestro, je Jesús i kitso: “Kataʼyaxkón jaʼaínli” (Mat. 6:9). Kui xi tsonile nga mená nga katabitjotsje je jaʼaínle Niná. Kuinga nijénilee nga katabasenkaoná nga tsínkui kʼoakuixoán kʼoa nga tsínkui kʼoasʼiaan xi sijndí je jaʼaínle. Alikui koa̱n kʼoasʼiaan jokisʼin kʼa je chjotale Cristo xi tsakatio nga siglo 1, tojo tso testo xi kamaxkia ndʼaibi, nga likuini kʼoakisʼin jmeni xi kitsoya. Je Jeobá ñaki kʼoasjetsje je jaʼaínle kʼianga sikjeson ngatsʼi chjota xi bʼasjengi nga je koatexomale (Ezeq. 38:22, 23). Xijekoa̱n, je chjota ñaki chjotatsje koa̱n. Kʼoa ngatsʼi xi ya koatio ngʼajmi kao i̱ Sonʼnde jé Jeobá kʼoetsʼoale kʼoa skoe̱xkón jaʼaíntsjele. Je Jeobá tsʼee koa̱nyeje “tʼatsʼe ngatsʼi”, xi tsonile, nga je koatexomale ngatsʼi xi tjío ya ngʼajmi kao i̱ Sonʼnde (1 Cor. 15:28). wp15 1/6 4:7, 10

Ya Escrituras Hebreas, kʼianga síkʼaxki̱ je xi nyanele ndso̱ko̱ Jeobá kʼoati kui tsoyanile je yo̱ngo̱ xi kisʼejna ya naxinandá Israel (1 Crón. 28:2; Sal. 132:7). Yo̱ngo̱ jebi nʼio naskánakisʼe ngixko̱n Jeobá nga̱ yaa tsakʼétsʼoale kʼoa yaa tsakʼasjejeya je choʼndale xi tjío i̱ Sonʼnde (Is. 60:13). Jósʼin ʼyaxkoán je Jeobá nichxin xi tiyoaa ndʼaibi. Alikui tijngo yo̱ngo̱ tíjnani jñani ʼyaxkón jokoan nichxin kjoatse. Je Jeobá kui tíjnale ndʼai jngo “yo̱ngo̱ xi tsín matsen”. Jméni xoʼmi. Kuiní josʼin tjínndajinle Jeobá nga miyole katama je chjotasonʼnde kʼoa nga katabʼétsʼoale. Kʼoa kuinga tjínniná kjoanda jebi nga jetsakʼéchjíntjainá je Jesús. Kʼiáni kisʼejna “yo̱ngo̱ xi tsín matsen xi tsʼe Niná”. Kʼianí nga nó 29 kʼianga kisʼenngindá je Jesús kʼoa naʼmi ngʼajko̱ sʼin tsakʼejnale je “yo̱ngo̱ xi tsín matsen xi tsʼe Niná” (Heb. 9:11, 12). wp15 1/7 1:1-3

Nga kjoaʼaí nichxin jebi, je Jesús kʼiaa tsjoále kjoatjao je xi kixi koaitʼale Niná kʼoa kjoañʼai tsjoále je xi tsín kixi koaitʼale Niná (Mat. 24:46, 47, 50, 51; 25:19, 28-30). Jósʼinnile. I kitsosa: “Kʼia nga je ʼndíle chjota kjoaʼaíkao kjoajeyale, kʼoa kao ngatsʼi ánkjele xi tsje kao je, kʼia kʼoéjnason yáxilele kjoajeyale. Koa̱nxkó ngixko̱n nga je ngatsʼi naxinandá, kʼoa sikatío tʼaxin nga jngójngó kʼa, josʼín je xi koʼnda cho̱ síkatío tʼaxin barré, kʼoa tʼaxin tindso. Kʼoa je sikatío barré ngakixile, kʼoa tindso ngʼaskónle” (Mat. 25:31-33). Kui xi tsonile nga sijtsoʼa ngatsʼi je chjota. Kʼianga skoe̱ nga tsín kixi jngo chjota “tindso” sʼin skoe̱kon kʼoa kjoaʼaxinní tokʼia saʼndani. Kʼoa nga skoe̱ nga kixi jngo chjota “barré” sʼin skoe̱kon kʼoa tsjoále kjoabijnachon xi tsínkʼia fetʼa (Mat. 25:46). wp15 1/7 2:11, 12

