Diciembre

Jngo chjota etíope xi xángʼa tjínle koanmele nga koaisʼenngindá, tonga a jetíjnanda. Je chjota jebi yaa Jerusalén jaʼaini nga kikʼétsʼoale Niná (Hech. 8:27). Kui religiónle chjota judío koankjainle. Kʼianga tsakʼéxkia je Escrituras Hebreas tsabe xi tʼatsʼe Jeobá, tonga koanmesale tsabe. Kʼianga kiskajin je Felipe kui rollo xi tsʼe Isaías tíbʼéxkia chjota jebi (Hech. 8:28). Tosi tonda koanmesale tsabe xi tʼatsʼe Niná, kuinga ya kini yo̱ngo̱ xi tíjna Jerusalén nga ya kikʼétsʼoale je Jeobá. Je Felipe kitsoyale chjota etíope jmeni xi kje bejin, jolani nga je Jesús je Mesías (Hech. 8:​34, 35). Nga ngisa tsjoake koan je Jeobá kao Jesús koanmele kisʼenngindá nga̱ kui xi koanmele nga chjotatjenngile Cristo koa̱n. Nga tsabe Felipe nga jetíjnanda chjota jebi kiskanisʼenngindá. w23.03 8, 9 párr. 3-6

Tsa tsín énkixi kuinókjoaa alikui tsjoa sʼe̱ kon je Jeobá xi tʼatsaan (Prov. 6:​16, 17). Je chjota alikui tichʼaotjín manile kʼianga bʼéndiso, tonga ñá kui xi mená nga kʼoatisʼin si̱kjaʼaitsjeen josʼin síkjaʼaitsjen je Jeobá (Sal. 15:​1, 2). Ningalani tsín kuitso tokoán nga kʼoéndisoaa, tonga kʼoati tsín ndatjín tsa jme xi kʼoéma tojoni nga koa̱nkjainle xíngiaa jmeni xi kuixoán. Kʼoati tsín énndiso nikʼabísoán (Prov. 25:23; 2 Tes. 3:11). Kʼiatsa énndiso kuichomani jmeni xi tichobayañá, tosa kui cho̱bayañá je xi ndatjín. Nichxin xi tiyoaa ndʼaibi, me tongatsʼi je chjota nga tsín nda tso én xi nchja̱. Je Jeobá sichikontʼainná kʼiatsa nda tso én kuinókjoaa kʼianga ʼmiyasoán, nga mangián kjoajtín kʼoa nga chobanajmiá, nga̱ kʼoasʼin jchaxkónñá. Kʼianga jetjóxin jme xi chon sonʼnde, ngisaa choa ñʼai koa̱nná nga chʼa̱sjengʼaa je Jeobá kao jmeni xi kuixoán (Jud. 15). w22.04 9 párr. 18-20

Kʼianga ʼyaa nga nʼio tsjoakená je Jeobá kao Jesús kʼoati tsjoacha maa tsanda ñá (1 Juan 4:10). Kʼoa ngisaa titsjoacha mangáñá je Jesús nga ʼyaa nga kitsjoa kjoabijnachonle xi totʼatsaan nga jngó jngoá. Je pastro Pablo kitsjoa kjoanda nga kʼoakisʼin je Jesús. Kʼianga kiski je carta xi tsʼe Gálatas i kitso: “Je ʼndíle Niná, xi koantsjoakena, xi kitsjoantjai yaole xi tʼatsʼan” (Gál. 2:20). Nga kʼoasʼin kitsjoa kjoabijnachonle Jesús, je Jeobá kui kjoanda kitsjoaná nga i̱ jaʼaikaojinná naxinandále ánni nga miyole koa̱nñá (Juan 6:44). Tsjoa sʼe tokoán nga be Jeobá jotjín je ni̱ma̱ná kʼoa nga i̱ jaʼaikaojinná naxinandále kʼoa nga kʼoasikji tse kjoanda tsakakóná nga tsakʼéchjíntjainá tojoni nga miyole koaan. Nga ʼyaa jebi, ngisaa tsjoacha maa je Jeobá kao Jesús. Kuinga machjénsíni nga si̱kjaʼaitsjenjiaan jebi: jósasʼin koakoa nga tsjoake̱ je Jeobá kao Jesús. Nga tsjoachaa je Jeobá kao Jesús kui xi basenkaoná nga kʼoati tsjoacha maa je xi kjaʼaí (2 Cor. 5:​14, 15; 6:​1, 2). w23.01 28 párr. 6, 7

Kui Biblia síchjén Jeobá nga basenkaoná nga to jngojtín nixálee ngatsʼiaa. Jé Jeobá xi kʼoasʼin koanmele nga kʼoasʼin kichji je Biblia nga toje chjota xi nangitokon katamajinle (Luc. 10:21). Bʼéxkiaa Biblia toʼya chjotani. Tonga tojé chjota xi nangitokon xi majinle kʼoa xi sítjoson jmeni xi tso Biblia (2 Cor. 3:​15, 16). Kui kjoachjinele Jeobá nya je Biblia. Kui Biblia síchjén Jeobá nga tsoyaná nga jngó jngoá kʼoa nga jngojtín mañá. Kʼianga bʼexkiaa Biblia ʼyañá nga kuenta sʼínná Jeobá nga jngó jngoá (Is. 30:21). Nkjínjin kʼa nga kuikjoan texto tsakʼexkiaa xi tsakasenkaoná kʼianga kjoa tibitjatojiaan. Kui xá kichjini Biblia nga kuinyakaoná ngatsʼiaa ninga millón mani chjota jngo tjíjtsa Sonʼnde. Nga nʼio chjine Niná kʼoa nga tʼatsʼe jaʼaini Biblia binyakaoná nga jngó jngoá je kjoafaʼaitsjen xi tsjoá (2 Tim. 3:​16, 17). w23.02 4, 5 párr. 8-10

