Diciembre

Kʼianga nichxinle je pastro Pedro, nʼio nkjín chjotale Cristo xi kiskale je kjoa xi tsakatíobasenle je Na̱i (Sant. 5:11). Tsakui nichxin tjínkʼa xi batiochjoaná kʼoa fitjenngikená nga Jeobá tinixálee. Kʼoa tsa chjotajchínga sʼin tiyoaa ya jinjtín kʼoa tsa superintendente xi tsʼe circuito maa, tsakui nichxin jetíbijtaná nga nʼio tse xá tjínná. Tsa kʼoakjimaa, koasenkaoná je choa̱le pastro Pablo. Je chjota nʼio kitjenngike Pablo. Xi ijngosani, je Pablo nʼio koanndosinle xi tʼatsʼe ndsʼe̱ (2 Cor. 11:23-29). Alikʼia kisikinroajen kon. Kʼoa jmeni xi kisʼin tsakinyakao je xi ngikʼa nga kʼoati kiskale (2 Cor. 1:6). Tsa ska̱ná je kjoa xi kuitjátojiaan kʼoati kuinyakao je ndsʼee nga kʼoati ska̱le. w16.04 2:11, 14

Je Jesús kʼoakitso nga kʼuínyason jngo tjíjtsa Sonʼnde je énnda chjotse xi tʼatsʼe Chjotaxále Niná kʼianga toje tífikjetʼa nichxin (Mat. 24:14). Nichxin xi tiyoaa ndʼaibi, ñá xi testigole Jeobá maa kʼoasʼin ʼyaná jngo tjíjtsa Sonʼnde nga Énle Niná ʼmiyasoán. Tjínkʼa chjota xi sasénle je én xi ʼmiyasoán kʼoa tjínkʼa xi tsín sasénle. Ninga kʼoalani, tokʼoamale nga kʼoasʼin ʼmiyasoán. Alikui jao tjínná nga toñá xi testigole Jeobá maa xi kʼoatinʼia jmeni xi kitso je Jesús. Nʼio nkjín relijión xi kʼoatso nga kui tjíotsoyason jmeni xi kitso je Jesús. Kʼianga tsoyason tsole yaole, kʼiaa nga tsoya ya yo̱ngo̱, tsa ya telebisión kʼoa tsa ya Internet. Tjínkʼa chjota xi kʼoatso nga tsoyason kʼianga bʼéyanajmíle xi kjaʼaí josʼin tsabeni xi tʼatsʼe Jesús. Kʼoa tjínkʼa xi kʼoatso nga kʼoasʼin tjíosítjoson jokitso je Jesús kʼianga binyakao xi nganʼio machjénle. Tobʼelañá, tsa tokjoatjao síxki je xi chjinexki ma kʼoa tsa tokjoatjao tsoya je xi maestro ma. Tonga a kui xi kitsole Jesús je chjotale nga kʼoasʼin. w16.05 2:1, 2

Je chjotaxá kontra tjíole je Chjotaxále Niná xi kʼia tsakʼétsʼiakaoni nga tsakatéxoma nga nó 1914. Je Chjotaxále Niná jeme kjoaʼaxin ngatsʼi chjotaxá sonʼnde (Sal. 2:2, 7-9). Je Niná kuinga títsjoáʼndeni nga tjín chjotaxá sonʼnde nga katasʼe kjoatéxoma kʼoa nga katasʼe kjoanyʼán. Kʼoa jebi binyakaoná nga ʼmiyasoán Énle Niná (Rom. 13:3, 4). Je Jeobá kʼoatsoná nga kʼoétsʼoantjé je chjotaxá ánni nga tosi tonda tjóʼndesíniná nga jchaxkoán je Jeobá (1 Tim. 2:1, 2). Kʼianga ʼya xi josíkaoná koaan si̱jélee nganʼio je chjotaxá tojo kisʼin je pastro Pablo. Kʼoa ninga kʼoatso je Biblia nga je Na̱i kjinentsja je chjotaxá sonʼnde, alikui kʼoatso tsa je fajin jmeni xi sʼín nga jngó jngó chjota xi ya síxákao chjotaxá (Luc. 4:5, 6). Kuinga tsín koa̱n kʼoakuixónsíñá nga je Na̱i tífajin jme xi tísʼín jngo chjota xi xá tjínle. Je Biblia kʼoatso nga tsín koa̱n chʼaosʼin si̱kʼaxkiaa je xi xá tjínle (Tito 3:1, 2). w16.04 4:5, 6

Jósʼin jchañá jmeni xi sasénle Jeobá. Tsa tsín jngo kjoatéxoma ya Biblia xi kʼoatsokixiná jmeni xi sʼiaan, tjínnele koa̱nchoyaná jmeni xi mele Jeobá nga sʼiaan. Kʼoa kʼianga koa̱nchoyaná tjínnele kuijnatsʼinyaa, kʼoétsʼoalee je Jeobá kʼoa kʼoaiʼndee nga nganʼiotsjele katabándiaaná. Je Jesús koanchoyale ngantsjai jmeni xi mele Jeobá nga sʼin. Tobʼelañá, jao kʼa nga títjon kjoanla tsakʼétsʼoa kʼianga kisinkjínya tsojmi nga kisikjen je chjotankjín (Mat. 14:17-20; 15:34-37). Tonga kʼianga koanbaole kʼoa kʼoakitsole je Na̱i nga nioxtila katasíkʼóya je la̱jao̱, je Jesús alikui kʼoakisʼin (Mat. 4:2-4). Kuinga tsín kʼoakisʼinni nga nʼio nda be je Jeobá kʼoa bení nga tsín sa̱sénle kʼiatsa kʼoasʼin sichjén je nganʼiotsje xi kitsjoale. Je Jesús bení nga je Nʼaile koandiaale kʼoa nga tsjoále xi ski̱ne kʼianga koa̱nchjénle. w16.05 3: 7, 8

