Noviembre

Nkjín koya josʼin tíbasenkaoli je Jeobá. Tobʼelañá, jé Jeobá basenkaoli kʼianga tsín yaoli nijtilai kʼianga je satéjin chjota xi tomajtile nga Énle Niná chjakaonajmíni. Kʼoa kʼianga satéjin jngo chjota xi mandosinle je Énle Niná, jé Jeobá basenkaoli nga kuikjoan texto faʼaitsjenli je xi koasenkao chjota jebi. Kʼoati tíbasenkaoli nga tosi tonda tiʼmiyasuin ninga tsín nrʼoé chjota je Énle Niná (Jer. 20:7-9). Kʼoati ʼyaa nga nda chjota je Jeobá kʼianga tsoyaná josʼin kʼuínyasoán. Kʼianga satíoná kjoajtín nga jinle xomana, yaa sakóyaná jósʼin koa̱n chja̱kaonajmíñá Énle Niná je chjota. Tsakui nichxin tsín tso tokoán nga kui mangíntjenngiaa je kjoafaʼaitsjen xi bʼainá nga satíoná kjoajtín, tonga nga mangíntjenngiaa kjoafaʼaitsjen jebi nda bichómani. Kʼoa kʼianga satíoná kjoajtín kao kjoajtíntse, kʼoaʼminá nga koa̱n nkjínsa koya josʼin kʼuínyasoán. Tsakui nichxin ñʼai koa̱nná nga̱ kjesa kʼoasʼin ʼmiyasonjián. Tonga tsa kʼoasʼiaan, je Jeobá sichikontʼainná. w21.08 27 párr. 5, 6

Kʼianga kiskile je chjotale Cristo xi Corinto tsʼe, je pastro Pablo kʼoakitsokixile jmeni xi tjínnele sʼin, tonga nga jekoanskanni jé Tito kisikasén, nga̱ koanmele tsabe tsa kisasenle je carta xi kisikasénle. Nʼio tsjoa koanle nga kisʼejinle nga kisitjoson je kjoafaʼaitsjen xi kitsjoale (2 Cor. 7:6, 7). Je xi chjotajchínga sʼin tjío koaan koaitjenngi je choa̱le Pablo nga sikʼayale nichxin je ndsʼee. Je xi koa̱n sʼin kuinga xátí kuicho nga satío kjoajtín ánni nga koa̱n kjoakaonajmíni je ndsʼee. Bʼainganʼiolee je ndsʼee ninga tongotjo chjakaonajmiá (Rom. 1:12). Kʼianga kui choa̱le Pablo fitjenngi je xi chjotajchínga sʼin tjío kui Biblia síchjén nga tsjoánganʼiole je ndsʼee kʼoa nga kʼoatsole nga tsjoake je Jeobá kʼoa nga kʼoatsole nga nda tjíosʼín. Yaa bʼangini jmeni xi tso je Énle Niná kʼianga ʼya xi kjoafaʼaitsjen tsjoále. Ningalani ñaki kʼoatsole je ndsʼee jmeni xi tjínnele sʼin, tonga ngasin nganda fákao (Gál. 6:1). w22.03 28, 29 párr. 11, 12

Jé Jeobá tsjoánganʼioná nichxin xi tiyoaa ndʼaibi nga tosi tonda nixálee. Jngo koya xi basenkaoná kuinga bʼetsʼoaa. Ya Efesios 6:18 je Pablo i kitso: “Tʼetsʼoalao Niná ngantsjai”. Tsa kʼoétsʼoalee je Niná koasenkaoná. Kʼianga kjoa tiyojiaan, tsakui nichxin likui ʼyaa jokʼuínlee je Jeobá kʼianga kʼoétsʼoalee. Tonga je kʼoatsoná nga kʼoéyanajmílee jotjín tokoán ninga tsín ʼyaa jokuixoán (Rom. 8:26, 27). Joni je Pablo, kʼoati tjónganʼioná kʼiatsa kʼoéxkiaa je Biblia (Rom. 15:4). Kʼianga kʼoéxkiaa je Biblia kʼoa nga si̱kjaʼaitsjenjiaan jmeni xi tso, jé nganʼiotsjele Jeobá koasenkaoná nga jchaa josʼin kjuintjenngiaa je kjoafaʼaitsjen xi faʼaitʼa ya Biblia (Heb. 4:12). w21.05 22 párr. 8-10

ʼYañá nga nʼio tjínle kjoandosin nga chjotatjenngile Cristo si̱koaa je chjota, tonga ñʼai ma sakʼoaná nga kʼoanʼia. Tobʼelañá, tjínkʼa ndsʼee xi jejchínga kʼoa tsa xi chʼin bʼetʼale. Tonga koaan teléfono kʼoa tsa Internet si̱chjén. Koaan ya tjen ndʼianá kʼuínyanilee Biblia je chjota. Tjínkʼa chjota xi mele skótʼaya, tonga tsín maʼale jme hora nga tsoyason je ndsʼee. Koaan kʼia kʼuínyalee Biblia je chjota jme horani nga skénndiaale, tsa kʼianga tanjio kʼoa tsa kʼianga jemaxon. Je Jesús kʼiaa nga jekoannjio kitsoyale je Nicodemo, nga̱ jé Nicodemo xi kʼoachon kiskenndiaale (Juan 3:1, 2). w21.07 5 párr. 10, 11

