Febrero

Nʼio mandosinle je Jeobá josʼin tjío ngatsʼi je choʼndale. Chrian tíjnaná ngatsʼiaa kʼoa be kʼianga nroajen tokoán (Sal. 145:18, 19). Kataʼyala josʼin tsakasenkao je profeta Elías. Nʼio ñʼai koanchon ya naxinandá Israel nichxin nga tsakʼejna je Elías. Tse nganʼio kisʼele je kontrale Niná kʼoa kitjenngike je choʼndale, kʼoa ñaki kʼoatsakatío kon nga sikʼien je Elías (1 Rey. 19:1, 2). Kʼoasʼin kisikjaʼaitsjen je Elías nga toje tojngosa xi profetale Jeobá ma nga kʼia, kʼoa nʼio kisikjáojin (1 Rey. 19:10). Tonga tokjoan tsakasenkao je Jeobá. Jngo ánkje kisikasén kʼianga kʼoakitsole je Elías nga tsín toje tíjna, kʼoa nga nkjínsa chjota israelita tjío xi kixi tjíofitʼale Niná (1 Rey. 19:5, 18). Je Jesús kʼoakitsole je chjotatjenngile nga nʼio nkjín koa̱nni je xi jo xínkjín sʼin skoe̱kon (Mar. 10:29, 30). Kʼoa je Jeobá kʼoatso nga koasenkao ngatsʼi xi je síxále (Sal. 9:10). w21.06 8, 9 párr. 3, 4

Nʼio nkjín chjota xi tsín sasénle jmeni xi ʼmiyaa, nga̱ bʼéjnatsen je Biblia nga tsínni kʼoatjín josʼin makjainle. Je xi nyatítjonle religión kui bakóyale chjota nga kjoañʼai tsjoále Niná je chjotatsʼen jñani lʼí títi, kʼoa makjainle je chjota joʼmile. Tonga ñá, xi choʼndale Jeobá maa, ʼmiyalee je chjota nga tsín kʼoatjín jebi, nga̱ ʼyañá nga nʼio tsjoakená je Niná. Je religión kui bakóya nga tojo bʼejnakon ni̱ma̱ná kʼianga jebiyaa. Tsa kʼoalani ma kjoaixi, alikuijin machjén nga kjoaʼáyanile je kʼien. Tonga ñá, kui bakoyaa nga tsín ya Biblia faʼaitʼa nga kʼoasʼin makjainle chjota. Tjínkʼa je religión xi kʼoasʼin bakóya nga to jetjínndajin jmeni xi nʼia. Tonga ñá, kui bakoyaa nga tiʼndená ngatsʼiaa nga chjoéjiaan jmeni xi sʼiaan, kʼoa ñá xi kuixónñá tsa mená si̱xálee Niná kʼoa tsa mai. Kʼoa je xi nyatítjonle religión nʼio jti male kʼianga kui ʼmiyaa. Tsa tsjoachaa je Énle Niná machjén nga si̱tjosoán kʼoa nga katamakjainná jmeni xi tso Niná (Juan 8:45, 46). Alikui kʼoasʼiaan jokisʼin je Na̱i, tosa kixi kjuintʼalee Niná kʼoa alikuikʼia si̱kʼéjnaa je Énle (Juan 8:44). Kui xi mele Niná nga kui choa̱le Jesús koaitjenngi je choʼndale. Kuinga i̱ tsoniná: “Chʼaocha katamao xi chʼao tjín, nʼio tangíntʼalao xi nda tjín” (Rom. 12:9; Heb. 1:9). w21.05 10 párr. 10, 11

Jósʼiaan tsa jengʼakon kʼoa tsa jexkaiʼa kjimaa. Je Pablo kʼoakitso nga koa̱n kuitjoxinlee ninga jeya tíkayaa je che̱nle Na̱i (2 Tim. 2:26). Kuenta sʼiaan nga ngisa tjínle nganʼio je Jeobá tikʼoajinni je Na̱i. Kʼiatsa si̱tjosoán jmeni xi tsoná je Jeobá alikui ya jtsaoyaa tojme che̱n xi sa̱tíobasenná. Tonga machjén nga si̱kuindalee yaoná, kʼoa jé Niná koasenkaoná. Nyaon nyaon si̱jélee nganʼio je Jeobá nga katabasenkaoná nga si̱ndayaa yaoná kʼiatsa jengʼakon kʼoa tsa jexkaiʼa kjimaa (Sal. 139:23, 24). Si̱kuindalee yaoná je che̱n xi síchjén je Na̱i. Jejmi nó tjínle nga kʼoasʼin che̱n batíobasen. Tonga jeme kuicho nichxin nga sʼe̱tʼanʼio, kʼoa xijekoa̱nni tondiaa tjóxin (Apoc. 20:1-3, 10). Nga tojo tíjnasa je Na̱i, tosi tonda si̱kuindalee yaoná je che̱nle. Si̱kuindaa yaoná nga tsín ngʼakon kʼoa nga tsín xkaiʼa katamaa. Kʼoa tosi tonda kjuintjenngiaa kjoafaʼaitsjen jebi: “Tiyotajalao je na̱i, kʼoasʼin koa̱nga tʼaxinnino”. w21.06 19 párr. 15-17

