Diciembre

Nichxin kjoatse, je chjota kʼoasʼin tsabeni nga kinchja̱le xínkjín nga tsakjenkao ya niʼyale, nga̱ kui xi koanmele nga nyʼán koatiokao xínkjín kʼoa miyo katafáo (Gén. 18:1-8; Juec. 13:15; Luc. 24:28-30). Kʼoa nichxin xi tiyoaa ndʼaibi, jé ndsʼee xi tjío ya jinjtínná xi ngisa machjén nga kuinókjoalee nga katafikjenkaoná ya niʼyaná, nga̱ jé xi kajinntsjé. Machjén nga nda kjuinkoaa xíngiaa kʼoa katasʼená miyo xi kixi, ánni nga koa̱n kuinyakaosíñá nga kjoaʼaí nichxin nga ngisa ñʼai koa̱nchon. Koaan kuinyakoaa je superintendente xi tsʼe circuito, je ndsʼee xi fi je skuela xi satío jinnaxinandále Niná kʼoa kao xi ya tsjoánganʼio jña sʼenda ndʼia jñani ʼyaxkón je Jeobá. Xi ijngosani, kʼianga kjoaxkón bichóne xíngiaa, machjénle niʼya jña koationi saʼnda nga sʼendaya niʼyale. Alikui koa̱n kʼoasʼin si̱kjaʼaitsjeen nga toje xi koa̱n kʼoasʼin je ndsʼee xi ndakjoan niʼyale kʼoa xi yʼai kjoan niʼyale. Tsakui nichxin nkjín kʼa jekʼoakisʼin. A koaan kʼoaiʼndelee je ndsʼee nga ya katabationi niʼyaná ninga tsín yʼai kjoan kʼoa ninga tsín jme xi nanda tjínná. w18.03 15 párr. 6; 15 párr. 9

Kʼianga nda kʼoéjna ijngokʼani jngo chjota xi kasokójéele kui nganʼiotsjele Niná koasenkao (2 Cor. 4:7). Je kjoanda xi tsjoáná je nganʼiotsjele Niná kuinga koa̱nná chjoéxkoá yaoná, kʼoa yaa mangóson nga tiñá bichakjáyanilee yaoná. Machjén nga kʼoétsʼoaa, nga kʼoéxkiaa je Biblia kʼoa si̱kjaʼaitsjenjiaan jmeni xi kachotʼayá. Tonga jmé xi koa̱n sʼiain kʼiatsa ñʼai mali nga chotʼayai je Biblia kʼoa tsa tsín tsjoachai nga bʼexkiai. Ali nikinroajenjin tokuin. Tsa si̱jélai nganʼio je Jeobá, koasenkaoli nga sa tsjoacha sa tsjoacha koain je Énle (1 Ped. 2:2). Xi títjon, tijélai nga katabasenkaoli nga chʼa̱sjeʼai nichxin nga chótʼayai je Biblia. Xijekoa̱n, kʼoatʼiain jmeni xi kanijélai. Tsakui nichxin ngisa skénndiaali nga tochoa choa kʼoéxkiai. Tsa kʼoasʼiain, tobijbi koa̱ntsjoachai nga kʼoéxkiai kʼoa nga si̱kjaʼaitsjenjin je Énle Niná (1 Tim. 4:15). w18.03 29 párr. 5, 6

Kʼianga kjesa fisʼenngindájin jngo chjota xi Biblia tíkotʼaya, tjínnele koa̱njinle jokjoantjínni xi tʼatsʼe Niná, jmeni xi tjínndajinle kʼoa jmeni xi kisʼin nga koa̱n kuitjo̱ntjé (1 Tim. 2:3-6). Je kjoankjíntokon jebi kui xi koasenkao nga sʼe̱le kjoamakjain kʼoa nga tsín tikui kʼoasʼinni jmeni xi tsín sasénle Niná kʼoa nga sitjoson je kjoafaʼaitsjen xi tsjoá je Biblia (Hech. 3:19). Je Niná alikui sa̱sénle kʼiatsa je tsjoátʼale yaole jngo chjota xi tosi tonda kui kʼoatísʼín xi chʼaotjín (1 Cor. 6:9, 10). Alikui tsa tokui xi machjén nga sitjoson je kjoatéxomale Niná je chjota xi Biblia tíkotʼaya. Kʼoati machjén nga koai kjoajtín, nga kjitʼa kuitsoyason kʼoa kuitsoyale Biblia je chjota (Hech. 1:8). Nga jekʼoatísʼín ngayeje jebi, koaan kʼoetsʼoale je Jeobá kʼianga tsjoátʼale yaole, kʼoa xijekoa̱n, koaan koaisʼenngindá. w18.03 6 párr. 12

Ánni nga je María kiskoejinni Jeobá nga na̱le Jesús koa̱n. Kuinga nʼio kisʼele kjoamakjain. Kʼoasʼin ʼyañá jokitso nga tsakʼasjengʼa Jeobá kʼianga kikonle je Zacarías kao Elisabet, xi xínkjín koanni (Luc. 1:46-49). Jmeni xi kitso je María tsakakóní nga nʼio tsjoake koan je Énle Niná kʼoa nga nʼio nda tsabe jotso je Escrituras Hebreas (Gén. 30:13; 1 Sam. 2:1-10; Mal. 3:12). Kʼoa kʼianga jechixankao José, alikui xínkjín tsakjayokao saʼnda nga jekitsin Jesús. Jebi kui bakó nga ngisa chjí tsabe jmeni xi mele Jeobá tikʼoajinni nga to yaole koaini (Mat. 1:25). Jokji jaʼato nó, je María nʼio kuenta kisʼin ngayeje jmeni xi kitso kʼoa jmeni xi kisʼin je Jesús. Nʼio koanndosinle jmeni xi tongini kitso Niná xi tʼatsʼe Mesías. Nʼio ndatjín nga si̱kjaʼaitsjenjiaan josʼin koa̱n chjénngiaa je choa̱ xi tsakʼéjnaná María kʼoa nga kui títjon si̱kʼéjnaa jmeni xi mele Jeobá. w18.02 21 párr. 11

