Septiembre

Kʼianga kʼien je Lázaro, je Jesús koanjinle jokisatio kon je Marta kao María, xi ndichja koanni je Lázaro. “Kiskiʼndá Jesús” kʼianga tsabe jokji kjoaʼaon tjíojin (Juan 11:32-35). Ali tokuijin nga kiskiʼndáni nga tsín tiya kʼoéjnakaoni je Lázaro, nga̱ be nga sikjaʼáyanile. Kuinga kiskiʼndáni nga̱ aon koanle nga kui kjoa tjíojin je Marta kao María, je miyole. Ñá alikui mangósoán kao Jesús nga̱ chjotajée maa. Tonga basenkaoná nga ʼyaa nga koanjinle jokisatio kon je chjota. Kʼoa kuinga tsjoachañá nga tsakakó kjoamatokon. Tsjoánganʼioná nga ʼyaa nga Rey sʼin tíjnale je Chjotaxále Niná kʼoa nga tochoasa chale nga kjoaʼaxin ngayeje kjoañʼai. Nga kʼoati chjota koan nga jaʼai i̱ Sonʼnde, nda majinle je kjoañʼai xi síkjaʼáná je Na̱i nga je tíbatéxoma, kʼoa jé Jesús kjoaʼaxin ngayeje kjoañʼai jebi. Nʼio tsjoa satío tokoán nga Rey sʼin tíjnaná je Jesús, je xi “koa̱nle koa̱nmakená” (Heb. 2:17, 18; 4:15, 16). w19.03 17 párr. 12, 13

Ningalani bʼenelee yaoná nga binyakoaa je chjota nga katabe xi tʼatsʼe Niná, alikuijin jmeni xi nʼia xi ngisa nʼio chjíle (1 Cor. 3:6, 7). Jé Jeobá xosʼín nga síchriantʼale je chjota. Kʼoa kui xi kuitsoni jotjín ni̱ma̱le je chjota tsa mele skótʼaya je Énle Niná kʼoa tsa mai (Mat. 13:4-8). Si̱kjaʼaitsjeen nga tsín tongatsʼi je chjota nga kinrʼoéle je Jesús kʼianga kitsoyason ningalani nʼio nda koanle kitsoya. Kuinga tsín si̱kʼajennilee je tokoán tsa tsín kjuinrʼoé je chjota kʼianga ʼmiyasoán. Ndasʼin kuichomani tsa si̱jinlee yaoná jotjío kon je chjota xi ʼmiyasonlee. Ngisaa tsjoa sa̱tío tokoán, kao kjoatsjoa koakoyalee, kʼoa ngisaa nda kjuinrʼoé Énle Niná je xi tjíonda nga sʼe̱le “kjoabijnachon ngantsjai” (Hech. 13:48). Nga tíjnasa nichxin “nda si̱xá tʼatsʼe ngatsʼi” (Gál. 6:10). Tsa kʼoasʼiaan, tsjoa sa̱tío tokoán nga̱ jé Jeobá, Nʼainá xi tíjna ngʼajmi, chʼa̱sjejeyaa (Mat. 5:16). w19.03 25 párr. 18, 19

Je rey David itso xi kiski: “Je Jeobá nʼio jeya tíjna kʼoa bakinle nga nʼio katabitjongʼa” (Sal. 145:3). Nʼio tsjoake koan je Jeobá kʼoa kui xi tsakasenkao nga tsakʼasjengʼani “ya jinle jtín” (1 Crón. 29:10-13; Sal. 40:5). Chʼasjengʼañá je Jeobá kʼianga bʼé je énná ya jinjtín. Nʼio tsjoa maná kʼianga nkjín xi tsjoá énle ya jinjtín. Tobʼelañá, kʼianga ni̱ma̱le nroajinni nga tsjoá énle jngo tiʼndí. Kʼianga noʼyá nga bʼéyanajmí jngo ndsʼee jmeni xi sʼa kamajinle. Nʼio chjí ʼyatokoán kʼianga tsjoá énle je ndsʼee ninga ñʼai male kʼoa ninga sʼa tjíokotʼaya je én xi nokjoaa (1 Tes. 2:2). Koaan koakoá nga chjí ʼyatokoán kʼianga kʼoakʼuínlee nga nda katsjoá énle kʼoa nga kabasenkaoná jmeni xi katso. Kʼoati chjí ʼyatokoán xi ngikʼa kʼianga bʼé je énná. Kʼoasʼin nga koa̱n kʼoainganʼiongañálee xíngiaa (Rom. 1:11, 12). w19.01 8 párr. 1, 2; 9 párr. 6

Je chjota xi te koanni xi kjiʼndojon yaole ñaki mele koannda. Kinrʼoé xi tʼatsʼe Jesús nga male síndaya tojme chʼinni kʼoa bení nga kʼoati koa̱nle sindaya tsanda je. Kʼianga tsabe nga kjin nroa Jesús, kiskiʼndáxá kʼoa kitso: “Jesús, Maestro, jchamatakonnajin”. Je Jesús kinrʼoéle kʼoa kisindayaa ngatsʼi. Nga te chjota jebi, nʼiojin kitsjoa kjoanda nga kʼoasʼin kisindaya Jesús. Tonga tojngoo xi ñaki kikon ijngokʼale Jesús nga kitsjoale kjoanda. Chjota samaritano jebi tsakʼasjengʼa Niná nga kitsjoa kjoanda (Luc. 17:12-19). Tojo kisʼin je chjota xi kisindaya Jesús nga kitsjoa kjoanda, kʼoati nʼia tsanda ñá kʼianga ʼya xi basenkaoná. Jé Jeobá bʼéjnaná choa̱ nga tjínnele kʼoee kjoanda. Tobʼelañá, nʼio tse kjoanichikontʼain tsjoále je xi kʼoasʼín jmeni xi sasénle (2 Sam. 22:21; Sal. 13:6; Mat. 10:40, 41). Kʼoa je Biblia itsoná: “Chjénngilao Niná, joni tsa ʼndí xi kjaínga tjaocha” (Efes. 5:1). Jngo koya anni nga bʼaiñá kjoanda kuinga mená nga je Jeobá chjénngilee. w19.02 14 párr. 1, 2, 4