Je Jeobá tsjoa sʼe kon kʼianga makjainle je chjota jmeni xi tso je Biblia kʼoa nga fákaoni xi kjaʼaí jmeni xi kjimajinle (Prov. 23:15, 16). Nʼiojin tsjoa tjín kon Jeobá tʼatsʼe jmeni xi kjima nichxin xi tiyoaa ndʼaibi. Tobʼelañá, ningalani nʼio táo chʼin xi koan nga nó 2020, je chjota xi Biblia tsakʼinyale 7,705,765 koanni kʼoa 241,994 koanni chjota xi kisʼenngindá nga kitsjoatʼale yaole je Jeobá. Ndsʼee jebi kʼoajinti nkjínsa chjota kuinyakao nga chjotatjenngile Cristo koa̱n (Luc. 6:40). Kʼianga chjotatjenngile Cristo nikoaa je chjota fayatsjoañá je ni̱ma̱le Jeobá. Tsee nichxin tjenkao nga ʼmiyalee je chjota nga tsjoake katama je Jeobá. Tonga jé Jeobá koasenkaoná nga kuitjosonná xá jebi. Koaan kʼoasʼin kʼoéndajiaan ninga tojngo chjota kʼuínyalee Biblia. Koaan kʼoakʼuínlee je chjota xi chjakaonajmiá kʼiatsa mele skótʼaya je Biblia, kʼoa tsakuini nichxin koa̱nmele skótʼaya. w21.07 6, 7 párr. 14-16

Je rey David nʼio tse tao̱n kitsjoa kʼoa nʼio nkjín koya tsojmi kitsjoa kʼianga kisʼenda je yo̱ngo̱ (1 Crón. 22:11-16). Kʼiatsa jejchíngai kʼoa tsa tsín tikʼoakoa̱nnili nga ya kʼoainganʼiui nga sʼenda ndʼia jña ʼyaxkón Niná, koaan tosi tonda kao tao̱n kʼoainganʼioni jokji tjen kʼoakoa̱nli. Kʼoa tʼinyalai je ndsʼee xi sʼa xti jokji kjoankjíntokon tísʼeli. Kʼoati nʼio nda choa̱ tsakʼéjna je pastro Pablo nga tsakasenkao je Timoteo. Kʼoakitsole je Timoteo nga katafikao kʼianga nʼio kjin kikakóyason. Kitsoyale josʼin kuitsoyason kʼoa josʼin kuitsoya je Énle Niná (Hech. 16:1-3). Nga kʼoakisʼin Pablo, je Timoteo nʼio nda koanle kitsoya je Énle Niná (1 Cor. 4:17). Kʼoa je Timoteo kʼoati tsakakóyale xi kjaʼaí josʼin kitsoyale je Pablo. w21.09 12 párr. 14, 15

Jmé xi bakóyaná je choa̱le Apolos kao pastro Pablo. Nga jao nʼio nda koanjinle jmeni xi tso je Énle Niná, nʼio tsaʼyale nga ndasʼin tsakakóyason. Nʼio nkjín chjota tsakinyakao nga chjotatjenngile Cristo koan, tonga tsínkʼia koanxinkonke xínkjín (Hech. 18:24). Kʼianga jeki nichxin, nga xin ʼnde ki je Apolos, je Pablo kʼoakitsole nga katafi ijngokʼa ya Corinto (1 Cor. 16:12). Je Apolos nʼio ndasʼin kisixá jokji tjen kʼoakoanle nga kitsoyason Énle Niná kʼoa nga kisinʼiojin je ndsʼe̱. Je Apolos kʼoati nʼio nangitokon koan, tobʼelañá, kʼianga “ngisa nda kitsoyatsenle je ndiaale Niná” je Áquila kao Priscila alikui koanjtile (Hech. 18:24-28). Je pastro Pablo nʼio kuenta kisʼin je xá xi kisʼin je Apolos. Tonga tsín koanxinkonke. Jmeni xi kiskile je jtín xi kisʼejna ya Corinto yaa bakóná nga nangitokon koan je Pablo, tsín ngʼa tsakʼasje yaole kʼoa kiskosonnile jme xi kisʼin (1 Cor. 3:4-6). w21.07 18 párr. 15-17

Kʼianga toxá tsín kisitjosonnile Niná je Adán kao Eva, kuinga tsín tikitsjoaʼndenile Niná nga ya tsakatiojinle je familiale. Kʼoa jókoa̱nni je xtile. Nga nʼio tsjoakená je Jeobá, tsakásjaile jokisʼin ánni nga koa̱n xtile kuitsonile je xi sitjosonle. Jé Jesús kisikasén nga tsakʼéchjíntjainá (Juan 3:16). Kʼoa nga kʼoasʼin kʼienntjainá je Jesús, je Niná 144,000 mani chjota kiskoéjin xi kixi tjíofitʼale nga jo xtile sʼin skoe̱kon (Rom. 8:15-17; Apoc. 14:1). Xi ijngosani, kʼoati millón mani chjota xi kʼoatjíosʼín josʼin mele Niná. Kui kjoachoya tjínle nga ya koatiojinle je familiale Niná kʼianga jekjoaʼato xi jngo jmi nó (Sal. 25:14; Rom. 8:20, 21). Ndʼaibi nga kui kjoachoya tjínle jo Nʼaile sʼin bekon je Jeobá (Mat. 6:9). Kʼianga jekjoaʼáyanile kʼien kʼoati kui kjoanda sʼe̱le nga skoe̱ xi tʼatsʼe Jeobá. Je xi sitjosonle Niná kʼoati familiale Niná koa̱n nga jekoai nichxin. w21.08 5 párr. 10, 11

