Marzo

Ali tsakuijin xi mená nga chjota koa̱njtikená kʼoa nga koatiochjoaná nga Énle Niná tichotʼayá. Jan koya tjínni anni nga koa̱n tsjoa sa̱tíoni tokoán kʼianga ʼya xi majtikená. Xi títjon, kʼianga kaná nga ʼya xi majtikená nda biyoaa ngixko̱n Niná (1 Ped. 4:13, 14). Xi majaoni, ngisaa nʼio sʼejna je kjoamakjainná (1 Ped. 1:7). Kʼoa xi majanni, kui kjoanda sʼe̱ná nga koa̱n kuiyoaa ngantsjai nichxin (Rom. 2:6, 7). Nga jejaʼato choatse nga jejaʼáyanile je Jesús, kʼiaa koanjinle je pastrole jósʼin nga tsjoa sa̱tío kon. Ninga kisatele kʼoa kʼoatsakʼinle nga tsín tikatatsoyasonni, tsjoa kisatio kon nga̱ “tsakinle nga kichʼasjengi xi tʼatsʼe jaʼaínle Jesús” (Hech. 5:40-42). Nga tsjoake koan je Jesús alikui je kontrale kitsokjonle. Kʼoasʼin tsakakóni nga tsjoake koan je Jesús nga tsín tsakájñále nga kitsoyason. Nichxin xi tiyoaa ndʼaibi, nʼio nkjín ndsʼee xi tosi tonda tjíosíxále Niná ninga kjoa tjíofaʼatojin. Be nga tsín sichajin je Jeobá jmeni xi tjíosʼín kʼoa nga tsjoake kjima. w21.03 25 párr. 18, 19

Je chjotale Cristo xi ya ngʼajmi koai ali tokʼoajejin kui kjoachoya tjínle kʼianga tsin, jé Jeobá xi kui kjoachoya tsjoále. Je chjotale Cristo xi ya ngʼajmi koai kui síkjaʼaitsjen ʼndeʼnde je kjoachoya xi tjínle, síkʼaxki kʼianga bʼétsʼoa kʼoa jemele nga sʼe̱le kjoanda jebi ya ngʼajmi. Alikui majinle jókjoan yao xi kʼoa̱, tonga kui nʼio símekon nga ya koatiokao Jeobá, Jesús, ánkje kao xi ngikʼa chjotale Cristo xi kʼoati ya ngʼajmi koai, kʼoa nga ya koatexomakao Jesús (Filip. 3:20, 21; 1 Juan 3:2). Je xi kjaʼaí barré kui koyale nga i̱ Sonʼnde koatio ngantsjai nichxin, kʼoa toxá kui nimetokonñá ngatsʼiaa xi chjotaa. Kui xi mele nga jekatafaʼai nichxin nga sixá nga ʼndenaxó koa̱n Sonʼnde, nga kʼoenda ndʼiale, nga kʼoentje tsojmi kao naxó, kʼoa nga likui tijme chʼin sʼe̱nile je kʼoa kao xtile (Is. 65:21-23). Nʼio mele nga nkjín ʼnde skoe̱xkon, nga skoe̱ nindo, skoe̱ jñájchá, skoe̱ ndáchikon kʼoa nga skótʼayason jmeni xi kisinda je Jeobá. Tonga je xi ngisa tsjoa batío kon, kuinga sa miyo sa miyo koa̱n kao Jeobá nga nyaon nyaon. w21.01 18, 19 párr. 17, 18

Kʼianga jekisikjeson naxinandá je chjota babilonio, je xi jaʼa i kitso: “Tokjitianí, tsín chjota, tsín cho̱, kʼoa jé tsakʼaile chjota caldeo” (Jer. 32:43). Jao sientola nó koanskanni kʼianga jekʼoakitso je Joel jmeni xi koa̱n, jé Jeobá xi kʼoasʼin koanmele nga tongini kʼoakitso je Jeremías jmesani xi koa̱n. Kʼoakitso nga je chjota xi sikjeson Jerusalén kjoanʼio koasjai je chjota israelita xi tsʼen kʼoa sikatíonʼio ngatsʼi. Ya Jeremías 16:16, 18 itso: “Nkjín chjota xi bʼasjengindá jti̱ kuinchjale, tso je Jeobá, kʼoa jé jtsoa̱no. Xijekoa̱n, nkjín chjota xi cho̱ síkʼien kuinchjale kʼoa jé sikʼienno ngakjijnda jñani nindo tjín kʼoa jñani tixʼa̱ngi je na̱xi̱”. Kʼoa itsosa: “Kjoañʼai tsjoale xi totʼatsʼe jéele”. Ni yajinla jinndáchikon kʼoa ni yajinla jinjñájchá koa̱n koatioʼma je chjota israelita xi tsín kʼoakoa̱nnile je jéele. Kjoanʼio koa̱nsjaile je chjota babilonio. w20.04 5 párr. 12, 13

Je Lot alikui ndi̱to̱n kisitjosonle Jeobá kʼianga nʼio tjínle kjoandosin nga kʼoasʼin tsakai. Tsakui nichxin kʼoakuixoán nga tsín koanmele kisitjoson. Tonga je Jeobá likui kʼoasʼin kisikjaʼaitsjen, tosaa “tsakakóle kjoamatokon”, kuinga je ánkje kiskoéni ntsja ngatsʼi nga tsakʼaonsje ya naxinandá (Gén. 19:15, 16). Ánni tsakakónile kjoamatokon Jeobá je Lot. Nkjín koya tjínni anni. Tsakui nichxin likui kitso kon nga kitsjionkon ndʼiale xi totʼatsʼe chjota xi xin ʼndele. Tonga ali tsa tokuijin jebi xi kitsokjonle. Tsakui nichxin kisʼejinle nga jao rey kitsaoya nga̱jao̱ xi tiya chrianni (Gén. 14:8-12). Tsakui nichxin kui kisikjáojinje̱ jókoa̱nni je chjoónle kao je xtiyánchjínle. Kʼoa nga nyiná koan, ndajin kisʼe ndʼiale (Gén. 13:5, 6). Alikui tjínnele nga kui jebi tsakasenngini yaole nga tsín tokjoan kisitjosonle Jeobá. Tonga Niná alikui kui kuenta kisʼin jñani chʼao kisʼin je Lot, tosaa kʼoasʼin tsabekon nga “chjota kixi koan” (2 Ped. 2:7, 8). w20.04 18 párr. 13, 14