Ñá xi chjotatjenngile Cristo maa nʼio tsjoachaa je Jeobá kʼoa kui xi mená nga nda si̱xálee. Tonga xi koasenkaoná kuinga si̱kjaʼaitsjeen jméni xi sʼiaan nga ngisa nda si̱xálee, nga kʼoakoa̱nkjoaan josʼin mele Niná, nga nkjínsa koya jmeni xi koa̱nná sʼiaan kʼoa nga jchaa josasʼin koa̱n kuinyakoaa je xíngiaa. Ánni ndatjínsíni nga kʼoéndajiaan josasʼin si̱xálee je Niná kʼoa nga kuichotjenngiaa jmeni xi kʼoéndajiaan. Xi títjon, kuinga mená nda kuiyoaa ngixko̱n Jeobá. Je Jeobá nʼio tsjoa sʼe kon kʼianga nichjén jmeni xi maná nʼia kʼianga je nixálee. Xi ijngosani, kui xi mená nga tosi tonda si̱ndayaa yaoná ánni nga ngisa nda kuinyakaoñá je ndsʼee (1 Tes. 4:​9, 10). Machjén nga tosi tonda si̱ndayaa yaoná kʼoa nga ngisasa nda si̱xálee je Jeobá, ni chriansʼa kʼoa ni jekjoatse tichotʼayá Biblia. w22.04 22 párr. 1, 2

Je chjota político tojeme kʼoetʼale je Babilonia xi nʼioje, xi tsonile, ngatsʼi religión ndiso xi tjín. Kʼianga kʼoetʼale kʼiaa koaitsʼia je kjoañʼai xi nʼio tse. Nga kʼoakoa̱n, a nʼio nkjín chjota xi je Jeobá koasjai. Mai. Tojo tso ya capítulo 6 xi tsʼe Apocalipsis, kʼianga kʼoakoa̱n, je chjota xi tsín je Jeobá síxále jé sinʼiotʼa chjota político kao negocio yʼai xi tjín, xi nindo ningósonkao ya capítulo jebi. Nga tsín ya tsjoánganʼiole Chjotaxále Niná chjota jebi, je Jeobá kʼoasʼin skoe̱kon nga kontra tjíole (Luc. 11:23; Apoc. 6:​15-17). Je choʼndale Jeobá xi kixi koaitʼale alikui koa̱nngóson kao josʼin je chjota xi tsín je Niná síxále kʼianga jetíjna kjoañʼai xi nʼio tse, tojéní choʼndale Jeobá xi tosi tonda je Jeobá tsjoánganʼiole, tsín ya tsjoánganʼiole je cho̱toán (Apoc. 13:​14-17). w22.05 16 párr. 8, 9

Ali tsa tokuijin je énnda xi tʼatsʼe Chjotaxále Niná xi tjínnele kuitsoyason je choʼndale Niná (Mat. 24:14). Kʼoati machjén nga tsjoánganʼiole je xá xi tjíosʼín je ánkjele Niná, tojosʼin bʼaxki̱ ya Apocalipsis capítulo 8 saʼnda 10. Ánkje jebi kui kʼoatjíotso je kjoañʼai xi kjoaʼaíne chjota xi tsín bʼaʼénle je Chjotaxále Niná. Je testigole Jeobá kʼoati kui tjíotsoyason je én xi kjoañʼai tjenkao xi ya mangóson je “jtsílao̱ kao lʼí”. Kʼoatjíotso jme kjoañʼai xi kjoaʼaíkaone Niná je chjota xi je Na̱i tsjoánganʼiole (Apoc. 8:​7, 13). Machjén nga skoe̱ je chjota nga jeme kjoaʼaí kjoafetʼa ánni nga koa̱n sikʼantjaiyani yaole kʼoa kuinje̱nginile yaole nichxin nga kjoaʼaí kjoajtile Jeobá (Sof. 2:​2, 3). Kjoanʼiojin machjénná nga kjoájinkoaan chjota én jebi. Kʼoa kʼianga jetíjna kjoañʼai xi nʼio tse ngisaa tijti koa̱nngánile je chjota kʼianga kʼoakʼuínkixilee jmeni xi koa̱ntʼain (Apoc. 16:21). w22.05 7 párr. 18, 19

Si̱kjaʼaitsjenla je xi ʼndíxti sʼele, tsakui nichxin jenkjín discurso nrʼoé tʼatsʼe josʼin nijchá ʼndíxti, tonga jekjaʼaí ma kʼianga je xi ʼndíxti sʼele. Jengisa nʼio mandosinle je kjoafaʼaitsjen xi tsjoá Niná tʼatsʼe josʼin nijchá je ʼndíxti. Tsee xá kjinele xi xijchá ma. Kʼianga jebʼantjaiya josʼin biyoaa kʼoati jengisa chjí ʼyatokoán jotso je Énle Niná. Kuinga nyaon nyaon bʼexkiañá je Biblia ñá xi choʼndale Jeobá maa, tojo tjínnele kisʼin je xi rey sʼin tsakatio ya naxinandá Israel nichxin kjoatse, kʼoa nikjaʼaitsjenjinñá jmeni xi tso Biblia (Deut. 17:19). Xi xijchá mao nʼio tse kjoanda tjínno kʼianga kuinyakao je ʼndíxtino nga kʼuínyalao xi tʼatsʼe Jeobá. Tonga ali tsa tokuijin xi machjén nga koakoyalao, kuinga kuinyakao nga ni̱ma̱le katanroajinni nga tsjoake katama Jeobá. w22.05 26 párr. 2, 3