Jngo maestro kʼoatsole je tsoti xi skuela tsoʼba nga katafi je sʼuí xi bʼasjele chjota je naxinandále kʼoa tsa tʼatsʼe je religión. Tonga tsoti jebi bení nga likui sasénle Niná sʼuí jebi kʼoa ngasin nganda kʼoatsole je maestrole nga tsín koai. Jngo ti xi títsoyason be nga ya kjoaʼa ya ndʼiale jngo ti xi ñatjen tjíotsoma skuela xi besin je testigole Jeobá, ninga tsokjón tonga síkjanetʼaa je xo̱ntjoa. Jngo xi nʼai ma yaa tíjna jñani síxá kʼoa je xi naile mani kʼoatsole nga kui kʼoakatasʼín jmeni xi tsín kixi tíjna. Alikui fini ninga sicha je xále kʼoa kʼoatsole je naile nga tsín kʼoasʼin nga̱ tjínnele nga kixi koa̱n kʼoa nga sitjoson je kjoatéxoma, nga̱ kui xi mele Niná nga sʼin je xi choʼndale mani (Rom. 13:1-4; Heb. 13:18). Jméni xi tsakakó nga jan ndsʼee jebi. Alikui kitsokjon kʼoa tsín tsakʼéndiso. Tonga xi ngisa tsakakó kuinga kixi koan. Tjíobʼénele yaole nga kixi tjíofitʼale je Jeobá kʼoa nga tjíosítjoson je kjoatéxomale. Kʼoa nga kʼoatjíosʼín nʼiojin tsjoa sʼe kon je Jeobá. Ñá kʼoati mená nga kjoáyatsjoaa kon je Niná. w19.02 2 párr. 1, 2

Je Kjoatéxoma jé tsakinyakao xi tsín ʼya xi kisʼele xi kisitoánntjai, jolani je ʼndíxtijchʼa̱n, je ʼndíyánchjínkʼan kʼoa kao xi xin naxinandále. Ngatsʼi je xi juez koan tjínnele kisitjoson je kjoatéxoma xi tso: “Tjínnele kao kjoatéxomakixi kʼoéndajinlai kjoa je xi xin naxinandále kao je ʼndíxtijchʼa̱n, alikui koa̱n nga kui si̱kʼéjnangi najñole jngo ʼndíchjoónkʼan kʼiatsa tjín xi si̱kinyalai” (Deut. 24:17). Je Jeobá nʼio koanndosinle je xi tsín ʼya xi kisitoánntjai kʼoa kuenta kisijéle je xi totaon tsabe (Éx. 22:22-24). Je Jeobá kui xi mele nga je xi xá tsjoále jinnaxinandále katasíkuinda xi je kjinentsja. Nʼio jtike je xi xínkjín síkaojée kʼoa xi xtiʼndí betaon. Je xi kui jée bajngi kuenta tsjoále je Jeobá, nga̱ kui xi mele nga katamakuinda ngatsʼi je choʼndale, ngisaa je xi tsínle xi sítoánntjai (Lev. 18:6-30). Kʼianga ʼyaa nga bakóná kjoatéxomakixi je Niná, ngisaa matsjoachasaa. Kʼoa nga tsjoacha maa je Niná kʼoa kao kjoatéxomale, bakolee xíngiaa je kjoatsjoacha kao kjoatéxomakixi. w19.02 24, 25 párr. 22-26

Jngola choa̱ kataʼyaa jósʼiaan nga si̱kuindalee yaoná je Na̱i. Je Jeobá kʼoatsoná nga tsín koa̱n kui cho̱bayañá je kjoachajngi kʼoa tojmeni xi jndí tíjna (Efes. 5:3). Jméni xi sʼiaan tsa je xi ñatjen nixá kʼoa xi ñatjen mangián skuela kui kjaoyani je xi jndí tíjna. Kui kjoafaʼaitsjenná koasenkaoná (Rom. 2:15). A kuenta sʼiaan jme xi tso je kjoafaʼaitsjenná kʼoa a kʼoéchjoalee je Na̱i nga tsín katasíkitsón. Tsakui nichxin kʼoati koa̱nmená nga kuinóʼyalee jmeni xi tjíotso kʼoa tsakui chótsenlee je sén xi tjíokotʼa, tonga je xi ngisa ndatjín nga sʼiaan kuinga kjaʼaínile xi cho̱bayañá kʼoa tsa maije̱ tosa tokjuian. Machjén nga nʼiojin koaan nga tsínkui si̱kjaʼaitsjeen kʼoa tsínkui kʼoasʼiaan jmeni xi tsín kixi tíjna, xi sʼín je xi ñatjen nixá kʼoa tsa xi ñatjen mangián skuela. Je Jeobá be jokji bʼenelee yaoná, kʼoa jé tsjoáná nganʼio kao kjoachjine nga chʼa̱sjengiaa je kjoafaʼaitsjen xi kaníbason je Na̱i (2 Crón. 16:9; Is. 40:29; Sant. 1:5). w19.01 17, 18 párr. 12, 13

