Abril

Jmé kjoa xi bitjatojin sakʼoa. Tsakui nichxin tsín kisasenná jokitsoná kʼoa tsa jokisikaoná jngo ndsʼee (Sant. 3:2). Tsakui nichxin je xi ñatjen nixá kʼoa tsa xi ñatjen mangián skuela skoe̱sinná nga je Jeobá tinixálee (1 Ped. 4:3, 4). Kʼoa tsa jngo xíngiaa bʼejnachjoa nga mangián kjoajtín kʼoa nga ʼmiyasoán (Mat. 10:35, 36). Tsa tsín tichókjoakaoniná je kjoa xi tibitjatojiaan, chanjin kʼoasʼin si̱kjaʼaitsjeen nga tosa nda nga tsín tije Jeobá si̱xánilee. Tonga koaan kʼoéjngoaa tokoán nga je Jeobá tsjoáná kjoachjine nga nda chjoéjiaan jmeni xi sʼiaan, kʼoa koasenkaoná nga chókjoajinná je kjoa. Jé Jeobá xi kʼoasʼin koanmele nga ya Biblia kisʼetʼaxo̱n tʼatsʼe choʼndale xi ñʼai tjín kjoa jaʼatojin. Kui xá kisʼetʼaxo̱nni nga ñá koasenkaoná, tojo kitso je pastro Pablo. Nga bʼexkiaa tʼatsʼe choʼndale Niná xi tsakatio nichxin kjoatse, sínʼio tokoán kʼoa tsjoáná kjoachoya. Tonga ali tsa tokuijin xi machjén nga tokʼoéxkiaa, machjén nga kuichokajin ni̱ma̱ná kʼoa kjuintjenngiaa je kjoafaʼaitsjen xi tsjoáná. w21.03 14 párr. 1, 2

Jósʼin ʼyatokoán je chjota xi ʼmiyasonlee. A kʼoasʼin nikjaʼaitsjeen nga ya mangóson joni je tsojmintje xi jekoa̱n sʼe̱xkó. Tsa jaon, jan koya tjínni xi koa̱n sʼiaan. Xi títjon, kʼoénelee yaoná nga ngisa nʼio kʼuínyasoán, nga̱ ʼyañá nga tochoasa nichxin tíjna. Xi majaoni, nʼio tsjoa kʼoé tokoán nga kʼuínyasoán je Énle Niná “tojo sʼín je chjota nga tsjoa tjíole nichxin nga sʼexkó je tsojmintje” (Is. 9:3). Kʼoa xi majanni, kʼoasʼin si̱kjaʼaitsjeen nga koa̱n chjotatjenngile Cristo koa̱n je chjota, kuinga kui chja̱kaonajmíñá jmeni xi mandosinle. Je Jesús likui kʼoasʼin kisikjaʼaitsjen nga tsínkʼia koa̱nkjainle je chjota samaritano, josʼin kisikjaʼaitsjen tsakai je chjotatjenngile. Tosaa kʼoasʼin kisikjaʼaitsjen nga chjotatjenngile koa̱n. Kʼoasʼin tjínnele si̱kjaʼaitsjeen tʼatsʼe je chjota jña ʼmiyasoán. Je pastro Pablo nʼio nda choa̱ tsakʼéjnaná. Tsabee choa tʼatsʼe jmeni xi makjainle je chjota xi kinrʼoéle, koanjinle jme xi koanndosinle je chjota kʼoa kʼoasʼin kisikjaʼaitsjen nga koa̱n chjotatjenngile Cristo koa̱n je chjota. w20.04 8, 9 párr. 3, 4

ʼNdele nga chʼaosʼin si̱kʼaxkiaa jngo chjota tʼatsʼe jmeni xi sʼín, tosa si̱jinlee yaoná jotjín kon. Jé Jeobá xi ngisa nda majinle jotjío tokoán. Si̱jélee nga katabasenkaoná nga kʼoasʼin si̱kjaʼaitsjeen tʼatsʼe ndsʼee josʼin síkjaʼaitsjen je kʼoa nga jchaa josʼin koakolee kjoamatokon. Likui koa̱n nga tochja̱ʼajiaan je ndsʼee xi koakolee kjoamatokon. Kʼoati sakʼoa kui kjoa bitjatojiaan je kjoa xi jaʼatojin Jonás, Elías, Agar kʼoa kao Lot. Tjínkʼa xi tije bajnginile kjoa yaole. Tonga tsa nda si̱kjaʼaitsjeen, ngatsʼiñá nga kʼoanʼia sakʼoaa. Kuinga kʼoatsosíniná Jeobá nga si̱jinlee yaoná jotjío kon xíngiaa (1 Ped. 3:8). Kʼianga nitjosoán jotsoná je Jeobá, jtín sʼin biyoaa kao ngatsʼi ndsʼee xi tjío jngo tjíjtsa Sonʼnde, ninga kjaʼaí kjaʼaí nʼia nga jngó jngoá. Kuinga kʼoénesínilee yaoná nga katamandosinná xíngiaa kʼoa koakolee kjoamatokon. w20.04 19 párr. 15-17