Toxá tsjoachañá je tsojmi xi chine jñani tsaan, tsa je én xi nokjoaa kʼoa tsakuije̱ kostumbre xi ya tjín. Tonga alikui koa̱n kʼoasʼin si̱kjaʼaitsjeen tsa ngisa nda jme xi tsjoachañá tikʼoajinni xi tsjoake xi ngikʼa. Ánni. Kuinga toxá nkjín koya tsojmi kisindani Jeobá kʼianga kʼoétsaojinkoaa (Sal. 104:24; Apoc. 4:11). Je Jeobá kui xi mele nga katabe toʼyani, nga katabexkón kʼoa nga katabatio tokʼia saʼndani (Juan 3:16; 1 Tim. 2:3, 4). Kuinga machjénsíni nga kuinóʼyá jme xi tso je ndsʼee kʼoa sakʼoa kʼoasʼiaan jotso ninga tsínkjoan kui xi mená ñá. Tsa kʼoasʼiaan ngisaa nda sʼe̱ tokoán kʼoa nyʼán sʼin kuiyokoaa xíngiaa ya jinjtín. Tojosʼin tiʼyaa, tojé Jeobá kao Chjotaxále bʼainganʼiolee, alikui ya nojiaan yaoná kjoa xi tjín sonʼnde. Alikui tsjoachaa je kjoangʼakon xi tjín sonʼndele Na̱i kʼoa alikui ngʼa nʼosjee yaoná. wp15 1/7 3:17, 18

Jósʼin koakolee Jeobá nga tsjoachaa. Jngo koya jokoa̱n sʼiaan kuinga kao kjoatsjoa kʼuínyasoán je énnda chjotse xi tʼatsʼe Chjotaxále (Mat. 24:14; 28:19, 20). Ijngosa koya, kʼianí nga kixi kjuintʼalee kʼianga kjoa tibitjatojiaan nga tíchotʼayakao kjoamakjainná (Sal. 84:11; Sant. 1:2-5). Ninga nʼio tse kjoa kuitjátojiaan, je Jeobá bení kʼoa koasenkaoná nga̱ nʼio tsjoakená (Sal. 56:8). Nga tsjoachaa je Jeobá kui xi basenkaoná nga nikjaʼaitsjenjiaan jmeni xi kisinda. Kʼoati bakolee nga tsjoachaa kʼianga kjitʼa chótʼayá je Biblia. Kʼoa nga ntsjaintsjai kʼoétsʼoalee ngisasa nda koa̱nmiyoaa. Kʼoa xi ijngosani, nga si̱kjaʼaitsjenjiaan jokji chjíle je kjoabʼechjíntjai xi kitsjoa ngisasa koa̱ntsjoachaa je Jeobá (1 Juan 2:1, 2). Tsa kʼoasʼiaan, ñaki sʼe̱jngo tokoán nga tsjoakená je Jeobá, kʼoa ñá sa tsjoacha sa tsjoachaa koaan. wp15 1/8 1:6, 17, 18