Je Pablo kui xá kisʼenele nga kuitsoyason kʼoa nʼio chjí tsabekon xá jebi. Xki̱ ndʼia xki̱ ndʼia kitsoyason kao jñani nʼio tjín chjota (Hech. 20:20). Kitsoya jokji tjen kʼoakoanle. Ñandia nga ya tíkoyale miyole ya Atenas, jngojtín chjota kitsoyale xi ya tsʼe kʼoa nda kichomani nga kʼoakisʼin (Hech. 17:16, 17, 34). Kʼoa kʼianga kinikʼéjnanʼio kitsoyale je chjota jokji tjen kʼoakoanle (Hech. 28:16-24; Filip. 1:13, 14). Je Pablo nda kisichjén nichxinle. Kʼoakitsole xi kjaʼaí nga ñatjen kuitsoyason. Tobʼelañá, kʼianga kjin kikakóyason, nga títjon jé Juan Marcos kikao kʼoa xi koanjaokʼani jé Timoteo kikao (Hech. 12:25; 16:1-4). Tsakakóyale chjota jebi nga koanle tsakatío jtín, nga koanle tsakándiaa kʼoa nga nda kitsoya (1 Cor. 4:17). w22.03 27 párr. 5, 6

Tjínkʼa je chjota xi tsín makjainle nga tíjna je Niná, nga̱ kʼoatso nga tokʼia koa̱nkjainle tsa ñaki xko̱n skoe̱ni. Ningalani kʼoatso je chjota, tojo makjainnile tʼatsʼe jmeni xi tsín be. Tobʼelañá, makjainle nga tjín je ntjao̱, ningalani tsín matsen. Je Biblia kʼoatso nga tjín je choa̱ xi bakóná “nga kjoakixi nga tjío” jmeni xi makjainná ninga tsín matsen (Heb. 11:1). Tonga machjén nga chʼa̱sjee nganʼio kʼoa si̱kʼayaa nichxin nga chótʼayajiaan choa̱ jebi. Nʼio nkjín chjota xi tsín mele nga kui batiotsʼinya, kuinga kʼoasʼin síkjaʼaitsjenni nga tsín je Niná. Kʼianga jekotʼayason je choa̱ xi tjín, tjínkʼa chjotachjine xi kʼoatso nga tíjna jngo Niná xi kisinda ngayeje jmeni xi tjín. Tjínkʼa xi tsín makjainle nga tíjna je Niná xi kisindaná nga̱ tsínkui kisakoyale ya skuelangʼa. Tonga nʼio nkjín xi tjíobe tʼatsʼe Jeobá kʼoa tsjoake kjima. Tonga ngatsʼiaa machjénná nga nʼio katasʼejna kjoamakjainná xi tʼatsʼe Niná, ni tse kʼoa ni choa kjoachjine tjínná. w21.08 14 párr. 1; 16, 17 párr. 6, 7

Je Jesús kui tsakʼéyanajmí tʼatsʼe je ti xi ki nga kitsoya josʼin bakó kjoamatokon je Jeobá. Je ti xi kinchja̱ni Jesús xin ki kʼoa kisikjeya “xi kitsʼaikjoatjaole” nga tsín nda kikao yaole (Luc. 15:13). Kʼianga jeki nichxin kʼoakoannile jmeni xi kisʼin kʼoa kini ndʼiale. Jókisʼin je nʼaile ti jebi. Je Jesús i kitso: “Kʼia nga kjinsa tíjna, nʼaile tsabe koanmake, kitokanʼio, kitsoakjá, nʼio tsakʼéndsoʼa”. ʼNdele nga totaon skoe̱, je nʼaile ti jebi tsakakóle kjoamatokon, kisichatʼale kʼoa kiskoétjao ijngokʼa. Ningalani tse jée tsakajngi ti jebi, je nʼaile kisichatʼale nga̱ kʼoakoannile jme xi kisʼin. Je choa̱ xi kitsoya Jesús, je xi nʼai ma jé Jeobá tsoyanile. Nga kʼoakitso je Jesús, kui kitsoya nga je Nʼaile síchatʼale chjota xi ai jée bajngi kʼianga kʼoama kjoaixinile jme xi kasʼín (Luc. 15:17-24). w21.10 8 párr. 4; 9 párr. 6

Nichxin xi tiyoaa ndʼaibi nʼio nkjín chjota xi nyatítjonle religión xi básjaile josʼín nga tsín bʼéjnatsen je jaʼaínle Niná. Tjíofaʼáxin je jaʼaínle Niná ya Biblia, kʼoa tjínkʼa xi tsín síchjén ya yo̱ngo̱le. Tojé testigole Jeobá xi bexkón kʼoa bʼéjnatsen je jaʼaínle Niná. Nijngojinla religión xi kʼoasʼín jonʼia nga ʼmiyalee chjota je jaʼaínle Niná. Bʼenelee yaoná nga kʼoasʼin mangínkoaa yaoná nga bakoá nga testigole Jeobá ma kjoaixiaa (Is. 43:10-12). Jetsʼato 240 millón Biblia xi tsʼe Traducción del Nuevo Mundo kitjo. Biblia jebi faʼaitʼa je jaʼaínle Niná jñani tsakjaʼáxinle je Biblia xi kjaʼaí. Kʼoa tsʼato 1,000 én tíbitjo je xo̱n kao video xi Énle Niná yʼangini xi faʼaitʼa je jaʼaínle Jeobá. w21.10 20 párr. 9, 10