Je Jesús nʼio nda choa̱ tsakʼéjna nga kisitjoson je kjoatéxomale Jeobá. Jngo koya josʼin koakoá nga nitjosonlee Jeobá kʼiaa nga chjénngiaa je choa̱le Jesús (Juan 8:29). Kʼianga tosi tonda si̱xálee Niná machjén nga ñaki kʼoakʼoé tokoán nga Niná xi tsʼe kjoakixi je Jeobá kʼoa nga ñaki kʼoatjín jmeni xi tsoná je Énle. Kʼoati machjén nga ñaki kʼoakʼoé tokoán nga je Jesús kiskoejin Niná nga Rey koa̱n. Nichxin xi tiyoaa ndʼaibi, nʼio nkjín chjota xi tsín makjainle nga je Jesús xi Rey sʼin tíjnale je Chjotaxále Niná. Je Juan kʼoakitso nga sʼe̱ chjota xi tobʼanacha, kʼoa je xi tsín ñaki tjíojngo kon tʼatsʼe Jeobá kao Jesús koa̱nkjainjinle jme xi kʼuínle (2 Juan 7-11). Je Juan itso xi kiski: “ʼYáni xi ndiso. A tsí tsa je xi tso nga Jesús ali je Cristo” (1 Juan 2:22). Tsa chótʼayajiaan je Énle Niná, jchañá xi tʼatsʼe Jeobá kao Jesús kʼoa alikui ʼya xi kʼoanachaná (Juan 17:3). Kui xi koasenkaoná nga kʼoakʼoé tokoán nga ñaki Énle Niná xi tichotʼayá. w20.07 21 párr. 4, 5

Tsa tsín mená nga ndsʼee si̱katéngiaa, alikui to yaoná kjuinñá kʼoa alikui koa̱n nga toñá kuitjosonná ngantsjai (Rom. 14:19-21; 1 Cor. 8:9, 13). Jebi alikui mangóson kao jmeni xi ma nga tokanacha je chjota nga toje mele kuinje̱le. Alikui kuenta sʼín xi ngikʼa. Kʼoa faʼatotʼale xi ngikʼa nga je mele tsjéntítjon. Tonga ñá xi chjotale Cristo maa alikui kʼoasʼin tokanachaa kao je ndsʼee (Gál. 5:26; 6:4). Je xi mená kuinga kuinyakoaa nga kʼoati katatjoéle je kjoatjao xi tsjoá Niná. Kuinga bʼenenilee yaoná nga mangíntjenngiaa je kjoafaʼaitsjen xi kitsjoa Pablo nga kʼoakitso nga tsín toñá kjuinñá yaoná nga kʼoati kuenta sʼiaan “xi kjaʼaí chjota” (Filip. 2:4). Nga tsjoakená Jeobá, kʼoatso nga tsjoále kjoatjao ngatsʼi xi kuinje̱le, xi tsonile, tsjoále kjoabijnachon xi tsínkʼia fetʼa. Tjínkʼa xi ya ngʼajmi sʼe̱le kjoanda jebi kʼoa tjínkʼa xi i̱ Sonʼnde koatio ngantsjai nichxin. w20.04 28 párr. 10; 29 párr. 12

I̱ Sonʼnde millón mani je chjotale Cristo xi kui kjoanda sʼe̱le nga ya ʼndenaxó koatio. Je chjota jebi skoeni xko̱n nga ni̱kinjele je kjoabiya kʼianga millón koa̱nni je chjota xi kjoaʼáyanile xi jekjoatse kʼien. Nʼiojin tsjoa sa̱tío tokoán nga kʼoakoa̱n (Hech. 24:15). Ngatsʼi je xi kixi koaitʼale je Jeobá kʼoati sikinjele je kjoabiya kʼoa koaan koatio ngantsjai nichxin. Ngatsʼiaa xi chjotale Cristo maa nʼio tsjoánganʼioná jmeni xi kitsole Pablo je chjotale Cristo xi Corinto tsʼe, tʼatsʼe nga kjoaʼáyanile kʼien. Kuinga machjénsíni nga kʼoasʼiaan jokitso Pablo: “Ngisa tse tixásalao Nainá ngantsjai” (1 Cor. 15:58). Tsa kixi kjuintʼalee Niná kʼoa tsa kʼoénelee yaoná jokji tjen kʼoakoa̱nná nga si̱xálee, nʼio tsjoa sa̱tío tokoán nichxin xi sʼa nroa, saʼnda tsín fiya jkoaa ndʼaibi jokji tsjoa sa̱tío tokoán. Kʼoa jchañá nga tsín toxitsjoa nga je Niná tinixálee. w20.12 13 párr. 16, 17

Jmeni xi tso Ezequiel 38:10-23; Daniel 2:43-45; 11:44-12:1 kao Apocalipsis 16:13-16, 21, mangóson je nichxin xi nchja̱ni kʼoa jmeni xi koa̱n. Kʼianga jekoaitsʼia kjoañʼai xi nʼio tse, je “chjotatítjon xi tsʼe ngakijnda sonʼnde” tojngoo sʼin yaole, xi tsonile, jngojtín naxinandá koa̱nni (Apoc. 16:13, 14). Kʼoa je xi jngojtín naxinandá “Gog xi ya Magog tsʼe” tsole je Biblia (Ezeq. 38:2). Je xi jngojtín naxinandá kʼoetʼale ngatsʼi choʼndale Niná kʼoa koa̱nmele sikjeson. Je pastro Juan jngo sén tsabe jñani kisakole jmeni xi koa̱n nga kui nichxin. Tsabe nga nʼio yʼai kjoan jtsílao̱ tsʼanele je kontrale Niná. Tsakui nichxin je jtsílao̱ jebi kui tsoyanile je én xi koajinkon chjota je choʼndale Jeobá nga kʼoakuitso nga kjoañʼai kjoaʼaíne. Tsakui nichxin kui xosikao je Gog xi ya Magog tsʼe nga kʼoetʼanile je naxinandále Niná kʼoa nga koa̱nmenile sikjeson (Apoc. 16:21). w20.05 15 párr. 13, 14

