Octubre

Kʼianga chjenngilee je Jesús kʼoasʼin nikjaʼaitsjeen kʼoa kʼoanʼia jokisʼin je. Kʼianga ngisasa nda jchaxkoaan kʼoa ngisa nda chjénngilee josʼin síkjaʼaitsjen, sa miyo sa miyo koaan. Jósʼin koa̱n chjénngilee je Jesús. Jngola choa̱ kataʼyaa. Je Jesús kui ngisa kitsjoale kjoandosin nga tsakasenkao xi kjaʼaí kʼoa tsín to yaole kini (Mat. 20:28; Rom. 15:1-3). Kʼianga kʼoakisʼin, tsakjaʼántjai kjoañʼai kʼoa kisichatʼale je xi ngikʼa. Alikui ndi̱to̱n kisijtile yaole ninga jotsakʼinle (Juan 1:46, 47). Kʼoa alikui kui ngotjo ngosa kisikjaʼaitsjennile je jée xi tsakajngi je chjota (1 Tim. 1:12-14). Nʼio tjínle kjoandosin nga chjénngiaa je choa̱le Jesús, nga̱ i kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Kuinga ndatjínni nga si̱kjaʼaitsjenjiaan jebi: “Tojo kisʼin je Jesús, a bʼenele yaona nga ndasʼin fikoa je ndsʼee”. w20.04 24 párr. 11

Ningalani tjín je chjota xi énndiso báne kʼoa xi nchja̱ʼaonle jaʼaínle Jeobá, koaan si̱toánntjé jokjoantjínni xi tʼatsʼe, nga tsje, nga kixi tíjna jmeni xi sʼín, nga nda chjota kʼoa nga bakó kjoatsjoacha. Koakoá nga mená je koatexomaná kʼoa kʼoakʼuínlee je chjota nga sʼe̱ kjoatéxomakixi, kjoanyʼán kʼoa nga tsjoa sa̱tío tokoán ngatsʼiaa kʼianga jekoatexoma je Chjotaxále Niná (Sal. 37:9, 37; 146:5, 6, 10). Kʼianga bakoyalee Biblia je chjota, me tongantsjai nga kui nikʼaxkiaa nga toje Niná xi tiʼndele koatexoma. Kʼoa kʼoatjín kjoaixi, tojé Jeobá xi tiʼndele koatexoma i̱ Sonʼnde kao ya ngʼajmi. Ningalani tjínle kjoandosin nga ʼmiyalee chjota je kjoatéxomale Jeobá, je xi ngisa tjínle kjoandosin kuinga kuinyakoaa nga katamatsjoake kʼoa nga kixi katafitʼale je Nʼainá xi tíjna ngʼajmi. Kuinga machjénsíni nga kʼuínyalee je chjota jokjoan je Jeobá kʼoa jme xi tsoyanile je jaʼaínle (Is. 63:7). Tsa kʼoasʼiaan, je chjota tsjoakejin koa̱n je Jeobá kʼoa kuijin nga sitjosonnile nga mele kixi koaitʼale. w20.06 6 párr. 16; 7 párr. 19

Tokʼoamaná josʼin koannda je xokoajkoaa. Kʼianga sʼa majcháyaa ya tsʼoa̱ na̱ná, je xokoajkoaa sa nkjín sa nkjín célula sʼele nga xki̱ minuto kʼoa tobijbi majngo. Je xi kui kotʼayason kʼoatso nga jngo chjota xi jekiskason nóle me 100,000 millón neurona tjínle. Kʼoa ngayeje célula jebi yaa tjíojin je xokoajkoaa, xi jngo kilo basenla ai. Si̱kjaʼaitsjenla joma xokoajkoaa kʼianga nokjoaa. Kʼianga tojngo én nokjoaa, jé xokoajkoaa xosʼín nga síkjan naxá xi kjiojin yaoná, jngo sientola naxáná síkjan, jolani xi kjiojin nijeen, yásiaan, ndsoʼbaa, ngiʼbaa kao ʼme̱ná. Ngayeje jebi ñatjen síkjan ánni nga nda kuitjoni én je ndsoʼbaa. Kʼianga kichotʼayason xi tʼatsʼe jebi nga nó 2019, tsaʼyale nga jenkjín én majinle je ʼndílee xi tosʼa tsin. Jebi mangóson kao jmesani xi tso je chjota xi kui kotʼayason, nga kʼoatso nga toje kʼoasʼin kichʼañá nga tsiaan nga koa̱nná nkjín én kuinókjoaa. Jngoo kjoatjao xi tʼatsʼe Niná nroani nga maná nokjoaa. w20.05 22 párr. 8, 9

Je Abrahán kisikatío ngayeje jmeni xi kisʼele nga tsakʼejna ya naxinandá Ur. Ánni. Kuinga kui kiskoyale je “naxinandátsebe xi tjínle xjáoja̱ma̱” (Heb. 11:8-10, 16). Je naxinandá xi kiskoyale Abrahán kui je Chjotaxále Niná, jé Jesucristo xi rey sʼin tíjnale kʼoa 144,000 mani xi ya koatexomakao. Je Pablo kʼoakitso nga je Chjotaxá jebi kui “je naxinandále Niná xi tíjnakon, je Jerusalén xi tsʼe ngʼajmi” (Heb. 12:22; Apoc. 5:8-10; 14:1). Je Jesús kʼoakitsole je chjotatjenngile nga katasíjé nga katafaʼai je Chjotaxá jebi ánni nga kuitjosonni josʼin mele Niná ya ngʼajmi kao i̱ Sonʼnde (Mat. 6:10). Je Abrahán alikui koanjinyejele josʼin tjínndajin tʼatsʼe Chjotaxále Niná. Siento nó nga to kisʼeʼma jebi (Efes. 1:8-10; Col. 1:26, 27). Tonga koanjinle nga tjínkʼa ntje̱le xi rey koa̱n, nga̱ tongini kʼoakitsole je Jeobá (Gén. 17:1, 2, 6). w20.08 2, 3 párr. 2-4