Je Salomón nyiná koan kʼoa tsee nganʼio kisʼele, tonga koanmele nga tsakʼétsaojin jmeni xi chon sonʼnde (Ecl. 2:1-10). Tsakʼéndaa ndʼia xi naskánakjoan, nʼio naskánakisichon jña tsakʼejna, kʼoakisʼin tojmeni xi koanmele. Tonga alikuini tsjoa kisʼe kon nga kʼoakisʼin. Tojo tso texto xi kamaxkia ndʼaibi, jesoaa kʼoakitso nga toxitsjoani ngayeje. Jósʼin koasenkaoli je choa̱le Salomón. Nkjín chjota xi kʼiani kʼoamale jmeni xi kasʼín kʼianga jekjoa tjíojin. Tonga je Jeobá alikui mele nga kjoa sʼe̱li. Kui xi mele nga kuinóʼyalai kʼoa si̱tjosonlai jmeni xi tsoli. Kʼianga kʼoasʼiain machjén nga sʼe̱li kjoamakjain, kʼoa alikuikʼia kʼoakoa̱nnili jmeni xi sʼiain. Kʼoa je Jeobá alikuikʼia sichajin josʼin tinixálai (Heb. 6:10). Kuinga machjénni nga taja katasʼejna je kjoamakjainli. Kʼoa jchani nga kjoanda tsini ngayeje jmeni xi tsoli je Jeobá (Sal. 32:8). w18.12 22 párr. 14, 15

Jngo chjota xi tjínle kjoamakjain tʼatsʼe Niná, jé sínʼiotʼa kʼoa kʼoasʼin síkjaʼaitsjen joni je. Tsjoáʼndee nga je Niná bándiaale kʼoa sítjosonle (1 Cor. 2:12, 13). Kʼoakisʼin je David. Kʼianga kisele Niná, kʼoakitso nga je títsjoále ngayeje jmeni xi tjínle, kui xi kitsonile nga ndasʼin tsakʼejna ngixko̱n (Sal. 16:5). Nʼio chjí tsabe nga miyole Niná koan kʼoa jé kisinʼiotʼa yaole (Sal. 16:1). Kuinga kʼoakitsoni nga nʼio tsjoa kisʼe kon nga miyole koan je Jeobá (Sal. 16:9, 11). Je xi tokui fitjenngi kjoatsjoa xi tjín sonʼnde kʼoa xi to tao̱n básjai alikui kʼoakji tsjoa satío kon joni je David (1 Tim. 6:9, 10). Tsa taja tíjna je kjoamakjainli kʼoa tsa je Jeobá si̱xálai, nda kuijnai kʼoa tsjoa sʼe̱ tokuin. Jmé xi koa̱n sʼiain nga ngisa sʼe̱li je kjoamakjain. Machjén nga kʼoéxkiai je Biblia, si̱kjaʼaitsjenjin jme xi kisinda Niná kʼoa tikjaʼaitsjenjin jokjoan, jolani nga tsjoakeli (Rom. 1:20). w18.12 25 párr. 7, 8

Ánni nga kʼoakitsoni je Pablo. Kuinga tjínnele chjí skoe̱kon kjoabixan je chjotatjenngile Cristo. Kʼoa ñá, a kʼoasʼin ʼyatokoán je kjoabixan. Tsa chjí ʼyaa kʼoa tsa ʼyaxkoán je kjoabixan, kui je choa̱le Cristo timangíntjenngiaa. Kʼianga kiskonangile Jesús je chjota fariseo xi tʼatsʼe nga tsjion xínkjín je chjota, je Jesús kui kʼoakitso jmeni xi kitsole Jeobá je Adán kao Eva, nga kitso: “Je xʼin sikatío nʼaile na̱le, kʼoa chjoónle kʼoéjnakao. Je xi jao koanni nga chjoón nga xʼin, tomajngoni yaole”. Kʼoa i kitsosa: “Je xi Niná tsakʼékjao, ali bʼasjexinjin chjota” (Mar. 10:2-12; Gén. 2:24). Je Jesús koanjinle nga je Niná tsakʼéndajin xi tʼatsʼe kjoabixan kʼoa kʼoakitso nga tjínnele koatiokaontsjai xínkjín. Je Jeobá alikui kʼoakitsole je Adán kao Eva nga koa̱n tsjión xínkjín, tosaa kui xi kitsole nga katabatiokao xínkjín ngantsjai. w18.12 10, 11 párr. 2-4

Kʼianga tosʼa ʼyaa xi tʼatsʼe Niná majinná nga nʼio chjíle nga ni̱tjosoán je kjoatéxomale. Tonga kʼianga jengisa machriantʼalee je Jeobá, majinná josʼin síkjaʼaitsjen, jmeni xi tsjoake kʼoa jmeni xi mai. Kʼianga bʼaiʼndee nga je Jeobá bándiaaná kʼianga jmeni xi nʼia kʼoa jmeni xi chjoejiaan, kʼoasʼin bakoñá nga kʼoatisʼin nikjaʼaitsjeen joni je. Ningalani nʼio tsjoa satío tokoán kʼianga majinná josʼin síkjaʼaitsjen je Jeobá, sakʼoaa ñʼai maná nga̱ chjotajée maa. Tsakui nichxin ñʼai maná nga majinná josʼin síkjaʼaitsjen je Niná tʼatsʼe kjoachajngi, tʼatsʼe tsojmi xi tjín sonʼnde, tʼatsʼe nga ʼmiyasoán kʼoa kao tʼatsʼe je njín. Chótʼayá je Biblia ánni nga jchasíñá josʼin síkjaʼaitsjen je Niná, si̱kjaʼaitsjenjiaan jmeni xi chotʼayá kʼoa kʼoasʼin si̱kjaʼaitsjeen joni je Jeobá. w18.11 23, 24 párr. 2-4