Ali tsa tokuijin xi machjén nga ba sʼe̱ kon jngo chjota nga kabajngijée. Machjén nga ñaki koako nga kʼoama kjoaixinile. Je xi kuenta sʼín je Jeobá kui tsa nikʼantjaiyaa yaoná. Kʼianga nikʼantjaiyaa yaoná alikui tikui xi chʼaotjín kʼoanʼiañá kʼoa kʼoasʼin mangínkoaa yaoná josʼin mele je Jeobá (Is. 55:7). Kʼianga síkʼantjaiya yaole jngo chjota tjínnele sikʼantjaiya josʼin síkjaʼaitsjen, ánni nga kui kjoafaʼaitsjenle Jeobá koandiaanile (Rom. 12:2; Efes. 4:23). Tjínnele ñaki kʼoakʼoe kon nga mele sindaya yaole, nga tsín tikui xi chʼaotjín sikjaʼaitsjenni kʼoa nga tsín tikui kʼoasʼinni (Col. 3:​7-9). Nga makjainná nga je Jesús tsakʼéchjíntjainá síchatʼaná je Jeobá kʼoa sítsjee je jéená. Kʼianga be Jeobá nga kʼoatinʼia jokji tjen kʼoakjimaná nga nda timangínkoaa yaoná síchatʼaná nga̱ kui kuenta sʼín nga tsakʼéchjíntjainá je Jesús (1 Juan 1:7). w22.06 6 párr. 16, 17

Jokji tífaʼato nichxin totaon tjíobe xínkjín chjota (Ecl. 8:9). Tobʼelañá, je chjota xi batéxoma tjínkʼa xi totaon be xi kjaʼaí. Tjínkʼa chjota xi nʼio tsʼen kʼoa toxkia sʼín, tjínkʼa xti xi totaon be je xtiskuela xínkjín, kʼoa tjínkʼa chjota xi totaon be je familiale. Je chjota tijé tsokjónnile xínkjín nga kʼoasʼín. Jósʼín je Na̱i nga chjota nokjonlee. Je Na̱i kui xi mele nga chjota kuijkónlee ánni nga tsín tikʼuínyasonsíñá kʼoa tsín tisi̱tjosonñá kjoatéxomale Jeobá. Jé Na̱i xosʼín nga tjínkʼa chjotaxá xi bʼéchjoa je xále Niná kʼoa nga fitjenngikená (Luc. 21:12). Nga je Na̱i kjinentsja jme xi chon sonʼnde tjínkʼa chjota xi énndiso kaníbason xi tʼatsʼe testigole Jeobá. Je xi sísin énndiso jebi tsakui nichxin toskoe̱sinná kʼoa tsa totaon skoe̱ná (Mat. 10:36). Tonga tsín tokʼoamaná nga kʼoasʼín je Na̱i nga̱ jesa kʼoakisʼin nga siglo 1 (Hech. 5:​27, 28, 40). w22.06 16 párr. 10, 11

ʼYáni xi sa̱kóyale “nga katabatiojin je kjoakixi”. Jé xi kjoaʼáyanile, je xi kjoaʼatojin tjínkon Armagedón kao xtiʼndí xi kʼia jtsín nga jetíjna sonʼnde chjotse. Kʼianga jekjoetʼa xi jngo jmi nó ngatsʼi xi koatio i̱ Sonʼnde chjotatsje koa̱n. Kʼianga chjotatsje koa̱n je chjota ali tsakuijin xi tsonile nga toje koatio ngantsjai nichxin. Si̱kjaʼaitsjenla je Adán kao Eva. Chjotatsje koan, tonga tjínnele kisitjosonle Jeobá nga koan tsakatio tsakai ngantsjai nichxin, tonga tsín kisitjoson (Rom. 5:12). Nga jekjoaʼato xi jngo jmi nó chjotatsje koa̱n ngatsʼi xi koatio, a jé Chjotaxále Niná tsjoánganʼiole axo kʼoatisʼin kʼa jokisʼin Adán kao Eva nga tsín kixi kitʼale Niná ningalani chjotatsje koan. w22.09 23 párr. 12-14

A kʼoasʼin nikjaʼaitsjain nga tsínkʼia nda kuiyoaa nga nʼio chʼao kjimachon nichxin xi tiyoaa ndʼaibi. Nkjín chjota xi tsín titsjoakeni xínkjín ya yaniʼya, sa tsʼen sa tsʼeen kjima, to yaole fini kʼoa tjín xi tsín tisítjosonnile xi xá tjínle. Tonga tosaa kui jebi xi bakóyaná nga majinná nga jeme nda kuiyoaa, nga̱ je chjota kʼoakjoán tjíosʼín tojo tso je én xi tongini kinokjoa tʼatsʼe nichxin fetʼa (2 Tim. 3:​1-5). ʼYañá nga tíbitjoson én jebi. Nga kʼoakjima kui xi bakóná nga jetíbatéxoma Jesús ya ngʼajmi. Nkjínsa én xi tongini kinokjoa xi kui nchja̱ni tʼatsʼe Chjotaxále Niná. Je én xi tongini kinokjoa yaa mangóson joni jngo rompecabezas nga ñaki tíbitjoson chʼin chʼin kʼoa kui xi basenkaoná nga ʼyaa jmé nichxinni tiyoaa ndʼaibi, tojosʼin jetíjnachoa̱le Jeobá. w22.07 2 párr. 1, 2