Xi machjénsa nga chʼa̱sjengiaa kui jmeni xi tso je chjota xi yátsʼi̱n binyále Niná. Saʼnda nga kisatio títjon je jtín xi tsʼe chjotale Cristo, je Na̱i chjota tísíchjén nga to jao katasatío kon je chjota xi kixi tjíofitʼale Niná. Kuinga machjénni nga kataʼyaa jmeni xi kixi tjín kʼoa jmeni xi to énndiso. Je xi jtikená, koaanle kui sichjén je Internet kao redes sociales nga tsín tije Jeobá si̱nʼiotʼañá kʼoa nga tsín titsjoacha koa̱nñá je ndsʼee. Alikui koa̱n nga kui kuenta sʼiaan je énndiso jebi, nga̱ tʼatsʼe Na̱i nroani (1 Juan 4:1, 6; Apoc. 12:9). Kʼiatsa mená nga tsín ya jtsaoyaa je che̱n xi batíobasenná je Na̱i, machjén nga tosi tonda katasʼená kjoamakjain xi tʼatsʼe Jesús kʼoa alikui jao kʼoé tokoán nga je tísíchjén Niná nga kuitjoson jme xi tjínndajinle. Kʼoati machjén nga si̱nʼiotʼaa je choʼnda xi nʼiotʼakon, xi nda be xá, nga̱ tojé choʼnda jebi tísíchjén Jeobá nga tíbándiaale je naxinandále (Mat. 24:45-47). Kʼianga ntsjaintsjai chótʼayá je Énle Niná ngisaa nʼio sʼe̱jna je kjoamakjainná kʼoa yaa koa̱nngósoán joma je yá xi na̱nga̱ fi ja̱ma̱le. Je Pablo kui kjoafaʼaitsjen kitsjoa kʼianga kiski én xi kamaxkia ndʼaibi. w20.07 23, 24 párr. 11, 12

Nga chjotajée maa, ngatsʼiñá nga tokui chotsen sakʼoalee jokjoan xíngiaa (Juan 7:24). Tonga tochoajin xi jchaa tʼatsʼe chjota tsa tokui chótsenlee josʼin matsen. Jngola choa̱ kʼoéjnaa. Ningalani nʼio nda jngo chjinexki, tsa tokui koaini josʼin matsen je xi tísíxkile nʼiojin tochoa xi skoe̱. Tjínnele nda kjuinrʼoé jomale je chjota tsa mele skoe̱ jme chʼin xi tjínle. Tsakui nichxin saʼnda kʼoakuitsole nga jngo radiografía katabʼasje. Tsa tsín kʼoasʼin je chjinexki likuijin skoe̱ jme chʼin xi tjínle je chjota. Tikʼoasʼinni ñá, likui koa̱njinná jotjío kon je ndsʼee tsa tokui chótsenlee josʼin matsen. Kuinga machjénni nga kataʼyaa jokjoan kjoaixi je ndsʼee. Ninga tsín maná chotʼajiaan jotjío ni̱ma̱le xíngiaa koaan chjénngilee josʼín je Jeobá. Je Jeobá nrʼoéle je choʼndale, kuenta sʼín josʼin koanjchínga, jme kjoa xi tjíofaʼatojin kʼoa bakóle kjoamatokon. w20.04 14, 15 párr. 1-3

Tjínnele nga nangitokon katamaa, nga̱ je chjota xi ngʼakon alikui kosonnile josʼin síkjaʼaitsjen. Nʼio sinle kjoa kʼoa to yaole fini. Xi ijngosani, josʼin síkjaʼaitsjen kʼoa jmeni xi sʼín je chjota xi ngʼakon tije síkiʼaonni yaole kʼoa kʼoati bʼakaotʼale xi kjaʼaí. Kʼiatsa tsín sikʼantjaiya yaole, jé Na̱i kʼoanachale nga sikitsónjin je kjoafaʼaitsjenle (2 Cor. 4:4; 11:3). Je chjota xi tjínle kjoanangitokon nda síkjaʼaitsjen kosonnile jmeni xi sʼín kʼoa majinle nga ngisa ngʼa tjío xi ngikʼa tikʼoajinni je (Filip. 2:3). Xi ijngosani, kʼoati majinle nga je “Niná bʼejnatajale xi ngʼakon. Tsjoále kjoanda je xi indajintakon” (1 Ped. 5:5). Je chjota xi nangitokon alikui mele nga kontrale koa̱n je Niná. Kʼiatsa mená nga tosi tonda nangitokon koaan, tjínnele si̱tjosoán kjoafaʼaitsjen jebi: “Jekichjaʼaxinlao yaono je ni̱ma̱ xi jchínga kao kjoa xi kisʼin. Jekichjóao je ni̱ma̱ xi chjotse”. Tjínnele chótʼayajiaan je choa̱le Jesús kʼoa chjénngiaa je choa̱le (Col. 3:9, 10; 1 Ped. 2:21). w20.07 7 párr. 16, 17

Nʼio tse kjoanda tjínná nga ya naxinandále Jeobá tiyojiaan. Tsjoa tjío tokoán nga nda tiyoaa kʼoa jtín tiyoaa kao ndsʼee. Jmé xá xi kjinená nga jngó jngoá ya jinjtín. Je Pablo kʼoakitso nga je jtín yaa mangósonkao je yaoná, kʼoa jmeni xi tjínle yaoná yaa mangóson je ndsʼee xi tjío ya jinjtín (Rom. 12:4-8; 1 Cor. 12:12-27; Efes. 4:16). Je xi títjon koya xi bakóyaná je choa̱ xi kisichjén Pablo kuinga nʼio chjíle jmeni xi nʼia nga jngó jngoá ya jinjtín. Je Pablo i kitso: “Josʼin kjoan yaoná nga nkjín jko̱ya tjínle, tonga ngayije jko̱yale yaoná ali tojngojin xá tjínle xi tongóson. Kʼoasʼin xi totʼatsʼe Cristo tojngo yao nía, nda tsa nkjín manía, tonga ngatsʼiaa nga jngójngoá xínkjín mani yaoná” (Rom. 12:4, 5). Kui xi kitsonile Pablo nga nʼio chjí bekonná Niná nga jngó jngoá ninga kjaʼaí kjaʼaí xá tjínná ya jinjtín. w20.08 20 párr. 1, 2; 21 párr. 4