Tsakui nichxin je xi tsabeli saʼnda nga sʼa ʼndí tisui, alikui kʼoasʼin síkjaʼaitsjen nga jetjínli kjoafaʼaitsjen. Tonga je Jeobá nda bexkonli kʼoa be jmeni xi koa̱nli sʼiain (1 Sam. 16:7). Timiyui je Jeobá tojo kisʼin je David. Kʼianga kui kisikjaʼaitsjen David jmeni xi koannda, kui kisikjaʼaitsjenjin jméni xi bakóyale xi tʼatsʼe Jeobá (Sal. 8:3, 4; 139:14; Rom. 1:20). Xi ijngosani tijélai nganʼio je Jeobá. Tobʼelañá, tsa besinli je xti xi ñatjen ʼmi skuela nga testigole Jeobá mai, je Jeobá tijélai nganʼio nga chókjoajinli. Tʼintjenngi je kjoafaʼaitsjen xi tsjoá Biblia kao jmeni xi tso je xo̱n kao video xi bʼasje naxinandále Niná. Ngisaa koa̱nnʼiotʼai je Jeobá nga jchai josʼin koasenkaoli, kʼoa ngisaa ndasʼin skoe̱konli xi ngikʼa kʼianga skoe̱ nga je Jeobá ninʼiotʼai. w21.03 3 párr. 7

Je xi nʼio miyo fao bʼéyanajmíle xínkjín jotjío kon. Kʼoatisʼinni xi kao Jeobá. Yaa Biblia faʼaitʼa josʼin síkjaʼaitsjen kʼoa jotjín kon. Kʼoa ñá kʼiaa chjakaonajmiá kʼianga bʼetsʼoalee. Kʼianga kʼoétsʼoalee koaan kʼoéyanajmílee jotjín je tokoán kʼoa josʼin nikjaʼaitsjeen. Nʼio tsjoa sʼele je Jeobá kʼianga bʼetsʼoalee. Je Jeobá tsjoakená, nrʼoéná kʼoa basenkaoná. Sakʼoa ngotjo basenkaoniná. Tonga sakʼoa machjén nga nkjín kʼa kʼoétsʼoaa. Tojosʼinni, alikui jao tjínná nga koasenkaoná kʼianga machjénná. Tsakui nichxin likuikjoan kʼoakoa̱n josʼin tichoyalee. Tobʼelañá, ʼndele nga kjoaʼaxinná je kjoa xi tibitjatojiaan, koaanle tsjoáná je kjoachjine kao nganʼio xi koasenkaoná nga chókjoajinná (1 Cor. 10:13). Jngo koya josʼin koakoá nga ʼyachjiá nga ma bʼetsʼoalee Niná kʼiaa nga kjuintjenngiaa je kjoafaʼaitsjen xi tsjoáná, nga̱ itso: “Tʼetsʼoao ali nichajinjion ngantsjai” (1 Tes. 5:17). w20.05 27, 28 párr. 7, 8

Je xi nʼio kjin toka alikui xin kotsen ánni nga tsín sa̱téngini. Ninga tsao binyatjeen ijngokʼa kʼoa tosi tonda toka. Alikui kui fini jme xi síkaténgi, tosaa kui kuenta sʼín nga kuicho jña saʼnda tíchoyale kʼoa nga kuinje̱le. Tsakui nichxin nkjín kʼa sa̱téngiaa xi totʼatsʼe jmeni xi bixoán kʼoa jmeni xi nʼia, kʼoa tsa tsín sa̱sénnáje̱ jmeni xi sʼin je ndsʼee. Kui kʼoamani nga chjotajée maa ngatsʼiaa kʼoa nga ya timangínyaa je ndiaa xi nrʼoeya kji xi kjoabijnachon kuichokaoná. Toxá kʼoama sakʼoani nga tsín sasénná tsa tjín xi koa̱ntʼeen (Col. 3:13). Tonga tsín koa̱n kui kjuinñá jmeni xi sikaténginá, tosa kui kuenta sʼiaan je kjoatjao xi choyalee kʼoa tosi tonda tókaa. Alikui koa̱n nga ya kuiyotsʼatjeen, xi tsonile tsín kʼoéngijtiaa tokoán. Tsa yaoná si̱jtilee tsínjin kuichotjenngiaa je kjoatjao xi kʼoainá, kʼoa ñájin xosi̱koaa nga ñʼai koa̱nle xi ngikʼa nga kao kjoatsjoa sixále Jeobá. w20.04 26 párr. 1; 28 párr. 8, 9

Je Daniel kui kinchja̱ni tʼatsʼe jngo xkóson xi síxkónkjije xi nkjín koya ki̱cha̱ koanndani. Nga jngó jngó koya ki̱cha̱ xi koanndani je xkóson xi síxkónkjije, jé tsoyanile chjotaxá xi bʼetʼale je naxinandále Niná. Je ndso̱ko̱ xi ki̱cha̱ koanndani kʼoa xi ndási títsʼónjin, jé tsoyanile chjotaxá xi tojngo kisʼin yaole, je Gran Bretaña kao Estados Unidos. Kʼoa chjotaxá jebi tojo tjío kʼianga kjoaʼaísíkjeson Chjotaxále Niná je chjotaxá sonʼnde, tojo tso je én xi tongini kinokjoa. Je pastro Juan kʼoati nchja̱ni je naxinandá xi nʼio tse nganʼio tjíosʼele, xi kʼoati tjíobʼetʼale je naxinandále Jeobá. Je én xi kiski jngoo cho̱ xi ñato mani jko̱ síkʼaxki̱. Xi mani ñato jko̱ cho̱ jebi, jé tsoyanile naxinandá xi nʼio tse nganʼio tjíosʼele, je Gran Bretaña kao Estados Unidos. Nʼio tjínle kjoandosin jebi, nga̱ to ñato mani jko̱ cho̱ jebi. Kʼoa xi mani ñato jko̱, xi tsonile, je Gran Bretaña kao Estados Unidos tojo tjíobatéxomasa kʼianga kjoaʼaísíkjeson Jesús, kao ánkjele kʼoa kao xi 144,000 mani. Kʼiaa kjoeson ngatsʼi chjotaxá sonʼnde (Apoc. 13:1, 2; 17:13, 14). w20.05 14 párr. 11, 12