Tsakui nichxin kʼoati koa̱nchjénná nga tsejta koaan ya ʼNdenaxó. Tobʼelañá, tsakui nichxin jchaa nga nʼio tsjoa tjíole xíngiaa xi ngikʼa nga jejaʼáyale xínkjín kʼoa tsa miyole. Kʼoa ñá tsakui nichxin chóyala saʼnda nga kjoaʼáyale xíngiaa. Kʼiatsa kʼoakoa̱n, a tsjoa kjoáyaa tokoán kao xíngiaa kʼoa a tsejta koaan (Rom. 12:15). Kʼiatsa tsejta kjimaa ndʼaibi nga tichoyalee saʼnda nga sitjoson Jeobá jmeni xi kitso kʼoati tsejta koaan nichxin xi nroaján. Kʼoati tibiyondalee je ʼNdenaxó kʼianga tsín jobixoán nga sakʼoa síkʼantjaiyajin je naxinandále Niná josʼin majinná tsakai je Biblia. A ñaki nda chotʼayá jmeni xi sʼa tjíotsoya chjotse. A tsejta maa kʼiatsa ñaki tsín majinná ngayeje. Kʼiatsa tsejtaa ndʼaibi, ngisaa choa ñʼai koa̱nná ya ʼNdenaxó nga tsejta koaan kʼianga jmeni xi kuitsoya chjotse je Jeobá (Prov. 4:18; Juan 16:12). wp15 1/8 3:9, 10

Je pastro Pablo kʼoakitsole je chjotale Cristo xi ya tsakatio naxinandá Éfeso kʼiatsa jtín sʼin koatio kʼoa tsa tosi tonda skótʼaya xi tʼatsʼe Jesús, kʼoati koa̱nkjoaan jokjoan je Cristo (Efes. 4:13). Kʼianga kiskile Pablo je jtín xi kisʼejna Éfeso, nʼio nkjín chjotale Cristo xi ya tjío xi jetjínle kjoafaʼaitsjen kʼoa xi jenkjín nó nga tjíokotʼaya. Tonga kʼoati tsakatio xi koanchjénsale nga ngisasa simiyo je Niná. Kʼoati ma jtín xi tjío ndʼaibi. Nkjín mani je ndsʼee xi jenkjín nó tjíosíxále je Jeobá. Tonga kʼoati tjío xi kje tsínjinle kjoafaʼaitsjen. Kʼoati ya maxki̱kao je ndsʼee xi jmi mani fisʼenngindá nga xki̱ nó. Ngatsʼi ndsʼee jebi machjénle nga kʼoenele yaole kʼianga kʼoati katamakjoan jokjoan je chjotale Cristo xi jetjínle kjoafaʼaitsjen. Kʼoa ji, a jetjínli kjoafaʼaitsjen jotjínnele koa̱nkjoan je chjotale Cristo (Col. 2:6, 7). wp15 1/9 1:2, 3

Nda síkaoná nga bʼasje nganʼio je yaoná, xi tsonile, nga ejercicio nʼia. Je ejercicio basenkao yaoná kao kjoafaʼaitsjenná. Kʼianga niská nda síkao je yaoná. Tonga ali tsakuijin xi tsonile nga toʼya chjota xi kao si̱ská. Proverbios 13:20 itso: “Je xi chjotachjine bʼamjekao chjinee koa̱n, tonga je xi chjotachini bájta kjoa ska̱jin”. Kʼiatsa mená nga nda chjoéjiaan josʼin kʼoétsaojiaan, machjénní nga kao Biblia si̱chjineñá kjoafaʼaitsjenná. Jméni xi ngisa nʼio chjíle xi kao ji. A kui nga ʼmi kjoajtín, nga ʼmiyasuin kʼoa nga chotʼayai Biblia. Axo kuinga bʼetsaojin. Je Jesús jngo kjoafaʼaitsjen kitsjoa xi koasenkaoná jokji tse nichxin si̱kʼayalee je kjoasʼetsaojin. Kitso: “Títjon tijnyísjao je kjoatéxomale Niná, kao kjoakixile, kʼoa ngayije kjoa jebi kʼoasʼin kʼoaisonno” (Mat. 6:33). Machjénní nga si̱kjaʼaitsjeen jme xi kitso Jesús ánni nga koa̱nsíniná nda si̱chjén je nichxinná. wp15 1/9 2:13, 15