Jósʼin koa̱n skénngile Jeobá je xi xijchá ma. Kʼianga tjen ndiaale, koaan skónangile je xtile jósʼin síkjaʼaitsjen jmeni xi sʼin xijchá kʼoa jósʼin tsa jelani. Kʼoa koaan kʼoasʼin tsa tjen ndiaale jme xi kuitso je xti. Je Jeobá tjínle kjoatsejta. Tobʼelañá, ngasin nganda nrʼoé kʼianga jme xi tso je choʼndale nga tsín majin sakʼoale tsa jmeni. Kinrʼoéle jme xi kitso je Abrahán nga tsín ndi̱to̱n koanjinle ánni nga sikjesonni je naxinandá Sodoma kao Gomorra (Gén. 18:22-33). Kʼoa kʼianga totsakijno je Sara, kʼianga kʼoatsakʼinle nga ʼndí sʼe̱le kʼianga jejchínga, ʼndele nga koa̱njtile Jeobá, tosaa tsakakóle kjoaxkóntokon (Gén. 18:10-14). Jmé xi bakóyano choa̱le Jeobá xi xijchá mao kao xi chjotajchínga sʼin tiyo. Jónʼiao kʼiatsa je xtino kʼoa tsa je ndsʼee ya jinjtín tsín sa̱sénle jmeni xi bʼendajion, a tokjoan nikixiyandaño. Axo nijinlao yaono ánni nga kʼoasʼin síkjaʼaitsjenni. Kʼianga je Jeobá kjenngile je xi xijchá ma nda batio je familiale, kʼoa nga kʼoati sʼín je xi xá kjinele ya jinjtín nda batio je ndsʼee. w20.08 10 párr. 7-9

Kʼianga tokʼia kichotʼayá je Biblia tsakui nichxin kisasenná nga ʼya xi tsakinyakaoná, nga̱ tsín jme xi majinná nga kʼia (1 Cor. 3:1, 2). Tonga jósʼin nikjaʼaitsjeen ndʼaibi tsa jenkjín nó nga tinixálee Jeobá kʼoa tsa jetjínná kjoafaʼaitsjen. Tsakui nichxin tsín sasénná tsa ʼya xi kjoafaʼaitsjen tsjoáná, ngisaa tsa sʼa choatsele nga tíkotʼaya Énle Niná. Tonga jé ndsʼee kao tichjaa síchjén Jeobá nga sínʼiojinná (Rom. 1:11, 12). Tsa mená nga tsjoánganʼioná je Jeobá, tjínnele kʼoaiʼndee nga kuinyakaoná je ndsʼee kao tichjaa. Alikui kui xi basenkaoná tsa tse nganʼio tjínná, tsa tse kjoachjine tjínná, tsa nyiná kʼoa tsa nda tiyoaa. Je xi basenkaoná kui je kjoanangitokon kʼoa nga je Jeobá ninʼiotʼaa yaoná. Kuinga ndatjínni nga tosi tonda je Jeobá si̱nʼiotʼaa, kjuintjenngiaa je choa̱le choʼndale xi tsakatio nichxin kjoatse kʼoa kʼoaiʼndee nga katabinyakaoná je ndsʼee. Tsa kʼoasʼiaan, ninga sakʼoa kʼoasʼe tokoán nga tsínná nganʼio, jé Jeobá tsjoánganʼioná. w20.07 14 párr. 2; 18, 19 párr. 18, 19

Tsakui nichxin ngisa ñʼai koa̱nná nga tsejta koaan kʼianga kʼuínyalee Énle Niná je xi xíngiaa mani. Ya Eclesiastés 3:1, 7 kʼoatso nga “tsen tjínle nichxin tojmeni [...]. Nichxin nga jyó biyoaa kʼoa nichxin nga nokjoaa”. Tjínkʼa xíngiaa xi kotʼaya Énle Niná kʼianga be nga nda mangínkoaa yaoná, tonga kʼoati machjén nga chja̱kaonajmíñá xi tʼatsʼe Jeobá (1 Ped. 3:1, 2). Ningalani kao kjoatsjoa ʼmiyasoán kʼoa bakoyaa je Énle Niná, kʼoati machjén nga tsejta koaan kʼianga kʼuínyalee je xi xíngiaa mani kʼoa toʼya chjotani. Nʼio nda choa̱ batíoná je choʼndale Niná nga bakó kjoatsejta, jolani xi tsakatio nichxin kjoatse kao xi tjío ndʼaibi. Je Habacuc kui xi koanmele nga tsín tikjoatsʼen sʼe̱ni, tonga i kitso: “Tosi tonda ya koatejna jñani tisikuinda” (Hab. 2:1). Je pastro Pablo kʼoakitso nga kui xi koanmele nga jekuicho nichxin nga “sikjetʼa” xále Niná kʼoa tjoéle je kjoanda xi kʼoaile. Ninga kʼoalani, tsejta koan kʼoa tosi tonda kitsoya je Énle Niná (Hech. 20:24). w20.09 12 párr. 12-14