Tjín librole Biblia xi jngo kʼoa tsa nkjín chjota kichjile. Kʼianga kʼoéxkiaa je Biblia títjon kjoanla si̱jélee Jeobá nga katabasenkaoná kʼoa katatsjoáná kjoachjine ánni nga koa̱njinsíniná jmeni xi mele kuitsoyaná (Esd. 7:10; Sant. 1:5). Kʼianga kʼoéxkiaa je Biblia koaan chjónangilee yaoná nga jan koya jebi: “Jmé xi tsoyana jebi xi tʼatsʼe Jeobá. Jósʼin koa̱nchjénna jebi. Jósʼin sichjén jebi nga koasenkoa xi kjaʼaí”. Tsa kʼoasʼiaan ngisaa koasenkaoná jmeni xi kʼoéxkiaa. Tobʼelañá, ya Biblia nkjín koya síjé Jeobá jotjínnele koa̱nkjoan je xi chjotajchínga sʼin tjío (1 Tim. 3:2-7). Kʼoa nga tsín chjotajchínga sʼin tiyoaa ngatsʼiaa, tsakui nichxin kʼoasʼin si̱kjaʼaitsjeen nga tsín machjénná testo jebi. Tonga koasenkaoná testo jebi ngatsʼiaa. w16.05 5:7, 8

Kʼianga kinikatíonʼio je chjota judío ya Babilonia, tsabee nga ñaki to xkóson bʼétsʼoale je chjota kʼoa nga ánkjele Na̱i bexkón. Tonga tjínkʼa chjota judío xi kixi koan kʼoa xi tsínkui kʼoakisʼin jmeni xi sʼín je chjota xi ya Babilonia tsʼe. Tobʼelañá, je Daniel kao xi ngi jan miyole kixi koan (Dan. 1:6, 8, 12; 3:16-18). Nga ño xti jebi tojé Jeobá tsabexkón. Ningalani nʼio tse nga ya tsakʼejna je Daniel ya Babilonia, jngo ánkje xi kʼoakitsole nga nʼio chjí bekon Niná (Dan. 10:11, 19). Nichxin kjoatse je chjota xi tii sínda jngo xjoa bʼéjnaya je niʼnde nga ma sínda. Nichxin xi tiyoaa ndʼaibi, ñá xi chjotale Cristo maa ʼyañá nga tjínle ʼnde je Jeobá nga kʼoasikao ngatsʼi naxinandá josʼin mele nga̱ jé batéxomale ngayeje (Jer. 18:6). Kʼoati tjínle ʼnde je Jeobá nga sindayaná nga jngó jngoá. Tonga tsín bʼénená nga si̱kʼantjaiyaa yaoná. Ñá xi kuixónñá tsa kʼoaiʼndee nga sindayaná. w16.06 2:1, 2

Je Na̱i kui xi mele nga kʼoasʼin si̱kjaʼaitsjeen nga kʼia tsjoa sʼe̱ tokoán tsa nʼio nkjín tsojmi sʼe̱ná. Kui síchjén jmeni xi tjín sonʼnde “kao kjoachi̱nga̱ xi tjínle xkoaan” nga nkjínsa tsojmi si̱metokoán (1 Juan 2:15-17; Gén. 3:6; Prov. 27:20). Tokui ʼyaa kʼoa tokui noʼyalee ngantsjai xi kʼoatso nga kuindá tsojmi xi sʼa chjotse. Kʼianga tjín xi tsakindaa, a tokui tsakindañá nga ndasʼin matsen ya tienda kʼoa tsa tjín jña jaʼaitʼa. Tsa kʼoakinʼia tochale skanni tsaʼyaa nga tsínni machjénná. Tsa tosi tonda kʼoasʼiaan, ñʼaijin koa̱nná. Kuijin kʼoechjoaná nga si̱xálee je Jeobá. Tsakui nichxin likui tikoa̱nʼaniná nga chótʼayá je Biblia, nga kuiyondalee je kjoajtínná kʼoa nga kjuian, kʼoa tsínjin titsjoániná nichxin nga kjitʼa kʼuínyasoán. Je Pastro Juan kʼoakitso nga tokjoaʼato jmeni xi tjín sonʼnde. w16.07 1:3, 4

Je chjotale Cristo xi títjon tsakatio, tjín xi chjota judío kitjenni, xi chjota griego kitjenni, xi chjota romano kitjenni kʼoa xi kjaʼaísa naxinandále. Kjaʼaí kjaʼaí kostumbre kisʼele kʼoa kjaʼaí kjaʼaísʼin kisikjaʼaitsjen. Kuinga tjínkʼa xi ñʼai koannile nga kʼoakisʼin jme xi tokʼia tsakʼinyale kʼoa nga ñʼai koannile nga kisikatío jmeni xi sʼín tsakai. Kuinga kʼoakitsosínile je pastro Pablo nga je chjotale Cristo tojngo Niná tjínle, tojéní Jeobá Ninále. Kʼoa jósʼin tiyoaa ñá xi chjotale Cristo maa ndʼaibi. Je profeta Isaías kʼoakitso nga kʼianga toje tífikjetʼa nichxin tojngo sʼin yaole ngatsʼi je chjota xi tjín ngakjijnda naxinandá kʼianga kʼoetsʼoale je Jeobá. Chjota jebi i kuitso: “Jé koakoyaná tʼatsʼe ndiaale, kʼoa yaa kuitsomayaa ndiaale” (Is. 2:2, 3). Nʼio tsjoa maná nga tiʼyaa kʼianga tíbitjoson én jebi. Je ndsʼee xinxin naxinandále, kjaʼaí kjaʼaí én nchja̱ kʼoa kjaʼaí kjaʼaí kostumbre tjínle. Tonga tojngo mañá ngatsʼiaa nga tiʼyaxkoán je Jeobá. w16.06 3:15, 16