Kʼianga chʼin COVID-19 tsʼatsen kʼoatsakʼinná josʼin kuiyojtián kʼoa josʼin kʼuínyasoán. Kjitʼanangi videoconferencia kinichjén nga tsakiyojtián nga xki̱ xomana kʼoa nga kisʼená kjoajtíntse. Carta kichjiaa kʼoa teléfono kinokjoalee chjota nga tsakʼinyasoán. Je Jeobá tísíchikontʼain je xá xi tinʼia. Nkjín je sucursal xi kʼoatso nga ngisa kjimankjínya je xi tsoyason. Nkjín ndsʼee xi kʼoatso nga nʼio ndasʼin tíbichómani nga tjíotsoyason nichxin xi tiyoaa ndʼaibi. Tsakui nichxin tjínkʼa ndsʼee xi kʼoakuitso nga síkʼatone choa̱le jotsoná je naxinandále Niná xi totʼatsʼe chʼin COVID-19. Tonga ʼyañá nga ndasʼin bichómani jotsoná je naxinandále Niná. Tsa si̱kjaʼaitsjenjiaan nga nʼio ndasʼin tíbándiaaná je Jesús, jchañá nga kʼoati sikuindaná je Jeobá kao Jesús nichxin xi sʼa nroa tojme kjoa xi kuitjátojiaan (Heb. 13:​5, 6). w22.07 13 párr. 15, 16

Kʼianga kʼoétsʼoalee Jeobá machjén nga chʼa̱sjengʼaa kʼoa nga kʼoailee kjoanda tʼatsʼe ngayeje jmeni xi tsjoáná, jolani nga naskásʼin matsen je naxó, nga nʼio nkjín koya tsojmi kitsjoaná xi ma chinee kʼoa nga nda satío tokoán nga ya biyokoaa je miyoná. Nʼiosa nkjín koya jmeni xi tsjoáná Niná nga̱ kui xi mele nga tsjoa sa̱tío tokoán (Sal. 104:​12-15, 24). Bʼailee kjoanda Jeobá nga tsoyaná xi tʼatsʼe, xi basenkaoná nga nʼio sʼejna kjoamakjainná kʼoa nga tsjoáná jngo kjoachoya. Sakʼoa chajinná nga bʼailee kjoanda Jeobá xi totʼatsʼe jmeni xi tsjoáná. Jméni xi koa̱n sʼiaan nga tsín kʼoakatamaa. Koaan kʼoétʼaxoaan jmeni xi si̱jélee Jeobá, kʼoa nga koa̱nskanni si̱kjaʼaitsjenjiaan jósʼin kitsjoaná jmeni xi kinijélee. Xijekoa̱n, kʼoétsʼoalee nga kʼoailee kjoanda nga tsakasenkaoná (Col. 3:15). w22.07 22, 23 párr. 8, 9

Ali tsa tokuijin xi machjén nga chótʼayá je Énle Niná. Machjén nga si̱tjosoán kʼoa kʼoasʼin kjuinkoaa yaoná jotso. Tsa kʼoasʼiaan, tsjoa sʼe̱ tokoán (Sant. 1:25). Jósʼin jchañá tsa kʼoasʼin timangínkoaa yaoná jotso je Énle Niná. Jngo ndsʼee xi kʼoatso nga tjínnele si̱kjaʼaitsjenjiaan jotinʼia, jñani nda tinʼia kʼoa jñani machjén nga si̱ndayasaa yaoná. Je pastro Pablo i kitso: “Je xi jejichotjenngilee, tokʼoasʼin séndiaa kjuinkaosaa tongóson kʼoétakoán” (Filip. 3:16). Si̱kjaʼaitsjenjiaan josʼin basenkaoná nga tosi tonda kʼoanʼia jotso je Énle Niná. Nda biyoaa, tsjoa sʼe kon Jeobá kʼoa nda satío kon je ndsʼee (Prov. 27:11; 3 Juan 4). Kuinga nʼio tsjoachañá je Énle Niná kʼoa kuinga kʼoasʼin mangínkaoñá yaoná jotso. w22.08 18, 19 párr. 16-18

Jngo koya josʼin koako nga tsjoake Jeobá kao Jesús je xi chjotajchínga sʼin tjío kʼiaa nga sikuinda je ndsʼee xi tjío ya jinjtín (1 Ped. 5:​1, 2). Je Jesús kui xá jebi tsakánele je pastro Pedro. Nga jan kʼa kʼoakitso je Pedro nga tsín bexkon je Jesús, koanmejinle tsabe Jesús tsa ñaki tsjoake kjoaixi. Kʼianga jejaʼáyanile i kitsole: “Simón, ʼndíle Jonás, a tsjoachanái”. Je Pedro tsakakójinle Jesús nga tsjoake kjoaixi. Nga koanskanni je Jesús i kitsole: “Tikuindai barréna” (Juan 21:​15-17). Nga jeki nichxin, je Pedro nda kisikuinda je chjotale Cristo kʼoa kʼoasʼin tsakakóni nga tsjoake Jesús. Jósʼin koako je xi chjotajchínga sʼin tjío nga tjíosítjoson jmeni xi kitsole Jesús je Pedro. Kʼoasʼin koakoni nga tsjoake je Jeobá kao Jesús tsa nda sitjoson je xá xi kjinele kʼoa tsa kuinyakao je ndsʼee xi jekisikatío xále Niná (Ezeq. 34:​11, 12). w23.01 29 párr. 10, 11

Alikui koa̱n kʼoasʼin si̱kjaʼaitsjeen nga tsín ʼya xi koa̱njinle josʼe tokoán nga kui xi chʼaotjín nikjaʼaitsjeen. Tsa kʼoalani, kʼoajinsʼin si̱kjaʼaitsjeen nga tsínkʼia tjóxinná je xi chʼaotjín. Ya Biblia itso: “Niná ñatje̱n tsjoá josʼin kuitjoo, jméni nga koa̱n jchókjoasínino”. Koaan kixi kjuintʼalee Jeobá ninga nʼio ñʼai koa̱nná nga kuixkantʼakoaa je xi chʼaotjín nikjaʼaitsjeen. Jé koasenkaoná nga tsínkui sikinjená xi chʼaotjín nikjaʼaitsjeen. Nga chjotajée maa toxá kui kjoaʼaítsjen sakʼoaniná xi chʼaotjín. Kʼianga kʼoakoa̱n tokjoan kui xi ndatjín si̱kjaʼaitsjeen. Joni José nga tokjoan kitjotoka nga kʼoakitsole chjoónle Potifar nga mele koájnakao (Gén. 39:12). Alikui kʼoaiʼndee nga kui sikinjená je xi chʼaotjín nimetokoán. w23.01 12, 13 párr. 16, 17