Nichxin nga tsakʼejna je Habacuc nʼio ñʼai koanchon. Nʼio ba kisʼe kon nga nʼio tsʼen koan je chjota. To kjoatsʼen tsabe ngakjijnda kʼoa tijéni chjota israelita xi nʼio chʼao kisʼin. Kuinga i̱ kitsoni je Habacuc: “Kʼiáni kjoetʼa je kjoatsʼen. Ánni nga tsín jme xi tísʼínni je Jeobá”. Joxi tojé tíjna koanle. Kuinga je Jeobá kisijénile nganʼio nga katabasenkao. Tsakui nichxin kʼoasʼin kisikjaʼaitsjen nga tsín koanndosinle je Jeobá jmeni xi kjima kʼoa nga nʼio tísíkʼachxin. A sakʼoaa kʼoasʼe tokoán jokisʼe kon je Habacuc. Ninga tsín koanjinle ánni nga tsín jme xi kisʼinni je Niná kʼoa ánni nga kitsjoaʼndeni nga kjoañʼai tsakjaʼá, je Habacuc tojo jé Jeobá kisinʼiotʼa nga̱ tsakʼéyanajmíle je kjoa xi kisʼele kʼoa kao jmeni xi koankjáojinle. Jebi kui bakó nga tsínkui kisikinjele je kjoanikjáojin. w18.11 14 párr. 4, 5

Je Pedro kao Andrés, jti̱ tsakʼasjengindá. Tonga nga kʼoakitsole je Jesús nga chjotatjenngile katama, kisikatío xá jebi (Mat. 4:18-20). Tonga alikui xi tsonile nga tjínnele sikatío je xále ngatsʼi xi Énle Niná kotʼaya. Nga̱ tjínnele koa̱njngíʼa yaole kʼoa kao familiale (1 Tim. 5:8). Tonga kʼianga jebe je Énle Niná alikui tikui nʼio tsjoánile kjoandosin jmeni xi tjín sonʼnde. Kataʼyala je choa̱le María. Nʼio tsjoake koan nga kisiská, kʼoa kui xi koanmele nga nʼio ngʼa kuicho kʼoa nga tse tao̱n kuinje̱le. Tonga kʼianga kiskotʼaya je Biblia nʼio tsjoake koan jmeni xi koanjinle kʼoa josʼin tsakasenkao. Je María koanjinle nga nʼio ñʼai koa̱nle tsa kʼoakji kuenta sʼin xi tʼatsʼe Niná kʼoa tsa kʼoakji koasjai je tsojmi xi tjín sonʼnde (Mat. 6:24). Kuinga tsín tikisiskáni. Kʼoa ndʼaibi, precursora sʼin tísíxá kʼoa kʼoatso nga nʼio tsjoa tjín kon. w18.11 5, 6 párr. 9, 10

Kʼianga 30 nóle Jesús alikuiti xá chjineyá kisʼinni, tokui xá kisʼin nga kitsoyason tʼatsʼe je Chjotaxále Niná. Koanjinle nga nʼio chjíle nga kui xá sʼin, nga̱ kʼoakitso nga kʼoati kui xá kisikasénni Niná i̱ Sonʼnde (Mat. 20:28; Luc. 3:23; 4:43). Je Jesús tokui xá kisʼin nga kitsoyason, kʼoa kui xi koanmele nga kʼoati sʼiaan tsanda ñá (Mat. 9:35-38). Alikui to ngatsʼiaa nga maná xá chjineyá, tonga ngatsʼiñá nga maná ʼmiyasoán je Énle Niná. Je xá jebi nʼio chjíle, nga̱ saʼnda je Niná kʼoati kui xá sʼín. Je Biblia kʼoatso nga tojngo nixákoaa je Niná (1 Cor. 3:9; 2 Cor. 6:4). ʼYañá nga ñaki kixi je Énle Niná (Sal. 119:159, 160). Kuinga nda nichjénñá “je én xi kjoakixi”, xi tsonile je Énle Niná, kʼianga ʼmiyasoán (2 Tim. 2:15). Tonga machjén nga ngisasa nda koa̱nná si̱chjén je Biblia, nga̱ kui xi ngisa nichjén kʼianga bakoyaa xi tʼatsʼe je Jeobá, je Jesús kʼoa kao tʼatsʼe Chjotaxále. w18.10 11 párr. 1, 2

Kʼianga kui fitjenngi je choa̱le Jesucristo je xi xʼin ma, je chjoónle bakóle kjoaxkóntokon (Efes. 5:22-25, 33). Kʼoa je chjoón kʼoati kuenta sʼín je xʼinle. Kʼianga bakóle kjoaxkóntokon xínkjín je xi xijchá ma, nʼio nda choa̱ batíole je ʼndíxtile. Tonga kʼoati je kjinele kuitsoyale josʼin koakole kjoaxkóntokon xi kjaʼaí. Tobʼelañá, koaan kʼoakuitsole nga tsín ya kʼoétsoma toka ya Ndʼia jña chotʼayá, kʼoa tsa kʼiaje̱ nga bichijtián kao je ndsʼee. Ngatsʼiñá nga koa̱n kuinyakoaa je xi xijchá ma. Tobʼelañá, tsa jngo tiʼndí skóxʼáná xo̱ntjoa, kʼoakʼuínlee nga nda kasʼín. Tsa kʼoakʼuínlee, nda sʼe̱ kon kʼoa koa̱njinle nga ngisa nda “nga kʼoee kaoni tsa nga chjoé”. w18.09 29 párr. 5, 6