Tʼatsʼe Niná nroani kjoabijnachon kao kjoatsjoacha. Nga tsjoakená je Jeobá alikui nokjoaan, tsjoa sʼe tokoán kʼoa sʼejngo tokoán. Xi chjotale Cristo maa, alikui ñá xi kuixónñá tsa mená koakoá kjoatsjoacha kʼoa tsa mai, ya Biblia kʼoatso nga tjínnele koakoá kjoatsjoacha (Mat. 22:37-40). Kʼianga ngisa ʼyaxkoaan je Jeobá, ngisaa choa ñʼai maná nga nitjosoán xi títjon kjoatéxoma, je Jeobá ñaki kixi jmeni xi sʼín, tsjoakená kʼoa bakó nga mandosinle xi tʼatsaan. Tsakui nichxin ngisa ñʼai maná nga nitjosoán je xi majaoni kjoatéxoma. Ánni. Kuinga kʼoati chjotajée ma je ndsʼee joni ñá, kʼoa sakʼoajin kui kʼoasʼin kʼoa kui kʼoakuitsoná xi tsín sa̱sénná kʼoa xi sikiʼaonná. Kuinga koanmenile je Jeobá nga kui kinchja̱ kʼani je xi kiski Biblia jósʼin koakolee kjoatsjoacha xíngiaa kʼoa ánni nga kʼoasʼianñá. Jngo xi kui kiski je Juan (1 Juan 3:11, 12). w21.01 8 párr. 1, 2

Ni jekjoatse kʼoa ni chriansʼa tinixálee Jeobá, machjén nga si̱kjaʼaitsjenjiaan jebi: “A tibʼenele yaona nga tsínkui katasíkinjena jmeni xi batíobasen je Na̱i nga mele jao sʼe̱ ni̱ma̱na”. Tobʼelañá, jmé xi nʼia kʼiatsa jngo sén ʼyaa kʼoa tsa jngo película tichotsenlee ya televisión kʼoa tsa ya Internet xi kjoajndí ska̱niya jkoaa. Tsakui nichxin kʼoakuixoán nga tsínkui sén tichotsenlee jñani tokjiojti chjota. Ninga kʼoalani, machjén nga si̱kjaʼaitsjenjiaan tsakui tísíchjén je Na̱i nga mele jao kʼoe ni̱ma̱ná. Jebi yaa mangóson joma kʼianga jngo ki̱cha̱ chanisʼenjiaan jngo yá. Tsakui nichxin tochoa choa fisʼenjin kʼoa tobijbi bakjan. Je sén xi kjoajndí kaníya jkoaa yaa mangóson ki̱cha̱ jebi. Tsakui nichxin kʼoasʼin matsen nga tsín chʼaotjín, tonga kui xosikaoná nga kui jée ska̱jiaan xi jao kʼoe ni̱ma̱ná kʼoa nga tsín tikixi kjuintʼanilee Jeobá. Kuinga tsín kʼoaiʼndesíñá nga kui katafaʼasʼenjin ni̱ma̱ná je xi chʼaotjín. Si̱kuindaa je ni̱ma̱ná nga tsín jao katasʼe kʼoa kuijkónchaa je jaʼaínle Jeobá. w20.06 12 párr. 14, 15

Kʼianga faʼai ijngokʼani xi jekisikjin, machjén nga tosi tonda kuinyakoaa kʼoa kʼoainganʼiolee. Tsakui nichxin kʼoatjío kon jokisʼe kon ti xi kinchja̱ni je Jesús (Luc. 15:17-24). Kʼoa nga tosʼa faʼai ijngokʼa, machjén nga sichriantʼa ijngokʼale Jeobá. Kuinga machjénsíni nga kuinyakoaa nga nʼio katasatío ijngokʼa kjoamakjainle. Kʼianga kitsoya je Jesús tʼatsʼe barré xi kicha, kʼoakitso nga je xi koʼnda básonxja kʼoa fikao ngindiani jña tjío xikʼa barré. Je chjota xi koʼnda kisikʼaya nichxin kʼoa tsee kjoama̱ tsakʼéngi nga koansjaile. Tonga be nga tjínnele koasenkao nga̱ tsín chókjoale nga toje (Luc. 15:4, 5). Tsakui nichxin machjén nga si̱kʼayalee nichxinná kao nganʼioná xi jekisikatío xále Niná nga katasímiyo ijngokʼa je Jeobá. Kui koasenkaoná je nganʼiotsjele Jeobá, je Biblia kao xo̱n xi bʼasje naxinandále Niná. Kao kjoatsjoa si̱tjosoán tsa ñá kʼoakuitsoná xi chjotajchínga sʼin tjío nga kuinyakoaa xi jekisikatío xále Niná. w20.06 28 párr. 14, 15