Tokʼoakoanle je chjotatjenngile Juan Bautista kʼianga tsabe nga tsín bationchjan je chjotatjenngile Jesús. Je Jesús kʼoakitsole je chjotale nga tsín tjínnele koationchjan kʼianga sʼasa ya tíjnakao (Mat. 9:14-17). Ninga kʼoalani, je chjota fariseo kao xi ngikʼa chjotakontrale Jesús kitjenngike nga tsín kisitjoson je costumbrele, kʼoa kʼoati koanjtile nga xoto kisindaya je chjota xi chʼin tjínle (Mar. 3:1-6; Juan 9:16). Je chjota fariseo kʼoasʼin kisikjaʼaitsjen nga tjíosítjoson je kjoatéxoma xi tsʼe nga xoto, tonga negocio kisʼin kaoni ya yo̱ngo̱. Chjota jebi tokoanjtile kʼianga kʼoakitsole Jesús nga tsín nda tjíomasʼín (Mat. 21:12, 13, 15). Kʼoa kʼianga kitsoya ya yo̱ngo̱ xi tíjna Nazaret, je chjota xi ya tjío koanjtile nga kui kitsoya Jesús jmeni xi koan ya naxinandá Israel, kʼoa jebi kui tsakʼéjnatsen jmeni xi tjíosʼín, kʼoa nga tsínle kjoamakjain (Luc. 4:16, 25-30). Nʼio nkjín xi tsín kisasenle nga tsín kʼoakisʼin je Jesús josʼin koanmele (Mat. 11:16-19). w21.05 5, 6 párr. 13, 14

Je Jeobá kʼoatsoná nga xkón tíjna kʼianga ngʼakon maa kʼoa nga xkaiʼa maa. Jé Na̱i xi títjon xkaiʼa koan. Nʼiojin tse kjoanda kisʼele nga ya sʼa tíjnakao Jeobá nga ánkje ma. Tonga nga xkaiʼa koan kui xi koanmele nga je sʼe̱tsʼoale. Kʼoa kui xi mele nga kʼoati sʼiaan tsanda ñá, kʼoa básjaile josʼín nga tsín tsjoa katasʼe tokoán jmeni xi tjínná. Je xi títjon tsakʼanachale jé Eva. Je Jeobá tojngoo yá xi tsakʼéchjoale je Adán kao Eva nga tsín koa̱n ski̱ne je to xi yale (Gén. 2:16). Tonga je Na̱i tsakʼanachale je Eva nga kʼoakitsole nga koa̱n ski̱ne je tole yá xi kisʼechjoale. Nga kʼoakisʼin je Eva kui tsakakó nga ngisasa tse jmeni xi mele, kʼoa kui xokisikao nga tsakajngijéeni kʼoa nga kʼienni (Gén. 3:6, 19). w21.06 14 párr. 2, 3; 17 párr. 9

Je Niná kui xi koanmele nga xti katasʼele je Adán kao Eva kʼoa nga katasíkuinda je Sonʼnde. Kʼiatsa kisitjosonlani jme xi tsakʼéndajin Jeobá, tjíojin saʼnda ndʼaibi je kʼoa kao xtile kʼoa familialejin Jeobá mani. Je Jeobá chjí tsabekon je Adán kao Eva nga ya tsakatiojinle je familiale. Kʼianga kui nchja̱ni josʼin kisinda Jeobá je chjota, ya Hebreos 2:7 itso: “Ngisa nangi tsakʼejnalai kaoni tsa je ánkje. Kitsʼailai kjoajeya kao kjoangʼa”. Je Niná alikui kʼoasʼin kisinda je chjota joni je ánkje, nga̱ je ánkje ngisaa tse nganʼio tjínle, ngisaa chjine kʼoa ngisaa tse jmeni xi male sʼín (Sal. 103:20). Tonga tokui jebi xi tsín mangóson je chjota kao ánkje. Ninga tsín tiya tsakatiojinnile je familiale Jeobá je Adán kao Eva. Tonga je Jeobá alikui tísíkʼantjaiya jme xi tjínndajinle, kui xi mele nga xtile katama ngantsjai je chjota xi sitjosonle. w21.08 2, 3 párr. 2-4

Nichxin xi tiyoaa ndʼaibi, ñá xi choʼndale Jeobá maa kʼoati fitjenngikená je chjota. Tjínkʼa ʼnde jñani tíchjoale xále Niná. Kʼianga ndoyá nikatíoʼya ndsʼee kʼoa nga ngixko̱n chjotaxá fichókinya kʼoasʼin beni chjota je Énle Niná (Mat. 10:17, 18). Kʼoa tjínkʼa ndsʼee xi kjaʼaísa kjoa faʼatojin. Ningalani tjoʼndele ya naxinandále nga je Jeobá síxále tonga sajé xi xínkjín ma batiochjoangále (Mat. 10:32-36). Kʼianga be je xi xínkjín ma nga toxitsjoa ninga batiochjoa, nga jefi nichxin alikui tikʼoasʼínni kʼoa je xi tsakatiochjoa ngasʼa tjínkʼa xi choʼndale Jeobá ma ndʼaibi. Machjén nga nʼiojin koaan kʼoa alikui koa̱n nga si̱kinroajeen tokoán ninga chjota fitjenngikená. Alikui koa̱n nga kuijkoán nga̱ jé Jeobá tíjnakaoná kʼoa tsjoáná je nganʼiotsjele. w22.03 16 párr. 8