Jósʼin chjénngilee nga kisitjoson kʼoa nga kisʼele kjoamakjain je Job. Tojme kjoa xi kuitjátojiaan, je Jeobá títjon si̱kʼéjnaa, ñaki je si̱nʼiotʼaa kʼoa ñaki kao ni̱ma̱ná si̱tjosonlee. Kʼoa ngisasa tse xi ʼyaa ñá ndʼaibi tikʼoajinni je Job. Tsee xi ʼyaa tʼatsʼe Na̱i kʼoa jmeni xi sʼín (2 Cor. 2:11). Je libro xi tsʼe Job kui xi kʼoati basenkaoná nga ʼyaa ánni nga tsjoáʼndesíni je Niná nga kjoañʼai bitjatojiaan. Kʼoa jmeni xi tongini kitso je Daniel, tsoyaná nga ñaki tíjna je Chjotaxále Niná kʼoa nga je Jesús xi rey sʼin tíjnale (Dan. 7:13, 14). Kʼoa ʼyañá nga je Chjotaxá jebi jeme kjoaʼaxin je kjoañʼai xi tichjaʼá. Joni je Job, kʼoati machjén nga koakolee kjoamatokon je ndsʼee kʼianga kjoañʼai faʼatojin. Tsakui nichxin tjínkʼa xi tsín kixi tíjna jmeni xi kuitsoná, tojo kisʼin je Job (Ecl. 7:7). Tonga ʼndele nga jokʼuínlee, tosa si̱jinlee yaoná nga kjoa tífaʼatojin. Tsa kʼoasʼiaan, jé Jeobá tichjenngilee, je Nʼainá xi tjínle kjoatsjoacha kao kjoamatokon (Sal. 103:8). w18.02 6 párr. 16; 7 párr. 19, 20

Tjínkʼa chjota xi ngʼakon ma xi totʼatsʼe nga nda matsen yaole, nga nʼio bʼaxki̱, tsa nda síkjane, nga tjínle nganʼio kʼoa tsakuije̱ nga nʼio bexkón je chjota. Je rey David kisʼele ngayeje jebi, tonga nangitokon koan. Tobʼelañá, kʼianga kisikʼien je Goliat, je rey Saúl kʼoakitsole nga koa̱n kuixankao je tsotile. Tonga je David i kitso: “ʼYáni an nga xkaʼndale rey koa̱nña” (1 Sam. 18:18). Ndʼaibi, ñá xi choʼndale Jeobá maa, bʼénele yaoná nga nangitokon katamaa, joni je David. Tokʼoamaná nga ʼyaa nga nangitokon je Jeobá ninga je tíbatéxomale ngʼajmi kao Sonʼnde. Nʼio kuenta nʼia nga i̱ tso je kjoafaʼaitsjen xi tsjoáná je Jeobá: “Kʼoasʼin tikʼantjaiyao yaono, katasʼeno kjoamatakon, kao kjoanda, kao kjoayo̱ma̱ kjiatakon, kao kjoandʼé, kao kjoatsetakon” (Col. 3:12). Kʼoa xi ijngosani, ʼyañá nga je chjota xi bakó kjoatsjoacha “likui bʼasjejeya yaole, likui mangʼakon” (1 Cor. 13:4). Tsa nangitokon koaan, kui xosikao je chjota nga sichriantʼale je Jeobá. w18.01 28 párr. 6, 7

Nichxin xi tiyoaa ndʼaibi, sakʼoaa machjén nganʼio kʼianga jme xá xi sʼe jinnaxinandále Niná (Hech. 4:34, 35; 1 Cor. 16:2). Tobʼelañá, tsakui nichxin kʼoasʼin tísʼendajin nga sʼe̱ndaya kʼoa tsa sʼe̱nda chjotse je Ndʼia jña chotʼayá kʼoa tsa tao̱n machjén nga sʼe̱jna je kjoajtíntse kʼoa tsakuije̱ nga kuinyakoaa je ndsʼee xi kjoaxkón bichóne. Je nganʼio xi bʼé kʼoati binyakao je misionero, je precursor especial, superintendente xi tsʼe circuito, je ndsʼee xi ya síxá ya oficina xi tíjnatítjon kʼoa kao xi tjíosíxá ya sucursal xi tjío jngo tjíjtsa Sonʼnde. Ngatsʼiñá nga koa̱n kʼoainganʼioá je xále Niná nichxin fetʼa xi tiyoaa ndʼaibi. Alikui ʼya xi be jotjín tao̱n bʼé nga jngó jngoá, nga̱ yaa nikatíoyá ya kaxa̱ xi tjío ya Ndʼia jña chotʼayá kʼoa tsa maije̱ ya tjen jw.org nikasénñá. Tsakui nichxin kʼoasʼin nikjaʼaitsjeen nga tsín nʼio tse bʼainganʼioá. Tonga je tao̱n xi kjimachjén nga tíbitjoson je xále Niná, alikui ya tínroani nga tochoa mani xi nʼio tse tsjoá, kuiní nga nʼio nkjín mani xi tsjoá ninga tochoa. w18.01 19 párr. 10, 11