Ngatsʼiaa xi chjotale Cristo maa tjínnele koakoá kjoatsjoacha. Tonga kʼoati tjínnele sʼe̱ná je “kjoachjine kao kjoaʼisentakon” xi tsʼe Niná (Filip. 1:9). Tsa tsín kʼoasʼiaan, kuijin kjoaʼasʼenjin kjoafaʼaitsjenná xi tsín kixi tjín kʼoa jejin kʼoanachaná je chjota xi yátsʼi̱n binyále Niná (Efes. 4:14). Kʼianga nʼio nkjín xi tsín tichjotatjenngile Jesús koanni nga siglo 1, je pastro Pedro ñaki tsakʼéjngo kon nga kui “én xi tsjoá kjoabijnachon ngantsjai” kitsoya je Jesús (Juan 6:67, 68). Ningalani tsín koanjinyejele Pedro nga kʼia jmeni xi kitsoya je Jesús, kixi kitʼale nga̱ kisijinle yaole jokjoantjínni xi tʼatsʼe Cristo. Tsa ñaki sʼe̱jngo tokoán tsanda ñá nga ñaki Énle Niná jmeni xi tsoya Biblia, nʼio sʼe̱jna je kjoamakjainná kʼianga kjoa kuitjátojiaan kʼoa kuinyakaoñá xi kjaʼaí nga nʼio katasatío je kjoamakjainle (2 Juan 1, 2). w20.07 8 párr. 2; 13 párr. 18

Koaan kuinyakoaa je ndsʼee nga tosi tonda kixi katafitʼale Niná kʼianga koakolee kjoamatokon (1 Juan 3:10, 11, 16, 17). Tjínnele tsjoacha koaan xíngiaa ni nda tiyoaa kʼoa ninga kjoa tjínná. Tobʼelañá, a ʼyaxkon jngoaa je ndsʼee xi xínkjín kisicha, tsa machjén nga si̱nʼioá kon kʼoa tsa jmesa nganʼio xi machjénle. Kʼoa tsa kjoaxkón kichone je ndsʼee, a tjínjinná tsa nganʼio machjénle nga sʼe̱ndaya je niʼyale kʼoa tsa je Ndʼia jña chotʼayá. Kʼiatsa ñaki tsjoacha kjoaixiaa je ndsʼee kʼoa mamachaa, kuinyakaojián kʼoa alikuijin to én kuinókjoaa. Kʼianga bakolee kjoatsjoacha xíngiaa, jé Niná tichjenngilee (1 Juan 4:7, 8). Jngo koya josʼin bakoá nga tjínná kjoatsjoacha kʼiaa nga nichatʼalee xíngiaa. Tobʼelañá, kʼiatsa ʼya xi sikiʼaon kjoafaʼaitsjenná, kui kjoatsjoacha xosikaoná nga si̱chatʼalee kʼoa si̱chajiaan jmeni xi koan (Col. 3:13). w20.07 24 párr. 14, 15

A tsen tsen sa̱kóyale nga jngó jngó xi kjoaʼáyanile tojosʼin ʼmiyalee ndʼaibi je chjota. A kʼoati koatiojtín kʼoa a sa̱kóyale nga koa̱n kuitsoyale je xi skan kjoaʼáyale. Alikui ʼyaa jokjoan koa̱n. Je xi ʼyaa kuinga “kui kjoankjíntokonle Jeobá sʼe̱ ngakjijnda sonʼnde” kʼianga jekjoetʼa xi jngo jmi nó koatexoma Jesús (Is. 11:9). Nʼio tsjoa koaya tokoán je xá xi sʼe̱ xi jngo jmi nó. Je xi jngo jmi nó, ngatsʼi choʼndale Jeobá tjínnele tosi tonda sikʼantjaiya yaole nga ndasʼin koatio ngixko̱n Niná. Kuinga machjénsíni nga ngasin nganda kuinyakao je xi kjoaʼáyanile nga tsínkui jée katasíkinjele kʼoa nga kʼoasʼin katafikao yaole josʼin mele Jeobá (1 Ped. 3:8). Kʼianga skoe̱ je chjota xi kjoaʼáyanile nga nangitokon je choʼndale Niná kʼoa nga kʼoati bʼénele yaole tsanda je nga tosi tonda nda batio ngixko̱n Niná, kui xosikao nga kʼoati skoe̱xkón Niná (Filip. 2:12). w20.08 16 párr. 6, 7

Tsa kjuintjenngiaa je kjoafaʼaitsjen xi kitsjoa Pablo kʼoa tsa kuenta sʼiaan jme xi nʼia, jchañá nga tjín jmeni xi maná nʼia xi tsín kʼoasʼín xi kjaʼaí. Tobʼelañá, tsakui nichxin jngo xi chjotajchínga sʼin tíjna tsín nanda male tsjoá kjoanokjoaya, tonga nʼio nda tsoyason. Tsakui nichxin tsín nanda male bʼéndajin je xá xi sʼe ya jinjtín, tonga tsakui nichxin je ngisa básjai ndsʼee kʼianga síjéle kjoafaʼaitsjen nga̱ nʼio ndʼé. Kʼoa tsa kʼoasʼin ʼyaleje̱ nga nʼio nda chjota (Heb. 13:2, 16). Kʼianga kuenta sʼiaan jmeni xi maná nʼia tsjoa sa̱tío tokoán josʼin bʼainganʼioá ya jinjtín. Kʼoa alikuijin koa̱nxinkonchá je ndsʼee tʼatsʼe jmeni xi male sʼín. Tojme xá xi kjinená ya jinjtín, tjínnele sa nda sa nda koa̱nná kʼuínyasoán je Énle Niná. w20.08 24 párr. 16-18