Ningalani je majaoni Jesús xi kʼoati tse nganʼio tjínle, alikui síkʼatone choa̱le josʼin síkjaʼaitsjen. Je choʼndale Jeobá xi je Jesús kjenngile kʼoa nangitokon ma, bakóní nga tjínle kjoatsjoacha (Luc. 9:48; Juan 13:35). Jmé xi sʼiaan tsa kjoa tjín ya jinjtín kʼoa tsa kʼoasʼin nikjaʼaitsjeen nga tsín nda tísʼendajin. ʼNdele nga tokui kuinókjoañá, tosa nangitokon katamaa kʼoa kʼoainganʼiolee xi bándiaale je jtín (Heb. 13:17). Xi koasenkaoná kuinga si̱kjaʼaitsjenjiaan jebi: “A nʼiokjoán tjínle kjoandosin je kjoa xi tjín. A machjén nga ndʼaikjoan sʼe̱ndajin. A an bʼakaona nga kʼoendajian. A kui xi mena nga nda kʼoéjna je jtín axo kui xi mena nga toʼan nda kʼoaxki̱a”. Je Jeobá ngisaa chjí be nga nangitokon maa tikʼoajinni jmeni xi maná nʼia kʼoa ningalani ndatjín nga nʼio nda si̱tjosoán je xá xi bʼainá tonga ngisaa chjíle nga jtín sʼin kuiyoaa. Kuinga kʼoénenilee yaoná nga nangitokon katamaa nga si̱xálee Jeobá. Tsa kʼoasʼiaan, jtín sʼin kuiyoaa kao je ndsʼee (Efes. 4:2, 3). w20.07 4, 5 párr. 9-11

Je Jesús nʼio chjí tsabe jmeni xi kisʼin je yánchjín nga tsakasenkao kʼoa nga kitsjoale jmeni xi koanchjénle (Luc. 8:1-3). Kʼoati kitsoyale jmeni xi tso je Énle Niná. Tobʼelañá, kitsoyale nga kuiyá kʼoa nga kjoaʼáyanile (Luc. 24:5-8). Kʼoati kisinʼiojin yánchjín jebi nga tongini kʼoakitsole kʼianga kjoañʼai ni̱kjaʼá je Jesús kʼoa nga ni̱kʼien (Mar. 9:30-32; 10:32-34). Xi ijngosani, ningalani kitokachjinga je chjotatjenngile Jesús kʼianga kindoa, tjínkʼa je yánchjín jebi xi ya tjío kʼianga kinikjaʼá kjoañʼai Jesús ya tʼayá (Mat. 26:56; Mar. 15:40, 41). Kʼoa kʼianga jejaʼáyanile, je xi títjon tsabe jé yánchjín xi kixi kitʼale. Kʼoakitsole Jesús je yánchjín jebi nga kʼoakatatsole je chjotatjenngile nga jejaʼáyanile (Mat. 28:5, 9, 10). Kʼoajinti tjío je xi yánchjín kʼianga kitsʼaile nganʼiotsje je chjotatjenngile Cristo nga sʼuí Pentecostés nga nó 33. Tsa kʼoalani, kʼoajin tikui kjoanda kisʼele nga kinchja̱ni xi tʼatsʼe Niná nga kjaʼaí kjaʼaí én (Hech. 1:14; 2:2-4, 11). w20.09 23 párr. 11, 12

Kʼianga Biblia ʼmiyalee je chjota kui xi mená nga kuitjontjaile yaole. Ánni kʼoabixónsíñá. Kuinga i̱ kitso je Jesús ya Mateo 28:19, 20 (TNM), kitso: “Kuinga tangínsíño, kʼoa chjotana tikao je chjota [...]. Cha̱nisʼenngindáo”. Machjén nga koaisʼenngindá ʼyani xi mele kuitjontjai. Kʼoa ʼyani xi mele koaisʼenngindá tjínnele koa̱nkjainle nga totʼatsʼe nga kʼienntjainá kʼoa nga jaʼáyanile Jesús nga koa̱n kuitjo̱ntjé. Kuinga i̱ kitsonile pastro Pedro je chjotale Cristo: “Nga mangínsʼenngindá, je xi kʼoati tíbʼasjentjaino ndʼaibi [...] xi totʼatsʼe nga jaʼáyanile Jesucristo” (1 Ped. 3:21, TNM). Kʼianga jefisʼenngindá jngo chjota kui kjoachoya sʼele nga koa̱n kʼoéjna ngantsjai nichxin. Nga chjotatjenngile Cristo si̱koaa je chjota tjínnele nga nda koa̱nná kʼuínyaa je Énle Niná (2 Tim. 2:24, 25). Nga̱ je Jesús i kitso: “Kuinga tangínsíño, kʼoa chjotana tikao je chjota [...]. Takoyalao”. Je pastro Pablo kʼoakitsole je Timoteo nga tosi tonda katabakóya je Énle Niná, kʼoa i kitsosale: “Kʼoasʼin kuitjo̱ntjai nga tijini, kʼoati je xi nrʼoéli”. w20.10 14 párr. 1, 2

Je Pedro nʼio tsjoake koan nga kitsoyason. Nga je Jeobá tsakasenkao nʼio koanle josʼin kitsoyason (Hech. 2:14, 41). Kuinga ʼmiyasonñá nga tsjoachaa je Jeobá. Kʼoa kui kjoatsjoacha jebi koasenkaoná kʼiatsa to jao sʼe̱ tokoán. Kʼianga kʼoakitsole Jesús je Pedro nga katatsoyason, i kitsole: “Ali jkonjin” (Luc. 5:8-11). Ali tsakuijin kitsokjonle Pedro tsa jme xi koa̱ntʼain nga chjotale Cristo koa̱n. Je Jesús kisichjén nganʼiole nga nkjín jti̱ tsakʼasjengindá kʼoa je Pedro kitsokjon nga̱ kʼoasʼin kisikjaʼaitsjen nga tsín bakinle nga ya sixákao Jesús. Kʼoa ji, a kui nikjaʼaitsjain jokji xá tjenkao nga chjotale Cristo maa. Tsa kʼoasʼin nikjaʼaitsjain machjén nga tsjoacha katamai Jeobá, Jesús kao chjota, kʼoa kui koasenkaoli nga sitjosonni jmeni xi kitso Jesús nga kʼuínyalai Énle Niná je chjota (Mat. 22:37, 39; Juan 14:15). w20.09 3 párr. 4, 5

