Ánni nga nʼio chjísínile nga kjoásjaiyaa jmeni xi tso je Biblia

ÑAKI KʼOATJÍN JMENI XI BʼÉYANAJMÍ JE BIBLIA

Omar: Alikui nanda sisian tʼatsʼe relijión, mela tsín jme xi cho̱banajmíñá.

Bruno: Tosa ndani nga kʼoatiʼminái. Bruno ʼmina kʼoa ji jóʼmili.

Omar: Omar ʼmina.

Bruno: Jótonda katsaojiaan xíngiaa, Omar.

Omar: Katsaojinngoáni.

Bruno: Kʼoa ngasʼa, a kinisinní tʼatsʼe relijión.

Omar: Jaon kisisinña nga sʼa ʼndí kjiʼe̱. Tonga kʼiaa tsín tikisisinña nga kia ya universidad nga̱ tsín tiniʼyana tsakatejnaña.

Bruno: Kʼoa jméni xi kichotʼayai ya universidad.

Omar: Historia kao Ciencias sociales kiskotʼaya. Saʼnda ngasʼa kui xi nʼio koanmena nga skoe jmeni xi koan ngasʼa, jmeni xi tjíosʼín chjota jokji tífaʼato nichxin.

Bruno: Nʼiojin ndatjín nga ʼyaa. Tochale kʼoati ʼyai nga je Biblia kʼoati nchja̱ni xi tʼatsʼe historia. A jesa tsakjasjaiyai xi tʼatsʼe Biblia.

Omar: Mai. ʼBeña nga nʼio ndatjín je Biblia tonga likui ʼbe tsa kʼoati nchja̱ni tʼatsʼe historia.

Bruno: Jótondani nga tsín chʼasjengi je Biblia. Tsa a ngotjoli, matsjoana koako kʼale choa̱ xi faʼaitʼa je Biblia jñani nchja̱ni xi tʼatsʼe historia.

Omar: Koa̱njin, tonga tsínna Biblia.

Bruno: Ali kʼoajin mali yʼaña je Bibliana. Kataʼyala jmeni xi tso ya 1 Crónicas kapítulo 29, bersíkulo 26 kao 27. Itso: “Je David, ʼndíle Jesé, tsakatéxomale ngakjijnda naxinandá Israel, kʼoa ñachan nó tsakatéxomale naxinandá Israel. Ñato nó tsakatéxoma ya Hebrón, kʼoa kantejan nó tsakatéxoma ya Jerusalén”.

Omar: Kʼoa jósʼin bakó testo jebi nga ñaki kʼoatjín jotso je Biblia.

Bruno: Nichxin kjoatse je chjota xi tsín nda nchja̱ni tʼatsʼe Biblia kʼoakitso nga tsín kʼoatjín jmeni xi bʼéyanajmí tʼatsʼe David, nga to kuento jmeni xi tso.

Omar: Kjoaixiñe, kʼoa ánni.

Bruno: Kuinga likui nanda ʼyale tsa ñaki tsakʼejna je David, tochoa xo̱n tjín jñani tsoya xi tʼatsʼe. Tonga nga nó 1993, je chjota arqueólogo jngo la̱jao̱ xi jenʼio kjoatse tíjna koansjaile, kʼoa la̱jao̱ jebi jao én tjítʼa xi “niʼyale David” kʼoa xi “rey xi tsʼe Israel” sʼin tsoyanile.

Omar: A jaon.

Bruno: Ijngosa chjota xi síkʼaxki̱ Biblia jé xi Poncio Pilato tsakʼin, xi tsakatéxoma nichxinle Jesús, kʼoa nʼio nkjín xi kʼoakitso nga tsín ñaki tsakʼejna chjota jebi. Kʼoa yaa faʼaitʼa ya Lucas kapítulo 3, bersíkulo 1. Testo jebi nʼio nkjín jaʼaín síkʼaxki̱ je xi kʼia tjíobatéxoma.