Je kjoanokjoaya xi “La grande muchedumbre” ʼmi, jé ndsʼee Joseph Rutherford kitsjoa kʼianga nó 1935 nga kisʼejna kjoajtíntse ya Washington (Estados Unidos). Kʼianga kitsjoa kjoanokjoayale je ndsʼee, kui kitsoya ʼyá xi nchja̱ni je chjotankjín xi síkʼaxki̱ Apocalipsis 7:9. Nga kʼia, kʼoasʼin kisikjaʼaitsjen je naxinandále Niná nga je tínchja̱ni xi ya ngʼajmi koai tonga xi tsín nʼio kixi kitʼale Niná. Je ndsʼee Rutherford kui Biblia kisichjén nga kitsoya nga je chjotankjín ali tsa jejin kitjoejin nga ya ngʼajmi koai, kʼoakitso nga ya maxki̱kao xi kjaʼaí barré ʼmile xi kjoaʼatojin tjínkon kjoañʼai xi nʼio tse, kʼoa xi i̱ Sonʼnde koyale koatio (Apoc. 7:14). Je Jesús i kitso: “Tjínsana xi kjaʼaí barré xi tsín tsa i̱ tjíojin. Kʼoati jebe machjénna nga kjuinroakoa, kjuinrʼoé jta̱na. Tojngo koa̱njtín, kʼoa tojngo koa̱n xi skoʼnda” (Juan 10:16). Je xi kjaʼaí barré ʼmile jení testigole Jeobá xi kixi tjíofitʼale Niná xi kui kjoachoya tjínle nga i̱ Sonʼnde koatio kʼianga jeʼndenaxó koa̱n (Mat. 25:31-33, 46). w21.01 14 párr. 1, 2

Tjínnele nga kʼoénelee yaoná nga kʼuínyasoán je Énle Niná (Mat. 28:19, 20). Ñá xi chjotaa alikui kʼoasʼin nganá nga kʼoanʼia jmeni xi kjinená. Tokui kʼoanʼia jmeni xi ngisa choa ñʼai maná. Tonga alikui choa ñʼai tíjna nga kui kʼoanʼia xi ngisa tjínle kjoandosin. Kuinga machjénni nga si̱ngalee yaoná nga kʼoasʼiaan. Kʼoa je Jeobá kui nganʼiotsjele síchjén nga basenkaoná nga̱ tsín kʼoakoa̱nná nga toñá (Gál. 5:22, 23). Je pastro Pablo nda kisitjoson je xá xi kisʼenele, tonga kʼoati kitso nga nʼio tsakʼénele yaole nga kui kʼoakisʼin xi ndatjín (1 Cor. 9:25-27). Je Pablo kʼoakitsole je chjotale Cristo nga nda katabʼéndajin kʼoa nda katasítjoson je xá xi kjinele (1 Cor. 14:40). Kʼoati machjén nga kʼoasʼiaan nga kuitjosonná je xále Niná, jolani nga ʼmiyasoán kʼoa nga ʼmiyalee Biblia chjota (Hech. 2:46). w20.09 6, 7 párr. 15-17

Nichxin xi tiyoaa ndʼaibi, nkjín ʼnde jñani tjoʼndená nga ʼmiyaa Énle Niná. Tsa tjoʼndená ya jñani tsaan, si̱kjaʼaitsjenjiaan tsa nda tinixálee Niná kʼianga tiʼndená. Nichxin fetʼa xi tiyoaa ndʼaibi, je naxinandále Niná nʼio títsjoále kjoandosin nga títsoya je Énle Niná, kʼoa ngisaa nʼio tíʼmiyason ndʼaibi tikʼoajinni nichxin kjoatse. Nʼio tsjoa tjío tokoán, nga̱ ngisaa nkjín koya josʼin koa̱n si̱xálee je Jeobá. Tsa tiʼndená nga ʼmiyasoán, jméni xi koa̱n sʼiaan (2 Tim. 4:2). Si̱kjaʼaitsjenjiaan josʼin tiyoaa. Koaan ngisasa tse si̱xálee Jeobá nga precursor koaan, kʼoa tsa jngoje̱ xíngiaa xi kui koa̱n. Alikui koa̱n tsa to tao̱n nʼio kjoásjee kʼoa tsa nkjín tsojmi sʼe̱ná, nga̱ toya jchajin jebi nga kjoaʼaí kjoañʼai xi nʼio tse (Prov. 11:4; Mat. 6:31-33; 1 Juan 2:15-17). Nʼio nkjín ndsʼee kao tichjaa xi kjaʼaí én tjíokotʼaya nga tjíotsoyason je Énle Niná. Je naxinandále Niná sa nkjín sa nkjín én tísíkʼatoya je xo̱n xi Énle Niná yʼangini, jetsʼato 1,000 én tífaʼatoya. w20.09 16 párr. 9-11

Jngo xi nda sítjoson xále nga sondado ma, kixi fitʼale je xi bándiaale. Sítoánntjai je xi tsjoake kʼoa xi chjí bekon. Je Pablo kʼoakitsole je Timoteo nga katabexkón je Niná, xi tsonile, nga tsjoake katama kʼoa nga kixi katafitʼale (1 Tim. 4:7). Kʼianga nʼio tsjoacha koaan je Niná kʼoa nga kixi kjuintʼalee alikuikʼia si̱kʼéjnaa je Énle (1 Tim. 4:8-10; 6:6). Jngo xi sondado ma bʼénele yaole nga sítjoson je xá xi sʼenele. Je Timoteo nda kisitjoson je xá xi kisʼenele, kisitjoson je kjoafaʼaitsjen xi kitsjoale Pablo nga tsínkui xi chʼaotjín kʼoakatasʼín, nga kui xi ndatjín katabakó kʼoa nga je katasímiyo chjotale Cristo (2 Tim. 2:22). Tonga tjínnele nʼio tsakʼénele yaole nga kʼoakisʼin. Kʼoati tjínnele kʼoénelee yaoná tsanda ñá nga tsínkui katasíkinjená kʼianga kui xi chʼaotjín nimetokoán (Rom. 7:21-25). Kʼoati machjén nga tosi tonda si̱ndayaa yaoná kʼoa nga kui xi ndatjín kʼoasʼiaan (Efes. 4:22, 24). Ninga jenʼio kijtaná nga kanixá, tsakui nichxin machjén nga kʼoénelee yaoná nga kjuian je kjoajtín (Heb. 10:24, 25). w20.09 28 párr. 9-11

