Enero

Je Jesús kʼoakitsole je chjotatítjonle religión jñani tsín nda kisʼin. Tobʼelañá, kuinga chjotajaonkjaín kitsonile je chjota fariseo nga̱ ngisaa kui kuenta kisʼin nga ntsja tsakanéjon tikʼoajinni nga xijchále kisikuinda (Mat. 15:1-11). Je Jesús tosi tonda kitsoya jokjoantjínni xi kixi ninga nʼio koanjtile je chjotatítjonle religión. Je Jesús tsakʼéjnatsen xi tsínni kʼoatjín. Alikui kʼoakitso nga tongatsʼi religión nga sasénkon Niná. Tosaa kʼoakitso nga nʼio nkjín mani xi ya tjíofiya ndiaa xi teya kji, xi ya kuichokao jña tojchajin, kʼoa tochoa mani xi ya tjíofiya je ndiaa nrʼoeya, xi ya kuichokao nga sʼe̱le kjoabijnachon xi tsínkʼia fetʼa (Mat. 7:13, 14). Kʼoakitso nga tjínkʼa xi kʼoakuitso nga Niná síxále, tonga tsínni kʼoasʼin. Kuinga i̱ kitsoni: “Tikuindalao yaono je xi énndiso nchja̱ya, xi faʼaikonno xi kijtéjon xjoa̱ xi tsʼe barré, tonga ya ni̱ma̱le ngoyale tseen xkainí. Kao xále jchanile chjotabe” (Mat. 7:15-20). w21.05 9 párr. 7, 8

Je Ana jé chixankao jngo chjota levita xi Elcaná tsakʼin, kʼoa je Elcaná nʼio tsjoake koan Ana. Tonga je Elcaná ijngo chjoón kisʼele xi Peniná tsakʼin. Je Peniná kisʼele xti tonga je Ana likui kisʼele. Je Peniná tsabesin je Ana tojoni nga chʼao katasʼe kon kʼoa saʼnda kisikjiʼndá kʼoa tsín titsakjenni. Tonga je Biblia alikui jña kʼoatso tsa kisijndani Ana jme xi koantʼain. Tosaa je Jeobá tsakʼétsʼoale nga kʼoakitsole jotjín kon kʼoa alikui jao kisʼele nga je Jeobá koasenkao (1 Sam. 1:2, 6, 7, 10). Jmé xi bakóyaná je choa̱le Ana. Kui bakóyaná nga ñá xi kuixónñá josʼiaan tsa ʼyani xi jokuitsoná. Likui koa̱n nga xíngiaa si̱ngósonkoaa yaoná kʼoa tsín ndatjín tsa tokui kuixkanyañá jmeni xi kʼuínná. ʼNdele nga si̱jndangajaoñá jme xi matʼeen, tosa cho̱bandañá kao xíngiaa (Rom. 12:17-21). Ninga tsín sindaya yaole xi ijngo, tonga ñá nda sʼe̱ tokoán. w21.07 17 párr. 13, 14

Nga títjon je Judas Iscariote nda chjota koan, tonga xi koanskanni koanxkaiʼa kʼoa yátsʼin tsakasénle je Jesús (Luc. 6:13, 16). Jé Judas kisʼenele nga katabʼéjnatjao je tao̱n. Je Jesús nkjín kʼa kʼoakitsole je chjotatjenngile nga katasíkuindale yaole je kjoaxkaiʼa (Mar. 7:22, 23; Luc. 11:39). Kʼianga tojeme ni̱kʼien je Jesús, kʼiaa tsakakó je Judas nga xkaiʼa kjima. Je Simón yaa kinchja̱le Jesús ya niʼyale kao chjotatjenngile, kʼoa kʼoati ya kicho je María kao Marta. Kʼianga tjíokjen, je María yaa kichokʼétjenjon jko̱ Jesús jngo siti̱ xi naskánje̱ kʼoa xi nʼio chjíle. Je Judas kao xi ngikʼa alikui kisasenle, tsakui nichxin kui xi koanmele je chjotatjenngile Jesús nga katasatená je siti̱, ánni nga ya koa̱nchjénsíni nga kuitsoyason je tao̱n xi so̱ko. Tonga je Judas kuinga koanjtinile nga jé síché je tao̱n xi sʼejnatjao (Juan 12:2-6; Mat. 26:6-16; Luc. 22:3-6). w21.06 18 párr. 12, 13

Kʼianga tse xá kjinená, a sakʼoa kʼoasʼe tokoán nga tsín kuitjosonná. Kʼoakisʼe kon je pastro Pablo. Kʼoakitso nga nʼio koankjáojinle xi tʼatsʼe ngatsʼi chjotale Cristo (2 Cor. 11:23-28). Kʼiatsa táo chʼin bʼetʼaná, a sakʼoa tsín tsjoa satío tokoán. Je pastro Pablo kʼoati kichobele nga tse kjoa jaʼatojin, tsakui nichxin chʼin tsakʼetʼale (2 Cor. 12:7-10). Joni Pablo, a sakʼoa nikinroajeen tokoán tʼatsʼe jñani tsín nda nʼia. Kʼoakitso nga tsín nda kisʼe kon nga̱ tsín choa ñʼai koanle nga kui kʼoakisʼin xi ndatjín (Rom. 7:21-24). Ningalani nʼio tse kjoa jaʼatojin je Pablo tosi tonda je Jeobá kisixále. Je xi tsakasenkao nga kichokjoajinle je kjoa xi jaʼatojin kuinga koankjainle nga je Jesús tsakʼéchjíntjainá. w21.04 21, 22 párr. 7, 8