Kao kjoatsjoa nikʼayaa nichxinná, nichjénñá nganʼioná kao jmeni xi tjínná nga fasjee je chjota xi tjíonda nga sʼe̱le “kjoabijnachon ngantsjai” (Hech. 13:48). Kʼoasʼin mangíntje̱ngiaa je choa̱le Jesús nga kitso: “Jé xi bakjennia, nga kʼoasʼian josʼin mele je xi kisikasénna kʼoa nga sijngoa xále” (Juan 4:34; 17:4). Kʼoati kui xi mená nga si̱jngoaa je xá xi kjinená (Juan 20:21). Kui xi mená nga tosi tonda ñatjen kʼuínyasoán je Énle Niná kao je ndsʼee kʼoa kao xi jekisikjin tsakai, saʼnda nga kjoetʼa jmeni xi chon sonʼnde (Mat. 24:13). ʼYañá nga tsín choa ñʼai tíjna nga kuitjosonná je xá xi tsakánená Jesús. Tonga ali tsa toñájin tiyoaa, je Jesús kʼoakitso nga i̱ tjen tíjnakaoná. Kʼianga chjotatjenngile Cristo nikoaa je chjota, jé Niná nixákoaa kʼoa jé Jesús basenkaoná (1 Cor. 3:9; 2 Cor. 2:17). Koaan kuitjosonná xá jebi, nga̱ jé Jeobá kao Jesús binyakaoná. Nʼio tseni kjoanda kʼoa nʼio tsjoa satío tokoán nga nitjosoán je xá xi tsakánená Jesús kʼoa nga binyakoaa xi kjaʼaí nga kʼoati katasʼín tsanda je (2 Cor. 4:7). w20.11 7 párr. 19, 20

Jmeni xi sʼín je xi xijchá ma bʼakaotʼale je ʼndíxtile ninga kʼianga jemajchínga. Tsa tsín nda skoéjin jmeni xi sʼin, kjoa batiojin je ʼndíxtile. Tonga tsa nda skoéjin jmeni xi sʼin tsjoa sa̱tío kon je ʼndíxtile. Tonga je ʼndíxti kʼoati machjén nga nda skoéjin jmeni xi sʼin. Je xi ngisa ndatjín nga sʼiaan kuinga je Jeobá si̱xálee (Sal. 73:28). Je xi xijchále koanni Jesús i̱ Sonʼnde kui xi koanmele nga je Jeobá sixále ngatsʼi ʼndíxtile. Jmeni xi kisʼin kao kui tsakakóni nga kui ngisa kitsjoale kjoandosin nga je Jeobá kisixále (Luc. 2:40, 41, 52). Nga nda kiskoejin jmeni xi kisʼin je Jesús kui xi tsakasenkao nga kitjosonle jmeni xi mele je Jeobá (Mat. 4:1-10). Nda chjota koan, kixi koan kʼoa nʼiojin koan, ngatsʼijin je xi xijchá ma nga mele nga kʼoasʼin je ʼndíxtile. w20.10 26 párr. 1, 2

Si̱kjaʼaitsjenjinla nga jan koya jebi: Jngo tichjaa xi jejchínga kui síkjaʼaitsjenjin jmeni xi tsjoa tsakʼé kon ngasʼa. Ningalani ñʼai male ndʼaibi, tojo tísíxále Jeobá jokji tjen kʼoamale (1 Cor. 15:58). Kui kaníya jko̱ ngantsjai nichxin nga jeya tíjna ya ʼndenaxó kao xínkjín. Ijngo tichjaa kui faʼaitsjenle nga jngo tichjaa kisikiʼaon kjoafaʼaitsjenle, tonga alikui bʼéngijti kon (Col. 3:13). Ijngo ndsʼee xi tsín chajinle je jée xi tsakajngi ngasʼa, tonga kʼoabʼé kon nga likui tikʼoasʼinni (Sal. 51:10). Jósʼin mangóson je kjoa xi tjíofaʼatojin nga jan ndsʼee jebi. Nga jan faʼaitsjenle jme xi kisʼin ngasʼa, tonga alikui kui kuenta sʼín. Tosaa kui kuenta sʼín nichxin xi sʼa nroa. Ánni nga nʼio tjínnile kjoandosin. Tojo ma jngo chjota kʼianga yátsʼi̱n kotsenni, alikui fi kixikixi, kʼoatisʼinni tsanda ñá, alikui nda si̱xálee je Jeobá tsakui si̱kjaʼaitsjeen jmeni xi jekʼoakoan ngasʼa (Luc. 9:62). w20.11 24 párr. 1-3

Kʼianga tsabe Goliat je David totsabesin kʼoa totsakijnoke nga̱ kʼoasʼin kisikjaʼaitsjen nga tsín jme nganʼio tjínle. Je Goliat nʼio ngʼa kisʼe, kisʼele ki̱cha̱ xi kisichjén kʼoa nʼio koanle josʼin kiskan. Kʼoa je David sʼaa ti kʼoa kʼoasʼin matsen nga tsín be josʼin skaan, tonga jé Jeobá kisinʼiotʼa yaole kʼoa jé kitsjoale nganʼio nga kisikʼien je Goliat (1 Sam. 17:41-45, 50). Je David kʼoati jaʼatojinsa kjoa xi kjaʼaínile. Choʼndale Saúl koan, je rey xi kiskoejin Jeobá. Nga títjon, je Saúl nʼio tsabexkón je David. Tonga nga jeki nichxin, ngʼakon koan kʼoa koanxinkonke je David. Totaon tsabe kʼoa koanmele kisikʼien (1 Sam. 18:6-9, 29; 19:9-11). Ningalani totaon tsaʼya je David, tosi tonda tsabexkón je Saúl, nga̱ koanjinle nga je Jeobá kiskoejin nga rey sʼin tíjna (1 Sam. 24:6). Jé Jeobá kisinʼiotʼa David kʼoa kʼoatsakʼé kon nga je tsjoále nganʼio nga chókjoajinle je kjoa xi tífaʼatojin (Sal. 18:1 kao én xi tjítʼa jña fitsʼiani capítulo). w20.07 17 párr. 11-13