Machjén nga tsejta koaan kʼiatsa mená nga tsjoátʼale yaole je Niná kʼoa koaisʼenngindá je xi tiʼmiyalee Biblia. Tonga kʼoati machjén nga si̱kjaʼaitsjenjiaan tsa me kjoaixile nga je Jeobá sixále kʼoa tsa mai. A bakó nga tísítjoson jmeni xi kitso je Jesús. Axo tokui kotʼayani nga nda tsole jmeni xi faʼaitʼa Biblia. Kjitʼa si̱kjaʼaitsjenjiaan tsa me kjoaixile nga je Jeobá sixále. Tobʼelañá, a kʼoatso jotjín kon xi tʼatsʼe Jeobá, a bʼétsʼoale Jeobá (Sal. 116:1, 2). A tsjoake nga bʼéxkia Biblia (Sal. 119:97). A ntsjaintsjai fi kjoajtín (Heb. 2:12). A jetísíkʼantjaiya yaole. A fákaonajmíni xínkjín kao miyole tʼatsʼe jme xi jekjimajinle (Sal. 9:1). Kʼoa a mele nga testigole Jeobá koa̱n (Sal. 40:8). Tsa tsín kʼoatísʼín, chósonnilee jokʼuínlee nga chjónangilee ánni nga tsín kʼoatísʼínni, kʼoa ngasin nganda kʼoakʼuínlee jmeni xi tjínnele sʼin. w20.10 18 párr. 14, 15

Je Jeobá nda kjoéjin ngantsjai jmeni xi sʼín, kʼoa kʼoati nda kiskoejin jmeni xi kisʼin je José kao María. Nga jekoanjchínga je Jesús chaan toje kiskoejin jmeni xi kisʼin (Gál. 6:5). Joni tsa ñá, kʼoati kisʼele kjoandái nga koan kiskoejin tojmeni xi mele kisʼin, tonga xi ngisa chjí tsabekon kuinga nda kʼoéjna ngixko̱n Jeobá. Kʼianga jekoanjinle Jesús jme xá kisikasénni Jeobá i̱ Sonʼnde kisitjosonle (Juan 6:38). Koanjinle nga nʼio nkjín chjota koa̱njtike kʼoa alikuijin nda kisʼe kon nga kʼoakoa̱ntʼain, tonga kisitjosonle je Jeobá. Kʼianga kisʼenngindá nga nó 29, kui ngisa kitsjoale kjoandosin nga kʼoakisʼin xi mele Jeobá (Heb. 10:5-7). Ninga kʼianga tífaʼá kjoañʼai ya tʼayá tojo kʼoatsakʼé kon nga je Jeobá sitjosonle (Juan 19:30). w20.10 29 párr. 12; 30 párr. 15

Tsa ʼyaa nga chʼin tíbʼetʼale jngo ndsʼee ya jinjtínná, tsa xínkjín kisicha kʼoa tsa kjoa tjínle, koaan si̱jélee je Jeobá nga katabasenkaoná nga kui én xi nda tso chja̱koaa je ndsʼee kʼoa tsa josasʼin kuisenkoaa. Tsa kʼoasʼiaan, ndajin sʼe̱ kon je ndsʼee (1 Ped. 4:10). ʼYañá nga je Jeobá koasenkaoná. Sakʼoa je Jesús kao ánkje síchjén nga basenkaoná. Kʼoa nga bitjoson josʼin tjínndajinle Jeobá kʼoati síchjén je chjota xi xá tjínle nga basenkaoná. Kʼoati ʼyaa nga kui nganʼiotsjele Jeobá síchjén kʼianga kʼoasatío kon je ndsʼee nga binyakaoná. Joni je Pablo, kuinga kʼoati i̱ bixónñá: “Jé Nainá [Jeobá] xi basenkaona, likui tsakjonnia. Jmé xi koa̱n sikaona chjota” (Heb. 13:6). w20.11 17 párr. 19, 20

Je pastrole Jesús tsabee nga je Jeobá tsakasenkao, nga̱ kitsjoale nganʼio nga koan tsakatío kjoaxkón (Hech. 5:12-16; 6:8). Ninga tsín koa̱nná kʼoasʼiaan ñá ndʼaibi, je Jeobá kui Énle síchjén nga kʼoatsoná nga nda kuiyoaa ngixko̱n kʼoa nga tsjoáná nganʼiotsjele kʼiatsa kjoañʼai chja̱ʼá xi totʼatsʼe nga je Niná tinitjosonlee (1 Ped. 3:14; 4:14). ʼNdele nga kui nʼio si̱kjáojiaan jósʼiaan tsa chjota koaitjenngikená nichxin xi sʼa nroa, tosa kui si̱kjaʼaitsjeen jme xi sʼiaan ndʼaibi nga ngisa si̱nʼiotʼaa je Jeobá nga je koasenkaoná kʼoa nga je kʼoasjentjainá. Si̱kjaʼaitsjeen nga i̱ kitso Jesús: “An tsjoano én kao kjoankjíntokon xi tsín tsa kui koa̱nle kʼoetʼano, ni kʼoekjaoʼakaojinno ngatsʼi xi kontra koaino”. Kʼoa i kitsosa: “Xi totʼatsʼe kjoatsejtano si̱kinjao kjoabijnachonno” (Luc. 21:12-19). Ningalani kuiyá je choʼndale Jeobá xi kixi fitʼale, alikui si̱chajiaan nga faʼaitsjenle Jeobá xi tʼatsʼe kʼoa sikjaʼáyanile. w21.01 4 párr. 12