Chjotatsje koan tsakai je Adán. Tonga kʼianga tsakajngijée, kisichaa je kjoanda xi kisʼele nga koa̱n kʼoéjna ngantsjai nichxin. Kʼoa kʼoati kisicha kjoanda jebi je xtile. Bakinle je Adán nga kinikʼien, nga̱ toxá kisʼinni nga tsakajngijée. Tonga je xtile alikui je tjínle jée jmeni xi kisʼin je Adán (Rom. 5:12, 14). Jméni xi kisʼin je Jeobá nga koa̱n koatio ngantsjai nichxin je xtile Adán. Kʼoakitso josʼin kʼoasjentjai xi tʼatsʼe jée kao kjoabiya (Gén. 3:15). Nga kʼoakisʼin, koaan miyoná koa̱nni je Jeobá ninga chjotajée maa. Kʼoa nga kʼoasʼin tsakʼéchjíntjainá je Jesús, kuixo̱ya je xále Na̱i (1 Juan 3:8). Xi ijngosani, kuitjoson jmeni xi tjínndajinle Niná saʼnda ngasʼa, nga ʼndenaxó koa̱n Sonʼnde. w21.04 14 párr. 1; 19 párr. 17

Nʼio nkjín chjota kicho ya Jerusalén xi xinxin naxinandá jaʼaini kʼoa xi kjaʼaí kjaʼaí én male. Nga kui nichxin, je chjota judío toʼikoan nga kui én kinchja̱ je én xi male chjota xi ya kicho. Tonga je xi ngisa tjínle kjoandosin kui jmeni xi kitso je chjota judío kʼoa jmeni xi kitso je pastro Pedro. Kui kitsoyale je chjota xi ya kicho nga kuitjontjaile yaole kʼiatsa koa̱nkjainle xi tʼatsʼe Jesús. Nga kʼoatsakʼinle, kisikjaʼaitsjenjin chjota jebi kʼoa i kitso: “Jméni xi sʼiainjin”. Kʼoa je Pedro i kitsole: “Cha̱nisʼenngindáo yaono nga jngó jngó” (Hech. 2:37, 38, TNM). Nga kʼia, janla jmi chjota kisʼenngindá xi chjotale Cristo koan. Kʼiaa kinroatsʼiani nga chjotatjenngile Cristo kinikao je chjota, kʼoa tojo kʼoakjima saʼnda ndʼaibi. w21.06 2 párr. 1, 2

Tsa kʼoasʼin nikjaʼaitsjeen nga tsín ʼya chjota ska̱jiaan xi mele skótʼaya Biblia ya jñani ʼmiyasoán. Tsakui nichxin tsín sasénle chjota nga Énle Niná ʼmiyasoán kʼoa tsa saʼnda batiochjoaná. Jmé xi koasenkaoná nga tsín si̱kinroajeen tokoán. Si̱kjaʼaitsjenjiaan nga bʼantjaiya josʼin tjío je chjota, tsakui nichxin je xi tsín nrʼoéná nga ʼmiyasoán skanni koa̱nmele kjuinrʼoé (Mat. 5:3). Tjínkʼa chjota xi tsín kjoé kʼianga jme xo̱n bʼailee, tonga skanni mamele kotʼaya je Biblia. Xi ijngosani, kuenta sʼiaan nga tsʼee Jeobá xá jebi (Mat. 9:38). Je Jeobá kui xi mele nga tosi tonda kʼuínyasoán, tonga jé koasenkao je chjota nga koa̱nkjainle. Ningalani tsín ʼya xi Biblia tiʼmiyalee ndʼaibi, nʼio tsjoánganʼioná nga kuenta sʼín Jeobá jokji bʼenelee yaoná kʼoa nga tsínkui fini jotjín chjota ʼmiyalee. w21.07 6 párr. 14

Je Jeobá kui kjoanda tsjoále je chjota nga koa̱n sʼe̱le xti kʼoa nga je kjinele kuitsoyale je ʼndíxtile nga tsjoake katama Niná kʼoa nga je katasíxále. Ningalani tse nganʼio tjínle je ánkje, tonga alikui kui kjoanda kitsjoale Jeobá nga xti sʼe̱le. Kʼianga kuenta sʼin jebi xi xijchá ma, nʼio chjí skoe̱kon je kjoanda xi tjínle. Kui xá kjinele je xi xijchá ma nga kʼoasʼin sijchá je ʼndíxtile josʼin mele Jeobá kʼoa nga kuitsoyale je kjoatéxomale (Efes. 6:4; Deut. 6:5-7). Je naxinandále Niná nkjín koya bʼasje xi ya Biblia yʼangini xi kuinyakao xi xijchá ma nga kuitsoyale je ʼndíxtile, jolani xo̱n, video, canción, kʼoa jmesani xi faʼaitʼa ya página xi tíjnaná ya Internet. Jebi kui bakóná nga je Jeobá kao Jesús nʼio tsjoake je ʼndíxti (Luc. 18:15-17). Je Jeobá nʼio tsjoa sʼe kon kʼianga je sínʼiotʼa yaole je xi xijchá ma kʼoa nga síkuinda ʼndíxtile. Nga kʼoasʼin bakóyale je ʼndíxtile binyakao nga ya koatiojinle je familiale Jeobá ngantsjai nichxin. w21.08 5 párr. 9