Je Biblia kʼoatso nga jtike Jeobá je “xi ngʼakon xko̱n, xi ndiso ni̱je̱n, xi njínle chjota xi tsín jme jée tjínle bʼéjten ntsja” (Prov. 6:16, 17). Kʼoati tso nga jtike “je chjotatsʼen kao xi bʼanacha” (Sal. 5:6). Je Jeobá nʼio jtike nga kʼoasʼín je chjota, kuinga kisikjesonni je chjotatsʼen kʼianga tsakʼejna Noé nga̱ ñaki to kjoatsʼen kisʼejnakitse i̱ Sonʼnde (Gén. 6:13). Je profeta Malaquías kʼoati kitso nga nʼio jtike Jeobá je xi bʼanachale tsa chjoónle kʼoa tsa xʼinle tojoni nga koa̱n tsjión xínkjín. Ninga kʼoatso nga Niná bexkón je chjota xi kʼoasʼín, je Niná alikui sasénle kʼoa kuenta sijéle (Mal. 2:13-16; Heb. 13:4). Je Jeobá itsoná: “Chʼaocha katamao xi chʼao tjín” (Rom. 12:9). Tsa jmeni xi chʼaochaa ñaki bʼechʼaolee yaoná. Tjínnele kʼoasʼin jchatokoán jmeni xi jtike Jeobá. w22.03 5 párr. 11, 12

Tochoasa chale nga nʼio tse kjoanichikontʼain tsjoáná Jeobá nga jekoatexoma Chjotaxále i̱ Sonʼnde. Je xi kui nʼio koyale nga je Jeobá katabʼéndajin kjoa tsee kjoanichikontʼain sʼe̱le ndʼaibi kao nichxin xi sʼa nroa nga jekjoaʼaí sonʼnde chjotse. Kʼianga jekjoaʼaí sonʼnde chjotse, xi choʼndale Niná maa alikui tikʼia nga kjoa kuitjátojinñá, kʼoa tsín tijme xi si̱kjáojinñá. Alikui tiʼya xi totaon skoe̱ni xínkjín kʼoa alikui tiʼya xi aon sa̱tíoni kon (Apoc. 21:4). Alikui tikui si̱kjáojinñá nga kui kjoásjee xi machjénná, nga̱ toxkia sʼee je tsojmi nga kʼia (Sal. 72:16; Is. 54:13). Nʼiojin ndasʼin kuiyoaa nga kui nichxin. Kʼianga tíbasenkaoná je Jeobá nga tinikatioá jmeni xi tsín sasénle kʼoa nga kui tibakoá xi ndatjín, je Jeobá tongini tísíkatíondaná josʼin kuiyoaa nga jekoatexoma Chjotaxále i̱ Sonʼnde. Alikui si̱kʼajenlee tokoán kʼoa tsín si̱xa̱nlee, nga̱ nʼio tse kjoanichikontʼain sʼe̱ná nichxin xi sʼa nroa. Nʼio ndasʼin kuiyoaa nga kʼia, kuinga machjénsíni nga tsejta katamaa, kʼoa tosi tonda chóyaa saʼnda nga sitjoson je Jeobá jmeni xi tongini tsoná. w21.08 13 párr. 17-19

Kʼianga jekichole carta jebi je chjotale Cristo, tochoatsee jaʼato nga kitjo ya naxinandá, kʼoa kisikatío ndʼiale, negociole kao xínkjín xi tsín choʼndale Niná ma kʼianga tsanga (Mat. 24:16). Nga kui nichxin nʼiojin koanchjénle nga tsakinyakaongañá xínkjín. Tsa sa jetsakinyakaongañá xínkjín tojo kitso Pablo, ngisajin choa ñʼai koanle nga kʼoakisʼin nga kui nichxin. Tsakui nichxin tsínkjoan kʼoakuitsoná je ndsʼee jmeni xi machjénle, tonga koaan chjónangilee. Kʼoakʼuínlee nga tiyondaa kʼianga kuinyakoaa. Ya jinjtínná tjío je ndsʼee kao tichjaa xi tjíonda nga binyakao xi kjaʼaí. Alikui kʼoasʼin síkjaʼaitsjen nga xá tifanelee kʼoa ʼyañá nga tjíonda ngantsjai nga kuinyakaoná kʼianga nganʼio koa̱nchjénná, kʼoa mená kʼoati sʼiaan tsanda ñá. w22.02 23, 24 párr. 13-15

Je nó xi tífaʼato tísʼendajin josʼin koatio je jtín kao circuito. Kʼiatsa ñálani xi kʼoatíʼminá ñʼaijin koa̱nná nga si̱katioá je xíngiaa kao miyoná. Nga tsín je Jeobá xotsole je xi chjotajchínga sʼin tjío jñani koai nga jngó jngó publicador, kuinga ñʼai maniná nga nitjosoán jmeni xi ʼminá. Je Jeobá sasénle josʼin bʼéndajin xi chjotajchínga sʼin tjío kʼoa kʼoati machjén nga si̱tjosoán tsanda ñá. Ánni nga kʼoainganʼioñá josʼin bʼéndajin xi chjotajchínga sʼin tjío ninga sakʼoa tsín sasénná. Nga kʼoanʼia jtín sʼin biyoaa. Ndasʼin biyoaa ngatsʼiaa ya jinjtín kʼianga nangitokon maa kʼoa nga nitjosoán josʼin bʼéndajin je xi chjotajchínga sʼin tjío (Heb. 13:17). Tonga xi ngisa chjíle kuinga kʼoasʼin bakoñá nga nitjosonlee je Jeobá nga̱ jé tsakinyánda xi chjotajchínga sʼin tjío nga sikuindaná (Hech. 20:28). w22.02 4, 5 párr. 9, 10