Kʼianga tsabe Jeobá nga chʼaotjín jmeni xi jeme sʼin je Caín, tsakasenkao. Kʼoakitsole nga tsín yaole katasíjtile kʼoa nga katasíkʼantjaiya yaole. Kʼiatsa kʼoalani kisʼin, je Jeobá kisichikontʼain. Tonga je Caín alikui kisitjoson kʼoa tse kjoañʼai tsakjaʼá (Gén. 4:11-13). Kʼoati tsakʼejna jngo choʼndale Jeobá xi Baruc tsakʼin xi kijtajinle kʼoa xi kisikinroajen kon. Kʼoa je Jeobá kʼoakitsole nga katasíkʼantjaiya kjoafaʼaitsjenle. Je Baruc kisitjoson kʼoa kitjontjaile yaole (Jer. 45:2-5). Je Jeobá bándiaaná kʼoa batekjáyaná nga̱ tsjoakená. Batekjáyaná nga machjénná tonga kʼoati basenkaoná nga ngisa nda sʼiaan (Heb. 12:6). Ya Biblia nʼio nkjín choa̱ faʼaitʼa josʼin tsakasenkao Jeobá je choʼndale nichxin kjoatse nga kisindaya je yaole. wp15 1/9 4:12, 13

Je chjota gabaonita tsabee nga Niná tíbasenkao naxinandá Israel. Jngo chjoón xi kʼoati tsabe nga Jeobá tíbasenkao je naxinandále jéní xi Rahab tsakʼin. Chjoón jebi ali tsa chjota israelitajin koan, tonga kisʼejinle josʼin tsakʼaonsje Jeobá je naxinandále ya Egipto. Kʼianga jao chjota israelita kichokotsenché ya naxinandále Rahab, je Rahab kʼoakitsole nga tsín jao tjínle nga je Jeobá koasenkao kʼianga tjoéle naxinandá. Je Rahab koankjainle nga Jeobá kʼoasjentjai, je kʼoa kao familiale (Jos. 2:9-13; 4:23, 24). Choa̱ jebi kʼoa kao xi kjaʼaísanile xi faʼaitʼa Biblia basenkaoná nga ʼyaa jósʼin basenkao Niná je choʼndale. Kʼoa ndʼaibi kʼoati tiʼyaa nga tíbasenkaoná je Niná. Kao “kjoafaʼaitsjenle” ni̱ma̱ná tiʼyañá, xi tsonile, tiʼyañá jokjoan je Jeobá kʼoa jmeni xi tísʼín (Efes. 1:18). wp15 1/10 1:6, 7, 9

Je Biblia kʼoatso nga je Marta nʼio miyole koanni je Jesús kʼoa tsjoake koan. Tonga ali tsa tojejin xi tsjoake koan kʼoa tsabexkón. Tobʼelañá, kʼoati tsjoake koan je María je xi ijngo ndichja Lázaro. Je Jesús kʼoati nʼio tsjoake koan je na̱le (Juan 19:25-27). Tonga ánni nga tsjoake koansíni je Marta. Kuinga tsjoake koanni nga nʼio kisʼele kjoamakjain kʼoa nga ndʼé koan kʼoa chjoónsíxá koan. Likui jao kisʼele kʼianga Mesías ma je Jesús kʼoa koankjainle jmeni xi kitsoya (Juan 11:21-27). Tonga sakʼoaa kʼoati kisatengi nga̱ kʼoati chjotajée koan. Tobʼelañá, ñandia kʼianga ya ki Jesús ya niʼyale Marta kao María. Tonga je Marta koanjtile nga tsín tsakasenkao je María kʼoa kitsole Jesús: “Señor, a tsí kʼoamali nga je tichja síkʼéjnana nga sixá nga tojngo an. Kʼoatʼinlaiʼni nga katasenkaona” (Luc. 10:38-42). wp15 1/10 3:1, 2