Tjínkʼa je chjota xi kʼoasʼin síkjaʼaitsjen nga koa̱n koa̱nkjainná tojmeni ninga tsínkjoan ʼyaa ánni nga kui makjainniná. Tonga je Biblia kʼoatso nga tsín kʼoasʼin tíjna je xi kjoamakjain ʼmile. Je Biblia tsoya nga tjín jñani chʼangiñá jmeni xi makjainná. Ningalani tsín ñaki kao xkoaan ʼyañá, tonga ya Biblia bakóyaná nga ñaki tíjna je Jeobá, je Jesús kao Chjotaxále Niná (Heb. 11:3). Jngo chjota científico xi testigole Jeobá ma itso: “ʼYañá ánni nga makjainniná kʼoa kuenta nʼia jmeni xi kjimasjaile je chjota nga tjíokotʼayason”. Tsa tjín choa̱ xi bakóná nga tíjna Niná xi kisindaná, ánni nga nʼio nkjín chjota xi tsín makjainnile nga Niná kisinda ngayeje jmeni xi tjíokon. Kuinga tsín jesoa kotʼayason choa̱ jebi. Je Robert, xi testigole Jeobá ma ndʼaibi, itso: “Kʼoasʼin kisikjaʼaitsjen nga tsín ʼya xi kisinda ngayeje jmeni xi tjín nga̱ tsínkʼia nga kui tsakʼinyana ya ndʼiaskuela. Kʼiaa saʼnda nga jekichona 22 nó nga tsakjakaonajmía je testigole Jeobá, kʼoa kao Biblia kitsoyana je choa̱ xi tjín nga tíjna je Niná xi kisinda ngayeje”. w21.08 15 párr. 4, 5

Kʼianga jchaa nga nʼio nda chjota je Jeobá, ali tsa tokuijin xi machjén nga kʼoéxkiaa je Biblia kʼoa tsa kjaʼaí xi kʼoeyanajmínáje̱ josʼin tísíchikontʼain Jeobá. Machjén nga ñásoa kataʼyaa nga nda chjota je Jeobá. Jngola choa̱ si̱kʼéjnaa. Tobʼelañá, tsa mená nga ñaki to xále Niná sʼiaan, machjén nga tokoa̱nniná josʼin kuiyoaa. Jeʼyaa nga kʼoakitso Jesús nga je Jeobá sichikontʼainná tsa je títjon si̱kʼéjnaa, tonga tsakui nichxin tsín ñásoa tiʼyaa josʼin tíbitjoson én jebi (Mat. 6:33). Tonga nga makjainná jmeni xi kitso je Jesús, chosonnilee josʼin nichjén tao̱nná kʼoa kʼoati chosonnilee jotjín nichxin nixá, kʼoa ngisaa tse nichxin nikʼayalee nga ʼmiyasoán. Nga kʼoanʼia ʼyañá josʼin síchikontʼainná je Jeobá kʼoa ñásoa ʼyaa nga nʼio nda chjota. w21.08 26 párr. 2

Kʼoati ma nichxin xi tiyoaa ndʼaibi. Nʼio nkjín chjota xi nyatítjonle religión xi toje nda kjoeya chjota xi tjínle tao̱n, xi chjine kʼoa xi nʼio ʼyale, kʼoa tsínkui fini ninga tsín nda fikao yaole kʼoa ninga tsín sítjoson jmeni xi tso Biblia. Kʼoa je chjotatítjonle religión bʼasjengi je testigole Jeobá nga̱ tsín nʼio chjí ʼyatokon i̱ Sonʼnde. Je testigole Jeobá kao kjoatsjoa síxále Niná kʼoa tsje fikao yaole. Tojo kitso Pablo, jé kiskoéjin Niná chjota xi tsín nʼio chjí ʼyale i̱ Sonʼnde (1 Cor. 1:26-29). Tonga je Jeobá nʼio chjí bekon je choʼndale xi kixi tjíofitʼale. Jmé xi koasenkaoná nga tsín kjuinroajen kjoamakjainná (Mat. 11:25, 26). Alikui kʼoaiʼndee nga kui katasíkinroajen tokoán jmeni xi tso chjota tʼatsʼe choʼndale Niná. Ñaki kʼoakʼoé tokoán nga je kjoéjin Jeobá chjota xi nangitokon kʼianga choʼndale mani (Sal. 138:6). Kʼoa kuenta sʼiaan jmeni xi tísʼín Jeobá nga je tísíchjén chjota xi tsín chjine sʼin ʼyatokon i̱ Sonʼnde. w21.05 8 párr. 1; 9 párr. 5, 6

Je pastro Pablo kitsjoaa kjoanda kʼianga tsakʼainganʼiole, kitsjoaa kjoanda nga tsakinyakao je ndsʼe̱ (Filip. 2:19-22). Je ndsʼee xi jekoanjchínga nʼio nkjín koya josʼin koa̱n koako nga tsjoále kjoanda jmeni xi sʼín je ndsʼee xi sʼa xti. Kʼiatsa jekjimajchíngai, tsa jngo ndsʼee xi sʼa xti kʼoakuitsoli nga mele koaikaoli tsa jña kʼuín, tsa je koaikatse jmeni xi machjénli kʼoa tsa jmesani xi sʼiain, tʼailai kjoanda nga kʼoasʼin koasenkaoli. Kui tikjaʼaitsjain nga je Jeobá xi kʼoasʼin tíbakóli kjoatsjoacha. Kʼoa tsakui nichxin saʼnda miyoli koa̱nni je ndsʼee. Tinyakao je xi sʼa xti nga ngisa katamamiyo je Jeobá. Kʼoatʼinlao nga nʼio nda tjíosʼín nga tjíobʼénele yaole nga tjíosíxále Jeobá. Kʼoa tikʼayalao nichxin nga tʼeyanajmílao josʼin tinijcháo yaono. Kʼoasʼin koakoño nga bʼailao kjoanda je Jeobá xi totʼatsʼe nga tjío ndsʼee xi sʼa xti ya jinjtín (Col. 3:15; Juan 6:44; 1 Tes. 5:18). w21.09 12 párr. 12, 13