Tjínnele koaisʼenngindá je xi chjotale Cristo ma, kʼoa kui xi machjén nga koa̱n kuitjo̱ntjé (Mat. 28:19, 20, TNM). Kʼianga tsangínsʼenngindá kʼoasʼin tsakakoá nga jetsakʼaitʼalee yaoná je Jeobá, xi tsonile, nga kʼoatsakʼinlee nga tsjoachaa kʼoa nga kui títjon si̱kʼéjnaa jmeni xi mele. Kʼianga yaoná bʼaitʼalee Niná alikuikʼia nga chʼaosʼin bichótsjoá. Nga̱ tsa tsín je Jeobá si̱xálee, jé Na̱i koanentsjaná. Kʼoa je Na̱i, alikui mandosinle nga kuitjo̱ntjé. Tosaa kui xi mele nga tsín tisʼe̱niná je kjoachoya nga koa̱n kuiyoaa ngantsjai nichxin kʼoa nga tsín je Jeobá si̱xálee. Tikjaʼaitsjenlai je kjoanichikontʼain xi tísokóli kʼianga jetsakʼaitʼalai yaoli je Jeobá kʼoa kʼinsʼenngindái. Nga jetsakʼaitʼalai yaoli je Jeobá, ngisaa tjínjngo tokuin nga i̱sí: “Je Jeobá yaa tíjnakaona; alikui tsokjoan. Jmé xi sikaona je chjota” (Sal. 118:6). Tsínsa jmeni xi nʼio chjíle nga je Niná tibʼainganʼiolee kʼoa nga ndasʼin tiyoaa ngixko̱n. w17.12 23, 24 párr. 1-3

Sakʼoajin likui sa̱sénná jmeni xi sʼin kʼoa tsa jme xi kuitso je ndsʼee, kʼoa kʼoajinti sakʼoa likui sa̱sénle jmeni xi sʼiaan tsanda ñá. Tsakui nichxin ñʼai koa̱nná. Tonga je Jeobá kui xi mele nga jtín sʼin si̱xálee kao je ndsʼee. Tsa kʼoasʼiaan, kʼoasʼin koakonilee je Jeobá nga kixi timangíntʼalee. Tojo koan je José, je Jeobá alikui bʼéchjoa nga kjoa faʼatojin je choʼndale. Kʼianga sʼa ti je José, jo choʼnda sʼin tsakaténa je xtindsʼe kʼoa yaa Egipto kinikasén (Gén. 37:28). Nʼiojin aon koanle je Niná nga tsabe nga kjoañʼai tífaʼá je José, jngo chjota xi kixi kʼoa xi miyole koanni. Tonga je Jeobá lijme xi kisʼin, ninga kʼianga je José kui kisʼene nga chjoónle Potifar kisikaojée kʼoa nga ndoyá kichaní. Tonga a tokitsjionkon. Mai. Je Biblia kʼoatso nga “jé Jeobá xokisʼin nga nda kitjo” ngayeje jme xi kisʼin José (Gén. 39:21-23). w18.01 9, 10 párr. 12-14

Jókuixoán kʼiatsa ʼya xi skónanginá jméni xi ngisa nʼio makjainná. Kʼoajin kuixoán nga je Jeobá kisinda ngayeje xi tjín kʼoa nga je títsjoáná kjoabijnachon. Kʼoa nga makjainná tʼatsʼe Jesucristo nga je kʼienntjainá. Kʼoa tsakui nichxin kʼoati kuixoán nga i̱ Sonʼnde kuiyoaa kʼianga jeʼndenaxó koa̱n. Tonga a kʼoabixoán nga sʼe̱ kjoafaʼáya. Ningalani tjínjngo tokoán nga kuitjátojin tjínkoaan je kjoañʼai xi nʼio tse kʼoa nga koa̱n kuiyoaa ngantsjai nichxin i̱ Sonʼnde, ʼyañá nga kui je kjoafaʼáya xi ngisa nʼio makjainná. Kʼiatsa tsínlani jaʼáyale Jesús alikuijin tíbatéxoma kʼoa toxitsjoajin nga kui bakoyaa xi tʼatsʼe Chjotaxále (1 Cor. 15: 12-19). Tjínjngoo tokoán nga jaʼáyanile Jesús (Mar. 12:18; Hech. 4:2, 3; 17:32; 23:6-8). w17.12 8 párr. 1, 2

Je chjota fariseo tokui kini nga tsakajngijée je chjota, alikui kuenta kisʼin jokjoanni tjío je ni̱ma̱le. Kataʼyala jmeni xi koan kʼianga ki je Jesús ya niʼyale Mateo. Je chjota fariseo i kitsole je chjotale Jesús: “Ánni nga kjenkaosíni je Maestrono je xi bʼéña taonbe kao chjotatsʼenbe”. Je Jesús i kitsole: “Chjota xi nda tjío, likui machjénle chjinexki, tojé xi tjíomʼe xi machjénle. Tangíon, tsokʼoa, chótʼayao jo tsoni: Kjoamatakon xi mena, ali jejin kjoatjao xi bʼaitʼanáo, nga̱ tsín chjota xi kixijin jeʼe̱ nchjale, tojé xi chjotajée, nga sikʼantjaiya kjoafaʼaitsjenle” (Mat. 9:9-13). A jé tsakasenkao Jesús chjota xi jée tjínle. Mai. Kui xi koanmele nga kʼoakatamanile je jéele chjota kʼoa kui xi nʼio kinchja̱ni nga kitsoyason (Mat. 4:17). Je Jesús nʼio nda kisijinle yaole kʼoa tsabení nga kʼoakoan kʼanile je jéele chjota kʼoa kao xi tao̱nbasen bʼéña. Je Jesús ali tsa tokuijin xá kini nga kikjen ya niʼyale Mateo kuinga kini nga nkjín mani chjotale xi ya tjío (Mar. 2:15). Je chjota fariseo alikui kʼoasʼin tsabekon je chjota josʼin tsabekon Jesús. w17.11 13 párr. 2; 16 párr. 15