Ngisaa chjí jchatokoán je nganʼiotsjele Niná tsa si̱kjaʼaitsjenjiaan jme xi kjima nichxin xi tiyoaa ndʼaibi. Nga kjesa fijin ya ngʼajmi je Jesús, i kitsole je chjotatjenngile: “Tjoéno nganʼio kʼia nga je Espíritu Santo kjoaʼaíno. Jon koa̱on testigona [...] jña saʼnda nga fetʼa sonʼnde” (Hech. 1:8). Jé nganʼiotsje tíbasenkao je chjota xi tsʼato jin millón basen mani jngo tjíjtsa Sonʼnde nga choʼndale Jeobá kjima. Xi ijngosani, je choʼndale Niná jtín tjío kʼoa nyʼán tjíokao xínkjín, nga̱ jé nganʼiotsjele Niná basenkaoná nga bakoá je xi ndatjín, jolani kjoatjaocha, kjoatsjoa, kjoanyʼán, kjoatsejta, kjoandʼé, kjoanda, kjoamakjain, kjoaʼindajintakon, kʼoa nga chjoexkoá yaoná. Kui kjoanda jebi xi tsjoá “je Espíritu Santo” (Gál. 5:22, 23). Alikui jao tjínná nga nʼio chjíle je nganʼiotsjele Niná. w20.05 28 párr. 10; 29 párr. 13

Nkjín koya tjínni anni kʼoabixónñá nga jchaa je xi xíngiaa mani kʼianga kjoaʼáyanile. Tojo koan nichxin kjoatse nga jaʼáyanile je kʼien, je Jeobá tojo kʼoajin sikjoan je chjota jokjoan nga kjesa mʼejin, josʼin nchja̱ kʼoa josʼin síkjaʼaitsjen. Xi ijngosani, je Jesús kʼoakitso nga ya mangóson je kjoabiya joma nga soyofe, kʼoa nga kjoaʼáyanile je kʼien yaa mangóson joma kʼianga faʼáná (Mat. 9:18, 24; Juan 11:11-13). Tojo ma kʼianga jefaʼáná, tojo kʼoakjoaan, tojo kʼoasʼin nokjoaa kʼoa tojo kʼoasʼin nikjaʼaitsjeen josʼin nikjaʼaitsjeen nga tosʼa soyofe. Si̱kjaʼaitsjenla jokoan je Lázaro. Jeño nichxin kijnakʼien kʼianga kisikjaʼáyale je Jesús kʼoa jejin tífiʼndo yaole. Kʼoa je ndichja ndi̱toon tsabe nga je, kʼoa je Lázaro kʼoati ndi̱to̱n tsabe je ndichja (Juan 11:38-44; 12:1, 2). w20.08 14 párr. 3; 16 párr. 8

Je Niná tongóson kji tsjoake kʼoa tongóson kji chjí bekon je xi ya ngʼajmi koai kao je xi kjaʼaí barré. Kao kjoabijnachonle ʼNdíle tsakʼéchjíntjaini xi ya ngʼajmi koai kao xi i̱ Sonʼnde koatio. Tokuikjoán je kjoachoya xi tjínle xi tsín mangóson, tonga tongóson sʼin tjínnele kixi koaitʼale Niná kao Cristo (Sal. 31:23). Je Jeobá koaanle sichjén je nganʼiotsjele nga tsjoánganʼiole ngatsʼi choʼndale. Je Jeobá kʼoakji tsjoále je nganʼiotsjele jokji machjénle je choʼndale, ni ya ngʼajmi koai kʼoa ni i̱ Sonʼnde koatio. Nʼio naskánatjín je kjoachoya xi tsjoále Jeobá nga jngó jngó choʼndale xi jekitsjoatʼale yaole (Jer. 29:11). Ngatsʼiaa xi chjotale Cristo maa nʼio chjí ʼyatokoán kʼianga faʼaitsjenya je Kjoabiyale Cristo, nga̱ kʼoasʼin chʼasjengʼañá je Niná kao Cristo tʼatsʼe jmeni xi kisʼin nga koa̱n kuiyoaa ngantsjai nichxin. Kʼianga faʼaitsjenya je Kjoabiyale Cristo kuisa xi ngisa nʼio chjí ʼyaa kʼianga xki̱ nó xki̱ nó ñá xi chjotale Cristo maa. w21.01 18 párr. 16; 19 párr. 19

Me tongatsʼi je xi fi kʼianga faʼaitsjenya je Kjoabiyale Cristo nga i̱ Sonʼnde koyale koatio. Tonga ánni kʼoati síkjaʼaitsjenyani je Kjoabiyale Cristo. Yaa mangóson joma kʼianga jngo miyoná bixan. Kuinga mangínñá nga̱ miyo chobá kʼoa tsjoachañá. Kʼoatisʼinni xi kjaʼaí barré, kuinga fini kʼianga faʼaitsjenya je Kjoabiyale Cristo nga̱ kʼoasʼin bakónile nga tsjoake kʼoa nga tsjoánganʼiole je Cristo kao xi ya ngʼajmi koai. Xi ijngosani, kʼoasʼin bakóni nga bechjí je kjoabʼechjíntjaile Jesús nga̱ totʼatsʼee nga koa̱n koatio ngantsjai nichxin i̱ Sonʼnde. Ijngosa koya xi nʼio tjínle kjoandosin anni nga fini xi kjaʼaí barré kʼianga faʼaitsjenya je Kjoabiyale Cristo, kuinga sítjoson jmeni xi tsakʼéne je Jesús. Kʼianga tsakjenkao je pastrole xi kixi kitʼale, i kitsole: “Kʼoatʼiaon jebi nga kjoaʼaítsjenno xi tʼatsʼan” (1 Cor. 11:23-26). Je xi kjaʼaí barré tosi tonda sikjaʼaitsjenya je Kjoabiyale Cristo nga i̱ sa Sonʼnde tjío xi ya ngʼajmi koai. w21.01 17, 18 párr. 13, 14