Nʼiojin tse kjoanda tsjoále Jeobá je chjotale Cristo xi ya koai ngʼajmi kʼianga jekoatexomakao Cristo (Luc. 22:28-30; Filip. 3:20, 21; 1 Juan 3:2). Je Jeobá kui kjoanda tsjoále nga “Jerusalén chjotse” koa̱n kʼoa nga “chjoónle” Cristo koa̱n (Apoc. 3:12; 17:14; 21:2, 9, 10). Kʼoa yaa sixákao je Cristo nga sixkile “ngatsʼi naxinandá”. Kui xi tsonile nga kuinyakao je chjota nga ndaí koatiole je jée kao kjoabiya kʼoa nga chjotatsje koa̱n (Apoc. 22:1, 2, 17). Jngo koya josʼin koako Niná kjoandale i̱ Sonʼnde kʼiaa nga sikjaʼáyale xi jekʼien (Job 14:13-15; Juan 5:28, 29). ʼYáni xi kjoaʼáyanile. Kjoaʼáyanile je choʼndale Niná xi kʼia kʼien nga kjesa faʼaijin Cristo. Kʼoati kjoaʼáyanile je xi “kjaʼaí barré” ʼmile xi tjíobiya nichxin fetʼa xi tiyoaa ndʼaibi. Koatiokon ijngokʼani kʼoa tosi tonda sixále je Jeobá (Juan 10:16). w16.07 4:13-15

Jméni xi koasenkaoná nga tjenyatokon kuiyoaa kʼoa nga tiyondaa nga kjoaʼaí je kjoaxkónle Jeobá. Jngo jao nichxin tongini nga toje ni̱kʼien je Jesús, kʼoakitsole je chjotale nga tosi tonda katasíjéle Jeobá nga katabinyakao (Luc. 21:36). Kʼianga tjenyatokon kuiyoaa nichxin xi totífikjetʼa kʼoati tjínnele kʼoétsʼoalee ngantsjai je Jeobá (1 Ped. 4:7). Je Jesús i kitsole je chjotale: “Je ʼndíle chjota kjoaʼaí kui ora kʼia nga tsín tjínjinno” (Mat. 24:44). Kuinga machjénsíni nga kuiyondaa ngantsjai. Alikui koa̱n nga kuila koanngíntjenngiaa jmeni xi tjín sonʼnde ninga kʼoatso je Na̱i nga kui xi tsjoa kʼoe tokoán. Tonga ñá ʼyañá nga tsín kʼoatjín. Ya Biblia, je Jeobá kao Jesús kʼoatsoná jmeni xi sʼiaan kʼianga tjenyatokon kuiyoaa. Kuinga kuenta sʼiansíñá jmeni xi tso je Biblia kʼoa josʼin tíbitjoson. Tosi tonda si̱miyoaa je Jeobá kʼoa kui títjon si̱kʼéjnaa je Chjotaxále. Tsa kʼoasʼiaan, tiyondañá nga kjoaʼaí kjoafetʼa (Apoc. 22:20). Tokʼoasʼin nga so̱koná kjoabijnachon. w16.07 2:15-17

Jméni xi koasenkao xi jechixan nga nʼio sʼe̱jna kjoabixanle. Je Biblia itso: “Tosi tonda katakano xíngio kʼoa kao kjoatsjoa tichatʼalao xíngio”. Nga chjotajée ma, je chjoón kao je xʼin sakʼoajin sa̱téngi kʼoa kjoa sʼe̱le. Kʼianga kʼoakoa̱n, tjínnele nga kuenta sʼin jméni xokasíkao nga kjoa kasʼenile ánni nga tsín tikʼoasʼinni nga koa̱nskanni. Kʼoati machjén nga sichatʼale xínkjín kʼoa nga tsjoake koa̱n xínkjín tojo tso ya Biblia, nga̱ je kjoatsjoacha kui xi jtín sʼin síkatíoná (Col. 3:14, TNM). Je xi jechixan, tjínnele tsejta koa̱n, ndʼé koa̱n kʼoa tsínkui kʼoejinkon xi chʼaotjín (1 Cor. 13:4, 5). Tjínnele nga kjitʼanangi kʼoendajin je kjoa xi sʼe̱le nga tikuini nichxin (Efes. 4:26, 27). Kjoanangitokon machjén kʼoa kjoanʼiojin machjén nga “tichatʼanái” kuitsole xínkjín. Kʼianga síjéle kjoanichatʼa xínkjín xi jechixan, kui xi binyakao nga bʼéndajin je kjoa xi sʼele kʼoa ngisaa machriantʼale xínkjín. w16.08 2:6

Je Jesús nʼio tsakʼénele yaole nga kitsoyason je énnda chjotse xi tʼatsʼe Chjotaxále Niná. Tonga kʼoati kisikʼaya nichxin nga kitsoyale je chjotale. Tsakakóyale jósʼin nga ngisa nda kuitsoya kʼoa jósʼin nga ngisa nda sikuinda je choʼndale Niná (Mat. 10:5-7). Je Felipe nʼio kitsjoale kjoandosin nga kitsoyason je Énle Niná. Tonga kʼoati kitsoyale je xtiyánchjínle nga kitsoyason (Hech. 21:8, 9). Nichxin xi tiyoaa ndʼaibi kʼoati tjínnele nga kʼuínyalee xi kjaʼaí. Ánni. Je jtín xi tjío jngo tjíjtsa Sonʼnde nʼio nkjín chjota tjín xi tosʼa choatsele nga tsabe je Énle Niná kʼoa kje fisʼenngindájin. Machjén nga kʼuínyalee. Tjínnele kuinyakoaa nga katamajinle ánni nga ndatjínni nga kʼoexkia kʼoa skótʼaya je Biblia nga toje. Kʼoati tjínnele kʼuínyalee nga katamale josʼin kjoakaoni Énle Niná je chjota kʼoa josʼin kuitsoyale. Je ndsʼee xi tosʼa choatsele nga kisʼenngindá kʼoati machjénle nga kuinyakoaa ánni nga koa̱n siervo ministerial koa̱nni kʼoa nga chjotajchínga sʼin koationi. Ngatsʼiaa koaan kuinyakoaa xi sʼa chjotse. w16.08 4:1, 2