Ngatsʼiñá nga kʼoasʼin nikjaʼaitsjeen nga nʼio tse kjoanichikontʼain tjínná nga i̱ tiyojiaan naxinandále Niná. Kʼianga chotʼayá Énle Niná ya kjoajtínná bʼainganʼiolee xíngiaa kʼoa bakolee kjoanda, jebi basenkaoná nga tsín chajinná je kjoatjao xi tsjoáná Niná. Tonga tsa sakʼoa kjoa sʼená kao ndsʼee kʼoa tsa tsín ndi̱to̱n kʼoéndajiaan, sʼe̱jngijtijin tokoán (1 Ped. 3:8, 9). Jmé xi koa̱n sʼiaan kʼiatsa tjínngijti tokoán nga tsínkui katabʼéchjoaná nga tjoéná kjoanda xi tsjoáná Niná. Pablo i kitsole je jtín xi kisʼejna ya naxinandá Colosas: “Jon nío xi Niná tsakjaʼájinno, xi tsjao, xi Niná tsjoakeno. Kʼoasʼin tikʼantjaiyao yaono, katasʼeno kjoamatakon, kao kjoanda, kao kjoayo̱ma̱ kjiatakon, kao kjoandʼé, kao kjoatsetakon. Tosi tonda katakano xíngio kʼoa kao kjoatsjoa tichatʼalao xíngio kʼiatsa ʼya xi fajétʼale xínkjín. Jokisʼin Jeobá nga kao kjoatsjoa kisichatʼano, kʼoati tʼiaon tsanda jon” (Col. 3:12, 13, TNM). w17.11 26, 27 párr. 7, 8

Kʼianga tokjoataon xi koanle je chjota israelita nga tjín xi kisikʼien, tjínnele ya kitoka ya naxinandá xi tsen kisatio jña fikatio je chjota xi tokjoataon xi koanle nga kʼien kisikʼien. Kʼoa yaa jchxo xo̱ntjoale naxinandá bʼéyanajmíle je chjotajchínga je kjoa xi kisokole, kʼoa je chjotajchínga tjínnele nda kiskoeya. Kʼianga maskanni, nikasén ijngokʼani ya ʼnde jñani kisokole kjoa kʼoa je chjotajchínga xi ya tjío, jé bʼéndajin je kjoale (Núm. 35:24, 25). Kʼiatsa tsaʼyale nga tokjoataon xi koanle, kitjoʼndele nga ki ijngokʼani ya naxinandá xi tsen kisatio. Ánni nga je chjotajchínga tsakʼéyanajmísínile je chjota xi kʼien kisikʼien. Kuinga je kisʼenele nga tsje sʼin katabʼejna je jtín xi kisʼejna ya Israel kʼoa nga je kuinyakao nga katasakóle je kjoamatokonle Jeobá. Je chjota xi kui kotʼayason kʼoatso nga tsa tsín tsakʼéyanajmíle je chjotajchínga, ndi̱to̱njin kinikʼien. Nga̱ tsín tsabechjí josʼin tsakʼéndajin Niná nga koasenkao. Kʼiatsa tsín ki ya naxinandá xi tsen kisatio, je chjota xi kisijndangajaoni koan kisikʼien. w17.11 9 párr. 6, 7

Je Jeobá tojo ánkje tísíchjén ndʼaibi nga tísíkuinda kʼoa nga tíbasenkao je naxinandále (Mal. 3:6; Heb. 1:7). Saʼnda tjen nó 1919, je chjotale Cristo xi ya koai ngʼajmi alikui tije Babilonia xi nʼioje tsakánentsjani. Je naxinandále Niná tosi tonda kjimankjínya ninga chjota tjíofitjenngike (Apoc. 18:4). Nga je ánkjele Jeobá tjíosíkuindaná, alikui koa̱n kuijkoán nga̱ tsín tikoa̱nnile nga je koanentsjaná je relijión ndiso (Sal. 34:7). Ñaki kʼoatjín tokoán nga kao kjoatsjoa si̱xálee Jeobá kao ndsʼee xi tjío jngo tjíjtsa Sonʼnde. Kʼianga jetíjna kjoañʼai xi nʼio tse, jé ánkjele Jeobá kuinyakaoná kʼoa sikjesonní ngatsʼi xi batiochjoale josʼin batéxoma Jeobá (2 Tes. 1:7, 8). Nʼiojin tsjoa sa̱tío tokoán nga kʼia. w17.10 28 párr. 10, 11

Kʼiatsa jngo xíngiaa bichonsjejin ya jinnaxinandále Niná kʼoa tsa je xi tsín timenile nga testigole Jeobá koa̱n. Nʼiojin aon koa̱nná, kʼoajin koa̱nná joni tsa jngo ki̱cha̱ tífaʼatosʼenkjá ya ni̱ma̱ná. Jmé xi koa̱n sʼiaan tsa kʼoakjima. Machjén nga si̱ngalee yaoná nga kʼoasʼiaan xi tʼatsʼe Niná tínroani. Nga tosi tonda taja katasʼejna je kjoamakjainná, tjínnele nyaon nyaon kʼoéxkiaa je Biblia, kuiyondalee je kjoajtínná kʼoa kjuian, kʼuínyasoán kʼoa si̱jélee Niná je nganʼiole nga katachókjoajinná je kjoa xi sʼená (Jud. 21). Tonga jméni xi koa̱n sʼiaan tsa tsínti kao kjoatsjoa tinixánilee Niná nga aon tjín tokoán. Alikui koa̱n si̱kinroajeen tokoán. Si̱kjaʼaitsjenjiaan je xále Jeobá nga̱ kui xi koasenkaoná nga tsín chʼao sʼe̱ tokoán kao kjoafaʼaitsjenná. Kuenta sʼiaan jmeni xi koanle xi kiski Salmo 73. Kʼianga tsín tinda kisʼeni kon, nʼio kisikjáojin. Tonga kʼianga jekui kisikjaʼaitsjen nga ñaki toje Jeobá sixále kui xi tsakasenkao nga kisindaya je kjoafaʼaitsjenle (Sal. 73:16, 17). Kʼiatsa kʼoasʼiaan tsanda ñá kʼoati koasenkaoná. w17.10 16 párr. 17, 18