Josʼin tíbándiaaná je Cristo, je xi Rey sʼin tíjnaná, koasenkaoná ndʼaibi kʼoa kao nichxin xi nroaján. Kuinga machjénsíni nga si̱kjaʼaitsjeen jósʼin tíbasenkaoná jmeni xi chriansʼa tíbʼantjaiyajin naxinandále Niná. Kʼianga chotʼayajtían ya yaniʼyaná koaan kʼia chótʼayá jmeni xi tíbʼantjaiyajin josʼin satío kjoajtínná kʼoa kao josʼin ʼmiyasoán. Tsa kʼoasʼiaan, nʼio koasenkaoná. Tsa majinná nga ndasʼin bichómani josʼin bándiaaná je naxinandále Niná, kaojin kjoatsjoa si̱tjosoán. Tobʼelañá, tsjoa satío tokoán nga tsín titse tao̱n feyani kʼianga tsín tinkjín xo̱n bitjoni. Nga kui ki̱cha̱ xi sʼa kjimatsen chjotse kjimachjén, ngisaa nkjín chjota tíʼmiyasonle je Énle Niná. Tsa kʼoakoa̱nná, koaan kui ngisa si̱chjén je xo̱n kao grabación xi ya satíotʼa je página xi tíjnaná ya Internet. Tsa kʼoasʼiaan, jé Jesús tichjenngilee nga ndasʼin tinichjén jmeni xi tsjoáná je naxinandále Niná. Kʼianga kao ni̱ma̱ná nitjosonñá josʼin bándiaaná je Cristo sítajaa je kjoamakjainná kʼoa jtín sʼin biyoaa kao je ndsʼee. w18.10 25, 26 párr. 17-19

Kʼiatsa ndʼé nikoaa je ndsʼee josʼín je Jeobá, nʼio kuinyakao kʼoa ngisaa tsakuikjoan tísíjéle Jeobá nga tíbʼétsʼoale (2 Cor. 1:3-6). Tonga alikui kui chóyalee nga tsínkʼia sa̱téngi je ndsʼee. Kuenta sʼiaan jokji tjen bichó nganʼiole. Kʼiatsa kʼoasʼin si̱kjaʼaitsjeen nga tsín tjínnele nga so̱kojéele, alikuijin nda sʼe̱ tokoán tsa jñani tsín nda sʼin (Ecl. 7:21, 22). Si̱kjaʼaitsjeen nga je Jeobá alikui kui síjéná jmeni xi tsín kʼoakoa̱nná. Kʼiatsa chjénngiaa jokjoan je Jeobá koaanná si̱chatʼalee xíngiaa tsa jñani tsín nda sʼin (Efes. 4:2, 32). Alikui koa̱n kʼoakuixoán nga tsín nʼio bʼénele yaole je ndsʼee kʼoa tsín koa̱n nga kjaʼaí xi si̱ngósonkoaa jmeni xi sʼín. Tsa kʼoasʼiaan alikuijin nda sa̱tío kon. Tosa kʼoakʼuínlee nga nda tjíosʼín. Tsa kʼoasʼiaan, si̱nʼiojinñá kon kʼoa kuinyakaoñá nga tosi tonda kao kjoatsjoa sixále je Jeobá (Gál. 6:4). w18.09 16 párr. 16, 17

Je Jesús kʼoakitso nga kui xi niole koanni kʼianga kisitjosonle Niná. Tojo ma kʼianga nʼio nda je tsojmi xi bichiñá, nda satío tokoán kʼoa tsjoa satíoná. Kʼoatisʼinni, kʼianga nitjosoán jmeni xi tsoná je Niná tosi tonda matajasa kjoamakjainná kʼoa kui xi tsjoa bʼé tokoán. Kʼianga nitjosoán jmeni xi bakóyaná je Niná chjine maa (Sant. 3:13). Tsa kʼoasʼiaan ndasʼin kuichomani. Je Biblia kʼoatso nga tsín jme xi mangóson je kjoachjine, nga̱ “je kjoachjine yá xi tsʼe kjoabijnachon tsoyanile je xi masjaile, kʼoa je xi tsín tsjion kʼoakʼuínle nga nʼio tsjoa tjíole” (Prov. 3:13-18). Ñandia kʼianga i̱ kitsole Jesús je chjotale: “Tsa ʼyanío kjoa jebi, jó tondano tsa kʼoasʼiaon” (Juan 13:17). Je chjotatjenngile Jesús tsjoa kisatio kon nga kisitjoson. Alikui tsa tosakʼoajin nga kisitjoson kʼoa nga kitjenngi je choa̱le Jesús, ngantsjai nga kʼoakisʼin. w18.09 4 párr. 4, 5