Je Jeobá tsjoake je ndsʼee. Tsakui nichxin ñʼai maná nga tsjoacha maa je ndsʼee. Tsakui nichxin kuinga ñʼai maniná nga xinxin kitjenñá kʼoa nga tsín tongóson sʼin koanjchíngaa. Kʼoa ngatsʼiñá nga kui kʼoanʼia sakʼoa jmeni xi tsín sasénle xi ngikʼa. Ninga kʼoalani, koaan tsjoacha koaan je ndsʼee tojo sʼín je Jeobá (Efes. 5:1, 2; 1 Juan 4:19). Jngo chjota xi tjínle kjoamatokon básjaile josʼin basenkao xi kjaʼaí kʼoa tsjoánganʼiole. Josʼin tsabekon Jesús je chjota, kʼoasʼin tsakakóni nga mamake Jeobá je chjota (Juan 5:19). Je Biblia itso: “Kʼia nga Jesús tsabe chjotankjín, koanmake, nga kʼoasʼin tjíotsaoba, kʼoa tʼaxin tjío, joni barré xi tsínle xi koʼnda” (Mat. 9:36). Ali tsa tokʼoajin kitso je Jesús nga koanmake je chjota, kisindayaa xi chʼin tjínle kʼoa tsakasenkao chjota xi nʼio kisixá kʼoa xi nʼio kisikjáojin (Mat. 11:28-30; 14:14). w21.09 22 párr. 10, 11

Kuinga tsjoakená je Jeobá nga bakóniná kjoamatokon. Je pastro Pablo kʼoakitso nga tjínle kjoamatokon je Niná. Kʼianga kʼoakitso kui kinchja̱ni nga je Niná kiskoéjin kʼa chjota i̱ Sonʼnde nga ya koai ngʼajmi (Efes. 2:4-7). Tonga ali tsa tojejin chjota xi ya tjínle kjoachoya ya ngʼajmi xi bakóle kjoamatokon je Niná. Itso jngo salmo xi kiski David: “Je Jeobá bakóle kjoanda ngatsʼi, kʼoa kao jmeni xi kisinda bakóni je kjoamatokonle” (Sal. 145:9). Kʼianga tsjoakená je Jeobá bakóná kjoamatokon kʼianga tjen ndiaale. Je Jesús nda be nga bakó kjoamatokon je Jeobá nga̱ jmi nó nga ya tsakʼejnakao Nʼaile ya ngʼajmi nga kjesa faʼaijin i̱ Sonʼnde (Prov. 8:30, 31). Nkjín kʼa tsabe josʼin bakóle Niná kjoamatokon je chjota (Sal. 78:37-42). Kʼianga kitsoya je Jesús me tokjitʼa nga kui kisikʼaxki̱ josʼin bakó kjoamatokon je Nʼaile. w21.10 8, 9 párr. 4, 5

Nʼio kinoʼyale je jta̱le Jeobá ya tjen ngʼajmi nga kʼoakitso nga kʼoasjejeya jaʼaínle. Kʼianga kitsoyason je Jesús i̱ Sonʼnde tsʼasjejeya je jaʼaínle Nʼaile (Juan 17:26). Kuinga tjínnenile sichjén jaʼaínle Niná je xi chjotale Cristo ma kjoaixi kʼoa nga kuitsoyale xi kjaʼaí. Kʼianga siglo 1, nga to chriankʼia kisʼejna je jtín xi tsʼe chjotale Cristo, je Jeobá kuenta kisʼin je “chjota xi li judíojin, nga kjoaʼajin chjota xi kʼuínle nga tsʼe”, xi tsonile, jngo naxinandá xi jaʼaínle kʼoa̱ (Hech. 15:14). Je chjotale Cristo jebi nʼio tsjoa kisatio kon nga kisichjén je jaʼaínle Niná kʼoa nga kitsoyale xi kjaʼaí. Kisichjén jaʼaínle Niná kʼianga kitsoyason kʼoa nga kiski Biblia. Tojé chjota jebi xi kitsoya joʼmi Niná kʼoa kʼoasʼin tsabexkónni je jaʼaínle (Hech. 2:14, 21). Nichxin xi tiyoaa ndʼaibi, yaa tiyojinlee jngo naxinandá xi jaʼaínle Niná yʼa. w21.10 20 párr. 8-10

Je xi ñaki kjoatsjoachale Niná tíjna ngantsjai. Ya Salmo 136 kanjaon kʼa síkʼaxki̱ nga je xi ñaki kjoatsjoacha tíjna ngantsjai. Je versículo xi títjon itso: “Tʼailao kjoanda je Jeobá nga̱ nda chjota; bakó ngantsjai xi ñaki kjoatsjoacha” (Sal. 136:1). Ya versículo 2 saʼnda 26 tikui tikui én síkʼaxki̱ni nga je xi ñaki kjoatsjoacha tíjna ngantsjai. Kʼianga bʼexkiaa salmo jebi, tokʼoamaná nga nkjín koya josʼin bakó Jeobá je xi ñaki kjoatsjoacha kʼoa bakó ʼndeʼndee. Kʼianga kʼoatso nga je xi ñaki kjoatsjoacha tíjna ngantsjai, kui bakóyaná nga je kjoatsjoacha xi bakóle Jeobá je naxinandále tsínkʼia bʼantjaiya. Nʼio basenkaoná nga ʼyaa nga tsín tsjionkon Jeobá je choʼndale, tosaa ya tjen tíjnakao xi je síxále, ngisaa kʼianga kjoa faʼatojin. Kʼianga ʼyaa nga ya tjen tíjnakaoná je Jeobá tsjoa sʼe tokoán kʼoa chókjoajinná je kjoa xi bitjatojiaan kʼoa tosi tonda ya mangínyaa je ndiaa xi kuichokaoná nga sʼe̱ná kjoabijnachon (Sal. 31:7). w21.11 4 párr. 9, 10