Kʼianga tsakjákao Na̱i je Eva ya ʼndenaxóle Edén kʼoasʼin koantsen nga ñaki mandosinle josʼin tjío. Tonga je Na̱i, alikuini ñaki kjoatsjoacha xi tsakakóle, nʼio jaonkjaín koan kʼoa ngʼakon koan (Gén. 3:4, 5). Xi ijngo choa̱, tʼatsʼe Ahitofel, kʼoasʼin koantsen nga miyole koan je David, tonga yátsʼin tsakasénle kʼianga tsabe nga ngisa nda kʼoéjna (2 Sam. 15:31). Nichxin xi tiyoaa ndʼaibi, je chjota xi yátsʼi̱n binyále Niná kʼoa xi kjaʼaísa chjota “kjaí ntsjén én xi nchja̱” kʼianga síjaoya je jtín kʼoa kʼianga bʼasjengʼa je ndsʼee xi ngikʼa nga kʼoasʼin katamakjainle nga tsjoake. Tonga nʼioni ngʼakon chjota jebi (Rom. 16:17, 18). Nʼio chʼaotjín kʼiatsa joxi tsjoachaa xíngiaa sʼiaan. Ninga koa̱n chʼa̱nachalee xíngiaa, tonga je Jeobá alikui koa̱n kʼoasi̱koaa. Je Jesús kʼoakitso nga kjoañʼai kʼoaile je xi jaonkjaín (Mat. 24:51). Kuinga chjónanginilee yaoná jebi: “A ñaki kixi je kjoatsjoacha xi bakoa axo tobʼanachaña”. w17.10 8 párr. 6-8

Jé Jeobá xi bʼaiʼndelee nga nchja̱ kʼianga Biblia bʼexkialee je chjota. Ngisaa tse nganʼio tjínle jngo textole Biblia tikʼoajinni tojmeni xi kuixoán (1 Tes. 2:13). Kuinga ndatjínni nga chjónangilee yaoná: “Kʼianga xinyasoan, a kui Biblia sichjén nga bʼexkiale je chjota”. Tonga ali tsa tokuijin xi machjén nga jngo textole Biblia kʼoéxkialee je chjota. Tojo koan kʼianga siglo 1, me ngatsʼi je chjota nga tsín majinle jmeni xi tso je Biblia. Kuinga tsín koa̱n tokʼoéjngosíñá tokoán kʼianga jekabʼexkialee jngo texto. Tjínnele nga kʼuínyalee kʼoa si̱kʼaxki̱ ijngokʼalee je én xi mená nga katasʼejinle, kʼoa nda kʼuínyalee. Tsa kʼoasʼiaan, kuichokajin Énle Niná je kjoafaʼaitsjenle kao ni̱ma̱le je chjota (Luc. 24:32). w17.09 25 párr. 7, 8

Jngo chjotale Cristo tjínnele koakole kjoamatokon je ndsʼe̱ kao chjota xi kjaʼaí (Juan 13:34, 35). Kʼianga bakoá kjoamatokon kui xi tsonile nga “chjaʼakoaa kjoañʼai” xíngiaa kʼoa nga bisenkoaa je xi kjoañʼai tjíofaʼá. Kjoásjailee josʼin kuisenkoaa xíngiaa. Nʼio nkjín ndsʼee xi bakó kjoamatokon kʼianga kjoaxkón sʼe. kʼoa ʼyale nga kʼoasʼín je choʼndale Jeobá (1 Ped. 2:17). Jngo tichjaa xi Japón tsʼe, yaa tíjna tsakai ya ʼnde jña jaʼa cháonnʼio kao tsunami kʼianga nó 2011. Kʼoakitso nga nʼio kitsjoanganʼiole nga nkjín koanni je ndsʼee, xi tiyani tsʼe Japón kʼoa xi xin naxinandále, kichokʼéndaya je niʼya kao Ndʼia jña chotʼayá. Itso je tichjaa: “Ngayeje jebi, tsakakóna nga tsjoakená je Jeobá, nga mandosinná xíngiaa xi testigole Jeobá maa, kʼoa nga nʼio nkjín mani je ndsʼee jngo tjíjtsa Sonʼnde xi tjíobʼétsʼoantjainá”. w17.09 11 párr. 12, 13

Ánni nga machjénsíni nga koa̱nná chjoéxkoá yaoná. Jaola koya kataʼyaa anni. Xi títjon, kuinga je chjota xi male kjoéxkó yaole likui nanda kjoa sʼele. Nda fikao xi kjaʼaí kʼoa alikui yaole síjtile kʼoa tsín nʼio síkjáojin. Xi majaoni, kʼianga nda kuiyoaa ngixko̱n Niná, tjínnele kʼoéchjoalee yaoná nga tsínkui kʼoasʼiaan xi chʼaotjín. Yaa bakóniná jokoan kʼianga tsakajngijée je Adán kao Eva (Gén. 3:6). Tojo koan nga kʼia, nichxin xi tiyoaa ndʼaibi nʼio nkjín chjota xi kjoa batiojin kʼianga tsín male kjoéxkó yaole. Je Jeobá be nga chjotajée maa kʼoa nga ñʼai maná chjoéxkoá yaoná. Tonga mele koasenkaoná nga koa̱nná chjoéxkoá yaoná nga tsínkui kʼoasʼiaan xi chʼaotjín (1 Rey. 8:46-50). w17.09 3, 4 párr. 3, 4