Nga ñatjen nixá kao ndsʼee kui xi basenkaoná nga jtín sʼin biyoaa kʼoa ngisasa mamiyoaa. Kʼoati basenkaoná nga choyalee je kjoanichikontʼain xi jeme kjoaʼaíkao je Chjotaxále Niná. Kʼianga bʼainganʼiolee xi kjaʼaí, binyakaoñá nga chókjoajinle je kjoa xi faʼatojin kʼoa nga sʼele kjoachoya (Is. 35:4). Nga kʼoanʼia, kʼoati tjonganʼioná tsanda ñá kʼoa kui nikjaʼaitsjeen je kjoanda xi sʼe̱ná nichxin xi nroaján. Kʼianga nikjaʼaitsjenjiaan josʼin kisikuinda kʼoa kitsjoanganʼiole Jeobá je choʼndale xi kixi kitʼale nichxin kjoatse, ngisasa mataja kjoamakjainná. Kuinga tsín si̱kʼajennilee tokoán kʼiatsa kjoa kuitjátojiaan kʼoa tsa nʼio si̱kjáojiaan (Sof. 3:16). Tsa si̱jélee nganʼio je Jeobá, likui jao tjínná kʼianga tsjoánganʼioná kʼoa jeme kjoaʼaíkao kjoanichikontʼain je Chjotaxále i̱ Sonʼnde (Sal. 73:23, 24). w16.09 1:16-18

Tsen tjín nichxin jokjoan najño xi bakinle nga chʼakjá. Tobʼelañá, kui xi tsoni jochon ya jñani tsaan kʼoa jme cha̱n xi tiyoaa. Tonga je kjoatéxomale Jeobá alikui bʼantjaiya (Mal. 3:6). Ya jñani nʼio sjeya ngisaa ñʼai ma nga chjoejiaan jokjoan najño xi ndasʼin matsen. Kʼoa je tichjaa kao ndsʼee nʼio chjí be nga tsínkui chʼakjá najño xi sʼeyoyanʼio yaoná kao xi nʼio xjoe kjoan, xi matsenya (Job 31:1). Kʼoa ninga ya tiyoaa jña nandá tjín, tjínnele nga kui chʼa̱kjá je najño xi ndasʼin matsen (Prov. 11:2, 20). Nʼio nkjín chjota xi kui bʼakjá je najño xi tsín nanda bʼéʼma yaole kʼianga ya tjío jñani nandá tjín. Tonga ñá, tjínnele si̱kjaʼaitsjeen nga je Jeobá nʼio tsje kʼoa machjén nga kui chʼa̱kjá je najño xi je kʼoasjengʼa. w16.09 3:11, 12

Je Jesús me tongantsjai kiskonangile je chjotale josʼin síkjaʼaitsjen. Jósʼin koa̱n chjénngilai je Jesús. Kʼianga jme xi tiʼmilai kʼoa tsa jme xi tinʼiao kao ʼndíxtili, chjónangilai jósʼin síkjaʼaitsjen kʼoa tʼaiʼndelai nga kʼoakatatso jotjío kon. Kʼiatsa ñʼai male je ʼndíxtino nga makjainle jmeni xi tso je Biblia, tsejta katamao. Tinyakao jmeni xi jao sʼele. Nʼio ndani nga kjonangi je ʼndíxti, nga̱ kʼoasʼin bakóni nga mele skoe̱sa tsa jmeni. Saʼnda je Jesús kiskonangi nga sʼa ʼndí kji (Luc. 2:46). Nda kataʼyao je ʼndíxtino. Ali tobʼejngojion tokon tsa fitsoyason kʼoa tsa fi je kjoajtín, ali kʼoajinsʼin nikjaʼaitsjaon nga jetjínle kjoamakjain. Chjónangilao yaono: “Jósʼin síkjaʼaitsjen je ʼndíxtina xi tʼatsʼe Jeobá kao tʼatsʼe Biblia”. Tiyotsʼinyao tsa jme xi bʼéchjoale nga kixi fitʼale je Jeobá. Chja̱kaonajmío nga nyaon nyaon xi tʼatsʼe Niná kʼianga tjín xi tinʼiao. Tʼetsʼoantjao je ʼndíxtino kʼianga ya tjíokaono kʼoa nga tojon tiyo. w16.09 5:3-5

Nichxin xi tiyoaa ndʼaibi, nʼio nkjín testigole Jeobá xi tjíotsjoánganʼio nga tíbitjoson je én xi faʼaitʼa ya Apocalipsis 14:6. Testo jebi kʼoatso nga kʼuínyasonle Énle Niná “ngayije ntje̱, kao ngayije én, kao ngayije naxinandá”. Nʼio nkjín testigole Jeobá xi kjaʼaí én tjíokotʼaya. Tobʼelañá, je xi misionero ma kʼoa tsa je ndsʼee xi ya tjíofitsjoánganʼio jñani ngisa machjén xi tsoyason. Kʼoa tjínkʼa ndsʼee xi tosʼa tjíobʼétsʼiakao nga tjíofi kjoajtín ya jtín jñani kjaʼaí én nokjoa xi tiyani naxinandále. Je xi ngisa tjínnele koa̱nndosinná ngatsʼiaa xi choʼndale Niná maa kui je kjoamiyo xi tjínná kao Jeobá kao je kjoamiyo xi tjínle familianá kao Jeobá. Tsakui nichxin sakʼoa nʼio tse xá tjínná kʼoa ñʼai maná nga nda chotʼayá je Biblia. Tonga je ndsʼee xi ya fi je jtín jñani kjaʼaí én nokjoa tjínsa jme xi ñʼai male. Je ndsʼee xi ya tjíotsjoánganʼio ya jtín jñani kjaʼaí én nokjoa, tjínnele nga skótʼaya je én xi tjíojin, tonga kʼoati tjínnele nga skótʼaya jmeni xi ñʼai tjín xi tsoya Énle Niná (1 Cor. 2:10). w16.10 2:1-3