Kui kjoatéxomakixi xi nʼio bakó je Jeobá (Deut. 32:4). Nga kjoatéxomakixi tjínle Jeobá alikui ʼya xi faʼájin (Hech. 10:​34, 35). Yaa bakóni Niná nga tsín ʼya xi faʼájin jme én xi kichjini Biblia. Je Jeobá tongini kʼoakitso nga sa tse sa tse koa̱n kjoachjine kʼianga to jetífetʼa nichxin, xi tsonile, nga nʼio nkjín chjota koa̱njinle jmeni xi bakóya je Biblia (Dan. 12:4). Je xi basenkaoná nga majinná jotso Biblia kuinga nkjín én tífaʼatoya, nkjín tíbitjo kʼoa nkjín tíbʼabíson. Kʼoa kʼoati tíbitjo xo̱n xi Énle Niná yʼangini. Je naxinandále Niná jetsʼato 240 én tísíkʼatoya je Biblia, tsa ngakjijngo kʼoa tsa tosʼa basen, kʼoa tokjoatjao nga bʼaile chjota. Jósʼin tíbichómani jebi. Millón mani chjota xi kjimakjainle Énle Niná nga kjesa faʼaijin kjoafetʼa (Mat. 24:14). Je Jeobá kixi kʼoa kui xi mele nga katabe chjota jotjínni xi tʼatsʼe kʼianga kʼoexkia Biblia. Kuinga tsjoakená nga kʼoasʼínni Jeobá. w23.02 5 párr. 11, 12

Tsjoachañá je kjoatéxomakixile Niná. Tonga nga chjotajée maa ngatsʼiaa tsakui nichxin kʼoatisʼin si̱kjaʼaitsjeen josʼin síkjaʼaitsjen chjota xi tsín Niná síxále tʼatsʼe xi ndatjín kao xi chʼaotjín (Is. 5:20). Kʼianga jaʼai Jesús i̱ Sonʼnde, je chjota xi tsakinyatítjonle religión nʼio kixi tsakʼasje yaole. Tonga je Jesús kʼoakitsole nga tsín nda kisʼin nga totaon tsabe xi kjaʼaí kʼoa nga totsʼe kjoatéxoma kisichjén tʼatsʼe jmeni xi ndatjín kao xi chʼaotjín (Ecl. 7:16; Luc. 16:15). Nichxin xi tiyoaa ndʼaibi, tjín je xi kʼoati sʼín joni chjota jebi. Kʼoasʼin síkjaʼaitsjen nga tsín chʼaotjín jmeni xi sʼín. Ngʼa bʼasje yaole kʼoa tobesin xi kjaʼaí. Alikui sasénle Niná nga kʼoasʼín je chjota nga̱ tsínkui kjoatéxomakixile fitjenngi. Nʼio naskásʼin tíjna je kjoatéxomakixi. Kui xi tsonile nga kui kʼoanʼia jmeni xi sasénle Niná. Kʼianga “kjoatéxomakixi” síkʼaxki̱ Biblia kui nchja̱ni nga kʼoasʼin mangínkoaa yaoná jotso kjoatéxomale Jeobá. w22.08 27 párr. 3-5

Je Jesús kisinʼiotʼaa je chjotatjenngile ningalani tsín nda kisʼin sakʼoa (Juan 15:16). Kʼianga kʼoakitso je Santiago kao Juan josʼin mele koatio kʼianga koatexoma Jesús, je Jesús alikui chʼaosʼin kisikjaʼaitsjen xi tʼatsʼe kʼoa alikui kʼoakitsole nga tsín tichjotatjenngile koa̱nni (Mar. 10:​35-40). Kʼoa nitje̱n nga kindoa Jesús, ngatsʼi chjotatjenngile tokitsjionkon (Mat. 26:56). Je Jesús koanjinle nga koa̱nle sindaya yaole je chjotatjenngile. Ningalani be jñani ñʼai koanle, je Jesús tjao koanle saʼnda nga kʼien (Juan 13:1). Kʼoa kʼianga jaʼáyanile Jesús, jé xi 11 chjotale tsakánele nga je koandiaa josʼin sa̱kóyason Énle Niná kʼoa nga je sikuinda je xi chjotatjenngile Cristo koa̱n (Mat. 28:​19, 20; Juan 21:​15-17). Je Jesús nda kisʼin nga je kisinʼiotʼa nga̱ kixi kitʼale Niná chjota jebi saʼnda nga kʼien. Je Jesús kisinʼiotʼa xi kjaʼaí chjota, kʼoa kui xi bakóyaná nga koa̱n kʼoati sʼiaan tsanda ñá. w22.09 6 párr. 12