Ali tsa jejin títjon pastro Pablo xi kui kiskoyale nga sʼe̱ kjoafaʼáya. Kʼoati kui kiskoyale je Job, nga̱ tsakʼéjngo kon nga kjoaʼaítsjenle Niná xi tʼatsʼe kʼoa nga sikjaʼáyanile (Job 14:7-10, 12-15). Je xi kʼoati nʼio makjainná ñá xi chjotale Cristo maa kuinga kjoaʼáyanile je kʼien (Heb. 6:1, 2). Je Pablo kui nʼio kinchja̱ni ya capítulo 15 xi tsʼe 1 Corintios. Josʼin kitsoya nʼiojin tsakinyakao je chjotale Cristo xi tsakatio nga siglo 1. Kʼoati tsjoánganʼioná tsanda ñá ni jekjoatse kʼoa ni chriansʼa tichotʼayá je Énle Niná. Nga jaʼáyanile je Jesús kuinga kʼoati makjainniná nga kjoaʼáyanile je xíngiaa xi jekʼien. Kui jebi “je énnda” xi kitsoyale Pablo je chjotale Cristo xi Corinto tsʼe (1 Cor. 15:1, 2). Kʼoakitsole nga toxitsjoajinni jme xi makjainle tsa tsín makjainle nga jaʼáyanile je Jesús (1 Cor. 15:17). w20.12 2 párr. 2-4

Xi tsakasenkao je Pedro kuinga kui kisikjaʼaitsjen nga kʼoakitsole Jesús nga tsakʼétsʼoantjai nga tsín kjuinroajen je kjoamakjainle. Je Jeobá kinrʼoé nga kʼoasʼin tsakʼétsʼoa je Jesús. Nga jekoanni, tsʼatsenle Jesús je Pedro kʼoa kitsjoanganʼiole (Luc. 22:32; 24:33, 34; 1 Cor. 15:5). Kʼoati tsʼatsenle Jesús je pastrole kʼianga tsín jme jti̱ tjíosokóle tsʼajnda nitje̱n. Je Jesús kitsjoaʼndele je Pedro nga kʼoakatatsole jokji tsjoake. Je Jesús miyo kitsole je Pedro kʼoa kʼoasʼin tsakakónile nga jekisichatʼale nga kitsjoaxásale (Juan 21:15-17). Josʼin tsabekon Jesús je Pedro tsakakó nga kisʼele kjoamatokon, joni je Nʼaile. Kʼiatsa sa̱téngiaa, alikui koa̱n kʼoasʼin si̱kjaʼaitsjeen nga tsín tikʼia sichatʼaniná je Jeobá. Kui xi mele je Na̱i nga kʼoasʼin si̱kjaʼaitsjeen. Tosa kʼoasʼin jchatokoán yaoná josʼin bekonná je Jeobá. Tojo sʼín je Jeobá, koakolee kjoatsjoacha kʼoa jchamatokoán tsa ʼya xi jotsoná kʼoa tsa ʼya xi josíkaoná (Sal. 103:13, 14). w20.12 20, 21 párr. 17-19

Koasenkaoná nga kuenta sʼiaan je xi tsín nda kisʼin kʼoa xi tsín je Jeobá kisinʼiotʼa. Nga kui chótʼayajiaan koasenkaoná nga tsín kʼoati sʼiaan tsanda ñá jokisʼin je. Tobʼelañá, nga títjon, je Asá jé Jeobá tsakásjai kʼianga kjoa jaʼatojin. Tonga nga jeki nichxin alikui tije Niná kisijénile nganʼio, to yaole kini jmeni xi kisʼin (2 Crón. 16:1-3, 12). Tsakui nichxin kʼoasʼin koantsen nga ndatjín nga je chjota sirio sijéle nganʼio nga koaikján kao naxinandá Israel. Tonga alikuini ndasʼin kichomani nga koanskanni. Je Jeobá jngoo profeta kisichjén nga i̱ kitsole: “Nga je kininʼiotʼai rey xi tsʼe Siria kʼoa tsín je kininʼiotʼai je Jeobá Nináli, je chjotakjoajchánle rey xi tsʼe Siria jekitokachjingali” (2 Crón. 16:7). Jebi kui bakóyaná nga tsín koa̱n kʼoasʼin si̱kjaʼaitsjeen nga koa̱nná toñá kʼoéndajiaan je kjoa xi tjínná kʼoa tsa tsín kjoásjeyaa jotso Énle Niná. Sakʼoajin machjén nga kjitʼanangi chjoéjiaan jmeni xi sʼiaan. Nda kuichomani tsa tsín nʼio si̱kjáojiaan kʼoa tsa je Jeobá si̱nʼiotʼaa. w21.01 6 párr. 13-15

Nichxin xi tiyoaa ndʼaibi, tjínkʼa choʼndale Jeobá xi tsín nanda sokóle jmeni xi kjine xi totʼatsʼe nga tsín masonnile tao̱n kʼoa tsakuije̱ nga kjoasi tjín kʼoa tsa kjoajchán tjín ya ʼndele. Kʼoa tjínkʼa xi ndoyá tjíoʼya xi totʼatsʼe kjoamakjainle. Ninga kʼoalani, je chjotankjín nʼio tsjoa tjío kon nga̱ nʼio nkjín tsojmi sʼe̱le kʼoa tosi tonda kuitsoyale je Jeobá kʼianga jetjóxin jmeni xi chon sonʼnde. Kʼianga sikjeson Jeobá jmeni xi chon sonʼnde, je Jeobá sikuinda je chjotankjín nga tsín jme xi koa̱nle. Kʼianga jekjoaʼato kjoañʼai xi nʼio tse, jé Jesús koandiaale “jña títjo nandá xi tíjnakon”, xi tsonile, jé koasenkao nga sʼe̱le kjoabijnachon xi tsínkʼia fetʼa (Apoc. 7:17). Si̱kjaʼaitsjenla jokji kjoanda sʼe̱le je chjotankjín, ninga jmi millón mani je chjota, toje xi tsínkʼia kuiyá (Juan 11:26). Je xi kjaʼaí barré nʼio tsjoále kjoanda je Jeobá kao Jesús nga kui kjoanda tjínle. w21.01 17 párr. 11, 12