ʼYaxkónñá je Jeobá kʼianga binyakoaa je ndsʼee xi nganʼio machjénle. Je Jeobá kʼoakitsole je chjota israelita nga sichikontʼain kʼiatsa kuinyakao je xi ma̱ tjío (Deut. 15:10). Kʼianga binyakoaa je ndsʼee xi nganʼio machjénle joxi jéni Jeobá xi tjín xi tibʼaikjoatjaolee (Prov. 19:17). Tobʼelañá, je chjotale Cristo xi Filipos tsʼe tsojmi kisikasénle Pablo nga tsakʼejnanʼio, kʼoa je Pablo kʼoakitso nga nʼio nda kisasenle Niná jmeni xi kisʼin chjota jebi (Filip. 4:18). Kuenta sʼiaan je ndsʼee xi tjío ya jinjtín kʼoa si̱kjaʼaitsjenjiaan a tjío ʼyani xi koa̱n kuisenkoaa. Je Jeobá nʼio tsjoa sʼe kon kʼianga binyakoaa je xi nganʼio machjénle, nga nikʼayalee nichxinná, nganʼioná kʼoa nga bʼailee jmeni xi tjínná. Nga kʼoanʼia kʼoasʼin ʼyaxkónñá je Jeobá (Sant. 1:27). Kʼianga kʼoasʼin jchaxkoán Niná josʼin mele machjén nga si̱kʼayaa nichxinná kao nganʼioná, kʼoa alikui ñʼai tíjna nga kʼoanʼia (1 Juan 5:3). Kuinga kʼoanʼiañá nga tsjoachaa je Jeobá kao ndsʼee. w22.03 24 párr. 14, 15

Tsa tjínná kjoamatokon kʼoa tsa mandosinná je ndsʼee, kuentajin sʼiaan je kjoa xi tjíofaʼatojin. Tobʼelañá, tsa jngo tichjaa xi nʼio táo chʼin tjínle. Ningalani tsín jokuitsoná nga táo chʼin tjínle, ndajin sʼe̱ kon kʼiatsa kuisenkoaa. Ndajin sʼe̱ kon kʼiatsa kʼoéndakoaa jme xi bichiñá kʼoa tsa sitsjekoaa je ndʼiale. Kʼoa tsa jngoje̱ ndsʼee xi tsín titísokóxánile koa̱njin kuisenkoaa kao tao̱n josaʼnda nga so̱koxále, ninga tsínkjoan kʼoakʼuínlee nga ñá tibʼailee. Kʼiatsa tjínná kjoamatokon alikuijin je ndsʼee kʼoakuitsoná tsa nganʼio machjénle, kʼoajin sʼiaan josʼín je Jeobá, kuisenkaojián tongini nga kjesa jotsojinná. Je Jeobá nyaon nyaon síʼisenná ninga tsín ñá xoʼmilee nga kʼoakatasʼín, kʼoa nga maʼisen basenkao ngatsʼi chjota, ninga je xi tsín tsjoá kjoanda. Nga tsjoáná Jeobá ngayeje xi machjénná, kʼoasʼin bakóniná nga tsjoakená. Nʼio tsjoachaa je Jeobá nga̱ nʼio nda chjota. w21.09 22, 23 párr. 12, 13

Nga tjínle je xi ñaki kjoatsjoacha je Niná síchatʼaná. Kʼianga be Jeobá nga kʼoakjimanile je jéele jngo chjota síchatʼale, nga̱ bakóle xi ñaki kjoatsjoacha. Je David i kitso xi tʼatsʼe Jeobá kʼianga kiski jngo salmo: “Alikui kʼoatísíkaoná josʼin bakinná tʼatsʼe jée xi tibijnyaa” (Sal. 103:8-11). Je David nda be josatío kon je chjota xi kʼoamanile nga bajngijée, tonga kʼoati tsabe nga tíjnanda Jeobá nga síchatʼaná. Kʼianga tsakʼétsʼoa je David kʼoakitso ánni nga síchatʼaniná je Jeobá tojo tso texto xi kamaxkia ndʼaibi. Nga bakó xi ñaki kjoatsjoacha je Jeobá síchatʼale ngatsʼi xi síjéle kjoanichatʼa. Nga jée kajiaan, basenkaoná nga ba sʼe tokoán nga̱ yaa kjuinroani nga kʼoakoa̱nniná jmeni xi kanʼia kʼoa nga si̱ndayaa yaoná. w21.11 5 párr. 11, 12