A nokjonní kʼianga kui nikjaʼaitsjain jmeni xi jeme kʼoakoa̱n. Jolani nga tjóxin religión ndiso, nga kʼoetʼaná Gog xi tsʼe Magog kʼoa nga sʼe̱jna kjoajchán xi Armagedón ʼmi. A sakʼoa nikjaʼaitsjain tsa kixi kʼuíntʼalai Niná kʼianga kʼoakoa̱n. Tsa kʼoalani, nʼio koasenkaoli jmeni xi kitso Jesús, tojo tso texto xi kamaxkia ndʼaibi. Je Jesús i kitsole je chjotatjenngile: “Ali aonjin male ni̱ma̱no. [...] Katamakjainno”. Kʼiatsa nʼio tíjna kjoamakjainná, alikui kui kuinókjonlee jmeni xi koa̱n nichxin xi sʼa nroa. Jngo koya xi koasenkaoná nga nʼio sʼe̱jna kjoamakjainná nga chókjoajinná je kjoa xi kuitjátojiaan nichxin xi sʼa nroa, kʼiaa nga si̱kjaʼaitsjenjiaan jonʼia ndʼaibi nga kjoa bitjatojiaan. Kui xi koasenkaoná nga jchaa jmésani xi machjénná nga nʼio sʼe̱jna je kjoamakjainná. Sa nʼio sa nʼio sʼejna je kjoamakjainná kʼianga chókjoajinná, kʼoa kui xi koasenkaoná nga chókjoajinná je kjoa xi kuitjátojiaan nichxin xi sʼa nroa. w21.11 20 párr. 1, 2

Je pastro Pablo kʼoakitsole je Timoteo nga nda katasítjoson je xále Niná, kʼoa kʼoati kui kjoafaʼaitsjen bʼaile ngatsʼi chjotale Cristo (2 Tim. 4:5). Tonga sakʼoa ñʼai maná nga nitjosoán kjoafaʼaitsjen jebi. Tobʼelañá, jñani tsín tsjoáʼnde je chjotaxá nga ʼmiyason je Énle Niná ñʼai male je ndsʼee. Kʼoa kjaʼaínile je kjoa xi sakʼoa bitjatojiaan, sakʼoa síkinroajen tokoán. Tobʼelañá, nkjín mani xi síxá bʼajnda nichxin, tonga tochoa̱ sokóʼale je familiale. Ningalani mele kuitsoyason ndsʼee jebi, sakʼoa tsín tikʼoamanile nga tífe xomana nga̱ jenʼio aonyale. Tjínkʼa xi tsín tinʼio tse síxánile je Jeobá, tsakui nga táo chʼin tjínle kʼoa tsakuije̱ nga jekjimajchínga kʼoa tsín tima bitjoni ndʼiale. Kʼoa tjínkʼa xi kʼoasʼin síkjaʼaitsjen nga tsín tichjínile jmeni xi sʼín. Tojme kjoa xi tibitjatojiaan, jé Jeobá koasenkaoná nga tosi tonda si̱xálee jokji tjen kʼoakoa̱nná. w21.05 20 párr. 1-3

Sakʼoa kʼiakjoan kʼoatsoná je chjota nga tjín xi sʼiaan kʼianga kui xále Jeobá kʼoanʼia. Kʼianga kʼoama, jméni xi koasenkaoná nga nda chjoéjiaan jme xi sʼiaan. Kataʼyala je kjoafaʼaitsjen xi tsjoáná ya Levítico 19:19, jñani i̱ tso choa: “Alikuijin chʼakjáo je najño xi jao nachjón xi kjaʼaí kjaʼaínile koanndani”. Nga kisitjoson kjoatéxoma jebi je chjota israelita, kʼoasʼin tsakakóni nga tsín koanngóson kao je naxinandá xi ya tsakationdaile. Nichxin xi tiyoaa ndʼaibi, alikui chʼaotjín tsakui chʼa̱kjá najño xi kjaʼaí kjaʼaí nachjón koanndani. Je xi chʼaotjín kuinga kʼoasʼiaan josʼín je chjota xi kui kʼoasʼín xi kontra tíjnale Biblia. Tsjoachañá je xíngiaa kao ngatsʼi chjota. Tonga kʼianga kui chjoejiaan je xi nʼio tjínle kjoandosin tjínnele jchale nga choʼndale Jeobá maa kʼoa nga tsín mangósoán josʼín chjota xi tsín je síxále. Machjén nga ñaki toje kjuintʼalee (2 Cor. 6:14-16; 1 Ped. 4:3, 4). w21.12 5 párr. 14; 6 párr. 16

Je Jesús kʼoakitso jmeni xi sʼiaan tsa mená nga sʼe̱ná kjoabijnachon, i kitso: “Tsa énna si̱kitjosonntsjao, jon nío xi ñaki chjotana. Jchanío xi kjoakixi, kʼoa je xi kjoakixi sikatíondaíno” (Juan 8:31, 32). Nʼio nda tinʼiai nga tsín ya tiʼmitjenngilai je chjota xi ya ndiaa xi “teya” tjíomaya, nga tosa kui tsakjasjai xi kixi. Nʼio nda kichotʼayajin jotso je Énle Niná nga tsaʼyai je kjoatéxomale kʼoa nga kinoʼyalai je Jesús. Koanjinli nga kui xi mele Jeobá nga tsínkui kuenta sʼiaan jme xi bakóya je religión ndiso, kʼoa nga tsínkui sʼuí chʼa̱sjee kʼoa tsínkui costumbre kjuintjenngiaa xi tsín ya Biblia faʼaitʼa. Kʼoati tsaʼyai nga tsín choa ñʼai maná nga nitjosoán jmeni xi tsoná je Jeobá kʼoa nga nikatioá jmeni xi tsín sasénle (Mat. 10:34-36). Tsakui nichxin ñʼai koanli nga kʼoakinʼiai, tonga nga tsjoachai Niná kʼoakinʼiai. Je Jeobá nʼio tsjoa tjín kon nga je tinixálai (Prov. 27:11). w21.12 22 párr. 3; 23 párr. 5