Nichxin xi tiyoaa ndʼaibi, nʼio nkjín ndsʼee xi kao kjoatsjoa tjíosíxále je Jeobá ninga chjota nʼio fitjenngike. Siento mani xi ndoyá tjíoʼya ya naxinandá Eritrea, Singapur kao Corea del Sur. Ánni. Kuinga kaile nga ki̱cha̱ kjoajchán sichjén. Alikui tongatsʼi je testigole Jeobá xi ndoyá nikatíoʼya kʼoa xi totaon ʼya joni je ndsʼee xi jekanikʼaxkiaa. Tonga nʼio nkjín xi kjoañʼai faʼá xi totʼatsʼe nga ma̱ tjío, nga kjoaxkón bichóne kʼoa nga kjoajchán batío chjota ya ʼndele. Kʼoa tjínkʼa je ndsʼee xi kui choa̱le Abrahán, Isaac, Jacob kao Moisés tjíofitjenngi, alikui mele nga nʼio ngʼa kuitjo i̱ Sonʼnde kʼoa alikui kjoanyiná tjíofitjenngi, tosa nʼio nda tjíosíxále je Jeobá. Jméni xi tjíobinyakao je ndsʼee jebi nga kao kjoatsjoa tjíosíxále Jeobá. Kuinga tsjoake je Jeobá kʼoa makjainle nga kuitjoson jmeni xi tongini tso. Be nga je Jeobá tsjoále kjoabijnachon xi tsínkʼia fetʼa ya sonʼnde chjotse je choʼndale xi kixi fitʼale. Nga kʼia alikui tiʼya xi totaon jchani (Sal. 37:5, 9, 29). w16.10 3:15, 16

Kʼianga kitsokjon kʼoa kisikʼajenle kon je profeta Jeremías, je Jeobá kʼoakitsole nga je koasenkao (Jer. 1:6-10). Je Jeobá kʼoati kisinʼio kon je profeta Daniel nga jngo ánkje kisikasén kʼoa nga kʼoakitsole nga nʼio bechjí (Dan. 10:8, 11, 18, 19). Koaan chjénngilee je Jeobá nga kʼoainganʼiolee je ndsʼee, jolani je xi precursor sʼin tjíosíxá kʼoa tsa je ndsʼee xi jejchínga xi tsín tikʼoamanile nga kʼoakji síxále je Jeobá jokisʼin ngasʼa. Nga kjesa faʼaijin i̱ Sonʼnde je Jesús, nʼio nkjín nó nga ya tsakʼejnakao Jeobá. Ninga kʼoalani, je Jeobá bení nga tojo koa̱nchjénle nganʼio je Jesús kʼianga i̱ Sonʼnde kʼoéjna. Kuinga jao kʼa kinchja̱ni je Jeobá tjen ngʼajmi nga i̱ kitso: “Jébi ʼndína xi tsjoake̱, jo nda sʼekoan xi tʼatsʼe” (Mat. 3:17; 17:5). Je Jeobá kʼiaa kʼoakitso nga tosʼa tsakʼétsʼiakao nga kitsoyason je Jesús kʼoa nga toje tochoatse kʼoéjnasa i̱ Sonʼnde. Je Jeobá kʼoati kisinʼio kon je Jesús kʼianga tojeme ni̱kʼien. Nga nʼio tísíkjáojin je Jesús, je Jeobá jngo ánkje kisikasén nga kisinʼiojin kʼoa nga kitsjoanganʼiole (Luc. 22:43). w16.11 1:7, 8

Sakʼoaa ngotjo nijtinilee yaoná. Tobʼelañá, tsakui nichxin chʼao sʼe tokoán kʼoa tsa jti maná kʼianga ʼya xi jotsoná kʼoa tsa josíkaoná xi totʼatsʼe tsa xin tsaan, josʼin tsen yaoná kʼoa jotisoyoaa. Ngisajin chʼao sʼe̱ tokoán kʼiatsa ndsʼee je xi kʼoakuitsoná. Tsa kjuintjenngiaa je kjoafaʼaitsjen xi tsjoáná je Jeobá kʼoa tsa tsín tokjoan si̱jtilee yaoná, tsínjin kjoa jtsaojiaan (Prov. 16:32). Je Biblia kʼoati tso nga tjínnele si̱chatʼalee xíngiaa. Je Jesús kʼoakitso nga tsín sichatʼaná je Jeobá kʼiatsa tsín si̱chatʼalee xíngiaa (Mat. 6:14, 15). A machjénná nga ngisasa tsejta koaan kʼoa nga si̱chatʼalee xíngiaa. Tsa kʼoaiʼndelee yaoná nga koa̱njtiná, tokʼoajinsʼe̱ ngantsjai je tokoán kʼoa tsakui nichxin saʼnda koa̱njtichaa xíngiaa. Kʼoa tsakui nichxin kʼoati sa̱tío kon je ndsʼee ya jinjtín (Lev. 19:17, 18). w16.11 3:4-6