Je Jeobá tsjoake je jaʼaínle kʼoa kui xi mele nga kataʼyaxkón (Is. 42:8). Tonga jela 6,000 nó tjínle nga tsín ndasʼin tíbʼaxki̱ je jaʼaínle Niná (Sal. 74:10, 18, 23). Yaa kinroatsʼiani kʼianga kʼoakitso je Na̱i (“xi énndiso báne” sʼin tsoyanile) nga tsín mele Niná nga tsjoa sa̱tío kon je Adán kao Eva (Gén. 3:1-5). Saʼnda nga kʼia, kui énndiso tísʼene je Jeobá nga kʼoatíʼmile nga tsín títsjoále chjota jmekjoanni xi machjénle. Je Jesús kui koankjáojinle nga chʼaosʼin tsʼaxki̱ je jaʼaínle Nʼaile. Tojé Jeobá xi tiʼndele koatexoma ya ngʼajmi kao i̱ Sonʼnde, kʼoa tojé xi nʼio ndasʼin batéxoma (Apoc. 4:11). Tonga je Na̱i kui xi mele nga kʼoasʼin katamakjainle je ánkje kao chjota nga tsín tiʼndele Niná nga je koatexomaná. Jeme kʼoendajin kjoa jebi je Jeobá, kʼoa jchale nga toje xi nʼio ndasʼin batéxoma, kʼoa tojé Chjotaxále xi koa̱nle sindachon sonʼnde nga ndasʼin kuiyoaa kʼoa nga tsjoa sa̱tío tokoán. w21.07 9 párr. 5, 6

Toxá je xi jko̱ tíjnale yaniʼya bajngiʼani je familiale, jolani nga tsjoále je chjoónle kao ʼndíxtile jme xi koakje̱nni, najño kao ʼnde jñani koatio. Alikuijin choa ñʼai kjimali kʼiatsa ñʼai chonli tao̱n. Ningalani kui kjoa tibitjatojin, koaan kʼoasʼin ni̱chjain nichxinli nga kui kʼoasʼiain jmeni xi nʼio sikʼéjna kjoamakjainli. Tʼetsʼoalai Jeobá, tʼexkiai kʼoa tikjaʼaitsjenjin jmeni xi kitso Jesús, tojosʼin faʼaitʼa ya Mateo 6:25-34. Tikjaʼaitsjenjin je choa̱le ndsʼee xi tjío ndʼaibi josʼin tjíobinyakao Jeobá nga kui xále Niná ngisa tjíotsjoále kjoandosin (1 Cor. 15:58). Tsa si̱kjaʼaitsjenjin jebi, ngisaa koa̱nnʼiotʼai Jeobá nga je koasenkaoli, tojosʼin tíbasenkao choʼndale xi ngikʼa. Je Jeobá be jmeni xi machjénli kʼoa koasenkaoli. Kʼianga jchai josʼin koasenkaoli ngisaa nʼio sʼe̱jna kjoamakjainli kʼoa chókjoajinli ninga ngisa tse kjoa kuitjátojin nichxin xi sʼa nroa. w21.11 20 párr. 3; 21 párr. 6

Ñá xi chjotale Cristo maa, nʼio binyakaoná kʼianga majinná nga tsakʼéchjíntjainá je Jesús. Tjínkʼa je ndsʼee xi tosi tonda tjíotsoyason ninga chjota fitjenngike kʼoa tjíochókjoajinle ninga tse kjoa tjíofaʼatojin. Kataʼyala je choa̱le pastro Juan. Tsʼato 60 nó kitsoyason jokjoantjínni tʼatsʼe Cristo kao tʼatsʼe nga tsakʼéchjíntjainá. Jeme 100 nóle kʼianga ya ʼnde xi tíjnajin ndáchikon xi Patmos ʼmi kichosíkʼéjnanʼio je chjotaxá romano. Kuinga kʼoakoantʼainni nga tʼatsʼe Niná kao tʼatsʼe Cristo kitsoyason (Apoc. 1:9). Nʼio nda choa̱ tsakʼéjnaná je pastro Juan nga kichokjoajinle kʼoa nga nʼio kisʼele kjoamakjain. Je libro xi kiski Juan yaa tsoya nga nʼio tsjoake je Jesús kʼoa nga nʼio chjí bekon nga tsakʼéchjíntjainá. Tsʼato 100 kʼa síkʼaxki̱ josʼin basenkaoná nga tsakʼéchjíntjainá je Jesús (1 Juan 2:2). Je Juan nʼio chjí tsabekon nga tsakʼéchjíntjainá je Jesús. w21.04 17 párr. 9, 10

Je Jeobá kʼoakitsole je choʼndale nga katabakóle kjoanda je xi yo̱ma̱ kjoan. Tobʼelañá, kʼoakitsole je chjota israelita nga tsín katanchja̱ʼaonle jngo xi jtaya. Nʼiojin chʼao kisʼin jngo chjota kʼiatsa je kinchja̱ʼaonle jngo xi tsín nrʼoé, nga̱ tsín koan josʼin kisitoánntjai yaole. Ya Levítico 19:14 kʼoatso nga i̱ kitsole Niná je naxinandále: “Alijmejin xi bʼejnachjoalai je xi xka̱”. Jngo xo̱n xi i̱ tso tʼatsʼe chjota xi yo̱ma̱ kjoan: “Nichxin kjoatse ya Oriente Medio totaon tsaʼya je chjota xi yo̱ma̱ kjoan”. Tsakui nichxin tjín xi tsakʼéjnachjoale jngo chjota xi tsín matsenle tojoni nga skuiʼaon kʼoa tsakuije̱ nga to kuijnoke. Nʼio chʼao kisʼin je chjota xi kʼoakisʼin. Tojo tso Levítico 19:14, je Jeobá kʼoakitsole naxinandále nga katabakóle kjoamatokon je xi yo̱ma̱ kjoan. w21.12 8, 9 párr. 3, 4

