Mukanda Wakulibanga wa Samwele
29 Bafilistiya bakungulwile maswalale babo boshe ku Afeki. Baisalele bakebo batungile cilombo cabo kumukulo wa kabwelubwelu mu Jezilele. 2 Co baka-kuyula Bafilistiya bakele na kwita na bibunga byabo bya maswalale 100 na maswalale 1,000, co Devidi na banalume bakele nendi bakele na kwija munima na Akishi. 3 Oloni bamyata ba Bafilistiya bendekele ngwabo: “Aba Bahebelu banezila bika kuno?” Akishi wakumbulwile aba bamyata ba Bafilistiya ngwendi: “Ou ikeye Devidi, ngamba ya Mwene Saulu wa Isalele, uje nakala nange mwaka umo nambe kutubakana. Kunjamuwanene na mulonga woshe-woshe, kushwa litangwa lyatewelele kuli yange kweta na lelo lino.” 4 Oloni bamyata ba Bafilistiya bamulubalelele, co bendekele ngwabo: “Leka ou munalume eluke. Mwecele eluke ku mwela uunamwanene. Keti umutabese kuya netu ku nzita, mangana keti akatutengulukile mu nzita. Mwafwa ngila muka yasa kuzibisilamo shukulu yendi kubwaha ije itubakana kumutwalela mitwe ya maswalale betu? 5 Kuma keti ikeye Devidi ibembile omwo bakele na kukina na kwimba ngwabo:
‘Saulu natsii makulukazi,
Devidi natsii makumi a makulukazi’?”
6 Ngeci, Akishi wasanene Devidi na kumuleka ngwendi: “Njilisinga hali Yehova wa kuyoya ngwange u wa kusungama, co njinashakele ngwange uye na maswalale bange ku nzita, mwafwa kunjakuwanene na mulonga woshe-woshe, kushwa litangwa liwezile kuli yange, kweta na lelo lino. Oloni bamyata kubakukulahelele. 7 Ngeci, iluka mu kwoloka, co keti ulinge cuma coshe-coshe cije cilubalesa bamyata ba Bafilistiya.” 8 Oloni Devidi wehwile Akishi ngwendi: “Bika lalo? Bika binjinalingi? Ngamba yobe unamuwana na mulonga muka kushwa litangwa lyezile kuli yobe kweta na lelo lino? Bika kunjiila nobe na kukalwisa bitozi ba shukulu yange mwene?” 9 Akishi wakumbulwile Devidi ngwendi: “Kuli yangeni unapu wamubwa ngwe kangelo ka Njambi. Oloni bamyata ba Bafilistiya banendeka ngwabo, ‘Keti umutabese kuya netu ku nzita.’ 10 Ngeci, induka mutondo-tondo na bangamba ba shukulu yobe baje banezile nobe. Induka mutondo-tondo na kukatuka, kucikya lika.”
11 Ngeci, Devidi na banalume baje bakele nendi bendukile mutondo-tondo na kwiluka ku lifuti lya Bafilistiya, co Bafilistiya baile ku Jezilele.