Levitike

15 Yehova watwaleleleleho kuleka Mosesa na Aloni ngwendi: 2 “Lekeni Baisalele ngweni, ‘Nga kuli bimo bili na kutunda ku bushwamwa bwa munalume, bije byuma bimulingisa apwe wa kujwala. 3 Napu wa kujwala mwafwa ya byuma bije binakala na kutunda ku bushwamwa bwendi. Nameme bitwalelelaho kutunda nambe nga bimana, anga napu wa kujwala.

4 “‘Mwela woshe halala uje ali na kutunda byuma bimo ku bushwamwa upwa wa kujwala, co lalo hoshe hatumama hapwa ha kujwala. 5 Munu woshe uje akwata mwela wendi napande kukusha bizalo byendi, co lalo napande kutana, oloni apwa wa kujwala kweta mangwezi. 6 Woshe atumama ha cuma canatumamene uje nakala na kutunda byuma bimo ku bushwamwa napande kukusha bizalo byendi na kutana, oloni apwa wa kujwala kweta mangwezi. 7 Woshe akwata munu uje ali na kutunda byuma bimo ku bushwamwa napande kukusha bizalo byendi na kutana, oloni apwa wa kujwala kweta mangwezi. 8 Nga munu uje ali na kutunda byuma bimo ku bushwamwa ajekwila mate munu wa kujela, co uje munu ibanajekwila mate napande kukusha bizalo byendi na kutana, oloni apwa wa kujwala kweta mangwezi. 9 Kacitwamo koshe ka ha mwongo wa cimuna katumama uje ali na kutunda bimo ku bushwamwa kapwa ka kujwala. 10 Woshe akwata cuma canatumamene uje munu apwa wa kujwala kweta mangwezi, co woshe ambata bije byuma napande kukusha bizalo byendi na kutana, oloni apwa wa kujwala kweta mangwezi. 11 Nga uje munu ali na kutunda byuma bimo ku bushwamwa bwendi akwata munu oku katanene ku maboko, co uje munu ibanakwata napande kukusha bizalo byendi na kutana, oloni apwa wa kujwala kweta mangwezi. 12 Ndeho yoshe ya buma yakwata uje munu ali na kutunda byuma bimo ku bushwamwa bwendi munapande kuibwabwanya, co cikwata coshe ca kushonga ha citi cakwata munapande kucikusha.

13 “‘Nga bije binakala na kutunda ku bushwamwa binemana, co uje munu nolo, co napande kutanda matangwa 7. Co munima ya matangwa 7 napande kulijelesa. Napande kukusha bizalo byendi na kutana mu mema a mu kabwelubwelu, co apwa wa kujela. 14 Ha litangwa lya bu 8 napande kwambata tutela babali nambe bana ba mayembe babali ba kulela na kuya nabo kulutwe lwa Yehova ku cikolo ca tenti ya kuliwanena na kukabana kuli kapilistu. 15 Co kapilistu akana umo wa baje tuzila kupwa bwana bwa kufwika bubi, mukwabo akamwana kupwa bwana bwa kwenyeka. Ebi bikebyo byakalinga kapilistu kulutwe lwa Yehova mangana ajelese uje munalume napu wa kujwala mwafwa ya byuma bili na kutunda ku bushwamwa bwendi.

16 “‘Nga ku bushwamwa bwa munalume kunatuhuka mbuto, co uje munalume napande kutana ha mubila woshe, oloni apwa wa kujwala kweta mangwezi. 17 Napande kukusha cizalo coshe-coshe cije cili na mbuto nambe cuma coshe-coshe ca kupanga ha cilambu haje hanetikila mbuto, oloni bipwa bya kujwala kweta mangwezi.

18 “‘Nga munalume alilala na munakazi, co etisa mbuto, co banapande kutana, oloni bapwa ba kujwala kweta mangwezi.

19 “‘Nga munakazi etisa maninga, co atwalelelaho kupwa wa kujwala ha matangwa 7 mwafwa ya kuya ku ngonde. Woshe amukwata apwa wa kujwala kweta mangwezi. 20 Hoshe halala ha simbu ya napu wa kujwala mwafwa ya kuya ku ngonde hapwa ha kujwala, co lalo hoshe hatumama hapwa ha kujwala. 21 Woshe akwata mwela wendi napande kukusha bizalo byendi na kutana, oloni apwa wa kujwala kweta mangwezi. 22 Woshe akwata cuma coshe-coshe canatumamene munakazi uje napu wa kujwala mwafwa ya kuya ku ngonde napande kukusha bizalo byendi na kutana, oloni apwa wa kujwala kweta mangwezi. 23 Woshe akwata mwela nambe cuma ceka canatumamene, apwa wa kujwala kweta mangwezi. 24 Co nga munalume alilala nendi, co mazilo endi a ku ngonde eta kuli ikeye, co uje munalume apwa wa kujwala ha matangwa 7, co mwela woshe halala upwa wa kujwala.

25 “‘Nga munakazi etisa maninga ha matangwa amangi okuni keti ikeyo simbu yendi ya kuya ku ngonde nambe nga aita ha simbu yailaha kutubakana muwaketila ha simbu yakakala ku ngonde, co apwa wa kujwala ha matangwa oshe etisa maninga ngecilika mwakapwila wa kujwala mwakai ku ngonde. 26 Mwela woshe halala ha matangwa ali na kwitisa maninga upwa wa kujwala ngwe mwela wakalala ha matangwa akai ku ngonde muukapwila wa kujwala. Cuma coshe catumama cipwa ca kujwala ngwe cuma coshe cakatumama mwakai ku ngonde mucikapwila ca kujwala. 27 Munu woshe akwata ebi byuma apwa wa kujwala, co napande kukusha bizalo byendi na kutana, oloni apwa wa kujwala kweta mangwezi.

28 “‘Oloni nga uje munakazi ecela kwitisa maninga, napande kubandamena ha matangwa 7, co munima ya matangwa 7 apwa wa kujela. 29 Ha litangwa lya bu 8, napande kwambata tutela babali nambe bana ba mayembe babali ba kulela na kubatwala kuli kapilistu ku cikolo ca tenti ya kuliwanena. 30 Kapilistu akana umo wa baje tuzila kupwa bwana bwa kufwika bubi, co mukwabo akamwana kupwa bwana bwa kwenyeka, ebi bikebyo byakalinga kapilistu kulutwe lwa Yehova mangana ajelese uje munakazi napwile wa kujwala mwafwa ya kwitisa maninga.

31 “‘Ngeci munapande kukwasa Baisalele bapwe ba kujela mangana keti batse mwafwa ya kujwalesa tabanakele yange ije ili mukati kabo.

32 “‘Eli likelyo lishiko linatalesa kuli munalume uje ali na kutunda byuma bimo ku bushwamwa bwendi, na munalume uje napu wa kujwala mwafwa ya kwitisa mbuto ku bushwamwa bwendi, 33 na munakazi uje napu wa kujwala mwafwa ya kuya ku ngonde, na munalume nambe munakazi woshe-woshe uje ali na kwitisa byuma bimo ku bushwamwa bwendi, na munalume uje alilala na munakazi wa kujwala.’”