Mukanda Wakulibanga wa Samwele
4 Samwele watwaleleleleho kwendeka kuli Baisalele boshe.
Co Baisalele baile na kulwisa Bafilistiya. Batungile cilombo cabo kuyehi na Ebeneza. Bafilistiya bakebo batungile cilombo cabo mu Afeki. 2 Bafilistiya bemanene mu myela yabo mangana balwise Baisalele, oloni nzita kuyendelele mwamubwa Baisalele, co Bafilistiya bahyanene Baisalele. Batsiile banalume ba kweta ku 4,000 omu mu nzita. 3 Maswalale mubelukile ku cilombo, bakulunu ba Isalele bendekele ngwabo: “Yehova natabesela bika Bafilistiya batuhyane lelo? Tuyeni tukambate cikasha ca Yehova ca cikumiiyo mu Shilo mangana cakukale netu na kutwobola mu liboko lya bitozi betu.” 4 Ngeci banu batumine banalume ku Shilo, co bakambatele cikasha ca cikumiiyo ca Yehova wa maswalale, uje natumama ha litanda, helu lya bakerubi. Mubakambatele cikasha ca cikumiiyo ca Njambi wa busunga, bana ba Eli babali ba banalume, Hofini na Finihasi, nabo kubakele.
5 Cikasha ca Yehova ca cikumiiyo mucakobelele lika mu cilombo, Baisalele boshe batambekele manene, co lifuti lyaningangele. 6 Bafilistiya mubazibile ije miyoyo behwile ngwabo: “Mwafwa bika kuli miyoyo ngacije mu cilombo ca Bahebelu?” Mamaneselelo banangukile ngwabo cikasha ca Yehova cinaija muje mu cilombo. 7 Bafilistiya bazibile manene lyoba, mwafwa bendekele ngwabo: “Njambi naija omu mu cilombo.” Ngeci bendekele ngwabo: “Lelo kwetu ngu, mwafwa cuma ca cifweci kanda cilingiweho laja. 8 Lelo kwetu ngu, iya atwobola mu liboko lyou Njambi wakama? Ou Njambi ikeye watsiile baka-Ijipiti ha kubanenela bukalu bwa kuliseza-seza mu mambo. 9 Simpeni ngwe banalume, eni Bafilistiya, mangana keti mupangele Bahebelu ngwe mubanamipangela. Lweni ngwe banalume.” 10 Ngeci Bafilistiya balwile na kuhyana Baisalele, co umo na umo watewelele ku tenti yendi. Babatsiile manene. Maswalale ba Baisalele ba kwenda ha mendi ba kupwa 30,000 batsile. 11 Co lalo bambatele cikasha ca Njambi, co bana ba Eli babali ba banalume, Hofini na Finihasi nabo batsile.
12 Munalume umo wa ku muyati wa Benjamini watewele ku nzita, co wakwetele ku Shilo ha litangwa lije bene na bizalo bya kutabuka, na libu ku mutwe. 13 Uje munalume mwetele, Eli te natumama ha citwamo kumukulo wa ngila oku ali na kukengelela, mwafwa walishoshomwenene manene cikasha ca Njambi wa busunga. Uje munalume waile mu nganda mangana aketese muzimbu, co banu boshe ba mu nganda bashangumukile kulila. 14 Eli mwazibile mbimbi wehwile ngwendi: “Oyo mbimbi ya bika?” Uje munalume wazambwilile kuli Eli na kumuleka owo muzimbu. 15 (Ha simbu oyo, Eli wakele na myaka 98, watuntumwine mesho, oloni kakele na kumona.) 16 Uje munalume walekele Eli ngwendi: “Yange njinatundu ku nzita. Lelo bene njinateweko.” Co Eli wamwihwile ngwendi: “Bika binalingiwa munange?” 17 Muka-kutanga muzimbu wendekele ngwendi: “Baisalele banatewe Bafilistiya, banabahyana manene. Bana bobe ba banalume babali, Hofini na Finihasi nabo banatsi, co cikasha ca Njambi wa busunga naco banacifungulula.”
18 Ou munalume mwendekele lika cikasha ca Njambi wa busunga, Eli wandumukile ha citwamo cendi, wawisile ca nima kumukulo wa cikolo, singo yendi yapokokele, co watsile, mwafwa wakulubalele, co lalo wamene manene. Wakwile Isalele ha myaka 40. 19 Inamweno, munakazi wa Finihasi wakele na cikute, co wakele muyehi na kupapa. Mwazibile ngwabo cikasha ca Njambi wa busunga banacambata, co lalo ishemweno na munalume wendi banatsi, wazibile manene kubabala, co cikute cendi cendukile mu kukasumuna, co wapapele. 20 Mwakele muyehi na kutsa, banakazi baje bemanene kumukulo wendi bendekele ngwabo: “Keti utewe, mwafwa unakiti mwana wa munalume.” Kakumbulwile, co lalo kakeleko mbunge. 21 Oloni walukile uje mwanike wa munalume ngwendi Ikabodi, mwafwa wendekele ngwendi: “Bumpau bunatundu mu Isalele na kuya mu bufunge,” kutalesa ku cikasha ca Njambi wa busunga cibambatele nebi byalingiwile kuli ishemweno na munalume wendi. 22 Wendekele ngwendi: “ Bumpau bunatundu mu Isalele na kuya mu bufunge, mwafwa cikasha ca Njambi wa busunga banacifungulula.”