Mukanda Wakulibanga wa Samwele
8 Samwele mwakulubalele, wangwile bana bendi kupwa maako ba Isalele. 2 Munendi wa ntwatwa wapwile Joele, wamucibali wapwile Abaija, co bapwile maako mu Bele-sheba. 3 Oloni bana bendi kubakabangeyeye mwanja wendi. Bashakele manene kuwana byuma mu linyanyamena, batambwile mazika-kanwa na kwakula mu kuhenga.
4 Mu kwita kwa simbu, bakulunu ba Baisalele boshe balikungulwile hamo na kwija kuli Samwele mu Lama. 5 Bamulekele ngwabo: “Tala! Unakulubala, oloni bana bobe kubesi na kukabangeya mwanja wobe. Ngeci, twangwile mwene mangana atwakule ngwe mwa mafuti akwabo oshe.” 6 Oloni Samwele kabwahelelele mubendekele ngwabo: “Twane mwene mangana atwakule.” Co Samwele walombelele kuli Yehova. 7 Yehova walekele Samwele ngwendi: “Tolilila byoshe bibakuleka aba banu, mwafwa keti yobe ibanabyana. Yange ibanabyana kupwa mwene yabo. 8 Bali na kulinga ngwe mubanalingila kushwa ha litangwa linjabatundisile mu Ijipiti kweta na lelo lino. Bali na kutwalelelaho kunjikengesa nima na kupangela binjambi beka, co bikebyo bibali na kulinga na kuli yobe. 9 Ngeci, batolilile. Nameme ngoco, banangule na nzili. Baleke lisesa lyakala nalyo mwene uje abayula.”
10 Ngeci, Samwele walekele banu baje bezile na kumulomba ngwabo abangwile mwene majwi oshe endekele Yehova. 11 Wabalekele ngwendi: “Eli likelyo lisesa lyakala nalyo mwene uje amiyula: Ambata bana beni ba banalume na kubapwisa baka-kwendesa matemba endi na baka-kulonda tubalu bendi, co bamo bakashatuka kulutwe lwa matemba endi. 12 Co akalyangwila bamyata ba banu 1,000 na bamyata ba banu 50, co beka bakamulimina na kumutejela, na kumupangela bitwa bya nzita na bikwata bya matemba. 13 Bana beni ba bambanda akabapwisa baka-kushingasana mazi,* baka-kuteleka na baka-kwoca makende. 14 Akambata mahya eni amabwa manene a bimbuto bya binona, na mahya eni a bushuka bwa binyu na mahya eni a olive na kuwana bangamba bendi. 15 Akambata mutamba wa bulikumi wa mahya eni a bimbuto bya binona, na mahya eni a bushuka bwa binyu na kuwana bamyata bendi na bangamba bendi. 16 Akambata bangamba beni ba banalume na ba banakazi na bingombe beni bababwa manene na bidonki* beni na kubapangesa bipangi byendi. 17 Akambata mutamba wa bulikumi wa matanga eni, co mukapwa bangamba bendi. 18 Litangwa likaija limukalila mwafwa ya mwene imunalyangwila, oloni Yehova kakamikumbulula ha litangwa olyo.”
19 Nameme ngoco, banu babyanene kutolilila byabalekele Samwele, co bendekele ngwabo: “Embwe, yetu tushaka bene kukala na mwene. 20 Co tulifwa na mafuti akwabo oshe, co mwene yetu atwakula na kututwamenena na kutulwila.” 21 Munima ya kuziba majwi oshe abendekele banu, Samwele wawalekele Yehova. 22 Yehova walekele Samwele ngwendi: “Batolilile na kubangwila mwene mangana abayule.” Co Samwele walekele banalume ba mu Isalele ngwendi: “Umo na umo weni eluke ku nganda yendi.”