Kao jmeni xi nʼia bakoñá nga tsjoachaa je xíngiaa (tingósonkoai Santiago 2:17). Je Jeobá tsjoakená (1 Juan 4:19). Tojosʼin faʼaitʼa ya Biblia, naskánatso én síchjén kʼianga kʼoatsoná nga tsjoakená (Sal. 25:10; Rom. 8:38, 39). Ali tokaojin jmeni xi tsoná ʼyañá nga tsjoakená, kao kui ʼyañá jmeni xi sʼín. Je Jeobá kitsjoaʼnde nga tsakjaʼá kjoañʼai je ʼNdíle kʼoa nga kʼienntjainá (Juan 3:16). Kuinga tjínjngoni tokoán nga tsjoakená. Kʼoasʼin bakoñá nga tsjoachaa je Jeobá kao Jesús kʼianga nitjosonlee (Juan 14:15; 1 Juan 5:3). Kʼoa je Jesús kʼoakitso nga tjínnele tsjoacha koaan xíngiaa (Juan 13:34, 35). Ali tsa tokaojin jmeni xi bixoán koakonilee je ndsʼee nga tsjoachaa, kʼoati kao kui jmeni xi nʼia (1 Juan 3:18). w21.01 9 párr. 6; 10 párr. 8

Je chjotale Cristo xi kao nganʼiotsje kitjoejinni koyale nga ya koatiokao Jesús ngantsjai nichxin ya ngʼajmi kʼoa nga ya koatexomakao. Skoe̱ní, kjoakaonajmí je Jesús kʼoa sʼeele nichxin nga ñatjen koatio (Juan 14:2, 3). Kʼoa je xi i̱ Sonʼnde koyale koatio kʼoati koakole kjoatsjoacha je Jesús kʼoa kuenta sʼin. Ninga tsín ñaki xko̱n skoe̱ni, sa miyo sa miyo koa̱nle je Jesús kʼianga jekoatio ngantsjai nichxin, nga̱ jé Jeobá kao Jesús tsjoále kjoanda jebi (Is. 9:6, 7). Kʼianga miyoná mani je Jesús nʼio tse kjoanichikontʼain sokóná. Tobʼelañá, tíbakóná kjoatsjoachale kʼoa títsjoánganʼioná ndʼaibi. Xi ijngosani, koaan kuiyoaa ngantsjai nichxin. Kʼoa nga miyoná mani je Jesús kui kjoanda tjínná nga kʼoati miyoná koa̱nni je Jeobá. Nʼio tse kjoanda tjenkao nga miyoná mani je Jesús. w20.04 25 párr. 15, 16

Je Pablo jé kiskile je chjotale Cristo xi Corinto tsʼe, xi ya ngʼajmi koai kʼoa xi ya kjoaʼáyanile. I kitsole: “Xi koantsjao nga tiyokao Cristo Jesús”. Je Pablo kʼoati kinchja̱ni tʼatsʼe “je xi kitʼale Cristo xi jekʼen” (1 Cor. 1:2; 15:18; 2 Cor. 5:17). Kʼoa nga kiski ijngo carta, i kitso: “Kʼia tsa kʼoasʼin tojngo koaan kao je [kao Jesús], joni tsa kʼen josʼin kʼen nga je, kʼoatisʼin tojngo koaan kao je nga kjoaʼáyaná jo koan nga jaʼáyale nga je” (Rom. 6:3-5). Je Jesús jo espíritu sʼin jaʼáyanile kʼoa yaa ngʼajmi ki. Kʼoati koa̱n ngatsʼi “je xi kitʼale Cristo”, xi tsonile, ngatsʼi xi ya ngʼajmi koai. Je Pablo kʼoakitso nga kʼoasʼin jaʼáyanile Cristo “je xi koan tjonle je xi jekʼen” (1 Cor. 15:20). Jé Jesús xi títjon jo espíritu sʼin jaʼáyanile kʼoa kui kjoanda tsakʼaile nga kʼoéjna ngantsjai nichxin. w20.12 5, 6 párr. 15, 16

Nichxin xi tiyoaa ndʼaibi, kʼianga jebiya je chjotale Cristo xi ya ngʼajmi koai, tokjoan faʼáyanile ya ngʼajmi. Jómani ʼyaa. Yaa tsoyaná ya 1 Corintios 15:51, 52. Kʼianga jekjoaʼáyanile je chjotale Cristo jebi, nʼio tsjoa sa̱tío kon. Je Biblia kʼoatso jmeni xi sʼin ya ngʼajmi je chjotale Cristo “xi tojngo nikʼajtsoaa xkoaan” kjoaʼáyanile. Je Jesús itsole: “Je xi sikinje, kʼoa xi sitjoson je xána saʼnda nga kjoetʼa, an tsjoale ʼnde nga koatexoma naxinandále sonʼnde. Koatexomale kao yájtiki̱cha̱le. Koakjanjinle joni tsa jngo tii. Tikʼoasʼinni josʼin nga Nʼaina kitsjoana kjoatéxoma” (Apoc. 2:26, 27). w20.12 12 párr. 14, 15

Kʼianga kʼoakitso Pablo nga je Jesús “xi koan tjonle je xi jekʼen”, kui xi kitsonile nga sʼe̱sa chjota xi kjoaʼáyanile xi ya ngʼajmi koatio. Nga jeki nichxin ngatsʼi “je xi kitʼale Cristo”, jolani je pastro, yaa ngʼajmi jaʼáyanile joni je Jesús. Kʼianga kiskile Pablo je chjotale Cristo xi Corinto tsʼe, kjesa ʼya xi faʼáyajinle “je xi kitʼale Cristo”, xi tsonile, je chjotale Cristo xi ya ngʼajmi koai (1 Cor. 15:18). Kʼoakitso nga skan kjoaʼáyale, i kitso: “Tonga nga jngójngó josʼin bʼakaole, Cristo je xi tjonle koan, skan je xi tsʼe Cristo, kʼia nga kjoaʼaí nga je” (1 Cor. 15:23; 1 Tes. 4:15, 16). Tojosʼin tiʼyaa, je pastro kʼoa kao chjotale Cristo xi ya ngʼajmi kisʼele kjoachoya alikui tokjoan jaʼáyale. Je Biblia kʼoatso nga kʼia kʼoaile kjoanda kʼoa nga kʼia kjoaʼáyale “kʼia nga kjoaʼaí” Cristo, xi tsonile, kʼianga jekoatexoma. Kʼoa nichxin xi tiyoaa ndʼaibi, jetíbatéxoma Cristo ya ngʼajmi (Rom. 6:5). w20.12 5 párr. 12; 6 párr. 16, 17