Je Adán kao Eva tjínnele kisikjaʼaitsjen tsakai je chjota xi koatio nga koa̱nskanni. Je Niná kisichikontʼain kʼoa kʼoakitsole nga nkjínya katama nga sitse i̱ Sonʼnde kʼoa nga je koanentsja (Gén. 1:28). Nga mandosinle je Niná jmeni xi kisinda, kʼoajinti tjínnele koanndosinle tsakai je Adán kao Eva jósʼin nga tsjoa sa̱tío kon je ntje̱le. Je Jeobá kui xi koanmele nga je Adán kao Eva kʼoa kao ngatsʼi xtile ñatjen sixá nga ʼndenaxó sikao ngakjijnda Sonʼnde. Kʼoa tsejin xá kitjenkao nga kuitjosonle jebi. Kʼianga ʼndenaxó sikao jngo tjíjtsa Sonʼnde je Adán kao Eva tjínnele ñatjen kisixá kao Jeobá. Tsa kʼoalani kisʼin koanjin jaʼasʼenjin je kjoanikjáyale Niná (Heb. 4:11). Nʼiojin tsjoa kisatio kon tsa kʼoakisʼin. Xi ijngosani, je Jeobá tsejin kjoanichikontʼain kitsjoale tsa tsín to yaole kini. w18.08 18 párr. 2; 20 párr. 8, 9

Jméni xi sʼiaan kʼiatsa kui sʼe̱né jmeni xi tsín kʼoatjín. Kʼoakoantʼain je Jesús kao Juan Bautista (Mat. 11:18, 19, TNM). Jókisʼin je Jesús nga énndiso kisʼene. ʼNdele nga tokui sikʼayale nichxinle nga sitoánntjai yaole, tosaa kʼoakitsole je chjota nga kui kuenta katasʼín jmeni xi kisʼin, jmeni xi kitso kʼoa kao jmeni xi tsakakóya. I kitso: “Je kjoachjine kao xále ʼyanile nga ñaki kʼoatjín”. Choa̱ jebi nʼio tse xi bakóyaná. Tsakui nichxin chʼaosʼin sikʼaxki̱ná je chjota, kʼoa tsa chʼaosʼin kuinchja̱ni xi tʼatsaan tojoni nga chʼaosʼin kʼoaxkiaa. Jméni xi koa̱n sʼiaan. Kʼiatsa ʼya xi énndiso ska̱nibason xi tʼatsaan, tosa koakoá nga tsín kʼoatjín kʼoa ndasʼin koanngínkoaa yaoná. Tojo kisʼin je Jesús, kʼiatsa kʼoatisʼin koanngínkoaa yaoná, koakoñá nga to énndiso xi kaníbason chjota xi tʼatsaan. w18.08 6 párr. 11-13

Je Caín, Salomón kao chjota israelita kitjoʼndele nga kisikʼantjaiya yaole tsakai (Hech. 3:19). Jebi kui bakóyaná nga je Jeobá alikui tokjoan kʼoasʼin síkjaʼaitsjen nga tsín tikoa̱nndayani jngo chjota xi jée bajngi. Tobʼelañá, kisichatʼale je Aarón. Kʼoa nichxin xi tiyoaa ndʼaibi, nga bájinkonná je Jeobá kui síchjén je Biblia, je xo̱n xi síkasénná naxinandále, kʼoa kao kjoafaʼaitsjen xi tsjoáná je ndsʼee. Kʼia tsa chʼa̱ʼén, alikui jao tjínná nga koakoná kjoamatokon je Jeobá. Nga bakóná kjoanda je Jeobá basenkaoná (2 Cor. 6:1). Tsjoáʼndená nga chjaʼaxinlee yaoná “kjoa xi tsín bexkón Niná” kʼoa kao “ngayije kjoachi̱nga̱le sonʼnde” (Tito 2:11, 12). Nichxin xi tiyoaa ndʼaibi, toxá kuitjátojinñá je kjoa xi skótʼayakaoná tsa kixi timangíntʼalee Jeobá kʼoa tsa mai. w18.07 21 párr. 20, 21

Jósʼiaan nga tosi tonda kui kjoásjee nga nda skoe̱xkonná je Niná. Jaola koya kataʼyaa. Xi títjon, machjén nga si̱kjaʼaitsjenjiaan nga je Jeobá ndasʼin bekon ngantsjai je choʼndale xi kixi fitʼale (Heb. 6:10; 11:6). Nʼio bechjí je choʼndale nga jngó jngó. Kuenta sʼín je chjota xi kixi kʼoa basenkao nga kjoa faʼatojin (Sal. 1:6; 2 Ped. 2:9). Xi majaoni koya, nkjín koya josʼin bakóná je Jeobá nga kuenta sʼínná. Alikui jme kjoanda tsjoále je chjota xi tokui kʼoasʼínni xi ndatjín kʼianga kjaʼaí xi katabe, nga̱ je Jesús kʼoakitso nga jetjíosokóle chjíle (Mat. 6:1-5). Tonga kʼoati kitso nga je Nʼaile be ʼyani xi kui kʼoasʼín xi ndatjín ninga tsín be xi kjaʼaí chjota. w18.07 9 párr. 8, 10

Je Pedro, alikui koanjinle jmeni xi tsoyanile je sén xi kisakole. Kʼoa nga tiʼakʼiani, kichokonle je chjota xi kisikasén je Cornelio. Jé nganʼiotsjele Niná tsakándiaale je Pedro nga ki ya ndʼiale Cornelio. Je chjota judío alikuikʼia ya jaʼasʼen ndʼiale jngo chjota xi tsín judío kitjenni. Tsa kuilani jebi kini je Pedro, alikuijin ki ya ndʼiale Cornelio. Kuinga kini je Pedro ya ndʼiale Cornelio nga sén kisakole kʼoa nga kui nganʼiotsjele Niná tsakándiaale. Kʼianga jekinrʼoéle jmeni xi kitso je Cornelio, je Pedro i kitso: “Tiʼbenía nga Niná tongóson fikao ngatsʼi. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (Hech. 10:34, 35). Jme xi koanjinle Pedro, kʼoati bʼakaotʼaná ngatsʼiaa xi chjotale Cristo maa ndʼaibi. w18.08 9 párr. 3, 4

