Jósʼiaan nga tsín ngʼakon koaan
NICHXIN xi tiyoaa ndʼaibi je chjota kui xi mele nga síxkón koa̱ntʼain kʼoa nga xá katabʼaile, kʼiatsa jetjínle xá kui xi mele nga tsesa xá sʼe̱le. Ya Biblia kʼoatso nga ngʼakon koa̱n chjota kʼianga to jetífikjetʼa nichxin (2 Tim. 3:2).
Saʼnda nichxin kjoatse toxá tjínni chjota xi ngʼakon. Tobʼelañá, je Adán kao Eva tojé tsakʼa yaole nga kiskoejin jmeni xi ndatjín kʼoa jmeni xi chʼaotjín, kʼoa nga kʼoakisʼin tsee kjoañʼai tichjaʼá ndʼaibi. Kʼianga jesiento nó jaʼato, je rey Uzías xi tsakatéxoma ya Judá kʼoati ngʼakon koan, jé tsakaká xongó ya yo̱ngo̱, tonga alikui je bʼakaole nga kʼoasʼin (2 Crón. 26:18, 19). Kʼoa je chjota fariseo kao chjota saduceo kʼoasʼin kisikjaʼaitsjen nga toje xi bakinle nga nda skoe̱kon Niná nga ntje̱le Abrahán kitjenni (Mat. 3:9).
Nga ngʼakon chjota xi tjín ndʼaibi kʼoajinti ngʼakon koaan tsa tsín si̱kuindaa yaoná (Gál. 5:26). Tsakui nichxin kʼoasʼin si̱kjaʼaitsjeen nga bakinná nga tsesa xá kʼoainá ya jinjtín kʼoa tsakuije̱ nga tjínnele síxkón sikaoná je ndsʼee. Jmé xi tjínnele sʼiaan nga tsín ngʼakon katamaa. Xi títjon, kuinga koa̱njinná josʼin síkjaʼaitsjen Jeobá. Jaola koya kataʼyaa jmeni xi tso Biblia.
Jé Jeobá xi tsoni jme xá xi sʼená. Kataʼyala.
Je Jeobá kui xi mele nga je chjoón katabexkón xʼinle, kʼoa je xi xʼin nga tsjoake katama je chjoónle (Efes. 5:33). Je xi jechixan machjén nga koakongañále kjoatsjoacha xínkjín kʼoa tsín koa̱n nga kjaʼaísa xi si sikao (1 Cor. 7:3). Je xi xijchá ma kui xi mele nga katasítjosonle je ʼndíxtile, kʼoa je xi ʼndíxti ma kui xi mele nga tjao kataʼya kʼoa nga katamakuinda (2 Cor. 12:14; Efes. 6:2).
Ya jinjtín machjén nga koakolee kjoaxkóntokon je xi chjotajchínga sʼin tjío nga̱ tse xá xi sʼín nga binyakaoná (1 Tes. 5:12). Tonga ndsʼee jebi alikui je tjínnele kʼoakuitsoná jmeni xi sʼiaan nga jngó jngoá (1 Ped. 5:2, 3).
Je Jeobá tsjoáʼndee nga tjío je chjotaxá kʼoa machjén nga kʼoéchjílee je tsojmi xi machjíntjai kʼoa nga koakolee kjoaxkóntokon (Rom. 13:1, 6, 7).
Nga tsjoakená Jeobá tsʼato kʼoakji tsjoáná jokji machjénná. Nga chjotajée maa kjoabiya choʼnda ngatsʼiaa (Rom. 6:23). Tonga nga nʼio tsjoakená je Jeobá nkjín koya tjínni xi tsjoáná (Sal. 103:10, 11). Síchikontʼainná nga̱ nʼio nda chjota ninga likui tjínnele kʼoasikaoná (Rom. 12:6-8; Efes. 2:8).
JMÉ XI SʼIAAN NGA TSÍN NGʼAKON KOAAN
Likui kʼoasʼin si̱kjaʼaitsjeen josʼin síkjaʼaitsjen je chjota xi ngʼakon. Tsa tsín si̱kuindaa yaoná kʼoajinsʼin si̱kjaʼaitsjeen nga ngisa tse xi bakinná tikʼoajinni xi ngikʼa. Je Jesús jngo choa̱ tsakʼéyanajmí jña nroani nga kʼoasʼin nikjaʼaitsjeen. Kʼoakitso nga choʼnda kikásjai jngo chjota xi xka̱totsee kjintjele kʼoa nga jngo denario kʼoechjíle je xi ya sixále. Nga nkjínsa choʼnda koanchjénle nkjín kʼa kikásjai je choʼnda xi kitsjoaxále. Nga jekoanxon kinchjaale ngatsʼi nga tsakʼéchjíle. Tjínkʼa xi tsʼajnda nichxin kisixá kʼoa tjínkʼa xi tojngo hora kisixá. Tonga je naile xka̱totsee tongóson kji tsakʼéchjíle ngatsʼi. Kʼoa je chjota xi tsʼajnda nichxin kisixá tsín kisasenle nga tongóson kji koanchjíle nga̱ kui xi koanmele nga tsesa koa̱nchjíle (Mat. 20:1-16). Nga kʼoakitso Jesús kui tsakakóyale chjotatjenngile nga tokatamajngoni tokoán jmeni xi tsjoáná Jeobá.
Je chjota xi tsʼajnda nichxin kisixá kʼoasʼin kisikjaʼaitsjen nga bakinle nga ngisa tse koa̱nchjíle
Likui koa̱n nga jme xi si̱jélee xíngiaa, tosa kʼoailee kjoanda nga jme xi tsjoáná (1 Tes. 5:18). Kʼoasʼiaan jokisʼin je pastro Pablo. Alikui tao̱n kisijéle je chjotale Cristo xi ya Corinto tsʼe ninga tao̱n koanchjénle (1 Cor. 9:11-14). ʼNdele nga tjín xi si̱jélee ndsʼee tokatamajngoni tokoán jme xi tsjoáná kʼoa kʼoailee kjoanda.
Je pastro Pablo alikui tao̱n kisijé
Nangitokon katamaa. Je chjota xi ngʼakon kʼoasʼin síkjaʼaitsjen nga tjínnele síxkón koa̱ntʼain. Nga tsín kʼoakatamaa tjínnele nga nangitokon koaan.
Nʼio chjí tsabekon Jeobá je profeta Daniel nga nangitokon koan
Je profeta Daniel nʼio nda choa̱ tsakʼéjnaná nga nangitokon koan. Nyiná koan xijchále, ndasʼin tsakʼejna kʼoa chjine koan. Alikui ngʼa tsakʼasje yaole kʼoa tsín kʼoasʼin kisikjaʼaitsjen nga bakinle je xá xi tsakʼaile (Dan. 1:3, 4, 19, 20). Nga nangitokon koan je profeta Daniel, je Jeobá chjí tsabekon (Dan. 2:30; 10:11, 12).
Alikui ngʼakon katamaa, tokatamajngoni tokoán jmeni xi tsjoáná Jeobá, kʼoailee kjoanda nga síchikontʼainná nga̱ kui kʼoasʼínni nga tsjoakená.