Je Pablo jé kinchja̱ni je xi “espíritu” sʼin kjoaʼáyanile ya ngʼajmi (1 Cor. 15:43, 44). Kʼianga jaʼai Jesús i̱ Sonʼnde kui yao tsakʼa jokjoaan ngatsʼiaa xi chjotaa. Kʼianga jejaʼáyanile kui “koan espíritu” xi tsjoá kjoabijnachon kʼoa yaa ngʼajmi ki. Kʼoatisʼinni je chjotale Cristo xi ya ngʼajmi koai, espíritu koa̱n nga jekjoaʼáyanile. Je Pablo i kitso: “Josʼin nga tjínná sénle xi tsʼe niʼnde, kʼoati sʼe̱ná sénle xi tsʼe ngʼajmi” (1 Cor. 15:45-49). Je Pablo kʼoakitso nga likui kui yao xi kichʼá yʼa je Jesús kʼianga jaʼáyanile, kʼoakitso “nga je yao kao njínná likui koa̱n sʼe̱kjoatjaole kjoatéxomale Niná” ya ngʼajmi (1 Cor. 15:50). Kʼianga koai ya ngʼajmi, je pastro kʼoa kao chjotale Cristo xi ya koai, alikui tikjuitsónni je yaole, nga̱ tsín tikʼoakjoanni yao xi kʼoa̱ jokjoaan xi chjotaa. w20.12 11 párr. 10-12

Jé Niná tsakándiaa kʼale je chjotale Cristo xi tsakatio nga siglo 1 nga kui kiski tʼatsʼe chjotale Cristo xi ya ngʼajmi koai. Je pastro Juan i kitso: “Ndʼaibi ʼndíle Niná nía nga ñá. Kjesa matsenjin jo koa̱nkjoan, tonga ʼyanía kʼia nga koa̱ntsen nga je, kʼoati kʼoakoa̱n kjoan jo kjoan nga je” (1 Juan 3:2). Je chjotale Cristo xi ya ngʼajmi koai alikui be josʼin koatio kʼianga jekjoaʼáyanile. Tonga xi majinle kuinga ñaki xko̱n skoe̱ni je Jeobá. Je Biblia kʼoatso nga je xi ya ngʼajmi koai yaa jetjíokao je Cristo kʼianga sikjeson “ngatsʼi xi tjío títjon, kʼoa ngatsʼi xi tjínle nganʼio, kʼoa ngatsʼi xi batéxoma”, kʼoa kʼoati kjoaʼaxin je kjoabiya. Nga jekoa̱nni, je Jesús kao xi ya koatexomakao jé Jeobá tsjoá ijngokʼanile je xá xi kitsjoale kʼoa tojé koatexoma nga jekoa̱nni (1 Cor. 15:24-28). Nʼiojin naskánakoa̱n nga kʼia. w20.12 8 párr. 2

Je chjotale Cristo xi kixi tjíofitʼale xi tsín ya ngʼajmi koai kʼoati kui koyale nga kjoaʼáyanile. Kui kʼoabixónñá nga̱ ya Biblia kʼoatso nga je “kjoaʼáyatítjonle” xi ya ngʼajmi koai, jolani je Pablo (Apoc. 20:6). A tsíkui xi tsoyaná jebi nga sʼe̱sa kjoafaʼáya nga koa̱nskanni. Je Job kui kiskoyale nga kjoaʼáyanile (Job 14:15). “Je xi tsʼe Cristo”, xi tsonile, xi ya ngʼajmi koai, yaa jetjíokao Jesús ya ngʼajmi kʼianga sikjeson “ngatsʼi xi tjío títjon, kʼoa ngatsʼi xi tjínle nganʼio, kʼoa ngatsʼi xi batéxoma”. Kʼoa nga kʼia, kʼoati tjóxin je kjoabiya. Kui bakóyaná jebi nga tsín tikʼia kuiyáni je xi ya ngʼajmi kjoaʼáyanile (1 Cor. 15:23-26). Je xi i̱ Sonʼnde koyale koatio kui kjoanda sʼe̱le je xi kitso Pablo ya texto xi kamaxkia ndʼaibi. Én jebi kui xi tsonile nga sʼe̱ kjoafaʼáya i̱ Sonʼnde. w20.12 6, 7 párr. 18, 19

Tsakui nichxin i̱ bixoán: “Jósʼin skoeña nga nda bekonna je Jeobá”. Tsa kʼoasʼin nikjaʼaitsjeen kui xi tsonile nga mená nga sichatʼaná je Jeobá. Ánni kʼoabixónsíñá. Nichxin kjoatse jngo revista La Atalaya xi i̱ tso xi jaʼaitʼa: “Alikui nda sʼe tokoán nga tikui tima kjoa tsaojinñá jme xi kinʼia ngasʼa”. Kʼoa i kitsosa: “Ali nikʼajenjin tokuin, ali kʼoajinsʼin nikjaʼaitsjain nga kui jée tsakijnyi xi tsín tikʼia jchatʼanili. Kui xi mele je Na̱i nga kʼoasʼin si̱kjaʼaitsjain. Tsa tsín nda sʼe tokuin nga kui kʼoanʼiai xi chʼaotjín, kui xi tsonile nga ndatjín ni̱ma̱li. Nangitokon katamai kʼoa tosi tonda tijélai Niná nga katasíchatʼali kʼoa nga katabasenkaoli nga nda sʼe̱ ijngokʼa tokuin”. Tsee jée tsakajngi je Pablo nga kjesa chjotale Cristo majin. Ningalani tsín kichajinle jmeni xi kisʼin, alikui kui nʼio kisikjaʼaitsjen (1 Tim. 1:12-15). Kʼoasʼin tsabekon je kjoabʼechjíntjaile Jesús joni jngo kjoatjao xi je Jeobá kitsjoale. Alikui tosi tonda jée tsakáne yaole, kui kisikjaʼaitsjen josʼin nga ngisa nda sixále je Jeobá. w20.11 27 párr. 14; 29 párr. 17