Je Moisés nʼio nda choa̱ bʼéjnaná nga̱ tsakʼaʼén jmeni xi kitsole Jeobá kʼianga tsín kixi tíjna jme xi kisʼin. Ñandia nga nʼio kisijtile yaole kʼoa tsín je Jeobá tsakʼasjengʼa. Kuinga tsín koan jaʼasʼenni ya ʼNde jña tsakʼinle nga kʼoaile (Núm. 20:1-13). Ba kisʼe kon Moisés nga kʼoatsakʼinle kʼoa kʼoakitsole Jeobá jotjín kon. Tonga je Jeobá i kitsole: “Ali tikuijin kʼoaʼmininái” (Deut. 3:23-27). ʼNdele nga tokoa̱njtile tosaa tsakʼaʼén jotsakʼinle, kʼoa je Jeobá tosi tonda kitsjoaxále nga je tsakándiaale naxinandá Israel (Deut. 4:1). Je Moisés nʼio nda choa̱ tsakʼéjnaná. Je Moisés tosi tonda kisixále Jeobá ningalani tsín kitjoʼndele nga jaʼasʼen ya ʼNde jña tsakʼinle nga kʼoaile, kʼoa kʼoasʼin tsakakóni nga tsakʼaʼén jmeni xi tsakʼinle. Ndasʼin kuichomani tsa chjénngilee je choʼndale Niná xi kixi koan jolani Moisés (Prov. 4:11-13). Nʼio nkjín ndsʼee xi kʼoatjíosʼín. w22.02 11 párr. 9, 10

Kʼianga tífetʼa nó 32, kitjochʼinle je miyole Jesús xi Lázaro tsakʼin kʼoa kʼieen (Juan 11:3, 14). Je Jesús nʼio tjao koanle Lázaro kʼoa kao nga jao ndichja. Kʼianga kisʼejinle Marta nga jetjenyandiaa je Jesús ndi̱toon kikʼáyandiaa. Si̱kjaʼaitsjenla jokji ba tjín kon Marta nga i̱ kitsole Jesús: “Señor, tsa i̱lasa tijnai tsakai, je ndsʼe likui kʼen” (Juan 11:21, 32, 33). Kuijin nga kiskiʼndáni je Jesús nga tsabe je María kao Marta nga nʼio ba tjío kon nga kʼien je ndsʼe̱. Kʼoajin timajinli jokisatio kon kʼiatsa jekinicha jngui xíngi. Je Jeobá majinle jotjín tokuin. Nʼio nda tsakakó Jesús jokjoan je Nʼaile (Heb. 1:3). Nga kiskiʼndá Jesús kʼoasʼin tsakakóni jotjín kon je Nʼaile (Juan 14:9). Kʼiatsa ba tjín tokuin nga jngo xíngi kʼien, je Jeobá kuenta sʼín kʼoa kʼoati ba male tsanda je. Mele nga nda sʼe̱ni tokuin (Sal. 34:18; 147:3). w22.01 14, 15 párr. 5-7

Nʼio koasenkaoná tsa si̱kʼayaa nichxin nga kʼoétsʼoalee Jeobá, nga kuinóʼyalee kʼoa nga si̱kjaʼaitsjenjiaan xi tʼatsʼe. Jósʼin koasenkaoná. Xi títjon, nda chjoéjiaan jmeni xi sʼiaan. Je Biblia kʼoatso nga “je xi chjotachjine bʼamjekao chjinee koa̱n” (Prov. 13:20). Xi majaoni, ngisaa nda koa̱nná koakoyaa. Kʼianga Biblia ʼmiyalee je chjota kui xi mená nga je Jeobá katasíchriantʼale. Kʼianga ntsjaintsjai chja̱kaonajmiá je Jeobá ngisaa tsjoacha koaan kʼoa ngisaa koa̱nná josʼin kʼuínyalee chjota nga kʼoati tsjoake katama tsanda je. Kʼoakisʼin je Jesús, tsakakó nga nʼio tsjoake je Nʼaile kʼianga kinchja̱ni xi tʼatsʼe. Kʼoa nga kʼoakisʼin, je chjotatjenngile kʼoati tsjoake koan je Jeobá (Juan 17:25, 26). Xi majanni, ngisaa nʼio sʼe̱jna kjoamakjainná. Si̱kjaʼaitsjenla josʼin basenkaoná je Jeobá kʼianga nganʼio nijélee, nga kʼoaʼmilee nga je katabándiaaná kʼoa nga katasínʼio tokoán. Nga ʼyaa josʼin basenkaoná Jeobá, sa nʼio sa nʼio sʼejna je kjoamakjainná (1 Juan 5:15). w22.01 30 párr. 15-17