Kʼianga nikjaʼaitsjenjiaan xi tʼatsʼe Jeobá kao Jesús kui xi basenkaoná nga tosi tonda kao kjoatsjoa nixálee je Jeobá. Kʼianga tsjoa tjío tokoán nga nixálee Jeobá, kʼoati tsjoa satíole je ndsʼee kʼoa kao chjota xi ʼmiyalee. Kʼoa nga nikjaʼaitsjenjiaan jmeni xi kisʼin je Jeobá nga kisikasén je ʼNdíle nga kʼienntjainá, yaa ʼyañá nga nʼio tse kjoanda tjínná nga ma nichriantʼalee Niná kʼoa nga miyoná mani (Rom. 3:24). Jngo ndsʼee xi ya Sudáfrica tsʼe xi Mark ʼmi xi jan nó nga ndoyá tsakʼejnaʼya xi totʼatsʼe nga kixi kitʼale Jeobá kʼoatso nga kʼianga nikjaʼaitsjenjiaan kjin fi kjoafaʼaitsjenná. Kʼianga nʼiosa síkjaʼaitsjen ndsʼee jebi, ngisaa tsesa xi be tʼatsʼe Jeobá. Kʼianga tínroajen kon kʼoa tsa jme xi síkjáojin, bʼéxkiaa je Biblia kʼoa xijema síkjaʼaitsjeen jmeni xi kabʼéxkia kʼoa kui xi basenkao nga nyʼán sʼe kon. wp15 1/10 4:15

Kʼianga jme xi sʼiain xi je xtili bʼakaotʼale kʼoatʼinlai ánni nga kʼoasʼianni. Je xti ngisaa sítjoson kʼianga majinle jme xi sʼín je xijchále. Jngo ndsʼee xi ño mani xtile, kʼoatso nga je xti ngisa sínʼiotʼa xijchále nga kʼoatsole ánni kʼoasʼinni tsa jmeni. Kui xi binyakao nga majinle jmeni xi sʼin je xijchále. Tikjaʼaitsjain nga tsín tixtiʼndíni. Jekjimale tjíosíkjaʼaitsjen kʼoa tjíokjoejin jmeni xi mele sʼin. Je ndsʼee xi kanikʼaxkiaa kʼoati tso nga je xti tjínnele koa̱nle sichjén kjoafaʼaitsjenle nga skoéjin jmeni xi sʼin. Takui kjoanangitokon kʼoa kʼoatʼinlai je xtili jotjín tokuin. Tsa kʼoasʼiain, kʼoati sʼin tsanda je. Xi ijngosani, skoee nga ʼyaxkuín kʼoa nga jejochjotajchínga nikoai. wp15 1/11 2:11

Jngo tjíjtsa Sonʼnde miyón mani chjota xi Jeobá síxále. Jósʼín tjínnele jchatokoán. Je Énle Niná kʼoatso nga tjínnele nda si̱koaa ngatsʼi chjota, kʼoa xi ngisa kuenta sʼiaan jé xi ndsʼee mani (Rom. 12:10). Je pastro Pedro kʼoakitso nga ñaki ni̱ma̱ná kjuinroajinni nga tsjoacha koaan je ndsʼee tsa si̱tjosoán jotso je Énle Niná. Kʼoati i̱ kitso: “Nʼio katamatsjoachao xíngio” (1 Ped. 1:22; 4:8). Ñá xi chjotale Cristo maa alikui mangósoán kao je chjota xi kjaʼaí. Ánni. Kuinga tsjoacha kjoaixiaa je ndsʼee. Kʼoati tsjoachaa je Jeobá kʼoa nitjosonñá kjoatéxomale. Kuinga tsjoániná nganʼiotsjele. Kʼoa je nganʼiotsjele Niná kui xi basenkaoná nga jtín sʼin biyoaa kao je ndsʼee xi tjío jngo tjíjtsa Sonʼnde (1 Juan 4:20, 21). wp15 1/11 4:8, 9