Tsa jekʼinsʼenngindái, a koaan nga ngisa kʼoénelai yaoli nga ngisa nda kʼuínyai kʼoa nga ngisa nda kuinókjoayai. Tsa kʼoénelai yaoli nga ngisa nda kʼoéxkiai, nga ngisa nda kuinókjoayai kʼoa nga ngisa nda kʼuínyai, nʼio kuinyakao je xi kjuinrʼoé (1 Tim. 4:15). Chótʼayai kʼoa tʼintjenngi kjoafaʼaitsjen xi tsjoá je folleto Tosi tonda nda tʼexkiai kʼoa nda takoyai. Chótʼayajin nga jngó jngó kjoaʼmiya xi faʼaitʼa. Chótʼayai nga toji ya ndʼiali kʼoa kui tichjain kjoafaʼaitsjen xi faʼaitʼa kʼianga kuinókjoayai. Tijélai kjoafaʼaitsjen je xi consejero auxiliar sʼin tíjna kʼoa tsa kjaʼaísa xi chjotajchínga sʼin tjío xi nda “nchja̱ya nga bakóya” (1 Tim. 5:17). Tʼintjenngi je kjoafaʼaitsjen xi tsjoá je folleto kʼoa tisenkoai je ndsʼee xi kjuinrʼoéli nga nʼio sa̱tío kjoamakjainle kʼoa nga sitjoson jmeni xi koa̱njinle. Tsa kʼoasʼiain, tsjoa sʼe̱ tokuin kʼoa kʼoati tsjoa sa̱tío kon je xi kjuinrʼoéli. w21.08 24 párr. 17

Kʼiatsa kʼoasʼin si̱kjaʼaitsjeen nga ngisa ngʼa tjío je xi ngikʼa tikʼoajinni ñá, alikuijin koa̱nxinkonchá ninga nkjín koya jme xi male sʼín, tosajin kjoáyatsjoaa tokoán. Kʼoa ngisaa tsa kʼoasʼin tjíosíchjén nganʼiole nga je Jeobá tjíosíxále. Jmé xi koasenkaoná nga tsín xinkon koaan. Xi koasenkaoná kuinga nangitokon koaan, xi tsonile nga kuenta sʼiaan jokji tjen kʼoamaná. Kʼiatsa nangitokon maa, alikuijin kʼoasʼin si̱kjaʼaitsjeen nga ngisa nʼio nda maná tsa jmeni tikʼoajinni xi ngikʼa. Tosajin kʼoakʼuínlee xi ngikʼa nga katatsoyaná jmeni xi male sʼín ánni nga ngisa nda koa̱nniná. Tobʼelañá, kʼiatsa nʼio nda tsjoá kjoanokjoaya jngo ndsʼee ya jinjtín, koa̱njin chjónangilee josʼin bʼénda. Tsa jngo tichjaa xi nʼio nda male bʼénda je tsojmi xi ma chine koa̱njin chjónangilee jósʼin bʼénda. w21.07 15, 16 párr. 8, 9

Je libro xi tsʼe Números kui bʼéyanajmí nga kʼoakitso Jeobá nga katanikʼien jngo chjota israelita xi chikín tíbʼéxkó nga xoto. Tonga kʼianga jesiento nó jaʼato, kʼoatso ya Segun­do de Samuel nga kisichatʼale Jeobá je rey David ningalani kisichajngi kʼoa kʼien kisikʼien (Núm. 15:32, 35; 2 Sam. 12:9, 13). Tsakui nichxin i̱ kuixoán: “Ánni nga kisichatʼanile Jeobá je rey David nga̱ nʼio tse jée tsakajngi, kʼoa ánni kʼoakitsoni nga katanikʼien je chjota xi to chikín tíbʼéxkó nga xoto”. Je Biblia alikui tongantsjai nga tsoya jmekjoanni xi kisʼin nga jngó jngó chjota. Tobʼelañá, je David kʼoakoannile jme xi kisʼin (Sal. 51:2-4). Tonga jókisʼin je chjota xi jaʼatone kjoatéxoma kʼianga xoto. A kʼoakoannile jme xi kisʼin. A sa jetsín kisitjosonle Jeobá. A sa jetsakichakjáyale kʼoa tsín kisitjoson. Je Biblia alikui tsoya xi tʼatsʼe jebi. Tonga jmeni xi jeʼyaa xi tʼatsʼe Jeobá kui xi bʼéjngo tokoán nga ñaki kixi jmeni xi sʼín ngantsjai (Sal. 145:17). w22.02 2, 3 párr. 3, 4