Omar: An, jaonngó, itso: “Kʼia nga koan gobernador Poncio Pilato ya ʼnde Judea, kʼoa Herodes chjotatítjon ya ʼnde Galilea”.

Bruno: Nʼio tse nga kʼoakitso je chjotachjine nga tsín tsakʼejna je Poncio Pilato. Sʼala ñachante nó tjínle nga ijngo la̱jao̱ koansjai ya Oriente Medio jñani tjítʼa jaʼaínle.

Omar: Kjelangása nrʼoejian xi tʼatsʼe jebi.

Bruno: Ndala tsokʼoa nga kui kabʼeyanajmíle.

Omar: Xi kjoaixi, kʼoasʼin sikjaʼaitsjen nga je Biblia jngo libro xi nʼio nda tjínnda josʼin kichji, tonga kʼoaxian nga tsín josʼin koa̱nchjénná ndʼaibi. Tokuijin tsoya jmeni xi koan nichxin kjoatse.

JE BIBLIA TOJO MACHJÉNNÁ NDʼAIBI

Bruno: Nʼio nkjín chjota xi kʼoati sʼin síkjaʼaitsjen. Tonga kjaʼaísʼin sikjaʼaitsjen an. A ʼyaní anni. Kuinga tojo kui machjénná ndʼaibi jmeni xi koanchjénle chjota saʼnda ngasʼa. Jolani, je tsojmi xi chinee, je najño xi chʼakjá kʼoa kao niʼya xi biyoʼyá. Machjénná nga cho̱banajmiá kao xíngiaa kʼoa nga nda kuiyoaa kao familianá. A tsí jaon.

Omar: Jaon, kʼoatjín.

Bruno: Je Biblia basenkaoná xi tʼatsʼe jebi. Ningalani jenʼio kjoatse kichji tojo machjénná ndʼaibi.

Omar: A jaon.

Bruno: Jaon, je kjoafaʼaitsjen xi faʼaitʼa nʼio koanchjén kʼianga sʼa kichji kʼoa tojo machjénná nichxin xi tiyoaa ndʼaibi.

Omar: Jngola koya kʼoatʼinnái.

Bruno: Je Biblia nʼio basenkaoná josʼin ʼyatokoán je tao̱n, josʼin nga nda kuiyoaa kao familianá kʼoa kao je miyoná. Je Biblia bándiaaná josʼin nga nda kuiyoaa. Tobʼelañá, ñʼai maná josʼin nijchá je ʼndíxtiná kʼoa josʼin kuijnakoaa je chjoónná. A tsí jaon.

Omar: Jaon kʼoatjín, jejngo nó chixainjin kao chjoónna kʼoa tojo ñʼai manajin nga mangósuinjin.

Bruno: Je Biblia nroatʼaa kjoafaʼaitsjen xi basenkaoná xi tʼatsʼe jebi kʼoa nga kui mangíntjenngiaa nda bichótsjoá. Tobʼelañá, Efesios kapítulo 5, bersíkulo 28. A koaan kʼoéxkiai.

Omar: Koa̱njin, itso: “Kʼoatisʼin xi xʼin tsjoake katama yánchjínle, joni tsa titsʼeni yao. Je xi tsjoake chjoónle, tijeni yaole xi tsjoake”.

Bruno: Kʼiatsa jngo xʼin xi koaitjenngi je kjoafaʼaitsjen jebi, a tsí nda koatio kao familiale.

Omar: Tochajinle, tonga ñʼai maná nga kʼoanʼia.

Bruno: Kʼoatjín, aliʼya xi kʼoasʼin bitjosonle. Tikuini kapítulo jebi faʼaitʼa jngo kjoafaʼaitsjen xi basenkaoná nga chósonnilee.a Ngatsʼi xi jechixan machjénle nga tsín nʼio koatiole xínkjín. Je chjoónna kao an, tíbasenkaonajin je Biblia nga nda tiyokoaijin xíngijin.

