Levitike

16 Yehova wendekele na Mosesa munima ya kutsa kwa bana ba Aloni babali ba banalume baje batsile mwafwa ya kushwena kuli Yehova. 2 Yehova walekele Mosesa ngwendi: “Leka ndolome yobe Aloni ngwobe kapandele kwija simbu yoshe-yoshe yashaka mu mwela wa kujela kusambwa lya nanga, kulutwe lwa cifwiko ca cikasha mangana keti atse, mwafwa yange njisholoka helu lya cifwiko mu lishelwa.

3 “Ebi bikebyo byanapande kunena Aloni mwaija mu mwela wa kujela. Napande kunena muna ngombe wa nkomba wa bwana bwa kufwika bubi na manga wa nkomba wa bwana bwa kwenyeka. 4 Napande kuzala mukanjo wa lineni wa kujela na tuputula twa lineni tuje tufwika mubila wendi, co napande kulikuta mwiba wa lineni na kulikuta nanga ya lineni ku mutwe. Ebi binapu bizalo bya kujela. Napande kutana simbu kanda abizale.

5 “Napande kwambata bana ba bimembe babali ba nkomba ba bwana bwa kufwika bubi na manga umo wa nkomba wa bwana bwa kwenyeka. Napande kwambata aba bimuna ku mbunga ya Baisalele.

6 “Aloni napande kwana ngombe wa nkomba kupwa bwana bwa kufwika bubi. Obu bunapu bwana bwendi, co akalinga ebi mangana bamukonekele bubi bwendi na bubi bwa bakunjibo yendi.

7 “Kutundaho, akambate bimembe babali na kubemika kulutwe lwa Yehova, ku cikolo ca tenti ya kuliwanena. 8 Aloni akata ñela mangana angule hakati ka bimembe babali. Membe umo apwa wa Yehova, co mukwabo apwa wa Azazeu.* 9 Aloni akanena membe uje yanangula kupwa wa Yehova mangana apwe mulambu wa kufwika bubi. 10 Oloni membe uje yaanangula ngwendi apwe wa Azazeu banapande kumunena oku ali na kuyoya na kumwimika kulutwe lwa Yehova mangana bamupangese mu kukonekela bubi mangana bamutwale mu mambo kupwa membe wa Azazeu.

11 “Aloni akanena ngombe wa nkomba wa bwana bwa kufwika bubi. Obu bunapu bwana bwendi mangana bakonekele bubi bwendi na bubi bwa bakunjibo yendi. Kutundaho, akatsiya uje ngombe wa nkomba wa bwana bwa kufwika bubi bwendi.

12 “Co akambata cilahwilo ca tuhya ca kushula manungu akwenyuka aje anatundu ku mutula, kulutwe lwa Yehova. Akambata lalo maboko abali a kushula a isense ya lwengo lwalubwa, co akabinena kusambwa lya nanga. 13 Akaka lalo isense ha tuhya kulutwe lwa Yehova, co bwisi bwa isense bukafwika cifwiko cije cili ha cikasha ca bukaleho mangana keti atse.

14 “Akambata maninga amo a ngombe na kuwashamwina kulutwe lwa cifwiko ku butuhukilo bwa litangwa kupangesa munye wendi, akambata maninga amo na kuwashamwina kulutwe lwa cifwiko lwa kupwa 7 kupangesa munye wendi.

15 “Co akatsiya membe wa bwana bwa kufwika bubi bwa banu na kunena maninga endi kusambwa lya nanga, na kuwapangesa ngwe mwanapangesela maninga a ngombe wa nkomba. Akawashamwina kulutwe lwa cifwiko ca cikasha.

16 “Ebi bikebyo byakalinga mangana bajelese* mwela wa kujela mwafwa ya bilinga bya kujwala bya Baisalele na milonga yabo na bubi bwabo, co bikebyo byanapande kulinga lalo na ku tenti ya kuliwanena ije ili mukati kabo mwafwa ya bilinga byabo bya kujwala.