Jngo chjota xi be nga tsín toje kʼoakoa̱nyejele alikui kjoanʼio bʼénele yaole nga kui kʼoasʼín tsa jmeni xi tsín kʼoakoa̱nle, tsjoa sʼe kon kʼoa nda síxá jokji kʼoamale. Yaa mangóson josʼín jngo chjota xi tjenmijon chon ndiaa jña tífi. Tojo fi, tonga tobijbi fi. Kʼoatisʼinni, je chjota xi be nga tsín toje kʼoakoa̱nyejele, majinle kʼiani nga tsín tikoa̱n kʼoasʼin sixánile Jeobá josʼin tísíxá tsakai, kʼoa tojo sixá jokji kuicho nganʼiole nga koasenkao xi ngikʼa (Filip. 4:5). Je Barzilái kʼiaa nga 80 nóle kʼoatsakʼinle nga ya sixákao je rey David. Koanjinle nga tsín kuitjosonle je xá xi sʼe̱nele kʼoa tsín kiskoé je xá xi tsakʼaitʼale. Koanjinle nga tsín tikʼoakoa̱nnile, kuinga kʼoakitsoni nga tosa je Kimham katabʼaixále, jngo chjota xi sʼa xti (2 Sam. 19:35-37). Joni je Barzilái, je ndsʼee xi jekoanjchínga tsjoa satío kon kʼianga je xi ngisa xti bʼaile je xá xi tjín jinnaxinandále Niná. w21.09 10 párr. 6, 7

A ñʼai maná nga jo Nʼainá sʼin ʼyatokoán je Jeobá kʼoa nga nʼio tsjoakená. Tsakui nichxin kuinga ñʼai maniná nga tsín tsjoake koanná je nʼainá nga sʼa koanjchíngaa. Nʼio basenkaoná kʼianga majinle Jeobá josatío tokoán kʼoa nga mele koasenkaoná. Kuinga i̱ tsoniná je Énle: “Tichriantʼalao Niná, kʼia kʼoati je sichriantʼano nga jon” (Sant. 4:8). Je Jeobá nʼio tsjoakená kʼoa kʼoatso nga ndasʼin sikuindaná nga Nʼainá mani. Je Jesús basenkaoná nga ngisa machriantʼalee je Jeobá. Nʼio nda bexkon je Jeobá kʼoa nʼio nda bakó jokjoan. Kuinga i̱ kitsoni: “Je xi tsabena nga an, tsabe Nʼainá” (Juan 14:9). Tojo sʼín jngo ti xi majchínga, je Jesús tsoyaná josʼin si̱tjosonlee Niná, josʼin jchaxkoán, josʼiaan nga tsjoa sʼe̱ kon kʼoa nga ndasʼin kuiyoaa ngixko̱n. Jmeni xi kisʼin je Jesús nga jaʼai i̱ Sonʼnde, kui tsakakó nga nʼio tsjoakená je Jeobá kʼoa nga nʼio nda chjota. w21.09 21 párr. 4, 5

Je Jeobá kui xá bánele xi chjotajchínga sʼin tjío nga sikuinda je jtín nga tsje kʼoéjna. Tobʼelañá, kʼianga jngo chjotale Cristo xi ai jée bajngi, jé xi chjotajchínga sʼin tjío bʼéndajin kjoa tsa tosi tonda ya naxinandále Niná kʼoéjnajin je xi tsakajngijée. Je xi sʼín xi chjotajchínga sʼin tjío kuinga básjaiya tsa kʼoakjima kjoaixinile je chjota xi jée tsakajngi. Kui jebi xi kuenta sʼín: Ningalani kʼoakuitso chjota jebi nga kʼoakjimanile jéele, tonga a ñaki tíbakó nga kʼoakjima kjoaixinile, a ñaki kʼoatjín kon nga tsín tikui jée koa̱njngíni. Tsakui tsakajngijéeni nga je kisimiyo chjota xi tsín nda sʼín, a tíjnanda nga tsín tije simiyoni. Je xi chjotajchínga sʼin tjío bʼétsʼoale Jeobá, kotʼayajin jmeni xi tso je Biblia kʼoa kuenta sʼín josʼin síkjaʼaitsjen je chjota xi tsakajngijée. Fáoyani tsa koa̱n nga tosi tonda ya kʼoéjnajin jtín je chjota jebi kʼoa tsa mai (1 Cor. 5:11-13). w22.02 5 párr. 11, 12

Ni chriansʼa kʼoa ni jekjoatse tsangínsʼenngindá, machjén nga tosi tonda si̱ndayaa yaoná ánni nga katasasénnile je Jeobá xi tʼatsaan. Nga si̱ndayaa yaoná machjén nga chósonnilee josʼin nikjaʼaitsjeen, nga̱ josʼin nikjaʼaitsjeen yaa nroani jonʼia. Kʼiatsa tokui si̱kjaʼaitsjeen jmeni xi símekon yaoná tokuijin kʼoakuixoán kʼoa tokuijin kʼoasʼiaan xi chʼaotjín (Efes. 4:17-19). Tonga tsakui si̱kjaʼaitsjeen xi ndatjín, kuijin kʼoakuixoán kʼoa kuijin kʼoasʼiaan xi sa̱sénle Jeobá (Gál. 5:16). Ninga alikui kʼoakoa̱nná nga ñaki tsínkui si̱kjaʼaitsjeen xi chʼaotjín, tonga koaan kʼoéchjoalee yaoná nga tsínkui kʼoasʼiaan xi chʼaotjín. Nga kjesa mangínsʼenngindájián, tjínnele nga tsínkui kʼoakuixoán kʼoa tsínkui kʼoasʼiaan jmeni xi jtike Jeobá. Kui jebi xi títjon tjínnele sʼiaan ánni nga tsín tikui kʼoasʼianñá jmeni xi chʼaotjín kinʼia ngasʼa. Kʼianga tsjoa kʼoé kon je Jeobá tjínnele si̱tjosoán je kjoatéxoma xi kʼoatso nga kʼoakoa̱nkjoaan josʼin mele Niná. w22.03 8 párr. 1, 2