Je Jacob nʼio kisikjáojin kʼoa nʼio kitsokjon nga kui kisikjaʼaitsjen nga tjínngijti kon je ndsʼe̱. Je xi kisʼin kuinga tsakʼétsʼoale je Jeobá. Xijekoan, kisikasénle kjoatjao je Esaú (Gén. 32:9-15). Kʼoa kʼianga kiskajin xínkjín, je Jacob tsakakóle kjoaxkóntokon je Esaú. Ñato kʼa tsakasenxkónyʼin je Jacob. Je Jacob nangitokon koan kʼoa tsakakó kjoaxkóntokon nga tsakjáondani kao je ndsʼe̱ (Gén. 33:3, 4). Nʼio nda choa̱ bʼéjnaná je Jacob jokisʼin tongini nga kjesa kajinjin ndsʼe̱ kʼoa jokisikao nga jekiskajin. Xi títjon kisʼin kuinga nangitokon koan kʼoa jé Jeobá kisijéle nganʼio nga katabasenkao. Xijekoanni, nga kikonle Esaú kʼoakisʼin jme xi kitso nga tsakʼétsʼoa. Kʼoa kʼianga jekisatejin xínkjín alikui kui kʼoakitso ʼyáni xi kisʼele jée. Je xi koanmele kuinga kjaondani kao je ndsʼe̱. Koaan chjénngiaa choa̱le (Mat. 5:23, 24). w21.12 25 párr. 11, 12

Sakʼoajin kʼoasatío tokoán nga tsín jme chjíná kʼoa nga tsín bakinná nga sa̱kóná kjoatsjoacha (1 Juan 3:19). Tsakui nichxin kʼoasʼin si̱kjaʼaitsjeen nga tsín sichatʼaná je Niná ningalani kʼienntjainá je Jesús. Kʼiatsa kʼoasatío tokoán, si̱kjaʼaitsjenjiaan nga “ngisa ngʼa tíjna Niná kaoni tsa ni̱ma̱ná”. Je Niná tsjoakená kʼoa síchatʼaná ningalani kʼoasatío tokoán nga tsín síchatʼaná kʼoa nga tsín tsjoakená. Kuinga machjénni nga kʼoéjngoaa tokoán. Nyaon nyaon kʼoéxkiaa je Énle Niná, kjitʼa kʼoétsʼoaa, kʼoa si̱kʼayalee nichxin je ndsʼee. Tsa kʼoasʼiaan, jchañá jokjoan je Jeobá kʼoa kʼoati jchaa nga nʼio tsjoakená. Tsa si̱kjaʼaitsjenjiaan jmeni xi tso je Biblia koasenkaoná nga nda si̱kjaʼaitsjeen kʼoa nga sʼe̱jngo tokoán (2 Tim. 3:16). w21.04 23, 24 párr. 12, 13

Kʼianga nʼio sʼe̱jna je kjoamakjainná ali tsa tokuijin xi machjén nga sʼe̱jintokoán jme xi bʼexkiaa. Machjén nga si̱kjaʼaitsjenjiaan jmeni xi tichotʼayá. Si̱kjaʼaitsjenla jokisʼe kon je xi kiski Salmo 77. Kui xi ba tsakʼé kon nga kʼoasʼin kisikjaʼaitsjen nga tsín tinda tjíoni ngixko̱n Jeobá je kʼoa kao chjota israelita. Nga nʼio kisikjáojin saʼnda tsín tikisʼefeni (versículo 2-8). Jmé xi kisʼin. I kitsole je Jeobá: “Sikjaʼaitsjenjinña ngayeje xáli, kʼoa sikjaʼaitsjenjinña jonʼiai” (versículo 12). Ningalani be josʼin tsakasenkao Jeobá je naxinandále nichxin kjoatse, i kitso: “A jekisichajin Niná nga koakoná kjoandale, axo kuinga jtile nga tsín titíbakóni kjoamatokon” (versículo 9). Je xi kiski salmo jebi kui kisikjaʼaitsjenjin josʼin tsakasenkao Jeobá naxinandále nichxin kjoatse nga tsakakóle kjoamatokon (versículo 11). Nga kʼoakisʼin, ñaki kisʼejngo kon nga tsín tsjiónkon Jeobá je naxinandále (versículo 15). w22.01 30 párr. 17, 18