Alikui kui kʼoanʼia jmeni xi ʼyaa nga jtike Niná. Tonga jónʼia tʼatsʼe jmeni xi tsín tsoyakixi je Biblia. Jómani ʼyaa jmeni xi mele Jeobá nga sʼiaan. Kʼiatsa kao kjoatéxomale Niná tinichjineñá je kjoafaʼaitsjenná, kuijin xi ndatjín chjoéjiaan. Je Jeobá tsjoakená, kuinga tsjoániná je kjoafaʼaitsjen xi bándiaaná. Itsoná: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai” (Is. 48:17, 18). Kʼianga bichókajin ni̱ma̱ná je kjoafaʼaitsjen xi tsjoá je Biblia, basenkaoná nga nindayasaa je kjoafaʼaitsjenná kʼoa nga kui xi ndatjín chjoéjiaan. Je kjoafaʼaitsjen xi tsjoáná Niná basenkaoná nga kui xi ndatjín kʼoanʼia. Kʼianga majinná je kjoafaʼaitsjen xi tsjoá je Biblia basenkaoná nga ʼyaa josʼin síkjaʼaitsjen je Jeobá, kʼoa ánni nga kui kjoatéxoma kitsjoaniná. w18.06 17 párr. 5; 18 párr. 8-10

Je xi koanmele chjotale Herodes kuinga tsa tsín nda sikʼaxki̱ Jesús nga tao̱nbasen machjí koaan kui jée sʼe̱ne nga kontra tíbʼejnale chjotaxá xi tsʼe Roma, kʼoa tsa kʼoakuitso nga tjínnele sʼe̱chjí tao̱nbasen, je chjota alikui tiya koaitjennginile. Nga tsín kjoa tsjónjin yaole Jesús nʼio nda kisikjaʼaitsjen jokitso. Ninga be nga síchéson je chjota xi tao̱nbasen síkʼéchjí, alikui kui kuenta kisʼin. Je xi ngisa kitsjoale kjoandosin kui tʼatsʼe Chjotaxále Niná, je xi koa̱nle kjoaʼaxin ngayeje kjoa xi tjínle chjota. Jngo choa̱ tsakʼéjnaná xi koanngíntjenngiaa. Ninga ndatjín jme xi tjíosʼín je chjota político koa̱nná, alikui koa̱n nga kui kuinójiaan yaoná. ʼNdele nga kʼoakuixoán jme xi kixi kʼoa xi tsín kixi kjima kʼoa tsa chʼaosʼin si̱kʼaxkiaa, ñá xi chjotale Cristo maa kui títjon nikʼéjnaa Chjotaxále Niná kʼoa kao kjoatéxomale (Mat. 6:33). Nʼio nkjín xi testigole Jeobá ma ndʼaibi xi xin kisikatío je kjoa política. w18.06 6 párr. 9-11

Je Na̱i ali tsa tokuijin che̱n jebi kisichjén, tsakui nichxin kʼoati kitsole je ánkje nga koa̱n je koatexomasonle je chjota. Tsakui nichxin kui xi koanmele nga tsín katafaʼai je “ntje̱le” je “chjoón” xi kinchja̱ni je Niná (Gén. 3:15). Tonga je Jeobá Jtsínʼio jaʼaikao kʼoa tsínni kʼoakoan josʼin kisikjaʼaitsjen je Na̱i kao ánkje tsʼen. Jebi kui tsoyaná nga tsín koa̱n kʼoasʼin si̱kjaʼaitsjeen nga tsín kjoachajngi jtsaojiaan kʼoa nga tsín kjoangʼakon kʼoetʼaná ninga tsín si̱kuindaa yaoná. Je ánkje xi ya kitʼale je Na̱i nʼio nkjín nó nga ya kisixákao je Jeobá. Tikʼoasʼinni tsanda ñá, tsakui nichxin jenʼio nkjín nó nga je Jeobá tinixálee. Ninga kʼoalani, koaanle kui xi chʼaotjín kjoaʼasʼenjin je ni̱ma̱ná (1 Cor. 10:12). Nʼio tjínle kjoandosin nga kuenta sʼiaan je ni̱ma̱ná nga tsín kjoangʼakon sʼe̱jnajin kʼoa nga tsínkui xi chʼaotjín sʼe̱jnajin (Gál. 5:26; Col 3:5). w18.05 25 párr. 11, 12

Je Pablo kisikinroajen kon kʼianga tsín kinrʼoé je chjota judío je Énle Niná. Ninga kʼoalani, alikuikʼia tsakájñále nga kitsoyason. Kʼoakitso jokisʼe kon xi tʼatsʼe chjota judío kʼianga i̱ kitso: “Ñaki kjoakixi ní kui xi mele ni̱ma̱na, kʼoa kui xi bʼetsʼoale Niná tʼatsʼe Israel, nga kuitjontjai. Nga̱ an tsjoa kjoakixi tʼatsʼe Israel nga nʼio xkón be Niná, tonga likui josʼin machjén kjoaʼisentakon” (Rom. 10:1, 2). Je Pablo kʼoakitso nga ni̱ma̱le kinroajinni nga kitsoyale Énle Niná je chjota judío. Kui xi koanmele nga kuitjontjaile yaole je chjota judío (Rom. 11:13, 14). Je Pablo kui kisijéle je Jeobá nga katabasenkao nga jngó jngó je chjota judío nga kjuinrʼoé je Énle Niná. Je Pablo i kitsosa: “Nʼio xkón be Niná”. Je Pablo kui kiskotsenle jmeni xi ndatjín tjíosʼín je chjota kʼoa kui kisikjaʼaitsjen nga koa̱n nʼio nda sixále Niná. Koanjinle nga koa̱n chjotale Cristo koa̱n chjota jebi. w18.05 13 párr. 4; 15 párr. 13, 14