Je én xi tongini kinokjoa tʼatsʼe je rey xi norte tsʼe kao je rey xi sur tsʼe jetíbitjoson, kuinga kʼoéjngosíñá tokoán nga kuitjoson xi chasa. Kʼianga koa̱njinná je én xi tongini kinokjoa xi faʼaitʼa ya capítulo 11 xi tsʼe Daniel, kuenta sʼiaan nga toje nchja̱ni chjotaxá xi bʼetʼale je naxinandále Jeobá. Kʼoa ninga ngisa choa mani je choʼndale Niná tikʼoajinni jotjín chjota tjín i̱ Sonʼnde, jé xi ngisa bʼetʼale je chjotaxá. Ánni. Kuinga je Na̱i kao chjota xi je fitʼale mele sikjeson je chjota xi je Jeobá kao Jesús síxále (Gén. 3:15; Apoc. 11:7; 12:17). Je én xi tongini tsakʼinle je Daniel tjínnele koa̱nngóson kao jmesani xi tso je én xi tongini kinokjoa xi faʼaitʼa Biblia. Kuinga machjénni nga chótʼayajiaan jmesani xi tso je Biblia ánni nga nda koa̱njinniná je én xi tongini tsakʼinle je Daniel. w20.05 2 párr. 1, 2

Nʼio nkjín chjota xi kjaʼaí kjaʼaísʼin síkjaʼaitsjen joma kʼianga jebiyaa. Tonga jméni xi bakóya je Biblia. Kʼianga jebiya jngo chjota, fiʼndo yaole. Tonga je Jeobá, xi tsakʼénda ngayeje xi tjín koaanle sikjaʼáyale xi jekʼien kʼoa tsjoále jngo yao xi chjotse (Gén. 1:1; 2:7). Je Pablo jngo choa̱ kisichjén nga kitsoya nga tsín tongóson kjoan yao tsjoále Niná je xi kjoaʼáyanile. Kʼoakjoan yao tsjoále josʼin mele Niná. Je Pablo kui kinchja̱ni joma jngo “na̱xi̱n” kʼoa tsa jngo tocho, kʼianga jesʼentje, xka̱ mʼónya nga jemani. Je xka̱ jebi alikui timangósonni jokji je tocho ngasʼa. Je Pablo kʼoati kitso nga “tjín yao xi tsʼe ngʼajmi, kʼoa tjín yao xi tsʼe sonʼnde”. Jmé xi kinchja̱ni nga kʼoakitso. Ñá xi i̱ Sonʼnde tiyoaa yao kichʼá, tonga je xi ya tjío ngʼajmi espírituní, jolani je ánkje (1 Cor. 15:36-41). w20.12 9, 10 párr. 7-9

Ngatsʼiñá nga mená nda kuiyoaa. Tonga kjoa bitjatojin sakʼoa ngatsʼiaa. Tsakui nichxin tjínkʼa xi kʼoasatío kon jokisʼe kon je rey David kʼianga kʼoakitsole je Jeobá jotso texto xi kamaxkia ndʼaibi. Tjín jmeni xi nʼio makjáojinná kʼoa xi tsín ñá kʼoakoa̱nná kʼoéndajiaan. Tobʼelañá, alikui joma nʼia nga xki̱ nó mi chjíle tsojmi, najño, kao renta. Kʼoati tsín ñá kʼoamaná bʼechjoalee nga kʼoatsoná je xi ñatjen nixá kʼoa tsa je xi ñatjen mangián skuela nga kui kʼoasʼiaan xi kjoajndí tjenkao. ʼYañá nga tsín kʼoakoa̱nná kʼoéndajiaan je kjoa xi tjín jñani tsaan. Ngatsʼiñá nga kui kjoa tjínná, nga̱ je chjota tsínkui fitjenngi je kjoafaʼaitsjen xi nroatʼa Biblia. Jé Na̱i kjinentsja jmeni xi chon sonʼnde, kʼoa be nga tjínkʼa chjota xi ñʼai koa̱nle nga je Jeobá sixále xi totʼatsʼe kjoanikjáojin xi tjín (Mat. 13:22; 1 Juan 5:19). Nga kʼoasikji kjoa tjín sonʼnde kuinga kʼoasikji kjoanikjáojin sʼenile je chjota. w21.01 2 párr. 1, 3

Je Juan kʼoakitso nga tsín koa̱n koa̱njtichaa je ndsʼee. Tsa tsín chʼa̱ʼén jokitso je Juan, kuijin kʼoasʼiaan xi mele je Na̱i (1 Juan 2:11). Kʼoakoan kʼa chjotale Cristo kʼianga to jetífikjetʼa siglo 1. Je Na̱i nʼio tsakásjaile jokisʼin nga koa̱njtike xínkjín je choʼndale Niná kʼoa nga xkoa̱ya koatio. Kʼianga kiskile Juan je chjotale Cristo, ya jinjtín tjínkʼa xi kʼoasʼin kisikjaʼaitsjen josʼin mele Na̱i. Tobʼelañá, je Diótrefes, jé xokisʼin nga xkoa̱ya tsakatio je chjotale Cristo ya jinjtín. Alikui tsakakóle kjoaxkóntokon je chjotale Cristo xi kisikasén cuerpo gobernante. Nʼio ngʼakon koan, kʼoa saʼnda koanmele tsakʼaonsjejin ya jinjtín je xi nda kiskoeya chjotale Cristo (3 Juan 9, 10). Nichxin xi tiyoaa ndʼaibi, je Na̱i nʼio tíbásjaile jotísʼín nga mele xkoa̱ya sikatíoná. Alikui xíngiaa katamajtichaa ánni nga tosi tonda jtín kuiyoñá. w21.01 11 párr. 14