Jósʼe kon Jeobá nga síkjaʼaitsjen tʼatsʼe choʼndale xi jekʼien xi kixi kitʼale. Je Jeobá mele sikjaʼáyanile (Job 14:15). Si̱kjaʼaitsjenla je Abrahán, je Jeobá jejin mele skoe̱ ijngokʼani je miyole (Sant. 2:23). Kʼoa jejin mele kjoakaonajmí ijngokʼa je Moisés, xi ñaki nga̱ʼa nga̱ʼa tsakjákao (Éx. 33:11). Kʼoajinti mele nga kjuinrʼoé ijngokʼale je David kao salmista xi ngikʼa nga séle (Sal. 104:33). Ngatsʼi chjota jebi miyole Niná koan, kʼoa ningalani jekʼien, je Jeobá alikui tíchajinle xi tʼatsʼe (Is. 49:15). Je Jeobá sikjaʼáyanile kʼoa nʼio tsjoa sʼe̱ kon nga kjuinrʼoéle kʼianga kʼoetsʼoale. Tsa jekinichaa xíngiaa, sínʼio tokoán je én jebi. Kʼianga tsakajngijée je Adán kao Eva ya ʼndenaxóle Edén, je Jeobá koanjinle nga sa chʼao sa chʼao koa̱nchon saʼnda nga sʼe̱ndajin kjoa jebi. Je Jeobá nʼio jtike nga kjoatsʼen tjín kʼoa nga tsín kixi jme xi matʼain kʼa je choʼndale nichxin xi tiyoaa ndʼaibi. w21.07 10 párr. 11; 12 párr. 12

Kʼianga tsjoachaa je ndsʼee kʼoatisʼin bakoñá nga chjí ʼyatokoán nga tsakʼéchjíntjainá je Jesús, nga̱ tsín tsa toñájin kʼienntjainá, kʼoati kʼienntjai ngatsʼi je ndsʼee. Kuinga kʼientjaininá je Jesús nga̱ nʼio tsjoakená nga jngó jngoá (1 Juan 3:16-18). Josʼin ʼyatokoán je ndsʼee kʼoasʼin bakoñá nga tsjoachaa (Efes. 4:29, 31–5:2). Binyakaoñá kʼianga chʼin tsaotʼale kʼoa nga tse kjoa faʼatojin, jolani jñani kjoaxkón sʼe. Tonga jósʼiaan tsakui kʼoasʼin kʼoa tsakui kʼoakuitsoná jngo ndsʼee xi tsín nda kʼoe tokoán. A bʼengijtiñá tokoán kʼiatsa ʼya xi jotsoná kʼoa tsa josíkaoná (Lev. 19:18). Tsa kʼoanʼia, koasenkaoná je kjoafaʼaitsjen xi tsjoá Biblia, nga tso: “Tosa nda tikao xíngio. Katasʼeno kjoamatakon. Tichatʼalao xíngio, josʼin nga Niná kisichatʼano nga tiyokao Cristo” (Efes. 4:32). Kʼianga nichatʼalee je ndsʼee, kʼoasʼin bakonilee Jeobá nga chjí ʼyatokon kjoaixiaa nga tsakʼéchjíntjainá je Jesús. w21.04 17, 18 párr. 12, 13

Je Jeobá basenkaoná nga nʼio ndasʼin nixálee kʼoa nga binyakoaa je chjota nga fisʼenngindá. Je xi bakóyaná choa̱le Apolos kao Pablo kuinga ngisa nda kʼoainganʼioá nga jtín sʼin kuiyoaa kʼoa nga ndasʼin kjuinkoaa xíngiaa kʼianga ngisa tse xá sʼenená ya jinjtín. Xi ijngosani, nda biyoaa kʼianga fitjenngi jmeni xi tso Énle Niná je xi chjotajchínga sʼin tjío kao xi siervo ministerial ma, nga tsín to yaole fini kʼoa nga je Jesús kjenngile. Nʼio tsjoa satío tokoán nga kʼoasʼin binyakaoná je ndsʼee (1 Cor. 4:6, 7). Je Niná kui kjoanda tsjoáná ngatsʼiaa nga koa̱nná kuinyakoaa xíngiaa. Tsakui nichxin kʼoasʼin nikjaʼaitsjeen nga tsín nʼio tse jmeni xi maná nʼia. Tonga jmeni xi nʼia nga jtín sʼin biyoaa yaa mangóson je nachjón xi tjonyajinle xínkjín nga manda jngo najño. Kuinga machjénni nga si̱ndayaa yaoná kʼiatsa kʼoasʼin nikjaʼaitsjeen nga ngisa ngʼa tiyoaa tikʼoajinni xi ngikʼa. Tsa kʼoasʼiaan ndajin sʼin kuiyoaa kʼoa jtínjin sʼin kuiyoaa (Efes. 4:3). w21.07 19 párr. 18, 19

Kʼoati koa̱n kʼoéjngui tokuin nga jcha ijngokʼai je xíngi xi jekʼien. Nga kʼoasʼin kiskiʼndá Jesús nga kisinʼio kon miyole, kui xi bakóyaná nga sikjaʼáyanile xi jekʼien (Juan 11:35). Koaan si̱nʼiui kon je xi kjoaba tjíojin. Je Jesús alikui tsa tokiskiʼndákao je Marta kao María, kʼoati kinrʼoéle kʼoa kisinʼio kon (Juan 11:25-27). Kʼoati koa̱n kʼoasi̱koaa je xi xínkjín kisicha. Jngo xi chjotajchínga sʼin tíjna xi ya Australia tsʼe, xi Dan ʼmi, itso: “Nʼio ba kisʼe tokoan kʼianga kʼien je chjoónna. Nkjín ndsʼee xi jechixan xi kʼoakitsona nga kjuinrʼoéna tokʼiani. Tokinrʼoéna nga kiskiʼndá kʼoa tsín jokitsona. Kʼoati tsakinyakaona kʼianga tsín sin kisʼe tokoan, jolani nga tsakanéjon je carrona, nga kikatsena tsojmi kʼoa nga tsakʼénda xi tsakje̱nña. Kʼoa me tokjitʼa tsakʼétsʼoantjaina. Ñaki tsakakó nga miyona mani kʼoa nga ndsʼe chobaijin nga kjoa jaʼatojian” (Prov. 17:17). w22.01 16 párr. 8, 9