Je Na̱i nkjín che̱n batíobasenná nga̱ kui xi mele nga kuijnyíjée. Tsakui nichxin i̱ kuixoán: “Alikui tokui kuichonsjejinnina naxinandále Niná nga kʼoasʼian, alikui nʼio tse jée koanjngia”. Tonga alikui kixi tíjna tsa kʼoasʼin si̱kjaʼaitsjeen. ʼNdele nga kʼoakuixoán, tosaa nda nga i̱ tso xi si̱kjaʼaitsjenjiaan: “A kui jebi tísíchjén je Na̱i nga jao tíbʼé je ni̱ma̱na. Tsa tsjoaʼndele yaona nga kui simekoan xi kjoajndí tjenkao, a sijndíña je jaʼaínle Jeobá. A koasenkaona nga sichriantʼale Niná axo tosaa koa̱nkjinle”. Si̱jélee kjoachjine je Jeobá nga si̱kjaʼaitsjenjiaan jotjín kjoaixi tokoán. Tsa kʼoasʼiaan, alikui jée jtsaojiaan. Koasenkaoná nga chʼa̱sjengiaa kʼianga kui xi chʼaotjín sa̱tíobasenná, tojo kisʼin je Jesús kʼianga i̱ kitsole je Na̱i: “Tʼin, Satanás” (Mat. 4:10). Si̱kjaʼaitsjeen nga tsín nda bichómani nga jao sʼe̱ ni̱ma̱ná. w20.06 12, 13 párr. 16, 17

Nitjosonlee je Jeobá nga̱ majinná nga kjoanda tsaanñá kʼianga nitjosoán kjoatéxomale (Efes. 4:22-24). Kʼianga nangitokon maa majinná nga ngisa tjínle kjoandosin jmeni xi tso je Jeobá tikʼoajinni jmeni xi bixoán ñá, kʼoa nga ngisa ngʼa tjío xi ngikʼa tikʼoani ñá. Kʼoa nga kʼoasʼin nikjaʼaitsjeen ndasʼin biyoaa kao Jeobá kʼoa kao ndsʼee (Filip. 2:3). Tsa tsín si̱kuindaa yaoná, kʼoajin tisʼin si̱kjaʼaitsjeen joni je chjota xi tsín je Jeobá síxále, nga ngʼakon kʼoa nga to yaole fini. Kʼoakoan je chjotale Cristo xi tsakatio nga siglo 1. Kuinga i̱ tso xi kiskinile Pablo je chjotale Cristo xi Roma tsʼe: “Kʼoaxinno nga jngójngó xi tiyobi, [...] nga tsín ʼya xi ngisa nʼio ngʼa sikjaʼaitsjenle yaole kaoni tsa xi josʼin nga bakinle, tonga kʼoasʼin katasíkjaʼaitsjenjin nga ningʼajin kʼoa ninangijin sikjaʼaitsjen xi tʼatsʼe yaole”. Je Pablo koanjinle nga tjínnele kʼoati skoe̱chjí yaole jokji tjen bakinle. Nga nangitokon koaan koasenkaoná nga “ningʼajin kʼoa ninangijin” si̱kjaʼaitsjeen xi titʼatsaanñá. w20.07 2 párr. 1, 2

Si̱kjaʼaitsjenla ijngokʼá jokoan nichxin nga tsakʼejna je Asá. Chaan kicho nichxin nga likui tinda tsakationi je naxinandá Judá, nga̱ jngo millón chjotakjoajchán etíope kichokʼetʼale. Je Zérah, xi tsakasentítjonle chjotakjoajchán jebi ñaki kʼoatsakʼé kon nga sikinjele naxinandá Judá. Tonga je Asá jé Jeobá kisinʼiotʼa yaole, kuinga i̱ kitsonile: “Tisenkaonáijin, ji Jeobá Ninánajin, nga̱ ji tininʼiotʼalaijin, kʼoa kao jaʼaínli jaʼainrʼoenijin chjotankjín jebi” (2 Crón. 14:11). Ningalani me jaoya kʼoakji mani je chjotakjoajchánle chjota etíope tikʼoajinni chjotakjoajchánle naxinandá Judá, je Asá be nga je Jeobá ngisaa tse nganʼio tjínle nga koasenkao je naxinandále. Kʼoa je Jeobá tsakasenkao kjoaixi je naxinandá Judá. Kisikjeson je chjotakjoajchán etíope (2 Crón. 14:8-13). Ningalani tsín ʼyaa jmeni xi koa̱nná nga jngó jngoá, ʼyañá nga tsín tongantsjai nga nda kuiyoaa. Si̱kjaʼaitsjeen nga kʼoakitso je Jesús nga koa̱njtikená chjota kʼianga jetífetʼa nichxin (Mat. 24:9). w20.09 17, 18 párr. 14-16