Nga kisʼejna je Kjoajchántse xi títjon, je chjotaxá xi tsakatéxoma ya Alemania kao Gran Bretaña kitjenngike je choʼndale Niná nga tsín kjoajchán kijin. Kʼoa je chjotaxá xi ya Estados Unidos tsakatéxoma ndoyá kisikatíoʼya je ndsʼee xi tsakándiaa nga tsakʼinyason. Nga kʼoasʼin chjota kitjenngike kʼiaa kitjoson jmeni xi tso Apocalipsis 11:7-10. Kʼianga nó 1930 kʼoa nga kisʼejna je Kjoajchántse xi majaoni, je rey xi norte tsʼe tsakʼetʼale je naxinandále Niná kʼoa totaon tsabe. Je Hitler kao xi kitsjoanganʼiole tsakʼéchjoale je xále Niná. Je chjota jebi nkjín siento choʼndale Jeobá kisikʼien kʼoa jmi koanni xi ya kinikatíonʼio ʼnde jñani kisikjaʼá kjoañʼai je chjota nazi. Kʼoakitso nga je rey xi norte tsʼe “sixkoaa je ʼndetsje” kʼoa “kjoaʼaxin ya ʼnde jñani ntsjaintsjai bʼaitʼale cho̱ je Niná”, xi tsonile, nga kʼoechjoale nga sa̱kóyason (Dan. 11:30b, 31a). Je Hitler kʼoakitso nga tondiaa sikjeson je naxinandále Niná ya Alemania. w20.05 6 párr. 12, 13

Kʼiatsa tsjoacha koaan je ndsʼee alikuijin ngisa ngʼa chʼa̱sjee yaoná. Si̱kjaʼaitsjeen nga je Jonatán alikui koanchi̱ni̱ke je David kʼoa alikui koanmele nga je tsakatéxomangajaole (1 Sam. 20:42). Chjénngiaa je choa̱le kʼoa alikui koa̱nchi̱ni̱chaa je ndsʼee ninga ngisa nkjín koya xi male sʼín. Tosa kʼoasʼiaan jokitso Pablo, nga kitso: “Tosa kjoayo̱ma̱ kjiatakon nga chósonnilao nga xikʼa ngisa nda male kjoa xi tjín kaoni tsa jon” (Filip. 2:3). Si̱kjaʼaitsjeen nga bʼainganʼioá ngatsʼiaa ya jinjtín. Tsa nangitokon maa, kuijin ngisa kuenta sʼiaan jñani nda sʼín je ndsʼee kʼoa koasenkaojinná je choa̱ xi batío nga kixi kjima (1 Cor. 12:21-25). Kʼianga bakolee kjoatsjoacha xíngiaa jtín sʼin biyoaa. Xi ijngosani, kʼoasʼin koakoñá nga chjotale Cristo maa, kʼoa kui xosikao je chjota nga koa̱nmele je Jeobá sixále. Tonga xi ngisa chjíle kuinga je Jeobá chʼa̱sjejeyaa, “je Nʼai xi tsʼe kjoamatakon, kʼoa Niná xi tsʼe ngayije kjoanijetakon” (2 Cor. 1:3). w21.01 24 párr. 14; 25 párr. 16

Nichxin xi tiyoaa ndʼaibi, tjín chjota xi totaon bená, xi besinná kʼoa xi kʼoatso nga tsín jme chjíná. Ánni. Kuinga tsín kʼoatisʼin nikjaʼaitsjeen josʼin síkjaʼaitsjen je. Je chjota tosaa nda síkʼaxki̱ je xi yaole bʼasjengʼa, xi ngʼakon kʼoa xi xíjin. Tonga ñá bʼenelee yaoná nga nangitokon maa, nga ndʼé maa kʼoa nga nitjosoán. Xi ijngosani, alikui kjoa política nojiaan yaoná kʼoa nijngojinla chjotakjoajchán bʼainganʼiolee. Kuinga bʼasjengininá (Rom. 12:2). Ninga kjaʼaísʼin síkjaʼaitsjen chjota xi tʼatsaan, ñá tísíchjénná je Jeobá tʼatsʼe je xá xi kjima. Tobʼelañá, jé Jeobá xotísʼín nga ngisa nʼio tíʼmiyason nichxin xi tiyoaa ndʼaibi jngo tjíjtsa Sonʼnde. Xi choʼndale Jeobá maa, nʼio nkjín revista tichʼasjee xi kjaʼaí kjaʼaí én kʼoa kui xo̱n jebi xi ngisasa tíbʼabíson jngo tjíjtsa Sonʼnde, kʼoa millón chjota binyakoaa nga ngisa nda batio nga ʼmiyalee jotso Biblia. Kʼoa totʼatsʼee Jeobá nga tíbitjosonni ngayeje xá jebi. w20.07 15 párr. 5, 6

Je Jesús sítjosonle je Jeobá nga jko̱ tíjnale, ali tsakui kʼoasʼínni nga tsín jme xi majinle kʼoa tsa tsín jme xi male. Je Jesús nʼio chjine koan kʼoa yaa tsakakóni nga nʼio choa ñʼai sʼin kitsoya (Juan 7:45, 46). Je Jeobá be nga nʼio chjine je Jesús nga̱ jé tsakasenkao nga kisinda Sonʼnde (Prov. 8:30; Heb. 1:2-4). Kʼoa kʼianga jejaʼáyanile Jesús, je Jeobá kitsjoale “kjoatéxoma ya ngʼajmi kao i̱ sonʼnde” (Mat. 28:18). Ninga nkjín koya jmeni xi male sʼín je Jesús, tojo jé Jeobá síjéle kjoafaʼaitsjen kʼoa kui kʼoasʼínni nga̱ tsjoake je Nʼaile. Tikʼoasʼinni je xi xʼin, ali tsakuijin nga ngisa nangi kʼoéjna je chjoón nga kʼoasʼin tsakʼéndajinni je Jeobá nga jko̱ kʼoéjna je xi xʼin ma. Yaa ʼyañá jebi nga̱ kjoéjin xi xʼin kao xi yánchjín nga ya koatexomakao je Jesús ya ngʼajmi (Gál. 3:26-29). Je Jeobá tsjoáxále je Jesús nga̱ be nga kuitjosonle je xá xi tsjoále, kʼoatisʼinni jngo chjota xi chjine, kʼoati be nga kuitjosonle je chjoónle tsa jme xá xi sʼe̱nele. w21.02 10, 11 párr. 13, 14