Nga tsjoakená Jeobá kʼoa nga mele nda kuiyoaa kuinga kʼoatsoniná nga tsín tikui si̱kjaʼaitsjenñá je xi chʼaotjín kʼoa tsín tikui kʼoasʼianñá (Is. 48:17, 18). Be je Jeobá nga tiñá nikiʼaonñá yaoná kʼoa nga kʼoati nikiʼoaan xi ngikʼa kʼianga bʼaiʼndelee yaoná nga kui kʼoanʼia xi chʼaotjín. Kʼoa tsín nda sʼe kon nga kʼoama. Tsakui nichxin toskoe̱sinná je xíngiaa kao miyoná nga tinikʼantjaiyaa yaoná jonʼia (1 Ped. 4:3, 4). Tsakui nichxin kʼoakuitsoná nga tiʼndená kʼoasʼiaan josʼin mená kʼoa nga tsín ʼya xi tjínnele kʼoakuitsoná josʼiaan. Tonga je xi tsín sítjoson kjoatéxomale Jeobá alikuini tsa toje yʼa yaole nga̱ kuini kʼoasʼín josʼin mele je Na̱i (Rom. 12:1, 2). Ngatsʼiaa machjén nga chjoéjiaan josʼiaan, a mená nga tosi tonda kui kʼoasʼiaan jokinʼia ngasʼa, josʼin mele Na̱i kʼoa josʼin mele yaoná. Axo kui xi mená nga je Jeobá sindayaná (Is. 64:8). w22.03 3 párr. 6, 7

Nga nikjaʼaitsjenjiaan jmeni xi tso je Énle Niná, basenkaoná nga tsín tokui bʼeyaa jkoaa je kjoa xi tjínná. Kataʼyala jokoan jngo tichjaa xi xʼinle kʼien. Jngo xi chjotajchínga sʼin tíjna, kʼoakitsole nga nʼio koasenkao kʼiatsa kui kʼoexkia je libro xi tsʼe Job. Kʼianga kui tsakʼéxkia tichjaa, kui kiskaniya jko̱ nga tsín kixi tíjna josʼin kisikjaʼaitsjen je Job, kʼoa i kitso:: “Job, tokui tinikjaʼaitsjen ntsjai je kjoa xi tjínli”. Kʼoa kʼiaa koanjinle nga kʼoani tisʼin tísíkjaʼaitsjen tsanda je jokisʼin Job. Kui xi tsakasenkao nga tsín tokui kuenta kisʼin je kjoa xi tjínle nga kisicha je xʼinle. Jé ndsʼee síchjén Jeobá nga tsjoánganʼioná. Je Pablo kʼoakitso nga nʼio koanmele kisatejin je ndsʼe̱, ánni nga tsjoánganʼiongañánile xínkjín (Rom. 1:11, 12). w21.05 22 párr. 10, 11; 24 párr. 12

Nichxin kjoatse, i tsakʼinle je chjota israelita: “Jan kʼa nga jngo nó, ngatsʼi je xi xʼin tjínnele koai ya ʼnde jñani skoéjin je Jeobá Nináli” (Deut. 16:16). Kʼianga ki jñani tsakatiojtín tjínnele kisikatío niʼyale kao tsojmi xi kisʼele. Je Jeobá i kitsole: “Aliʼya xi kuitso kon nga nangili skoé kʼianga kʼuínkisenjnai ngixko̱n Jeobá Nináli” (Éx. 34:24). Jé Jeobá kisinʼiotʼa je chjota israelita kʼianga ki je kjoajtín xi xki̱ nó kisatiole. Nʼio tsakinyakao nga kʼoakisʼin, ngisaa nda koanjinle jotso je kjoatéxomale Niná, kisikjaʼaitsjenjin je kjoanda xi tsakakóle Jeobá kʼoa ngisaa koanmiyo xínkjín nga ñatjen tsakʼétsʼoale Jeobá. Kʼoati nʼio binyakaoná tsanda ñá kʼianga mangián je kjoajtín. Kʼoa nʼiojin tsjoa sʼe kon je Jeobá nga tongini biyondaa nga bʼé comentarioná. w22.03 22 párr. 9

Je Jeobá kuinga kitsjoaʼndeni jme xi koantʼain je Jesús nga Naʼmitítjon koa̱n ya ngʼajmi. Kʼianga kjoañʼai jaʼatojin je Jesús koanjinle nga tsín choa ñʼai tíjna kʼianga nitjosonlee je Niná. Kʼianga tse kjoañʼai tíjnajin je Jesús kisijéle nganʼio je Nʼaile kʼoa saʼnda kiskiʼndá. Nga tse kjoañʼai tsakjaʼá je Jesús, majinle josatío tokoán kʼianga kjoañʼai bitjatojiaan kʼoa tíjnandaa nga koasenkaoná. Nʼio bʼailee kjoanda je Jeobá nga je Jesús xi Naʼmitítjon sʼin kisikʼéjna nga̱ majinle josatío tokoán (Heb. 2:17; 4:14-16; 5:7-10). Kuinga kitsjoaʼndeni Jeobá nga kjoañʼai tsakjaʼá je Jesús nga̱ kʼoasʼin tsakakóni nga koa̱n kixi koaitʼale Niná jngo chjota ninga nʼio tse kjoañʼai ni̱kjaʼá. Je Na̱i kʼoatso nga to tjín xi nʼianilee nga Niná nixálee kʼoa nga tsín tsjoachaa je Jeobá (Job 1:9-11; 2:4, 5). Nga kixi kitʼale Niná je Jesús kʼoasʼin tsakakóni nga ndiso je Na̱i. w21.04 16, 17 párr. 7, 8