Ngasʼa, je chjotaxá xi ya tsʼe Sudáfrica alikui kitsjoaʼndele je testigole Jeobá xi kjaʼaí kjaʼaísʼin tsen yaole nga tojngo tsakatiojtín. Tonga kʼianga taingo nga 18 sá diciembre nó 2011, nga kisʼejna kjoajtíntse ya Johannesburgo, tsʼato 78,000 koanni je testigole Jeobá xi tsakatiojtín xi kjaʼaí kjaʼaísʼin tsen yaole xi ya tsʼe Sudáfrica kʼoa xi xin ʼnde jaʼaini, ñaki kisʼejnakitse ya ʼnde jñani kisʼejna je kjoajtíntse. Jngo chjota xi síkuinda ʼnde jebi, i kitso: “Nisañandiajinla ʼbe nga nda sʼín je chjota nga nʼio nkjín mani. Ndakjoan najño kichʼakjáo ngatsʼio kʼoa nʼio tsje chonno je ʼnde. Tonga je xi ngisa tokʼoamana, kuinga tsín chʼasjengio xíngio”. Nga kʼoatso kʼa je chjota xi tsín testigole Jeobá ma, kui xi bakó nga tsín ijngo jtín xi mangóson kao je naxinandále Niná (1 Ped. 5:9). Ánni nga tsín mangósonsíñá kao xi kjaʼaí jtín. Kuinga bʼenelee yaoná nga nikatioá jokoankjoaan ngasʼa kʼoa kui xi mená nga kʼoakoa̱nkjoaan josʼin mele Niná, kʼoa xi basenkaoná kui jmeni xi tso je Biblia kao nganʼiotsjele Niná (Col. 3:9). w17.08 17, 18 párr. 2, 3

Tojo tso je Biblia, jé nganʼiotsjele Niná basenkaoná kʼianga tsejta maa. Tsa tsín je Niná koasenkaoná, nʼio ñʼai koa̱nná nga tsejta koaan. Je kjoatsejta jngoo kjoatjao xi tʼatsʼe Niná nroani, kʼoa nga tsejta maa kʼoasʼin bakoñá nga tsjoachaa je Jeobá kʼoa kao xíngiaa. Kʼianga tsínná kjoatsejta, alikui bakolee kjoatsjoacha xíngiaa (1 Cor. 13:4; Gál. 5:22). Je kjoatsejta yaa tíjnajin jotjínnele koa̱nkjoan je chjotale Cristo. Tobʼelañá, kʼianga tsejtaa maa, kui xi tsonile nga kaná kʼoa maná josʼin bitjatojiaan je kjoa xi sʼe kʼoa alikui nikʼajenlee tokoán (Col. 1:11; Sant. 1:3, 4). Nga tsejta maa, kʼoati kui xi tsonile nga tsín nijndañá jmeni xi matʼeen kʼoa nga kixi mangíntʼalee je Niná tojme kjoa xi kuitjátojiaan. Je Biblia kʼoatso nga machjén nga chóyaa. Kʼoa kui jebi xi tsoyaná Santiago 5:7, 8. w17.08 4 párr. 4

Jon xi sʼa xtio, tsakui nichxin kʼoati ʼyao nga tongini bʼendajiaan kʼianga tjín jña mangián. Kʼoatisʼinni, kʼianga sʼa xtiaa tongini bʼendajiaan jmeni xi sʼiaan kʼianga jekoa̱njchíngaa. Tonga kʼianga jme xi bʼendajiaan ñʼai maná. Tikjaʼaitsjain jotso je texto xi kamaxkia ndʼaibi. Je Jeobá kui xi mele nga nda kʼoéndajin jmeni xi sʼiain nichxin xi sʼa nroa (Ecl. 12:1; Mat. 6:20). Mele nga tsjoa sʼe̱ tokuin, kʼoa kui xi bakó nga ma chotsain, noʼyai kʼoa nga ʼyai jochine je tsojmi xi kisinda. Kʼoa tikjaʼaitsjain nga mandosinle xi tʼatsaan kʼoa tsoyaná josʼin si̱jchá yaoná. Je xi bʼasjengi kjoatéxomale itsole: “Kui kichjoejion jmeni xi tsín sasénna”. Kʼoa itsosa: “¡Koeni! Je choʼndana nda satío kon, tonga jon kjoasoa kuiyojion. [...] ¡Koeni! Je choʼndana ñaki sé kʼianga tsjoa tjío je ni̱ma̱le” (Is. 65:12-14). Kʼianga kui chjoéjiaan xi ndatjín, jé Jeobá kuitjongʼa (Prov. 27:11). w17.07 22 párr. 1, 2

Je Niná be jñani tjío nga jngó jngó niño. Kʼoatisʼinni xi kao ñá, je Jeobá be jñani tiyoaa, jotjío tokoán kʼoa jmeni xi machjénná nga jngó jngoá. Je Jeobá nda machoyale je kjoa xi bitjatojiaan nga jngó jngoá kʼoa tjínle nganʼio nga koa̱n koasenkaoná (Sal. 147:5). Sakʼoaa kʼoasatío tokoán nga tsín tichókjoajinniná je kjoa xi bitjatojiaan. Tonga je Niná be jokji tjen bichó nganʼioná kʼoa “faʼaitsjenle nga to chaoñá” (Sal. 103:14). Nga chjotajée maa, sakʼoaa tikui tima jée bijnyiñá. Kʼoa tsakui nichxin aon maniná jmeni xi bixoán, kʼoa nga kui nimetokoán xi chʼaotjín kʼoa tsa kʼia nga maxinkonchá xi kjaʼaí. Kuenta sʼiaan nga je Jeobá nda machoyale je kjoa xi bitjatojiaan (Is. 40:28). Tsakui nichxin jesa tsaʼyaa josʼin kisichjén nganiole Jeobá nga tsakasenkaoná kʼianga kjoa kitjatojiaan (Is. 41:10, 13). w17.07 18, 19 párr. 6-8