Alikui koa̱nle kuinyaxkónná je Na̱i tsa ñaki tjínjngo tokoán nga tsjoakená Jeobá kʼoa nga je koasenkaoná. Tobʼelañá, je xi kiski Salmo 118 tse kjoa jaʼatojin. Nkjín kontra kisʼele, jolani chjota xi nʼio tsaʼyale (versículo 9 kao 10). Sakʼoa nʼio kisʼenele nga tjín xi sʼin (versículo 13). Kʼoa nga tsakatekjáyale Jeobá nʼio tsakjákao (versículo 18). Ninga kʼoalani, i kitso: “Alikui tsokjoan”. Be nga tsjoake Jeobá ningalani nʼio tsakjákao nga tsakatekjáyale. Ñaki tsakʼéjngo kon xi kiski salmo jebi nga tsjoake Jeobá kʼoa nga je koasenkao tojme kjoa xi kjoaʼatojin (Sal. 118:29). Kʼoéjngoaa tokoán nga tsjoakená Jeobá nga jngó jngoá. Tsa kʼoakʼoé tokoán, janla koya si̱kʼaxkiaa xi tsín tikuinókjonnilee. Xi títjon, tsakui nikjáojiaan nga tsín so̱koʼaná je familianá. Xi majaoni, nga chjota nokjonlee. Kʼoa xi majanni, nga nokjonlee kjoabiya. w22.06 14, 15 párr. 3, 4

Ngisa kʼoailee kjoandosin nga je Jeobá jchaxkoán. Bakinle nga je Jeobá jchaxkoán nga̱ jé kisindaná (Apoc. 4:11; 14:​6, 7). Kuinga kui xi ngisa chjínile nga kʼoasʼin jchaxkoán Jeobá josʼin mele, kao kjoakixi kʼoa josʼin bándiaa nganʼiotsjele (Juan 4:​23, 24). Kui xi mená nga kui nganʼiotsjele Niná katabándiaaná ánni nga kʼoasʼin jchaxkónñá Jeobá tojo tso je Biblia. Kui ngisa kʼoailee kjoandosin je xále Niná ninga ya tiyoaa ya ʼnde jñani tíchjoale xále Niná. Nichxin xi tiyoaa ndʼaibi tsʼato 100 mani je ndsʼee kao tichjaa xi ndoyá tjíoʼya xi totʼatsʼe nga testigole Jeobá ma. Ninga kʼoalani, tsjoa tjío kon nga̱ bʼénele yaole jokji tjen kʼoamale nga bʼétsʼoa, nga kotʼaya kʼoa nga fákaonajmíni xi kjaʼaí xi tʼatsʼe Jeobá kao Chjotaxále. Ningalani totaon skoe̱ná chjota kʼoa ninga koaitjenngikená, tsjoa sa̱tío tokoán nga̱ ʼyañá nga je Jeobá koasenkaoná kʼoa tsee kjoanichikontʼain tsjoáná (1 Ped. 4:14). w22.10 9 párr. 13

Je kjoafaʼaitsjen xi faʼaitʼa libro xi tsʼe Proverbios nʼio nda basenkaoná ngantsjai, kʼoa ndasʼin biyoaa nga mangíntjenngiaa jmeni xi tso. Jao koya kataʼyaa tʼatsʼe kjoafaʼaitsjen jebi. Xi títjon, tokatamaniná jokji tjínná. Proverbios 23:​4, 5 itso kjoafaʼaitsjen xi tsjoá: “Ali tsa kjoanyinájin nʼio fasjai [ . . . ], nga̱ jnga kuitjole jokjoan jngale ja̱, kʼoa koaitjeen ya ngʼá”. Ninga kʼoalani, nichxin xi tiyoaa ndʼaibi, ni je xi nyiná kʼoa ni je xi ma̱ tjíosíjchá yaole kui xi mele nga tao̱n sʼe̱le. Kʼoa nga kui básjai, sakʼoa kui kʼoasʼín xi tsín kixi tíjna kʼoa alikui tinda bʼaxki̱ni, alikui tinda fikaoni xi kjaʼaí kʼoa saʼnda tjochʼinle (Prov. 28:20; 1 Tim. 6:​9, 10). Títjonkjoanla si̱kjaʼaitsjeen nga kjesa nokjoajián. Tsa tsín si̱kuindaa jmeni xi bixoán, si̱kiʼaonjián xi kjaʼaí. Proverbios 12:18 itso: “Je énle chjota xi tsín síkjaʼaitsjen yaa mangóson joni tsa ki̱cha̱ tíbʼésʼenjin yaoná, tonga je énle chjota xi chjine síndayaná”. Tsa tsínkui cho̱bayañá jñani chao sʼín xi kjaʼaí nda kjuinkoaa xíngiaa (Prov. 20:19). w22.10 21 párr. 14; 22 párr. 16, 17

Tjínnele koanjinle Ezequiel ngayeje je én xi kuitsoyason. Tjínnele koankjainle nga kui koasenkao nga kuitsoyason je én xi tjítʼa ya rollo. Je Ezequiel kʼoakitso nga kʼoakji xi rollo jebi “joni tsa ntsjén” (Ezeq. 3:3). Ánni. Je Ezequiel kʼoakitso nga tse kjoanda kitsʼaile kʼoa nga naskánatjín nga tʼatsʼe Jeobá kuinchja̱ni (Sal. 19:​8-11). Kitsjoale kjoanda Jeobá nga je kiskoéjin nga profetale koa̱n. Nga koanskanni, je Jeobá i kitsole Ezequiel: “Tinóʼyai kʼoa tʼejnajin ni̱ma̱li ngayeje xi tixinle” (Ezeq. 3:10). Je Jeobá kʼoakitsole nga katasíkjaʼaitsjen jmeni xi tjítʼa je rollo kʼoa nga katasíkjaʼaitsjenjin jmeni xi tso. Kui xi koasenkao nga nʼio sʼe̱jna kjoamakjainle Ezequiel kʼoa sʼe̱jinkon je én xi koaikájinkon je chjota (Ezeq. 3:11). Nga ya kisʼeʼa tsʼoa kʼoa nga ya kisʼejnajin ni̱ma̱le je Énle Niná, je Ezequiel tíjnanda nga kuitsoyason kʼoa nga kuitjosonle je xá xi kisʼenele. w22.11 6 párr. 12-14