Kʼianga nó 1870 je Charles Taze Russell kao xi kjaʼaísa chjota nʼio nda kiskotʼayajin je Biblia. Nga títjon, je Russell kui xi koanmele nga koa̱nsjaile je relijión xi ñaki kui xi kixi bakóya. Kisingóson jmeni xi tsoya nga jngó jngó relijión xi chjotale Cristo tsole yaole kʼoa kao xi kjaʼaí relijión kao jmeni xi tso je Biblia. Nga kʼoakisʼin, tsabee nga nijngojin relijión xi ñaki ya bʼangini Biblia jmeni xi tsoya. Xijekoan, nkjín chjota xi nyatítjonle relijión tsakjákaonajmí. Je Russell kui xi koanmele tsakai nga koa̱nkjainle chjota jebi jmeni xi tso je Biblia kʼoa nga katatsoyale je chjotale. Tonga je chjota xi nyatítjonle relijión likui kʼoakisʼin. Je chjota xi kiskotʼaya Biblia chan koanjinle nga tsín koa̱n ya sijngokao yaole je chjota xi ya tjíojin relijión ndiso. w16.11 4:14

Tsa ʼyachjiá je kjoandale Niná, kʼoati tsínkui kʼoasʼiaan jmeni xi tsín sasénle (1 Cor. 6:9-11). Tobʼelañá, ali tsa tokuijin xi bʼechjoalee yaoná je kjoachajngi, kʼoati tsínkui bʼetsaojinkoaa xi jndí tíjna. Kʼoa ali tsa to kjoachʼi̱jin xi bʼechjoalee yaoná, kʼoati likui nʼio tse ʼyoá. Tsakui nichxin ñʼai koa̱nná, tonga koaan kʼoéchjoalee yaoná. Kʼoénelee yaoná nga kjuintjenngiaa kjoafaʼaitsjen xi kitsjoa Pablo nga kitso: “Li bʼaiʼndejinlao jéebe nga koatexoma yajin yaono xi biya, nga kʼoasʼin si̱tjosonnilao xi kjoachi̱nga̱le” (Rom. 6:12; 7:18-20). w16.12 1:16, 19-21

Je Jesús kʼoakitso nga je Niná tsjoáná nganʼiotsjele kʼiatsa si̱jélee (Luc. 11:10-13). Je nganʼiotsjele Niná nʼio tjínle nganʼio, basenkaoná nga kʼoamakjoaan jokjoan je Niná (Col. 3:10). Kʼianga sʼená jmeni xi síkʼaxki̱ ya Gálatas ngisaa nda biyoaa kao xíngiaa kʼoa alikui kui kjoa sʼená xi nikjáojiaan. Tjínnele nangitokon koaan nga koa̱n si̱nʼiotʼaa “ntsja Niná xi tjínle nganʼio” kʼoa nga je si̱kʼamiaa “ngayije kjoanikjaojin[ná]” (1 Ped. 5:6, 7). Tsa tjínná kjoanangitokon, je Jeobá sikuindaná. Kʼianga ʼyaa nga tjín jmeni xi koa̱nná kʼoasʼiaan kʼoa tjín xi tsín kʼoakoa̱nná, bakoñá nga tsín toñá tininʼiotʼaa yaoná. Nga kʼoanʼia, likui nʼio nikjáojiaan, nga̱ je Niná ninʼiotʼaa (Miq. 6:8). w16.12 3:7, 12

Tobʼelañá, tsakájinkon je chjota nga Jtsínʼio kjoaʼaíkao je Jeobá. Nga kʼoakisʼin kuijin xi tsakasenkao nga nʼio kisʼejna kjoamakjainle. Tonga ali tsa tokitsoyasonjin, kʼoati ñaki kʼoasʼin kitjenngi jme xi kitsole Jeobá nga tsakʼénda je arca (Heb. 11:7). Tojo kisʼin je Noé, ñá kʼoati kui xále Niná tinʼia (1 Cor. 15:58). Tobʼelañá, tjínkʼa xi ya tsjoánganʼio nga sʼenda je Ndʼia jña chotʼayá kao jña satío kjoajtíntse. Kʼoa tjínkʼa xi ya tsjoánganʼio ya jña tjío sucursal kʼoa tsa yaje̱ jña tjío ndʼia jña faʼatoya Énle Niná. Kʼoa tjínkʼa xi tsjoánganʼio nga satío kjoajtíntse. Tonga je xi ngisa nʼia kuinga ʼmiyasoán, kʼoa kui xi ngisa sítaja kjoamakjainná tʼatsʼe kjoachoya xi tjínná. Kʼoa tosi tonda mataja kjoamakjainná nga ʼmiyasoán, kʼoa kʼoati basenkaoná nga tosi tonda bʼenelee yaoná saʼnda nga tjoéná kjoabijnachon xi tsínkʼia fetʼa (1 Cor. 9:24). w17.01 1:8, 9

Kʼoati tjínnele jchaxkoán jmeni xi sʼín xi kjaʼaí, nga̱ tiʼndele je skoéjin jmeni xi sʼin. Likui tongantsjai nga mangóson jmeni xi chjoejiaan nga jngó jngoá xi chjotale Cristo maa, jolani jmeni xi nʼia kʼoa josʼin mená si̱xálee Niná. Kui tsoyaná nga tsen kichʼá yaoná nga jngó jngoá. Kuinga jchaxkónsíñá xi kjaʼaí, nga̱ tjínle ʼnde nga je skoéjin jmeni xi sʼin, ninga tʼatsʼe kjoa xi tochoa tíjna (1 Cor. 10:32, 33). Jngo kjoatjao xi je Jeobá kitsjoaná nga tjínná kjoandái josʼiaan (2 Cor. 3:17). Chjí ʼyaa je kjoatjao jebi nga̱ kao kui jonʼia bakonilee je Jeobá jokji tsjoachaa. Kui kʼoasʼiaan jmeni xi je Jeobá kʼoasjengʼa kʼoa jchaxkoán jmeni xi sʼin xi kjaʼaí nga̱ tjínle ʼnde nga je skoéjin jmeni xi sʼin. Tsa kʼoasʼiaan, kʼoasʼin koakoñá nga chjí ʼyaa je kjoatjao xi kitsjoaná je Jeobá. w17.01 2:15, 17, 18

