Mukanda Wakulibanga wa Samwele
7 Co banalume ba mu Kiliyathi-jealimu bezile na kwambata cikasha ca Yehova na kucitwala mu njibo ya Abinadabu ije yakele ha lilundu, co bajelesele munendi Eliaza mangana anyunge cikasha ca Yehova.
2 Kutunda hacezilile cikasha mu Kiliyathi-jealimu, kwetile simbu yailaha, kwetile myaka 20, co bakunjibo ya Isalele boshe bashangumukile kushakezeka* Yehova. 3 Ngeci, Samwele walekele bakunjibo ya Isalele boshe ngwendi: “Nga mwiluka kuli Yehova na bimbunge byeni byoshe na kutundisa binjambi beka na tumponya ba Ashitolethi mukati keni, na kukundika bimbunge byeni byoshe kuli Yehova na kupangela lika ikeye, co amyamena ku liboko lya Bafilistiya.” 4 Co Baisalele bombilile kuti tumponya ba Bale na ba Ashitolethi na kupangela lika Yehova.
5 Samwele wendekele ngwendi: “Kungulwileni hamo Baisalele boshe ku Mizipa, co njimilombelela kuli Yehova.” 6 Ngeci, balikungulwilile ku Mizipa. Batekwile mema na kuwetila halutwe lwa Yehova, co batwaleleleleho kulyumina byakulya lije litangwa. Co kuje bene bendekele ngwabo: “Tunabiisila Yehova.” Co Samwele wapwile lyaako wa Baisalele mu Mizipa.
7 Bafilistiya mubazibile ngwabo Baisalele banalikungulwila ku Mizipa, baka-kuyula Bafilistiya baile na kulwisa Isalele. Baisalele mubazibile ngoco, bazibilile Bafilistiya lyoba. 8 Co Baisalele balekele Samwele ngwabo: “Keti wecele kutambeka kuli Yehova Njambi yetu mangana atukwase na kutwobola mu liboko lya Bafilistiya.” 9 Ngeci, Samwele wambatele muna manga uje acijamwa na kumwana kupwa bwana bwa kwenyeka bwa mutunu kuli Yehova, co Samwele watambekele kuli Yehova na kulombela Baisalele bukwasi, co Yehova wamukumbulwile. 10 Samwele mwakele na kwana bwana bwa kwenyeka, Bafilistiya bezile na kulwisa Isalele. Ha litangwa olyo, Yehova walumisilile Bafilistiya cililimo cakama, co wabatanganesele. Ngeci Baisalele bahyanene Bafilistiya. 11 Baisalele batundile mu Mizipa, co bashekele Bafilistiya na kubatsiya kuketa na ku mbwela ya Bethi-ka. 12 Co Samwele wambatele limanya na kulishimbika mukati ka Mizipa na Jeshana, co walilukile ngwendi Ebeneza,* mwafwa wendekele ngwendi: “Yehova natukwasa kweta na simbu ino.” 13 Ngeci, Bafilistiya babahyanene, co kubelukile lalo mu mutambela wa Isalele. Liboko lya Yehova lyatwaleleleleho kulwisa Bafilistiya mu matangwa oshe a Samwele. 14 Co lalo Bafilistiya belwisilile Baisalele binganda byabo bibabanyekele, kutunda ku Ekroni kweta ku Gathi, co Baisalele bambatele mutambela wabo ubabanyekele Bafilistiya.
Kwakele lalo kwoloka mukati ka Baisalele na Baamoli.
15 Samwele watwaleleleleho kupwa lyaako wa Baisalele mu kuyoya kwendi kwoshe. 16 Mwaka na mwaka, wakele na kulizenga mu mitambela ya Betheu, Giugali na Mizipa, co wakele na kwakula Baisalele mu mitambela yoshe ei. 17 Oloni wakele na kwiluka ku Lama, mwafwa kukekwo kwakele njibo yendi, co nakwo wakele na kwakula Baisalele. Watungilileko Yehova mutula.