Je Jeobá kui xi mele nga ndasʼin kuiyoaa (Prov. 4:20-22). Kʼianga tsjoáná kjoafaʼaitsjen je Jeobá kui síchjén je Biblia, xo̱n xi bʼasje naxinandále kʼoa tsa jngo ndsʼee tsjoáná kjoafaʼaitsjen, kʼoasʼin bakóniná nga tsjoakená je Jeobá (Heb. 12:9, 10). Kui kjuinñá je kjoafaʼaitsjen xi kʼoainá, ali tsakuijin josʼin chja̱kaonajmíná. Tsakui nichxin sakʼoa kʼoasʼin si̱kjaʼaitsjeen nga tsín kixi tíjna josʼin kichjakaoná. Kʼoa je xi kjoafaʼaitsjen tsjoá machjén nga ngasin nganda kjoakaonajmí je xi kjoafaʼaitsjen tsjoále ánni nga sitjosonsíni (Gál. 6:1). Tonga tsa ñá xi kjoafaʼaitsjen tsakʼainá machjén nga kui kuenta sʼiaan jotsakʼinná ninga kʼoasʼin nikjaʼaitsjeen nga tsín kixi tíjna josʼin kichjakaoná. Koaan i̱ kuixoán: “Ninga tsín kisasenna josʼin tsakjákaonajmína je xi kjoafaʼaitsjen kitsjoana, a tsí kʼoatjín jokitsona. A koaan sichajian josʼin tsakjákaonajmína kʼoa tosa kui kuenta sʼian je kjoafaʼaitsjen xi kitsjoana”. Ndatjín nga si̱tjosoán je kjoafaʼaitsjen xi kʼoainá. w22.02 12 párr. 13, 14

Je Jeobá be nga tsín choa ñʼai tíjna nga tsín tikui nikjaʼaitsjenñá kʼoa tsín tikui kʼoanʼiañá xi chʼaotjín (Sal. 103:13, 14). Ninga kʼoalani, je Jeobá tsjoáná kjoachjine kao nganʼio xi machjénná nga si̱kʼantjaiyaa yaoná. Kʼoa kui Biblia síchjén, nganʼiotsjele kao naxinandále nga basenkaoná. Kui Biblia koasenkaoli nga jchai jñasani si̱kʼantjaiyai yaoli. Je Énle Niná yaa mangóson joni jngo cho̱tsín xi chotsensʼén, kʼoa kui xi koasenkaoli nga jchai tsa ndatjín josʼin nikjaʼaitsjain, jotso én xi nokjoai kʼoa jonʼiai (Sant. 1:22-25). Je Jeobá tíjnandaa ngantsjai nga koasenkaoli, tojé Jeobá xi koa̱nle koasenkaoli nga̱ be jotjín ni̱ma̱li (Prov. 14:10; 15:11). Kuinga machjénni nga ntsjaintsjai kʼoétsʼoalai kʼoa nga nyaon nyaon chótʼayai Biblia. Kʼoatʼai tokuin nga kui kjoatéxomale Jeobá koasenkaoli. Jmeni xi tsoná je Jeobá kjoanda tsaanñá. ʼYani xi sítjoson je kjoatéxomale Jeobá nda sʼe kon, kʼoa be nga tsín tokjoatjaojin nga tíjna (Sal. 19:8-11). w22.03 4 párr. 8-10

ʼYaxkónñá je Jeobá kʼianga bʼainganʼioá nga matsje kʼoa nga sʼenda ndʼia jña ʼyaxkón. Je Biblia kʼoatso nga tsje je xá xi koan nga kisʼenda je ndʼianajño kao tsojmi xi ya koanchjén (Éx. 36:1, 4). Nichxin xi tiyoaa ndʼaibi, je Jeobá kʼoati tsje sʼin bekon je xá xi ma nga sʼenda Ndʼia jña chotʼayá kao ndʼia xi kʼoatisʼin machjén nga ʼyaxkón. Tjínkʼa ndsʼee xi tse nichxin síkʼaya kʼianga tsjoánganʼio, kʼoa bʼailee kjoanda nga kʼoasʼin síxá. Kʼoati síkʼaya nichxin nga tsoyason, kʼoa tjínkʼa ndsʼee jebi xi mele nga precursor sʼin sixá. Kʼoa je xi chjotajchínga sʼin tjío kʼoati tsjoánganʼio kʼianga kʼoatso nga koa̱n precursor sʼin sixá ndsʼee xi ya tsjoánganʼio nga sʼenda ndʼia jña ʼyaxkón Niná. Ni maná kʼoa ni tsín maná bʼendaa ndʼia, kʼoati koa̱n kʼoainganʼioá nga matsje kʼoa nga masinle. w22.03 22 párr. 11, 12