Jméni xi sʼiaan tsa ñʼai maná nga jme xi bʼantjaiyajin naxinandále Niná. Kʼoainganʼioá. Kʼianga tsakʼema ya ʼndekixí je chjota israelita, jé chjota cohatita tsakʼa kaxa̱ jña kixinya je kjoa xi kisʼendajin (Núm. 3:​29, 31; 10:33; Jos. 3:​2-4). Tsee kjoanda kisʼele chjota jebi. Tonga kʼianga jekicho chjota israelita ya ʼNde jña tsakʼinle nga kʼoaile alikui tikui xá kisʼinni je chjota cohatita, nga̱ tsín tixin kikaoni je kaxa̱ jña kixinya je kjoa xi kisʼendajin. Nga kui nichxin je chjota cohatita kjaʼaí xá tsakʼaile (1 Crón. 6:​31-33; 26:​1, 24). Je Biblia alikui kʼoatso tsa tsín kisasenle chjota cohatita je xá xi kisʼin kʼoa tsakui xá xi ngʼa tíjna kisijé tokuini nga nda xá kisʼele nga títjon. Jmé xi bakóyaná jebi. Ñaki ni̱ma̱ná katanroajinni nga si̱tjosoán jmeni xi bʼantjaiyajin naxinandále Niná ninga tsín tikui xá sʼe̱niná jmeni xi nʼia tsakai. Kao kjoatsjoa si̱tjosoán tojme xá xi sʼe̱nená. Kuenta sʼiaan nga kui xi ngisa chjí be Jeobá nga nitjosonlee tikʼoajinni jme xá xi sʼená jinnaxinandále. w22.11 23 párr. 10, 11

Je Onesíforo tsakasenkao Pablo nga ndoyá tsakʼejnaʼya. Je Pablo i kitso xi tʼatsʼe: “Likui koansoale nga kjoañʼai tijna”. Je Onesíforo tsakásjai Pablo, kʼoa kʼianga jekiskajin tsakasenkao kʼoa tsínkui kini ninga xkón tsakʼejna. Jmé xi bakóyaná jebi. Kui bakóyaná nga koa̱n kuinyakoaa je ndsʼee xi chjota fitjenngike kʼoa tsín chjota kuijkónlee. Koaan si̱toánntjé kʼoa kʼoainganʼiolee je ndsʼee (Prov. 17:17). Machjén nga koakolee je ndsʼee nga tsjoachaa kʼoa kuinyakoaa. Si̱kjaʼaitsjeen josʼín je ndsʼee kao tichjaa xi Rusia tsʼe kʼianga ndoyá nikatíoʼya je ndsʼee xi ngikʼa. Kʼianga sʼendajinle kjoa ya ngixko̱n chjotaxá, nʼio nkjín ndsʼee xi kʼoati bichó nga tsjoánganʼiole je ndsʼee. Jmé xi bakóyaná jebi. Alikui koa̱n kuijkoán kʼiatsa énndiso sʼe̱ne je ndsʼee xi xá kjinele jinnaxinandále Niná, tsa ndoyá ni̱katíoʼya kʼoa tsa chjota koaitjenngike. Kʼoétsʼoantjé je ndsʼee, kuinyakoaa je familiale kʼoa kjoásjailee josʼin koa̱n kʼoainganʼiolee (Hech. 12:5; 2 Cor. 1:​10, 11). w22.11 17 párr. 11, 12

Je xi chjotajchínga sʼin tjío kui xá kjinele nga sinʼio kon je ndsʼee kʼoa kuitsoyale xi tʼatsʼe Niná (1 Ped. 5:2). Kʼianga kjoaxkón sʼe, je xi títjon sʼin xi chjotajchínga sʼin tjío kuinga koasjaiya tsa nda tjíoni nga jngó jngó ndsʼee kʼoa tsa tjínle xi tjíokjine, najño kao jñani tjíoni. Je xi kjoaxkón bichóne tsakui nichxin nkjín sá nga nganʼio koa̱nchjénle, nga si̱nʼio kon kʼoa nga kui chja̱kaonajmíni xi tʼatsʼe Niná (Juan 21:15). Je Harold, xi ya tíjnajinle Comité xi tsʼe Sucursal jenkjín ndsʼee xi kjoaxkón bichóne fákaonajmí. Itso: “Tsee bichómani nga nda satío ijngokʼani kon je ndsʼee. Ningalani nda batio ijngokʼani, kui faʼaitsjenle jmeni xi koan. Jolani tsa xínkjín kʼien, tsakui kisicha jngo tsojmi xi nʼio chjí bekon kʼoa tsakuije̱ nga xkón tsakatio nga kjoa jaʼaine. Ba satío kon nga kui jebi faʼaitsjenle. Toxá kʼoasatíoni tokoán, ali tsakuijin xi tsonile nga tsínle kjoamakjain”. Nʼio chjíle nga koaitjenngi kjoafaʼaitsjen jebi xi chjotajchínga sʼin tjío: “Chjíʼndákao ʼya xi kjiʼndá” (Rom. 12:15). w22.12 22 párr. 1; 24, 25 párr. 10, 11