ʼNdele nga ngʼakon koaan kʼoa nga chʼa̱sjengʼaa yaoná ngixko̱n chjota, tosa kui katasʼená “ni̱ma̱ndʼé xi tojbi” (1 Ped. 3:3, 4; Jer. 9:23, 24). Jotso je én xi nokjoaa kʼoa jonʼia chan koako josʼin nikjaʼaitsjeen. Tobʼelañá, a kui xi mená nga kʼoasʼin katasíkjaʼaitsjen xi ngikʼa nga nʼio chjíná xi totʼatsʼe je xá xi nʼia, jmeni xi maná kʼoa ʼya chjota xi ʼyaxkoaan. Kʼoa tsa jmeni xi kanʼia xi nʼio chjíle, a kui xi mená nga kʼoasʼin katasíkjaʼaitsjen xi ngikʼa nga toñá kʼoakanʼia ninga tjínni xi kabasenkaoná. Si̱kjaʼaitsjeen jokisʼin je Jesús. Koanjin nga tsakʼasjengʼa yaole nga̱ nʼio chjine koan. Tonga likui kʼoakisʼin. Kjitʼaa kisikʼaxki̱ je Énle Niná. Alikui koanmele nga je kʼoasjengʼa chjota. Kui xi koanmele nga je Jeobá katabʼasjengʼa chjota. w17.01 4:12

Alikui ñʼai tíjna je kjoatéxoma xi tsakʼaile je Adán kao Eva. Kʼoati tsín ñʼai koanle tsakai nga kisitjoson, nga̱ nʼio nkjín koya tsojmi kisʼe xi koan kiskine. Je Na̱i jngo ye̱ kisichjén nga tsakʼanachale je Eva nga tsín tikisitjosonnile je Jeobá (Gén. 3:1-5; Apoc. 12:9). Je Na̱i joxi kʼoakitso nga tsín kixi tíjna nga tsín tsjoáʼndele Niná je xtile nga ski̱ne “tole ngayeje yá xi tjín” ya ʼndenaxó. Joxi ini kitsole: “Ánni nga tsín koa̱n kʼoasʼianño jmeni xi meno”. Xijekoan, i kitsole je Eva: “Likui kuiyáo”. Kʼoakitsole nga tsín tjínnele sitjosonle je Niná. I kitsole: “Je Niná bení kʼianga je nichxin nga kui chi̱nao tjóxʼángi xkon”. Kui xi kitsonile nga kuinga tsakʼéchjoanile Jeobá nga ski̱ne tole yá nga tsín mele nga sʼe̱le kjoankjíntokon. Xijekoan, je Na̱i i kitsole: “Nichxin nga kui chi̱nao [...] koa̱nngósonño kao Niná, nga jchao xi ndatjín kao xi chʼaotjín”. w17.02 1:8, 9

Je Isaías kʼoakitso nga je xi skoéjin Jeobá chjotatítjon koa̱n (Is. 55:4). Kʼoa je Daniel kʼoakitso nga je Mesías xi “Ngʼajko̱” sʼin kʼoéjna (Dan. 9:25). Kʼoa xijekoanni, je Jesús kʼoakitso nga je xi ngʼajko sʼin kʼoéjnale naxinandále Niná (Mat. 23:10). Je chjotale Jesús kao kjoatsjoa kitjenngile kʼoa koankjainle nga Niná kiskoejin Jesús (Juan 6:68, 69). Jméni xi tsakinyakao. Kʼianga kisʼenngindá je Jesús, je Juan kʼoakitso nga tsabe “je Espíritu Santo nga jitjojenni ngʼajmi, joni tsa jngo nise paloma, kisasenjnasonle Jesús” (Mar. 1:10-12). Kʼianga tsakʼejna Jesús i̱ Sonʼnde, kui nganʼiotsjele Niná tsakasenkao nga kitsoya kʼoa nga koanle tsakatío kjoaxkón (Hech. 10:38). Xi ijngosani, je nganʼiotsjele Niná tsakasenkao je Jesús nga tsakakó kjoatsjoacha, kjoatsjoa kʼoa nga nʼio kisʼejna kjoamakjainle (Juan 15:9; Heb. 12:2). Nijngojin chjotatítjon xi kʼoasʼin tsakakó joni Jesús nga tjínle nganʼiotsjele Niná. Alikui jao tjínná nga je Jeobá kiskoejin Jesús. w17.02 3:15, 16

Saʼnda tjen sʼuí Pentecostés nó 33, jé pastro tsakándiaale je jtín xi tsʼe Cristo. Je Biblia kʼoatso nga tsakasenndo Pedro “kao xi tejngo pastro”, kʼoa nʼio nkjín chjota kitsoyale jokjoantjínni xi tʼatsʼe Niná xi kuinyakao nga kuitjontjaile yaole (Hech. 2:14, 15). Kʼoa nʼio nkjín xi chjotale Cristo koan. Kʼoa xijekoan, je chjota jebi kui kitjenngi “josʼin kitsoya pastro” (Hech. 2:42). Jé pastro kisʼenele josʼin koanchjén je tao̱n xi koanxkó ya jinjtín (Hech. 4:34, 35). Xi ijngosani, jé kitsoyale naxinandále Niná kʼoa tsakʼétsʼoantjai. I kitso: “Jinjin tojo kʼoétsʼoa ntsjainíjin, koakoya ntsjainíjin énle Niná” (Hech. 6:4). Je pastro jé kisikasén chjotale Cristo xi jetjínle kjoafaʼaitsjen nga kitsoyason ya ʼnde jñani kjesa ʼmiyasonjin (Hech. 8:14, 15). Nga jeki nichxin, tsakatio kʼa chjotajchínga xi ya ngʼajmi koai xi tsakinyakao pastro kʼianga kisikuinda je jtín. Ngatsʼi chjotale Cristo jebi jé xi cuerpo gobernante koan, xi tsakándiaale ngatsʼi je jtín (Hech. 15:2). w17.02 4:4