Je Énle Niná yaa mangóson jngo cho̱tsín, basenkaoná nga ʼyaa jñáni machjén nga si̱ndayaa yaoná kʼoa jméni xi koa̱n sʼiaan (Sant. 1:23-25). Tobʼelañá, kʼianga jechotʼayá Énle Niná, tsakui nichxin jchaa nga machjén nga si̱ndayasaa yaoná, jolani tsa ngotjo majtininá. Jé Jeobá koasenkaoná kʼianga ndʼé koaan, nga tsín yaoná si̱jtilee kʼianga ʼya xi jokuitsoná. Tsa kʼoasʼiaan ngisaa nda ni̱kjaʼaitsjeen kʼoa chósonnilee jmeni xi sʼiaan (Sant. 3:13). Kuinga nʼio chjínile nga nda jchaa jmeni xi tso Biblia. Kʼiaa majin sakʼoaná nga tsín ndatjín jmeni xi kanʼia kʼianga jekjoa tiyojiaan. ʼNdele nga kʼoakoaan, tosa kuenta sʼiaan josʼin bichómani jñani nda sʼín kʼoa jñani chʼao sʼín xi kjaʼaí. Kuinga kʼoatsoniná je Santiago nga chótʼayajiaan je choa̱le Abrahán, Rahab, Job kao Elías (Sant. 2:21-26; 5:10, 11, 17, 18). Je chjota jebi choʼndale Jeobá koan, kichokjoajinle je kjoa xi jaʼatojin kʼoa tsjoa kisatio kon. Kui xi bakóyaná nga kʼoati chókjoajinná tsanda ñá je kjoa xi kuitjátojiaan kʼianga je Jeobá koasenkaoná. w21.02 30 párr. 12, 13

Kʼianga tísakóyale chjota, jé ndsʼee xi tsjoále estudio kjinele koasenkao nga koa̱njinle jotso je Énle Niná. Kʼia tsa kʼoakuitsoná nga kjuinkoaa nga koaitsjoá estudio, kui xá koanngínkaoñá nga kuisenkoaa (Ecl. 4:9, 10). Jméni xi sʼiaan. Nda kuiyondaa. Je xi títjon sʼiaan, kuinga kʼoakʼuínlee je ndsʼee nga katabʼéyanajmí choaná tʼatsʼe je chjota xi títsoyale Biblia. Koaan chjónangilee jókjoan, jmé kjoaʼmiya xi skótʼaya kʼoa jméni xi mele kuitsoyale nga kui nichxin. Kʼoati koa̱n chjónangilee tsa jme xi tsín koa̱n kʼoakuixoán kʼoa tsa jme xi tsín koa̱n kʼoasʼiaan, kʼoa jósʼin koa̱n kuisenkoaa je chjota xi tíʼmiyale. Ninga tsín kʼoakuitsoyejená je ndsʼee tʼatsʼe je chjota xi títsoyale, tonga tokʼoa jejinla jcha choaa xi tʼatsʼe. Je tichjaa xi misionera sʼin tísíxá, itso: “Nga kʼoaxinle je xi fikaona nga fitsjoa estudio, be jmeni xi tsole je chjota xi titsjoale estudio kʼoa be josʼin basenkao”. w21.03 9 párr. 5, 6

Kuinga sakʼoa majtikeniná je chjota nga kui kjoatéxomale Niná mangíntjenngiaa, kʼoa tsín kʼoasʼin nikjaʼaitsjeen josʼin síkjaʼaitsjen je. Nichxin xi tiyoaa ndʼaibi, alikui chʼaotjín male chjota nga tixʼin xínkjín kʼoa nga tiyánchjín xínkjín fayokaoni, tonga je Niná kisikjeson naxinandá Sodoma kao Gomorra nga kui kjoa kisʼe (Jud. 7). Besinná je chjota nga kui kjoatéxomale Niná mangíntjenngiaa kʼoa kʼoatso nga ñá xi tsín nda nikjaʼaitsjeen (1 Ped. 4:3, 4). Jméni xi koasenkaoná. Tjínnele nga ñaki kʼoakʼoé tokoán nga je Jeobá koasenkaoná. Nga makjainná yaa mangóson jngo ki̱cha̱ xi bájchxochjoá yaoná xi síkjitsʼao “je flecha xi títi xi tsʼe na̱i” (Efes. 6:16). Ali tsa tokuijin xi machjén nga koa̱nkjainná, kʼoati machjén nga koakoá kjoatsjoacha. Nga̱ je kjoatsjoacha “likui matijta”. Kʼoa nga bakoá kjoatsjoacha chókjoajinná kʼianga jme xi matʼeen (1 Cor. 13:4-7, 13). Kui xi basenkaoná nga tsjoachaa je Jeobá, nga tsjoachaa je ndsʼee kʼoa nga tsjoacha maa saʼnda je xi jtikená. w21.03 20, 21 párr. 3, 4

Sakʼoa kʼoatisʼin bakonilee je ndsʼee nga tsjoachaa kʼianga tsín kʼoanʼia tsa jmeni. Tobʼelañá, alikui koa̱n ndi̱to̱n koa̱njtiná kʼiatsa jme xi kuitsoná. Si̱kjaʼaitsjenla jmeni xi koan kʼianga tojeme ni̱kʼien Jesús. Je Jesús kʼoakitsole je chjotatjenngile nga tjínnele ski̱ne je yaole kʼoa skʼuí je njínle kʼianga so̱kole kjoabijnachon xi tsínkʼia fetʼa (Juan 6:53-57). Nʼio nkjín xi tsín kisasenle nga kʼoakitso je Jesús kʼoa tokitsjionkon. Tonga likui kʼoakisʼin xi miyole koan kjoaixi. Ningalani tsín koanjinle jmeni xi kitso Jesús, alikui chʼaosʼin kisikjaʼaitsjen xi tʼatsʼe. Tosaa kisinʼiotʼa je Jesús nga̱ be nga ñaki kui xi kixi kʼoatso ngantsjai (Juan 6:60, 66-69). Nʼio tjínle kjoandosin nga tsín tokjoan si̱jtilee yaoná tsa jmeni xi kuitsoná je ndsʼee, tosa ngasin nganda kuinóʼyalee nga kʼoeyanajmíná jokjoantjínni kjoa (Prov. 18:13). w21.01 11 párr. 13