Kataʼyala josʼín jngo ndsʼee xi ya Sri Lanka tsʼe, xi xin naxinandá tísíjchá yaole. Ndsʼee jebi kijnale nangi kao niʼya ya ʼndele kʼoa tsjoáʼndee nga ya satíoni kjoajtín kao kjoajtíntse, kʼoa nga ya bationi je ndsʼee xi ñaki to xále Niná sʼín. Ninga nʼio tse tao̱n sʼengile, basenkao je ndsʼee xi ma̱ sʼin tjíosíjchá yaole nga kʼoasʼín. Ya naxinandá jña tsín tjoʼndele ndsʼee nga tsoyason je Énle Niná, tjín ndsʼee xi tsjoáʼnde nga ya niʼyale satíoni kjoajtín. Kʼianga kʼoasʼín, binyakao je ndsʼee xi precursor sʼin tjíosíxá kʼoa kao xi jetsoyason nga tsín renta bʼéchjí jña batiojtín. Jngo tichjaa xi ntsjaintsjai bʼéjna tao̱n nga tsjoánganʼio nga tísakóyason je Énle Niná, kʼoatso nga nʼio tse kjoanda tísokóle nga kʼoasʼin tjotʼa jmeni xi tjínle. Itso: “Kʼianga kʼoasʼin tjotʼa je tsojmi xi tjínna. Ngisaa choa ñʼai mana nga sichatʼale je ndsʼee, nga tsejta ma kʼoa nga sitjosoan je kjoafaʼaitsjen xi bʼaina”. w17.07 9 párr. 9, 10

Ningalani tsín koanjinle ánni nga kjoañʼai tsakjaʼáni je Job, tsakui nichxin kui kisikjaʼaitsjen ánni kitsjoaʼndeni Niná nga kʼoasikji kjoañʼai tsakjaʼá. Nga kui kisikjaʼaitsjen jmeni xi kitsole Jeobá, kui xi tsakasenkao kʼoa xi kitsjoanganʼiole (Sal. 94:19). Nga nikjaʼaitsjenjiaan je kjoa xi jaʼatojin Job, kʼoati basenkaoná kʼoa tsjoánganʼioná. Je libro xi tsʼe Job kui xá kichjini “nga koakoyaná, jméni nga sʼe̱síniná kjoachoya[...] xi totʼatsʼe kjoatsejta kao kjoanijetakon xi tjínle xo̱n Escrituras” (Rom. 15:4). Xi bakóyaná kuinga tsínkui nʼio si̱kjaʼaitsjeen jme kjoa xi bitjatojiaan kʼoa tsín si̱chajiaan nga ngisa tjínle kjoandosin nga kataʼyale nga je Jeobá xi bakinle batéxoma. Tojo kisʼin je Job, jé Jeobá bʼainganʼiolee kʼianga kixi mangíntʼalee ninga kʼia nga nʼio ñʼai tjín kjoa bitjatojiaan. w17.06 24 párr. 9; 25 párr. 13, 14

Je Jesús tsabee nga kʼoati machjénle nga sikjáya je chjotale. Kʼianga jejaʼaini nga kikakóyason, kʼoakitsole je chjotale jotso je texto xi kamaxkia ndʼaibi. Tojo kitso je Jesús, kʼianga bʼetsaojiaan basenkaoná nga nikjáyaa kʼoa nga nda sʼe tokoán. Tonga kʼoati tjínnele si̱kuindalee yaoná nga tsínkui nʼio kʼoailee kjoandosin. Kʼianga siglo 1, nʼio nkjín chjota xi tokui kjoasʼetsaojin kitʼale kʼoa i kitso: “Kuichaa, sʼioaa, nga nyaonli kuiyanía” (1 Cor. 15:32). Nichxin xi tiyoaa ndʼaibi, nʼio nkjín chjota xi kʼoati kui fitʼale. Jméni xi koasenkaoná nga chósonnilee josʼin jchatokoán je kjoasʼetsaojin. Koaan kʼoétʼaxoaan nga jngo xomana jme xále Niná xi nʼia. Kʼoati koa̱n kʼoétʼaxoaan jotjín ora nikʼayalee nga niská, nga chotsenlee telebisión, videojuego kʼoa xi kjaʼaísanile. Kʼianga si̱ngósoán jotjín ora nikʼayalee nga jngó jngó koya jebi, jchañá tsa machjén nga si̱kʼantjaiyajiaan jmeni xi nʼia (Efes. 5:15, 16). w17.05 24 párr. 11-13

Je Jesús kui tsakʼéyanajmí tʼatsʼe jngo chjota xi kjoama̱ sʼín xi perla básjai. Kʼianga jngo perla xi nʼio chjíle kisokole, tsakaténaa ngayeje xi tjínle nga tsakatse. A majinná jokji chjí tsabekon je perla xi tsakatse. Je perla xi nʼio chjíle kui tsoyanile jokjoantjínni xi tʼatsʼe Chjotaxále Niná. Tsa nʼio chjí ʼyaa je Chjotaxále Niná, tojosʼin chjí tsabe perla xi koansjaile je chjota xi kjoama̱ sʼín, alikuijin kui kjuinñá tojmeni xi si̱katioá tojoni nga je Chjotaxále Niná koatexomaná (Mar. 10:28-30). Tobʼelañá, je Zaqueo nyiná koan nga tao̱n kisichéson (Luc. 19:1-9). Tonga kʼianga kinrʼoéle je Jesús nga tínchja̱ni tʼatsʼe Chjotaxále Niná, koanjinle nga nʼio chjíle, kʼoa i kitso: “Koeni Señor, basen tsojmi xi tjínna tsjoale chjotayo̱ma̱”. Kʼoa kʼoakitso nga ño ya tsjoángajaonile jotjín kisichéle chjota. Je Zaqueo alikui ti xkaiʼa koanni. w17.06 10 párr. 3-5