Omar: Jaon, kʼoajin tjín.

Bruno: Jin xi testigole Jeobá maijin, jngo pájina xi tsʼe Internet tíjnanajin jña faʼaitʼa kjoafaʼaitsjen xi binyakao xi jechixan kʼoa kao familia. Koakola ngotjole jmeni xi faʼaitʼa pájina jebi.

Omar: Koa̱njin, nga̱ tongotjo.

Bruno: Jw.org ʼmi pájina jebi.

Omar: Naskángó kjoan je foto xi faʼaitʼa.

Bruno: Jaon, je xíngijin xi tjío jña xin naxinandá, tjíotsoyason. Jngo koya nroatʼa ibi jñani “xo̱n kao grabación” tso. I koa̱nsjaili je rebista chjotse xi bitjo kʼoa kao xo̱n xi kjaʼaísanile jñani faʼaitʼa je kjoafaʼaitsjen xi binyakao je familia. Tobʼelañá, kuila chótsenlee je foyeto Énnda chjotse xi tʼatsʼe Niná tínroani. Jngo kjoaʼmiya faʼaitʼa xi i̱ ʼmi: “Jósʼiaan nga nda kuiyoaa ya yaniʼya”.

Omar: Ndalatjín. Kʼoa jméni xi tso.

Bruno: Je kjoaʼmiya jebi nkjín koya faʼaitʼa xi koasenkaono nga nda kuiyo kao je chjoónli. Chótsenlalai párrafo xi tíjna jñani faʼaitʼa kjoachjonangi xi majaoni. A koaan kʼoéxkiai je én xi tofikjetʼani.

Omar: Koa̱njin, itso: “Je xi jechixan tjínnele skoe̱xkón xínkjín kʼoa tsjoake koa̱n xínkjín. Kʼoa mani nga chjotajée nga jao, tjínnele sichatʼangañále xínkjín ánni nga nda koatiosíni”. Kʼoajintjín jotso.

Bruno: Jngo testole Biblia xi faʼaitʼa ibi kui Efesios 5:33. A koaan kʼoéxkiai i̱ Bibliana.

Omar: Itso: “Jngójngó ngatsʼiobi ñaki kʼoasʼin tsjoacha katamao yánchjínno, josʼin tsjoachao yaono. Je xi chjoón xkón katabe xʼinle”.

Bruno: A kaʼyaní jmeni xi machjénle nga jngó jngó kʼoa josʼin tsjoángañále xínkjín.

Omar: Me tsín nanda kamajinna.

Bruno: Ngatsʼi je xi xʼin a tsínkui xi mele nga katabexkón je chjoónle. Kʼoa je xi yánchjín kui xi mele nga tsjoacha katama.

Omar: Kʼoatjín kjoaixi.

Bruno: Kʼiatsa je xi xʼin koakole je chjoónle nga tsjoake, je chjoón ngisajin skoe̱xkón je xʼinle.

Omar: Jaonjin.

Bruno: Je én jebi jeme jao jmi nó kichji, tonga tojo machjén nichxin xi tiyoaa ndʼaibi. Kʼiatsa kui koaitjenngi je xi jechixan je kjoafaʼaitsjen jebi nda koatio nga̱ tsjoále xínkjín jmeni xi machjénle.

Omar: Alikui ʼbe tsa kʼoanisikji kjoafaʼaitsjen tsjoá je Biblia.

Bruno: Jaon tse kjoafaʼaitsjen tsjoá. Jósi tsa kjaʼaí nichxin kjoaʼaikonle kʼoa kui chótʼayá je xi majanni kjoachjonangi jñasíni tso: “A koaan tsjión xínkjín xi jechixan kʼiatsa tsín nda tjíokao xínkjín”, xi ti i̱ faʼaitʼani pájina jebi.b

Omar: Ndajin. Kʼoalaxínle je chjoónna tsa koa̱n kʼoéxkiaijin ngajoaijin.