Alikui choa ñʼai male je xi chjotajchínga sʼin tjío nga be kʼiatsa kʼoakjima kjoaixinile je chjota xi ai jée tsakajngi. Ánni. Kuinga je xi chjotajchínga sʼin tjío alikui be jotjín ni̱ma̱le je chjota. Kuinga básjaiyani tsa tsín tikui kʼoatísʼínni xi chʼaotjín je ndsʼee xi jée tsakajngi. Kui xi mele skoe̱ tsa tísíkʼantjaiya kjoaixi yaole je chjota xi jée tsakajngi, jotjín kon, josʼin síkjaʼaitsjen kʼoa jmé xi sʼín. Tsakui nichxin tse kuichomani nga sindaya yaole, nga koako nga kʼoakjima kjoaixinile je jée xi tsakajngi. Jósʼin bakó je xi tsakichonsjejin naxinandále Niná nga kʼoama kjoaixinile je jéele. Tjínnele koai ntsjaintsjai kjoajtín kʼoa sitjoson je kjoafaʼaitsjen xi tsjoále je xi chjotajchínga sʼin tjío nga kʼoetsʼoa kʼoa nga skótʼaya je Biblia. Kʼoa kʼoati kʼoenele yaole nga tsín tikui kʼoasʼinni jmeni xi jée ska̱nijin ijngokʼa. Kʼiatsa kʼoenele yaole nga ndasʼin kʼoéjna ijngokʼa ngixko̱n Jeobá, je Jeobá sichatʼale kʼoa je xi chjotajchínga sʼin tjío kuinyakao nga nda kʼoéjna ijngokʼa ya jinjtín. w21.10 6 párr. 16-18

Nga nʼio tsjoake Jesús je Jeobá, ñaki toje tsabexkón ya ngʼajmi kao i̱ Sonʼnde (Luc. 4:8). Kʼoa kʼoakitsole je chjotatjenngile nga kʼoati katasʼín tsanda je. Je Jesús kao chjotatjenngile alikuikʼia nga xkóson kisichjén nga tsakʼétsʼoale Niná. Nga tsín matsen Niná alikʼia koa̱nle je chjota nga kʼoakjoan siká je xi sinda kʼoa nga kʼoakji kjoajeya tsjoále (Is. 46:5). Kʼoa jósʼin tíjna nga kui sínda chjota je xkósonle xi santo tsole kʼoa nga kui bʼétsʼoale. Nga kitsjoa Jeobá je xi te kjoatéxoma, je xi majaoni kui je én xi faʼaitʼa texto xi kamaxkia ndʼaibi. Je xi mele kʼoasʼin skoe̱xkón Niná josʼin mele, majinle nga tsín tjínnele xkóson sichjén nga kʼoetsʼoale. Je chjota xi kotʼayason jokoan ngasʼa kʼoatso nga ñaki toje Niná tsakʼétsʼoale je chjotale Cristo xi títjon tsakatio. Nichxin xi tiyoaa ndʼaibi, xi testigole Jeobá maa, kʼoati kui choa̱ mangíntjenngiaa jokisʼin je chjotale Cristo xi títjon tsakatio. w21.10 19, 20 párr. 5, 6

Je Jesús kʼoakitsole je chjotale Cristo xi Judea tsʼe xi tsakatio nga siglo 1 nga tjínnele kuitjo ya naxinandá kʼianga jekuichokationdai je sondado ya Jerusalén (Luc. 21:20-24). Tsa kisitjoson jme xi kitsole Jesús kinjengile yaole, tonga tjínnele kitsjionkon jmeni xi tjínle. Jngo revista La Atalaya xi i̱ kitso: “Kitsjionkon niʼyale, nangile kao tsojmi xi kisʼele. Tosaa je Jeobá kisinʼiotʼa yaole, nga̱ koankjainle nga je koasenkao kʼoa nga je tsjoále jme xi koa̱nchjénle”. Je revista jebi i kitsosa: “Tsakui nichxin chótʼayakaoná nichxin xi sʼa nroa tʼatsʼe jme xi ngisa chjí jchatokoán. A kui ngisa chjí jchatokoán je tsojmi xi tjínná axo kui ngisa chjí jchatokoán nga kixi kjuintʼalee Niná nga̱ ʼyañá nga je kʼoasjentjainá. Kʼianga kʼoakoa̱n, tsakui nichxin ñʼai koa̱nná je tsojmi xi si̱chjén, tonga tjínnele kuiyondaa”. w22.01 4 párr. 7, 8