Tojo kitso je Pablo, ngatsʼiñá nga tjínnele koa̱nndosinná je ndsʼee kʼoa kuenta sʼiaan jmeni xi machjénle. Je Pablo i kitso: “Chjómitjaon ndsao xi tsín ma síkjan, kʼoa tʼainganʼiolao xkóno xi tsín timatinyani. Chjoʼaiʼndao ndiaa xi kixi xi tʼatsʼe ndso̱ko, jméni nga je xi chjiʼngé likui koatjijinnile xínkjín nindandso̱ko̱, tonga katandani” (Heb. 12:12, 13). Saʼnda je xi sʼa xti koaan kjoakaonajmí je ndsʼee nga sinʼio kon. Je Pablo kui kjoafaʼaitsjen jebi kitsjoale je jtín xi kisʼejna ya naxinandá Filipos: “Tsa sínʼiotakoán Cristo, tsa je kjoatjaocha bʼénená, tsa ñaki kjoakixi tiyokjoaa kao je Espíritu Santo, tsa tjínná kjoatjaocha kao kjoamatakon, tijngonáo kjoatsjoana. Tʼejngotakon, tikʼoasʼinni katamatsjoachao, tijngo yaono, kʼoa tojngo kjoafaʼaitsjen katasʼeno. Ali kʼoa tochʼaondai mao. Ali kʼoajin tongʼatakon mao. Tosa kjoayo̱ma̱ kjiatakon nga chósonnilao nga xikʼa ngisa nda male kjoa xi tjín kaoni tsa jon. Ali kuindajin nʼiao xi totsaon kjoa, tonga kʼoati tʼiaon kuinda tsʼe xi kjaʼaí chjota” (Filip. 2:1-4). w18.04 22 párr. 10; 23 párr. 12

Je Jeobá, jé Jesús kisichjén nga ndái kisikatíoná xi tʼatsʼe jée kao kjoabiya ánni nga toje si̱xánilee. Kʼianga nʼio kʼoailee kjoandosin je xále Niná, kui xi koasenkaoná nga tsín chʼaosʼin si̱chjén je kjoandái xi tjínná, nga tsín choʼndale koaan jmeni xi nimetokoán kʼoa jmeni xi tjín sonʼnde (Gál. 5:16). Kataʼyala je choa̱le Noé kao familiale. Ningalani nʼio chʼao kisʼin kʼoa tsʼen koan chjota nga kui nichxin, je Noé kao familiale alikui kui kisimekon jmeni xi koanndosinle je chjota. Jméni xi tsakinyakao. Kuinga kui kʼoakisʼin jmeni xi kitsole Jeobá, nga tsakʼénda je arca, nga tsakinyáxkó je tsojmi xi ski̱ne kʼoa kao xi tsjoále je cho̱ kʼoa nga tsakájinkon je chjota jmeni xi koa̱n. Je Biblia itso: “Je Noé kʼoakjoán kisʼin ngayeje jmeni xi tsakʼénele Niná. Ñaki kʼoakjoán kisʼin” (Gén. 6:22). Je Noé kao yaniʼyale kitjontjaile yaole nga kʼoakisʼin (Heb. 11:7). w18.04 10 párr. 8; 11 párr. 11, 12

Kʼianga bʼanachale je chjota jngo tjíjtsa Sonʼnde, je Na̱i kao ánkje tsʼen ali tsa tokuijin síchjén je chjotaxá sonʼnde, kʼoati síchjén je religión ndiso kʼoa kao negosioyʼai (Apoc. 12:9). Kʼianga kui religión ndiso síchjén, je Na̱i énndiso kaníbason xi tʼatsʼe Jeobá, kʼoa kui xi mele nga nʼio nkjín chjota katasíchajin je jaʼaínle Niná (Jer. 23:26, 27). Kʼoa xi totʼatsʼe jebi, nkjín chjota xi kʼoasʼin síkjaʼaitsjen nga Niná bʼétsʼoale, tonga jéni ánkjele Na̱i tjíobʼétsʼoale (1 Cor. 10:20; 2 Cor. 11:13-15). Kʼoati kui negosioyʼai síchjén kʼianga kaníbason je énndiso. Tobʼelañá, kui xi mele nga kʼoasʼin katasíkjaʼaitsjen je chjota nga kui xi tsjoa kʼoee kon kʼiatsa nʼio tse tao̱n sʼe̱le kʼoa tsa nʼio nkjín tsojmi sʼe̱le (Prov. 18:11). Je xi makjainle kjoandiso jebi, to “kjoanyiná” básjai ʼndele nga je Jeobá sixále (Mat. 6:24). Kʼianga kui nʼio matsjoake je tsojmi xi tjín sonʼnde kui xosíkao nga tsín titsjoake mani je Niná (Mat. 13:22; 1 Juan 2:15, 16). w18.05 23 párr. 6, 7