Aliʼya xi nda sʼe kon nga nokjoaʼaonle. Tonga sikinroajenjin tokoán tsakui nʼio si̱kjáojiaan (Prov. 24:10). Jósʼiaan tsa ʼya xi jokuitsoná. Koaan chjénngilee je Pablo nga tsjoa tsakáya kon ninga kinokjoaʼaonle. Koaan tsjoa kjoáyaa tokoán kʼianga nchja̱ʼaonná je chjota kʼoa batiochjoaná, nga̱ kui xi bakó nga ñaki chjotatjenngile Cristo maa (1 Ped. 4:14). Je Jesús kʼoakitso nga chjota koaitjenngike je chjotatjenngile (Juan 15:18-20). Kʼoa kʼoakoan nga siglo 1. Tobʼelañá, je chjota xi costumbrele chjota griego kitjenngi, kʼoakitso nga tsín jme chjíle chjotatjenngile Cristo kʼoa nga tsín xo̱n male. Kʼoa je chjota judío kʼoakitso nga toxkia chjota kʼoa nga “tsín tsa tse kiskotʼaya” je pastro Pedro kao Juan (Hech. 4:13). Nʼio nkjín chjota xi tsín chjí tsabekon je chjotale Cristo, nga̱ tsín kjoa política kitsjonjin yaole kʼoa alikui kjoajchán kijin. Ningalani tsín nda kisikʼaxki̱ chjota, alikui kui tsakʼéchjoale nga tosi tonda kitsoyason. w20.07 14, 15 párr. 3, 4

Je pastro Juan nʼio tjao koanle je ndsʼe̱ kʼoa kui xi koanmele nga nʼio katasatío je kjoamakjainle. Jebi yaa bakó jotso je kjoafaʼaitsjen xi faʼaitʼa nga jan xo̱n xi kiski. Nʼio tsjoánganʼioná nga ʼyaa nga kʼoati tjío kon je chjotale Cristo xi ya ngʼajmi koatexomakao Jesús jokisʼe kon je pastro Juan (1 Juan 2:27). Si̱tjosoán je kjoafaʼaitsjen xi kitsjoa. Ñaki kʼoakʼoé tokoán nga kʼoasʼin koanngínkoaa yaoná jotso je Jeobá kʼoa si̱tjosonlee ngantsjai. Chótʼayajiaan je Biblia kʼoa alikui jao kʼoé tokoán nga ñaki kʼoatjín jmeni xi tso. Chótʼayajiaan xi tʼatsʼe Jesús ánni nga nʼio sʼe̱jnani je kjoamakjainná. Alikui kui kjuintjenngiaa je kjoachjine xi tjín sonʼnde kʼoa jmeni xi tso je chjota xi yátsʼi̱n binyále Niná. Kʼoénelee yaoná nga tsín kʼoakji nda sʼiaan kʼoa kʼoakji chʼao sʼiaan, kʼoa tsín kuijnyíjée. Kʼoaiʼndee nga kui kjoatéxomale Jeobá katabándiaaná. Kuisenkoaa je ndsʼee nga kixi katafitʼale Niná nga si̱chatʼalee kʼoa kuinyakoaa je xi nganʼio machjénle. Tsa kʼoasʼiaan, tosi tonda kixi kjuintʼalee Niná ninga tojme kjoa xi kuitjátojiaan. w20.07 24, 25 párr. 15-17

Nga tsjoakená Jeobá tsjoáxáná nga jngó jngoá ya jinjtín. Ninga kjaʼaí kjaʼaí xá kjinená nʼio chjí bekonná Niná kʼoa binyakaongañáñá xíngiaa. Je Pablo kʼoakitso nga tsín koa̱n i̱ kʼuínlee je ndsʼee: “Likui machjénle” (1 Cor. 12:21). Tsa mená nda kjuinkoaa je ndsʼee ya jinjtín, tjínnele chjí jchatokoán kʼoa kuinyakaongañá xíngiaa (Efes. 4:16). Tsa jtín sʼin si̱xá, ngisaa sʼe̱ kjoatsjoacha ya jinjtín kʼoa ngisaa nda kuiyoaa ngatsʼiaa. Ngatsʼi xi chjotajchínga sʼin tjío kao nganʼiotsjele Jeobá tjoéjinni kʼoa kjaʼaí kjaʼaí jmeni xi male sʼín nga jngó jngó (1 Cor. 12:17). Tjínkʼa xi chriansʼa nga chjotajchínga sʼin tjío kʼoa kje kʼoakji kjoafaʼaitsjen tjínjinle joni xi ngikʼa. Tjínkʼa xi tsín tikʼoamanile nga tse síxá nga jejchínga kʼoa tsakui nga chʼin bʼetʼale. Je xi chjotajchínga sʼin tjío alikui koa̱n kʼoasʼin sikjaʼaitsjen nga tsín machjénle nganʼiole chjotajchínga xi ngikʼa. Tosaa kui tjínnele koaitjenngi nga jngó jngó je kjoafaʼaitsjen xi kitsjoa Pablo, tojo tso ya Romanos 12:10. w20.08 26 párr. 1, 2; 27 párr. 4

Je Jeobá jé jtínle síchjén kʼianga bándiaaná nga ya kjuinyaa je ndiaa xi ya kuichokaoná kjoabijnachon xi tsínkʼia fetʼa. Kʼianga tsoyanda ijngokʼaná jmeni xi tsoya je Biblia kʼoa kʼianga kui tsoyaná josʼin kjuinkoaa yaoná, nitjosonñá. Tonga jósʼin nikjaʼaitsjeen tʼatsʼe jmesani xi bʼéndajin je naxinandále Niná. Jolani tsa tsín tiya biyoxkóñá ya Ndʼia jña chotʼayá. Xi koasenkaoná nga tsjoa sʼe̱ tokoán kʼiaa nga kui si̱kjaʼaitsjeen nga tʼatsʼe Jeobá tínroani je xá xi tinʼia kʼoa nga je tíbándiaale naxinandále (Col. 3:23, 24). Je rey David nda choa̱ tsakʼéjnaná nga kitsjoanganʼio nga kisʼenda je yo̱ngo̱. I kitso: “Tonga ʼyáni an kʼoa ʼyáni je naxinandána nga kʼoasʼin kʼoaitʼalaijin tsojmi jebi. Nga̱ tʼatsi tínroani ngayeje, kʼoa tikui tibʼainilaijin jmeni xi tibʼaináijin” (1 Crón. 29:14). Kʼianga batioá je tao̱n xi kʼoasʼin kjimachjén nga tíʼmiyason je Énle Niná, kʼoasʼin tibʼainilee je Niná jmeni xi tije títsjoániná. Ningalani tije Jeobá tsjoániná ngayeje, chjí be nga chʼasjeʼaa nichxinná, nga nikjelee nganʼioná kʼoa nga bʼé jmeni xi tjínná kʼianga bʼainganʼioá nga tíʼmiyason je Énle (2 Cor. 9:7). w20.11 22, 23 párr. 14-16