Me tongatsʼi chjota nga kui fini jochon je sonʼnde xi kjinentsja je Na̱i. Tjínkʼa je chjota xi nʼio bitjongʼa, kʼoa ñaki jo Niná sʼin ʼyatokon. Je chjota síkʼatone choa̱le josʼin bexkón, ʼndele nga kʼoasʼin skoe̱xkón kʼoa koakole kjoaxkóntokon jotso je Jeobá. Tjínkʼa xi kʼoati kjoan najño bʼakjá kʼoa xi kʼoati sʼín josʼín je chjota xi nʼio ʼyale. Tsakui nichxin je kjenngile je chjota polítiko, je xi nyatítjonle relijión, je chjota xi faʼa ya cine kʼoa tsa jeje̱ xi síská. Ñá xi chjotale Cristo maa, ʼyañá nga tsín ndatjín nga nʼio si̱kʼatoné choa̱le jokji jchaxkoán je chjota. Tojé je Jesús xi nʼio nda choa̱ tsakʼéjnaná xi koa̱n chjénngiaa (1 Ped. 2:21). Si̱kjaʼaitsjeen nga ngatsʼi chjota “tsajngi jée, [kʼoa] likui nda bitjo ngixko̱n Niná” (Rom. 3:23). Kuinga nijngojin chjotasonʼnde xi bakinnile nga kʼoétsʼoalee. Tsa si̱kʼatoné choa̱le josʼin jchaxkoán jngo chjota, likuijin sa̱sénle je Jeobá. w17.03 1:6-8

Jósʼin ʼyañá tsa ñaki kao ngayeje ni̱ma̱ná tinixánilee je Jeobá. Koaan chjónangilee yaoná jebi: “A sitjosonle je Jeobá ninga sakʼoa ñʼai mana. A tijnandaña nga tsjoanganʼioa nga tsje sʼin katabʼejna je jtín”. Tobʼelañá, jósʼiaan kʼiatsa jngo xíngiaa kʼoa tsa jngo miyoná koa̱njngijée kʼoa tsa kuichonsjejin jinjtín nga tsín kʼoakoa̱nnile je jéele. A tsín tije kuinókjoanilee. Jméni xi sʼiaan. Joni tsa Asá, sakʼoajin kʼoasʼe tokoán nga ñaki to kontra tjíoná xi ngikʼa. Tsakui nichxin je xi ñatjen nixá kʼoa tsa je xi ñatjen mangián skuela skoe̱sinná nga testigole Jeobá maa. Kʼoa tsakui nichxin je chjota xi ñatjen nixá skoe̱sinná nga nijékjoaa ya tʼaxáná kʼianga mangián je kjoajtíntsená kʼoa tsakuije̱ nga tsín nkjínsa ora nixásoán tojoni nga nʼio tse tao̱n kuinjená. Tsa kʼoamaa, si̱nʼiotʼaa je Niná tojo kisʼin je Asá, kʼoétsʼoalee je Jeobá (2 Crón. 14:11). Nʼiojin katamaa kʼoa tosi tonda kui xi ndatjín kʼoasʼiaan. Si̱kjaʼaitsjeen nga je Jeobá tsjoánganʼioná josʼin kitsjoanganʼiole je Asá. w17.03 3:6-8

Je Biblia kʼoatso nga títjonkjoanla nda si̱kjaʼaitsjeen jósʼiaan tsakui chjoéjiaan jmeni xi nʼio tjínle kjoandosin, nga tsín xitso xiská kʼoasʼiaan. Tjínnele chʼa̱sjeʼaa nichxin nga nda si̱kjaʼaitsjenjiaan. Tsa kʼoasʼiaan ndasʼin kuichotsjoá (1 Tes. 5:21). Tobʼelañá, je xi ngʼajko̱ tjíole ya yaniʼya, tjínnele sikʼayale nichxin nga koasjai jotso je Biblia kao xo̱n xi Énle Niná yʼangini kʼianga kjesa kjoejinjin jmeni xi sʼin. Kʼoati ndatjín nga kjuinrʼoéle jotso xi ngikʼa ya yaniʼya. Si̱kjaʼaitsjeen nga je Niná kʼoakitsole je Abrahán nga katanrʼoéle jmeni xi títsole je chjoónle (Gén. 21:9-12). Je xi chjotajchínga sʼin tjío tjínnele kʼoasjeʼa nichxin nga skótʼaya. Kʼiatsa jme xi ngisa nda koa̱njinle kʼoa tsa tjínnele sikʼantjaiyajin jmeni xi jetsakʼéndajin, tjínnele kʼoasʼin ninga tjíokʼa xi tsín sa̱sénle. Je xi chjotajchínga sʼin tjío, xi nda kosonnile jmeni xi sʼín kʼoa xi nangitokon ma, tjínnele sikʼantjaiya josʼin síkjaʼaitsjen kʼoa jmeni xi jetsakʼéndajin kʼiatsa machjén nga sikʼantjaiya. Ndatjín nga chjénngiaa ngatsʼiaa je choa̱le. Tsa kʼoasʼiaan, nyʼán sʼin kuiyoaa ya jinjtín kʼoa jtín sʼin kuiyoaa (Hech. 6:1-4). w17.03 2:16