Kʼianga kuinyakao ndsʼee je ʼndíxtile xijchá xi xin naxinandá faʼaini, tjínnele kʼoakuitsole nga katabexkón je xijchále. Jósʼin kuinyakao. Je ndsʼee koaan nda kuinchja̱ni tʼatsʼe xijchále je xti kʼoa kuenta sʼin nga je xijchá kjinele nga kuitsoyale xtile. Kʼoa nga ya tjíokao xti jebi, je ndsʼee tjínnele sikuinda yaole nga tsínkui kʼoasʼin jmeni xi chʼaosʼin skoe̱ je xi ya tjío jinjtín kʼoa tsa xi kjaʼaí chjota (1 Ped. 2:12). Ningalani nganʼio sijé xijchá jebi, tojo je kjinele nga kuitsoyale je ʼndíxtile Énle Niná. Kʼoati tjínnele skoe̱ jósʼin tíbʼainganʼiole je ʼndíxtile. Jon xi xijchá mao, tijélao nganʼio je Jeobá kʼoa tosi tonda tʼenelao yaono jokji tjen kʼoakoa̱nno (2 Crón. 15:7). Kui ngisa kuenta tʼiaon je kjoamiyo xi tjínle ʼndíxtino xi kao Jeobá. Ngasin nganda tʼinyalao nga katabichókajin ni̱ma̱le je Énle Niná. Ñaki kʼoatʼao tokon nga koa̱n choʼndale Jeobá koa̱n je ʼndíxtino. w17.05 14 párr. 19, 20

Si̱kjaʼaitsjenla je choa̱ jebi: Jao chjotatsʼen xi nʼio ai jée tsakáne jngo chjota. Ningalani to énndiso xi kisʼene je chjota jebi, kitsʼaile kjoañʼai kʼoa saʼnda kinikʼieen. Si̱kjaʼaitsjenla jókisatio kon je chjota xi kixi kʼianga la̱jao̱ kinikʼienni chjota jebi kao xtile. Jebi ñaki kʼoakoan. Je xi kʼoakoantʼain jéní choʼndale Jeobá xi Nabot tsakʼin, xi kʼia tsakʼejna nga tsakatéxoma je rey Acab ya naxinandá Israel (1 Rey. 21:11-13; 2 Rey. 9:26). Je rey Acab kui koanmele je nangile Nabot. Kuinga kʼoakitsonile je Nabot nga koatsele je nangi xka̱totseele kʼoa tsa maije̱ xin tsjoángajaonile jñani ngisa nda chon. Tonga je Nabot koankaile. Ánni nga tsín koanjyonile Nabot jmeni xi kitsole je Acab. Kuinga je kjoatéxoma xi kitsjoale Jeobá je chjota israelita kʼoatso nga tsín koa̱n tondiaa sa̱téna je nangi xi bʼaile (Lev. 25:23; Núm. 36:7). Tojosʼin tiʼyaa, je Nabot kisitjosonle je Jeobá. w17.04 21 párr. 1; 22 párr. 4

ʼYáni xi koatiokon kʼianga jeni̱kjeson je chjotatsʼen. Je Jeobá itso: “Tonga je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio”. Kʼoa xijema itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Sal. 37:11, 29). Je “xi ndʼé” ʼmile jéní chjota xi nangitokon xi kjimajinle tʼatsʼe Jeobá kʼoa xi sítjosonle. Kʼoa je “xi kixi” ʼmile jéní xi kʼoasʼín jmeni xi kʼoatso je Jeobá nga ndatjín. Nichxin xi tiyoaa ndʼaibi, ngisaa nʼio nkjín chjota xi chʼao sʼín tikʼoajinni je xi nda sʼín. Tonga kʼianga jeʼndenaxó koa̱n i̱ Sonʼnde tojé koatio je chjotandʼé kao xi kixi. Jé chjota jebi xi ʼndenaxó sikao sonʼnde. w17.04 11 párr. 5, 6

Je “kjoatjaochale Niná” kui xosíkaoná nga binyakoaa je ndsʼee, ngisaa kʼianga kjoañʼai faʼatojin (1 Juan 3:17, 18). Tobʼelañá, kʼianga siglo 1, jngo kjinrá kisʼe kʼoa je chjotale Cristo xi tsakatio ya Judea likui tikisʼenile je tsojmi xi kiskine. Kʼoa je ndsʼee xi xin naxinandále kisikasénle jme xi koanchjénle (Hech. 11:28, 29). Je pastro Pablo kao Pedro kʼoati kitsole je chjotale Cristo nga katabinyakao xínkjín (Rom. 12:13; 1 Ped. 4:9). Kʼiatsa nda chjoeyaa je ndsʼee xi faʼaikonná, ngisaa timachjénngáni nga nda chjoéyaa je ndsʼee xi kjoañʼai tjíofaʼatojin kʼoa tsa chjota tjíofitjenngike xi totʼatsʼe kjoamakjainle. Chriansʼaa nga nʼio nkjín testigole Jeobá xi tjío ya Ucrania, xi kitsjionkon je niʼyale nga kjoajchán kisʼe kʼoa nga chjota kitjenngike. Tjínkʼa xi kinikʼien. Tonga me ngatsʼi nga ya kikationi ya niʼyale je ndsʼee xi tiyani Ucrania tsʼe kʼoa kao xi Rusia tsʼe. Je ndsʼee xi ya tjío nga jao naxinandá jebi, alikui jme kjoasi tsakjayojin kʼoa kʼoasʼin tsakakóni nga tsín i̱ tsjonjin yaole jmeni xi chon sonʼnde. Xi ijngosani, tosi tonda kao kjoatsjoa “kinchjaya je énle Niná” (Juan 15:19; Hech. 8:4). w17.05 4, 5 párr. 6, 7