Nitje̱n nga tokʼoatjínsa tsakʼejna i̱ Sonʼnde je Jesús, kui kisikjaʼaitsjen je kjoa xi kjoaʼatojin je chjotatjenngile. Nga tsjoake koan, i kitsole je Nʼaile: “Tokui xi bʼetsʼoantje nga kʼoasʼin si̱kuindai, jméni nga je xi tsʼen likui sikaosíni” (Juan 17:14, 15). Je Jesús be nga kʼianga jekoaini ya ngʼajmi, tosi tonda kʼoetʼale Na̱i je xi mele nga je Jeobá sixále. Kuinga machjénni nga je Jeobá sikuinda naxinandále. Ndʼaibi ngisaa machjénná nga je Jeobá sikuindaná, nga̱ je Na̱i i Sonʼnde kinikʼatjenjenngi kʼoa nʼio jtile (Apoc. 12:12). Tjínkʼa xi kʼoasʼin síkjaʼaitsjen nga Niná tjíosíxále kʼianga fitjenngikená, kʼoa jé Na̱i xotísʼín nga kʼoasʼin síkjaʼaitsjen kʼani chjota (Juan 16:2). Kʼoa je xi tsín makjainle tʼatsʼe Niná, fitjenngikená nga̱ tsín ya nojiaan yaoná jmeni xi chon sonʼnde. Ninga kʼoalani alikui nokjoaan. Ánni. Kuinga makjainná jotso texto xi kamaxkia ndʼaibi. w21.03 26 párr. 1, 3

Ngayeje jmeni xi sʼín je Jeobá kao kjoatsjoacha kʼoasʼínni. Je Jeobá tsjoáná ngayeje jmeni xi machjénná. Nga tsjoakená kitsjoaa je ʼNdíle kʼianga tsakʼéchjíntjainá, kʼoa je Jesús kʼoati nʼio tsjoakená nga̱ kitsjoaa kjoabijnachonle xi totʼatsaan (Juan 3:16; 15:13, TNM). Alikui ʼya xi kʼoechjoale je Jeobá kao Jesús nga tsjoake koa̱n je xi kixi fitʼale (Juan 13:1; Rom. 8:35). Je xi jko̱ tíjnale yaniʼya kʼoati tjínnele nga kao kjoatsjoacha kʼoasʼinni ngayeje jmeni xi sʼin. Ánni nga nʼio chjínile nga kʼoasʼin. Je pastro Juan i kitso: “Je xi ndsʼe̱ tsabeni xko̱n, kʼoa tsín tjaoke ndsʼe̱, [kʼoa tsa familiale] jósʼin koa̱nni nga tjaoke koa̱nni Niná, xi tsín tsa tsabeni xko̱n” (1 Juan 4:11, 20). Je chjota xi tsjoake familiale kʼoa xi mele nga je Jeobá kao Jesús skénngile, koasenkao je chjoónle kao xtile nga nda koatio ngixko̱n Jeobá, nga nda sa̱tío kon kʼoa nga tsjoále je tsojmi xi machjénle (1 Tim. 5:8). Kuitsoyale kʼoa koatekjáyale je xtile. Kui kʼoasʼin je xi sasénle Jeobá kʼoa xi koasenkao je familiale. w21.02 5 párr. 12, 13

Je Jeobá be nga sakʼoa tsín nda satío tokoán nga kui nikjaʼaitsjeen jme xi koan ngasʼa. Kʼoati be jñani nda nʼia ninga kʼoasʼin nikjaʼaitsjeen nga tsín jme xi nda nʼia (1 Juan 3:19, 20). Tsa jngo xi tíbʼénele yaole nga tsínkui kʼoasʼin xi chʼaotjín, kuijin xosikao nga sikʼajenile kon tsa tikui kjoa ska̱jinngáni. Kʼianga sokójéená toxá tsín nda sʼeni tokoán (2 Cor. 7:10). Tonga alikui koa̱n si̱kʼatoné choa̱le josʼin si̱kjaʼaitsjeen kʼoa tsa i̱ kuixoán: “Alikuila kʼia koa̱nndaya kʼoa alikuijin kʼia sichatʼana je Jeobá”. Alikui kixi tíjna tsa kʼoasʼin si̱kjaʼaitsjeen, kuijin xosikaoná nga si̱kjinnilee je Jeobá. Tosaa nda nga je Jeobá kʼoétsʼoalee kʼoa kʼoakʼuínlee nga katasíchatʼaná (Is. 1:18). Skoee nga tibʼenelee yaoná nga kui mená kʼoasʼiaan xi ndatjín kʼoa sichatʼaná. Xi ijngosani, kʼoéyanajmílee je xi chjotajchínga sʼin tjío, ngasin nganda kuinyakaoná nga nda kuiyoaa ngixko̱n Niná (Sant. 5:14, 15). w20.12 23 párr. 5, 6

Je Jesús tsabexkón je yánchjín. Alikui kʼoakisʼin jokisʼin je chjota fariseo nga choa chjí tsabekon je yánchjín. Je chjota fariseo tsín tsakjákaonajmí yánchjín ya jinle chjota kʼoa alikʼia kitsoyale jotso je Énle Niná. Tonga je Jesús kitsoyale xi xʼin kao xi yánchjín (Luc. 10:38, 39, 42). Kʼoati nkjín koanni yánchjín xi kikao jñani kitsoyason je Jesús (Luc. 8:1-3). Kʼoa tjínkʼa je yánchjín xi kui kjoanda kitsjoale nga kikájinkon je pastrole kʼianga jejaʼáyanile Jesús (Juan 20:16-18). Je pastro Pablo kʼoakitsole je Timoteo nga katabexkón je yánchjín. Kʼoa tsabechjí jme xi kisʼin je na̱le kao majchále Timoteo nga kitsoyale jmeni xi tso je Énle Niná saʼnda nga sʼa ʼndí kji (2 Tim. 1:5; 3:14, 15). Xi ijngosani, kʼianga kiskile Pablo je chjotale Cristo xi Roma tsʼe, nkjín tichjaa kisikasénle kjoatiʼnda, kʼoa kisikʼaxki je jaʼaínle. Kuenta kisʼin josʼin kisixále Niná je yánchjín jebi kʼoa nʼio chjí tsabekon (Rom. 16:1-4, 6, 12; Filip. 4:3). w21.02 15 párr. 5, 6