Je Jeobá alikui bʼénená tsa jngo én chótʼayá nga jchaa xi tʼatsʼe kao jme xi tjínndajinle (Apoc. 7:9, 10). Ñá xi chjotaa nʼio nkjín én nokjoaa. Tonga je Jeobá alikui kui batéchjoale nga fákaoná, kuinga nʼio nkjín én tífaʼatoyani je énle. Tobʼelañá, ya Biblia tojngo jaosa én xi jesoa Jesús kinchja̱ faʼaitʼa (Mat. 27:46; Mar. 5:41; 7:34; 14:36). Je Jeobá koanmele nga kisʼetʼaxo̱n je énle Jesús kʼoa nga jaʼatoya én griego kʼoa kao xi kjaʼaí én nga koanskanni. Xi ijngosani, je Énle Niná alikui kichangi, nga̱ je Niná xokisʼin nga nkjín copia xi tsʼe Biblia tsakʼasje je chjota judío kʼoa kao chjotale Cristo. Kʼoa copia jebi nʼio nkjín én jaʼatoya nga jekoanni. Kʼianga jekoanni 400 nó nga tsakʼejna je Cristo, jngo chjota relijión xi kʼoakitso nga jmeni xi kitso je Jesús, jejaʼatoya je én xi nokjoa ya Siria, Egipto, India, Persia, Etiopía kao xi kjaʼaísa naxinandá. wp15 1/12 1:10, 11

Nʼio machjén nga chósonnilee kʼiani kuinókjoaa. Tsa kʼiakjoan kuinókjoaa nga machjén ngisaa nda kuichotsjoá. Kʼoa tsa kʼia kuinókjoaa nga tsín tjínnele, tsakui nichxin likui koa̱njinle chjota jmeni xi kuixoán kʼoa tsa maije̱ likui sa̱sénle. Tobʼelañá, kʼianga sá marzo nó 2011, ya Japón nʼio nkjín naxinandá xi jngo cháonnʼio kʼoa jngo tsunami kichone. Tsʼato 15,000 chjota kʼien. Ninga nʼio nkjín testigole Jeobá xi kʼien je familiale kao miyole, tonga kʼoati mele nga kuitsoyale je chjotandaindʼiale xi kjoaba tjíojin jmeni xi tso je Biblia. Kʼianga kui nichxin, je ndsʼee nda kiskosonnile jmeni xi kitso, tosaa likui kui tsakjákaoni xi tʼatsʼe kjoafaʼáya. Ánni. Kuinga je chjota xi ya tjín budistaní kʼoa me likui be jmeni xi tso je Biblia. Je ndsʼee tosaa kui tsakjákaonajmíni ánni nga kui kjoa xi chʼaotjín bitjatojinñá kʼoa kisinʼiojin kon. wp15 1/12 3:7

Machjén nga chósonnilee josʼiaan kʼianga si̱xkiaa. Tsakui nichxin tjínkʼa chjota kʼoa tsa jñani saténa xki xi kʼoakuitsoná jñanile je xki xi koasenkaoná. Tsakui nichxin tokui xi mele nga tse tao̱n kuinje̱le. Tonga alikui koa̱n nga tojme xi chi̱nee tojoni nga nda sʼe̱ tokoán kʼoa tsakuije̱ nga ngisasa tse kuiyoaa. Kʼiatsa chjinee, chósonjinnilee josʼiaan tʼatsʼe je kjoafaʼaitsjen xi bʼainá tʼatsʼe josʼin si̱xkiaa, kʼoa ngisaa tsa je xotítsoná jngo chjota xi tsín be tʼatsʼe xki. Chjónangilee yaoná: “A ñaki ʼbe kjoaixiña nga saje tsakasenkao xi kjaʼaí vitamina jebi, tsojmi jebi kʼoa tsa ndáxka̱ jebi. Ningalani tsakasenkao xi kjaʼaí, a koasenkaona an. A tjínnele nga koatejnatsʼinyasa xi tʼatsʼe jebi kʼoa tsa jngo especialista kjuíkonle” (Deut. 17:6). wp15 1/12 4:14, 15