Kʼianga to chriankʼia kitjoni Egipto je chjota israelita, nga kui kisikʼaxki̱le Jeobá je Moisés xi tʼatsʼe jaʼaínle kʼoa jokjoan, i kitsole: “Jeobá, Jeobá, jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín, kʼoa jmi mani xi bakóle je kjoatsjoacha, síchatʼa jñani tsín kʼoanʼia, jñani saténgiaa kʼoa jñani bijnyijée” (Éx. 34:6, 7). Nga kʼoakitso Jeobá nʼio chjíle xi tsakakóyale Moisés xi tʼatsʼe kjoatsjoachale. Kataʼyala jme xi kinchja̱ni. Je Jeobá kʼoakitso nga nʼio tjínle je xi ñaki kjoatsjoacha. Kʼoa én jebi ngi ñato kʼa faʼaitʼa ya Biblia (Núm. 14:18; Neh. 9:17; Sal. 86:15; 103:⁠8; Joel 2:13; Jon. 4:⁠2). Kʼianga jngó jngó kʼa bʼaxki̱ ya Biblia én jebi jé Jeobá nchja̱ni, alikuikʼia nga je chjota nchja̱ni. Nʼio tjínle kjoandosin nga kʼoatsole yaole Jeobá nga tjínle xi ñaki kjoatsjoacha. w21.11 2, 3 párr. 3, 4

Je xi nda choa̱ bʼéjnale xi jechixan jé pastro Pedro kao chjoónle. Kʼiala nga jejaʼato jaon sá kʼoa tsa jngo nó nga tsabexkon Jesús, nʼio tjínle kjoandosin jme xi kisʼin je pastro Pedro. Kʼianga kʼoakitsole Jesús nga chjotatjenngile katama, tjínnele kisikjaʼaitsjenjin jmeni xi sʼin nga̱ jti̱ bʼasjengindá nga bajngiʼa familiale (Luc. 5:1-11). Je xi kisʼin kuinga tosa kui kiskoejin nga kitjenngile Jesús. ʼYañá nga kitsjoanganʼiole je chjoónle nga̱ je Biblia kʼoatso nga ya kikao choatse nga kjin kikakóyason je Pedro kʼianga jejaʼáyanile Jesús (1 Cor. 9:5). Nga nʼio nda choa̱ tsakʼéjna je chjoónle Pedro koan kitsjoale kjoafaʼaitsjen Pedro je xi chjoón kao xi xʼin (1 Ped. 3:1-7). Je Pedro kao chjoónle ­koankjainle nga kʼoatso je Jeobá nga tsjoále jme xi koa̱nchjénle kʼiatsa kui títjon xále Niná sikatío (Mat. 6:31-34). w21.11 18 párr. 14

Je pastro Pablo nʼio tsjoake koan je chjotale Cristo kuinga nʼio kisixáni nga tsakasenkao (Hech. 20:31). Nga kʼoakisʼin tsjoacha koan je Pablo. Tobʼelañá, kʼianga kisʼejinle je xi chjotajchínga sʼin tjío ya Éfeso nga tsín tiskoe̱ni je pastro Pablo, ñaki kiskiʼndá ngatsʼi (Hech. 20:37). Kʼoatisʼinni ndʼaibi, je xi chjotajchínga sʼin tjío tsjoake je ndsʼe̱ kʼoa binyakao (Filip. 2:16, 17). Kʼoa jméni xi kuinyakao nga ñʼai ma sakʼoale je xi chjotajchínga sʼin tjío. Je xi chjotajchínga sʼin tjío nʼio tse xá kjinele kʼoa ndatjín nga skénngi je choa̱le Pablo. Je Pablo kʼoati chjotajée koan joni tsa ñá, kuinga sakʼoa ñʼai koannile nga kʼoakisʼin xi ndatjín (Rom. 7:18-20). Ningalani tse kjoa jaʼatojin, alikui kisikʼajenle kon. Tosi tonda tsjoa tsakáya kon. Kʼiatsa skénngi choa̱le Pablo je xi chjotajchínga sʼin tjío, tosi tonda tsjoa sa̱tío kon nga sixále Jeobá ninga sakʼoa ñʼai koa̱nle. w22.03 26 párr. 1, 2

Ya Levítico 19:3 kʼoatso nga tjínnele jchaxkón nga xoto. Ñá xi chjotale Cristo maa alikui tikui kjoatéxoma mangíntjenngiñá, tonga nʼio tse xi bakóyaná jmeni xi kisʼin chjota israelita kʼianga xoto kʼoa je kjoanichikontʼain xi kisokole nga kisitjoson. Kʼianga kisikjáya nga xoto je chjota israelita alikui titsʼe xá kisʼinni, jé Jeobá tsabexkón. Kuinga ya ndʼia sinagoga ki ntsjaintsjaini Jesús nga xoto kʼoa kui Énle Niná tsakʼéxkia (Éx. 31:12-15; Luc. 4:16-18). Jmeni xi tso Levítico 19:3 tʼatsʼe nga ʼyaxkón nga xoto, kui tsoyaná nga tjínnele si̱ʼaa nga nyaon nyaon nga si̱chriantʼalee Jeobá. Tsa tsín kʼoatinʼia, machjén nga ngisasa kʼoailee kjoandosin xi tʼatsʼe jebi. Tsa ntsjaintsjai si̱kʼayalee nichxin je Niná, ngisaa koa̱nchriantʼalee, kʼoa tjínnele kʼoasʼiaan nga tsje koaan. w21.12 5 párr. 13