Ñá xi choʼndale Niná maa, ʼyañá nga tsínkui xi chjíle jotjín chjota binyakoaa nga choʼndale Niná ma (Luc. 8:11-15). Je Jeobá tsjoa sʼe kon kʼiatsa tosi tonda kʼuínyasoán kʼoa koakoyalee Biblia je chjota nga̱ tinitjosonñá jmeni xi tsoná, je kʼoa kao ʼNdíle (Mar. 13:10; Hech. 5:28, 29). Nʼio maxátíyale je xá xi nʼia nga ʼmiyalee chjota, nga̱ jenʼio machrianle nga kjoetʼa jmeni xi chon sonʼnde. Tochoa nichxin tíjnaná nga kʼuínyalee chjota. Ali kʼoajinsʼin nikjaʼaitsjain nga kʼia kʼuínyasuin kʼianga jengisa nda kuijnai, ndʼaibi nga machjén nga kʼuínyasuin, nga ngisa jchai jmeni xi tso Biblia, nga nʼiojin koai̱n, kʼoa nga kʼoasʼiain jmeni xi kjineli. Kʼoati tʼiain tsanda ji jotjíosʼín je xi tsʼato jin millón mani xi tjíotsoyason jngo tjíjtsa Sonʼnde je Énle Niná kʼoa sʼeeli je “kjoatsjoa xi tʼatsʼe Jeobá tínroani” (Neh. 8:10; Luc. 5:10). Tosi tonda tʼinyasuin saʼnda nga kʼoakuitso Jeobá nga tsín tisa̱kóyasonni. w20.09 7 párr. 18-20

Alikui koa̱n nga kui nʼio si̱metokoán je tsojmi xi tjín sonʼnde, nga̱ je “kjoachʼanacha xi tsʼe kjoanyiná” kuijin xosikaoná nga tsín titsjoacha koa̱nñá je Jeobá, alikuijin tichjí jchatokonñá je Énle kʼoa alikuijin tikʼuínyanilee je chjota (Mat. 13:22). Tsa mená si̱kuindaa je xi nʼio chjíle xi títsjoáná Jeobá, tjínnele kjitʼanangi chja̱ʼaxinlee yaoná jmeni xi xkón sikʼéjnaná. Tongini si̱kjaʼaitsjeen jósʼiaan tsa ya Internet tichotʼaa, tsa televisión kʼoa tsa jngo película tichotsenlee, tsakui én tífaʼa xi kaníbason je chjota xi yátsʼi̱n binyále Niná kʼoa tsakui jchaa je xi kjoajndí tjenkao. Tsa tongini kuiyondaa, ngotjo jchañá jmeni xi sʼiaan ánni nga tosi tonda miyoná koa̱nsíni je Jeobá kʼoa tsje kuiyosíñá ngixko̱n (Sal. 101:3; 1 Tim. 4:12). Tjínnele si̱kuindaa je tsojmichjí xi títsjoáná je Jeobá, xi tsonile, jmeni xi tsoya je Biblia kʼoa nga kui kjoanda tjínná nga ʼmiyalee xi kjaʼaí. Tsa kʼoasʼiaan, nda sʼe̱ tokoán, tsjoa sʼe̱ná kʼoa tsjoa sa̱tío tokoán nga kuinyakoaa xi kjaʼaí nga katabexkon je Jeobá. w20.09 30 párr. 16-19

Tsa jetsangínsʼenngindá, kʼoasʼin tsakakonilee xi ngikʼa nga makjainná xi tʼatsʼe Jeobá, nga mená si̱xálee kʼoa nga mená ya kuiyojinlee jtínle. Nichxin xi tiyoaa ndʼaibi, josʼin tíbándiaale Jeobá je jtínle kui bakó jokjoan, jmeni xi tjínndajinle kʼoa jotjínni kjoatéxomale. Janla koya kataʼyaa josʼin bakó naxinandále jokjoan je Jeobá. Xi títjon, je “Niná tongóson fikao ngatsʼi” (Hech. 10:34). Nga tsjoakená je Jeobá kitsjoaa je ʼNdíle nga tsakʼéchjíntjainá (Juan 3:16; 1 Tim. 2:6). Je Jeobá, jé naxinandále tísíchjén nga tjíotsoyasonle chjota je Énle, ánni nga sʼe̱nile kjoanichikontʼain xi tjenkao nga tsakʼéchjíntjainá je Jesús. Xi majaoni, je Jeobá ali tsa tjíojen tjíokjájin xále, Ninále kjoanyʼánní (1 Cor. 14:33, 40, TNM). Kʼoa je naxinandále tjínnele nga ndakjoán kʼoendajin josʼin sixá kʼoa nga nda koaikao xínkjín. Xi majanni, jé Jeobá xi nʼio nda bakóyaná (Is. 30:21). Kuinga kui Énle ʼmiyañá kʼianga satíoná kjoajtín kʼoa nga ʼmiyasoán. w20.10 20 párr. 1-3