Je Pablo be nga tsa ʼyachjiá je kjoatsjoacha xi tsakakó je Jesús, kuijin xosikaoná nga tsjoacha koaan kʼoa nga jchaxkoán. Kʼianga nda majinná jmeni xi kisʼin xi tʼatsaan je Jeobá, kʼoajinsʼin kjuinkoaa yaoná josʼin mele Jesús. Jósʼiaan. Tjínnele nga chjénngiaa choa̱le je Jesús (1 Ped. 2:21; 1 Juan 2:6). Kʼianga nitjosonlee je Niná kao Jesús, kʼoasʼin bakoñá nga tsjoachaa. Je Jesús i kitso: “Je xi tjínle kjoatéxomana, xi síkitjoson kui kjoatéxomabi, jébi xi tsjoakena. Je xi tsjoakena nga an, kʼoasʼin Nʼaina tsjoake nga je, kʼoa an tsjoake̱ nga je” (Juan 14:21; 1 Juan 5:3). Chjónangilee yaoná jebi: “Jósʼin jetikjenngile je Jesús. Jmésani xi sʼian nga sindaya yaona”. Nʼio koasenkaoná nga kui chjónangilee yaoná jebi, nga̱ koaanle kui skénʼndóbʼakjáná jmeni xi chon sonʼnde, nga kʼoasʼiaan josʼín je chjota (Rom. 12:2). w16.01 2:7-9

A tsen mali nga ñaki kao kjoatsjoa ʼmiyasuin. A nʼio tsjoachai nga chotʼayajin je Biblia kʼoa nga fasjaiyai “je xi ñʼai tjín xi tsʼe Niná” (1 Cor. 2:10). A tsen mali nga ñaki kjaʼaísʼin tíbasenkaoli je Jeobá kʼianga ʼmiyasuin. A ñaki nʼio meli nga kui kʼoasʼiain jmeni xi mele je Niná. A nʼio tsjoachai je ndsʼai kʼoa a tsen mali nga kui xá kjineli nga kuisenkoai nga ngisa nda katasíxále Jeobá. A tiʼyaní josʼin tíbasenkaoli je Jeobá jokji tse nga jetinixálai. Kʼiatsa jaon kasi ngayeje kjoachjonangi jebi, a kui xi tsonile nga ya ngʼajmi kʼuín. Majain. Nga̱ ngatsʼiñá nga koa̱n kʼoasatío tokoán ninga tsín ya ngʼajmi koanngián. Je Jeobá koaanle sichjén nganʼiotsjele nga tsjoánganʼiole ngatsʼi je choʼndale, ni ya ngʼajmi koai kʼoa ni i̱ Sonʼnde koatio. Kʼiatsa tsín ñaki ʼyai tsa ji kiskoejinli Niná nga ya ngʼajmi kʼuín, kui xi tsonile nga tsín ya kʼuín. w16.01 3:14, 15

Je Jesús nga ya kisixákao Nʼaile nʼio nda kisʼe kon nga̱ nʼio nkjín koya jmeni xi kisʼin kʼoa nga̱ be nga tsjoake koan Niná. Kʼoa ñá, a kʼoati nda sʼe tokoán. Je Jesús kʼoakitso nga tsjoa sʼe tokoán kʼianga tjín xi bʼe kʼoa tsa kʼiaje̱ nga tjín xi bʼainá (Hech. 20:35). Kʼianga tsakʼinyaná je Énle Niná nʼio tsjoa kisatio tokoán. Tonga nga ʼmiyalee xi kjaʼaí je Énle Niná, kʼoati tsjoa satío tokoán. Ánni. Kuinga ʼyaa nga tsjoa satío kon je chjota nga majinle jme xi bakóya je Biblia kʼoa nga bexkon je Niná. Nʼio tsjoa satío tokoán nga ʼyaa nga síkʼantjaiya yaole je chjota, jokjoan kʼoa josʼin fikao yaole. ʼYañá nga je xi miyole Niná ma koaan koatio ngantsjai nichxin (2 Cor. 5:20). Nga ʼmiyasoán je Énle Niná kui xi ngisasa nʼio chjíle kʼoa xi ngisasa tsjoa fáya tokoán. w16.01 5:6, 7