Mukanda Wakulibanga wa Samwele
10 Samwele wambatele lilulu lya mazi na kuwetila ha mutwe wa Saulu. Wamutsembele na kumuleka ngwendi: “Kuma Yehova kakubwabesele mangana upwe ntwama ya buswana bwendi ndi? 2 Muunjiseza lelo, uwana banalume babali kuyehi na mbumbo ya Recho mu mutambela wa Benjamini ku Zeuza, co bakuleka ngwabo, ‘Bidonki* baunaile na kutonda banabawana. Hanwoni isho nebalako bya bidonki, nashoto yobe mbunge. Ali na kwendeka ngwendi: “Njilinga batyoni, munange wahi?”’ 3 Muutundoho, twalelelaho kwenda kweta noho hawetela ku muti wakama wa Taboli, kuje kuukaliwana na banalume batatu bali na kukanduka kuli Njambi wa busunga ku Betheu. Umo nambata bana ba bimembe batatu, mukwabo nambata mikasha ya makende itatu, mukwaboco nambata njaba yakama ya binyu. 4 Bakakwindwisa na kukwana mikasha ya makende ibali, co unapande kutambula oyo mikasha. 5 Kutundoho, ukaya ku lilundu lya Njambi wa busunga, kuje kuli cibunga ca maswalale ba Bafilistiya. Muuketa mu nganda, ukawana cibunga ca tupolofweto basikumuka kutunda ku mwela wa kulunduka oku bapolofweta, co kulutwe lwabo kuli banu bali na kwimba cisanzi ca mikole, na kangoma, na kamutolilo, na kalyalya. 6 Sipilitu ya Yehova ikakwana nzili, co ukapolofweta hamo nabo na kutenguluka kupwa munu weka. 7 Ebi byuma byoshe mubikasholoka, yakalinge byoshe biukasa kulinga, mwafwa Njambi wa busunga ali nobe. 8 Ukalibanga kusikumuka ku Giugali, co njikakuwanako mangana njikane milambu ya kwenyeka, na milambu ya kulila hamo. Unapande kukanjibandamena ha matangwa 7 kweta noho hanjikezila. Co njikakuleka biunapande kulinga.”
9 Saulu mwatengulukile lika na kuseza Samwele, Njambi watengulwile mbunge yendi na kuipwisa ngwe ya munu weka, co ebi byuma* byoshe byasholokele ha litangwa lije. 10 Saulu na muka-kumupangela batundile kuje na kuya ku lilundu, co cibunga ca tupolofweto caliwanene nendi. Oho bene sipilitu ya Njambi yamwanene nzili, co washangumukile kupolofweta hamo nabo. 11 Boshe baje bamuzibukile mubamumwene ali na kupolofweta hamo na tupolofweto, balyendekesele ngwabo: “Bika binalingiwa kuli muna Kishi? Kuma Saulu nendi napu umo wa tupolofweto ndi?” 12 Co munalume umo wehwile ngwendi: “Indi aba tupolofweto bakwabo ishabo iya?” Mukemwo kwezile endekesi ya kwendeka ngwabo: “Kuma Saulu nendi napu umo wa tupolofweto ndi?”
13 Mwamanesele kupolofweta, waile ku mwela wa kulunduka. 14 Mu kwita kwa simbu, ndolome ya ishe ya Saulu wehwile Saulu na muka-kumupangela ngwendi: “Munaile kuli?” Wamukumbulwile ngwendi: “Tunaile na kutonda bidonki,* oloni tunonowele kubawana, mukemwo tunaile kuli Samwele.” 15 Ndolome ya ishe ya Saulu wehwile Saulu ngwendi: “Njilekeko, bika byanakuleke Samwele?” 16 Saulu wakumbulwile ndolome ya ishe ngwendi: “Natulekele ngwendi bidonki banabawana laja.” Oloni Saulu kamulekele byendekele Samwele kutalesa ku bumwene.
17 Co Samwele wasanene banu balikungulwile kuli Yehova ku Mizipa. 18 Co walekele Baisalele ngwendi: “Yehova Njambi ya Isalele ngwendi: ‘Yange njatundisile Isalele mu Ijipiti na kumyamena mu liboko lya baka-Ijipiti na mu liboko lya bumwene bwoshe buje bwakele na kumiyandesa. 19 Oloni lelo munabyana Njambi yeni uje wamyobwele ku byuma byoshe byabibi na ku bukalu bweni bwoshe, co munendeka ngweni: “Embwe, unapande kutwangwila mwene.” Ngeci, imaneni halutwe lwa Yehova kwesekesa na miyati yeni na bikota byeni.’”
20 Samwele walekele miyati yoshe ya Isalele ishwene muyehi, co bangwile muyati wa Benjamini. 21 Ngeci, walekele muyati wa Benjamini ushwene muyehi kwesekesa na binaanga byawo, co bangwile naanga ya Bamatili. Mamaneselelo bangwile Saulu muna Kishi. Oloni mubaile na kumutonda, kubamuwanene. 22 Ngeci, behwile Yehova ngwabo: “Ou munu naija laja ndi?” Yehova wabakumbulwile ngwendi: “Uje nabanda muje mu bitenga.” 23 Ngeci bashatukile na kukamwambatamo. Mwemanene hakati ka banu, watubakanene banu boshe. Bamupwisilile ha bitsili. 24 Samwele walekele banu boshe ngwendi: “Munamumono ou yanangula Yehova? Mwamono ngweni naumo wahi nalifu nendi hakati ka banu boshe ndi?” Co banu boshe bashangumukile kutambeka ngwabo: “Mwene ayoye myaka yaingi!”
25 Samwele walekele banu byuma binapande bimyene, co wabisonekele mu libulu na kubyaka halutwe lwa Yehova. Co Samwele walekele banu boshe balishandoke, co munu na munu welukile ku njibo yendi. 26 Saulu nendi waile ku njibo yendi mu Gibea, hamo na baka-kulwa baje baashongangeyeye Yehova. 27 Oloni banalume bamo ba kujeneka seho bendekele ngwabo: “Owoni atwobola bati?” Ngeci, bamwombwanesele, co kubamunenelele bwana. Oloni ikeye nabimo byahi byendekele.