Mukanda Wamucibali wa Samwele
7 Mwene mwasheketeyeye mu lipela* lyendi, co lalo Yehova mwamuhwimisile ku bitozi bendi boshe baje bamuzengelekele, 2 mwene walekele kapolofweto Nathani ngwendi: “Yange hano njili mu njibo ya mabaya a sida okuni cikasha ca Njambi wa busunga cili mukati ka bitenti.” 3 Nathani wakumbulwile mwene ngwendi: “Ya ukalinge byoshe-byoshe bili mu mbunge yobe, mwafwa Yehova ali nobe.”
4 Buje bene butsiki, Yehova walekele Nathani ngwendi: 5 “Ya ukaleke ngamba yange Devidi ngwobe, ‘Yehova nendeka ngwendi: “Kuma yobe unapande kunjitungila njibo ya kukalamo ndi? 6 Mwafwa kunjakele mu njibo kushwa litangwa linjatundisile banu ba Isalele mu Ijipiti kweta na lelo lino, oloni njinajalozoka mu tenti na mu tabanakele. 7 Ha simbu yoshe injinende na Baisalele boshe, kuma njalekaho laja ntwama umo wa miyati ya Isalele injinangula kunyunga banu bange Baisalele ngwange, ‘Bika kumwanjitungilile njibo ya mabaya a sida’ ndi?”’ 8 Ngeci, leka ngamba yange Devidi ngwobe, ‘Yehova wa maswalale nendeka ngwendi: “Njakutundisile ku bulilo bwa bimuna, njakutundisile ku kunyunga butanga bwa bimanga na kukupwisa ntwama wa banu bange Baisalele. 9 Co njikala nobe kwoshe-kwoshe kuuya, na kutundisa* bitozi bobe boshe halutwe lwobe. Co njitsimanesa lizina lyobe ngwe mwa mazina a banu bakama ha lifuti-libu. 10 Njikangwila banu bange Baisalele mwela na kubalingisa batungemo. Bakayoyamo kwa kujeneka umo abapindisa lalo. Banu bababi kubakabalyatelela lalo ngwe mubalingilile kunima. 11 Banu bange Baisalele banabayandesa tunde ha litangwa linjabangwilile maako. Co njikuhwimisa ku bitozi bobe boshe.
“‘“Co lalo Yehova nakuleke ngwendi ikeye Yehova akutungila njibo.* 12 Matangwa obe muwahwa, mubakakutsinda kubanatsindi bakukulwila bobe, njikengisa munobe ha litanda lyobe, munobe* wa kulikitila, co njikazameka bumwene bwendi. 13 Ikeye akatungila lizina lyange njibo, co njikazameka litanda lya bumwene bwendi myaka yoshe. 14 Njipwa ishe, co ikeye apwa munange. Mwabiisa, njimunangula na mulamu wa banu na makote a bana ba banu.* 15 Kunjikatundisa cizemo cange cije kucesi kutenguluka kuli ikeye ngwe munjacitundisilile kuli Saulu, uje injatundisile halutwe lwobe. 16 Njibo yobe na bumwene bwobe bakabinyungilila myaka yoshe, co litanda lyobe likazama myaka yoshe.”’”
17 Nathani walekele Devidi awa majwi oshe neci cimona coshe camwene.
18 Co Mwene Devidi wezile na kutumama halutwe lwa Yehova na kwendeka ngwendi: “Yange iyajo, obe Mwata Wahakamwa ya Byoshe Yehova? Co bakunjibo yange beyajo mangana unjilingile byoshe ebi? 19 Keti ebi lika, obe Mwata Wahakamwa ya Byoshe Yehova, oloni unendeka nebi biukalingila cikota ca ngamba yobe mu simbu ya kulutwe. Co unana banu boshe eli lishiko,* obe Mwata Wahakamwa ya Byoshe Yehova. 20 Bika lalo binjasa kwendeka kuli yobe yange ngamba yobe Devidi okuni unjizibuka mwamubwa, obe Mwata Wahakamwa ya Byoshe Yehova? 21 Unalingi ebi byuma byoshe byakama na kubisholwela ngamba yobe mwafwa bikebyo biwakulahesele, co lalo cikeco cizango cobe. 22 Mukemwo wapwa bene u wakama, obe Mwata Wahakamwa ya Byoshe Yehova Njambi. Kukwesi walifwa nobe, co lalo kukwesi Njambi weka kubanga yobe. Byoshe bitunazibi na matwi etu binamwesa ngoco. 23 Co muyati muka weka wa banu hano hasi uje unalifu na banu bobe Baisalele? Yobe Njambi waile na kubapatula ha kupwa banu bobe, co watsimanesele lizina lyobe omwo wabalingilile byuma byakama bya kukasamesa. Washekele baka-mafuti na binjambi babo mwafwa ya banu bobe, baje bawalipatwilile mu Ijipiti. 24 Wazamekele banu bobe Baisalele kupwa banu bobe myaka yoshe, co yobe, obe Yehova, unapu Njambi yabo.
25 “Ngeci, obe Yehova Njambi, shulisilila cikulaheso ciunakulahesa kutalesa kuli ngamba yobe na bakunjibo yendi myaka yoshe, co linga bene kwesekesa nomu muunakulahesela. 26 Lizina lyobe balitsimanese myaka yoshe, mangana banu bendeke ngwabo. ‘Yehova wa maswalale ikeye Njambi ya Isalele,’ co bakunjibo ya ngamba yobe Devidi bazame halutwe lwobe. 27 Mwafwa yobe, Yehova wa maswalale, Njambi ya Isalele, unajombolwela ngamba yobe ngwobe, ‘Njikakutungila njibo.’ Mukemwo ngamba yobe nasimpi na kwasa kulombela eli lilombelo kuli yobe. 28 Ngeci, obe Mwata Wahakamwa ya Byoshe Yehova, yobe Njambi wa busunga, co ukendeka busunga simbu yoshe, co lalo unakulahesa ngamba yobe ebi byuma byabibwa. 29 Ngeci kubezikisa bakunjibo ya ngamba yobe kukubwase, co batwaleleleho kukala ha mesho obe myaka yoshe, mwafwa yobe unakulahesa ngoco, obe Mwata Wahakamwa ya Byoshe Yehova, co bezikisa bakunjibo ya ngamba yobe myaka yoshe.”