Kui nganʼiotsjele Jeobá basenkaoná nga tsínkui síkinjená je xi chʼaotjín nikjaʼaitsjeen. Bʼaiʼndelee nganʼiotsjele Niná nga basenkaoná kʼianga chotʼayá je Biblia. Kʼoati kui nganʼiotsjele Niná bándiaaná nga mangián kjoajtín. Kʼoati binyakaoná nga chjakaonajmiá je ndsʼee nga̱ kʼoati tjíosíndaya yaole jñani ñʼai male (Heb. 10:​24, 25; 13:7). Nga bʼetsʼoalee Jeobá kʼianga kʼoaʼmilee nga katabasenkaoná jñani ñʼai maná tsjoáná nganʼiotsjele nga tosi tonda si̱ndayaa yaoná. Ningalani tsín tokjoan tjóxinná kjoafaʼaitsjen xi tsín ndatjín, tonga koasenkaoná nga tsínkui sikinjená xi chʼaotjín. Kʼianga jekui kʼoanʼia jmeni xi sasénle Jeobá, machjén nga tosi tonda kʼoasʼiaan kʼoa tosi tonda kui si̱kjaʼaitsjeen xi ndatjín. w23.01 11 párr. 13, 14

Je Biblia ali tsa tʼatsʼe xkijin nchja̱ni kʼoa alikuikjoan kʼoatsoná jokjoan xi sʼioaa kʼoa jokjoan xi chi̱nee, tonga kʼoatsoná josʼin síkjaʼaitsjen Jeobá xi tʼatsʼe jebi. Tobʼelañá, itso: “Chja̱ʼaxinlai yaoli xi síkiʼaonná” (Ecl. 11:10). Je xi síkiʼaonná kʼoa xi kʼoatso Biblia nga tsín ndatjín kuinga toxkia bichaa kʼoa tsa koa̱nchʼiaa (Prov. 23:20). Je Jeobá kui xi mele nga tsín si̱kʼatoné choa̱le jokji sʼioaa kʼoa jokji kuichaa (1 Cor. 9:25). Machjén nga nda si̱kjaʼaitsjeen jmeni xi sʼiaan nga̱ kʼoasʼin koakoñá nga chjí ʼyaa je kjoabijnachon xi kitsjoaná Jeobá (Sal. 119:​99, 100; Prov. 2:11). Tobʼelañá, chosonnilee jokjoan tsojmi xi chinee kʼoa tsínkui chinee tsojmi xi síkiʼaonná ninga nda chine. Basenkaoná nga nda soyofe, nga ntsjaintsjai ejercicio nʼia, nga tsje nʼia kʼoa nga tsje nichoaan ya ndʼianá. w23.02 21 párr. 6, 7

Jméni xi sʼiaan nga koa̱njinná jmeni xi bakóya Biblia xi tsín choa ñʼai tíjna. Chótʼayajinla jotso 2 Timoteo 3:​16, 17. Kʼoatso nga ño koya tjínni josʼin basenkaoná Énle Niná, bakóyaná, nchja̱tikaoná, síchoyandaná kʼoa síkinyáyandiaaná. Kʼoasʼin basenkaoná ngayeje libro xi faʼaitʼa ya Biblia. Kʼianga bʼexkiaa si̱kjaʼaitsjeen jmeni xi bakóyaná tʼatsʼe Jeobá, tʼatsʼe xi tjínndajinle, kʼoa tsakuije̱ kjoafaʼaitsjen xi tsjoáná. Jméni xi machjén nga sʼiaan kʼianga koatekjáyaná Énle Niná. Kuenta sʼiaan jmeni xi koasenkaoná nga jchaa jñáni machjén nga si̱ndayaa yaoná kʼoa xi koasenkaoná nga tsín tikʼoasʼianñá. Kʼoati kuenta sʼiaan jme xi koasenkaoná nga tosi tonda kixi kjuintʼalee Jeobá. Si̱kjaʼaitsjenjiaan jósʼin síchoyandaná jmeni xi tibʼexkiaa tsa jme xi tsín kʼoasʼin majinná tsakai, jolani tsakui jmeni xi tsakʼinná nga ʼmiyasoán. Kʼoa jméni xi sʼiaan nga sikinyáyandiaaná jmeni xi bʼexkiaa ya Biblia. Kjoásjaiyaa jmeni xi koasenkaoná nga kʼoasʼin si̱kjaʼaitsjeen josʼin síkjaʼaitsjen Jeobá. Tsa kuenta sʼiaan nga ño koya jebi ngisaa nda koa̱njinná jmeni xi kʼoéxkiaa ya Biblia. w23.02 11 párr. 11

Je én xi tongini kinokjoa xi faʼaitʼa je libro xi tsʼe Daniel, kʼoatso nga kʼia tsakʼétsʼiakao nga tsakatéxoma je Jesús nga jejetʼa xi ñato nichxin tsole je Biblia. Kataʼyala kʼiáni kʼoakoan (Daniel 4:​10-17). Je xi “ñato nichxin” tsole Biblia 2,520 nó tínchja̱ni. Nó jebi kʼiaa kitsʼiani nga nó 607 tongini nga nó 1, kʼianga tsakjaʼáxin chjota babilonio je rey xi tojetʼani tsakatéxoma ya Jerusalén xi je Jeobá tsakasénnda. Nó jebi kʼiaa jetʼa nga nó 1914 nga je Jeobá kitsjoale xá Jesús nga je xi Rey sʼin kʼoéjnale Chjotaxále Niná, xi “tjínle ʼnde” nga koatexoma (Ezeq. 21:​25-27). Jósʼin basenkaoná je én xi tongini kinokjoa. Nga majinná je én xi tongini kinokjoa tʼatsʼe xi “ñato nichxin” tsole Biblia, ʼyañá nga kʼiakjoan kisitjoson Jeobá nga choa̱le. Kʼoakitso kʼiani koatexoma je Chjotaxále kʼoa nga kicho nichxin kʼoakisʼin. Tikʼoasʼinni, je én xi tongini kinokjoa xi chasa nga kuitjoson kʼiakjoán sitjoson Jeobá kʼiani nga kitso, alikui sikʼachxin (Hab. 2:3). w22.07 2, 3 párr. 3-5