17 “Kukwesi munu weka napande kukala mu tenti ya kuliwanena kutunda ha simbu yakobela mu mwela wa kujela mangana akane mulambu wa kukonekela bubi kubanga noho hakatuhukilamo. Akana mulambu mangana bamukonekele bubi bwendi na bwa bakunjibo yendi na bwa mbunga yoshe ya Isalele.

18 “Co mwakatuhukamo akaya ku mutula uje uli kulutwe lwa Yehova na kwana mulambu mangana baujelese.* Akambata maninga amo a ngombe wa nkomba na maninga amo a membe na kuwakwita ku mambinga a mutula ku mitambela yoshe. 19 Akaushamwina lalo maninga amo na munye wendi lwa kupwa 7 na kuujelesa ku bilinga bya kujwala bya Baisalele.

20 “Mwakamanesa kwana mulambu mangana bajelese* mwela wa kujela na tenti ya kuliwanena na mutula, co akanena membe wa kuyoya. 21 Aloni akakambeka maboko endi oshe abali ha mutwe wa uje membe wa kuyoya na kwendeka kusebuka kwoshe kwa Baisalele na milonga yabo yoshe na bubi bwabo bwoshe, co akabyaka ha mutwe wa uje membe na kumwecela aye mu mambo na munalume uje ibanangula ngwabo amutwale. 22 Uje membe akambata milonga yabo yoshe na kuya nayo mu mambo, co uje munalume akatwala uje membe mu mambo.

23 “Co Aloni akakobela mu tenti ya kuliwanena na kushulula bizalo bya lineni byanazalele mwanaile mu mwela wa kujela, co akabisezamo. 24 Napande kutanena mu mwela wa kujela na kuzala bizalo byendi, co akatundamo na kwana bwana bwendi bwa kwenyeka na bwana bwa mbunga bwa kwenyeka mangana bamukonekele na kukonekela banu. 25 Akenyeka mazi a cimuna wa bwana bwa kufwika bubi ha mutula mangana akakumune bwisi.

26 “Uje munalume natwalele membe wa Azazeu napande tahi kukusha bizalo byendi na kutana, asina eluka mu cilombo.

27 “Co ngombe wa nkomba wa bwana bwa kufwika bubi na membe wa bwana bwa kufwika bubi kuje kubanambatele maninga abananene mu mwela wa kujela mangana bakonekele bubi, banapande kubatwala hanja ya cilombo, co bilambu byabo, na situ yabo na bufwati bwabo banapande kubyenyeka mu tuhya. 28 Uje abyenyeka napande kukusha bizalo byendi na kutana, co munima asinoni eluke mu cilombo.

29 “Eli likelyo lishiko limukakabangeya myaka na myaka: Mu ngonde ya bu 7, ha litangwa lya bu 10 omu mu ngonde, munapande kuliyandesa yeni babenya,* co kumwapandele kulinga cipangi coshe-coshe, ipwe Kaisalele nambe munu wa ku lifuti lyeka uje ali hakati keni. 30 Ha litangwa eli bakamyanena mulambu wa kukonekela bubi bweni mangana bamitumbule ngwabo mu ba kujela. Mukapwa ba kujela ku bubi bweni bwoshe ku mesho a Yehova. 31 Linapu litangwa lya sabata limunapande kuhwima, co munapande kuliyandesa yeni babenya.* Eli likelyo lishiko limunapande kukabangeya myaka na myaka.

32 “Kapilistu ibanabwabesa uje ibanangula kupwa kapilistu uje ainga ishe, akana mulambu wa kukonekela bubi na kuzala bizalo bya lineni, bije binapu bizalo bya kujela. 33 Akajelesa mwela wa kujela manene, na tenti ya kuliwanena na mutula, co akana mulambu wa tupilistu na wa mbunga yoshe mangana babakonekele bubi. 34 Eli likelyo lishiko limukakabangeya myaka na myaka ha kwana mulambu wa kukonekela bubi bwoshe bwa Baisalele. Mukalingalinga ngoco lumolika ha mwaka.”

Ngeci Aloni walingile muje bene mwashikilile Yehova Mosesa.