Je xi títjon sʼin je xi Biblia tíkotʼaya kuinga sitjoson jotso je Énle Niná. Kʼiatsa kʼoasʼin, yaa koa̱nngóson je chjota xi kinchja̱ni Jesús, je xi na̱xi̱ tsakʼéndason ndʼiale (Mat. 7:24, 25; Luc. 6:47, 48). Kuisenkoaa je xi Biblia tiʼmiyalee nga katasíkʼantjaiya yaole (Mar. 10:17-22). Je Jesús kʼoakitsole jngo chjotanyiná nga katabaténa ngayeje je tsojmi xi tjínle, ningalani be Jesús nga tsín choa ñʼai koa̱nle nga kʼoasʼin (Mar. 10:23). Kuinga kʼoakitsonile Jesús chjota jebi nga tjao koanle. Tsakui nichxin tsín kuitso tokoán nga kʼoakʼuínlee je xi Biblia tiʼmiyalee nga ndi̱to̱n katasítjoson jmeni xi tso je Énle Niná (Col. 3:9, 10). Tonga tsa kʼoakʼuínlee, ngisajin ndi̱to̱n koa̱nmele sitjoson. Kʼiatsa kʼoakʼuínlee kʼoasʼin koakonilee nga mandosinná xi tʼatsʼe (Sal. 141:5; Prov. 27:17). w21.06 2, párr. 3; 3 párr. 5

Je Pedro kʼoakitso nga nʼio nda choa̱ tsakʼéjnaná je Jesús nga kichokjoajinle je kjoa xi jaʼatojin. Tonga nkjínsa koya xi koa̱n chjénngilee jokisʼin je Jesús (1 Ped. 2:18-25, TNM). Nʼio nda choa̱ tsakʼéjnaná jmeni xi kisʼin kʼoa jmeni xi kitso. Nga chjotajée maa, a koaan chjénngiaa je choa̱le Jesús. Jaon. Je Pedro ali tsakuijin xi kitsonile nga ñaki kʼoakjoansʼin kuitjosonná jokisʼin je Jesús. Kui xi kitsonile nga chjénngilee jokji tjen kʼoakoa̱nná. Tsa kjuintjenngiaa je choa̱le Jesús jokji tjen kʼoakoa̱nná, tinitjosonñá jokitso je pastro Juan nga kʼoakitso nga kʼoasʼin kuitsomaa josʼin tsakʼamje je Jesús (1 Juan 2:6). Tsa kjuintjenngiaa je choa̱le Jesús ngisaa koa̱nchriantʼalee je Jeobá. Je Jesús tsakʼéjnachoaná josʼin kjuinkoaa yaoná nga sa̱sénle Niná (Juan 8:29). Tsjoa sʼe̱ kon je Jeobá tsa kjuintjenngiaa je choa̱le Jesús. Xi ijngosani, alikui jao tjínná nga je Jeobá síchriantʼale je xi bʼénele yaole nga símiyo (Sant. 4:8). w21.04 3 párr. 4-6

Je Jeobá kui kuenta sʼín jñani nda nʼia, be nga koa̱nná kʼoasʼiaan xi ndatjín kʼoa miyo tsoná. Tsa kixi kjuintʼalee yaa tjen tíjnakaoná ngantsjai (Juan 6:44). Tsa ñaki kʼoatjío tokoán nga tsjoakená je Jeobá, tosi tondajin je si̱xálee ninga tse kjoa kuitjátojiaan. Tonga tsa to jao sʼe̱ná nga tsjoakená je Jeobá, kjuinroajenjin tokoán (Prov. 24:10). Tsa si̱kinroajeen tokoán kʼoa kʼoasʼin si̱kjaʼaitsjeen nga tsín tsjoakená je Jeobá, ngisajin ñʼai koa̱nná nga chókjoajinná jmeni xi koatiobasenná je Na̱i (Efes. 6:16). Tjínkʼa ndsʼee xi kʼoasʼin síkjaʼaitsjen nga tsín titsjoakeni je Jeobá kʼoa kuinga nroajenni je kjoamakjainle. Tokjoan kʼoakʼuínlee je Jeobá nga katabasenkaoná tsa jekʼoasʼin tinikjaʼaitsjeen nga tsín titsjoakeniná. Kʼoakʼuínlee nga katabasenkaoná nga nda katasʼe tokoán, kʼoa nga tsín tikʼoasʼin si̱kjaʼaitsjenñá (Sal. 139:23; nota; Filip. 4:6, 7). Kʼoati kuenta sʼiaan nga tjín je ndsʼee xi kʼoati satío kon. w21.04 20 párr. 1; 21 párr. 4-6

Si̱kjaʼaitsjenla jókoanni tsaʼyaa je Énle Niná. Tjínjin xi kitsoyaná, tsakui nichxin je xijcháná, tsa xi ñatjen nixá, tsa je xi ñatjen mangían skuela kʼoa tsa kʼia kinoʼyáje̱ nga xki̱ ndʼia xki̱ ndʼia tsoyason je ndsʼee (Mar. 13:10). Xijekoan, kisikʼayajin nichxin nga kitsoyaná je Biblia. Nga tsakʼinyaná jotjínni xi tʼatsʼe Jeobá, koanjinná nga tsjoakená kʼoa kʼoati tsjoacha koan tsanda ñá. Jé Jeobá xi i̱ jaʼaikaoná jinnaxinandále. Ndʼaibi nga jechjotatjenngile Cristo maa, tjínná kjoachoya nga koa̱n kuiyoaa ngantsjai nichxin (Juan 6:44). Bʼailee kjoanda je Jeobá nga kʼoasʼin tsakakóyaná je choʼndale jotjínni xi kixi kʼoa nga kjima tinixálee ndʼaibi. Nga jeʼyaa jotjínni je Énle Niná kʼoati kui kjoanda tjínná nga kuinyakoaa je chjota nga chjotatjenngile Cristo katama. Tjínkʼa ndsʼee xi tsín ñʼai male nga xki̱ ndʼia xki̱ ndʼia tsoyason, tonga je xi ñʼai male kuinga Biblia tsoyale je chjota. w21.07 2 párr. 1, 2