Kʼianga tsakʼejna je Jesús i̱ Sonʼnde kisimiyo toʼya chjotani. Kisimiyo je chjotanyiná kʼoa kʼoati kisimiyo je chjota xi ma̱ tjío kʼoa xi totaon tsaʼya. Kʼoati tsakakóle kjoamatokon je xi tsín nda tsaʼyatokon. Tjínkʼa chjota xi tsín kisasenle nga kʼoakisʼin je Jesús. Je chjota jebi, i kitsole je chjotatjenngile Jesús: “Ánni nga tibichisínio, kʼoa tiʼyo kao chjota xi tao̱nbasen bʼéña, kʼoa kao chjotatsʼen”. Je Jesús kʼoakitso jotso én xi kamaxkia ndʼaibi (Luc. 5:29-31). Nga kjesa faʼaijin je Jesús i̱ Sonʼnde, je profeta Isaías kʼoakitso nga tsín nda skoéya je chjota. I kitso: “Kichʼasjengi kʼoa tsakinyaxinle chjota [...]. Joxi kisʼeʼmaa je nkjaín nga tsín tsaʼyaa. Kichʼasjengi kʼoa likui jme chjí tsaʼyatokoán” (Is. 53:3). Je profeta Isaías tongini kʼoakitso nga tsín nda skoéya chjota je Mesías. Tsakuilani kisikjaʼaitsjenjin je chjota judío koanjinjinle nga toxá kʼoakoa̱ntʼainni je Jesús. w21.05 8, 9 párr. 3, 4

Tjínkʼa chjotale Cristo xi tsín ndi̱to̱n kisitjoson je kjoafaʼaitsjen xi tsakʼaile (Sant. 1:22). Tjínkʼa xi toje nda kisikao xi nyiná (Sant. 2:1-3). Kʼoa tjínkʼa xi toxkia kinchja̱ (Sant. 3:8-10). Ningalani kʼoakisʼin chjotale Cristo jebi, je Santiago alikui kʼoakitso nga tsínkʼia tikoa̱nndayani. Ngasin nganda tsakjákao, tonga kʼoakitsokixile jñani tjínnele sindaya yaole. Kʼoa kʼoakitsole xi jetjíonroajen kjoamakjainle nga katasíjéle nganʼio xi chjotajchínga sʼin tjío (Sant. 5:13, 14). Xi bakóyaná: Ningalani tjín jmeni xi ñʼai male je ndsʼee, kʼoasʼin si̱kjaʼaitsjeen nga koa̱n sindaya yaole. Tjínkʼa chjota xi ʼmiyalee Biblia xi ñʼai male nga sítjoson jmeni xi tso Biblia (Sant. 4:1-4). Tsakui nichxin ñʼai koa̱nle nga tokjoan sindaya yaole kʼoa kʼoasʼin jotso je Énle Niná. Tonga tojo kisʼin je Santiago, kʼoati koa̱n kʼoakʼuínlee jñani machjén nga sindaya yaole. Tonga kʼoati kuenta sʼiaan nga je Jeobá koasenkao xi nangitokon kʼianga sindaya yaole (Sant. 4:10). w22.01 11 párr. 11, 12

Ngatsʼiñá nga mená koakoá kjoamatokon tojo sʼín je Jeobá. Ánni. Kuinga tsín nrʼoéle Jeobá je xi tsín bakóle kjoamatokon xi kjaʼaí. Nga mená nga kjuinrʼoéná je Jeobá kʼianga kʼoétsʼoalee, kuinga tsín totaon ʼyañá xi kjaʼaí. ʼNdele nga tojtaya si̱koaa je xi kjoañʼai tífaʼá, tosaa binyakoaa kʼoa mangíntjenngiñá je kjoafaʼaitsjen xi tsjoá Biblia nga tso: “Alijme kjoamatakon xi sʼe̱ xi tʼatsʼe je xi tsínkui tjínle kjoamatakon” (Sant. 2:13). Tsa nangitokon maa kʼoa tsa ʼyaa nga kʼoati machjén nga sa̱kóná kjoamatokon, kʼoatisʼin bakoá kjoamatokon tsanda ñá. Ngisaa machjén nga koakolee kjoamatokon jngo xi tsakajngijée xi faʼaijin ijngokʼani jinjtín. Ya Biblia faʼaitʼa choa̱le je chjota xi tsakakó kjoamatokon kʼoa xi tsín totaon tsabe xi kjaʼaí. Choa̱ jebi koasenkaoná nga kʼoati sʼiaan tsanda ñá. w21.10 12 párr. 16, 17

Nitje̱n nga tokʼoatjínsa tsakʼejna Jesús i̱ Sonʼnde, yaa ʼnde jña Getsemaní ʼmi kikʼétsʼoa kʼoa kisikjaʼaitsjenjin. Nʼio tjínle kjoandosin jmeni xi kitsole chjotatjenngile. Tsakui nichxin jetsʼato basenya nitje̱n nga kicho Jesús kao chjotatjenngile ya ʼnde jña Getsemaní ʼmi. Kʼoakitsole nga tjenyatokon katabatio kʼoa kʼiaa kikʼétsʼoa (Mat. 26:37-39). Kjiofe je chjotatjenngile kʼianga jaʼainrʼoe kʼoa kʼoakitso ijngokʼale nga tjenyatokon katabatio kʼoa nga katabʼétsʼoa (Mat. 26:40, 41). Je Jesús koanjinle nga nʼio tjíosíkjáojin chjotatjenngile kʼoa nga nʼio aonyale. Kʼoa kʼoakitso nga tsínle nganʼio je yaoná. Ngi jao kʼa kikʼétsʼoa je Jesús, kʼoa nga jao kʼa alikui tjíobʼétsʼoa chjotatjenngile kʼianga jaʼainrʼoe, tokjiofení (Mat. 26:42-45). w22.01 28 párr. 10, 11