1. Ri tsjijñi ke ma ri chjꞹntꞹbi dya ri jyambꞹbi

¿PJE NEE RA MAMAYO?

Yo ya chjꞹntꞹ ra mbeñebi ke ra mimibi texe yo paa, ñe dya ra tsjijñibi ke ra xo̱gꞹbi, zø pje ma nrrumꞹ ra tsjogꞹbi, nzayebi pa̱ra̱bi ke dya ra xo̱gꞹbi.

Bʼꞹbʼꞹ yo ya chjꞹntꞹ ke dya xo̱gꞹbi nange me tsjeji pje ra manji o pjamilia ñe o jobi. Pe mazi na joo ke ra mingui nange me potka sʼiyabi ñe me tʼekañomꞹbi.

NE BIBLIA MAMA: “Nutsʼkʼeji in bʼɇzoji dya ri pɇzgeji nin suji” (1 Corintios 7:​11).

“Ma ri tsjijñi ke dya ri xo̱gꞹbi, nuyo​ra tsjakʼꞹ ke dya dʼabʼaditjo ri mbekue. Xo dya ri zøø​ke na sʼɇzhtjo ke ri pombꞹ ñe ri dyotʼꞹ ke ra dispensaotsʼꞹ. Ri jokꞹbi yo nrrumꞹ ke ri tsjogꞹbi, pe dya ri xo̱gꞹbi” (Micah).

¿PJENGA ME NA MUBIYO?

Yo a go chjꞹntꞹji ma ra jyombeñeji ke dya na joo ra xo̱gꞹji ma ra pɇsʼiji ndumꞹ, bʼꞹma ra manji ke mazi na joo ke dya rgo chjꞹntꞹji ñe pje nrre ra jyodʼꞹji ja rga xo̱gꞹji.

“Na punkjꞹ ntee ma chjꞹntꞹji mbeñeji ke søø ra xo̱gꞹji ma ra pɇsʼiji​ndumꞹ. Ma gi kjijñi akjanu, nee ra mama ke ndeze ma kja bi chjꞹntꞹge dya mi kjijñige ke rgui mimibi ni suu o ni xira texe yo paa” (Jean).

¿PJE SØØ RI TSJAA?

ÑUU JA GA NGETSʼKʼE

¿Pje i kjage ma gi chamabi ni suu o ni xira?

• ¿I mangebi dya ga joo ke bi chjꞹntꞹbi?

• ¿Gi kjijñi ja rgui minke ma rgui chjꞹntꞹbi naño ntee?

• ¿Gi mange “ra jɇtsʼkʼi” o “ra jonkʼø kjo ra neze”?

Ma bi chjꞹrꞹ ke ja̱a̱ dʼaja o texe yo trʼonꞹ, ngedya ri mbeñe ke ma gui chjꞹntꞹbi ri mingui texe yo paa.

RI ÑAGEBIYO KO NI SUU O NI XIRA

• ¿A ro jyombeñebi ke dya ro xo̱gꞹbi, ro minkøbi texe yo paa? Ma nge ga kjanu, ¿pjenga?

• ¿Pje søø ra kjabi ngekʼua xe ra nubi me na mubi ke ro chjꞹntkʼøbi, ñe dya ra jyambꞹbi?

NU KʼO SØØ RI TSJAA

• Dyopjꞹ na tsʼijebi ngekʼua ri xipji ni su̱u̱ o ni xira ke me gi sʼiyage.

• Pɇsʼi na foto ni su̱u̱ o ni xira nu ja i pɇpjige.

• Zopjꞹ kja teléfono ni su̱u̱ o ni xira texe yo paa ma i bʼꞹnkʼe kja bʼɇpji o ma dya gi bʼꞹnkʼebi.

NE BIBLIA MAMA: “Mizhokjimi ya ñeʼchpʼe e bʼɇzo e ndixu̱, nge kʼua dya ra xo̱kꞹ e bʼɇzo” (Mateo 19:6).